Pos Ma
Rohamuna Unang Hamu Mabiar
1 Rajaraja
19: 9-18
a. Asa boi tangkas antusanta turpuk on jumolo ma
hita manulingkiti latar belakang situasina. Ia latarbelakang ni turpukta on ima
taringot; na maporus panurirang Elia tu halongonan, sadari mardalan daona
marhamaolhon hosana. Maporus panurirang Elia tu halongonan, marbingkas do i
siala pangaleleion ni si Isebel pardihutani raja Ahab, naung diseati (dibunu)
si Elia sude angka paanurirang dewa baal, na sinomba ni si Isebel. Ditahi si
Isebel ma naeng patupahon tu si Elia songon na binahen ni si Elia tu panurirang
ni si Isebel i, i ma mamunu si Elia. Didok si Isebel ma na pinsangon ni
‘debata; ibana molo so bahenonna songon pambahenan ni si Elia i tu angka
panurirang baal naung binununa i. Mambege barita i, mabiar do si Elia huhut
magopu rohana, hehe ma ibana mardalan marhamaol hosana tu halongonan,
marlinggom di hau tadatada, pola dua hali ibana tarpodom di pardalanan. Jala ro
do surusuruan ni Debata laho manopot ibana mangalehon mangan dohot minum ibana.
Dung i borhat ma si Elia mardalan leleng
ni opat pulu ari opat pulu borngin lelengna, sahat ro di dolok Horeb (dolok ni
Debata). Sasintongna, nunga mandele si Elia, jala nunga lomo rohana mate, alai
ndang diloas Debata Jahowa, ala godang dope siulaonna songon naposo ni Debata.
b. Dihilala si Elia na gagal ibana di ulaonna,
ala ndang hot raja Ahab, dirimpu naung donganna, hape ndang, terancam hosana,
ingkon maporus ibana. Dungi sai diperbandingkon si Elia do panurirangionna
dohot angka ompuna na jolo, molo angka ompuna marhasil do didok rohana hape
ibana satonga dalan dope ulaonna nunga adong rasa kegagalan ima ancaman (ay.4b
Nunga i sae ale Jahowa, buat na ma tagonan hosangki, ai apala dumenggan ahu
marroha sian angka daompung). Hinorhon ni naung putus asa jala loja ibana,
mohop ari, hundul ma ibana di toru ni hau tadatada. Dipangido ibana ma asa
dibuat Debata hosa na i asa mate ibana. Tung magopu (putus asa) do roha ni si Elia
ala diida ibana hajahaton di Israel, raja na pe jahat, marmatean angka
panurirang, ngoluna pe terancam dibahen si Isebel. Dihilala ibana do
kegagalanna, na so pola dumenggan ibana sian angka ompuna. Dihilala ibana na so
adong perobahan hinorhon ni pangulaonna, ai sai mulahulak pangalaho ni bangso i
dao sian Debata. Alai molo tajaha na pinatupa ni si Elia na sangat luar biasa,
boi do dohonon ndada pola mabiar be ibana di ancaman na ro sian si Isebel. Ai
ndada gumogo si Isebel sian angka panurirang baalna i, haru panurirang baal 450
nunga ditaluhon si Elia. Alai ala hinorhon ni godang parungkion i, boi masa do
gabe moru nang parsaoran ni si Elia tu Debata, lam moru panandaonna dohot
haporseaonna tu Tuhan i. Jala laos ala ni putus asa, dipangido ibana ma asa
mate ibana. Ai diida ibana ancaman i lam leleng lam rosu. Ala ni ancaman i ma
na gabe umbalga di rohana asa sian Debata. Ala ni i dipangkulingi Debata ma
ibana marhitehite surusuruan laos dilehon di sipanganon dohot siinumonna, pola
dua hali ibana dihehei jala diarahon asa mangan ala ni lojana, jala dao dope
sidalananna.
c.
Mardalan ma si Elia opat pulu ari opat pulu
borngin, sahat ro didolok Horeb (dolok ni Debata). Dolok Horeb ima dolok Sinai.
Molo mamereng daona sian Beer-Seba (Bersyeba) tu Horeb na marjarak +300
sahat tu 400 Km daona, ndada pola ingkon opat pulu ari opat pulu borngin, alai
tontu do ndang mardalan torus si Elia sipata mangulon do ibana. Ido umbahen boi
dohonon ia dolok ni Debata na ginoaranna dison i ma dolok Sinai manang Horeb
(inganan ni si Musa manghatai dohot Debata ditongatonga ni ramba na so olo suda
ramba i dipangan api; ptds. 2 Musa 3:2; dohot inganan pangalehonon ni patik na
sampulu i; ptds. 5 Musa 4-5). Molo taparrohahon sikap ni si Elia nunga mago
haporseaonna tu Debata, gabe gumogo do sikap ‘psikologisna’ ni hajlmaonna ala
sian sudut sosiologia naung terancam do ngoluna jala mabiar dibunu. Ndang
tarida be sikap teologis manang haporseaon naung hea dipatuduhon ibana mangalo
panurirang baal. Na tumagon didok rohana ndang mangulahon ulaonna be jala
martabuni di dolok Horeb ido umbahen disungkun Debata ibana pola dua hali: “Aha
do na niulam dison, ale Elia?” (ay.9,13). Ndang diakui ibana hagaleonna,
baliksa sai hira manalahon Debata do ibana di pandohanna: “Marmurukmuruk situtu do ahu nian humongkop ulaon ni Jahowa, Debata
Zebaot, ai nunga ditadingkon halak Israel parjanjianmu, nunga maloha angka
langgatanmu, jala nunga dibunu angka panurirangmu marhite sian podang, sasada
ahu na ma tading, dohot hosangki dope dilului nasida naeng buatonna”
(ay.10,14). Dua hali ma doshon alusna tu adopan ni Debata, sai hira ndang dohot
Debata mangurupi Ibana. Adong dua kondisi na mambahen si Elia Lari tu dolok
Horeb: Naparjolo; nunga mansai loja situtu pangkilalaanna, dungkon mangalo
dohot maneat angka panurirang Baal di Gunung Karmel jala mabiar ala
pangaleleion ni halak si Isebel asa songon i daona lari ibana tu dolok Horeb. Napaduahon:
Mangasii dirina sandiri (putus asa) do si Elia, Molo nunga di titik kulminasi halojaon
ni sasahalak boi do ndang tingkos be na nidokna, laos tarida do di sikap ni si
Elia naung ‘maporus haporseaonna sian Debata’ (krisis rohani-iman). Sian na
masa i tontu loja do ibana ala ni pangaleleion i jala holan sahalakna do, tontu
disi ro do roha na mandele. Adong fakta na maralo sian alus ni Si Elia tu
Debata: a) Dipingkiri ibana na holan sahalakna sandiri do panurirang na
marjuang tu bangsona, hape nian adong dope 100 halak panurirang natinabunihon
ni si Obaja ( 1 Raja 18: 4). b) Debata do na mangalehon ibana mangan dohot
minum ditoru ni hau tadatada i asa mulak gogona pola boi ibana mardalan pat
opat pulu ari opat pulu borngin tu dolok Horeb. c) Ndang sude halak Israel
manadingkon Debata, adong dope si Obaja dohot halak Israel na manaksihon ulaon
ni si Elia (18:3; 38-39). Dipaboa do na putus asa si Elia umbahen dijalo asa
mate hosana (ay.4), alai ndada lomo ni si Elia na saut alai lomo ni roha ni
Debata na ingkon saut, dipahehe Debata do semangat ni si Elia sian panjouonNa
na parjolo tu si Elia. Dipasahat Debata do tugas na imbaru tu si Elia laho
mamiahi si Hasael bahen raja gumonggom Ram, Yehu gabe raja di Israel, jala si
Elisa gabe panurirang na manggantihon ibana ( 1 Raja 19: 15-16). Jala lam
dipatangkas Debata visi dohot missi ni
si Elia; adong dope 7000 halak na satia tu Debata (ay.18), jala ima muse na
patuduhon ndang sahalak ni si Elia na marjuang, jala asa mulak semangat nang
gogo ni si Elia marhobas.
d.
Molo naeng marhasil hita mangula angka
ulaonta, ndang adong na mura dalanna, sai adong do hamolon, halangan nang
rintangan na ingkon adopanta. Sai adong nian na mambahen jut rohanta gabe
mabiar mangalangka tu jolo. Na deba jolma jotjot merasa pasif di ngoluna, gabe
so olo maju. Alai molo barani do ibana mangalo hamaolon i, dohot na mangulahon
ulaonna dohot konsisten ima na boi haruar sian pandelean i. Tarlumobi di hita
angka siihuthon Kristus, sai adopanta do angka hamolon hamaolon dipardalanan ni
ngolunta. Jala boi do masa na so saut dibagasan rohanta manang angka kegagalan
di angka ulaonta. Kegagalan yang pernah terjadi dalam hidup kita harus dipahami
sebagai sarana membangun hubungan yang lebih baik lagi dengan Tuhan dan sesama.
Tidak ada keberhasilan tanpa ujian dan kegagalan. Boi do ala pintor mandele so
diboto be manilai angka na masa dihumaliangna songon si Elia i, gabe marsalaan
do na nidokna. Holan sian kaca mata keputus asaan, ndang tepat be angka
penilaian nang pandohanta, ndang dapot rohanta be angka na pinatupa ni Debata
dibagasan ngolunta. Laos songon i do na masa tu angka sisean ni Jesus di tingki
disosak galumbang dohot alogo parau nasida, mansai tahutan do nasida, gok biar,
ndang mampu be nasida mamereng Jesus dohot tangkas ala ni biar ni rohana
dirimpu tondi (bhs Indonesia: hantu). Diuji si Petrus do Jesus i asa dohot
ibana mardalan raphon Jesus diatas ni aek i, alai ala umbalga biar ni rohana tu
habahaba i, gabe otik ma haporseaonna tu Jesus asa gabe madabu ibana (Mat.14:22-33).
Songon topik ni Minggunta: “Pos Ma
Rohamuna Unang Hamu Mabiar”, ima na gabe joujou tu sude hita angka na
porsea. Ndada hea tadingkonon ni Tuhan Jesus hita asal ma porsea hita.
Taparrohahon ma dalan ni Debata mamangkulingi hita sian Barita Na Uli, angka
jamita, angka tangiang, dohot angka na masa di humaliangta. Unang ma pintor
mandele hita alai naeng ma tapasahat tu Tuhan i sude parsorion ni ngolunta. Ai didok
Jesus do di Johannes 16:33 “Asa mardame hamu di bagasan Ahu, umbahen na
huhatahon angka i tu hamu. Haporsuhon do jambarmuna di portibi on; alai pos ma
rohamuna: Nunga talu hubahen portibi on”. Gok biar do nian hita na mangoluon di portibi on, alai unang ma
biar ni roha i na umbalga sian asi ni roha ni Debata, asa umbalga do Debata
sian biar ni rohanta nang sian saluhutna na tau mangatasi angka hamaolon
dipardalanan ni ngolunta, asa ingot ma hita dipandohan ni Apostel Paulus di
Pilippi 4: 13 “Saluhutna do tarpatupa ahu
marhitehite Ibana, na margogoihon ahu!”. (ptds.Pslm.37:5; Joh.15:5;
Rom.8:18) Amen.
