Jamot
di Jorgong ni Sibolis, Hot di Haluaon
1
Musa 2 : 16 – 17 + 3 : 1 – 7
A.
Patujolo
Molo tinaringotan tu
sada halak hasalaan nabinahenna, ndang olo manigor mangokui hasalaanna i.
Dibela do dirina songon na mandok, na so marsala ibana. Molo so dapot dibela
dirina, pinotmatna songon na pametmethon hasalaan i, digeser ma i tu halak na
asing na mempengaruhi ibana mambahen hasalaan i, ndang apala na sian rohana
manang kemauanna hian i. Ianggo angka hasalaanna i. Apala paruhuman ma jotjot
masa na songon i, hombar tu kemampuan ni pembela, keahlianna di soal hukum, na
boi do tutu malua parsala i, bebas sian tuduhan dohot tuntutan hukum ibana.
Alai ianggo di jolo ni Debata, ndang marlangku pembela (advokaatI laho
mangondingi nasa parsala, ai tangkas do dibereng Ibana manang songon dia ma
pangulaon ni jolma i, ndang adong na onding sian jolona. Dijamita sadario on
manungguli rohanta marningot hajajadi ni dosa ni portibi on; antong tapaihutihut ma asa lam
margogo hita mangalo dosa dohot jorgong ni sibolis.
B.
Hatorangan
1.
Ditompa Debata do hau na di parsitongaan ni
porlak Eden i ma bagian sian sude na tinompa ni Debata. Alai boasa dibahen
ditonga ni porlak i ? ima asa adong pamiliton di si Adam dohot si Hawa; unduk
do di Hata ni Debata manang ndang. Boi do marlomo ni roha nasida di porlak i,
alai hau na di parsitongaan ni porlak i, ndang jadi panganonna, ai molo
panganonnasida i gabe tu hamatean do ujungna. Molo so dilehon Debata tu nasida
parenta i laho mamillit, sai hira robot do nasida na holan mangulahon na naung
di aturhon. Ditompa Debata do jolma i asa boi mambuat haputusan ingkon adong
pilihan di nasida. Sasintongna ndang adong na jat sian hau i manang sian
parbuena. Manang dai na pe ndada na manghorhon tu si Adam manang si Hawa
parbinotoan na mansai bidang. Alai pangalaosion na i do na mamuhai mata ni si
Adam dohot si Hawa gabe tu na jat; ima DOSA. Dosa i ma pangalaosionnasida tu
Debata na mamboan dosa dohot hajahaton tu portibi on. Mangan parbue ni hau i
gabe sada pangalaho na mangalaosi Debata; dungkon i ma asa tau nasida i na jat
(1 Musa 3 : 6-7).
2.
Sibolis do mula ni dosa i, ai sian mulana ibana
mardosa. Ndang adong roha na denggan manang holong dibagasan ibana, holan
rohamangago. Ala ni i do dung didabu sibolis i sian ginjang tu tano on
(Luk.10:18) dilului do manang na ise na naeng agoona. Parjolo do ulok i
dimasuki sibolis i, ala ibana umbisuk sian sude na manggulmit di ladang. Dung i
disuru ma ibana paoto otohon si Hawa na di porlak Eden i. Ulok i do na ummuli
jala na sumolhot tu jolma, ndang masihabiaran. Boi do marsaor jolma dohot sude
angka pahanpahanan. Si Adam do na mambahen goar nasida sude. Olo do dijou si
Adam ro tu jolona sude. Ulok i paoto otohon si Hawa, didok tu si Hawa: “Ndang
tutu hamu mate, Ai diboto Debata do, sadari dipangan hamu sian i, tonggor ma
matamuna, gabe doshon Debata hamu umboto na denggan dohot na roa. Dung i
dipanotnoti boruboru i ma parbue i dibahen denggan panganon jala pia matana
marnida, jala tau manunggul roha tu hapistaran hau i, jadi diputikhon sian
parbuena jala dipangan. Hata na tabo jala lambok do do didok sibolis tu si Hawa
i. Sibolis i do na paoto otohon, songon goarna i do rohana dohot pangalahona.
Sibolis lapatanna pamolamola, panggargari, marharoroan sian hata Diabolos;
setan; satanis; mangalo. Tung so lomo do rohana jolma i marsaor dohot Debata.
Sogo rohana mida sonangna i jolma di Porlak Eden marsaor dohot Debata.
Dibolabola, digargari parsaoran i. Pangalaho na songon i dipangke sibolis do
sahat tu sadari on mangela jolma mambahen dosa. Dipatuduhon do songon na sonang
do angka namangulahon dosa i, mamora do angka panangko, penipu, koruptor dohot
angka parjahat i, ndang dipaboa manang aha masa dibalik ni i. Sonang do
perasaan ni angka na mangisap ganja, morphin, minumminum alkohol, pergaulan
bebas ni angka naposo na mambahen lomolomo ni roha daging i. Hape anggo naroko
dibalik na i diondingi do. Tapatinggil ma sipareon partondion i, tapatonggor ma
simalolong parbagasan ni rohanta i, asa taantusi jala tatanda soara ni sibolis
na mangela hita tu dosa. Pajonok hamu ma tu Debata, alo hamu sibolis i dung i
maporus ma ibana sian hamu (Jak.4:7-8).
3.
Pangantusion ni dosa, ima pangalaosion. Haroroan
ni dosa sian diri niba sandiri do i; boi do i sian pamerengan, pangkilalaan,
parbinegean dohot ala ni sala pamangke ni pamatang ni jolma i gabe gait. Di
tingki ro ulok i mangunjuni si Hawa; diida si Hawa jala dipanotnoti
simalolongna do p arbue ni hau i, lam adong panghhilalaan di ibana di hinatabi
ni parbue i panganon ( tudos do tu Film ‘Lord of The Ring’). Disurdukhon do
tanganna laho mamutikhon, laos dipangan. Molo di BE no 239 ayat 12 mandok “Dirimu do musumuna Dohot dipangago i;Ia
hangoluanmuna I ma Tuhan Jesus i”. Dilehon Debata do tu hita alamat na lima i
(panca indra) laho pangkeonta mangoloi Debata mangulahon na denggan ndada
mangalo Debata. Nuaeng godang ni na jorbut siala ni pamerengon dohot sude
namangoloi hagiot ni pamatang i. I do
alana umbahen na didok Tuhanta, molo targasip ho dibahen matami, pulsikkon jala
bolongkon, ai dumenggan marmata sada ho masuk tu hangoluan, asa marmata dua
bolong tu apinaroko (Mat.8:9). Nang tangan nang pat molo mambahen pargasipan do
i tu diriniba didok do asa digotaphon. BE No.64 : 2 “Aut alusanku Debatangku ra
tung maila au disi; marningot salpu ni rohangku ro di sude ulaonki; Ai dosa do
binaen ni tangan Gok dosa nang rohangku pe; Nang pat nang mata Nang pamangan
Luhut marsala do hape”.
4.
Dungkon
dipangan nasida nadua parbue ni hau na diparsitongaan ni Porlak Eden i, maila
ma nasida, diboto ma na marsaemara do nasida. Gabe disomothon ma bulung ni hau
ara bahen sabukna. Naeng ingotonta
dison, ia marabit pe hita ala ni dosa do i. Asa unang ginjang rohanta molo tung
tapangke parabiton na arga, molo tung na ummura pe unang pola gabe marsak hita,
alai dosanta ma taarsakhon, asa marusaha hita mangalo dosa i, tapangke ma
pangkeanta i mardongan hahormaton, unang ma manait roha ni na marnidasa gabe
mardosa nang dohot rohanta sandiri pe.
C. Sipahusorhusoron
Ø
Sahata do si Adam dohot si Hawa mangalaosi hata ni Debata. Sahadirion do
na dua i, ai sada daging do nasida. Keluarga na pasangap Debata do nian sangkap
ni Debata umbahen dilehon si Hawa i pangurupi bahenangkupna. Tung beha ma roha
ni Debata marnida hasadaon ni keluarga molo gabe pangalo tu hata ni Debata ?
Ala ni i songon halak Kristen hita, sai tapahombar ma ngolu ni keluarganta i tu
lomo ni roha ni Tuhanta. Tahaporseai ma Jesus Kristus i naung mangalehon hosaNa
humophop hita na paluahon hita sian dosa na jorbut i, asa unang tadatdati be
mangulahon dosa i.
Ø
Pamanat di hisap ni pamatang. Boi do buatonta ilustrasi sian Bibel i;
Diida si Agan do barangbarang na uli sian tabantaban di huta Ai, na pinorang ni
Israel i, jala impol matana marnida lumobi baju Babilon, na uli, dohot dua
ratus rupiah dohot ponding sere sada limapulu hati dokdokna, gabe dibuat jala
ditabunihon di toru ni undungundungna. Ala ni pambahenanna i, marhatahuton do
bangso Israel maralohon halak AI. Alai tarboto do ibana panangko, gabe
dipapungu ma sude nasa artana dohot keluargana, dibunu jala ditutung bangso
Israel ma sudena i (Jos.7:1). Dugi sian barita ni si Ahab; mangapian do mata ni
raja Ahab marnioda porlak ni si Nabot, naeng diibana porlak i, jala ndang olo
si Nabot mangalehon, gabe disuru ma si Isebel laho mamunu si Nabot. Dung mate
si Nabot, disoluk raja Ahab ma porlak anggur i. Alai hona toru ni Debata do si
Ahab ala ni pambahenanna i ( 1 Raja 21). Ala ni i boi masa do pangalaho
sisongon i dibagasan ngolunta di portibi on. Asa tapamanat dihisap ni
pamatangta, molo sai tapatujolo jala taoloi pangidon ni pamatang on, apalagi na
maralo tu Hata ni Debata. Unang olo hita dielaela sibolis pangago i. Alo ma
sibolis i dohot gogo ni Tondi Parbadia i (2 Tim.3 : 1 – 4).
Ø
Malo do sibolis i laho mangelaela hita. Diela do hita jala diunjuni
marhite parbinotoanta sian Hata ni Debata. Boasa si hawa jumolo diunjuni
sibolis i jala ndang si Adam? Ala si Adam do na jumolo tangkas mambege Hata ni
Debata i; tontu umbagas do parenta i di si Adam asa sian si Hawa. Jadi nunga
diboto sibolis ima ulok i ise do na
unjunonna; ima si Hawa toho do ibana naung memboto Hata ni Debata i ? Pangalaho
sisongon on do dipamasa sibolis i tu Jesus; laho mamereng sadia bagas do
parbinotoan ni Jesus taringot tu diriNa sandiri: molo sintong Jesus i Anak ni
Debata boi do paubaonNa batu i gabe roti (Mat.4:3). Alai ndang dioloi Jesus
tung boi pe Ibana patupahon i. Nunga ditanda Jesus diriNa sandiri. Ala ni i
angka teolog mandok mansai ringkot do parbinotoan, jala adong do tolu sian
haporseaon siingotonta:
a.
Notitia
(parbinotoan) taringot tu na hinaporseaonna
b.
Assensus
(manolopi) manang satolop taringot tu nahinaporseaonna
c.
Fiducia
(haoloon) manang na mangoloi dohot manghaporseai ngoluna tuna hinaporseaonna.
Ala ni ima sada sian impola ni
haporseaon i ma “parbinotoan”. Boha do hita manolopi manang mamelehon diri asa
mangoloi tu sada oknum, molo so tau hita aha do na tatolopi manang na taoloi ?
mansai ringkot do parbinotoan i. Alai dipartingkian nuaeng on na deba halak
Kristen i ndnag pola mangharingkothon parbinotoan ia so holan na pengalaman
manang mujizat sambing. (Matius 22 : 37 Jadi didok Jesus ma: Sihaholonganmu do
Tuhan Debatam sian nasa ateatem, sian nasa hosam dohot sian nasa roham!) molo
nunga sian nasa roha (hata Indonesia: akal budi) dohot do parbinotoan i
pangkeon laho manghobasi Tuhan i. Dibagasan haporseaon adong do parbinotoan ima
marbinoto di hasintongan; parbinotoan di hamuliaon ni Debata; adong ma tolu
turpuk na mangondolhonsa:
v 1 Timoteus 1:13 “Panginsahi do ahu
najolo jala pangalele jala siulahon gogo; alai dapotan asi ni roha do ahu, ai
ndang huboto na huula i, tagan so porsea i dope ahu.”
v 2 Korint 4:6 “Ai Debata, na mandokkon
marsinondang hatiuron i sian haholomon i, Ibana do patiurhon rohanami, pabinsar
parbinotoan di sangap ni Debata, na di bagasan bohi ni Kristus i.”
v Heber 10 : 26 “Ai anggo tatuntun
mardosa, dung jolo tajalo parbinotoan di hasintongan i, ndang adong be dapot
pelean pasaehon dosa.”
Molo nunga tabege Hata ni Debata sian angka parjamita nang
sian na tajaha sandiri nunga marsiajar hita disi asa parbinoto di hasintongan
taringot tu hamuliaon ni Debata, molo so songon i jeheon ni sibolis i ma hita
asa tarunjun hita. I do umbahen di sosoi Ap.Petrus di 2 Petrus 1 : 5 “Dibahen i, haringgashon hamu
ma sian nasa gogo, manurdukkon denggan ni parange di bagasan haporseaon i, dung
i habisuhon ma di bagasan parange na denggan”
Ø
Unang marpangunsandean tu pingkiran sandiri: Pangalaho
ni si Hawa dohot si Adam mangadopi pangunjunan ni sibolis i, sai
marpangunsandean tu panghilalan ni rohana dohot pingkiranna, jala di sahat tu
tingki on nunga lam tamba jolma na manghilala na ummalo do ibana, jala nunga
godangan jolma na patujolohon pingkiranna, gogona, nang na adong diibana.
Kesombongan diri merajalela; menyombongkan kepintaran, kekuatan, pengetahuannya
sendiri. Hape di Poda Raja salomo 3:5 didok: “Marhaposan tu Jahowa ma ho sian
nasa roham, jala unang marpangunsandean ho tu pingkiranmu sandiri”. Molo ro na
maol i manang mara manang pangunjunan i unang ma tapangasahon pingkiranta, gogo
nang malomalonta; alai tapasahat ma tu Debata na marnampunahon bisuk nang
hagogoon i.
Ø
Minggunta sadarion ima minggu Invocavit na marlapatan:
Jouonna ma ahu, jadi alusanhu ma Ibana (Psalm 91: 15a). Angka na porsea ima
siihuthon Jesus Krsitus i nunga tarjou tu haluaon na saleleng ni lelengna ndada
tu hamagoan na saleleng ni lelengna. Ia si Adam na parjolo i nunga mamboan hita
tu hamagoan ala ni dosa teanteanan i, alai nunga ro Adam na paduahon i ma Jesus Kristus i laho
paluahon hita sian jorgong ni sibolis i (Rom 5 : 12 Dibahen i, songon na bongot
dosa i tu portibi on marhite sian sada halak jala marhitehite dosa i ro
hamatean, songon i sahat hamatean i tu saluhut jolma, ala sude nasida mardosa. 18
Asa songon marhite sian pangalaosion ni na sahalak lalu uhum hamagoan tu
saluhut jolma, songon i do marhite sian na Sada na mamintori sahat hatigoran
hangoluan tu saluhut jolma). Ala ni i Hot ma hita di Haluaon ni Debata
marhitehite Jesus Kristus i, unang olo hita munggilunggil, tatiop ma tumpalta i
asa unang adong na mambuat. Jakobus 1 : 12 “Martua do halak na manaon di
pangunjunan i: Ai dung tau ibana, jaloonna ma tumpal hangoluan, naung
diparbagabaga tu angka na holong roha di Ibana”.
