Bahan Jamita Epistel Minggu Invocavit, 9 Maret 2014

Hot Di Haluaon ni Kristus

Rom 5 : 12 – 19

       A.      Patujolo

Ia turpuk on naeng patoranghon pangalaho, manang pambahenan dohot bangko na denggan, na sintong jala bonar. Angka i ma na ginoaran parbue ni hatigoran. I ma na gabe hatigoran di ngolu ni halak Kristen, na haruar sian haporseaonna tu Tuhan Jesus Kristus. Parbue ni hatigoran i ma ulaon na denggan di jolo ni Debata dohot dijolo ni dongan jolma. Isarana, manghaholongi Debata, marsihohot manghaporseaon tu Ibana jala manghaholongi donganna jolma dohot marpangalaho na hombar tu lomo ni roha ni Debata di ngolu siganup ari. Alana nunga jumolo hita dihaholongi jala dihophop Debata, i ma dibagasan holong doht panghophopon ni Tuhan Jesus Kristus. Asa tiruan do i, na binahen ni Debata tu hita jolma, na gabe siulahonon jala siparbuehonon di ngolu siganup ari. Lapatanna , molo olo Debata manghaholongi jala humonghop hita jolma, suang songoni ma nang hita maradophon Debata nang maradophon dongan jolma. Ingkon mian dibagasan haholongon na sian Jesus Kristus ma hita. Tarpatupa hita do i saleleng marsihohot hita manghaporseai Ibana. Ai sian haporseaon tu Tuhan Jesus do tubu parbue ni hatigoran i.

      B.      Hatorangan

      1.       Ayat 12; Panghorhon ni dosa ni si Adam: sude jolma gabe mardosa (dosa teanteanan; dosa warisan; Ayat 12,19). Di tingki si Adam mardosa, ndang adong dope jolma asing ni si Hawa di tingki i. Alai dibereng Debata do si Adam songon jolma na mewakili sude jolma, ido umbahen di tingki mardosa si Adam, sude do jolma i gabe mardosa. Jala mansai marasing situtu do tu parugamo silom na mandok; tubu dibagasan habadiaon do ia jolma i. Di haporseaonta mangajarhon hadadabu ni si Adam manghorhon sude jolma tubu dibagasan dosa, on ma na jotjot ginoaran ‘dosa asal’ manang  (hata Inggris; original sin) (jaha; Job 25: 4; Pslm.51:7; 58:4). Hita dibagasan Adam songon bulungbulung na di hau i. martumbur do angka bulung i sian hau i. Hita jolma ma bulungbulung i, jala hau i ima si Adam. Songon pepatah Indonesia mandok: ‘satu makan cempedak, semua kena getahnya’. Jala tudos do i tu pertandingan olah raga, molo ganup negara adong do perwakilan di tiap pertandingan olah raga olimpiade. Jala termasuk do perwakilan sian negaranta Indonesia, molo talu do perwakilanta i, mandok talu do negaranta di pertandingan i. Songon i do si Adam na gabe perwakilanta sude jolma, naung madabu tu dosa laos hita pe dos dohot ibana madabu tu bagasan dosa. Adam telah menularkan dosa tu hita jolma. 1 Korint 15:22 Ai songon na di bagasan Adam saluhut mate, songon i di bagasan Kristus sude dipangolu.

      2.       Ayat 13 – 14; Dialusi si Paulus do sungkunsungkun na boi  tubu hinorhon ni pandohanna di ay.12. I ma ia hamatean i ima upa tinuhor ni dosa naung masuk tu portibi on siala sude jolma nunga mardosa, boasa hamatean i sahat tu angka na mardosa andorang so ro patik i ? Sungkunsungkun on marharoroan sian haporseaon na tarsurat di buku apokaliptik  ni halak Jahudi, ima na mandok pangalaho ni angka jolma tarsurat do i di buku na badia, ja diungkap do i di panguhuman na parpudi ( Daniel 7 : 10). Alai, na tarsurat i marlangsu do holan tu na mangalaosi patik i. Tudos do i songon di negaranta molo so adong paraturan ndang boi pinadalan uhuman. Nuaeng tubu ma muse sungkunsungkun; boasa hona uhum  jolma i nang pe so ditanda dope patik i? Alus ni Apostel Paulus marbingkas sian ‘pangalaosion’ dohot ‘dosa’. Nunga dilaosi si Adam parenta ni Debata ( 1 Musa 2:17; 3:1). Laos songon i do na tarsurat di Rom 2: 23 ‘pangalaosion’ dipahombar tu patik. I do umbahen didok si Paulus di Rom 4 : 15 “Ai dihorhon patik i do rimas; alai anggo soada patik, laos so adong do pangalaosion”. Pangalaosion i, ima pangalaho na niulahon dohot sadar, na maralo dohot sangkap ni Debata naung tangkas. Alai ‘dosa’ na nidok di ayat 13 ndang mangacu tu pangalaho ni jolma i, alai huaso na manahan jolma i (Rom 3:9). Na tangkas dosa nunga adong andorang so ro patik i, alai hamatean do upa ni dosa tarmasuk; sahat do sian jaman ni si Adam tu si Musa. Sian turpuk on naeng do paingotonna angka hasalaan ni halak na manengahon patik, ima angka halak Jahudi hatiha i. (Rom 3: 9 “Ai ndang dapotan hatigoran jolma nanggo sada di adopan ni Debata, anggo sian na mangulahon patik i. Ai dihorhon patik i do panandaon di dosa”). Naeng dohonon Apostel Paulus na so mandapot patik i pe tong do mardosa. ( Johannes 8:34 Dung i didok Jesus ma mangalusi: Na tutu situtu do na hudok on tu hamu: Hatoban ni dosa do ganup na mangula dosa). Molo didok “sumansuman na naeng ro i” martudutudu tu Jesus Kristus, na rap mempengaruhi do si Adam dohot Jesus Kristus tu jolma.

    3.       Ayat 15 – 19: di turpuk on dipatorang si Paulus do parasingan sian si Adam dohot Kristus, laho pajamothon sala pangantusion di tudosanna (bnd. Ay.14 b sumansuman ni na naeng ro i) jala di patorang do i di ayat 18 hadosanna. Parasingan si Adam dohot Kristus, ima marhite pambahenanna ganup jala pangkorhonna tu jolma. Molo pambahenan ni si Adam ima pangalaosion; manubuhon dosa na parjolo di Firdaus – hamatean na mampangkorhon tu sude manisia (ay.12-14). Alai sabalikna; pambahenan ni Kristus ima patuduhon asi ni roha ni Debata tu manisia manubuhon hangoluan na salelngnilelengna. Dosa ni si Adam sai hira dalan na tu toru do i berengonta, mansai mura do molo dalan tu toru. Alai ro ma Kristus laho tu toru ni dosa dibagasan hajolmaonNa sahat tu hau pinarsilang, mansai rahis ajala maol do mandalani sahat tu ginjang ni hasangapon ni Debata (ptds. BE. No.242 : “Rahis jala maol tutu Dalan tu banuaginjang”). Ditaluhon ma dosa dohot hamatean i marhite haheheonNa. Parasingan ni si Adam dohot Kristus boi do bahenonta gombaranna sian parngoluonta siganup ari; mansai mura do manegai naung denggan, molo nunga sega mansai maol do paturehon, mansai mura do manegai keramik sian na paturehon, dna.  Muraando manegai parsaoran sian paturehonsa. Si Adam na olo dielaela sibolis gabe olo manegai parsaoranna dohot Debata, alai ro ma Kristus laho padomuhon parsaoran ni jolma i dohot Debata asa denggan.

C. Sipahusorhusoron

     1.       Ndang mardia imbar hita naporsea dohot na so porsea, rap madabu tubagasan dosa do. Ala ni i do ringkot ni panjouon ni haporseaonta laho manjangkhon Kristus i gabe sipalua hita jolma. Ndang adong sada sian hita na malua sian na mangulahon patik nang angka ulaon na denggan. Alai ala asi ni roha ni Debata sambing do marhitehite AnakNa Jesus Kristus. (Gal. 2: 16 Alai on do huboto hami: Sian haporseaon di Jesus Kristus sambing do dapotan hapintoron jolma, ndada sian ulaon patik. Dibahen i, nang hami gabe porsea di Kristus Jesus i, asa dipintori hami, sian haporseaon di Kristus i, ndada sian ulaon patik: Ai ndang dapotan hapintoron nasa na mardaging, anggo sian ulaon patik) Galatia 2 : 21 “Ndang hubolongkon asi ni roha ni Debata; ai aut adong hatigoran marhite sian patik i, magopo ma hamamate ni Kristus i.”

      2.       Poda naniondolhon Martin Luther hombar tu na tarsurat di Rom 3: 23-24, hapintoron ni Debata dohot asi ni rohaNa do mamintori hita jolma. Lam tangkas do tajalo asi ni roha ni Debata i, ai dipatubu haporseaon na mangolu di hita laho manghaporseai Ibana sian dirina sandiri. Alai na dijou Tondi Parbadia i do hita manghaporseai Ibana. “Asa on do dijujur rohanta: Haporseaon i do mamintori jolma, ndada na mangulahon patik”(Rom 3: 28). On ma ojahan ni pandohan ni si Martin Luther, mandok Sola Fide – holan marhite haporseaon dipintori jolma i. Asa bagas do panghorhon ni panghophopon ni Jesus Kristus tu hita. Ndada holan na dipintori hita, alai huhut do di parbadiai dohot dipatau. Lapatanna, ndang halak na badia hita, alai gabe halak na pinarbadiaan do hita marhitehite mudar dohot daging ni Kristus na diseahon humophop hita jolma. Hataridaan ni i do natajalo marhite parpadanan na badia i. Ndang halakna tau hita, alai gabe dipatau ma hita marhite panghophopon dohot panobusion na pinatupa  ni Jesus Kristus i. I ma hinaarga ni panobusion marhite panghophoponNa i.

      3.       Jamot di jorgong ni sibolis, hot dihaluaon. Molo tangkas taparrohahon unok ni jamita epistel di minggu na salpu asa hehe jala unang mabiar bangso Israel, ingkon idaonna do hamuliaon ni Debata Jahowa maniaphon halak Misir i. Bahen hasangapon ni Debatanta do molo tahaburjuhon paraloan haporseaon i, i ma hasangapon ni Tuhan ni nasa na asong di portibi on. Ai nunga pola disuru Debata AnakNa na sasada i ro tu portibi on, marsitaonon Ibana, durus mudarNa, mate tarsilang Ibana, bahen hangoluan di angka na porsea. I ma holong ni roha ni Debata na so halompoan i (Joh.3:16), asa tama ma tapasangap Ibana tongtong. Dibagasan Kristus do nunga digohi saluhutna hangoluan tu nasa na tinompa ni Debata. Ai songon na didok : “Laos marhite sian Ibana do padengganonna tu dirina saluhutna i, nang angka na di tano, nang angka na di banuaginjang, dung dipatupa dame marhitehite mudar na sian silangna i, marhitehite Ibana.” (Kolosse 1 : 20). Na tarjou do hita saluhutna halak Kristen tu paraloan haporseaon i, i ma dibagasan pandonganion ni Tuhanta i mangalo nasa na jat dohot pamanat jorgong ni sibolis, jala naeng ma sai mangasahon gogo, na sian Tuhanta i patupahon nasa na denggan. Sai jounta ma Tuhanta i asa malua hita sian jorgong ni sibolis na manegai parsaoranta dohot Debata, marsihohot ma hita dihaporseaonta di Ibana asa songon goar ni minggunta Minggu Invocavit : Jouonna ma Ahu, jadi alusanKu ma ibana. Amen!

Bahan Jamita Evangelium Minggu Estomihi, 2 Maret 2014

Hehe ma hamu, Unang ma mabiar

Mateus 17 : 1 – 9

      A.      Patujolo

Marragam do dalan dibahen Jesus pataridahon huhut papatarhon haDebataonNa tu jolma. Ai ndang boi holan marhite hata paboaon ni Jesus ha-DebataonNa tu hita jolma. Marhite sude nagka tanda halongangan dipatarida Jesus ha-Debataonna. Ai boi dipangolu Ibana naung mate, mardlan dibahen Ibana angka na pangpang, marnida angka na mapitung, disesa Ibana dosa ni torop halak. Sai dipatihi Ibana angka siseanna mandok “unang hatahon hamu i tu halak na asing”. Ima dalan ni Jesus papatarhon ha-DebataonNa. Nuaeng marhite turpuk on, secara khusus naeng pataridahonon ni Jesus ha-Debataonna tu siseanna na tolu i (Petrus, Jakobus, Johannes), marhite na masa di atas dolok; Jesus marsangap patar tandaon ni sisean i, ia Jesus ndada jolma biasa, alai Debata sipanompa i do Ibana na gabe jolma. Mandalani saminggu dung disungkun Tuhan Jesus angka siseanNa; “Manang ise do Ibana didok halak dohot  pandoknasida, i ma  di dalan sian Kapernaum tu luat Kaesarea Pilippi. Pilippi i ma kota na pinajongjong ni Raja Herodes Pilippi di abad 2-3sM, kota na ginoaran ni Agrippa II “Neronias” (penghargaan tu Kesar Nero), jala na margoar Panias (Banias di mulana), inganan parsombaon di debata Pan ni halak Siria (Mat.17:1-13). Asa ndada Kaesarea pelabuhan na balga, na di topi ni laut tengah, na pinabalga ni raja Herodes Agung di taon 20 – 9 sM na nidokna inganan ni na masa on; ai adong do dua na margoar Kaesarea, sada ma i di topi laut, na sada on ditoru ni dolok Hermon na di luat Libanon, ima daerah pegunungan Siria tengah.

Onom ari dung dihatindanghon si Petrus Tuhan Jesus “Anak ni Debata na mangolu”, jala didok si Lukas 8 ari dung salpu disungkun Tuhan i angka sisean-Na i; ditogihon ma si Petrus, Jakobus dohot anggina si Johannes laho tu dolok Hermon (dolok nabadia) + 2.750 M (Mat.16-16-17; 17:1; Luk.9:28-36; Mark.9:2-9). Alai tinggal di kota Kaesarea Pilippi (Banias do anggo sisean na sia halak nari.

      B.      Hatorangan

1.    Nunga mandalani ualu ari Tuhan Jesus rap dohot angka siseanNa mardalan sian Kapernamum laho tu Kaesarea Pilippi (Banias/Neronias). Alai holan tolu halak do siseanNa i diarahaon  tu dolok Hermon ( na badia i), sada dolok tunggal na timbo jala lungun ala ni ngalina ( 2.750 M) sian permukaan laut; i ma si Petrus, Jakkobus, dohot si Johannes haholongan i, songon si Musa na mamboan donganna si 3 halak uju i tu dolok Sinai (2 Musa 14 : 1). Boasa ingkon tolu halak huroha diboan Tuhan Jesus donganNa, ndang sude si sampuludua halak i, asa tumorop nian jala rumibur nasida. Di sude pambahenan ni Tuhanta mansai arga situtu do lapatanna atik pe so pintor diantusi angka siseanNa uju i nang hita angka na porsea di tingki on. Ai panindangion ni tolu halak ndang targugat (tarsoadahon) manang na ise be i, na manudu tu bilangan ni Debata sandiri do bilangan ni tolu i (Mat.28:19).

2.    Torop do dolok na punjung (tunggal) di luat Palestina  nian, songon dolok Ebal, Gerizim, Karmel, Moria, Nebo, Zaitun, Tabor, Dolok Sion, Hermon, asing di Dolok Horeb, Sinai, Piagah di Nebo; alai dipillit Tuhan Jesus do dolok Hermon na di Libanon – Siria na mansai jarang dibolus (dikunjungi) jolma ala ni ngalina dohot timbona, ninna angka saksi mata (ptds. Jos.20:7; 1 Musa 36:8-9; 19:17-19.; Mat.24:16; Joh.4:20-21).

3.    Dung sahat nasida tu atas dolok i, laho ma Tuhan Jesus tu sada inganan na suhi. Alai muba ma rupa ni Tuhan Jesus  diida sisean na 3 halak i. Marsinondang ma bohiNa songon mata ni ari, mamontar ulosNa songon na tiur. Johannes, Markus mandok: “Marsillam ulosNa, bontar sahali, na so dapot botoon ni panunci di tano on bontar songon i (Mark.9:3). Molo siLukas mandok: “Marlinanglinang ma parabitonNa”. Nang pe borngin na masa i, alai gabe songon arian di parpilngas ni mata ni ari do humaliang nasida. I ma hasangapon ni Tuhan Jesus Kristus, na tininggalhonNa di surgo, mangeahi hita jolma pardosa di tano on, laho paluahon sandok hajolmaon sian rimas ni Debata ala ni dosa i, jala paluahon  hita sian rante ni sibolis, asa mangolu hita di Debata.

4.    Alai disi tarsunggul sisean na tolu halak i, diida nasida ma si Musa dohot si Elias manghatai dohot Tuhan Jesus dibagasan hasangaponNa hian. I ma di parsitongaan ni partaonan logo ni ari taon 29 M (Bulan Mei-Oktober: partaonan las- logo ni ari di Palestina; Bulan Oktober – Nopember : ari parudan, Bulan Desember – Pebruari musim salju).

5.    Disi do ditotophon Jesus panghophoponNa di hita jolma, sidalananNa sampulu bulan nari di Jerusalem, sian Juli 29 M – April 30 M. Didok Tuhan Jesus Kritus tu si Elias dohot si Musa na ro manopot Jesus di atas dolok Hermon i: “Na olo ahu, ale Amang, sian sandok rohangKu. Pasauthon lomo ni rohaM, rohaM sambing do guru”..... (ida BE. 83: 3). On do na hinatindanghon ni Ap.Petrus sahat ro diujung ni ngoluna, na niidana di dolok Hermon i dohot soara na binegena sian ginjang, sian Debata, na mandok: “On do Anak haholonganKu, lomo do rohangKu mida Ibana, tangihon hamu ma Ibana”. Paduahalihon i ma soara ni Debata Jahowa sian banuaginjang dibege sisean i di tingki tardidi Tuhan Jesus di aek Jordan (Mat. 3:17), dohot diatas dolok Hermon (Mat.17:5), atik pe ndang diantusi nasida lapatan ni na niida dohot na binegenasida  di tingki i (Pat.Mark.9:9-10). I do umbahen didok si Petrus tu Tuhan Jesus, hinorhon ni las ni rohana, asa dipajongjong 3 jabu ditas dolok Hermon i: sada di Tuhan Jesus, sada di si Musa, sada di si Elias. Ndang diboto nasid annidokna (Petrus), ai holan spontanitas ni emosi sambing do pandohanna i, ndada sian kesadaran ni haporseaon dohot holong na rimpas dope panindangion ni si Petrus di tingki i. Ai ndada na naeng menetap di portibi on umbahen ro Tuhan Jesus Kristus; manang ringkot sopo bahen inganan hapunjunganNa umbahen diboan nasida tu atas ni dolok Hermon. Ai ndang diantusi sisean na tolu halak i do pe na niidanasida i, atik pe nunga dipatorang Tuhan i tu nasida  di dalan laho  tu Kaesarea Pilippi; na ingkon manaon na porsuk do Ibana bahenon ni angka sintua ni natorop, sintua ni malim, siboto surat pe, sahat tu na mate (Mat.16 : 22; 12:40; Joh.2:19)

6.    Nang pe marholangholang tingki ni si Musa tu tingki ni Tuhan Jesus di portibi on + 1.330 taon ( 5 Musa 34: 7); jala tingki ni si Elias tu tingki ni Tuhan Jesus di portibi on, di tingki i + 900 taon ( 2 Raja.:12); Ia Tuhan Jesus na maruloshon hasangaponNa dohot si Musa dohot si Elias di dolok i, dibereng nasiada na tolu, alai tung so diboto nasida dope, Jesus naung jongjong di holangholang ni dua partingkian na manontuhon ngolu ni nasa hajolmaon manang hamatean ni sandok hajolmaon saleleng ni lelengna tung dibagasan tanganNa sandiri nama anggo nuaeng. Dung pe hehe sian na mate asa tangkas didok Tuhan Jesus tu angka siseanNa: “Nunga sahat tu Ahu nasa huaso na di banua ginjang dohot na di tano on” (Mat.28:18). Ibana do singa ni Juda, naung manjalo “Buku na tarsahap i” jala mangungkap buku dohot mangharhari sahapna na pitu i, na pinatuduhon ni Tuhan Jesus tu sisean haholonganNa di Pulo Patmos 67 taon di pudi ni turpuk on (ida, Pangk.5: 1-14). Diungkap Tuhan Jesus do tutu ganup sahap ni buku i marhite 7 pandohanNa sian hau pinarsilang di Golgata (ida buku Passion-Paskah= Mat.27:32-56; Mark.15:21-41; Luk.23:26-49; Joh.19:17-30)

7.    Marnida sondang na mansai uli, na niuloshon ni Debata tu atas dolok Hermon di tingki panghataion ni Tuhan Jesus dohot si Musa dohot si Elias, dohot sonang ni panghilalaan ni angka sisean na 3 halak on, didapothon si Petrus ma Tuhan Jesus huhut pasahathon usulna naeng pajongjongkhon tolu bagas di inganan i, hape tompu ma ro sada ombun na tiur mangalinggomi nasida. Ndang sadia leleng tarbege ma soara sian bagasan ombun i mandok : “On do Anak haholonganKu, lomo do rohangKu mida Ibana; tangihon hamu ma Ibana”. Umbege hata na marsaringar sian bagasan ombun i, mansai mabiar ma nasida laos manungkap. Alai ndung manaek ombun na tiur i, di parmulak ni si Musa dohot si Elias tu banua ginjang, didapothon Jesus ma siseanNa na hatahutan i huhut dijama mandok: “Hehe ma hamu, unang mabiar”. Disi dibege si Petrus, Jakobus dohot si Johannes soara ni Tuhan Jesus pintor dipadirgak nasida mamereng, hape holan sasada Jesus nama diida nasida disi, ai nunga  mulak si Musa dohot si Elias tu banuaginjang. Dung sidung panghataion ni utusan ni Padan Na Robi dohot utusan ni Padan Na Imbaru di atas dolok Hermon i. Boasa ndang diida sisean na tolu halak i parlaho ni si Musa dohot si Elias maninggalhon nasida di atas dolok Hermon i ? Siala hinorhon ni ombun na tiur i naung manghuphupi nasida. Ombun i ma lambang ni hasangapon ni Debata Jahowa dohot Jesus Kristus (2 Musa 16: 10; 4 Musa 12: 5; 14:10; Psalm.99:7; 104:4).’

     C.      Sipahusorhusoron

 ü  Pengakuan ni Debata tu AnakNa Na Sasada i ndada holan tarbege di Jordan dohot di dolok Hermon 2000 taon naung salpu i, alai nunga tarbege soara i dung dipillit Debata bangsoNa di GoarNa sian mulana ( 6000-4000: 2000 taon naung salpu= ida 1 Musa 12; Psalm.2:7; 89:27-30; 2 Sam 7:14; Jes 42: 1; 49: 1; Mat.3: 17; 17: 5)

 ü  Alai ndada di tingki na robi tarbege soara ni Debata sian Banuaginjang mandok “on do AnakKu, haholongan i, halomoan ni rohangKu do Ibana” alai nunga gabe tumangkas soara i tu sandok hajolmaon dung ro Tondi Parbadia, mandok : “AnakKu do ho, Sadarion do ho Hutubuhon” (Ul.Ap. 13:33; Heb.1:5; 5:5). Tagamon do ulaning sude ruas ni hurianta be mangauhon on tu dirina : “AnakKu do ho, sadari on do ho hutubuhon”, i ma soara sian banua ginjang tu tondinta be, molo naung tutu situtu tau hita gabe Anak dohot boru ni Debata, di hata nang di pambahenanta be ?

 ü  Naeng ma marsangap Jesus i dibagasan ngolu ni angka na porsea marhite na tau mangulahon lomo ni roha ni Debata. Tapasiding ma pangalaho na mangasahon panghilalaanna dohot pingkiranna ia so sian Hata nang patik ni Debata. Na maniop biar ni roha dibagasan ngoluna jotjot do ndang denggan panghilalaanna jala jotjot do dihuphupi holom ni rohanang pingkiran. Panghorhonna gabe madabu tubagasan na mangasahon gogo nang pingkiran dohot panghilalaan songon na tolu sisean ni Jesus i; tung songon na uli pe usul nasida alai ndang apala na ummuli jala na dumenggan diadopan ni Jesus. Ala ni i naeng ma Jesus i tabahen gabe raja dibagasan ngolunta; hasangapon ni Tuhan Jesus i ndada ala ni hita alai ala Ibana do na patamahon hita asa marhasangapon marhite mudar ni Jesus di Dolok Golgata. Ibana naungmate jala hehe sian hamatean marhasangapon laho pamonanghon hita jolma sian dosa nang hamatean i. Ala ni i unang be adong siihuthon Kristus na sai biahaton manang mabiar alai naeng ma hehe partondionna. Jala sude na manghatindanghon hagogoonNa mandok songon na nidok parpsalmen di Psalmen 31: 3b “sai Ho ma gabe dolok batu partanobatoan di ahu, gabe huta na gonting laho pangoluhon ahu”, jala laos topik di minggunta minggu Estomihi. Amen!

Bahan Jamita Epistel Minggu Estomihi, 2 Maret 2014

Hehe ma hamu, Unang  ma Mabiar

2 Musa 14 : 12 – 18

      A.      Patujolo

Ia Buku 2 Musa on digoari do di hata Indonesia ‘Keluaran’, molo di hata Inggris ‘Exodus’; ima manaringoti haluaon ni bangso Israel sian parhatobanan Misir na pinatupa ni Debata marhite naposoNa si Musa. Buku on marisihon 40 bindu na boi sagionta marhite 2 bagian :

1.       Bindu 1 -15 ima taringot tu sori ni ngolu bangso Israel saleleng  400 taon di parhatoban di Misir sahat tu na pinalua Debata nasida marhite naposoNa si Musa. Maringan do bangso Israel di Misir saleleng 430 taon alai ndang saleleng i nasida di parhatoban, siala di tingki ngolu ni si Josep + 80 taon dungkon masuk tu Misir, ndada di parhatoban bangso Israel ( 2 Musa 12 : 40-41). Alai ndungkon  gabe raja ma si Firaun na so mananda si Josep i asa gabe marsingkor bangso Israel. Ndang apala dipaboa secara menditail leleng ni parhatobaon i, dungkon na pinaboa ni Debata tu si Abraham di 1 Musa 15 : 13, ia bangso Israel di parhatoban saleleng 400 taon.

2.       Bindu 16 – 40 ima taringot tu sori ni ngolu ni bangso Israel lobi hurang 40 taon lelengna di parhorsihan Sinai.

Sian parsagina i boi ma idaonta , ia turpukta on masuk do tu horong naparjolo, ima sori ngolu ni bangso Israel na pinaboa dibagasan ni turpuk on sada bagian na metmet sian sori  ngolu na nialaman ni bangso Israel saleleng di parhorsihan Sinai. Boasa ingkon bungkas bangso Israel sian tano Misir ? siala ndang i tano bagabaga manang tano teanteanan di nasida. Halak dagang do nasida saleleng di tano Misir. Boasa pola diloas Debata nasida manaon na porsuk pola sahat 400 taon diparhatoban di tano Misir ? asa anggiat marhite i lam nalnal ditanda nasida Debata na tuk paluahon nasida. Dung i sahat ma hita molo ro sungkunsungkun; Boasa pola 40 taon bangso Israel di parhorsihan Sinai ? Asa anggiat leleng ni  40 taon tartopa nasida di harohaon, rumang ni ngolu dohot haporseaon na hot jala pita holan tu Debata. Taingot ma 40 ari do leleng ni Jesus di halongonan (padang gurun) dungkon tardidi Ibana. Saleleng 40 ari i do Jesus marsaor dohot Debata songon na niulahon ni angka rabbi uju andorang so mangula songon rabbi nasida (guru). Bangso Israel pe nunga tudos na tardidi nasida ( 1 Korint 10:1-2 Ai naeng ma tangkas botoonmuna di rohangku, ale angka dongan: Ia angka amanta najolo, saluhut do nian nilinggoman ni ombun i, jala saluhut do nasida mamostang laut i. Jadi saluhut do nasida tardidi tubagasan si Musa, di bagasan ombun i dohot di laut i.) Jala 40 taon di parhorsihan asa lam jonok tu Debata jala mangantusi dalan nang sangkap ni Debata andorang so sahat nasida tu tano Kanaan.

Nuaeng idaonta nang sangkap haluaon na pinatupa ni Debata tu bangso-Na, bangso Israel:

 ü  Asa bolas do Bangso Israel marsomba tu Debata dohot denggan di parhorsihan i, ala ndang apala bebas bangso i mangulahon parsombaon tu Debata di Misir hombar tu ruhut-ruhut naung disuanthon jala maralo tu hasomalan bangso Misir uju i. Asa dohononta ma, habubungkas ni bangso Israel sian parhatobanon Misir mamboan nasida tu haluaon ni ngolu parugamoon.

 ü  Gabe haluaon sian gomgoman ni bangso Misir. Ia bangso Israel ima bersifat Theokrasi = Theos; Allah, Kratein; pemerintahan (Aallah memerintah; Debata na langsung manguluhon). Ala ni i i ngkon malua do nasida sian gomgoman ni bangso na asing asa boi mardalan dohot denggan pamilliton ni Debata di nasida asa gabe bangso na merdeka nasida (haluaon na bersifat politis).

 ü  Haluaon sian parhatobanon Misir. Molo nunga bangso na pinillit ni Debata, na merdeka, ndang be hatoban be nasida, ala ni i ingkon bungka s do nasida sian parhatobanon Misir. Sangkap ni Debata mamboan bangso Israel haruar sian parhatobanon Misir, i ma asa sumuang nasida tu hajongjongan songon bangso na pinillit ni Debata.   

     B.      Hatorangan

     1.       Ayat 12 : Ndung haruar bangso Israel sian Tano Misir, sahat ma nasida di topi ni Laut Teberau. Sian pudinasida nunga diberengnasida ro Firaun dohot angka paranganna laho mangalele nasida (ay.10-11). Nunga tarhapit situtu nasida, jala ndang mungkin be maju manang mundur , nunga dihapit halongonan i nasida (ay.3). Disi ma ro biar ni roha nasida huhut joujou tu Debata. Molo di situasi na hapit songon jolma hita, disi do maol marpingkir secara positif, laos songon i do na dihilala ni bangso Israel hatiha i; gabe madabu ma nasida tu pangalaho na marungutungut (ptds. Parjamita 7 : 8-9). Didok nasida dengganan di parhatoban halak Misir nasida (ay.11-12). Lupa do nasida ditingki Debata napaluahon nasida sian parhatobanon Misir nunga dipelehon Paskah marhite na maneat anak ni birubiru. Laos hita pe angka na porsea, naeng do ingot hita disi ro na maol i; nunga umborat jala ummaol naniadopan ni Anak ni Debata  (Anak Domba Paskah), na gabe singkatta laho mangadopi na jumorbit ala  ni dosanta i; ima hamatean i.

     2.     Ayat 13 - 14 : Unang hamu mabiar, marsihohot ma rohamuna, jala ida hamu hamuliaon ni Jahowa. Marhite turpuk on dipaingot si Musa do bangso i asa unang manghalupahon Debata, unang gabe hatahuton i n a umbalga di rohana ia so Debata. Umbalga do Debata sian nasa na adong tarmasuk biar ni rohanta i. Jala di dok si Musa “unang mabiar hamu!”, adong pos ni roha; laho pasahathon diri nang ngolu nasida tu adopan ni Debata marhitehite tangiang jala unang marpangunsandean tu pingkiran nang hagogoonta sandiri na somal ala ni so manahan di sitaonon manang angka na masa. (Poda 3:5 Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri). Na niulahon si Musa nunga hombar tu ruhutruhut ni Patik i, molo di Paraturan di tingki p orang sahalak malim ingkon ro tu jolo manghatai tu ruasna ( 5 Musa 20:1-4). Di na mangadopi hamaolon, malim mangarahon ruasna unang mangashon pingkiran nang gogona sandiri, alai naeng ma hibul dipasahat hamaolon i tu adopan ni Debata marhite joujouna di tangiang asa marhagogoon di haporseaon; Debata na marporang humonghop nasida asal ma hohom nasida (ptds. Parjamita 5:1)

Jotjot do hita mangadopi angka na maol dibagasan ngolunta; godang angka na bernit, nang sitaonon, isarana songon ina na holsoan di (santtabi) na naeng partus (Rom 8: 22-23). Na boi ulahononta ima holan na joujou tu Debata jala ihut marhaporseaon dohot marpos ni roha; ndang loason ni Debata hita ditadingkon, lehononNa do pangurupion. Ala ni songon siihuthon Kristus hita, tung aha pe hamaolon na ro tu hita, naeng do margogo hita mangadopi jala tongtong tu jolo, unang sumurut semangat nang haporseaonta pe.

     3.       Ayat 15 – 16: Na dohot do si Musa mangangguhi ala so manahan mambege angukangguk ni bangsona. I do umbahen di dok Debata hataNa tu si Musa : “Boasa sai mangangguhi ho tu Ahu?”. Ala i dilehon Debata do dalan tu si Musa songon malim na gabe parantara ni Debata dohot bangsona manghatai. Asa di patoltol si Musa tanganna tu atas ni laut i, jal aihut di patolak tanganna asa boi halak Israel mamolus tongatonga ni laut i mardalan di na mahiang. Molo sian hajolmaonta tung so mungkin do, alai songon na tarsurat di Lukas 1:37 Ai ndang adong na so tarpatupa Debata. (from impossible to possible; dari yang tak mungkin menjadi mungkin).

    4.       Ayat 17 – 18 : Mansai maol do antusanta pandohan ni Debata di dua ayat on. Memang dimulana i dipasombu si Parao do bangso Israel lintun sian Misir. Alai dung sahat bangso Israel di topi Laut Rara (Laut Teberau), gabe muba ma roha ni si Parao, naeng do leleonna bangso i marhitehite 600 paranganna na marhureta hoda dohot di parsihundulna. Namarlapatan do; dipaloas Debata na masa i masa asa patuduhon hagogoon nang hasangapon ni Debata. Ndang gumogo si Parao dohot bangsona; alai gumogo do Debata. Ndang unsangap raja Parao dohot paranganna na marhureta jala marsihundul asa sian Debata. Dung sahat mamolus bangso Israel sian laut i, mangihut do si Parao dohot paranganna mangalele. Dipatuduhon Debata ma hagogoon nang hasangaponNa tu bangso Israel na maniaphon(memusnahkan) si Parao dohot paranganna marhite na pasadahon aek laut i muse. Ima bagabagaNa tu bangso Israel sian ayat 13 i; na so idaon nasida be halak Misir i salelengni lelengna ala nunga ro hamuliaon ni Debata Jahowa.

    C.    Sipahusorhusoron

 ü  Unang Mabiar: Godang do na mambahen mabiar hita isarana; sahit, bencana alam, kegagalan usaha nang di parsingkola gagal mendapat nilai yg baik, mabiar nang mangadopi hamatean. Manusiawi do molo mabiar hita idope hajolmaonta, alai songon bangso ni Debata hita (sosian parmudaron nang pardagingon, alai sian partondion haporseaon) di Jesus Kristus naeng do antusanta hagogoon ni Debata. Nunga ditaluhon Debata sorop ni sibolis dohot hamatean i marhitehite AnakNA Jesus Kristus i. HaheheonNa i patuduhon Ibana do Tuhan naung monang jala marhagogoon. Persoalanna jotjot do hita uju dilele biar ni roha, sai hira na umbalga do bair  i dibagasan rohanta sian habalgaon ni Debata dibagasan rohanta. (jaha Matius 10 : 28 “Unang pola mabiar hamu mida angka na mambunu daging, angka na so tuk mambunu tondi; alai na marhuaso mangagohon daging dohot tondi tu na roko, i do sihabiaranmuna.”) Ia pangurupion ni jolma marbatas do i jala ndang singkop, holan pangurupion ni Debata do na boi mangatasi angka saluhut. (Rom 8 : 26-27 “Alai nang Tondi i, diurupi do hita di hagaleonta i; ai ndang taboto, manang aha na tama sipangidoonta, gabe diondihon Tondi i do hita marhitehite hata na hinoihon na so tangkas hinatahon.Alai diboto Sitanda roha i do na pinarrohahon ni Tondi i, ai marguru tu lomo ni roha ni Debata do pangondihonna di angka na badia i.”). Molo didok unang mabiar; ndada na mandok anggar jago, molo botoon do na mamboan mara i, unang tajonohi, unang tatondong, unang ma mati konyol. Siarsakhonon do pangalaho na sala mangantus hata “unang mabiar” on. Adong do na deba halak Kristen, marsahit ma ibana, jala pos do rohana dipamalum Debata sahitna so pola marubat tu dokter manang diubati, dungi mate ma ibana. Hape di dok do dang sae holan haporseaon ingkon dohot do pangulaon; di Jakobus 2:17-18 Haporseaon i pe songon i do: Anggo so adong pangulaonna, naung mate do hadirionna.Alai adong ma na mandok: Di ho do haporseaon; di ahu do pangulaon! Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku. Unang mabiar na marlapatan nunga dilehon tu hita angka na porsea ima Tondi Parbadia, ndada Tondi hatahuton 2 Timoteus 1:7 Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton. Asa marhite TondiNa i ma hita marhagogoan dohot marpos ni roha di pangurupionNa i.

  ü  Hehe ma hamu. Na boi do hita hot jongjong diadopan ni Debata, molo tung rope angka habahaba, angin lubis, ambatambat, nang mara pe, unang pintor holsoan manangmarungutungut. Nunga siniraan Hata ni Debata hita siihuthon Kristus, ala ni i unang ma sumurut haporseaonta ( 1 Korint 15 : 1-2 “Alai naeng ma pabotohononku tu hamu, angka dongan, barita na uli, na hubaritahon tu hamu, na jinalomuna naung gabe hajongjongan muna. Laos i do parhiteanmuna gabe malua, namun ditiop hamu hata na binaritahon tu hamu; ia na so sandok magopo hamu porsea.) Naeng do diarahon haporseaonta manghirim di haluaon naung dibagabaghon Debata tu hita Jesaya 25:9 Jadi dohonon ni halak ma di ari na sasada i: Ida ma on do Debatanta, na itahaposi, na mangurupi hita, dison do Jahowa na itahaposi. Marolopolop ma hita jala marlas ni roha mida hatuaonna i.(ptds. Pslm.68:20-22). Ndang adong ngolunta na bolas malua sian ragam hamaolon, sai adong be do na masa hamaolon na sahat tu ngolunta songon na nidok BE NO. 716 : 1 “Di na mamolus sandok ngoluon gok do na marsak gale.” Alai unang ma bermental “hatoban” hita songon bangso Israel uju mangadopi hamaolon i, mudah menyerah menghadapi pergumulan hidup. Di jaman nuaeng on tung dapot hita dope pangalaho sisongon i. Nunga Kristen, nunga tardidi, jala malua, alai tong dope ‘diparhatoban” sibolis. Lomoan rohana mandai angka hadosaon na mangarajai roha nang pingkiranna. Apalagi molo ro pangaleleion na mangondam (mengancam) ngoluna. Molo naeng mangihuthon Kristus naeng ma taihuthon HataNa nang PatikNa. Ngolunta di portibi on sai hira di halongonan i dope boi do godang pangunjunan na manait rohanta mangalaosi patik nang Hata ni Debata asa ndang be satia hita tu Ibana. Alai naeng ma tadai dengganbasa ni Debata dibagasan Jesus Kristus i na gabe Raja dingolunta unang  loas sibolis na gabe raja. Sai tadok ma songon topik ni minggunta Minggu Estomihi “Sai Ho ma gabe partanobatoanhu” (Pslam.31:3b). Amen.

Bahan Jamita Minggu Sexagesima, 23 Pebruari 2014

Mangantusi Jala Manghangoluhon Hata ni Debata

Psalmen 119: 33 – 40

      A.      Patujolo

Psalmen di hata Heber digoari ma i “thelim manang Tehilling”, lapatanna mamujimuji”, pujipujian (praises). Jala di hata Junani : tehillim on marlapatan “angka tangiang”, jotjot do i didok ‘Psalmoi” na marlapatan : endende, i ma angka ulaula na pinangke ni angka parmusik na mamangke tali dohot ende. Angka on ma na pinangke ni angka bangso i di parsaoran nasida, jala sude angka ende dohot tangiang dohot pangidoan  ni jolma tu Debata. I do umbahen di buku Psalmen on adong do disurathon hata “sela” godangna 71 hali. Ra marlapatan ma i sada tanda tu sada punguan parende manang sada punguan parmusik/ koor ni bangso Israel. Jala na gumodang di Psalmen on i ma Ende sian si David. Jala ende Psalmen on boi masa do di tingki habuangan ni bangso Israel tu Babel sahat ro di na mulak nasida sian habuangan.

Ia psalmen 119 on, i ma psalmen na gumanjang sian sude bindu na adong di Buku Psalmen. Molo di Bibelta i (Hata Batak), tarida do na di sagi do psalmen on tu 22 bagian. Ganup bagian dibahen judulna mangihuthon alpabet ni hata Heber. Dibuhai marhite Alep jala marujung  tu hurup na parpudi ni alpabet Heber: Tau. Molo tapareso Biblia Hebraica (Padan na Robi di hata Heber) dohot judul huruf He= H do bagian na tatangkasi, ala ni i ganup ayat disi mamungka sian ayat 33-40 di Biblia Hebraica sai mamungka do dohot huruf He= H. Ala ni i mansai menarik do cara penyusunan ni Psalmen 119 on. Gaya sastra na songon on ninna angka na malo dihalomohon halak do dung habuangan Babel. Ala ni i ninna deba sian nasida, tercipta do Psalmen 119 on dungkon na mulak nasida sian Babel. Mangihuthon horongna, tarmasuk do tu psalmen habisuhon manang psalmen pangajaran, laho mangarahon halak asa diihuthon habisuhon na adong disi songon naung dihangoluhon parpsalmen i. Songon bentuk psalmen pangajaran manang poda, i ma na tarbarita sian pengalaman ni ngolu ni haporseaon parpsalmen, olo do tarbege disi tangiang mangido pangurupion manang na siala hagaleon manang ala ni mara na ro sian musuna.

     B.      Hatorangan

1.    Nunga godang program ni pamarenta nang berbagai elemen masyarakat laho patupahon gerakan gemar membaca. Molo so ringkot manjaha boi do mula ni keterbelakangan dan ketidakmajuan ni sada bangso. Molo ringgas do hita manjaha buku, tontu sai adong do buku  hasoloan ni rohanta. Molo nunga tahalomohon i sai jagaonta do asa unang sega, jal amansai arga do i tahilala. Jala boi do ala ni lomo ni rohanta manjaha sada buku, gabe mempengaruhi pola pikir nang pangalahonta. Laos songon i do digombarhon di Psalmen 119 on. Ia parpsalmen sai manghalomohon Patik ni Debata na dihilala ibana silehonlehon ni Debata na mansai arga situtu.

2.    Sian turpuk on, dipaboa parpsalmen  do pangantusionna secara pribadi taringot tu Hata ni Debata dibagasan ngoluna, didok ibana do Hata ni Debata songon:

Ø  Angka aturan (ay.33)

Ø  Patik (ay.34)

Ø  Tona (ay.35)

Ø  Panindangion (ay.36)

Ø  Angka dalan (ay.37)

Ø  Bagabaga (ay.38)

Ø  Angka uhum ( ay.39)

Ø  Parenta (ay.40)

Ø  Hatigoran (ay.40)

Sian angka impolana on na patuduhon ia parpsalmen on manghilalahon dohot na mangalami ringot ni na mangolu dibagasan bisuk ni Debata jala hagogoon ni Hata ni Debata dibagasan ngoluna. Molo di parpsalmen on ndada adong na asing ia so Hata ni Debata na mansai bagas pamorahon ibana di parbinotoan nang habisuhon i. Dihaporsea ibana do Ia Debata do langsung mandok i tu ibana, jala ndang tadinghononna Hata ni Debata nang saotik pe ala mansai arga do i di ngoluna.

3.    Ia respon ni parpsalmen tu Hata ni Debata. Sasintongna mansai jonok do parpsalmen on tu Hata ni Debata. Ummarga do di Ibana Hata ni Debata. I do umbahen sian ias ni rohana laho pasahathon diri tu Patik i, ala marhite i ma ibana pasahathon diri naang ngoluna tu Tuhan i sandiri. Pasahathon diri nang ngolu di patuduhon do i marhitehite sikapna tu Hata ni Debata i ma:

Ø  Sai huradoti ro diujung ( ay.33)

Ø  Huhajongjonghon sian nasa roha (ay.34)

Ø  Dalan balobung (ay.35)

Ø  Paeleng rohangku (ay.36)

Ø  Sai pangolu ma ahu ( ay.37,40)

Ima angka sikap nang pangalaho na boi masa di angka jolma na sai manghalomohon Hata ni Debata na tau mangamudihon ngoluna, ima na nialaman ni parpsalmen. Boha do ianggo hita angka siihuthon Kristus ? Arga do di hita Hata ni Debata na gabe dalan manana asi dohot holongNa tu hita ? Sadia gomos tatiop Hata ni Debata, jala tahangoluhon jala boi paubahon ngolunta ? Tapeop ma jolo dibagasan rohanta; molo nunga jaloonta i songon sikap ni parpsalmen, na tau dapotan do hita huaso ni HataNa i dibagasan ngolunta. Naeng ma mangolu hita dibagasan jala ala ni Hata ni Debata. Ia Hata ni Debata silehonlehonNa do i tu hita na mansai arga laho manjaga nang mangarahon ngolunta asa hombar tu lomo ni rohaNa. Jadi adong ma respon sian hita di silehonlehonNa i marhite na mameop dohot na mangulahonsa.

C.    Sipahusorhusoron

 ü  Ndada na muramura gabe sipangoloi, ganup minggu do begeonta jamita di gareja manang sian angka partangiangan nang na manjahasa sian angka buku renungan. Marhite i diigil do laho mangajari hita asa mangolu dibagasan pangoloion. Alai kenyataanna mansai torop dope jolma na so olo gabe pangoloi tarlumobi di Hata ni Debata. Heber 2: 2b-3 “....jala nasa pangalaosion dohot hatoison mangalap pamaloson na hombar. Tagamon ma adong dapot haporusanta, molo tatoishon haluaon na sai godang i? Pola do Tuhan i mangkatahonsa di mulana i, jala momos dipasahat angka na umbegesa tu hita.” Taingot ma sian pangalaho ama ni saluhut bangso si Abraham, satia do ibana mangulahon na nidok ni Debata. Ditingki didok Debata asa bungkas ibana laho tu luat na dao dohot keluargana, dioloi ibana do. Jala di tingki dipangido Debata asa pelehononna anakna i ( 1 Musa 22 : 3) dioloi ibana do, nang pe diujung na muse adong ma sada birubiru tartait di ramba i. Ala ni pangoloionna i ma dietong sada hapintoron di adopan ni Debata. I do asa lehonon ni Debata tu ibana pasupasuNa nang sahat tu angka pinomparna (jaha; 1 Musa 18: 18). Asa naeng gabe songon si Abraham, ingkon pasahathonta do ngolunta hibul tu adopan ni Debata. Jotjot do hita sai mangido tu Debata, hape aha sipangidoon ni Debata tu hita ndang  hea ta respon jala taulahon ( ima pangoloion) di HataNa.

 ü  Mansai arga do pengalamn ni ngolu ni si David uju i dohot Debata. Panogunoguon, parmahanion dohot hamonangan sai mangihutihut di pardalanan ni ngoluna. Didok rohana do saluhtna i siala asi ni roha ni Debata. Alai nang pe songon i ndada na mandok sai dao angka mara dipardalanan ni ngoluna, diadopi ibana do gok hamaolon, alai tongtong do ibana marsihohot rohana di angka padan ni Debata. I do umbahen di dok ibana di Psalmen 23 : 4  Ai nang pe mardalan ahu di * rura linggoman ni hamatean, ndang huhabiari parmaraan, ai Ho do mandongani ahu * tungkotmu dohot batahim mangapuli ahu.

 ü  Dihamauliatehon si David do sude na diulahon Debata dipardalanan ni ngoluna. Sian hametmetonna sahalak parmahan, boi diain Debata gabe sahalak na sangap gabe panggomgomi ni bangso Israel. Dipillit Debata do ibana laho manggantihon si Saul songon sahalak raja, ido umbahen didok si David di 1 Kronika 17 : 16  “Tung ise ma ahu pola, ale Jahowa Debatangku, jala tung ise ma pola anggo pinomparhu, umbahen tung diboan Ho ahu sahat ro tuson”. (ptds. Pslm.119:11a, 103). Alai nang pe songon i sai songgop do hamolon dipardalanan ni ngoluna, tung pe songon i sai satia do si David tu Debata. Laos songon i do ngolunta angka siihuthon Kristus, ndang adong na malua sian ragam ni hamaolon hita on, alai dipadanhon do hita na dongananNa do hita di hasiangan on ro disalelengnilelengna, sahat tu sambulo ni tondinta di Paradeiso i marhitehite AnakNa Jesus Kristus Sipalua hita. Jadi ndang adong be alasan di hita sai marungutungut, ndang sidok mauliate apalagi na manalahon Tuhan. Ala ni i taambolongkon ma sude arsak nang ganggu ni roha dohot pingkiran i na so ture marhite na ringgas hita manjaha Hata ni Debata arian nang borngin pe huhut mangulahonsa, asa lam margogo hita mangadopi angka na masa di pardalana ni ngolunta jala matoras hita, tang di haporseaon. 2 Timotius 3 : 16 – 17 “Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa ulaon na denggan.” Jala didok do muse di Pilippi 1 : 6 “Apala on ma pos ni rohangku: Naung umpungka ulaon na denggan di bagasan hamu, patuluson ni I do i, sahat ro di ari ni Kristus Jesus.”Ala ni i taantusi jala tahangoluhon ma HataNa i. Amen.

Bahan Jamita Epistel Minggu Sexagesima (60 ari andorang so haheheon), 23 Pebruari 2014

Mangantusi Jala Manghangoluhon Hata ni Debata

1 Korint 13 : 10 – 13

            A.      Patujolo

Kota Korint ima sada kota na maju jala tarbarita dohot strategis di pardagangan tubagasan dohot tu luar negeri, jala tarmasuk do pusat ni pamarenta nang partahanan. Hinorhon ni i jumpang do ragam ni angka jolma na marharoroan sian desa na ualu, mangihut do di ragam ni suku, bahasa nang ugamo pe. Jala mangihut do ragam ni parbinotoan na jumpang di Korint, tamba angka na binoto ni jolma hatiha i dohot angka ajaran na imbaru isarana angka ajaran filsafat nang haporseaon hinorhon ni ilmu pengetahuan na niluluan torop jolma hatiha i; tarmasuk ma disi na sian Jahudi, Junani, dohot angka na manomba ganaganaan. Laos songon i do huria Korint maringan ditongatonga ni masyarakat majemuk, jala latarbelakang ni ruas i pe marragam do, alai nang pe marasingasing haroroan ni ruas i alai sada do nasida dibagasan Jesus Kristus, nasida ma ruas ni huria naung tarjou jala diparbadia dibagasan Kristus i ( ptds. 1 Kor.1:2 ; 12:12-13). Digurithon si Paulus do suratna tu Korint sian Huta Epesus hirahira taon 53-57 M, jal aibana do na pajongjong huria i, jala denggan do parsaoranna dohot ruas na di Korint ( ptds. 1 Kor.11:2; 2 Kor.1-2). Tarmasuk do rua na di Korint naung manjalo ragam asiasi ni Debata nanilehonNa tu Huria i marhitehite Jesus Kristus ( 1 Kor.1:4-7). Godang do silehonlehon (karunia-karunia) partondion tu ruas i ( 1 Kor.13; 14), jala laos ala ni on do tubu parbolatbolatan, ala adong mangarajumi dirina naung badia lobi sian na asing.

Ro ma nuaeng Apostel Paulus marhite turpuk on, laho patorangkon asa unang sai marsuali nasida mampartahanhon na binotona be, na mengarah tu parbolatbolaton, na boi ujungna gabe manegai tu ngolu haKristenon, nang ngolu na laho mangihuthon Kristus i. Diondolhon Paulus do di turpuk on, na mardebadeba do pe parbinotoannasida, hape angka na laho salpu do na pinarsoalhon nasida (ptds. Parjamita 1:2 Tung na laho salpu do luhutna, ninna parjamita i, alogo sambing do tutu luhutna i!). Sandok pardaging do nasida na marngolu sisongon i, jala ngolu na danak do angka i di ngolu ni parhuriaon (ptds. 1 Kor.3:1-9). Diarahon turpuk on do nasida nang hita nuaeng di partingkian on asa mampareahi parange ngolu ni huria na manuju tu na sasintongna i jala na hot, ima : Haporseaon, Pangkirimon dohot Haholongon.

            B.      Hatorangan

1.       Digombarhon Apostel Paulus do Huria (bhs. Junani; Ekklesia; angka na porsea  tu Jesus), sada hasadaan na hibul songon pamatang ni jolma (daging) na terdiri sian angka ruas, ndang sada ruas, tung torop do. Manggombarhon na asing be bentuk dohot fungsina: mata, tangan, pat, pinggol, dna; alai marhasadaon jala marsirainrainan secara langsung (refleks). Bagian ni pamatang i do ruasna i, jala ingkon disi do asa utuh, singkop, ala ni i do sada hasadaon na so tarsirang na sada tu nasada. Molo tung adong na so berfungsi boi do marpangkurangi tu nasida jala asa boi masiurupan. Ala ni i gombaran ni pamatang do angka na porsea i di Tuhan Jesus. Ia pamatang ni Kristus do huria i jala ruasNa (baoa, boru, sian ragam houm rap arga do i sude nang pe marasing warna kulit; birong, bontar, kuning, merah dna dungi na sangap na lea dibereng portibi on; Gal.3:28), rap arga do diadopan ni Debata. Ndang na gabe sumurung na sada sian nasadaan, alai ibana mamereng, marbinege, maniop, manjaha, mangalangka, jala rap marguna do luhutna, suang songon i do jolma i ima ruas ni huria i. Ndada sude sisia gogo, ala ni i do umbahen digombarhon tu “pamatang : angka na porsea di Jesus” jala di dok pamatang ni Kristus, asa unang adong na so arga jala marguna di Debata, rup manumpahi do nasida jala masiurupan ( Ep. 4:11-13; Gal.6:2)

      2.       Ayat 10; Dung pe ro na sun denggan i, asa pasohotonna na mardebadeba i. Jala sude na so sempurnah i ingkon disiaphon, tarmasuk do disi marhata sileban naung diparsangapi jala diharingkothon halak Korint hatiha i. Na singkop i do na mangatasi na hurang singkop i marhite na paujunghonsa. Haholongon i do na pasingkophon parbinotoan na so singkop i. Ndang adong na singkop di portibi on (Pil.3:12), i do umbahen ingkon adong do perkembangan di na laho patanghon haKristenon i, songon sada posoposo manang dakdanak ingkon adong ma perkembangan nang pertumbuhanna asa sahat tu na dewasa (bnd.ay.11); sian suara ni posoposo, manghatai samponggolponggol di hadakdanakhonna, dungi sahat ma tu na malo manghatai (tarmasuk do marhata sileban tu horong hadakdanakhon di haKristenon), ndang tang di haporseaon dope ala ndang mangihut haholongon di ngolu ni ruas na di Korint uju i.

    3.       Ayat 11: ganup jolma jumolo do mamungka sian dakdanak asa gabe dewasa. Jumolo do marpingkir songon dakdanak na sederhana, na mura dope antusan jala ndang maol. Molo pingkiran ni dakdanak tarbatas dope persepsina taringot tu angka realitas, ndang boi do pe mamunten dohot denggan, holan sebatas nabiinotona dope. Molo nunga tang ibana, manang magodang, marujung ma pangalaho dakdanak i. Ia ruas na di Korint tarunjun do tu sikap nang pangalaho hasomalan ni halak Korint pada umumna; ima na mangharingkothon parbinotoan sambing, mangapudii haporseaonna. Hape ia parbinotoan i pe na laho salpu do. Ai didok si Paulus do na so tang di haporseaon ala sai mangasahon parbinotoanna sambing nasida. Hape adong dope parbinotoan na rumingkot ima : haholongon i. Molo nunga adong haholongon i, ndang danak be pangalaho nang sikap nasida maradophon dongan jolma nang tarlumobi maradophon Debata.

    4.       Ayat 12: Anggo nuaeng, semo do parnidaanta songon sian sorminan; na marlapatan rata dope parnidaanta songon sian pantulan ni sormin; ndang apala pas dope secara langsung objek na tabereng sian sorminan i. Dikutip Ap.Paulus do sian 4 Musa 33: 11, na manghatai Debata dohot si Musa dohot istilah (hata Heber; panim'el-panim: wajah kepada wajah” manang somalna dilapati"ka'asyer yedaber 'isy 'el re'ehu: seperti seseorang berbicara kepada temannya), ima sada pangalaho na patuduhon rumang ni parsaoran na rosu, ndang adong na buni disi. Alai nang pe songon i digombarhon si Musa manghatai dohot Debata songon  jolma manghatai tu donganna jolma, molo tajaha di  2 Musa 33: 18-23 tung so boi dope bohi ni Debata berengon ni si Musa di ayat 20 di dok “Angkup ni didok Jahowa: Ndang tarbahen ho anggo tung marnida apala Bohingkon, ai ndang tarbahen manang ise jolma hian marnida Ahu, laos mangolu ibana.” Jotjot do on digoari dohot istilah “theofani”: Kehadiran kemuliaan Allah). Jala boi do on dilapati parsaoran ni jolma dohot Debata nang pe so boi dope marnida bohi ni Debata na sasintongna holan songon sian sorminan dope boi idaonta. “Alai sogot adop bohi be ma”. Dibagasan ngolunta on, sude na pinasahat ni Debata sian angka naposona nang bagabagaNa i marhite “sorminan” (na so singkop dope), tarbatas dope hita jolma laho mananda na so singkop i dope, jala sogot di tingkina tandaonta ma i dohot tangkas. Pangantusion ‘saonnari’ mamereng di sorminan na so singkop i, molo sormin hatiha i, ndang songon sinuaeng on. Di partingkian si Paulus, molo sorminan ditopa do sian logam  na di dipahillong marhitehite na   digosok dohot batu, alani hasilna pe ndang apa tangkas molo dipangke jala ndang torang, semo do (ptds. 2 Korint 5:7), alai di tingkina sogot adop bohi be ma.

     5.       Ayat 13: Laos songon i do tu panandaon; na jelas panandaon di Debata do marhitehhite HolongNa i na mamillit hita tu na manongtong i; Debata Parmahan Bolon i mananda birubiruNa, ido na ringkot (ptds. Joh.10:14). Tolu do na hot: Haporseaon, Pangkirimon dohot Haholongon, tolu hasadaon na mian di bagasan ngolu songon asi ni roha ni Debata na mampartahanhon ngolu ni halak Kristen. Molo soadong haporseaon ndang mungkin tarjalo haluaon, molo soadong pangkirimon ndang adong na boi martahan di habengeton, jala molo soadong haholongon ndang mungkin adong parsaoran di angka na porsea. Alai molo mulak tu pudi (ay.8) taringot tu silehonlehon partondion ingkon marujung do i jala haholongon i na manongtong do i. I do umbahen na umbalga sian na tolu i ima haholongon. Marhite Haporseaon tahaporseai do Debata, jala pangkirimon martahan di haporseaon, jala haholongon i manongtong jala na umbalga. Haholongon i ima na marhuaso laho pasadahon Debata dohot jolma i, jala jolma tu jolma. Ima na so boi diulahon marhite pengalaman; di pangungkapon, marhata sileban, manang angka parbinotoan na bagas dohot angka silehonlehon i. Haholongoon i ma na gabe ciri ni ruas ni huria asa tama didok siihuthon Kristus manang halak Kristen. Haholongon i do dipangke laho mangulahon angka silehonlehon ni Debata, siala dipsahat pe silehonlehon i laho pauliuli huria ni Tuhan i do ( 1 Kor. 14 : 1 – 5), jala ndang sahat disi, ia haholongon i manongtong do.

C. Sipahusorhusoron

  Ø  Marasing do molo pangantusion ni portibi on taringot tu haholongon i; na holan sebatas, emosi sambing, hape Hata ni Debata patoranghon tu hita dohot tangkas taringot tu haholongon i, ndada na holan dihilala jolma i, alai na boi tarida sian pambahenan do. Jaloonta ma bisuk di haKristenonta, boha do hita mangula ulaonta asa hombar tu holong na sian Debata na manghaholongi hita ( jaha; Epe.5:1-2; 1 Joh.4:19).

Sude angka i dipatorang di 1 Korint 13 : 4 – 7 “Na lambas do haholongon i jala na sorta, ndang na mangiburuhaholongon i, ndang tenga jala ndang dipaburnangburnang dirina. Maradat situtu do haholongon i, ndang na ahut, ndang olo pangarimason, ndang dipajujurjujur na jahat. Ndang las rohana mida hageduhon; alai tongtong do dihalashon hasintongan i. Saluhut do ditanom rohana, saluhut do dihaporseai, dihirimi jala ditaon”.(ptds. Gal.5:22-25; Ep.4:2,3; Kol.3: 12-14; 1 Kor. 12:26,31a; 1:8; 8:7-13;10:24,33 Mat.26:33; Joh.21:17; Pil.2:4; Rom.12:3;10; 1 Joh.1:6; Joh.3:21; Rom.1:18; 2:8; 2 Tess.2:1-2; 1 Pet.4:8)

  Ø  Digombarhon do hasitolusadaon manang tritunggal di : Haporseaon, Pangkirimon dohot, Haholongon i ( 1 Tess.1:3; Kol.1:4-5). Haporseaon mangurupi hita mananda jala manghangoluhon holong i, jala pangkirimon margogoihon hita manjalo holong i; holan marhite holong na sian Debata do hita manjalo angoluan sogot, i ma dibagasan Kristus Jesus, asa haholongon i mangonjar hita gabe parholong tu Ibana dohot tu dongan jolma, mambahen hita gabe pangoloi jala marguna di portibi on songon angka anak halomoan diadopanNa. Marhite pandohan i, Apostel Paulus manosoi asa hot Huria Korint nang hita marhaporseaon, marpangkirimon dibagasan holong na sian ginjang i. Didok di 1 Johannes 4:16 Nunga tatanda jala tahaporseai holong ni roha ni Debata di hita. Debata do haholongon i; jala halak na mian di bagasan haholongon, i do na mian di bagasan Debata jala Debata di bagasan ibana. Molo nunga dibagasan Debata hita, nunga gabe parholong hita, jala ndang danak be pangalahonta di haporseaon alai lam tangmarhaporseaon.

  Ø  Jotjot do hita madabu tu pangalaho dakdanak di haporseaon. Talapati do haholongon ni Debata sai hira dakdanak; molo nunga dilehon tu dakdanak sipangidoonna i, las ma rohana, alai molo so nilehon gabe tangis do dakdanak i. Jotjot do talapati haholongon ni Debata i holan marhite angka keberhasilan, hagabeon, hamoraon (songon didok na deba halak Batak), dungi marhahipason, dao sian angka mara, tamba na sininta ni roha. Hape disi ro sahit, hapariron nang jea i, boi do pintor maheu rohanta, mandate jala marungutungut tu Debata. Alai molo nunga tang haporseaonta, tung aha pe na masa sai tong do haholongon ni Debata hita. Taingot ma nanidok di  Pangungkapon 3:19 “Ai nasa na huhaholongi, angka i do hupinsang jala huajar. Antong, haringkothon ma na paubahon roha!” naeng do dipatuduhon Debata holongNa i sian ragam angka na masa dipardalanan ni ngolunta. So tung sompit parbinotoanta taringot tu holong ni Debata. Didok di KJ. 408: 1 “Di jalanku ‘ku diiring oleh Yesus Tuhanku; Apakah yang kurang lagi, jika Dia Panduku?; Diberi damai sorgawi, asal imanku teguh; Suka-duka dipakaiNya untuk kebaikanku; Suka-duka dipakaiNya untuk kebaikanku”. Ala ni i boha do hita mangantusi angka na masa dipardalanan ni ngolunta ? molo ro margantisorin na paet manang na tongi, las ni roha arsak pe naeng tongtong tapuji Tuhanta i. Ingkon ingotonta do na nidok di Rom 8:18 Ai hurajumi angka sitaonon di hasiangan on, hira na so adong do martimbangkon hasangapon sipapataron tu hita sogot.

  Ø  Matoras di Hata ni Debata; songon topik di Minggunta “Mangantusi jala manghangoluhon Hata ni Debata”, boha do hita asa mangantusi jala manghangoluhon Hata ni Debata ? Tontu pangidoonta ma pangurupion ni Debata na gok holong i asa pargogoanNa hita marhite Bisuk ni Debata. Di Poda  1:7  Biar mida Jahowa do parmulaan ni parbinotoan, alai anggo halak na oto manoisi hapistaran dohot pangajaran. Molo didok Biar; ndang na marlapatan mabiar di paruhuman sogot nang habiaran ala hamatean. Alai biar na patuduhon : “hormat dan Taat”. Molo nunga hormat manang tahormati panobusion ni Jesus Kristus i, ( Joh.3:16, ai songonon do holong ni Debata tu portibi on...) tontu arga ma di hita panobusion i ala ni holongNa na pasangaphon hita jolma pardosa on asa gabe parjambar dihangoluan sogot. Dung i tapatuduhon ma biar ni rohanta na hormat i dohot haoloon manang pangoloion di Hata nang patikNa marhiehite holong na sian Ibana, ima Holong Agape, asa matoras hita di Hata ni Debata jala sian i ma antusanta lomo  ni rohaNa di hita.(ptds. Jak. 2: 17-18). Amen.

Bahan Jamita Minggu Septuagesima, 16 Pebruari 2013

Dipangolu, Dipatorop Jala Dipasupasu Jahowa

5    Musa 30 : 15 – 20

             A.      Patujolo

Ditaon pa-40-hon dung haruar bangso Israel sian Mesir, tolhas ma nasida tu tano Moab di taon 1210 SM, manggulon (berkemah) di toru ni dolok Nebo, na marpuncuhon Pisgah 835 meter di ginjang ni laut, jala 1230 meter sian angka rura na humaliang. Na ginoar Jabal An Naba, saonnari marholangholang 19 km sian muara Jordan, manang 185 km sian dolok Hermon.

Disi ma bangso Israel mangulon saleleng 2 bulan, sada adaran na martondongkon bariba ni kota Jeriko, kota kurma na tarbarita i inganan parsingkolaan ni angka malim Jahudi uju i. (Pt. Pang.1:16; 3:13; 5 Musa 34:3). Boho ma umur ni si Musa, naposo ni Debata di tingki i, 120 taon ( 5 Musa 31:2). Hira g anup ari do si Musa pajongjong di jolo ni luhutn ni Israel di tingki i manjamitahon angka hata ni Debata laho mamodai saluhut bangso i si 601.730 halak baoa na marumur 20 taon tu ginjang, hombar tu sensus na paduahon ( 4 Musa 26: 4-51)

Mansai tangkas do dijamitahon si Musa tu sandok bangso Israel taringot tu panogunoguon ni Debata Jahowa di nasida, mulai sian Gosen-Misir sahat tu Sinai inganan nasida manjalo Patik na 10 i. Nuaeng pe , nunga sahat nasida tu bariba ni Aek Jordan laho taripar tu tano Kanaan, naung pinarbagabaga ni Jahowa tu ompunasida si Abraham, si Ishak dohot si Jakob ( 1 Musa 12: 1-7).

Tardok dua pangibulan bolon do jamita ni si Musa tu luhutan ni bangso i di nebo taon 1210 SM, i ma : “Manaili tu pudi” dohot  “Mamereng tu jolo” (Pslm.1-11; 12-34). I do umbahen digoar halak Jahudi buku 5 Musa on “Haddebharim”= tona parpudi ni si Musa tu Israel, manang Deutronomium (Bhs. Junani): pangarataion di patik ; (Deuteros: paduahon; Nomos: patik/hukum).

        B.      Hatorangan

      1.       Dung haruar bangso Israel sian tano Misir, sai jotjot do bangso i maralo dompak Debata. Sai madabu do  nasida tu na mangulahon na so dihalomohon ni roha ni Debata (dosa); marungutungut, manomba ganaganaan, pargadombuson, harorangon dna. Sai jotjot do nasida marjogal ni roha na so mangulahon patik nang Hata ni Debata. Ala ni i diuhum Debata ma nasida mardalan dihalongonan saleleng 40 taon. Asing ni si Josua dohot si Kaleb, sude halak Israel sian generasi na paprjolo sian bangso i disiaphon di halongonan i. Ndang diloas Debata nasida mamasuhi tano naniuarihon i, ima  Tano Kanaan.

     2.       Mamereng tu pudi angka hasalaan dohot dosa nasida ujui sahat tu Moab nasida, dipaingot si Musa ma muse nasida andorang mamasuhi Tano Kanaan i asa unang mangulahi mangulahon dosa nang hasalaan nasarupa. Dibariba aek Jordan i ma disosoi si Musa bangsona i asa unduk tu Debata. Ndang adong na so boi siulahononnhon sian patikNa i, adong ma dua sieahan nasida, ima:

    a.       Naparjolo; patik na tarsurat i, ndada na maol i ulahononhon. Alai nang pe songon i tong do pamanathonsa, ndada ulaon na muramura i, jala ndang  na marlapatan ndang boi ulahononthon. Jala marhite turpuk on, naeng do dohonon ni si Musa haunduhon di na mangulahon  Hata nang patik  ni Debata ndada holan haboion ni nasida mangulahonsa, alai pangoloion nasida do mangulahonsa. Na dipangido tu nasida ndada holan mangulahon sambing alai adong kepatuhan, hormat mangoloi jala mangulahonsa.

     b.      Napaduahon; haunduhon nasida boi do siala ndang pola dao inganan pangulahononna, ndada di laut, dilangit, diudara manang di inganan na maol, alai na boi sipatupaon nasida do. Ndada na buni laho mangulahonsa ingananna manang na gabe maol botoon. Nunga dipasahat tu bangso i patikNa i di dolok Sinai, ro do Debata mardompakhon nasida laho pasahathon na dirohaNa i tu bangsoNa. Ditongatonga nasida do Patik i naung niajarhon ni angka ompunasida na jolo tu angka iananghonna songon na tarsurat di  5 Musa 6 : 6 – 7 “Jala ingkon parateatehononmu luhut hata on, angka na hutonahon tu ho sadarion. Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse”. Lapatanna; nunga dihasomalhon nasida mangapil patik i, arian dohot borngin, nunga dihatahon nasida, nunga diapil, jala nunga dihasomalhon dibagasan ngolunasida, jadi ndang asing be i di nasida. Jadi ndada na maol manang hal na asing be i dinasida, alai disosohon si Musa ndada holan diulahon alai ingkon adong kesungguhan, manang komitmen; holan dua do pilihan dinasida mangulahon dos tu hangoluon, ndang mangulahon dos ma i tu hamatean.

      3.       Pardalanan nasida mamolus halonongan dohot angka mara nang ahsusaan saleleng 40 taon na niuluhon Debata marhitehite NaposoNa sai hira nunga martopi. Nunga sahat tu luat Moab nasida, tungkan purba sunge Jordan. Tano Kanaan, naung dipadanhon Debata nunga dijolo ni mata ( 5 Musa 1 : 1-8), dung i marhite 5 Musa (Kitab Ulangan), dipaingot Debata ma muse marhitehite si Musa naposoNa i tu bangso Israel asa unang langgus rohana jala manghalupahon Patik nang Hata ni Debata; disi mi ditegakkan kembali perjanjian ni Debata dohot tu nasida, ima angka uhum, nang patik, hasomalan, di adat nasida, di masyarakat nang pangalahona pe ( 5 Musa 12-26). Alai ndang sae holan i, diboto si Musa do na so pasidohot be ibana mamasuhi tano i jala ingkon ditorushon si Josua nama ( 5 Musa 31), jongjong ma muse ibana diadopan ni Bangso Israel i, asa mambuat jala manotophon pamilitonna na manontuhon masa depan bangso i. Ndada na marmeammeam tu pilihan i, i do na manontuhon; ayat 19a “Jouonku ma sadarion langit dohot tano gabe sitindangingku dompak hamu, paboa naung hupapillithon tu hamu hangoluan dohot hamatean, pasupasu dohot torutoru....” (jaha ay. 15 “....nunga hupapillithon tu ho sadarion hangoluan dohot hatuaon, hamatean dohot hamagoan”). Jaloona do hangoluan dohot hatuaon molo dihaholongi nasida Debata marhite na mangulahon dohot na manghangoluhon Patik nang Hata ni Debata (ay. 16a. Ingkon haholonganmu Jahowa, Debatam, jala marparange di angka dalanna, huhut mangaradoti angka patikna, angka aturanna dohot uhumna,). Alai sabalikna molo maralo do pangalaho nasida sian hata nang patik ni Debata aeonna ma hamatean, bura nang hamaolon (ay. 17 Alai tung sura marbalik roham, ndang olo ho manangihon, lam olo ho elaelaon marsomba tu angka debata sileban dohot mangoloi angka i). Marhite pilihan i, naeng do ingot diroha nibangso i na masa uju di Misir nasida na manomba debata ganaganaan, hape di perbudak do nasida. Ido alana dipaingot si Musa bangso i asa mambuat pilihan; hangoluan do  manang hamatean? (“...dibahen i pillit ma hangoluan i, asa mangolu ho dohot pinomparmu sogot. Asa haholonganmu Jahowa, Debatam, jala tangihononmu soarana, jala marsilohot roham tu Ibana, ai Ibana hangoluanmu hian dohot na paginjang umurmu...”ayat 19b-20a).

     4.       Dibagasan padan naung niuarihon ni Debata tu bangsoNa i; naeng pasupasuonNa marhite angka ondeng ima berkat jasmani na marhadomuan tu pauliulihon parngoluannasida na gabe bangso na pinillit ni Debata. Jaloonna do pasupasu i molo pangoloi nasida di na mangulahon Patik ni Debata naung dilehon tunasida, na marlapatan, sahat ma pasupasu i tu nasida molo hatauon nasida di Hata ni Debata nang Patik dihangoluhon (diulahon) nasida dibagasan parngoluan nasida siganup ari. On ma na so diulahon generasi na parjolo sian bangso i. Pamotoan nasida di patik i dang diihuthon marhite pambahenannas, asa on ma siboan mara di nasida diuhum Debata. Asa marhite turpuk on sipaingot Debata tu bangso Israel i, naeng unang holan di bibir nasida patik i, manang holan diapil, manang dihasomalan sambing (ay.16).

     5.       Parenta ni si Musa tu bangso Israel laho manghaholongi Debata Jahowa marhitehite na mangulahon patik  ni Debata, na patuduhon parbinotoan ni bangso i taringot tu patik nang Hata ni Debata ndada adong artina molo so adong komitmen laho mangulahonsa. Laos sadalan do i na tarsurat di Jakobus 1 : 22 “Alai gabe siulahon Hata i ma hamu, unang holan pananginangi, angka na paotootohon dirina!”. Laos parange sisongon i do na diorai Jesus tu halak Parise dohot siboto surat, na holan tumangihon Hata ni Debata dohot patikNa alai ndang diulahon dohot denggan jala sintong, ndang dihangoluhon. Naeng do dikuasai Hata ni Debata alai ndang olo nasida Hata ni Debata mangarajai ngoluna.

      C.      Sipahusorhusoron

Ø  Somal do molo di pudi ni taon manang di bona ni taon dipamasa huria rapot laho patupahon angka program pelayanan ditonga ni huria dohot rancangan ni anggaranna. Hea do masa disada huria dihatai pandita ma dohot parhalado nanaeng sipatupaon dohot evaluasi pelayanan. Dirangrangi do sahat tu pelayanan na so apala manghorhon tu partondion sian haroro ni na mandohot, sahat ma panghataion i tu ulaon partangiangan, hape na mandohoti lam moru do ro partangiangan na somal di gareja dibereng pandita i dohot parhalado. Ndang songon paprunguan koor rupani dohot partangiangan wijk, hape partangiangan di gareja lam moru jala otik holan 5 sahat tu 7 halak do na ro, ipe holan angka horong lansia do na ro. Sialani i ma, efisiensi anggaran laho  patupa bus jemputan tu partangiangan gareja gabe dihapus jala diputushon asa  mansoohot  ulaon partangiangan gareja i. Dung sahat barita haputusan i tu ruas nang sahat tu na ringgas mandohotisa, gabe protes ma ndang setuju angka na ringgas tu parpunguan i, alai molo pandita dohot parhalado totop do di haputusanna. Alai nang pe dipasohot ulaon parpunguan i, sai ro do sahalak ina tu gareja i laho martangiang songon na somal  hian. Ditangianghon ibana do sude ruas ni huria, pandita nang parhalado pe, tung pe sahalkna martangiang pos do rohana ditangiahon Debata do tangiangna i. Dung manipat pigapiga bulan, lam leleng tarbarita do hasatiaonni sahalak ina na ringgas ro martangiang i tu ruas. Gabe lam ro ma ruas mandohoti ina i laho martangiang di gareja, ujungna gabe dipungka huria ma muse parpunguan i. Di hita saluhutna nahinaholongan dibagasan Jesus Kristus, sahalak ina i, sada ruas biasa do na so apal timbo parsingkolaanna, alai marhite sikapna polin i laho mangulahon Hata ni Debata gabe sada bukti laho pailahon angka na parbinoto dohot parilmu tinggi.

Ø  Hea do ra hita umbege barita taringot tu sahalak dakdanak, ditingki marsingkola ibana mangadopi ujian matematika dapotna do puntten 100, alai hea do disuru inongna ibana laho manuhor situhoron tu warung alai ndang diboto ibana mangetong ulak ni hepengna. Di hita na hinaholongan dibagasan Jesus Kristus, jotjot do rupani hita songon dakdanak i dijolo ni Debata, taboto do dohot denggan Hata ni Debata alai ndang taboto mangulahonsa dohot sintong. Ala ni i sian turpuk on dipaingot do hita, ia ngolu na tama diadopan ni Debata ndang dipuntten i sian timbo ni parbinotoanta  alai haunduhonta do mangoloi Hata ni Debata dohot sintong dibagasan ngolunta.

Ø  Nuaeng lam jonok nama pemilihan angka na hundul di pemerintahan negaranta Indonesia taon on, manat ma hita mamillit sipillitonta, alai unang ma gabe golput hita manang na so olo mamilit, tajou ma Tuhan i laho mamparbisuhi hita mamilit na hombar tu lomo ni roha ni Debata asa marbisuk hita mamereng ise do figure na boi sipangasahon di pamarenta daerah nang pusat pe. Nang di situasi ngolunta ganup jotjot do hita dipaadop tu berbagai pilihan, ala ni molo sala mamilit hita boi gabe sikamabarbar ( sala mandasor sega l uhutan). Tajalo ma hagogoon nang petunjuk sian Debata marhite tangiangta asa diparbisuhi hita laho mamillit angka pilihan na sahat tu hita, gabe pasupasu nang las ni roha ma dihita ujungna.

Ø  Hita na porsea dibagasan Jesus Kristus, dipillit do hita gabe anak ni Debata na gabe panean di  HarajaonNa, alai naeng ma dipudi ni pamillitonNa i tapatuduhon parange ni ngolu na tama jala marasing sian jolma na di portibi on. Molo dilehon tu hita Hata ni Debata ndada holan didiskusihon manang diperdebatkan, alai naeng do diulahon dibagasan ngolunta. Nang pe sai tadok nunga taboto HataNa i alai namangulahon on do na maol, ndada na mandok gabe so diulahon. Molo taungkap roha nang pingkiranta jala adong komitment dihita ganup boi do ulahononta i marhitehite pangurupionNa i. Ala ni i tapangasahon ma bisuk na sian Debata asa tau hita mangulahonsa jala dipargogoi hita marhitehite TondiNa ima Tondi Parbadia. Ala ni i tabuat ma komitment, hangoluan do manang hamatean ? Alai hita na hinonghop dibagasan Jesus Kristus nunga dipillit hita asa gabe parjambar di hangoluan sogot marhitehite AnakNa Jesus Kristus, tahormati jala arga ma di ngolunta i marhite na sipangoloi (taat) hita di Patik nang HataNa i asa tarpasupasu hita. Amen.!

Bahan Jamita Epistel Minggu Septuagesima, 16 Pebruari 2014

Hasadaon ni Ruas ni Huria

1 Korint 3 : 1 – 9

A.   Patujolo

Dipungka si Paulus do huria Korint, dungi laho ma ibana tu angka luat na asing mamungka huria angka na asing. Dung laho si Paulus sian Korint, tinggal do si Apollos patureture Huria i.

Di huta Korint uju i, nunga masa parbolatbolatan,  hinorhon ni fanatisme ni angka jolma, nang ruas ni Huria i, manghaholongi sadasada halak guru manang pangajari, na mansai sangap di tingki i, ai tergolong do halak on tu na pistar di parbinotoan di parugamaon dohot dipengetahuan umum, gabe adong ma na manggoari dirina “pengikut ni si Apollos, si Paulus dohot si Petrus, horong ni Kristus. Boi do jumpang on, ala nunga dirajumi halak Junani na pistar, ala gaya bahasana na menarik, naung  mempengaruhi warga masyarakat dohot warga gereja di tingki i. Boi do muse masa parbolatabolaton on, ala adong guruguru Kristen (sian Jahudi) na ro sian Jerusalem (1 Kor.7:18), na so apala sadalan dohot guru-guru  Kristen (na sian sipelebegu hian). Apostel Paulus mandapot laporan taringot tu parbolatbolatan i sude sian keluarga Kloe ( 1 Kor.1: 11). Boi do sigatanta taringot tu angka golongan manang kelompok na masa hatiha i:

v Horong Paulus; didok rohanasida holan si Paulus do siihuthononnasaida di Korintus. Paulus do ama di nasida. Gumodangan do anggotana marharoroan sian halak non-Jahudi na lomo rohana di jamita ni apostel Paulus taringot tu haluaon ni halak Kristen jala ujung ni patik i. Ia horong on sai marusaha do manguba haluaon i gabe sada dalan asa marlomo ni roha nasida di haKristenonnasida. Lupa do nasida ia haluaon na jinalo nasida nadada asa marlomo ni roha mangulahon dosa, alai sabalikna asa merdeka do nasida unang sai mangulahon dosa be. Na  deba penafsir mandok ia nasida on ima sian angka halak na mangulahon harorangon, pangalangkupon dohot na mangallang pelean tu debata sileban.

v Horong Apolos United. Gumodangan do nasida na malo jala parbinoto jala na manghalomohon filsafat. Mansai lomo do rohana molo dibaritahon barita na Uli i pasidohot filsafat na tarbarita. Mansai las do rohanasida di angka jamita ni si Apolos na boi ber –retorika (sebuah teknik pembujuk-rayuan secara persuasi untuk menghasilkan bujukan dengan melalui karakter pembicara, emosional atau argumen/logo). Jala didok nasida do ia Apolos do na berperan di na laho pagodanghon ruasni huria di Korint, ala nasida do na mangajar dohot na pauliulihon ruas i asa lam mangerbang jala lam balga. Angka na malo mandok ia horong on, boi do ra sian angka halak na manirpang sian ulon na badia jala na mangalanggar angka hahomion ni parmingguon.

v Horong ni si Petrus (Peter’s Community). Molo angka anggotana gumodangan sian halak Jahudi. Mansai lomo do rohana pangajarion na mandok ia angka na porsea ingkon hot do mangulahon ruhutruhut ni patik i. Nasida ma na sai mangharingkothon uhum, na ringkot legalis, alai ihut tu na mangorui angka silehonlehon ni Debata jala na mangarajumi barita taringot tu silang, i ma haotoon.

v Horong siihuthon Kristus (Christ Fans Club). Sian goar i pe nunga mura tandaonta angka siginjang roha, na mandok dibagasan rohana dirina do na bonar jala na sintong sian horong na asing siala adong hubungan na khusus dohot Kristus. Dirohana holan nasida do na marnampunasa Kristus ndang dohot na asing. Didok angka penafsir; boi do ra nasida na so porsea tu haheheon ni pamatang ala dilapati nasida do Kristus i sian hajolmaonNa sambing.

 Dibege si Paulus do barita, na so magodang haporseaon ni huria i, sai  tong dope nasi parroha daging. Dibahen si Paulus ma suratna tu nasida maminsang  pangalaho nasida  na marbolatbolat i dohot patoguhon haporseaon nasida, asa huria ni Debata nasida, unang ma huria ni jolma.

B.    Hatorangan

     1.       Ayat 1- 2 : Parroha pardagingon dope huria i di mulana. Dos do parroha pardagingon dohot posoposo di partondion. Hata pardagingon  dope na boi dohonon tu parroha pardagingon. Susu dope na boi lehonon tu pososposo. Hata pardagingon dohot susu ndang marlapatan i parbinotoan portibi na toru, alai hata ni Debata na bulus do na marrupa barita na masa pambahenan ni Debata na mura antusan ni na so adong hian dope binotona. Lam tamba ma umur ni huria i, naeng ma lam magodang partondionna dohot haporseaon. Molo dung magodang huria i, boi ma jaloonnasida hata partondion, jala boi ma panganonnasida sipanganon hian (sipanganon na pir). Gabe parroha partondion dohot parhaporseaon na tang ma Huria i. Hape ianggo huria Korint ndang olo magodang, sai tong posoposo, sai tong parroha pardagingon.

    2.       Ayat 3 – 4; Nang pe naung Kristen halak Korint, masa dope ditongatonga nasida pangiburuon dohot parsalisian. Songon na tarsurat di Rom 13 : 14. Sumarihon daging, laho manungguli hisaphisapna. Angka on ma parulaon ni daging: Parmainanon, hahodaron, pargadombuson, parbadabadaon dohot na asing (Gal.5:16-24), diboanhon halak Korint do roha pardagingonnasida tu huria i, gabe tubu  ma parbolatbolaton di huria i. Adong mandok sisean ni si Paulus do ahu, na deba mandok sisean ni si Apollos, Ndang sada be hasiseaonnasida.

     3.       Ayat 5 – 6; Ia si Paulus, i ma Apostel tu sipelebegu (bangso na so Jahudi). Ibana ma na mamungka angka huria na di Asia na metmet dohot na di Junani manang Makedonia. Ibana ma na mamungka huria Korint. Ia si Apollos, i ma sahalak Jahudi na tubu di Alexandria, siboto surat (ahli Taurat) do ibana, sisean ni si Johannes Pandidi, na gabe halak Kristen muse jala na gabe parbarita na uli na sipata rap dohot Apostel Paulus. Di huta Korint do si Apollos, ditadinghon si Paulus ibana, di na laho si Paulus mandalani angka luat sahat tu Efesus (ul. Ap. 19:1). Si Paulus ma na mamungka huria i, jadi sipanuan ma ibana. Na pinungka ni si Paulus i dipatureture si Apollos, jadi sipanambornambor manang na pabornokhon (maniram) suansuanan (huria) i ma ibana. Jadi nasida na dua parhalado ni huria Korint i do, parhitean ni huria gabe porsea. Na mangula do nasida hombar tu pangalehon ni Tuhan i di ulaon nasida be.

    4.       Ayat 7 – 8; Holan pangula do si Paulus dohot si Apollos, alai Debata do na patubuhon. Debata na patubuhon i do siihuthonon dohot sipujion ndada parhalado. Dos do sude parhalado i, ai ganup nasida manjalo upa sian Tuhan i, hombar tu pangulaonna be. Dipinsang si Paulus do huria na mambahen parbolatbolaton di huria i. Ia huria i ndada huria ni parhalado, alai huria ni Debata. Ndada huria ni ruas huria i, ndang boi nasida mamolati parhalado, huria ni Debata do huria i. Sada ulaon ni Parhalado, na masipagohan do nasida di na ringkot di parngoluon ni huria i.

     5.       Ayat  9 : Ai dongan pangula ni Debata do hami. Na diparar Debata do si Paulus dohot si Apollos gabe dongan ni Debata mangula di ulaon ni Debata. Suang songon i do angka parhalado ni huria, na marasingasing ulaon dohot hatauon nasida, mangula di ulaon ni Debata. Ndada na hurang gogo Debata, alai na dihalomohon do angka halak donganNa mangula  ulaonNa. Asi ni roha ni Debata do i rajumon molo diparar Debata iba gabe donganNa mangula di ulaonNa. Ia ulaon ni Debata, i ma mangula haumaNa dohot pauliulihon BagasNa. Huria i do hauma ni Debata laos huria i do Bagas ni Debata. Hauma ni Debata do hita halak Kristen, olo ma hita diula Debata rap dohot donganNa. Bagas ni Debata do hita halak Kristen, olo ma hita pauliuli Debata dohot donganNa.

C.    Sipahusorhusoron

  Ø  Debata do nampuna Huria i, Ibana do na mangula ditongatonga ni huria, Ibana do na patubuhon haporseaon. Dison Ibana do parhalado ni huria  gabe donganna saulaon. Ndang boi bolaton parhalado i, gabe marbolat huria i. Ingkon sada do ruas dohot parhalado pauliulihon ni Debata.

  Ø  Godang do huria na tubu di negaranta Indonesia on. Tubu do huria i ala pangulaon ni angka missionaris na marasingasing haroroanna be. Boi do marragam ruhutruhut parduru ni haKristenonta, israna parmingguonta, endenta mamuji Debata, dohot ragam hasomalon na taulahon di huria i. Alai nang pe marragam saluhutna i, ianggo ojahanta sada do, i ma Jesus Kristus, Tuhan Sipalua hita. Magodang do huria hombar tu ingananna be. Alai marragam pe huria sisada haporseaon do di Jesus Kristus. Kristus ma hasadaon. Hasadaon di Kristus i do hasadaon Oikumene. Asa saluhut halak Kristen ingkon sada do, sisada roha, sisada haporseaon, sisada panindangion. Ragam pangula ni huria, parbagi ni tohonanna be dohot ragam ni pendidikan nasida be. Mangula do angka parhalado i hombar tu parbagi ni ulaonna be. Ndada nasida nampuna huria i, holan pangula do nasida dongan ni Debata mangula huria i. Unang ma adong halak Kristen na sada dohot Kristen na sada nari, manang huria na sada tu na sada, na masitihaan, masihosoman, masirehean jala masiagoan. Siarsakhonon do angka pangalaho na masa di angka huria na parpudi on, na so tangkas tujuan na marbarita na uli. Ai nunga torop huria marbarita na uli na holan laho manambai ruas ni huriana disangkapi rohana, ndang manambai bilangan na porsea tu Jesus Kristus. Molo sude mangarahon asa gabe patorop godang ni ruas ni huriana be, lam lumlam ma huria, jala boi songon na masa di huria Korintus. Ndada lembaga gereja na gabe ojahan alai Jesus Kristus do ojahan ni haKristenon.

  Ø  Molo tubu roha ni angka ruas mambahen parbolatbolaton, manang mambagibagi huria i, ala ni angka kepentingan na marasingasing, ingkon sada do parhalado i maralohon ruas i, asa unang saut nasa parbolatbolaton i. Ingkon asing do antusanta parbolatbolaton sian hararat (perkembangan) ni huria  i. Ingkon rarat (berkembang) do huria, ai i do tanda ni huria na mangolu. Ingkon sipasidingon do hata na mandok ala ni parbadaan do umbahen na tamba (berkembang) huria. Sipasidingon do huria na tamba ala ni na marbolaan, alai sieahan do hararat ni huria na manarsar (bekembang) songon maremare. Sipasidingon do pangalaho na gabe marmetmet huria alai sieahan ma huria na magodang lam tu panggalna na songon buarbuar. Tajagahon ma hasadaon ditonga ni huria; unang masa parbolatbolatan, parbadaan, pargutugutuon. Songon hasadaon ni Debata Ama dohot AnakNa Jesus Kristus songon tangiang ni Jesus tu angka na hinonghopNa i (Joh.17:21 “Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu” ), songon i ma hasadaon ni ruas ni huria, na sahata, saroha, sapingkiran jala tarlumobi satondi, saluhut na i sian Tondi na sasada i Tondi ni Jesus Kristus i. Amen!