Jamita Evangelium Minggu XXI Dung Trinitatis – 9 Nopember 2025

Mangaramoti Diri Di Bagasan Holong Ni Roha

(Memelihara Diri dalam Kasih Allah)

Judas 1: 17 – 23

 

a)     Huria ni Tuhanta na hinaholongan dibagasan Jesus Kristus. Dung mate martyr si Jakobus anggi ni Tuhan Jesus di taon 62-63 M, si Paulus dohot si Petrus di Roma taon 67 M di tingki ni Kesar Nero nunga mandalani sataon hamamasa ni porang Jahudi mangalo imperial Romawi  na menindas Jahudi mulai sian tingki ni si Pompeus taon 63 sM. Ala ndang tartaon halak Jahudi be nasida pinaporsukporsuk ni halak Roma, ingkon manggarar pajak na mansai balga/timbo; isara biaya porang pinangke ni halak Romawi ingkon 50% gararon ni sude bangso jajahan ni bangso Romawi di tingki i. Ala ni porang dohot pangaleleion i, mansai parir do partinaonan ni halak Kristen/ huria na parjolo i lumobi na di parserahan (diaspora). Jahudi naung nilele ni Kesar Klaudius sian Roma taon 50 M. Lam martamba ma haporsuhon tu huria na imbaru tubu i sahat tu tingki ni si Paulus torus tu pangaleleion ni Kesar Nero, 54-58 M; torus tu ari hatataban ni Jerusalem dibahen Jend.Titus, anak ni Kesar Pespasianus i di taon 70 M. Hehe ma dohot anga parpoda haliluon, Libertinisme, na mangajarhon poda ni jolma: Filsafat dohot parbinotoan, na so manghaposi hagogoon ni Debata di bagasan Jesus Kristus. Na mangajarhon: Ia Jesus Kristus, ndang tutu Anak ni Debata na Sasada i alai jolma na somal do nang Ibana songon hita. Ingkon sisulingkiton do nang Bibel i, ai ndang saluhutna isi ni Bibel i Hata ni Debata, alai godaan do i hata ni jolma na bisuk. Asa ingkon sulingkiton do nang Bibel i dohot parbinotoan, ninna parpoda haliluon i.

b)    Tolhas do barita haliluon i tu si Judas di Jerusalem dohot tu angka na porsea i. Ai mansai hatop do marlojong poda i dibahen horong Libertinisme di tingki hagogotan i marhite na mangalehon pangurupion tu angka na pogos asal ma dijalo nasida poda i. Hehe ma dohot parpoda Gnostik, na mamodahon: Holan marhite sian parbinotoan sambaing do boi sahat jolma tu haluaon na tutu situtu, asa ndang sai holan sian haporseaon, ninna parpoda haliluon i, na so porsea di hagogoon ni Debata dohot Jesus Kristus di bagasan Tondi Parbadia (super natural). Holan marhite na tardungdung utokutok (akal pikiran) dohot na boi idaon dohot jamaon ni tangan sambing do sihaporseaon ni parpoda haliluon i.

c)     Dung tangkas dipahusorhusor si Judas (tarpuji ma Jahowa) angka poda ni Libertinisme dohot Gnostik na maralo situtu tu poda haporseaon naung ni podahon ni Tuhan Jesus dohot si Jakobus, hahana naung mate martyr ditongos ma suratna si sada bindu on sian Galilea laho paingothon angka dongan Kristen na parjolo i, asa marsihohot di haporseaon jala manulak poda haliluon bolon i. I do umbahen digoar angka na porsea i surat ni si Judas on: Poda sipaingot dohot tangiang pujipujian tu Jahowa dohot Jesus Kristus. Ia disi huria ni Kristus (na porsea) maringanan, disi do sibolis manggasa dohot tondi na hodar rongom mangarsahi dohot manursari punguaan ni na porsea na masihaholongan i. Mat.13:25-30, jala ingkon boluson ni huria ni Tuhanta do paraloan dohot parungkilon na songon i sahat ro di ari haroro ni Tuhan Jesus Kristus, Raja ni Huria i. Songon naung dilumbahon ni angka apostel ni Tuhan Jesus Kristus, si Petrus; 2 Ptrs.3:1-5 dohot si Paulus :Ul.Ap.20:29-30. 1 Tim 4: 1 – 4, 2 Tim 3: 1-13. Alai dipasombu Debata Jahowa pe masa angka i mamolus sian tongatonga ni huriaNa laho papitahon haporseaonta do asa marsihohot di poda ni angka panurirang dohot apostel ni Tuhan Jesus Kristus paima ro Tuhan i.

d)    Nang sian na robi, dung tubu huria ni Tuhanta di portibi on di ari ni Tondi Parbadia, bongot ma angka parpoda haliluon na malo manghatai (Marpollung tubu) mamutar balikkon hasintongan laho manait roha ni baoa dohot boruboru na so togu, ima angka na so marholong ni roha di hasintongan dohot di hatigoran na sinuan ni Tondi parbadia dibagasan roha ni angka na porsea. Umbahen dipaingot si Judas saluhut huria ni Tuhanta Jesus Kristus  mandok: “Hamu angka haholongan, ingot hamu ma hata naung nilumbahon ni angka apostel ni Tuhan Jesus Kristus”. Tangkas situtu do diida si Judas disi masuk angka parpoda haliluon tu huria ni Tuhan i, masa ma perpecahan, torop ma na targasip laos mago ala marbalik sian poda haporseaon na sintong i. Boasa mago nasida ? on do alana: “Ala mangadop di jolma dohot parbinotoan dohot hamoraon, jabatan/huaso na di portibi on, gabe disoadahon asi ni roha dohot holong ni Debata Jahowa naung mansai patar marhitehite Jesus Kristus. Jala jumonok dope nasida tu tingki ni na masa i unang hita angka na mangolu di ari parpudi on marnida ulaon ni Tuhan Jesus Kristus.” Torop ma sian nasida marungutunggut ala hurang merasa puas ala so siat tahi ni rohana di huria ni Tuhan i. Ai dirimpu nasida do jolma nampuna huria i umbahen disoadahon Debata nang Jesus Kristus (Heb.6:4-6). Jala na deba hinorhon ni pangiburuon ala ni roha late dohot ginjang ni roha na so longkang hian dope sian dirina dung gabe Kristen. I ma na porsea na so dung paubahon rohana (Pil.2:14; Judas 17-19).

e)     Diondolhon si Judas do pitu poda na mansai arga disuratna on sihangoluhononta angka na porsea di Tuhan Jesus Kristus, ima:

ü  Puliuli diri: ngolu, parsaoran, parugamaon diatas haporseaon na badia situtu (ptds.Hebr.10:35-38)

ü  Martangiang dibagasan Tondi Parbadia, unang holan hasomalan sambing (Rom.8:14,16,26)

ü  Mangaramoti diri di bagasan holong ni roha ni Jesus Kristus, asa gabe parholong (1 Ptr.4:8).

ü  Maimaima di asi ni roha ni Tuhan Jesus, manghirim dihaimbaruon sogot I (Pangk.2:10)

ü  Mangajari angka na ganggu roha/ na so togu laho paluahon tondi nasida sian hamagoan i ma hamatean saleleng ni lelengna i (api naroko). Dan.12:3.

ü  Marasi ni roha di sipelebegu (mamaritahon barit ana uli) huhut pasiding dosa haramunon nasida naung gabe adat hasomalan di angka na so mananda Debata dohot Kristus ( 1 Kor.6:9-10).

ü  Manghagigihon abit (pangalaho) nasida naung niramunan ni hagiot ni sibuk nasida (Jak.5:19-20; Pangk.22:11)

f)     Huria ni Tuhanta na hinahoongan dibagasan Jesus Kristus, pauliuli haporseaonta na badia situtu i ma mandok: unang mansadi hita padomuhon dirinta dohot Jesus Kristus rap dohot na porsea tumangihon hataNa (1 Kor.6:17) Asa:

ü  Martangiang dibagasan Tondi Parbadia; na so tupa mansadi angka na porsea martangiang saleleng di portibi on dope ibana, beha pe situasi di ngolunta be. Alai ingkon dibagasan hasintongan i ma haporseaon, holong dohot pangkirimon na mangolu. Unang nionjar ni emosi dohot ambisi manang biar. Alai jumolo pos ditutu rohanta na ditangihon, dijalo dioloi Debata do nasa na tapangido tu Ibana marhite Jesus Kristus (Luk.18:1; 1 Tess.5:17; Joh.14: 13-14).

ü  Mangaramoti diri di bagasan holong ni roha ni Debata; nasa naung di bagasan Jesus Kristus i do parholong n iroha, angka naung mananda jala manghangoluhon haholongon i, tanda ni jolma na imbaru, naung mambongoti parmulaan ni hangoluan saleleng ni lelengna nang pe di portibi on dope ibana mangolu, marsahit, mate, dohot na asing (2 Kor.5:17)

ü  Maimaima di asi ni roha ni Tuhan Jesus Kristus; unang ma sumurut ringgas ni rohanta mangulahon nasa na denggan saleleng mangolu (dilehon Debata di hita tingki, kemampuan, kesempatan/gogo), alai naeng ma sude angka na porsea di Tuhan Jesus Kristus partondi na girgir mangoloi Debata dohot Kristus huhut marlas ni roha mangkirim di bagasan habengeton dohot tangiang (Pat. Rom 12:11-12).

ü  Mangajari na ganggu roha; asa marpos ni roha di Hata ni Debata na sintong i nang pe lumambat tajalo manang taida hapapatarna di ngolunta. “HataMi do sulusulu ni pathu jala hatiuron di dalanku” (Pslm.119:105).

ü  Marasi ni roha di angka sipelebegu dohot na mandele (murtad) huhut manghabiari dosanasida; sai tahaggihon ma nasa dosa dohot hajahaton na metmet nang nab alga, na buni nang na patar asa tarboan hita ang ana lilu dohot sipelebegu tu harajaon banuaginajng marhite hata dohot pambahenanta na niida ni matanasida (pat. Rom 6: 13).

ü  Manghagigihon abit (pangalaho/ adatnasida) na niramunan ni sibuk (hagiot ni daging) nasida; nasa na porsea unang be dais tu bango  hasipelebeguon dohot parsombaon tu begu marhitehite pangulpuhon ni datu /hadatuon, gunaguna, tabastabas (mistik, spiritisme, okultisme) angka na paotootohon jolma laho patagas hisap ni dagingna (2 Tim.3;1-9, pat.Ul.Ap.15:20; 21:25; 1 Kor.10:14)

g)    Huria ni Tuhanta na hinaholongan dibagasan Jesus Kristus, ndang tarbahen so songgop angka pangunjunan tu nasa jolma di portibi on nang marhite angka haimbaruon na binnoan ni jaman on, nang marhite ragam ni angka hapistaran dohot ragam nihabisuhon na so sian Debata Jahowa, na marhapatean tu panolsolion na so haulahan di ganup jolma na manundalhon Debata dohot Jesus Kristus. Jala ndang tarbahen so adong angka haliluon na manggaori huria ni Tuhanta saleleng di portibi on sahat ro diharoro ni Tuhanta Jesus Kristus. Jala ingkon sian bagasan ni Huria i sandiri do i mullop dalan parsegeon ni Tondi Parbadia i laho papitahon haporseaon, holong n iroha dohot pangkirimon ni hitana porsea di Tuhanta Jesus Kristus, i ma angka naung tarpillit sian tahi dohot lomo n iroha ni Debata hian (Pat.1 Ptrs.4:17; Yeh.9:4-6; Jer.25:29). Amen.