(Penghakiman Yang Terakhir)
Sepanya 1: 1 – 7
1.
Huria
ni Tuhanta na hinaholongan dibagasan Jesus Kristus. Minggu on ma hita mamasuhi
minggu ujung taon parhuriaon, laos songon mingu parningotan di angka naung
monding. Jala taboto do, ia partingkianta ima partingkian na linear, na torus
mardalan tu joo, jala diujungna marujung do. Adong do ujung ni saluhut. Ujung
ni saluhutna I na naginnoaran ari ni Tuhan i. Mansai gogo do dipaboahon si
Sepanya sadarion joujou tu hita mandok; tongkinnari nama, tongkinari nama, ro
ma ari ni Tuhan i. “Ai jonok nama ari ni Jahowa” (Ay.7b); sudah dekat dan
datang dengan cepat sekali (a.14). Aha ma huroha na masa di ari ni Tuhan I ? Didok
; “nunga dipadiri Jahowa sada pelean sipotongon” (ay.1). Aha do I ? Ima ari
paruhuman ni Jahowa. Ai n aro ma Jahowa songon Panguhum (hakim) na mengadili jala mandabu uhum tu nasida.
Boasa ? tutu, digoar Israel do Jahowa songon “Ama” na manghaholongi nasida.
Alai, holan di bibir do I, ianggo pangalaho nasida tung holan na mambahen sogo ni
roha ni Jahowa do.
2.
Memang
ianggo panurirangon ni si Sepanya on martudutudu tu penghancuran ni Jerusalem
do on di piga taon na mangihut. Alai adong dope na dumao sian i. Ai tong do on
martudutudu tu ari parpudi, di haroro ni Tuhan Jesus n apaduahalihon, laho
manguhumi sandok portibi on. Tumangkas I tajaha di Mateus 24. Marujung ma disi Sejarah
ni portibi on, marongso ma sude na di portibi on; jala ndang adong nab oi Manahan.
Dung I dabuon ni Tuhan Jesus ma uhum tu angka parjahat, ima angka na so olo
manjalo Tuhan Jesus gabe sipaluana, jala na so olo paubahon roha;dabuon ni
Jesus ma nasida tu na holom marimpotimpot, tu api naroko. Disi ma masa songon
na di turpuk on, masa ma na patunggoripon.
3.
Alai
sebalikna, ia ari ni Tuhan I gabe las n iroha do I di hita angka na porsea,
angka naung manjangkon Jesus gabe Sipalua di ibana, angka nao lo paubahon
rohana. Ai disi ma boanon ni Tuhan Jesus hita masuk tu harajaon na manongtong I,
di surgo manjalo hangoluan na salelenglelengna, disi ma hita torus manorus
raphon Debata. Jala dua ma tingki nab oi gabe ari ni Tuhan I di hita:
naparjolo, ima ari haroro ni Tuhan Jesus paduahalihon na gabe ujung ni Sejarah ni
portibi on. Alai na paduahon, ima arii hamamatenta, di na tos hosanta jala
marujung ngolunta sian portibi on.
4.
Huria
ni Tuhanta nahinaholongan dibagasan Kristus Jesus. Na gabe sungkunsungkun tu
hita; “Aha ma sibahenonta?”. Ala didok, nunga mansai jonok, hatop nama. Isarana
molo ro mangkuling begeonta sirene peringatan dini ni Tsunami, pintor hatop do
hita marlojong. Nuaeng, aha ma na ingkon bahenonta ?: Sada joujou na torus manorus
sian Hata ni Debata taringot tuson ima asa “Dungo”, rade, waspada. Boasa? Ai ndada
holan jonokknama, alai na umborat didok dope: “songon panangko borngin do
haroroNa” (jaha; 1 Tess.5:2; Mat.24:43; 2 Trs.3:10; Pangk.3:3). Ai ndang hea
martelepon manang mar-wa panangko paboahon na naeng ro ibana manangko, alai
tompu do i. I do ala mansai jamot jala denggan tasordak jala tahinsu bagasta.
Sai tapargunahon ma angka alat pengaman, jolo tapamanat, tapareso do I asa laho
hita modom, dang i? ima ala tatagam sotung annon ro panangko. I ma tanda ni
hadungoon, haradeon, kewaspadaan. Boha ma ia haradeon manang hadungoon managam
haroro ni Tuhan Jesus I ?
5.
Huria
ni Tuhata laho managam haroroNa I aha ma siparadeonta? Ima Haporseaon. Ai
haporseaon I do na paluahon hita. Molo porsea hita di Tuhan Jesus, jala tajalo
Ibana gabe SIpalua di hita, nunga ditanda Jesus be hita; I ma gabe materai na
gabe jaminan paboa nunga bebas hita sian uhum hamagoan i. Haporseaon I do anak
hinsu laho bongot tu Banuaginjang. Ala ni I, sadarion ma, molo adong dope sian hit
ana so tangkas dope porsea di Tuhan Jesus, na so manjangkon Jesus dope gabe
Sipalua di ibana, sadari on ma unang paima annon manang marsogot, alai sadari
on ma, jangkon ma Jesus gabe Sipalua di ho. Menundanunda mengambil Keputusan itu
berarti kita menunda jaminan masuk surga kita. Alaimolo naung tangkas hita
porsea di Tuhan Jesus, molo husungkun hamu: “Molo mata hamu saonnari, ise ma
hamu na porsea na tutu situtu tu surgo ibana?” Pasti sude do hita martudu
mandok: “Ahu pasti masuk surgo, ala nunga porsea ahu di Tuhan Jesus.” I do na
rumingkot.
6.
Alai,
ingkon tarida do parbue manang hataridaan
ni haporseaon I di ngolunta siganup ari. Ima marhite parange, parulan,
panghataion na hombar tu lomo n iroha ni Debata. Jala molo taradoti ngolu na
hombar tu lomo n iroha ni Debata marhite
na mangaradoti patik nang HataNa ima tanda ni hadungoon, kewaspadaan,
kesiap-siagaanta manomunomu haroro ni Tuhanta Jesus. Didok Hata ni Debata: “Unang
jumpangsa hita martihas, alai ingkon badia ma. Asa boi taradoti ngolu na badia,
ingkon tongtong ma taingot hita: “Atik annon ro Tuhan I, atik sajomnari, atik
satonga arinari, huradoti ma ngolu na badia, asa di n aro Tuhanki, dapotsa au
so marlindang, so martihas. Di na sahali, ala sesuatu hal, gabe tartading manang
na piga halaknari angka tentara di medan perang. Alai tingki marsirang, didok
komandanna I do paboa pasti ro do ibana menjemput nasida, alai ndang dipaboa
sadihari. Sai dilului komandanna I do cara asa boi alaponna pasukanna na
tertinggal i. Alai ingkon tangkas maretong di tingkoi, ai mansai sobu dope
parporangan i. Tompu ma ro komandan I mamboan kapal menjemput nasida.
Tarsonggot komandanna i. Ai disi sahat ibana tu inganan I nunga sude rade
pasukan I siap berangkat. Dipardalanan disungkun komandan I ma nasida: “Ai
nunga diboto hamu do nanaeng ro hami menjemput?” “daong”, ninna pasukan I, “sian
dia bootoonnami ai so adong alat komunikasi.” “Jadi, boasa boi pintor siap
berangkat hamu?” “Oh…, ganup ari do hami siap siaga, atik beha sadiahri ro
komandan I, nunga pintor rade hami borhat”, ninna pasukan i.
7.
Huria
ni Tuhanta boha do ia hita? Molo tongkinari ro ma ari ni Tuhan I menjemput hita
?, boha nunga siap berangkat hita? Torop
dope ruas ni huria n mansai maol martangiang mandok: “Mangolu manang mate pe
ahu di bagasan Tuhan Jesus do ahu”. Hape I do nian sada tanda nia kepastianta.
8.
Na
mangihhut tangkas do didok turpuk on, ternyata sude arta, hamoraon ,
hasangapon, hagabeon na tapeop di ngolu on ndang boi I mangondihon manang
paluahon hita sian uhuman i. Holan haporseaon di Tuhan Jesus do nab oi paluahon
hita. Ala ni I dipaingot endenta i: “unang haposi arta di portibi on” ( 1 Tim
6:17). Unang gabe halak nao to hita songon halak na mora jong na di Lukas 12:
16-21 (tajaha ma), na mambahen artana gabe haposanna. Hape di n aro Tuhanta I mambuat
hosana, ndang tarbahen artana na godang I manundati manang manambai umurna
nanggo apala semenit. Ala ni I, unang olo lalap hota paetongetong sadihari
manang andigan ma ro ari ni Tuhan i. Halak nao to do na songon I, angka na naeng
mengangkat dirina gabe Debata. Ai didok Jesus do; “ndang adong na umboto
andigan I masa, andigan ombasna, holan Ama I do na umbotosa ( Mat.24:36). Unang
pasuda tingkim tusi. Na ringkot ima; dungo, rade, waspada, siap siaga.
9.
Huria
ni Tuhanta, ala ni I, binsan dipaingot hat ani Debata hita sadari on, unang ma
leas rohanta. Songon sirene pringatan dini ma on asa siap siaga jala sigop hita.
Ai tung na mengerikan do ari ni Tuhan I di angka na so olo siap siaga jala
sigop hita. Ai tung na mengerikan do ari ni Tuhan I di angka na so olo pauba
roha. Jala ingot ma, ndang hea lomo roha ni Debata asa tu paruhuman manang tu
naroko hita. Alai taida ma holong ni rohaNa I, pola dilehon Tuhan Jesus, Anak
haholongan ni rohana I, pola mate tarsilang as dilehon di hita hangoluan na
manongtong I (Joh.3:16). Ima tajalo, tajangkon ma Jesus I gabe Sipalua hita.
Saonari ma unang tunda be, asa molo ro ari ni Tuhan I, gabe ari las n iroha ma
di hita, asa disi ma jaloonta haluaon na singkop, boanon ni Jesus ma hita tu
SurgoNa I. Amen.
