(Segala Sesuatu Diciptakan Didalam Kristus)
Kolose 1 : 15 – 20
I.
Patujolo
Arga
do panghophopon ni Debata tu portibi on i ma marhitehite Jesus Kristus. Nunga
pola mate Ibana di dolok Golgata laho pasaehon saluhut dosanta. Ibana do Anak
ni Debata na mamorsan dosa ni portibi on. Ala ni dapotan hangoluan
salelenglelengna do halak na marhatopothon Jesus mual ni haluaon ( Joh. 3: 16).
Pangantusion na songon i do pinatorang ni apostel Paulus tu huria Kolose di
turpuk on laho mangadopi angka ajaran sesat (parpoda haliluon) na ro tu huria
Kolose. Poda haliluon on nunga mengganggu haporseaon ni ruas nihuria, so diboto
be dia na sintong dia na sala, ai godang do i na manait roha jala na berbau
filsafat na digemari uju i. Ajaran palsu on mandok paboa holan marhite patik
(taurat) ni Jahudi do dapot haluaon gabe ingkon radotan ma aturan taringot tu
sipanganon, siinumon, ari raya, sabat dohot na asing. Taringot tu Jesus i didok
nasida, ia Jesus i holan sipalua ni tondi (jiwa) ni jolma do, ndang
dohot paluahon sandok hadirion ni jolma i. Ra nunga mulai ro bibit ni ajaran ni
aliran Gnostik uju i, ima na mandok, ia Jesus i holan jolma na somal do i, na sarupa
dohot angka na asing na mengantarai jolma tu Debata. Tung mansai toru do
dibahen nasida “keberadaaan” ni Tuhan Jesus. Ala ni angka poda na lipe i ma, ro
do si Epafras, ra na pajongjong huria di Kolose, paboahon na masa i tu si
Paulus laho manjalo pangajarion. Gabe ditongos si Paulus ma surat on dalanna
mangalehon poda na sintong huhut patoguhon roha ni huria i maniop na sintong i.
II.
Hatorangan
Dibagasan
turpuk on ma di patorang tangkas taringot tu Tuhan Jesus, gabe tarida ma
keunggulan ni Jesus sian jolma dohot debata na asing, ima:
a)
Ayat 15: Jesus do suman ni Debata. Molo didok suman
ni Debata na marlapatan do i dibagasan Jesus ma hita mananda Debata. Molo di
tingki Padan na Robi dipatuduhon do Debata na so tardungdung (transenden),
alai di bagasan hadirion ni Jesus gabe rap Debata dohot jolma (immanen).
Jumpang hita do pangantusion si songon on nang di tangiang ni ruas siganup ari
na mandok : “Ale Tuhan Debata na di Banuaginjang, di Banuaginjang pe Ho (transenden),
alai jonok do Ho di angka na manou GoarMu (immanen)”. Dipatuduuhon i do
naung diumpat parholangan ni jolma dohot Debata. Na mangihut didok muse: “Ibana
do patujolo ni nasa na tinompa.” Andorang so ojak dope portibi on nunga
ditodo Debata AnakNa Jesus Kristus. Di bagasan Debata nunga mian Jesus, ai
AnakNa do Ibana. I ma patuduhon hajongjongan ni Jesus Kristus dang dos dohot na
tinompa. Dia bukan mahklauk ciptaan, na dos dohot surusuruan, songon
natinuduhon ni angka parfilsafat Junani. Sude na adong di Debata adong do di
Jesus (Pil.2:6 Atik pe rupa ni Debata di Ibana, ndada songon na nidobo dirajumi
rohana tudosna i tu Debata). Ibana do digoari Anak ni Debata. Di Mateus 3: 17 On
do Anakku, Haholongan i; halomoan ni rohangku do Ibana!. Jala di Joh.14:11
didok muse: “Porsea ma hamu di Ahu: Di bagasan Ama i do Ahu jala di bagasan
Ahu do Ama i; molo so i, ala ni angka ulaon i ma hamu porsea!”
b)
Ayat 16: Dibagasan Ibana do ditompa saluhut. Lapatanna
sahadirion do Debata dohot Jesus Kristus dibagasan pangantusion Trinitatis di
ulaon panompaon i, Jesus do parhitean ni Debata. Marhitehite Jesus i naeng
tarida ulaon dohot huaso ni Debata sitompa saluhut. Ndang adong sian naung
tinompa i na so sian pamotoan ni Jesus Kristus. Jala di Johannes 1: 1 +14 didok
paboa Jesus i nunga adong di mula ni mulana, jala Ibana do Hata i. Marhite
Ibana, Hata ni Debata do ditompa saluhut na adong. Na tarida dohot na so
tarida. Na tarida marhite pemerngan portibi on dohot na so tarida dope.
Dipatuduhon i do paboa godang dope sian na tinompa ni Debata na so tarida di
pamerenganta, alai saluhutna patar do ianggo di adopan ni Tuhanta Jesus
Kristus. Jala ndang adong na manjadi na tinompa i ianggo so marhite sian Ibana
(pat. 1 Kor.8:6)
c)
Ayat 17: Jesus dijolo ni saluhut: Marhite pandohan i
dipatuduuhon i do paboa Ibana do bonana dohot ujungna (alpa dohot omega).
Ibana na marhuaso padomuhon nasa na tinompa dohot Debata. Ndang adong na asing
na boi mangula ulaon i. Ibana do dijolo, asa ndang adong sian nasa na tinompa i
na patut pajolohon dirina di adopan ni Debata, na mangetong dirina jumago sian
donganna. Dipatujolo Debata Ibana asa boi padomuhon (memperdamaikan), manogu
angka na tinompa i tu Debata.
d)
Ayat 18: Jesus do ulu ni Huria. Huria ima
hataridaan ni daging/pamatang ni Kristus di tano on. Boi do antusanta pandohan
on molo tajaha 1 Korintus 3:11 “Jesus do ulu dohot ojahan ni Huria ni Debata
na adong di tano on”. Dipatangkas Apostel Paulus do muse di 1 Korintus
12:12-24 hasadaon ni huria i songon hasadaon ni pamatang nijolma, di ragam ni
angka ulaonna be, alai sada do ianggo ulu i. Asa ndang patut jolma
pajongjonghon dirina gabe dasor ni huria, nang pe tahaporseai do na dipangke
Debata do jolma gabe ulaula ni Debata di tongatonga ni huria i sandiri. Dipapungu
do huria i ndada holan sian sada marga manang kelompok, alai sian sude bangso,
houm, marga ni sandok portibi on, termasuk ma haak Kolose (ay.21-22). Dipasada
ma sude halak, bangso, marga na marragamragam i gabe sada songon pamatang ni
Kristus ( 1 Kor.12:27; 1 Kor.10:17; 12:12,20). I do na taokuhon di Konfessi
HKBP Bindu 8 na mandok: Ia huria, ima parpunguan ni halak na porsea di
Jesus Kristus. Molo didok “Jesus Ulu ni Huria”, marlaptan, hita do
pamatangNa jala ndang tarsirang Kristus I sian huria i. Ibana do parjolo hehe
sian angka naung monding i. Berarti: berbicara tentang Kristus adalah berbicara
tentang kehidupan, bukan tentang kematian. Ndang hamatean be ujung ni
pardalanan ni jolma, alai hamatean i nunga ditaluhon Jesus marhite haheheonna
sian na mate. Laos dipatuduhon ima paboa hamatean ni daging ndang sihabiaran ni
angka na porsea. Alai gabe sada dalan do i manopot na manongtong i songon na
nidok ni Apostel Paulus di 1 Korint 15: 45-50 “Saluhut angka na porsea ndang
marujung dihamatean, alai di haheheon do.”
e)
Ayat 19: Jesus do nampuna hagogoon: Dibagasan huaso
ha-DebataonNa i do hagogoonNa, mangatasi nasa hagogoon na adong di portibi on.
Dibagasan hadirion ni Jesus do tarida hagogoon sian nasa hagogoon. Manuanhon
pos ni roha do i tu angka na porsea. Di ragam ni huaso hagogoon na adong di
portibi on na mambahen halak Kristen mabiar, alai adong do na sun hinagogo na
tuk mangurupi, ima Jesus Kristus.
f)
Ayat 20: Jesus do pardengganan. Mulai sian padan
na robi, dung mardosa jolma, nunga adong holangholang dohot Debata na sun badia
i. Dipillit Debata do angka jolma na
gabe ulaulaNa padomuhon jolma dohot Debata. Adong panurirang, malim dohot angka
raja. Alai ndang singkop ala hot do jolma
di hadosanna. Alai dipasingkop do i marhite haroro ni Jesus Kristus.
Laho pasaehon dosa ni jolma. Jesus ma na ingkon mate di hau na pinarsilang di
dolok Golgata laho patupa pardengganan (Rom 3:25; 5:11; 1 Joh.2:2; 4:10). Ala
ni i ma, uju mate Jesus, maribak do hirehire na di bagas joro i, ima simbol
naung mulak mardomu hita tu Debata marhite Jesus Kristus. I do ala barani Jesus
mandok di Johannes 14: 6 “Ahu do dalan i dohot hasintongan dohot hangoluan.
Ndang adong na sahat tu Ama i, ia so marhite sian Ahu.”Alani i jumpang do
pardengganan dohot Debata di angka jolma na tangkas manghaporseai Jesus naung
mate jala hehe sian na mate.
III.
Sipahusorhusoron
1)
Disosohon
tu huria Kolose nang tu hita asa hot jala ojak marhaporseon na togu di poda na
sintong taringot tu Jesus Kristus. Unang olo di paotooto manang aha pe, ala ni i
tarjou do huria laho marmahani, manjamothon dohot manangianghon ruas ni huria
asa unang adong na manimbil sian pangantusion na so sintong di Hata ni Debata
tarlumobi panandaon tu Jesus Kristus.
2)
Naeng
ma parbuehononta di ngolunta lapatan ni naung sintong hita porsea tu Debata
Ama, Anak dohot Tondi Parbadia. Ndang adong sipangasahononta nda holan Debata
pargogo na so hatudosan i do. Ibana do tahaposi jala tahaporseai pasingkophon
na ringkot di ngolunta. Ai ndang adong na so tarpatupa Debata (Luk.1:37).
3)
Tuhan
Jesus do Anak ni Debata naung ro tu portibi on. Ibana do parhitean ni Debata
laho patupahon haluaon ni jolma di portibi on. Marhite Jesus Kristus na
tongtong do mangula Debata nang Tondi Parbadia laho mandongani dohot mamasumasu
ngolu ni hita manisia. Ido nanaeng tangkas hatindanghononta di adopan ni Debata.
Unang be ganggu hita di haluaon na binoan ni Debata marhite Jesus Kristus.
“Ai sada do
Debata, jala sada do nang Pangulu ni Debata dohot jolma, i ma jolma Kristus
Jesus i. Dilehon do dirina, bahen tobus humongkop saluhut, i ma
sihatindangkononhon di tingki hadenggananna.” ( 1 Tim.2:5-6).
4)
Topik
ni Minggunta mandok: “Sude Ditompa Marhite Kristus” (Segala Sesuatu Diciptakan
Didalam Kristus) jala domu tu Minggu Ekologi, taringot tusi didok do di Konfessi
HKBP 1996 bindu 5 Kebudayaan Lingkungan Hidup No 2, Tahaporseai jala
tahatindanghon do : Ulaon ni Jesus Kristus paluahon jolma i, nasa na tinompa
i songon i portibion sandiri (Kol. 1: 15 20; Rom 8: 19 - 33). Marhite on : Tahatindanghon
do tanggungjawab ni jolma pangoluhon sude na tinompa ni Debata (melestarikan)
asa boi ibana mangula, hipas, dohot marsonangsonang (sejahtera). Psalm 8: 4 -
10. Taalo do angka usaho na manegai lingkungan marhite na manutungi dohot
manabai hau di tombak manang harangan (5 Musa 20: 19 - 20). Taalo do angka
usaho na mangalitohi aek dohot awang-awang (udara) nang aek panirisan (limbah)
na marisi rasun sian angka pabrik-pabrik, marhite na so manganturehon halalaho
ni aek panirisan i dohot pencemaran udara, pola gabe manegai aek siinumon dohot
parhosaon ni jolma (polusi/pencemaran lingkungan), paheba Psalm 104: 1 - 23;
Pangungk. 22: 1 - 2. Ala ni i di Minggu Ekologi on tasosoi ma ruas ni
hurianta laho mangaramoti angka na tinompa ni Kristus. Amen.
