Jamita Epistel Minggu XV Dung Trinitatis – 28 September 2025 (Minggu ekologi)

Sude Ditompa Marhite Kristus

(Segala Sesuatu Diciptakan Didalam Kristus)

Psalmen 148: 1 – 14

 

1.     Huria ni Tuhanta na hinaholongan dibagasan Jesus Kristus, lima nindu parpudi di buku psalmen on ma hira puncak ni sude buku Psalmen. Molo tauji tabayangkon na nidok ni turpuk on, jala tapaihut muse tu Psalm 150, dihehei jala dihara parpsalmen i do sandok portibi on asa masiboan alat musikna be laho mamuji Debata….asa rap marende. Sude na adong di ginjang ima: surusuruan dohot paranganna, mataniari, bulan, langit, aek na di langit dohot na di laut; dohot sude  na di tano on ima; binatang laut, ular naga, samudera raya, api, hujan es, salju, kabut, habahaba, dolok, robean, sude hau, binatang liar, gulomit, dohot pidong na habang. Jala di turpuk on dijou asa nang sude angka raja, bangso, pembesar, pamarenta, sude dolidoli, na marbaju, natuatua sahat tu naposo, sude dijou, dihara, dipahehe asa rap marende mamuji Debata. Luar biasa …

2.     Ido na nidok ni si Calvin, ama ni huria i: “dunia ini ibarat suatu Theatron Gloriae Dei”, atau “sebuah panggung untuk kemuliaan Tuhan”. Nasa na tinompa ingon mamuji Debata, songon alusna tu pambahenan ni Debata. Alai jotjot do ndang tabege jala ndang tasadari be ende ni na tiompa i. Hape molo hehe hita manogotna i, pintor marende do angka pidong, manuk manang sese paboahon naung ro ari na imbaru. Angka binatang di robean pe pintor marlas ni roha do. Molo tabege soara ni ombak ni laut, gabe sada ende na uli do i, na masiaduaduan, jala jotjot do i gabe inspirasi di angka komponis na tarbarita laho menggubah ende na uli. Disi ro mataniari pintor mangerbang do angka bunga paruarhon angurna. Molo tapahohom dirinta di toru ni hau na potpot na godang di tombak, begeonta do soarana songon na marende, marhusip, berdesir, semilir diombus alogo. Molo ro borngin, molo tapahohom dirinta, begeonta do soara ni angka binatang hutan, kelelawar, nang angka gulomit pe songon ende na uli. Taida do nang hinauli ni bulan dohot angka binatang di langitan i. Sudena i, gabe ende ni angka natinompa i, na gabe pamujionna tu Sitompa ibana. Molo sai tapamanat angka i, tutu situtu ma hilalaonta, ia portibi on ima Panggung Kemuliaan Tuhan. Alai, ala kesibukan ni jolma, ala godang ni angka soara na tabege, isara ni soara ni halak na asing, soaranta sandiri, soara ni ekonomi, soara ni politik, soara ni karejo, soara ni angka ugamo, soara ni angka adat, ianangkon, sipanganon, parabiton, dohot lan soara na asing dope, jotjot gabe so tabege be soara pamujion ni angka na tinompa i. Hita pe, gabe so tahilala be hinauli ni pamujion nasida i.

3.     Huria ni Tuhanta, sian dia do haruar ende pujipujian? Ima sian roha mauliate. Sian dia do ro roha mauliate ? Ima sian panghalonganghonon, dari sebuah kekaguman. Sian dia do ro kekaguman ? ima sian roha na olo mamilangmilangi na binahen ni Debata. Ima na masa jala pinatupa ni si Psalmen on:

Ø  Parjolo, marende do ibana mamuji Debata, ala dihatindanghon jala dihalonganghon ibana, paboa sandok portibi on, termasuk ahu dohot na adong di ahu, tung na tinompa ni Debata do i, ai Ibana do mandokhon gabe tartompa ma saluhut (ay.5b). Molo tauji mangarimangi natinompa ni Debata, pasti longang, pasti terkagumkagum do hita. Molo tabereng parhusoran ni mataniari di arianna, bulan di bodarina, haroro ni udan di tingkina, adong musim panas, musim dingin, na patubuhon suansuanan gabe adong kehidupan. Diatur Debata do saluhutna i gabe berkesinambungan. Ekosistem na denggan nabinahen ni Debata, i do menjamin kelangsungan hidup ni sude na mangolu (ay.6). Ditompa Debata do suansuanan, na mangalehon hosa tu jolma. Dilehon suansuanan dohot pinahan, naboi panganon  ni jolma. Ditompa do jolma na manjagahon asa mangolu angka na tinompa. Adong logo ni ari, adong muse ari parudan na mambahen tubu angka boni jala marparbue angka suansuanan. Dipaojak do angka na tinompa di ingananna be, asa teratur. Marhusor do portibi (bumi) secara konstan mambahen adong ari minggu, bulan dohot taon. Sude planet dipahundul di ingananna be, huhut marhusor mangihuthon natinontuhon ni Debata gabe ndang masiantuhan (ay.6b). Molo tapamanat tahe pamatangta sandiri; pamatangta on terdiri dari berjuta-juta sel, urat syaraf, otot dohot organ na marmansammansam, alai ditata, diatur Tuhanta do i sedemikian rupa gabe pamatang na mambahen hita boi mangolu dohot denggan jala hipas. Molo dipasorang Debata angka dakdanak tu portibi on marhite angka keluarga, dung hirahira sia bulan ditonun Debata posoposo i di bortian ni inangna, itu sebuah keajaiban, bukan ? Ala ni, naeng nian ganup hita sai mangendehon endenta i: “O Debata, tung longang do rohangku, molo hubereng natinompaMi”. Saluhut Bintang, hilap dohot ronggur, manghatindanghhon hadangaponmi”. Molo dung songon i antong, ingkon lam gogo ma endehononta: “Marende au, Tuhan mamuji Ho. O Debata, sangap do Ho” (BE.569).

Ø  Paduahon, marende do ibana mamuji Jahowa, ai sasada goarNa i do na timbul, diatasi hamuliaonNa i do tano on dohot angka  langit (ay.13). Ndang adong Debata na asing na songon Ibana. Mamujung do Debatanta i. Tung so adong do na boi patudoson tu Ibana ( 2 Musa 15:11). I do ala pola didok tu ganup jolma, asa unang adong na mambahen marangkup Debatanta. Molo olo hita marsomba tu angka debata dohot tu hagogoon na asing, ndang taokui be na mamujung do Debatanta i di hamuliaonNa. Ala ni i, haotoon do molo sai adong dope na olo porsea tu hagogoon na asing tarlobi molo olo dope porsea tu ulaon haholomon, tu datu pangulpuk, ajimat, sumangot, dna.

Ø  Patoluhon. Na rumingkot dope, marende do ibana mamuji Debata ala dipatimbul Debata do sada tanduk di bangsoNa (ay.14). Tung dipapulik Debata do bangsoNa i gabe bangso na gogo, na bolon jala na disegani angka bangso na asing (jaha Rom 9: 4). Ndang olat ni i, dibagasan Jesus Kristus AnakNa i, diparade Debata do tanduk haluaon tu sandok na porsea (Pat.Luk.1:69).

4.     Huria ni Tuhanta topik na sahat tu hita di minggu on ima; Sude Ditompa Marhite Kristus (Segala Sesuatu Diciptakan Didalam Kristus). Tahamuliatehon ma angka jadijadian ni Debata, unang ma tasegai, tasursari, alai songon mahkluk na tertinggi hita di tompa Debata dilehon do di hita mandat imagodei; sagombaran dohot Debata laho manjaga angka na tinompaNa. Naung dilehon do hita haimbaruon sian na robi i marhite Jesus Kristus, ala ni i marngolu na imbaru ma hita na manghaholongi angka na tinompa ni Debata. Ai marhite angka natinompana i do boi hita tarpasupasu jala mangolu di portibi on. Debata paloashon hita mengelola jala mamparhasseang sude na di lingkungan, alam sekitar gabe pasupasu dihita. Ala ni i topet di Minggu Ekologi on, disosoi do hita asa manjagahon kelestarian dohot keseimbangan ekosistem, mencegah polusi, pencemaran, pembuangan sampah sembarangan, paias pekarangan jabunta, perkantoranta, ingan parkarejoanta, jala pargodungon garejanta. Lam so marroha be na deba jolma holan laho mengeksploitassi alam so padohot melestarikan lingkungan. Ala ni molo marsoara nuaeng hita asa pro kehidupan bukan pro kematian. Tatulak ma angka usaha na laho manegai lingkungan alam sekitar dohot potensi na manegai ekosistem di laut, di darat, di dolok nang di dia pe isarana TPL (Toba Pulb Lestari, PT Dairi Prima Mineral (DPM), PLTU Pangkalan Susu, tambang (nikel, emas, silika), tekstil (rayon), dan beberapa pembangkit listrik tenaga uap (PLTU), seperti PT. Kallista Alam, PT. RUM, PT. Pajitex, dan proyek nikel raksasa di Maluku Utara (IWIP). Kerusakan yang terjadi meliputi pencemaran udara, air, dan tanah melalui pembuangan limbah, serta deforestasi dan kerusakan ekosistem.. Haluaon na binoan ni Kristus ima haluaon  ndang holan tu jolma alai dohot do mampanghorhon haluaon tu portibi on asa lam tu dengganna jala gabe pasupasu tu portibi on. Amen.