Debata Paimbaruhon Ngolu Ni BangsoNa
(Tuhan Memulihkan UmatNya)
Amos 9: 11 – 15
1.
Huria
ni Tuhanta na hinaholongan dibagasan Jesus Kristus, dilehon Debata do
pangungkapon tu sada jolma na porsea na manangihon jala marsihohot di Ibana. Na
marlapatan do pangungkapon laho patoranghon na naeng masa tu tingki na naeng ro
di parngoluon ni sada bangso manang taringot tu portibi on. Basabasa jala
silehonlehon ni Debata sambing do i ia pangungkapon. Ndada masa i holan alani pangidoan
ni jolma sambaing. Pangungkapon na patoluhon na masa tu panurirang Amos domu do
i tu parsorion ni bangso i uju panggomgomi ni Raja Jerobeam. Turpuk on ma na
parpudi di Buku ni si Amos na manringoti padan haluaon dohot paimbaruhon na dibahen
Debata tu tongatonga bangsoNa. Ro do rimas ni Debat jala diuhum do bangsona na
mardosa i. Alai ndada holan na manguhum Debaa, molo tung pe dipasahat Ibana
uhuman i ima tanda ni holongNa tu bangsoNa. Jala na pasti paluaonNa do nasida
jala paimbaruhon, ala impola ni panguhuman i ima laho paimbaruhon huhut laho
paluahon.
2.
(ay.11-12);
Pandaoni na parjolo ima mandaoni harajaon ni Daud manang Israel (11). Musu ni
Israel ima bangso edom naung parjolo dilengsehon si Daud, alai hehe muse marhuraja, jala dipudian ni ari muse
dilengsehon do (12). Dibuhai si Amos do dohot pandohan “di ari na sasada i” jala
di ay.13 didok; “na ro do sogot angka ari”. On ma pandohan na dipangke angka
panurirang laho paboahon haroro ni partingkian ni Mesias. Jala pandohan i pe
laho paboahon angka na naeng masa andorang so mamuhai partingkian na imbaru uju
ro Mesias i mamboan hamonangan dohot haluaon. Jadi pandohan ni si amos on
mandok naung jonok ne nama tingkina uju ro Tuhan i laho paulihon harajaon i.
Pandohan “pajongjjongonhu” ima na marlapatan dipauli muse, dipahehe muse. Harajaon
i digombarhon do songon “undungundung ni si Daud”. Harajaon i ndang digombarhon
songon bagasjoro ni si Daud manang harajaon ni si Daud na tongam i. Nuaeng,
harajaoni digombarhon songon undungundung naung malengse jala sega. Harajaon i ndandg
marlapatan be jala ndang mararti ala kondisi naung gale jala ndang margogo.
Bangso naung madabu jala malengse i naeng paulihon ni Jahowa. Harajaon i dipajongjong
muse songon na uju i. Hamulian ni harajaon i sai ro do muse jala pinajongjong
dibagasan hamuliaon uju di Harajaon ni si Daud.
3.
Na
mangihut muse, (ay.12);Asa nasida manean pasipasi ni Edom dohot saluhut bangso
parbegu angka na targoar tu goarhu, ninna Jahowa, na pasauthon songon i. Harajaon
ni Daud dipajongjong do muse di ari i jala harajaon na dipauli i muse sahat
manghaliangi angka pasipasini Edom jala manggomgomi angka bangso na asing. Sian
Sejarah historis ia bangso Edom ima musu ni bangso Israel. Alai dunkon dipauli
Debata laho pajongjong harajaon i, sai adong ma bangso na maralo na gabe musu
nasida. Ingkon paimahon bangso Israel do andigan sogot nasida gabe sada bangso
na bolon asa unduk nasa bangso tu nasida. Disuriranghon si Amos do hamubaon ni
angka bangso asa saluhut bangso manjou goar ni Debata. Saluhut bangso Debata do
nampunasa jala nasida saluhut unduk tu Ibana. Sifat nang karakter ni Debata ingkon tarida ma di
angka nasida. Manaluhon dohot menguasai Edom ndang holan bersifat militer, alai
pasadahon partondion tu Harajaon Daud na dipaimbaru.
4.
Ay.13-14
manggombarhon hadumaon ni harajaon i na gok angka hasil ni pangulaon na
berlimpah. Molo tung pe naung disurirangkon haraparon dohot na na marsik tano
na naeng masa (4:6-8), alai sain a ro ma pandumaan, ima masa ni Mesias na
imbaru pasahathon tu nasida pandumaan jala paulihon, paimbaruhon nasida. On ma
padan ni Debata tu si Musa na tarsurat di 5 Musa 30: 1 – 3. Dungkon masa
pangalaosion ni bangso Israel dohot panguhuman masa tu nasida, paulihon Debata
do harjaon i muse.
5.
Na
parpudi di ay.15 manggombarhon harajaon dohot padan na manongtong. Suanhonon ni
Debata sogot bangsoNa I jala ndang si umpaton nasida. Hasesaan ni Debata do
bangso Israel na hot permanen jala angka pasupasu na I sain a ro do torus sian
Debata. Pandaonan dohot angka pasupasu ni padan naung dipasahat songon padan na
so bersyarat. Na disuanhn Debata do nasida jala ndang umpaton, manggombarhon
hagogok ni padan di tano na naung dilehon Debata tu si Abraham. Hape marbalik
do sude naung di pasahat si Amos di nbindu 5: 2, disi didok naung madabu do
bangso I jala ndang hea be dipahehe. Alai di ari na naeng ro, pandaonan na masa
ia Harajaon I ndang hea be malengse.
6.
Huria ni Tuhanta topik ni minggunta mandok: Debata
Paimbaruhon Ngolu Ni BangsoNa (Tuhan Memulihkan UmatNya) jotjot do hita songon
bangso Israel i ndang satia jala ndang ingot di denggan basaNa. Hape molo ingot
do bangso Israel di 1- 5 Musa (Kejadian-Ulangan) ima kitab Pentateuch na somal
diguruhon dohot dipaingotingot tu angka pinompar Israel taringot tu Sejarah ni
ompu nasida na dipalua Debata sian parhatobanon Misir dipatongon tu jampalan na
lomak ima tano Kanaan, tontu ndang manimbil nasida sian Debata Jahowa. Alai ala
dihalupahon nasida Sejarah keselamatan ni Debat tu ompunasida gabe marlomolomo
ma nasida jala gabe mangalaosi uhum nang patik ni Debata pola do ingkon dapotan
uhuman nasida. Alai mauliate ma tadok tu Tuhan Debata nang pe diuhum bangsoNa
sai dilehon do dalan pauliulihon. Panguhuman songon sada dalan laho pulihon.
Ima songon panopa hudon i, dibukbahi do tano liat (tano mera) i asa laho
membentuk sada hudon na uli jala marguna (menjadi bejana yang berguna). Laos
songon i ma panghilalaan nang na taalami songon angka siihuthon Kristus, loas
ma Debata manopa ho, nang pe sipata songon na tarbuang hita, diuhum Debata
hita, alai lapati ma panguhuman i laho papitahon, memurnikan, paimbaruhon
ngolunta asa lam uli jala tama hita diadopan ni Debata. Nunga ditanggung jala
di porsan Jesus Kristus sude partinaonanta i di hau silang i. Nunga mate jala
hehe Jesus i manaluhon hamamatenta. Ala ni tajalo jala tajanghon ma Jesus
Kristus i na manguluhon pardalanan ni ngolunta; laho manaon hamaolon,
hahasiton, pardangolan, parsorion ni ngolu asa tartaon hita sude i. Jala
marhite ima dipaimbaru hita, dipulihkan gabe jolma na satia, jala unduk tu hata
nang patik ni Debata. Sai ungkap do roha ni Debata laho manjanghon hamumulakta
manundalhon dosa dohot pangalaosionta tu ampuanNa i. Songon anak na mago i, ala
dipansuasaehon do sude na diibana i, jala gabe mago ma. Alai ndang maila ibana
mulak tu amana, marningot naung rade do sude di amana i hasonangan las n iroha,
jala dipaimaima amana i do hamumulakna. Dung mulak di haol jala dilehon angka
na ummarga dipangke jala rap mangan marlas ni roha ala nunga marngolu na imbaru
ibana. Laos songon i ma hita, mulak ma
tu Ibana ai na rade do Tuhanta Jesus i paimahon haroronta jala marlas ni roha.
Amen.
