Tarhindat Jesus Tu Ginjang
Marlas ni Roha Situtu Ma Hita
(Yesus Terangkat
ke Sorga dan Kita Bersukacita)
Lukas 24: 44 – 53
1) Dibagasan turpuk on naeng
jaloonta do jamita halalas ni roha na pinasahat ni Tuhanta tu angka siseanNa,
na pinapatarNa i diriNa tu nasida di sada bagas di na sordak angla pintu. On
ma palima halihon dipapatar Jesus diriNa
tu angka sisean i di na sadari dung hehe Ibana sianna mate. Denggann do
taringotanta songon na parataratahon, na pinapatar Jesus diriNa 10 hali nari
dibagasan na 40 ari i dung hehe sian na mate, paima manaek Ibana tu
Banuaginjang, ima:
Ø Tu si Maria Magdalena di kuburan
i (Mark.16: 9)
Ø Tu angka boruboru dongan ni si
Maria Magdalena na mulak sian tanoman i, ala ni biar ni rohanasida (mat.28:8-9)
Ø Tu si Petrus siseanNa na dohot
laho tu kuburan i ( 1 Kor.15:5)
Ø Tu dua halak siseanNa na laho tu
huta Emmaus (Luk.24:13-31)
Ø Tu angka sisean na marpungu di
sada bagas di tingki na sordak angka pintu, alai ndang dohot dope disi si
Tomas. Ima na tinaringotan ni jamita on. (tapatudos ma tu Joh.20:19-23.
Ø Di ari Minggu paduahon manang ari
paualuhon, marpungu angka sisean i muse di sada bagas alai nunga disi si Tomas
ro ma Jesus mandapothon nasida di na sordak angka pintu (Joh.20:24-31)
Ø Uju mardengke sisean i 7 halak
toropna di tao Tiberias (Joh.21:1)
Ø Tu angka sisean dohot 500 halak
na marpungu di sada dolok di Galilea (Mat.28:16; 1 Kor.15:6)
Ø Tu si Jakobus anggi ni Tuhan
Jesus, gabe dohot do ibana termasuk tu Apostel jala gabe tiang ni Huria ni
Tuhanta ( 1 Kor.15: 7)
Ø Tu angka sisean i di na laho
manaek Ibana tu Banuaginjang sian dolok Jetun (Ul.1:1-12; 50-53). On ma
parsaoran na parpudi di angka sisean i rap dohot Jesus. Dung i manaek Ibana tu
Banuaginjang parsaoran partondion dibagasan haporseaon. Songon i nang hita
huriaNa di tingki on paima ro ari parpudi i.
2) Mamungka sian dung tartangkup
Jesus di Getsemane, nunga sai digohi biar roha ni angka sisean i. Ndang barani
be nasida jumonok tu Jesus naung tarboan tu jolo ni paruhuman. Apal lumobi ma
dung tarsilang Ibana; Holan si Johannes dohot manang na piga halak nama
boruboru na olo jumonok tu silang ni Tuhanta i. Tung na susa do halak na
mambiar. Ndang adong hasonangan dirohana, sai patagamtagam parmaraan do nasida.
Di angka halak na marparaloan, halak na dibagasan hasalaan, halak na sai gok
angka parjahat di humaliang nasida, dohot angka na marragam. Molo adong ro
tompu bencana alam, godang do halak na marsahit jantung ala nibiarna. Angka
sisean on, mabiar do; atik beha sadihari ro angka suruan ni sintua ni malim
manangkup nasida. Ima alana umbahen marpungupungu nasida jala pintor manordahi
pintu nang pe so apala haru holom dope. Di tingki on ma ro Jesus mandok : “Dame ma di hamu”. Tutu
di na satongkin i, ndang pintor barani dope nasida, alai lam dibuat Tuhan i do
marhite hata Dame i biar ni rohanasida i. Na hinangkam ni hata Dame on tung mansai bidang do. Mardame tu
saluhut halak lumobi ma tu Debata. Ala ni sai olo ma hita padamehon ni hata ni
Tuhanta Jesus, asa boi sonang jala las rohanta saleleng hita di ngolunta on
sahat tu salelenglelengna i.
3) Ganggu ni roha sadalan do i dohot
biar. Ganggu rohanasida marnida Jesus, dirimpu nasida do tondi, manang begu
Tuhanta i. Ndang diboto na ganggu roha mambahen sada hatontuon, isara manang na
aha na naeng siulaon manang sibahenonna. Mangambolonghon roha na ganggu i do
umbahen na dipangido Jesus tu nasida manang aha sipanganon na adong dipeop
nasida, asa dipangan dipanotnoti nasdia paboa na so tondi na niida nasida. Jadi
dilehon nasida do na dipangido ni Jesus, jala dipangan dipanotnoti nasida.
Nunga godang dilehon Tuhanta pangajarionNa tu hita, asa unang ganggu rohanta
mangihuthon Tuhanta, sian angka na tarsurat i. Ps ma rohanta, sapala naung
talehon rohanta tu Huria i mangihuthon Tuhanta, unang ma songon na golom
riaria. Ai molo ganggu rohanta, mangumpat riaria, gabe songon na tapaganggang
tanganta maniop, gabe seatonna do tanganta. Alai molo gomos do tatiop, ndang
mahua hita jala tarcabut do riaria i. Ala ni i gomos ma tatiop na taparhatopot
i, ai haposan do na marbagabagahonsa. Tung so susa do hita maniop Tuhanta i,
alai sonang jala martua do hita.
4) Haporseaon di Tuhanta ima na ro sian pangantusion na
sintong di panindangion haporseaon ni HKBP adong do 3 tandatanda ni Huria na
sintong, ima:
ü Molo polin dipodahon Hata ni
Debata na sian Bibel i.
ü Molo sintong dipadalan sakramen
na dua i, ima pandidion na badia dohot marulaon na badia
ü Molo sintong dipadalan ruhut
paminsangon manggotapi angka dosa.
Nanaeng dohonon marhite sian i, ndang tarbahen so ro poda na
lipe molo so adong pangantusion. Beha ma bahenon mananda poda na sintong i ia
so niantusan angka na tarsurat i. Didok sahalak dolidoli do tu sada na marbaju
na niriritna naeng gabe pardihutana, ala pulipulik ugamo nasida, songon on ma
hatana: “Tumimbo do cintanta on sian parugamaon i. Ai dos do agama i sude, jadi
ndang pola persoalan ugamo asal ma naung
cinta sama cinta, ima mangalusi. Molo dos do sude agama i masuk Kristen ma ho,
asa sadalan hita mengikat cinta sama cinta i. Ninnanasida, ima labana ala naung
diantusi do haporseaonna di Kristus i. Aut sura ndang diantusi, dohononna ma ido tutuu,
tapasautma........,. Ala ni i unang mansadi hita mangguruhon, manangihon Hata
ni Tuhanta, ai sian na tumangihon do ro pangantusion, sian pangantusion do ro
haporseaon i. Songon na nidok ni Ap.Paulus di Rom 10:17 “Ai sian na tumangihon
do ro haporseaon: ia panangihon i, sian Hata ni Kristus do. Antong tajalo ma
dame na nilehon ni Tuhanta i tu hita, asa dao biar dohot ganggu ni roha sian
hita, jala tahaporseai ma sude hata ni Tuhanta, asa diboan i hota tu tujuan na
sasintongna ima manuju harajaon ni Debata na di surgo i do, asa tangkas
parsidohotonta tusi.
5) Angka sisean i disuru do laho paimahon di Jerusalem,
asa jamot nasida mangarade diri gabe sitindang i ni Kristus. Na masa hamubaon
ni paradigma sian diri nasida angka sisean i mansai ringkot do adong proses,
alai ndada holan na marhamubaon na instant andorang hananaek ni Jesus tu
Banuaginjang. Siala ni i buku ni Ulaon ni Angka Apostel on patorangkon huaso na
nilehon ni Tondi Parbadia na margogoihon nasida gabe sitindang ini Kristus di
Jerusalem (2-7), saluhut di Judea dohot Samaria (Ul.Ap.8-12) jala sahat tu ujung
ni portibi on (ul.Ap.13-26). Lapatanna, ia angka sisean i gabe sintindangi ni
Kristus, alai marhite angka proses na nialaman nasida. Dibuhai sian Jerusalem,
ima angka jolma na jumonol dohot nasida, sian dirina sandiri nang angka
keluargana, nang tondongna. Diihuthon ma muse gabe sitindangi di ;uat Judea,
ima angka donganna halak Jahudi na saugamo dohot nasida. Gabe sitindangi di
Samaria, angka na maralo hian, jala marasing bangsona, dogma nang ajaran ni
ugamona dohot nasida. Jala sitindang idisandok portibi on ima angka jolma na
marharoroan sian Jahudi nang so sian Jahudi. Jadi andorang angka sisean i gabe
sitindangi ni Kristus na patorushon ulaon ni Jesus mamboan hadameon nang
hatigoran tu saluhut jolma naeng ma nasida naung dao sian nam angharingkothon
dirina sandiri. Asa ndang na gabe muramura proses nihamubaon i dungkon manaek
Jesus tu Banuaginjang, alai sahat ulaon nasida sude. Ido alana boasa nasida
angka sisean i paimahon di Jerusalem asa digohi huaso ni Tondi Parbadia nasida.
Hambuaon ni paradigma ni parngoluon on ma na dipasahat Apostel Paulus tu huria
na di Efesus. Nasida tarjou gabe nampuna ni Kristus naung digohi marhite Tondi
Habisuhon na maruba paradigma ni parngoluon nasida asa boi gabe sitindang i ni
Kristus jala gabe pasupasu tu na humaliangna.
Dungkon dilehon Jesus angka ulaon i, asa dihindat Jesus
ma tanganNa laho mamasumasu angka siseanna i. Pasupasuni Tuhan i paboahon
hasahatan ni pangulaonNa tu angka sisean i jala sekaligus gabe bagabagaNa laho
mandongani nasida mangulahon tugas songon sitindangi ni Kristus. Angka sisean i
marsinggang laho mangadop Jesus huhut manghormati Ibana manjalo tugas parsuruonNa
i. Ndang na gabe bonsa be rohanasida
jala marsak di halalao ni Jesus, marasing uju mangadopi hamatean ni Jesus, angka
sisean i mansai digohi biar ni roha. Marhite pasupasu dohot huaso na dipasahat
tu nasida, laho ma angka sisean imulak tu Jerusalem dohot laas niroha nang
olopolop. Rade ma roha nasida patulushon angka ulaon ni Jesus di portibi on.
Ulaon na mamboan hadameon, hatigoran tu angka na tarduru, tarsisi, termarginalkan,
na hona tindos nang digosagosa keadilan di parngoluon ni masyarakat nang
parugamaon. Nang pe diboto nasida konsekuensina laho memperjuanghon i sude, sai
adong do angka na mangalo, manundali dohot ragam ni abatabat nang tantangan na
niadopanna disi. Alai tongtong do angka sisean i marlas ni roha jala marpos ni
roha ala ni huaso ni Jesus na mangalinggomi nasida. Huaso na sian Tondi
Parbadia na mangalehon hagogoon dohot haboion tu nasida laho marpanindangion
dohot mangulahon Hata nang niajarhon Jesus sahat tu na mate nasida. Laso songon
i ma hita angka na porsea, las ma rohanta naung manaek Tuhanta i tu
Banuaginjang i. Amen.
