Huaso Ni Tondi Parbadia Na
Pasadahon
(Kuasa Roh Kudus Yang Mempersekutukan)
1 Musa 41
: 37 – 42
a) Ise ma sian hita na manghilalahon pandaonganion ni
Debata dibagasan ngolunta ? Adong hita na membuktihon i ? Taparrohahon ma
sejarah ni ngolu ni si Josep. Sian sikola minggu naung tabege taringot tu
ibana. Sahalak na mansai hinaholongan ni amana si Jakob do ibana. Mansai andul
do marasing sian hahana pambahenan ni si Jakob manghaholongi si Josep anakna
i.Ido alana patubu pangiburuon di roha ni hahana, apala dihasogohon angka
hahana pola sahat nanaeng bunuon nasida si Josep. Ujungna gabe digadis ma ibana
gabe hatoban nihalak Misir. Dihaholongi si Potifar do ibana alai gabe masuk tu
hurungan do ibana siala dituduhon pardihuta ni si Potipar fitnahan tu ibana.
Sampulu pitu taon ma si Josep uju digadis angka hahana ibadan gabe hatoban (37:
2), sampulu tolu taon ibana gabe
„naposo‟ di bagas ni si Potifar, jala tolu taon ibana di hurungan. Alai
saluhutna i, dihaporseai do i dalan ni Debata laho parmudumudu bangsoNa.
Dipangke Debata do Ibana gabe dalan hangoluan ni bangso na asing pe.
b) Molo tajaha dijolo ni turpukta on ima 1 Musa 41:1-57
patuduhon, na mangula do Debata marhite Raja Parao dohot si Josep laho
padimundimun masa depan ni ngolu ni
sandok bangso jala padirihon inganan di bangso napinillitNa i. Marhite
parnipion ni Raja Parao dipabotohon Debata do angka na naeng masa di sandok
tano on, jala marhite si Josep dipabotohon Debata angka lapatan ni parnipion ni
Raja Parao. Sian na dua i, dipanghulingi Debata portibi on asa parade diri
managam angka na naeng masa. Di na marnipi Raja Parao, ndang adong na tuk
mambahen alus na sintong taringot tu lapatan ni nipi i. Dipapungu raja i do
angka pangarunding dohot paralamat angka na di tano Misir alai ndang adong na
tuk mangalapatisa. Alai adong do sahalak sintua ni angka sitahu anggur ni raja
i, na marningot si Josep di hurungan (41:8-9). Ibana ma na tangkas paandarhon
lapatan ni nipi i, huhut mangalehon dalan haruar sian hamaolon ni bangso i.
Dipangalaho sisongon ima si Josep hira na mangajari Raja Parao taringot tu
angka sipatupaonna di partingkian na so pola leleng be di Tano Misir. Asa
mangarade bangso i di haleon potir na mansai leleng ima 7 taon laho papungu parbue
ni gandum asa malua nasida sian hamaolon di sipanganon nibangso i.
c) Mansai denggan do di roha ni Raja Parao nang angka
naposona pe di panorangion ni si Josep na marasing situtu sian angka
pangarunding najinou ni Raja Parao. Jala i pe ndang dao sian angkap ni Debata
na mambuha pingkiran ni Raja Parao mangantusi dohot manjalo angka hata ni si
Josep. Pola do songon na martingting raja i paboa na so adong jumpang songon si
Josep di tano Misir, jala pola dihatindanghon: Naginohan ni Tondi ni Debata do
ibana (ay. 38) jala laos dirajumi na so adong na umpantas marroha sian si Josep.
Mansai arga do panindangion ni Raja Parao taringot tu si Josep dohot Tondi ni
Debata na mian di bagasan ibana. Tontu ndang panandaon siala parsiajaran
najinalo ni Raja Parao i taringot tu haporseaon ni si Josep, alai nang i,
hahomion ni Debata do i laho patandahon hadirionNa tu angka bangso dohot angka
raja di portibi on. Tondi ni Debata do tutu na manggohi hadirion ni si Josep,
jala siala Tondi i do margogoihon ibana mandalani godang ni hamaolon di
parngoluonna. Laos Tondi i do nang na mangaramoti ibana di hamamasa ni
pangarupaon sian angka hahana dohot tuhas ni pardihuta ni si Potipar. Laos
marhite Tondi i do boi dijujur ibana angka nipi dalan ni Debata pabotohon angka
na masa di portibi on. Siala ni
saluhutna i dipasahat raja i ma sandok huaso tu tangan ni si Josep di bagasna
suang songoni nang di sandok bangso i. holan hasurunganna ima habangsa harajaon
i (ay. 40). Dos songon si Potipar na pabangkithon si Josep mangaradoti angka na
di bagasna songoni ma nang Raja Parao pabangkithon si Josep mangaradoti sandok
bangso i. dipasahat i tu ibana, siala diida raja i na ginohan ni tondi do
ibana, na pistar jala na pantas marroha.
Haposan do si Josep di na otik jala haposan muse di na godang. Mempertanggungjawabkan
apa yang telah dipercayakan kepada si Yusuf, bila dengan baik dan benar
dilaksanakan akan mampu memikul tanggung jawab besar di kemudian hari.
d) Tarida do toruk ni roha ni Raja Parao manghatindanghon
hapantason ni si Josep. Ianggo sian habalgaon dohot hasangaponna nian, ndang
pola tama ibana pajumpang dohot sada naposo na tarhurung jala laos pasahat
saluhut bagas dohot bangso naginomgomanna tu si Josep. Alai tong ma ingkon
mulak hita muse tu huaso ni Debata marhitehite Tondina, gabe tupa ma saluhutna.
e) Huria ni Tuhanta, tatiru ma songon si Josep: tung
rahis jala maol pe dalan ni parngoluonna alai tongtong benget ibana manaon i saluhutna.
Soada dendam kesumat, amarah, pangarimason, ondamondam di roha ni si Josep
marnida pangalaho na jat sian hahana nang istri ni si Potifar. Pos do roha ni
si Josep ndang na manghohom Debata marnida parniahapanna. Jonok do partondion
ni si Josep dohot Tondi ni Debata, asa ima na mambahen ibana margogo jal
marhabisuhon. Si Josep na ginohan ni Tondi ni Debata ndang adong sangkkap
mamalos hajahaton i sude, baliksa angka na uli na denggan do na pinatupana. Halak
na ginohan ni Tondi Parbadia sai mamparbuehon angka na uli na denggan do.
Songon pandok ni Ap.Paulus di Galatia 5:22-23 Alai angka on do parbue ni Tondi:
Holong dohot las ni roha, dame dohot lambas ni roha, habasaron, habasaon,
haporseaon, halambohon dohot hatomanon. Ndang maralo patik dompak angka
sisongon i. Songon halak na porsea hita siihuthon Jesus Kristus, unang ma adong
kamus pembalasan di rohanta manang manguhumi di hasalaan ni dongan nang musu.
Baliksa angka sangkap dohot ulaon na denggan i ma taula jala taparbuehon. Rugi
do hita, jala terkuras energi psikologinta laho mamikkiri dohot manangkapi
balos ni na jat i. Baliksa naung digohi Tondi Parbadia do angka na porsea di
Jesus Kristus asa ndang sanga be rohana laho mangurusi angka hajahaton ni halak
tu hita. Alai naung tapasahat do luhutna tu Tuhanta gondok ni rohanta i asa
Ibana na paturehon.
a)
Adong do sangkap ni
Debata di saluhut angka natinompana, tarlumobi ma angka napinillitna gabe na
porsea di Ibana. Laos adong do silehonlehon ni Debata di ganup laho patulushon
angka nasinangkapan ni Debata. Disi ma naeng tangkas panghangoluhonon ni na
porsea I hombar tu parsuruon ni Tuhan i. Ndada holan tu diri sandiri dohot na
sahorong dohot iba, alai nang tu angka bangso na asing pe. Dipasada Tondi i do
angka na so masitandaan hian gabe rap patulus angka sangkap ni Debata. Ai dang
sian dia dalanna nian sahalak hatoban ingkon gabe haposan ni sahalak raja
bolon. Alai i ma gogo ni Tondi i, na sai tongtong mengalehon gogo dohot bisuk
di angka naposoNa. Peranan ni Tondi Parbadia di moment Pentakoste on laho
pasadahon asa unang masa parbolatbolatan di angka halak Kristen. Alai laho
pasadahon, patoguhon parpunguan ni halak Kristen na sada tu na asing
marsiurupan, masitoguon, masiaminan na mamboan dampak pembaharuan di
parngoluonta. Songon na pinangido ni topik ni minggunta Huaso Ni Tondi Parbadia Na Pasadahon (Kuasa Roh Kudus Yang
Mempersekutukan). Pentakosta merobohkan tembok pemisah antara suku, bangsa,
songon i nang kepercayaan tertentu gabe sada bangso na balga na tergabung sian
sude angka bangso na di portibi on na mamaritahon karya Keselamatan na sian
Kristus Jesus. Amen. (Pdt.Ebenezer Munthe, M.Th-HKBP Resort Moria BSP)
