Di
Ibana Ma Hasangapon Ro Disaleleng Ni
lelengna
(Bagi Dialah Kemuliaan Sampai Selama-lamanya)
Heber 13 : 20 - 21
a) Hamuna nahinaholongan, dapot hita
do dibagasan trupuk on songon tangiang pangujungi di Buku Heber on. Ima na
manaringoti Tuhan. Ia buku Bibelta i manaringoti Tuhan i do. Jala parngoluonta
on pe taringot tu Tuhan i do. Saluhut portibi on taringot tu Tuhan i do. Jala
na masa i pe taringot tu Tuhanta i do.
b) Dilehon do dihita ulaon songon
manisia na gabe mahkluk tertinggi sianna tinompa ni Debata. Angka na tinompa i
pe, binatang, suansuanan nang alam pe dipangke Tuhan i do. Alai keegoisan do na
masa di hajolmaon. Molo taparrohahon di gareja, diado na gumodang ditaringoti
angka ruas i taringot tu dirina do manang taringot tu Debata na sinomba nasida.
Molo taparrohahon namambahen angka status di media sosial, media online songon
tiktok, facebook, instagram, twitter dohot lan na asing godangan do angka
informasi status, songon na mandok nasida ma jonggolna manang bintang
pertunjukan. Hape sasintongna Tuhanta i do Bintang na sasintongna, hita na di
portibi on holan songon figuran do.
c) Lomo ni roh ani Tuhan i ma na
saut dohot na gabe dalanta mandapot dame na sumurung na pahehehon Tuhanta Jesus
sian hamatean i. Dipasahat do tu hita hot haholonganna marhahaanggi, halambohon
tu angka jolma, marningot angka na porsea na tarhurung ala ni haporseaonna.
Manjaga parumatanggaon na polin jala manundali pangalangkupon. Manadingkon
pangalaho na mangahhut jala na mangasahon Tuhan i di pangomoan ariari. Maniru
angka uluan ni halak Kristen. Manjaga parasingan ni angka pangajarion na so
denggan dohot na denggan jala pinargogoan asini roha. Jalo tu duru ni huria
mangea angka elaela na niae ni Kristus, mangalului huta na naeng ro. Mamujimuji
Tuhan i, mangulahon na denggan jala marbagi tu angka dongan jolma sian na adong
di hita. Unduk jala pangoloi tu angka panggomgomi huht martangiang (13:1-18).
d) Songon sahalak natuatua na burju
marroha na mambohali anakhonna tu ari parjolo di parsikolaanna. Dilehon Tuhan i
do nasa na denggan tu hita asa boi hita marngolu na denggan jala tujuanna ima
tu hasangapon ni Debata. Taparrohahon sian ayat on dibuhai sian hata Tuhan,
jala diproses Tuhan i jala dipaujung Tuhan i. Tuhan i di na pasingkophon. Lomo
ni roha ni Tuhan i do na gabe tugas na diparlengkapi tu hita. Jala saluhut hamuliaon
ni angka perlengkapan dohot ulaon i ditujuhon tu Jesus Kristus, Anak ni Debata.
Hamuliaon ni Jesus i do na gabe tujuan ni saluhut ni saleleng sejarah ni
haportibi on on. Jala ima na gabe tujuan ni parngoluonta. Ala ni i nang pe
saluhutna i na i gabe laho jala mago, marsihohot ma tu Debata na gok asini roha
i, Parmahan Bolon i jala marngolu ma hita tu hamuliaon ni Jesus Kristus.
e) Dibagasan ngolu on, sude jolma do
dilehon tanggung-jawab, adong na otik, jala boi otik hian tanggung-jawabna.
Asing ni i, adong do na mardalan dohot denggan, alai adong do na ndang denggan
mardalan. Saluhutna i marsigantung tu jolma na manghilalahon deohot denggan,
mangalola, dohot na padalanhon tanggung jawabna. Boha ia hita duaeng sadia
godang ma dituhuk ho tanggung jawab na sian Debata i ? jala boha do laho
padalanhon i ? Ditompa Debata do hita dohot maksud asa boi hita mangulahon
angka na denggan songon sangkap dohot tujuan panompaon na parjolo i. Dilehon do
tu ganup jolma i tanggung jawab na boi siulahononhon asa mardalan dohot denggan
parngoluon on. Uju dipasahat Debata sada haposan nang tanggung jawab tu hita,
sai na lehononNa do angka perlengkapan saluhut angka na denggan laho mangulahon
lomo ni rohaNa huhut mangula dibagasan hita angka na hombar tu lomo ni rohaNa.
f) Dihita na hinaholongan tongkinari
ma tatadinghon taon 2023 on, ala ni i dlehon tu hita perenungan di parpunguan
bodari on asa taevaluasi pardalanan ni ngolunta na sataon bolon on. Taringot tu
Debata do ngolum manang taringot tu dirim sandiri ? asa tabahen jolo rujiruji
na paboahon godang dope angka kesilapan, hagaleon nang dosa mangihhutihut
ngolunta on. Ala ni i tama do hita mangido hasesaan nang pangurupion ni Tuhanta
asa diajari hita mamongoti taon na imbaru ima taon 2024. Dungi molo nunga
tasulingkiti ngolunta, aha do tanggung jawab na naung niulam di taon 2023 on ?
mardalan do i manang ndang ? asa molo adong dope na hurang tapangido ma asini
roha ni Tuhan i asa diloas hita mamasuhi taon 2024 dohot tekad nang komitment
laho pasangaphon Tuhan i dibagasan ngolum huhut padenggan tatanan hidup na
bertanggung jawab tu Tuhan nang tu saluhut jolma nang tu dirinta sandiri. Asa
diIbana ma hasangapon ro di salelengni lelengna. Selamat Jelang Tahun Baru
2024. Amen.
