MARIAIA
DO TONDINGKU MIDA DEBATA
(JIWAKU
MEMULIAKAN TUHAN)
Lukas 1: 46b-55
1)
Huria na hinaholongan diabagsan Jesus Kristus, na marlas ni roha do hita
mamuji pasangaphon Tuhan i marhite parsaoranta di ombas on nang ganup hita be
saor dohot Tuhanta i. Naung masuk ma hita di minggu Advent na III hon marhite
turpuk Lukas 1: 26 b- 55 na gabe ende pujipujian ni si Maria. Ia ende on
dipasahat si Maria, siala naung dipillit Debata ibana gabe parhitean pasupasu, pasorangkon
Sipalua i, ima Jesus Kristus. Tung ise ma na so las rohana mamujimuji Tuhan i
molo naung di todo Debata hita jolma na biasa on gabe hitehiteNa na songkal i.
Ido umbahen dibagasan pamujion ni si Maria pasangaphon Debata uju dipilit
Debata ibana gabe parhitean ni tanganNa.
2)
Ulaon na pinatupa ni si Maria ndang na muramura i, mansai borat do i jala
beresiko. Sahalak borua naposo, na sederhana, na so muli dope, alai dipasahat ulaon
gabegabean Anak ni Debata. Alai dungkon manjalo ulaon i, dijalo si Maria do i
dibagasan serep ni roha. Ndang maheu ibana disi, ndang bobonosan jala susa
dihilala. Boasa boi songon sikap ni si Maria i ? alusna boi parrohahononta
dibagasan ende pujianna i.
3)
Adong ma piga piga na boi parsiajaranta sian ende pujipujian ni si Maria i
:
v Naparjolo, jumolo do dipasangap
si Maria Debata. Dipasangap si Maria Debata na mambahen ragam halongangan
dibagasan dirina. On ma parhusoran ni haporseaon na porsea tu Tuhan Debata.
Tuhan Debata na tahaporsea i ima Debata na songkal situtu, Debat an mangolu.
Tahilalahon dope pambahenan ni Debata na songkal i dibagasan ngolunta ? Hagogon
nang hasongkalon ni Tuhan Debata mambahen pos ni rohanta mandalani ari ari ni
ngolunta. Sai na tu na gogo do hita marlinggom, na paposhon rohanta. Jala holan
Tuhan Debata do na boi mambahen pos rohanta mangadopi ragam hamaolon nang
hasusaan di portibi on.
v Napaduahon, dibagasan
pujipujianna si Maria paboahon ia asi ni roha ni Tuhan Debata ro
marsundutsundut tu angka na manghabiari Ibana. Lapatanna ima angka halak na
biar mida Jahowa jaloonna ma asi ni rohaNa i. Jaloona angka pasupasuNa i songon
halak na porsea. Tahilalahon ma asi ni rohaNa i dibagasan ngolunta angka na
porsea i siala biar do hita mida Jahowa. Siala ni i sai dapotan las niroha do
hita hinorhon ni i.
v Napatoluhon, dibagasan
pamujionna, si Maria mandok na sirangon ni Debata do angka halak na ginjang
roha, alai patimboonNa do angka halak na serep roha. Ginjang ni roha sai
mamboan jolma i do tu hasesegana, alai angka na martoruk ni roha mamboan ibana
tu ngolu na gok pasupasu ni Tuhan Debata. Marhite pujipujian i dipaingot do
hita asa sai tongtong mangolu dibagasan serep ni roha. Alai ndanda na mauramura
i siala hasomalan ni jolma na sai merasa hebat, balga, sangap ala ni sifat
nihaportibion nang hadagingon ni manisia i do i. Sai ingkon na dumenggan sian
halak na asing manang sian donganna ikon sai tumimbo. Sai boha ma tarpasupasu
molo sai songon i do parange nang pangalaho. Ala ni i dijou do hita angka na
porsea i martoruk ni roha, asa tama pangkeon ni Tuhan i hita gabe ulaulana laho
pasangaphon Tuhan i.
v Napaopathon, dibagasan pamujionna
dipaboa si Maria do habalgaon ni Debata na mamparrohahon angka halak na pogos,
na male dohot na manarita. Diparrohahon Debata do angka na so mardihadiha, pola
na tudoshon diriNa tu angka halak na male, na tarhurung, na susa d.a (Ptds.Mat.25).
v Palimahon, na parpudi di ujung ni
pamujionna, si Maria paboahon di hajongjongan ni Jesus ditongatonga ni portibi on
ima hapataran ni bagabaga Na tu si Abraham.
4) Parange ni si maria i ma na
tapahusorhusor dibagasan ngolunta. Uju na mangarade hita di masa advent on ima
manomunomu haroroni Jesus na paduahalihon dohot na manaringoti hatutubu ni
Tuhan Jesus na paboahon: Ia Debata na mamillit hita gabe ulaulaNa, ala Iaban do
Debata na songkal i . Debata na mamasumasu angka halak na biar mida Ibana jala
Debata na patimbohon angka na serep marroha. Debata na sai manarihon dohot
manogunogu angka halak na gale jala na papatarhon bagabagaNa marhitehite Jesus
Kristus. Asa hita saluhutna na porsea dibagasan Jesus Kristus asa gabe Maria –
Maria jaman now, asa marhite parngoluonta i na mangula Tuhanta laho paluahon
ngolu dohot keluarga nang torop halak.Mariaia ma Tondianta mida Debata. Amen.
