MANOMUNOMU
RAJA PARTIGOR JALA SIPARMONANG
(Menyambut
Raja Adil Dan Jaya)
Zakaria 9: 9 – 10
a) Dibagasan turpuk on adong didok
istilah raja na martudutudu tu parhuaso na tumimbo disada harajaon manang halak
na manguluhon dohot manggomgomi sada harajaon manang bangso manang sada negara.
Ia Jesus Kristus do Rajanta i; Jesus Kristus ima Raja na marhuaso mangatasi
portibi on nang pardisurgo i. Songon halak na porsea hita, mandok maulate do
rohanta siala naung gabe angka anakNa hita dibagasan Harajaon ni Debata. Songon
angka halak nanaung niondingan dibagasan Harajaon ni Debata disosoi do hita asa
marsiajar songon bangso na marnampunahon Jesus songon Rajanta boha do hita
bersikap,marparange, marpangalaho songon angka anak dohot boru ni Raja laho :
Manomunomu Raja Partigor Jala Parmonang i?”
b) Dibagasan turpuk on dibuhai
panurirang Zakharia do panurirangonna taringot tu Mesias Raja di Sion na
manosoi angka halak Jerusalem na ginoaran Boru Sion asa marsuraksurak. Dua hali
disosoi diarahon marsurak surak dipaboa di turpuk on. Ndada holak marsurak
surak na somal alai marsurak surak dohot gogo. Hagogoon ni hamonangan na gok
las ni roha di haluaon. Saluhut halak marsurak surak dohot gogo siala naung ro
Sipalua i.”Ida ma, na ro ma rajam tumopot ho...”. Raja na somalna maringan di
istana na megah jala hundul di harajaonna na songkal hape na ro ma laho tumopot
hita rakyatna. Na pasti molo ro Raja na ro ma las ni roha dohot pangkirimon.
Raja na nidok ni si Zakaria ima na martudutudu tu Jesus Kristus, ima Mesias na
binagabagahon i. Jesus ima Raja na tigor, na marhamonangan jala na lambok. Aha
do lapatan ni panurirangon ni si Zakaria taringot tu Raja Mesias na di Sion i mardomu di kondisi ni bangso uju
i ?
c) Na mangolu do si Zakaria di masa
ni habuangan babel. Diadopi ibana do dohot bangsona na manarita i uju di
habuangan babel. Asa dung di taon 538 SM dipauli Debata ma Israel. Asa mulak ma
nasida tu hutana di Kanaan di masa panggomgomi ni Jerubabel. Mulak bangso
Israel tu hutana, huta hatubuanna mansai las ma antong rohanasida, hape na
mulak nasida tu hutana baliksa do na di rohanaisda. Dua pulu taon dung mulak
nasida tu Kanaan sian habuangan Babel, sai tong dope nasida mangadopi
panaritaan. Mansai maol dope di perekonomian, politik, dohot sosial. Sian sudut
politik sai ditoru panggomgomion bangso Persia dope nasida. Sai hira na malua
sian baba ni babiat bongot tu baba ni buaea. Penindasan dohot ketidakadilan sai
tong dope masa di tonga ni bangso Israel
di panggomgomion ni bangso Persia. Dung mulak sian habuangan Babel, tong dope
hatoban nasida di tano nasida sandiri. Porlak anggur, parladangan dohot jabu pe
digadehon laho manuhor sagusagu. Panaritaan dohot habebernit na saai manosak
parngoluon nibangso Israel. Alai di hasusaan i, sai hot do bangso Israel
manghaporseai na Debata tongtong mandongani nasida. Diida bangso Israel do
pangaramotion ni Debata marhite na pinajongjongna parik ni huta Jerusalem.
Dijalo Israel do padan i jala manangihon panurirangon taringot tu Mesias i. Bangso
Israel managam haroroni Mesias songon Raja na boi paluahon nasida sian
habebernit i dohot hasusaan na manindos nasdia. Dibagasan situasi i ma
Panurirang Zakharia manurirangkon haroro ni Mesias.
d) Mesias digombarhon songon raja na
tigor. Hata “tigor” dilapati sian hata Heber: Tsadiq. Hata on marlapatan ia
Mesias, Raja na Tigor i ndada holan patupahon hatigoran, manggomgomi di
hasintongan, jala mangolu di integritas. Alai Raja i pe tong do mamaparrohahon
dohot mandukung halak na pogos, na gale. Raja na tigor i merefleksihon
hatigoran dohot haburjuon ni Debata na berpihak tu angka na metmet jala na
pinapulik. Dibagasan hatigoranNa, Jesus Raja papatarhon holong dohot
haburjuonNa tu saluhut jolma. Mesias, Raja na marhuaso na so terbatas alai
Iaban do Raja na serep roha. Mesias Raja i, mansai marasing do sian raja na
somal. Raja somalna manghunduli hoda do. Alai Mesias Raja i manghunduli halode
do. Hoda ima sada binatang na togos jala gogo, alai halode ima binatang na
gale, alai dibagasan hagaleonna halode i pautuduhon haunduhonna tu halak na
manghundulisa. Halode gabe sada simbol haserepon ni roha. Hoda sai patuduhon
haulionna, alai halode sai rade do manuhuk boban na borat sahali pe. Halode
gabe sada simbol haradeon laho berkorban. Mesias Raja i ndada manghunduli hoda,
na laho pangkeon marporang. Alai manghunduli sada halode na bermissi mamboan
hadameon. Hureta porang dohot jorat ni porang disiaphon ala so na laho marporang
na diboan alai hadameon do na binaritahon. Hadameon na nimaksud nada na mandok
ndang adong konflik, alai dame na marlapan gumogo mangadopi masalah, keadaan
dibagasan harmoni holistik jala dipasupasu Tuhanta.
e) Nang pe bagabaga ni Mesias ndang
langsung digohi di masa ni Zakaria alai di jaman ni Jesus alai bangso i
tongtong do mangolu dibagasan pangkirimon tu Mesias, Rajana tigor, na songkal
jala na lambok, huasona sahat tu ujung ni portibi on. Panurirangon taringot tu
Raja na digohi dibagasan Kristus. Ia Sipalua na gabe jolma i, manarita na
bernit jala mate holan laho manesa dosanta. Ulaon hadameon na pinatupa ni Jesus
ndada na laho pausehon mudar ni halak alai pausehon mudarNa sandiri jala
mamelehon hosaNa sandiri tu pardamean ni Debata dohot jolma. Hatigoran ni
Kristus manggomgomi di saluhut partingkian, Ibana Raja na manggontihon parsiranggutan
gabe las ni roha jala panaritaan gabe hamonangan tu bangsoNa na sai tongtong
mangkirim tu Ibana. Naung ro do Raja i mangula ditongatonga parngoluon ni
manisia. Huaso hadameonNa dipapatar asa mangolu hita dibagasan holongNa.
f) Di minggu Advent na pa-II-hon on,
diarahon do hita dohot topik: MANOMUNOMU RAJA PARTIGOR JALA SIPARMONANG
(Menyambut Raja Adil Dan Jaya). Disosoi do hita asa mangolu songon
bangso ni Debata sidok mauliate ala ni Kristus na gabe Rajanta. Asa hita bangso
Ni Debata marpangkirimon dibagasan
Jesus. Asa molo tamiliki Jesus, disi ma ngolunta niuluhon ni Jesus songon Raja.
Manomu nomu Raja Partigor Siparmonang holan tu Jesus ma pangkirimonta asa
tongtong hita mangolu dibagasan dame nang las ni roha. Roha dohot pikiranta
dibagasan semangat nang las ni roha nang pe ngolunta on mangadopi bahat angka
hamaolon, tantangan, alai huaso dame ni Debata na manaluhon saluhutna i. Molo
masa do hita nuaeng hasusaan, hamaolon, putus asa dohot ragam ni hamaolon atik
ditonga ni bagas, huria nang masyarakat. Godang angka parkaro na mambahen
marsak rohanta, sai ingot ma anak ni Raja i do hita. Jesus do na gabe Raja di
hita, na mangarajai roha nang pikiranta asa sonang rohanta mampu manaluhon
ragam ni hasusaan, hamaolon marhite huaso ni Raja Kristus i. Dibagasan Jesus sai
jaloonta di pangkirimon. Sai tongtong ma hita satia, burju na mar Tuhan on jala
tasoadahon dirinta, gogonta, hamoraonta, jabatan, pangkat ala tumimbo do gogo,
hamoraon, jabatan nang pangkat ni RAJA i ima KRISTUS I. Selamat Advent II.
