Marhiras
Ni Roha Manghatahon Barita Na Uli Mangasahon Debata
5 Musa
34 : 7 – 12
a)
Ia turpukta
on ima bagian na parpudi ni Buku 5 Musa on na gabe songon batu parningotan laho
manaringoti angka naung jumolo songon si Musa. Asing ni na patuduhon si Josua
songon uluan na imbaru ditonga bangso israel, jala batu parningotan i tong
manggombarhon parsaoran ni si Musa na so handungdungan dohot raja uluanna ima
Tuhan. Naung marumur 120 taon do si Musa uju di hamamatena. Dipeakhon si Musa
pe jabatanna i ndada ala ni hagaleon ni pamatang alai ala ni Tuhan i do
mangaturhon taringot tu ibana. Ai udut ni didok do taringot tu si Musa : “....ndang
pola homur anggo matana jala ndada surut gogona”. Lapaanna, togos dope ibana
jala layak mangulahon ulaonna songon
uluan ditonga bangso Israel (ay.7).
b)
Dung hamamate
ni si Musa, saluht halak Israel marhabot ni roha, jala pola 30 ari lelengna
nasida tumatangis huhut mangandungi. Ai molo di halak Israel somalna holan 7
ari do dipamasa mangandungi na mate (1 Musa 50:10; 1 Sam.31: 13; 1 Taw.10:12).
Si Aron 20 ari ditatangisi, holan si Josep do 70 ari diandungi (tudos songon
masa mangandungi di tano Misir, 1 Musa 50:3).
c)
Dungkon hamatean
ni si Musa, nangkok ma si Josua laho manggontihon manguluhon bangso Israel tu
tano parpadanan. Ndada asing be si Josua ditonga ni halak Israel. Andorang so
i, naung mangula do si Josua songon naposo ni si Musa (4 Musa 11:28). Songon
naposo ni si Musa, dipatuduhon si Josua do dirina songon uluan na marbisuk uju
dipangido si Musa ibana labho papunguhon angka halak laho marporang mangalo
halak Amalek, jala laos diulahon ibana di do na nidok ni si Musa tu ibana ( 5
Musa 17: 9-10). Marhamonangan do si Josua ala ni Tuhan i na marporang
diadopanna jala na mangalehon parporangan i di ibana. Naung diparbohali do si
Josua laho manguluhon bangso Israel laho mamasuuhi Tano Parpadanan siala
ginohan ni tondi habisuhon do ibana. Hata habisuhon i marharoroan sian hata
Heber –‘Hokma’, ima hamaloon dinalaho patupahon parbinotoan i. Hata on
dipargunahon laho patuduhon angka na malo pajongjonghon Undung Undung na Badia
(5 Musa.28:3; 31:3; 35:31). Sian angka buku ni habisuhon di Padan na Robi
songon Buku Poda ima na martudutudu tu “malo di hangoluan”, diboto mamboan
dirina asa mampu mandalani ari ni ngoluna, malo mambahen pilian na topet. Malo
mamilit dia do ulaon na pinasahat ni Tuhan i, siala sian i do hita dapotan
paruntungan, ndang harugian). Ima na dumenggan tu hita sandiri. Pangalaho na
hombar tu pilian i ingkon manat do hita laho mangalangka manang mambuat angka
haputusan.
d) Pangalaho i marlangku do i di angka na porsea di
Padan na Imbaru nang tu hita di partingkian sisaonnari on. Na martangiang do
Ap.Paulus asa dilehon Debata Tondi habisuhon tu huria na di Efesus (Ef. 1: 17).
Nang pe tondi i martudutudu tu roha ni jolma, mual ni habisuhon i ima Tondi
Parbadia (Jes.11:2). Dilehon do habisuhon tu si Josua na dihaporluhon laho
manguluhon bangso Israel dungkon monding si Musa. Panumpahion habisuhon itu si
Josua uju ro si Musa mangampehon tanganna di atasna. On ma sada ritual na
malambanghon pangojakhonon ni sahalak uluan. Astuanna dison ima pasahathon hajongjongan
ni padan sian si Musa tu si Josua. Na mandok, dipabangkit si Josua jala
dipadasip laho manggohi ulaonna songon sahalak uluan na imbaru di Israel.
Songon Tuhan i na mangaramoti si Musa, laos songon i ma Tuhan i mangaramoti si
Josua (Jos.1:5). Marhite i ma asa, angka anak Israel manangihon ibana jala
mangulahon songon na diparentahon ni Tuhan tu si Musa. Nang pe songon i, sai
diingot do si Musa songon sahalak uluan na mansai luar biasa siala parsaoranna
na rosu dohot Tuhan i.
e)
Dipatorang do
dibagasan turpuk on, dungkon salpu masa si Musa ndang adong be panurirang
tudoshon Ibana (ay.10). pandohan panurirang dison ima sian hata Heber “Navi”;
nabi. Na martudutudu tu sasahalak na manjalo panjouon sian Tuhan laho
pasahathon na nidok Debata. Ibana ma na disuru Debata dohot tona na sian
Debata, songon na somal dipanurirangon i jotjot do didok hata : “songon on ma Hata ni Tuhan (Jer.11:3;33:2; Jes.48;17).
Sahalak panurirang somalna manjalo barita sian Debata marhite nipi manang
parnidaan (4 Musa 12:6). Sian pangalaho i na patuduhon ia Debata somalna
papatarhon diriNa tu angka panurirangNa marhite nipi dohot parnidaan di
partingkian Padan na Robi. Sabalikna marasing tu si Musa na langsung manjalosa
sian Tuhan siala ditanda Tuhan i do ibana. Lapatanna Tuhan i do na langsung
manghatai tu si Musa soada parhiteanna. Tarlumobi, panguluhonon ni si Musa n
mansai luar biasa na tarida sian pambahenanna. Sai ingoton do ibana siala
saluhut angka tanda dohot angka halongangan na pinasahat ni Tuhan i tu ibana
asa diulahon jala dipatupa di Tano Misir tu si Paraoh, saluhut naposona, jala
tu sude bangsona (ay.11). Angka tanda halongangan i ima martudutudu angka bura (tulah)
na manahopi bangso Misir (2 Musa 7-12).
f)
Gabe
siingoton ma si Musa siala saluhut nabinahenna i angka halongangan bolon,
hagogoon nang ondamondam na pinamasana tu saluhut Israel (ay.12). Hagogoon na
manompas boi do sada tudutudu tu angka sahit panahit nang halelengse ni angka
soldadu ni Misir uju mamolus aek rara ( 2 Musa 15:16). Mansai bahat do angka
panurirang bolon na ro muse dungkon ni si Musa songon si Samuel, Elia, Jesaya,
Hesekiel, Jeremia, Daniel, Amos, Hosea, Obaja, mansai godang dope. Nasida ma
naposo ni Debata na denggan, na burju jala satia. Alai ndang songon si Musa
nasida, ala dijalo si Musa do silehonlehon na khusus sian Tuhan i laho
patupahon ulaon na bolon di jolo ni Israel.
g)
Topik ni
Minggunta mandok : Marhiras ni Roha manghatahon Barita na Uli Mangasahon
Debata. Marhiras ni roha do si Musa mangulahon parsuruon ni Debata, dipelehon
do sadenggan dengganna dirina tu Debata. Musa ima jolma na mansai balga jala
gogo, ndang adong di portibi on songon haserepon ni rohana didok di 4 Musa 12:
3. Didok pe sisongon i siala ditanda si Musa do dirina sandiri, ndang
dipalobilaobi manang diorui sian hadirionna. Nabulus bulus i do dirohana. Holan
ulaula ni Debata do ibana didok rohana laho manghobasi bangso Israel marhite na
manguluhon nasida dohot denggan, jala parhitean nasida tu Debata jala diulahon
do na sa tolap ni gogona. Songon angka uluan na targoar di portibi on, ndang
mangalului hasangapon si Musa manang jabatan, hape najinou ni Debata do ibana
tu arah i, alai mansai borat do dipingkiri ibana laho manjalo panjouon i (2
Musa 3: 11). Jala diujungna ro ma sahalak panurirang Bolon na lobi muse sian si
Musa, goarna ma Ima Jesus Kristus (Joh.1: 45). Molo didokdi Buku Heber 3: 3, na
layak do Jesus manjalo hasangapon na lumobi sian si Musa. Na hehe do Jesus
songon si Musa jala marhite Ibana mangahatai Debata langsung tu jolma na
tinompaNa i dibagasan hajolmaon, songon pangidoan nasida ( 5 Musa 18:18). Alai
ndang ditanda bangso Israel ianggo Nasida dung sorang Jesus ditongatonga
nasida. Hape dibagasan hiras ni roha do Jesus mangatahon barita na uli
mangasahon Debata. Tongtong satia si Musa dohot Jesus. Asa hita angka na porsea
tapatuduhon hiras ni rohanta laho manghatahhon Barita na Uli mangasahon Debata.
Amen.
