Jahowa
Do Mual Ni Haluaon
Lukas
10: 21 – 24
1)
Mansai
tangkas do dipodai/dipaingot Tuhan Jesus siseanNa na 70 halak i unang palobihu
las ni rohanasida, ala naung boi dipabali nasida angka tondi na jahat
mangasahon Goar ni Tuhan Jesus Kristus ala naung dipasahat tu nasida buaso
mandegei angka ulok dohot hala dohot mangusir tondi na hodar. Alai las ni roha
na sumurung sihalashonon ni angka sisean/na porseai, ima: naung tarsurat goar
ni angka na porsea i di Banua Ginjang.” Ai ndang adong na patut
sibanggahononhon ni angka sisean dohot na porsea di Tuhan Jesus di portibi on
na margoar jasa dohot kesuksesan di ulaonna be, asa unang madabu tu ginjang ni
roha songon hadadabu ni sibolis sian banua ginjang i (ay.18-20).
2) Laos di tingki i ma marolopolop Tuhan Jesus
dibahen Tondi Parbadia, mandok: “Hupuji
Ho Amang, Tuhan sigomgom banua ginjang dohot tano on, ala ditamondinghon
(ditabunihon) Ho i sian jolo ni angka na pistar na marroha, gabe dipapatar Ho i
tu angka siondihononhon. Olo, Amang, i do dihalomohon rohaM hian. Saluhutna i,
nunga dipasahat Damang tu Ahu; jala ndang adong na tumanda Anak i, dungkon ni
Ama i; Ama i pe, ndang adong na tumanda i, ia so holan Anak i, angkup ni na
pinodaan ni Anak i mangihuthon lomo ni rohaNa. Dung i didompakhon ma pulik angka siseanNa, mandok: “Martua ma angka
mata na marnida na niidamuna; ai Hudok ma di hamu: “torop do angka panurirang
dohot raja masihol: naeng idaonna nian naung niidamuna, hape ndang diida:
“naeng begeonna, naung binegemuna, hape ndang dibege.”
3)
Nasa las ni
roha dibagasan Tondi Parbadia, i do mangonjar roha ni ganup na porsea
marolopolop mamuji Debata Ama, sigomgom banua ginjang dohot tano on, songon
nialaman ni Tuhan Jesus mida las ni roha ni angka siseanNa na porsea i. Alai
ganup las ni roha na so marhapatean tu pujipujian tu Debata dohot Jesus Kristus
ndada sian Tondi Porbadia anggo i (Rom
14: 10). Las ni roha ni Tuhan Jesus marolopolop mamuji Debata ala naung gabe
partohap angka na pogos, na gale, na oto, na terbatas, na marsahit dohot
pardosa di harajaon banua ginjang i. Disi dibaritahon tu nasida Barita las ni
roh jala porsea di Tuhan Jesus Kristus, Anak ni Debata na sinuruNa ro tu tano
on. Alai anggo haroro ni Tuhan Jesus buni do i di angka patik, parise, saduse,
dohot angka na pistar naung umbege Barita na uli, hape matua so porsea jala
ndang olo paubahon rohana, songon pangisi ni luat Korazim, Betsaida, Kapernaum
dna. Buni do nang angka ulaon hagogoon ni Tuhan Jesus dohot ngoluNa tu angka
parisi, buni dohot haroroNa tu portibi on tu angka siboto surat.
4)
Di Galilea
toho berkembang do ilmu filsafat, sohot ilmu fisika, matematika, alai di
Jerusalem ilmu Teologia do diguruhon angka na pistar, alai tongtong buni sian
rohanasida tingki panopotion ni Debata tu portibi on marhite /dibagasan Jesus
Kristus. Buni do nang holong ni roha dohot denggan basa ni Debata naung pinaruloshonNa tu angka
na metmet/dakdanak siondihononNa (Neipos). Buni nang ulaon ni TondiNa manogu
jolma i tu harajaonna. (Pst.Luk.17:20, Ende no.543/218, 83:3.
5)
Tutu nunga
dipasahat Ama i sude sangkapNa tu Jesus Kristus umbahen didok: “Sada do Ahu dohot Ama i” (Joh.10:30). Ai
ndang adong haluaon dibagasan manang ise na asing di toru ni langit dilehon tu
jolma parhiteanna tu haluaon. Asing sian Jesus Kristus (Ul.Ap.4: 12; Joh.14:6).
Asa ganup na naeng mananda roha, pingkiran, dohot hadirion ni Debata Jahowa,
Ama i, Jesus ma dibereng, dihaporseai jala diihuthon asa mangolu ibana
(Pat.John.14:9-11). Ima angka na pinodaan ni Anak i, na pinillitNa, tinodoNa,
na pinincangNa jala na niasianNa (Joh.15:16-27).
6)
Laho
mangungkap pingkiran dohot roha ni sisean i, pulik do (khusus) do nasida di
ajari Tuhan Jesus na mandok: “Martua ma
angka mata na marnida na niidamuna, dohot parbinegean naung umbege na
binegemuna; umbahen didok Tondi i tu angka huria: “Ditangihon angka na marpinggol ma na nidok ni Tondi i tu angka huria.”
(Pangk.2:7,11,17,29; 3:6, 13, 22). Lapatanna: Nunga diida hamu Sipalua na
pinarbagabaga i, jala dibege hamu Hata haluaon na sian Asi ni roha ni Debata;
gabe saut malua ma nang hamu dung porsea (Joh.8:36). Ima haluaon, na niluluan
jala pinamanatmanat ni angka panurirang, naung manuriranghon asi ni roha na tu
hamu” (1 Petr.1:10).
7)
Laos didok
Tuhan Jesus do tu hita: “Ai sitiruon do Hulehon tu hamu, asa dibahen hamu
songon naung Hubahen i tu hamu”. Molo diboto hamu i, martua ma hamu
mangulahonsa” (Joh.13:15,17). Ima ende olopolop dohot las ni rohanta, angka na
porsea mamuji Debata Ama i dibagasan Jesus Kristus dohot dibagasan Tondi Parbadia,
sahat tu haroroNa paduahalihon pusat ni sihirimonta i. Dihamauliatehon Jesus do
angka siseanNa ndada ala na pistar alai ala sian halak na metmet do haroroan
nasida. Dihametmeton nasida i do asa mangasahon Tuhan i nasida, jala marhasil
do nasida di na mangulahon panghobasion nasida i. Ndada na tarpillit nasida
sian tongatonga ni halak na malo, na pistar alai angka halak na metmet, angka
sijala dengke, sijalo beo, angka pardosa na nidok portibi on ndang tama nasida.
Boasa ? Ala molo halak na poistar naung dijoloani angka pikiranna sandiri,
naung antusan nasida do i saluhut hombar tu pikiranna sandiri, jala halak na bisuk pagodanghu partimbangan
mangadopi halak sisongon i, tung beha ma bahenon ni Tuhan i ? Asing do molo
halak na metmet ima angka halak na sederhana na porsea di pambahenanni Debata,
sai pos do rohana di ngoluna tu pambahenan ni Tuhan i. Mangadopi angka halak
sederhana on, sai pasupasuon ni Tuhan i do marhite asi ni roha godang. Asa
sahat ma ujungna angka halak na metmet i boi marnida, jala mananda dohot
mangantusi Jesus nang angka sangkapNa.
8)
Topik ni
minggunta mandok: “Jahowa Do Mual ni Haluaon”, marsiajar hita sian Jesus na
marparsangapi jala mangargahon nang dukungan tu angka halak na dihumaliangta.
Jala mandok mauliate ndada holan ni na marhasil alai dohot do di angka hamaolon
tongtong do hita mandok mauliate. Ala di hamaolon i do hita lam tang jala
mangerbang. Angka jolma na mangae jala manaon parsahiton do na mampu
mangargahon na ginoaran hahipason. Angka jolma na mangkilalahon lungun ni roha
ala sahalakna na so dipandang halak ibana na mangantusi pengakuan dohot na
sauduran. Di hahasintonna nang di pardangolan dohot sitaononna i do mangido
pangurupion dohot gogo sian Tuhan i, jala na mambahen Tuhan i mual haluaonna asa
pos rohana jala dapotan gogo mangadopi sitaonon i jala marhasil dohot
marhamonangan. Amen.
