Nunga Tubu Raja ni Hadameon
RAJA DAMAI TELAH LAHIR
(Mikha 5: 1 – 4)
Ia panurirang Mikha na marbagabagahon sahalak partogi na
naeng ro sian Bethlehem, Ibana ma na manggohi ssaluhut padan ni Debata tu
bangsoNa. Ia turpukta on marhahonaan tu Jesus Kristus ima Mesias i na
marharoroan sian najolo. Ibana sorang songon jolma, Ibana ma Tuhan jala Sipalua
hita, goarna ma Tuhan Jesus Kristus.
Ia Bethlehem Efrata, sada kota na
metmte di Juda, daona hurang lobi 9km sian Jerusalem inbu kota ni harajaon Juda.
Bethlehem ima kota na metmet sian angka kota na asing di Juda tingki i, ala
hurang diparrohahon jala dang dapot etongon sian politik, sosial-ekonomi nang
parugamaon.
Alai gabe sian dalan na holom di
kta Betlehem na metmte i, marsinondang ma panondang. Sian Kota na metmte i
sorang ma partogi na bolon, sahalak Raja na mangatasi huaso ni saluhut parhuaso
di portibi on. Hape Bethlehem kota na metmte i gabe pusat ni pamerengon ni sude
jolma, ala sian i ma bangkit sahalak partogi na bolon i. Sian Bethlehem na
metmet i, dibahen Debata sada sejarah na bolon. Ido ala na sian panurriang
Mikha di turpuk on paingothon tu hita, ia pesta natal on di hita ima:
1) Ia
kota Bethlehem na metmte i sasintongna naung adong dibagasan sangkap ni Debata.
Disi do si Rahel mate, ompung ni si Daud ima si Rut maringan disi, Raja Daud
sorang disi, jala Jesus Kristus pe sorang disi. Berengon do so apala ringkot, ndang
mararti, ndang pola diparetonghon ni panatapan ni jolma alai gabe mararti do
dibahen Debata, jala gabe mual ni las ni roha nang hadameon.
2) Bethlehem
ima koa na metmet, goarna Bethlehem na marlapatan: Rumah Roti, nang pe metmet
alai gbe pasupasu bolon. Ngolunta on pe naeng gabe pasupasu tu saluhut jolma.
Mamestahon natal ndang holan pesta godang sipanganon dohot minuman, dungi adong
pahean na imbaru nang dekorasi na bagak. Alai mamestahon natal ima
masilehonlehon nang marlas ni roha tu saluhut jolma.
3) Di
Bethlehem kota na metmet i ma sorang Kristus. Posoposo anak ni Natal i sorang
laho gabe manarita jala mate. Peak do di panggagatan na di Bethlehem i, gabe
sitotas nambur tu hau pinarsilang di Golgata. Posoposo na di Bethlehem i ima
hajolmaon ni Debata na manarita. Jadi dibagasan las ni roha na marnatal on,
naeng ma hita marningot laho mamestahon i dibagasan haserepon, kesederhanaan,
ndang marpesta pora hita disi. Tapestahon ma natal na sederhana dohot roha na hohom sian
kesibukan, sian angka parsualon ni portibi on, sian hamaolon. Unang songon na
asing dirayahon dohot angka petasan, keributan, mabuk minuman, kegaduhan na ma
na masa bahkan pola gabe adong korban. Marsiajar ma hhita sian Bethlehem na
metmet i, pametmet ma egomu jala paserep ma roham, siala tung metmet pe hita
jolma on, alai dihaholongi Debata hita.
4) Habalgoan
i ndang na songon na nietong portibi on manang na di roha ni toropan ni jolma,
alai hombar do tu sangkap dohot lomo ni roha ni Debata i sandiri. Naeng ma hita
porsea, ia ngolunta on, metmet manang balga, tongtong do dibagasan
pangaramotion asi ni roha ni Kristus sahat tu na mamongoti taon na imbaru
nanaeng sibolusonta.
Tarimangrimangi ma hasosorang ni
Tuhan Jesus Kristus i di portibi on.
Dipesta natal borngin on naeng ma tubu di roha laho marende ende, marpuisi,
mardeklamasi mandok mauliate, mamujimuji Tuhan i. Asa disi ma rohanta lobi sian
ari na asing i, gok las ni roha nang olopolop ma rohanta ala nunga tubu Raja ni
hadameon i. Amen.
