GABE DAGING MA HATA I
FIRMAN TELAH MENJADI MANUSIA
Yohanes 1: 1 – 14
1)
Pandohan “Hata” dison ima sian hata Gorik “logos”
na marlapatan “Kata” asa boi ma dohonon dilapati “Hata” manang “parhataan”, alai
songon pangantusion parbinoto na mandok hajongjonganna. Dibagasan hajongjongan
i adong hangoluan jala hangoluan i ma panondang (ay.4). Hajongjongan na
manghamham hangoluan dohot hatiuron na mangatasi haholomon. Dipatiur do na
holom i alai haholomon i ndang boi mangatasi hatiuron i (ay.5). Panurat Buku
Johannes naeng patoranghon tu panjahana di najolo i taringot tu hajongjongan ni
Jesus Kristus na sian ginjang haroroanNa. Asa dipangke ma istilah na secara
filsafat na boi antusan ni torop jolma hatiha i. Molo disungkun hita uju metmet
dope, sai tadokdo angka songon jolma na marpangkat, manang na gabe laam umbalga
sian donganna sahuta. Sude do hita jolma naeng do lam mamora, lam sangap, jala
hormat, lam tu maduma, lam tarbarita, lam marhuaso, lam jaya (songon angka goar
ni usaha, manang cv na nuaeng on). Lam bahat do angka sintasinta manang
keinginan ni jolma na lobi maju sian angka dongan jolma. Dapot roha do i di
hajolmaon on, manang ise pe boi do sukses ibana, sai taulahon ma dohot jujur
jala denggan angka na pinarsinta ni rohanta molo lomo rohanta.
2)
Didok si Johannes do muse ia Jesus ima “Panondang
portibi on” (9-10). Ditulak portibi on do panondang i marhite angka haholomon.
Alai haholomon i ndang mampu manaluhonsa. Sai songon naeng dipadomu si Johanes do
barita panompaon i di Buku 1 Musa. Ia ditompa Debata ma hatiuron i na jumolo
laho manghophop haholomon i. Ia Debata i sai dilapati do na dao sian hita, alai
dung gabe jolma Debata i gabe lam jumonok ma dohot manisia. Sada panindangion
taringot inkarnasi ni Debata dibagasan diri ni Jesus. Na ro do Debata i gabe
jolma dibagasan diri ni Jesus. Asa lam jonok ma Hata i, nunga maringan
ditongatonganta Ibana tudos songon hita jolma. Na nidokNa pe mansai mura
antusan siala dipangke Debata do bahasa ni jolma.
3) Alai sian tongatonga ni halak na porseai na manghatindanghon dirina songon siihuthon Kristus nunga lam godang na gabe muba rohana, ditadinghon Tuhan Jesus i. Godang do halak Kristen na manadinghon ugamo na manang Tuhanta Jesus i. Halak na mandao rohana ima si pargabus, halak Kristen alai disoadahon do ia Jesus ima Kristus i. Halak na murtad i ma goaron si Pargabus, na mandok dirina halak Kristen alai disoadahon do ia Jesus ima Kristus i. Halak sisongon i ma na ginoaran anti Kristus na manoadahon Ama dohot Anak.
4) Panindangion ia Debata na gabe jolma dibagsan Jesus ima saratus persen jolma. Ibana do Jesus Kristus, botoon jala hilalaonNa do panaritaan ni jolma i. DihilalaonNa do na mauas, na male, na mangandungi, na muruk dohot lan na asing, alai ndang na gabe mago hamuliaonNa i songon Anak ni Debata jala ndang martihas dohot mardosa Ibana. Dibaritahon Bbibelta i do ia Debata na patuduhon hamuliaonNa dibagasan Jesus Kristus, ima marhite:
a) Tung soadong do jolma na boi marnida Debata secara fisik. Holan marhite Jesus i do na boi idaonta Debata. Dibahen Debata do DiriNa asa ditanda marhitehite Jesus (gabe daging ma Hata i-Firman telah menjadi daging).
b) Ia Jesus Kristus sian pardompahan ni Debata na boi berengon ni mata, na boi begeon ni sipareon, jala na boi dais dohot fisik. Naung dipatuduhon Debata diriNa dibagasan Jesus Kristus. Haporseaon nang panindangionta di Jesus Kristus sian Hata ni Debata na gabe bonsir ni hasintongan ni Tuhanta ima Jesus Kristus. Laos songon i ma panindangion dohot haporseaon ni hita di Jesus Kristus ima Hata i na gabe bona ni hatigoran na sian Tuhanta Jesus Kristus.
c) Laos songon i ma panindangion ni angka sisean ni Jesus taringot tu hamuliaonNa i umbahen nasida naung marnida hasangaponNa na dibasabasahon Debata tu Jesus songon “AnakNa na sasada ni Ama i” na mangalehon hosaNa tu jolma songon Sipalua na mangolu. Asa sian i ma patuduhon ia Jesus na sintong do haroroanNa sian Debata jala marhite jamitaNa na gok bisuk nang angka halongangan na gabe dalan panindangionNa tu angka siseanNa asa disurathon ma “Naung taida do hamuliaonNa i”. Hita pe naung mamereng hajongjongan ni Jesus i na papatarhon Debata dibagasan diriNa, na dibereng sian lomo ni rohaNa, holongNa dohot pambahenanNa na patuduhon Debata.
d) Asa molo naeng antusanta, asa jumolo ma hantus di hita taringot “inkarnasi”. Jesus Kristus ima Debata na gabe jolma, na ro do Ibana songon sitotas nambur ni hangoluan dohot hatiuron. Na ro do Ibana tu portibi on laho paulakhon portibi on tu hatiuron. Adong do na manulak Ibana ala naung sanga leleng mangolu dihaholomon. Alai adong do na manjanghon Ibana na ginoaran angka anak ni Debata (John1:12).
Asa molo tapestahon parningotan hatutubu ni Jesus, manang Natal iam na mangondolhon tu
hita songon angka siihuthon Kristis ima angka anak ni Debata. Alai ndung salpu natal, naeng
tongtong hot hita songon siboan hangoluan nang hatiuron. Molo taulahon na maralo tusi, na
marlapatan na so taparsangapi hajolmaon ni Debata. Ia Hata i i ma Debata, na gabe jolma.
Na dao hian do Debata i alai marhite inkarnasiNa dibagasan Jesus gabe jonok ma Ibana tu
hita. Ibana ma hatiuron na manondangi hagolapon ni portibi on. Mangolu ma hita laho
manjalahi dirinta asa mangolu laho patureture dirinta. Naung daging do Hata i, jala Hata i
tahangoluhon, taparhadaginghon asa lam malo hita pasumansuman lomo dohot sangkap ni
roha ni Debata marhite na mangulahon hataNa nang patikna i. Amen.
