“Tomu
Ma Ibana Na Pinarbaga Ni Jahowa”
Sambutlah Dia Yang
Dijanjikan Allah
& Ev: Rom 1: 1 –
7 & Ep: Jesaya 7: 10– 16
A. Patujolo
Ia Buku Rom ima na ginurithon Ap.Paulus hirahira taon 57.
Saleleng pardalanan ni panghobasionna, laos so he aodpe ibana mambongoti huria
di Rom Holan satongkin do ibana mamasuhi kota Roma (Ul.AP.23:11-22), dungi
humusor ma muse iaban tu Kaisarea (Ul.Ap.23:33-35). Ia kota Rom ima ibu kota di
harajaon na mabatas sian inggris dahat tu Arab, sada kota na mansai mora jala
pusat pamarenta nang pardagangan ni dunia na mansai tarbarita uju i. Harajaon
di Roma mansai dame jala makmur. Ia ruas ni huria di Rom na mabaor dohot bangso
Jahudi nang angka bangso na asing na marbonsir sian boni pamaritaon na dipatupa
Ap.Petrus di ari Pentakosta (Ul.Ap.2:10), uju i angka paisolat na ro sian Rom
jala marpungu di Jersualem. Ia Buku Rom na marisihon angka pangajarion na
mansai ringkot na pinatupa AP.Paulus. Dungkon digurithon surat on hira taon 64,
masa ma pangaleleion bolon na sian Kesar Nero na mambahen tuduhon palsu tu
angka halak Kristen uju i na mambahen hagoran Kota Roma, hape Kesar Nero do na
manutung kota i. Dibahen Kesar Nero sisongon i ala sogo rohana marnida halak
Kristen jala dibereng do nasida penentang ni kesar ala ndang olo manomba kesar
songon Tuhan dinasida.
B. Hatorangan
1)
Ayat 1: Hata “naposo”/ hamba ima na
patuduhon diri ni si Paulus na dijou gabe apostel. Naposo/hamba sian hata Gorik
: “doulos” lapatanna hatoban (budak). Pandohan hatoban na patuduhon ulaon na
tumoru, ala sahalak hatoban inglkon manghobasi tuanna. Adong tolu pangantusion
sian Padan Na robi taringot tu doulos (hatoban/hamba/naposo)
Ø Ia di Padan na Robi sahalak hatoban ima na tinuhor (1 Musa
43;18 angka hahaanggi ni si Josep na mananda dirina diadopan ni si Josep, ai
nunga mago hak nasida songon hatoban nang arta nasida pe, na boi buaton tuan nasida
jala boi manuhor hatoban i). Ia Ap.paulus manghilalahon dirina songon hatoban
ni Kristus siala Kristus naung manuhor dirina marhite mudarNa jala manesa angka
dosana. Pandohan naposo /hamba ima na gabe singotsingot dihita angka naunga
tinobus mudar ni Kristus na gabe shatoban ni Kristus. Molo gabe hatobanNa hita,
ndang adong na boi sipertahanonta songon milikta, alai sabalikna ingkon
pasahatnonta do saluhutna na adong dihita tu Ibana songon Tuan jala Tuhan
(Kurios) dibagasan ngolunta (12:1-2; 1 Ptr.3:15).
Ø Napaduahon di Padan na Robi sahalk hatoban ima na mamuji
Tuhan Debata. Dipaboa di Psalmen 119: 49, ia hatoban/napsoo na dihonahon tu
sahalak na marningot dohot na mangkirim di angka HataNa. Dung i molo tajaha di
Jesaya 56:6, sahalak hatoban ima na marpardomuan tu halak na maniop padan ni
Debata. Hombar tusi ia Ap.Paulus ima halak na sai nunut mamuji Tuhan Debata,
jala digoari ma ibana naposo ni Debata. Hita angka naposo ni Kristus ndada na
holan sidok mauliate di asini roha Na na manobus hita, alai na rade mangoloi
Hata nang patikNa jala na olo mandok Ndang tu dosa.
Ø Napatoluhon taringot tu hatoban /naposo di Padan na Robi
ima halak na marsitutu manghobasi halak na asing ( 1 Musa 24:2, 10, 17, 34-67).
Sian i boi berengonta naposo ni si Abraham na manghobasi si Abraham dohot si
Ishak dohot denggan, jala naposona i mangido tanda sian Tuhan laho patuduhon
dongan saripe na tama tu si Ishak, tuanna i. Suang songon i maolo tajaha
di 1 Raja 19; 19-21, dipaboa taringot tu
si Elisa songon naposo ni si Elia na marsitutu manghobasi si Elia, panurirang
ni Debata. Marhite i Ap.Paulus na marsitutu manghobasi Tuhan i dibagasan
ngoluna ima Kristus i sandiri, asa tung manang aha pe na ni parentahon Kristus,
na gabe pangoloi do si Paulus disi. Laos songon i do hita angka siihuthon
Kristus ima angka naposoNa na wajib maggarar arganta dibagasan Kristus (Mat.16:24).
Asa marsitutu hita mamaritahon Barita na Uli ni Kristus tu saluhut jolma hombar
tu na tinonahonNa (Mat.28:19-20).
Dibagasan ayat 1 on ndada holan naposo
ni Kristus ia si Paulus alai dijou gabe apostel. Hata ‘dijou” di Hata Gorik
“Kletos” na marlapatan ditodo (dihunjuk-appointed) secara khsusu. Jala hata
apostel/rasul sian hata Gorik “apostolos” na marlapatan delegasi manang duta
injil, manang utusan. Dison ma Ap.Paulus manggoari dirina songon naposo ni
Kristus, jala ibana apostelNa na gabe utusan ni Kristus manang duta injil
songon pondasi ni huria (Ef.2:20). Molo najolo si Paulus margoar si Saulus, ima
sahalak hatoban ni dosa, ala ni i ibana dohot hita pe rup na hona jorat manang
tarihot dosa, jala ndang adong na boi paluahon hita sian jorat i, ia molo so
holan Kristus. Parjumpangan ni si Saulus dohot Kristus dipardalananna tu
Damsyik (Ul.Ap.9: 3-9) mambuhai dohot paluahon ibana sian jorat ni dosa, jala
diganti ma goarna gabe si Paulus (na metmet), na gabe hatoban ni hatigoran nang hasintongan ima Jesus Kristus i. Na gabe
pangoloi do si Paulus jala rade agoan hosa holan ala ni Kristus dohot Barita
nauliNa i. Laos songon i do hita uju gabe hatoban ni dosa hita nunga dipalua
marhite mudar ni Anak ni birubiruni Debata, jala hita naueng ndang na gab hatoban
ni manang ise, alai gabe hatoban ni Kristus, naposoNa, alapatanna na hobas do
hita manghobasi Ibana sleleng ni lelengna, jala satia tu Ibana dohot HataNa.
Gabe pangoloi tu Ibana dohot HataNa, jala rade agoan hosa holan ala Ibana. Na
gabe pangoloi do Ap.Paulus so pola tarbarita pe goarna najolo uju gabe sisean
ni si Gamaliel ibana. Saluhut najolo idihilalaibana gabe paruntungan, alai
nuaeng gabe harugian do hape di ibana, ala panandaonna di Kristus na lobi
ummarga sian manang aha pe (Pil.3:8-9), ima harohaon ni naposo ni Kristus.
2)
Ayat 2-4: dison na langsung do AP.Paulus
manaithon Barita na Uli dohot panurirangon di Padan na Robi (1 Musa 3:15). Ia
pamusatan sude Barita na Uli ima Jesus Kristus na sorang sian hajolmaon dohot
ha-Debataon (ay.3-4, ima; Taringot tu Anakna Jesus Kristus, Tuhanta i, na tubu
sian pomparan ni si Daud, ia dagingna. Naung gabe tandap Anak ni Debata na
marhagogoon mangkihuthon Tondi na badia, dung hehe Ibana sian hamatean).
Kristus na mardaginng manisia, na terbutki Ibana sian pinompar ni si Daud
(amt.1:1-17), jala Kristus i pe na sian Debata, na terbutki na hehe do Ibana
sian hamatean laho manaluhon huaso ni dosa, sibolis nang hamatean. Dibagasan
ayat 3-4 on dipatorang si Paulus konsep padua mula ni Kristus dohot tangkas. Ia Barita na Uli ima Kristus
i. Ganup Barita na so mamaritahon taringot tu Kristus ima barita gapgap
(Gal.1:6-10). Molo taparrohahon na masa di haKristenon di partingkian on, ia
impola ni Barita na Uli i nunga morot sian ulaon ni Kristus na manobus dosa
gabe dua horoang na ringkot ima Barita hahhipason dohot hadumaon na
mangharingktohon halongangan di hahipason dohot pandengganhon perekonomian
siala panobusion ni Kristus. Di sisi na asing ima barita na Uli sosial na
manawarhon ia Kristus ima na paluahon saluhut manisia sian boban ni panaritaan
dohot haporsuhon ni portibi on (na manulak ulaon panobusion ni Kristus na
manesa dosa). Mamaritahon barita na Uli ima na marpamusatan di Kristus ingkon
dipatupa marhite na so mardia imbar tu manang ise pe, songon Kristus na manghaholongi
saluhut jolma na so mardia imbar. Lapatanna, ingkon baritahononhon do Barita na
Uli tu saluhut jolma mandok ia sasada Jesus Kristus na gabe Sipalua portibi on,
jala mamboan hita asa lam porsea jala gabe pangoloi di Ibana. Pamaritaon na
sintong dohot na martanggungjawab ima na holan marpusat di Kristus
(Christosentris), jala na manogunogu tu kristus. Pamaritaon na holan mangajar
taringot tu Kristus, alai ndang manogunogu tu kristus, na gabe pamaritaon na
marisuang. Lapatanna, pamaritaon i holan hata manang teori na so di
parsiranguthon manang mambuat haputusan Kristus na gabe Tuhan dibagasan ngoluna
siganup ari. On ma nigoaran pangoloi tu goarNa, songon respon ni haporseaon tu
Kristus. Hata mamngoloi di hata Gorik di dok “hupoke” lapatanna haunduhon
manang sipangoloi. Halak na mangoloi ima halak na unduk tu parentaNa. Dison ma
dipatuduhon pasahathon diri total tu Debata na sasada i na ingkon sihaposan
nang dihaporseao na so pola sala be jala tu HataNa, Buku na Badia songon
pondasi ni haporseaon ni halak Kristen.
3)
Ayat 6 – 7: dison Ap.Paulus langsung
patuduhon huria na di Rom songon halak na sian saluhut bangso na jinou Debata
gabe nampuna ni Kristus songon tu si Paulus. Hita angka anak ni Debata pe
dipillit jala dijou Debata andorang so dijadihon portibi on (Rom 8: 29-30),
laho diain gabe nampuna ni Kristus jala hita diparbadia i (manang gabe halak na
badia-ay.7a), asa sarupa dohot gombaran ni Kristus, Anak ni Debata. Ala naung
dituhor jala argana nunga salose marhite panaonon ni Kristus. 1 Korintus 6:20 = “Ai arga do hamu
ditobus: Dibahen i pasangap hamu ma Debata marhitehite dagingmuna dohot
marhitehite tondimuna; ai Debata do nampuna i.”
3)Boi
do halak mangalapati taringot tu hatoban i ma na tarihot, alai Ap.Paulus mandok
na marasing, ia hatoban na jinou Debata ima halak na bebas, jala diuduti muse
molo tung pe bebas sahalak hatoban i alai nampuna ni Tuhan i do ibana.
Lapatanna nang pe hita angka anak ni Tuhan i ima angka hatoban ni Debata na
naung dipalua sian dosa, alaihot do naisda nampuna ni Tuhan i na wajib jala
ingkon paundunghon diri ndada tu jolma alai tu Debata. Ingkon sipangoloi do
hita laho pararathon Barita na Uli i songon respon ta na torus manorus songon
hatoban ni Kristus na naung tinobus ni mudarNa. Dungi diujung ni ayat 7 i,
dilehon Ap.Paulus do pasupasu na songon gabungan ni hasomalan ni halak Jahudi
dohot Junani. Pasupasu on ima sada tabe sian apostel tu huriana di Rom na so
hea bongotanna. Pandohan tabe nang parhorasan on gabe sada bukti nahilalahon ni
AP.Paulus tu huria di Rom.
C. Sipahusorhusoron
1)
Na tarjou do hita gabe siboan Barita na
Uli. Di Matius 28;19-20 tangkas do parsuruon ni Jesus tu angla siseanna nang tu
hita na mandok: “Laho ma hamu, podai hamu ma saluhut bangso, didi hamu ma
nasida tubagasan Goar ni Ama. Anak dohot Tondi Parbadia! Laos ajari hamu ma
nasida mangaradoti nasa hata naung hupatikkon tu hamu. Ai ida ma, sai na
dongananku do hamu ganup ari, rasirasa ro ajal ni hasiangan on.” Boasa hita
laho gabe suruan ni Debata ? ima na parjolo: ala dihaholongi Debata hita. Molo soala
ni holongh ni Debata tu hita na mardosa on, sai dibagasan rimasNa do hita ala
ni dosa i. Alai siala asi dohot holong ni rohaNa na balga i tu hita, pola do
dilehon AnakNa na sasadai bahen haluaon di hita (Joh.3:16). Napaduahon, ala
naung dijou hita. Haluaon ni Debata naung patar dibagasan ngolunta uju dijou
hita gabe anakhonNa. Ndada siala na ro hita ti Debata alai ala panjouonNa asa boi hita ro tu Ibana. Siala holong nang
panjouonNaima hita gabe angka nabadia. Songon na marroha hita di asi dohot
holong ni Debata i, rade ma hita manarihon dongan marhite pasupasu partondion i
tu angka jolma na so porsea dope tu Kristus, asa lam torop bilangan ni na
porsea jala pangoloi dii Ibana. Unang ma hita gabe halak na egois, na holan
sari di dirina sandiri. Pasarhon ma barita las ni roha i tu torop jolma.
Panjouon ni Tuhan Jesus i na marsintuhu situtu. Uju pangoloi hita di PanjouonNa,
las ni roha bolon ma na tajalo dibagasan golunta.
2) Natarjjou do hita asa gabe sagombaran dohot Kristus, ai
Kristus do na parjolo di hita asa hita ma na mangihuthon bogasNa i. Dipasahat
Tuhan Jesus do tu hita tiruan na tingkos i. Asa ganup na porsea ingkon marguru
sian Ibana. Marsiajar hita diserep ni rohaNa: “Atik pe rupa ni Debata di Ibana,
ndada songon na nidobo dirajumi rohana tudosna i tu Debata. Dirumari do dirina
jala disolukkon rupa ni hatoban, gabe suman tu jolma do Ibana jala rumang jolma
dapot di Ibana (Pil.2:6-7). Na ro do Tuhanta Jesus i ndada laho dioloi Ibana
baliksa gabe pangoloi (ptds. Mat.20:26b-27). Sahalak naposo lapatanna na olo
mangoloi, ndada asa dioloi. Asa gabe sarupa nang sagombaran dohot Kristus,
naeng ma hita torus marsiajar sian haoloonNa tu sangkap ni Debata. Sipangoloi do
Kristus di Debata Ama i, mangulahon lomo ni rohaNa sahat tu na agoan hosa di
hau pinarsilang i. Nang pe lea dibereng, direhei jala dipatutoru jolma, alai
ndang dibalsohon Ibana i, baliksa ditangianghon do nasida i.
3) Minggu on naung masuhanta ma minggu Advent na pa opathon,
tema na mandok: “Tomu Ma Ibana Na Pinarbaga Ni Jahowa”. Halak na tama manomu
haroro ni Jesus Kristus i, ima na rade rohana gabe pangoloi di sangkap nang
Hata ni Debata. Marguru tu lomo ni roha ni Ama i marhitehite HataNa nang
PatikNa. Manomu Kristus i, ingkon tama
ma ibana tongtong marsiajar dihaserepon ni roha, ndada ginjang ni roha na
sipangasahonon. Unduk dohot serep ni roha gabe ciri khas ni halak na olo manomu
Kristus i. Halak na satia manomunomu haroro ni Kristus sai hot ma hasationna i
jala unang mubauba. Ai portibi on boi do paubahon hasatiaonta molo sai olo hita
diela, digunturi, dipalindaklindak sibolis i. Alai maulitae ma di Tuhanta i na
sai tongtong satia mandongani hita asa malua hita sian hamolon nang hasusaan
nang hagangguon i. Selamat Advent. Amen.
