NDANG MULAK BOTI HATA NI DEBATA
Firman Tuhan Tidak
Akan Kembali Dengan Sia-sia
Ev. Yesaya 55: 10 – 13 Ep. Mateus 13: 18 – 23
DI hita saluhutna
huria ni Tuhanta na hinaholongan dibagasan Jesus Kristus, Tung so hea do didok
Tuhanta i HataNa tu angka na so marguna, manang tung so hea do saluhut Hata ni
Debata na marisuang boti. Hata ni Debata laho mangalehon hagogoon, haluaon jala
hangoluan na manongtong. Huaso ni Hata ni Debata na manghorhohn tu parngoluon
ni angka jolma, angka na porsea nang na so porsea pe. Ala molo tu angka na
porsea, sai jaloonna do angka na pinarbagabaga Debata marhitehite hataNa. Andul
marasing tu angka jolma na so porsea, angka na marbalik sian na manjalo Hata ni
Debata na ingkon sijaloon nasida. Huaso Hatani Debata pe manghorhon nang tu
saluhut angka na tinompa di portibi on, dohot di pardalanan ni sejarah ni angka
bangso di portibi on. Ndada holan bangso, alai dohot do ganup halak, huaso Hata
ni Debata manghorhon di sejarah ni parngoluonta. Hata ni Debata na niojakhon ni roha, manimbulhon
hatontuon, nang bagabaga dohot pangkirimon di hapataranna. Tung so ada do na
mulak boti tu Debata, siala Hata ni Debata naung dipasahat Debata tung so muba
jala mose i, alai sai manongtong do i. Tung so mulak songon i do Hata ni Debata
siala Tuhan Debata na satia di angka padanNa. HataNa i na mangulahon angka na
tonaNa. Tu hita do HataNa i, na mangalehon hangoluan dohot pasupasu partondion
tu bagasan parngoluonta si saonnari on sahat ro di saleleng ni lelengna. Sai
porsea ma hita di Hatani Debata asa marlas ni roha gok olopolop jala las ni
roha raphon Kristus Tuhanta i.
Disada tingki adong ma sahalak dakdanak na marmeam
meam di topi ni Tao raphon dohot solu meamemamna. Ala ni tabo ni parmeamonna i,
tung so di boto do parao meam memamna i lam leleng lam mandao marhusor to tonga
ni aek tao i. Tunga boha ma ibana mambuatsa ? tung so diboto do marlange.
Sai tumatangis ma dakdanak i huhut manganggunhi
mangido tolong. Hape adong sada ama na umbege anggug ni dakdanak i na huhut
mamolus sian i. Diurupi ma dakdanak i asa laho mambuat meammeam na i. Aha ma na
pinatupa ni amanta i ? Dibuat amanta i ma sada batu huhut di danggurhon ma tu
parao i. Gabe mangamuk ma jala muruk dakdanak i tu ama ama i. Alai lam
diparrohahon ma parao na i lam leleng jonokkhon topi ni tao i. Gabe las ma roha
ni Dakdanak i. Boasa tingki di danggurhon batu tu parao i muruk dakdanak i ?
ala di roha ni dakdanak i olo ma gabe sega parao meam meam na i. Hape baliksa
asa lam jonok do parao na i dibahen galumbang aek na di dagnggurhon batu ni ama
ama i. Gabe las ma roha ni dakdanak i huhut mandok mauliate tu ama ama i.
Hamuna angka dongan sai jotjot do hita songon
dakdanak i sai marsak, jala humasusa mamingkiri angka hamaolon, angka arsak,
sitaonon na taadopi di parngoluonta. Alai molo mulak tapasahat tu Debata Ama i
saluhut parsorionta i, sipata tung maol do antusanta pambahenanNa tu hta laho
manaleseihon masalahta. Boi do tabereng lam maol dalan i, jala susa rohanta
mamingkiri, olo do mao tapingkiri cara nang pambahenan ni Debata laho
paujunghon parungkilonta i. Cara nang dalan ni Debata tung so antusanta do
sipata maol tarjalo rohanta; rumit dan sulit manjanghon tu roha bagabaga ni Tuhan i. Pasupasu, haimbaruon, hamubaon
laos sisongon i ma panghilalaan ni bangso Israel dibagasan turpuk on.
Molo taparrohahon ayat
12-13, boi do ro sungkunsungkun tu bagasan rohanta, borhat tudia ? hape
dibagasan habuangan do situasi nasida. Boha do boi nasida marlas ni roha ?
Boha do boi partubu sampinur
dohot bunga na hushus ? na nihilalon nasida holan angka duhutduhut do na tubu
nang angka suga. Pitupulu taon ma lelengna masa habuangan i, bangso Israel
dibuang tu tano ni halak sileban, sai marhusori do dibagasan roha nang
haporseaon nasida taringot “habalgaon ni Debata”. Dungkon dibagabaghon Debata
haluaon di nasida tung mansai leleng do dipaima nasida tingkina. Ati boha laos
songon i ma panghilalanta angka halak na porsea i laho paimahon bagabaga
hasasaut ni Hata ni Debata tu hita.
Marhite na masa si
songon i, ala ni i adong ma pigapiga point na porlu sipahusorhusorhononta, ima:
a.
Naparjolo;
Dipaloas Debata do masa tu hita angka hamaolon, sipingkiran, nang hasusaan,
alai dipudi ni i saluhutna diigil Debata do hita sa marsiajar sian angka
haberniton i. Tu halak Israel naeng do asa ajaron ni Debata nasida asa gabe
sada bangso na marhamubaon sian dalan na so sintong, sian dalan na so tigor
(halumlamon pangalaho nasida na so satia marsomba tu adopan ni Debata jahowa).
Nang tu hita saluhutna angka na porsea molo tung pe masa angka hamaolon,
haberniton dibagasan parngoluonta, naeng diigil Debata sian hita asa sadar diri
di angka pangalaho na uju i masa di hita; atik so satia hita tu Debata. Atik
hurang burju hita mangulahon HataNa i. Mansai uli do di angka na porsea sadar
jala mangkuling Tondi Parbadai i manjou jala manggorahon tu rohana asa mamingkiri
na masa hamaolon i saluhutna. Asa holan Tuhan Debata na tau mangalehon dalan,
hatiuron asa malua hita sian haberniton i. Jala molo nunga tapasahat saluhutna
tu adopan ni Debata, dapot hita ma hagogoon na imbaru, pos ni roha nang las ni
roha, ala sai dipasupasu Debata do hita, so loasonNa hita sai dibagasan
haporsuhon, adong pasupasu na so tarhatahon. Diparade Debata do suksuk pasupasu
na sai marhaposan jala na mulak tu dalan ni Debata. Ala ni dijou do hita jala diarahon asa mangaluli
Debata. ( 55:6 Sai lulu i hamu ma Jahowa, binsan tarbahen dope jumpang ibana;
jou hamu ma ibana, binsan jonok dope ibana.)
Tantangan jala
hambatan di hita di jaman nuaeng asa jonok jala solhot tu Debata ima kemajuan
tehknologi nuaeng. Ndang tu Debata be ibana manghatai, mangalualu,alai gabe
laho do tu jolma, tuhalak na pistar, tu Mbah Google. Di Goole i boi
sungkunonnta manang aha, jala hatop do dialusi hasilna. Boi do hita gabe
terlena, jala gabe mar pos ni roha dohot ujungna marhaporseaon tu portibi on.
Ndang marhaposan tu Debata be nasida, hape portibi on na terbatas do, jala
ndang sempurna pasti sai adong do kelemahanna. Na deba holan donganna jolma na
di haposi, dang tu Debata be rohana. Ala ni i ringkot do hita mamereng
perkembangan jaman sinuaeng on asa unang terjebak hita disi. Sai margogo ma
hita pasolhothon diri tu Debata Jahowa i.
b.
Napaduahon;
Mandalani parngoluon on, sipata hita holan na mangarsakhon angka siarsahonon,
angka hamaolon na taadopi gabe maol tahilalahon ala hurang dope pos ni rohanta
boi hita malua sian angka hamaolon i marhite dalan nang cara na asing. Molo
manghuling haporseaonta pasti sai lehonon ni Debata do dalan tu hita asa malua
sian saluuhutna hamolon i. Unang ma gabe jumolo angka persoalan i na sai
mangarajai roha nang pingkiranta alai taloas ma habalgaon nang hasangapon ni
Debata mangarajai roha nang pingkiranta, asa lumbang tahilala, dame rohanta,
jala gabe marbisuk hita dohot margogo. Sai adong do binsar hatiuron sian
haholomon, lapatanna unang ma pangke pingkiranmu, utokutokmu, gogomu, nang
portibi on. Pangke ma hagogon ni Debata, pangke ma nang HataNa i na mangjari,
manogunogu tondinta.
c.
Napatoluhon:
mandalani ngolu siganup ari raphon Tuhan i, tung soada do na marisuang, saluhut
dipangke Debta do laho tu haporluonta di ari na naeng ro. 55:10 Ai songon hadadabu ni udan dohot ambolas sian
langit, jala ndada mulak boti tusi, nda jolo dibornohi tano i jala dipagabe,
asa martumburi, jala dilehon boni tu halak panabur dohot roti tu halak na
manganhon. 55:11 Ingkon songon i do hatangki na ruar sian pamanganku: Ndang
mulak boti tu ahu, ingkon bahenonna do lomo ni rohangku, jala manjadi tu na
hutongos.
Isara i na mapultak dolok Sinabung, gabe
mara, hasusaan na masa di penduduk na dihumaliangna, alai gabe mambahen
kesuburan ni tano do i soggot, jala tarpasupasu ma angka partani di luat i muse
marlompit ganda. Dibalik ni sude masalah sai dipatongon Debata do angka
pasupasuNa. Taparateatehon ma parngoluon ni Ap.Paulus, na margoar si Saulus do
najolo siboto surat angka na malo sian halak Jahudi, na mangalelei halak na
porsea siihuthon Kristus. Alai ditangkup Kristus do ibana jala paubahon rohana
nang haporseaonna gabe siihuthon Kristus na pasarhon barita na uli tu angka
luat.
d.
Ndang
mulak boti Hata ni Debata. Nang pe dibagasan halak Kristen sai adong dope na
holsoan manjaha Hata ni Debata, ndang ringkot mambege jamita, ro tu parmingguon
alai ndang dirohana na marminggu i. Holan mamereng jolma, ise na ro, ise na
marhobas, ise na marjamita, ndang na laho mangadop nang mamereng Debata mata
haporseaonna. Bibel di jabu pe sai bagak dope idaon songon na baru tinuhor sian
na parjolo, ima ala so hea dijama, so hea dijaha, ndang di haringkothon na
manangihon hata ni Debata. Alai ndang mulak boti Hata ni Debata, asa na
mapahorhon do Hata ni Debata tubagasan ngolunta. Heber 4:12 Ai na marngolu do
hata ni Debata jala marpangkorhon, jala tumajom sian nasa podang siduababa,
jala torus do disirang hosa dohot tondi, ringring dohot utohutokna, laos
diuhumi do na sinangkap dohot na piningkir ni roha.
d.Sai marpanghorhon tu
na uli jala na denggan do Hata ni Debata, sai marhasil jala marparbue do Hata
ni Debata. 2 Timotius 3:16 Ai nasa Surat i, sinihathon ni Debata do; jala hasea
mamodai, maminsang, pauliulihon, manogunogu di bagasan hatigoran, 3:17 asa
rimpas halak ni Debata, hobas tu nasa ulaon na denggan.Lapatanna ia hata ni
Debata sai manghorhon parbue na jala gunana di hita na manangihon dohot na
manjanghon HataNa i. Sai marpanghorhon tu na uli jala na denggan dibagasan
ngolunta Hata ni Debata na tatangihon i, ndang mulak boti HataNa i.
e.
Tuhan
Jesus do hagogok ni Hata i. Jala Ibana do Hata i, Naung ro do Ibana tu
tongatonganta. Tajanghon ma Tuhan Jesus Kristus i gabe Sipalua hita. Tapeopma
HataNa i, gabe tano na napu ma rohanta na sai olo pahusorhusorhon HataNa i gabe
sinjatanta mandopang musunta ima sibolis i. Hata Na i Gabe panondang di
mandalani ariari ni ngolunta di portibi on na gok haholomon. (Psl.119:105).
Tapukpuhi, tatambortamboti Hatana i asa ndang marisuang i saluhtna, jala
manghorhon parbue parulaonta na tama di adopan ni Debata nang hajolmaon. Hita do
surat ni Kristus na jinaha torop jolma nang portibi on. Tapatuduhon ma parange
nang pangalaho na sepadan dohot Hata ni Debata. Amen.
