TARPASUPASU DO ANGKA NA MARHAPOSAN TU DEBATA
Diberkatilah Orang Yang Mengandalkan
Tuhan
Ev.Jeremia 17: 5-10 Ep.Mateus 4: 23 – 25
I.
Patujolo
Namangula do si
Jeremia di Bangso Jehuda (Israel Selatan) dibereng ibana sandiri do angka na
masa ngolu haporseaon ni bangso i jala parualon nasida siganup ari naung mandao
sian dalan ni Debata. Disuriranghon do halelengse ni bangso i siala dosa
nasida. Gomos do dihaposi si Jeremia Debata na inghon mandabuhon uhuman tu
bangso Jehuda asa gabe masa harugian bolon di bangso i, na nidokna marmula sian
bangso Asyur dohot babel. Nang pe naung dipasahat si Jeremia panurirangon tu
bangso i asa maruba hape distundali nasida
do Debata jala sai marhaposan tu bangso na gogo uju i ima bangso Misir asa
malua nasida sian panoroan bangso na asing. Sai marhaposan do bangso i tu jolma
asa sian Debata.
II.
Hatorangan
1.
Marjea
ma baoa na marhaposan tu jolma (ay.5): Mansai koras do oraora on tu bangso i.
Angka na marhaposan tu jolma hona bura ni Debata. Aha do lapatanna na
mangasahon jolma ? dung tajaha singkop ayat 5 i, tangkas ma astuanna na mandok
halak na mangasahon jolma molo sai holan mangasahon pikiranna sandiri laho
mambuat haputusan, nang angka dalan nang tujuan ni parngoluon. Lapatanna na
mangasahon jolma ima na pasurut rohana sian Debata. Nasida ma na nidokna na
mangasahon jolma. Hata bura di hata Heber di dok אָרַר (aw-rar') yang berarti kutuk, dijijikkan atau
dijauhi oleh Allah. Nunga boi tabayanghon boha ma roha ni Debata na mamereng
halak na sai mangasahon jolma, magigi ma Debata marnida hita. Na mandao sian
Debata do na mangashon jolma, gabe dapotan bura manang kutuk ma ibana disi.
2.
Panghorhon
na mangasahon jolma (ay.6). Parbue ni na mangasahon jolma ima na marje ngoluna
songon halak parbahudung, maringan di tano bangkalbangkal di halongonan, di
tano na ansim na so ni hundulan ni halak; hidup sengsara ma goarna. Ima na
patuduhon hidup dalam kesengsaraan dan kehancuran.
3. Alai martua ma baoa na marhaposan tu Jahowa
(ay.7). Andul marasing do keadaan nasida na dibura Debata, dibagasan ayat on
dipasahat Jeremia do keadaan na maralo di ayat dijolona. Angka nasida na
mangasahon Debata sai dipasupasu do. Aha do lapatanna na mangasahon Debata ?
ima angka halak na sai marsigantung tu Debata jala sai manghirim tu Ibana. Tung
aha pe na sinangkapan ni roha asa Tuhanta i na dipatujolohon.
Parhataan : dipasupasu
sian hata heber בָּרַךְ (barak)-diberkati, marsinggang
diadopan ni Debata manang jonokhon Debata asa margogo. Parhataan on sarupa
pamanghena tu pandohan: “Dungi dipasupasu Debatama si Abraham” na marlapatan
parsaoran na rosu dohot Debata asa digoari ma ibana aleale ni Debata. Hala na
mangasahon Debata sai dipasupasu do. Lapatanna dipajonok Debata jala maraleale
dohot halak na dipasupasu.
4. Laba ni angka na mangasahon Debata (ay.8);
Molo nunga dipasupasu Debata halak na pajonokhon dirina tu Debata, digombarhon
do di ayat on songon: tu hau na sinuan di topi ni batang aek, jala manjarar
uratna di lambung batang aek, jala ndang mabiar ibana molo ro hamohopon, jala
tongtong rata bulungna, jala ndang holsoan ibana di taon haraharon, jala ndang
mansohot marparbue. Lapatanna ndang marhahurangan angka na jonok dohot Debata,
sai taruli pasupasu do nasida. Mansai andul marasing dohot halak na so
mangasahon Debata, manang halak na so jonok dohot Debata, halak na binuraan ni
Debata ima na sai mangasahon dirina sandiri; gok hasusaan, hamaolon, jala
madabu tu gambo lisop ni dosa.
5. Rohanta i do
pamusatan (ayat 9): Bibelta i mandok ia rohanta i do pamusatan: Poda 4:23 Sian
saluhut sijagaon i, gumodang ma jaga roham, ai sian i do ruar angka mual
hangoluan. Lapatanna, roha na boi berengon songon pangisi saluhut angka
pikiran, panghilalaan, giot ni roha, sangkapsangkap. Sian turpuk dipaboa do ia
Debata do na mandodo roha ni jolma. Sian ayat on ro do si Jeremia naeng
paingothon bangso Jahudi dosa nasida naung marroha batu manghorhon angka
bencana nang angka hasusaan nang mara, adong ma tolu dosa nasida Ayat 1-4):
naparjolo, roha nasida na gabe pamusatan di nasida tung so adong do alus ni
roha nang haporseaon nasida tu Hata ni Debata. Napaduahon, Sai dipangasahon do
jolma asa sian Debata (ay.5-8). Napatoluhon, naung sega do parrohaon ni bangso
i jala godang naung mangulahon korupsi, tung so boi do ubaon i muse (ay.9-13).
Roha nasida sai holan tu na mangulahon dosa do. Ala ni i ndang boi disalahon
Debata na parohon mara nang hasusaan di tonga ni bangso i, di naung sega
hajolmaonna, parange, nang parsaoranna dohot dongan jolma nang haporseaonna pe
naung sega. Tung so manolsoli roha do nasida asa manopoti dosana tu Debata,
alai sabalikna direhei nasida do si Jeremia nang Hata ni Debata nabinaritahonnna
i. Pangalaho i patuduhon tung soada be biar ni rohanasida tu panguhumanni
Debata, baliksa laho mangalo Hata ni Debata do hape diula. Roha naung jogal,
gabe songon batu, na masa situasi nang pangalaho sisongon i di jaman nuaeng on.
6. Debata sidodo roha
ni jolma (ay.10). Saluhut nasa na dibagasan rohanta i, ingkon di dodo jala
diuji jala adong be do balos ni. Jala diboto Debata do na dibagasan rohanta i.
Sude angka sangkap, angka sangkap na denggan manang na roa, boi do i gabe tarida songon pandohan manang sikapta. Ido
umbahen asa manat hita mandok hatanta, asa unang gabe partuktuhan, asa unang
gabe sihataan, gabe mamboan mara, manang hasesega. Poda 4:23 Sian
saluhut sijagaon i, gumodang ma jaga roham, ai sian i do ruar angka mual
hangoluan.
Lapatanna asa serius do hita manjaga simangkudapta on, asa unang mandok hata na
so penting, na so marguna.Asal ni dok
hata hape nunga mambahen hansit roha ni halak. Godang na marsogo ni roha
gabe alo nang gabe musu muse. Ala ni i rohanta i ma jumolo tapuba marhite huaso
ni Tondi Parbadia na mangajari hita asa marroha, marbisuk asa tau hita mambahen
lomo ni roha ni Debata marhite na malo mambahen lomo ni roha ni dongan asa
marhasonangan, marlas ni roha mambege hatanta nang pangalahonta. Ima
peribadahanta, ima pelayananta tu Tuhan marhite na manghorhon ulaon na uli na
denggan tu saluhut halak.
III.
Sipahusorhusoron
1.
Diajari
Debata do hita asa unang mangasahon jolma. Boasa ? Siala na parjolo, jolma i
boi do mambahen kecewa hita, ndang singkop las ni rohanta jala ndang boi
singkop las ni roha dompak jolma. Ai terbatas do kemampuan ni manisia, boido
lupa dinaung dijanjihon, gabe sogo ma rohanta na maniop janjina i. Jala boi do
hita sandiri na lupa, ala silap manang angka kesibukan ulaon gabe lupa hita tu
janjinta tu dongan. Napaduahon; ala terbatas do gogonta nang kemampuanta,
sangkapta naeng patulushon janjinta tu dongan alai ala ni keadaan gabe so
mungkin be pinatupa. Isarana ala ni bencana alam ala ni kecelakaan, musibah,
parsahiton, alani covid 19 on dohot na asing songon udan na so hasaongan ma
istilahna.
2.
Ala
ni i molo nunga tangkas taboto na so boi jolma i mamboan las ni roha alai
kekecewaan do ala keterbatasanna, boasa sai adong dope sian hita na sai
mangasahon jolma ndada mangasahon Debata? Holan Debata do sipangasahononta
siala: sai dipasaut Tuhan i do bagabagaNa. Napaduahon; Ala Ibana do Debata na
songkal, na marhuaso. Tung soada do na boi mambatasi huasoNa laho mangurupi
hita. Sai maol ni maolna jala saborat ni borat ni permasalahanta, di diape
manang boha pe i, holan Debata do na sanggup jala na mampu mangantusi hita.
3.
Ndada
holan na mangasahon Ibana Debata sipatujolohononta alai sai pasupasuonNa do
hita. Suksuk do pasupasuNa tu angka na manghaposi Debata, pasupasu ndada holan
arta manang materi alai dohot do disi angka si las ni roha, dame na sumurung,
hadumaon, pangaramotion uju na maol dalan sidalananta jala adong solusi dilehon
Debata asa malua hita sian angka hamaolonta. Tarpasupasu do jolma na marhaposan
tu Debata. Marhite AnakNa Jesus Kristus dapot hita do hatuaonta marhite
hasesaan ni dosa, haluaon, nang hangoluan na saleleng ni lelengna. Amen.
