Diboto Debata Do Na Diroham
Tuhan Mengetahui Isi Hatimu
& Ev: Markus 7 : 17 - 23 & Ep: Kidung Agung 2 : 8 - 13
Huria na
hinaholongan dibagasan Jesus Kristus
Molo tajaha
bibelta i na mandok sian hajormaonna jotjot do mangkuling do roha ni jolma i
dipemahaman na so denggan. Ndang diantusi jolma i taringot tu dirina ala ni
naung madabu tu bagasan dosa, jadi ndang adong na sintong jolma i songon na
tarsurat di Rom.3: 10 Hombar tu na tarsurat i: "Ndang adong na tigor
nanggo sada!". Ise ma naumboto roha ni jolma i ? Sian Bibel i mandok,
ia holan Tuhanta i do na umboto roha ni jolma i. Jeremia 17:10 Ahu Jahowa do * Sidodo roha, siuji piapia jala * mangalehon tu
ganup jolma hombar tu dalanna, hombar tu parbue ni pambahenanna. Jala par Psalmen
pe mandok : “Tung so sisiran ni Debata i? Ai Ibana do tumanda angka sibunian ni
roha.” (Pslm.44:22) jala ditanda dohot diantusi Debata do angka na naeng
ulahononta manang sintasinta ni rohanta (jaha 1 Kronika 28: 9)
Molo naung taboto
do hasintonganna ia roha ni jolma i sai jotjot do tu na jat asa ndang be
manghohom boti, alai sai diusahahon do boha do paubahon roha gabe halomoan ni
roha ni Debata. Laos ima na niigil ni turpuk on tu hita ganup marsadasada. Asa tapaihuthihut
ma na ni dok ni turpuk on tu hita:
a. Sian ayat 17 – 23 ima
turpuk na mangihut sian jolo ni ayat on (1 – 16). Ima na paboahon taringot tu
halak parise dohot angka siboto surat na paingothon angka sisean ni Jesus naung
marsala mangulahon hasomalan nang ruhutruhut ni Hajahudion ni ompunasida
marhite na mangan dohot tangan na ramun ala ndang di paias nasida tanganna
andorang so mangan nasida. Alai didok Jesus do tu nasida angka halak Parise
dohot siboto surat i ima angka halak na munafik, marhite na paingothon hata na
tarsurat di Jesaya 29: 13 Jadi didok Tuhan i ma:” Ala na jumonok bangso on
tu ahu marhitehite pamanganna dohot marhitehite bibirna pasangap ahu, hape
anggo rohana holang do sian ahu, jala hadaulatonnasida maradophon ahu
patikpatik ni jolma na ginuruhon sambing do i.”
a.Dungi dipatorang
Jesus do muse tunasida na mandok: Mark.7:15 Nda tung gabe ramun jolma
binahen ni na ro sian ruar tu bagasan ibana; alai na ruar sian jolma i, i do
mangaramuni ibana. Dung songon i gabe pasiding diri ma Jesus dohot angka
sisean i sian hariburon i, alai sai sungkunsungkun do pe roha ni angka sisean i
taringot na ni dok ni Jesus ima aha naung masuk dohot naung haruar sian
sasahalak jolma. Asa dialusi Jesus ma di ay.18 Gabe didok ma tu nasida: Asa
dohot do hamu hape so mangarti! Ndang dapot rohamu, na so tarbahen ramun jolma
bahenon ni nasa na ro sian ruar tubagasan ibana.
a.Dison ma
dipatorang Tuhanta Jesus tu angka siseanna i asa unang mangalapati i songon
halak Parise dohot siboto surat naung sala mambahen haramunon ni sasahalak, ia
na mambahen ramun sasahalak ndada sian sipanganon manang siinumon na masuk tu
pamangan nang pamatang ni jolma. Ala so na masuk tu roha i alai tu si ubeon do
dung i bolong do i di inganan na soding. I do umbahen sude do sipanganon i
ndang adong na subang (ay.19) Jala dipagomos ma muse pandohan i, ia sipanganon
nang siinumon i na masuk do i tu siubeon nang pamatangta asa boong do muse i di
ingananna na soding ndada tu roha.
Dilapati do roha i di hata Gorik dohot “Jantung”,
ia roha ni jolma i ima pusok ni hangoluan ni jolma. Sian roha do bungkas
panghilalaan nang pambahenan. Dibagasan roha i do inganan na masirapusan angka
na jat dohot angka na denggan. Sian rohana i do jolma mamuji dohot pasangaphon
alai laos sian i do boi haruar roha na mangalo Debata. Boi ma dohonon ia
sipanganon nang siinumon i holan parsualon siubeon do i ima tu pamatang jala
ndada adong hubunganna na mambahen jolma i gabe ramun di partondion tu adopan
ni Debata.
b. Dung i sian
pandohan ni Tuhan Jesus i adong ma dibahen hatorangan sian panurat ni Buku
Markus, ia na ni dok ni Jesus boi ma dohonon ndang adong sipanganon na ramun,
alai saluhut na do niiasan ni Debata. Asa didok ma muse, na haruar sian
sasahalak i do na mambahen asa ramun (ay.20-23). Jadi na mambahen ramun halak
nadada sian sipanganon manang siinumon na masuk tu pamatang alai angka na
haruar do sian roha nang pingkiranta. Boi ma dohonon na mambahen sasahalak i
gabe ramun ndada sian sipanganon na dipangan masuk tu siubeonna, alai angka na
ruar sian rohana, ima angka na jat na marharoroan sian rohana, songon roha na
jat, pangalangkupon, manangko, mamunu, halumlamon, hamongkuson, hajahaton,
ginjang ni roha, sijogal baut,roharoha, ondamondam dohot lan na asing (
ay.21-22).
c.
Sipahusorhusoronta:
1. Haporsaon ni hita
halak Kristen nadada haporseaon na muramura etongon, na mambahen sipanganon
manang siinumon gabe ukuran manang patokan ni hatigoranta di adopan ni Debata.
Sian turpuk on mansai tangkas dialo Jesus do angka jolma na mamangke sipanganon
gabe ukuran ni sasahalak gabe ramun manang daong.
2. Na mambahen hita
gabe ramun ndada namasuk alai na haruar i do. Ido umbahen unang ma talului
hasalaan ni angka dosanta nang hajahaton na taula. Laos boha pe angka hamaolon
nang utiutian ni sibolis na masuk tu dirinta, alai molo sai tongtong do hita
sinondangan ni Hata ni Debata, sai maralo do i tu bagasan rohanta jala tung boi
do hitamandopang i saluhutna. Ala saluhut tantangan i boi do tapahusorhusor di
roha nang pingliranta asa ndada muramura be hita dibagsan halangguson ni roha mambahen
dosa. Naung bagas do tapingkiri manang taparrohahon aha do konsekuensi ni na
taulahon asa unang manghorhon dosa. Songon naung niajarhon ni Tuhanta Jesus di
Matius 5: 39-41 “Alai Ahu mandok tu hamu: Unang alo hamu na jahat! Molo adong
na mamastap hurum siamunmi, tarehon ma nang hurummu sihambirang! Molo adong na
naeng mambahen sindir tu ho, laho mambuat ulosmu, atena ma dohot bajubajum di
ibana! Molo adong manang ise na manggogoi ho mandongani ibana sapaal, oloi ma
ibana dua!”
3. Tasulingkiti ma
rohanta. Ia rohanta i ima inganan na bagas di hita jolma. Ala ni bagasa na pola
do di dok rohanta ndang apala adong be jolma na umbotosa asa gabe taulahon na
nilomo ni rohanta sambing. Alai tung malo pe hita manimpan denggan ala bagas ni
rohanta i sandiri do i, alai Tuhan Debata do na umboto saluhut rohanta. Ala ni
denggan ma tasulingkiti rohanta ganup, aha do na dibagasan roham, aha do na
sininta ni roham, aha do sangkap ni roham, ala dia ma na jat siulahonota sian
sangkap ni rohanta ima na mambahen ramun hita. Psalm.139:23 Sulingkit ma ahu, ale Debata, jala
tanda rohangki, uji ma ahu jala tanda angka pingkiranki.
3.
4. Ap.Paulus mandok
di Galatia 5: 16 Alai on do hudok:
Marguru tu Tondi i ma hamu marparange; unang pasaut hamu hisaphisap ni daging.
Unduk ma hita di na niuluhon ni Tondi Parbadia, ido sintongna. Ala
holan marhite Tondi Parbadia i do na mamoda i na mangajari na paingothon hita.
Joh.14:26 Alai
anggo Pangondian i, i ma Tondi Parbadia, sisuruon ni Ama i marhitehite Goarhu,
ajarhonon jala paingothonon ni I do tu hamu nasa na huhatahon i tu hamu!
Di na unduk hita tu Tondi Parbadia, toguonna do hita tu parsaoran na uli jalana
rosu dohot Tuhanta Jesus jala patupa Hata ni Debata songon sipanganon
partondion siganup ari, asa saluhut na taulahon dohot na tapaboahon hombar tu
Hata ni Debata. Songon Jesus Kristus na mangulahon ulaonna hombar tu lomo ni
roha ni Debata Ama i. Amen.
BE 267 : 1
O TUHAN SULINGKIT BL. 100
v Tuhan sulingkit ma au, sondangi rohangku
tangkas. Gogongku soada di au Tu Ho au paringgas, tu Ho au padonok, di Ho nama
au Tu Ho au paringgas, tu Ho au padonok, di Ho nama au.
