“ALLAH
YANG MEMERDEKAKAN”
(DEBATA NAPALUAHON)
EV. Yohanes 8 : 30 – 36 EP.
Keluaran 4: 18 – 23
Huria ni Tuhanta
nahinaholongan dibagasan Jesus Kristus.
Ngolu na dibagasan
haluaon manghorhon las ni roha. Tung so adong do las ni roha dibagasan ngolu na
di parhatoban, ndang merdeka. Las do rohanta di taon on dua ari nai ma tgl 17
Agustus, di ari Selasa topet ma di 76 taon Dirgahayu Republik Indonesia. Naung
merdeka do bangsonta Indonesia sian penjajah, sihamauliateon do i tu Tuhan
Debata parasi roha i. Alai boi do gabe ro sungkun sungkun hinorhon na masa di
negeranta on; toho do naung merdeka bangsonta ? Boasa gabe tubu sungkunsungkun
i ? ima siala sai torop dope angka na pogos, na so mardihadiha, na papeol uhum
di negaranta on, godang masa praktek korupsi, penindasan dohot angka
harorangon, hajahaton na asing. Maol dope na mangalului karejo, mansai arga
angka situhoron.
Alai sasintongna ingkon marsihohot do hita
mandok naung malua hita, manang naung Merdeka do hita; “Merdeka”. Ndang
tarambatan angka na masa hamaolon di negaranta nang angka tantangan
dipardalanan ni pemerintahanta. Holan tu hita sandiri ma na ingkon tubu di roha
na masigorgor mangeahi haluaon di negaranta on. Molo adong pe angka na mambahen
hajahaton nang harorangon, siala sai adong dope jolma na so mangargahon haluaon
i, na so martanggung jawab, sai adong dope na girgir rohana manjajah donganna
jolma ditongatonga ni negaranta.
Songon angka halak
na porsea hita naung malua hita dibagsan Jesus Kristus i, naung dipalua sian
gomgoman ni dosa dohot sibolis i, alai ditonga ni portibi on dope hita, godang
angka pangalaho dosa, sai masirapusan dope rohanta mangadopi i. Hape tardok do
hita naung pinalua niKristus Jesus i, sai tongtong ma mangolu dibagasan
haluaon, somngon dekke di laut i, na mangolu do angka dengke di laut na ansim i
alai molo sibukna i i ndada gabe dohot ansim. Sai songon i ma nian na masa di
parngoluon ni halak na porsea. Halak na porsea na mangolu di tonga ni portibi
on na gok dosa dohot pangalaosion, sai unang ma pangalaho nang huaso haholomon
i maangago angka na porsea i. Ndada lingkungan na manontuhon haluaon manang
kemerdekaan di nalak na porsea alai halak na porsea i naeng ma manggohi haluaon
ni negaranta i marhite angka kreasi nang prestasi, sumbangsi, pambahenan na
manghorhon pasupasu, las ni roha di tongatongan ni negaranta. Tahilalahon ma na
mangolu dibagasan haluaon, songon tanggung jawab pribadi ni halak na porsea
laos songon i ma tanggungjawab tu negaranta, gabe sipangoloi di Hata ni Debata
nang di UUD negaranta. Na unduk tu Hata ni Debata nang tu pamarenta.
Molo masuk hita tu
bagasan turpuk di minggunta on ima taringot na binahen ni Jesus laho
patoranghon dohot paposhon roha ni halak Jahudi ia haluaon ni halak na porsea i
dipapatar dibagasan Jesus Kristus. Panangkasion i marbonsir sian na masa angka
halak Parise na mamboan sahalak parompuan na tarjorat ala mangalangkup tu
adopan ni Jesus. Naeng do sangkap nasida laho mangunjuni Jesus di danamasa i,
mangalului hasalaan ni Jesus, unduk do Jesus manang ndang di pangajaran ni
Patik ni pinsahat ni si Musa, na mangajari asa mandangur angka parompuan na
tardapot mangalangkup. Disituasi i didok Tuhan Jesus do (8: 7, 9) = “.....Alai
dung sai didatdati nasida manungkun, dipadirgak ma Ibana huhut ma didok tu
nasida: Manang ise sian hamu na so mardosa, i ma jumolo maninggangkon batu tu
ibana” Alai
umbege i, laho be ma nasida sadasada, pininsang ni panggora ni rohana be,
jumolo ma angka sintua i, gabe tinggal ma holan Jesus angkup ni boruboru i, na
jongjong disi.
Sai di dok roha ni
halak Parise do na sintong nasida, alai diajari Jesus do taringot hasintongan
na imbaru, ndang boi nasida mangalausi ala jolma pardosa do angka halak Parise
i, na sai pabongakkon angka hasintongan na marpangalensem, mangolu dibagsan
kemunafikan, godang gabus jala martahi laho mamunu Jesus. DI ayat 44 mansai
koras do didok Jesus tu halak Jahudi (8:44) “Na marama tu sibolis do hamu, jala
sinangkap ni roha ni amamuna do naeng patupaonmuna. Sibunu jolma do ibana sian
mulana i, ndang tindang ibana di hasintongan, ai ndang adong hasintongan di
bagasan rohana. Jumpa dihatahon gabus, na di dirina hian ma dihatahon disi, ai
pargapgap do ibana jala ama ni gapgap.” Ia sibolis ima ama ni saluhut pargabus,
somngon na masa tu si Hawa di porlak Eden ( 1 Musa 2: 1 – 6), jala mamunu,
songon namasa tu si Kain na mamunu anggina si Habel (1 Joh.3: 12).
Marhite
pangajarion ni Jesus manghorhon sikap ni halak Parise na mangkilala hasalaanna,
alai ndada na gabe patubu rohanasida laho manjanghon Jesus. Lam jebu do di
situasi dohot kondisi, na ro Jesus paingothon nasida, ia haluaon na didokna
nadada songon na di haporseai nasida na mandok holan nasida ma bangso na
pinillit ni Debata na bongot tu Harajaon ni Debata, ala nasida do na marsunat
songon angka pinompar ni si Abraham na hea gabe hatoban ni manang isepe. Naung
malua do didok roha nasida saluhutna jala ndang ringkot nasida di haroro ni
Jesus. Ido sialana di paingot Jesus pangantusion ni halak Jahudi i, ia haluaon
nadada marhite holan tanda parsunaton (tradisi), ndada margogo parsunaton i
laho parohon haluaon suang songon i nang hajongjongan nasida ndada ala ni
pinompar ni si Abraham.
Taringot tu
pemahaman nasida halak Jahudi pinompar nisi Abraham, didok Jesus do di 8:
39b-41a = “Anggo angka anak ni si Abraham do hamu, ulaonmuna ma angka
pambahenan ni si Abraham. Alai dilului hamu do dalan mambunu Ahu on, na
paboahon tu hamu hasintongan na hubege sian Debata. Ndang songon i pambahen ni
si Abraham. Diula hamu do angka na niula ni amamuna.” Diorai Jesus do nasida na
mangajari laho manulak Hata ni Debata na dipasahat Jesus iama na manulak
hasintongan ni Debata, jala manulak haluaon i. Ia Debata do Hata i (Joh.1:1),
na gabe daging do Hata i dibagasan Jesus jala Ibana do na paluahon. Ala ni i halak
na manulak Hata ni Debata dos do i tu
halak na manulak Debata, manulak Jesus, manulak haluaon.
Hamuna ruas ni
huria na hinaholongan dibagasan Jesus Kristus, Jotjot do hita umbege manang hea
mandok; marhite pandidion i manang marguru malua naung dipalua Jesus do hita.
Toho do hita naung malua ? Molo sai olo dope hita mamaeop hansit ni roha, nang
sogo ni roha, nasida do na ginomgoman ni jut rohana, diparhatoban muruk ni
rohana.
Halak na mamompom
hansit ni roha, nasida ma halak na diparhatoban ni dosa. Molo sai adong dope
halak na mangulahon dosa na ginomgoman ni dosa dope nasida. Molo sai adong dope
jolma na sai holongan ni hepeng sai na tarihot dope rohana tu hagiot ni daging
sai pagukguk marlobilobi tu dirina sandiri. Molo adong dope halak na manalahon
pangalaho sala na niulana najolo, goaron do nasida na dipatunduk roha na so olo
muba manjalo naung masa i di dirina.
Marhite turpuk on
manjou hita asa unang doshon songon halak Jahudi i laho mangadopi Jesus, mandok
dirina na sintong gabe manghuphupi dirina sian hasintongan na sasintongna.
Mangokui hasintongan ni pangajarion ni Jesus dohot bisuk ni Debata alai manulak
Jesus manghorhon ndang adong hamubaon ni roha nasida.
Rade do haluaon i
molo sai olo jolma i manjanghon Jesus ima Hata ni Debata, mangjanghon ngolu ni
Jesus jala mangolu dibagasan Jesus marhite parange nang pambahenanna. Saluhut
naung dipasahat nang niajarhon Jesus jala diulahon Jesus ima asa masihaholongan
jala patupa hadameon laho manghobasi angka jolma marhite haholongan i.
Naeng ma tarida
hapapatar ni Harajaon ni Debata di tonga ni halak na porsea na merdeka laho
mangulahon lomo ni roha ni Debata, ndada holan na unduk tu hasomalan manang
tradisi nasida. Isarana songon na niajarhon Ap.Paulus, n ringkot dibagasan
haluaon ndada marhite tanda parsunaton alai parsunaton ni roha, jala panangihonon
(ptds.Ul.Ap.7:51). Manjanghon haluaon dibagasan Jesus Kristus ima na olo
dipauba, ndang marjogal ni roha. Na olo manjaga hagiot ni roha nang pingkiranna
asa polin jala sintong. Na olo manjaga sipareonna laho manangihon jala
manjanghon hasintongan na sian Hata ni Debata.
Tapadao ma sikap
nang pangalaho ni halak Jahudi nang halak parise i, na marjogal ni roha, na so
mangantusi taringot haluaon i.
Di hita saluhutna
na hinaholongan dibagasan Jesus Kristus; haluaon ni halak Kristen ndada haluaon
na marlomo lomo ni roha so ada batas. Ia haluaon i songon dalan ni rel kareta
api na mardalan di relna i molo nunga galak masinna i mardalan ma ibana lambas.
Manang songon dengke na masihohot di bagasan aek i, molo haruar ibana sian aek
i gabe moru ma oksigenna, mahiangma, gabe gale jala mate. Haluaon ni halak
Krsten ima na mansai ringgas patupahon
angka ulaon na manghorhon holong na didasori haholongon ni Kristus. Angka na
porsea naeng ma sai marningot dohot mangargai proklamasi kemerdekaan ni Jesus
Kristus marhite hamamateNa di hau pinarsilang i dohot marhite haheheonNa. Ala
ni i marsihohot ma jongjong songon halak siparmonang jala manulak sude angka
pangalaho parhatobanon. Haluaon dibagasan Jesus Kristus naung manuhuk saluhut
na porsea gabe ianakhon ni Tuhan na gabe
panean di bagas ni Debata di Harajaonna i. MERDEKA!!!. Amen.
