HALAK
PARTIGOR DIADOPAN NI DEBATA
Ev.Psalm 34: 12 - 18
Ep.Rom 12: 17 – 21
a. Ia Buku Psalmen on ima na
marisihon angka ende, ima angka ende ni haporseaon sian parpsalmen taringot tu
angka pardalanan ni haluaon dohot pangaramotion ni Debata dibagasan ngolu
nasida. Tarlumobi dibagasan turpuk on napaboahon pardalanan ni haluaon i sahat
tu tongatonga ni bangso ni Debata margite napinaandar ni si Daud na
manghilalahon pambahenan ni Debata, tarlumobi di na manaon hasusaan ibana,
ndada hea ibana manundali dohot manadinghon Debata jala mamurai Debata. Ia na
dipaandar dibagasan turpuk on sian ayat parjolo bindu 34 taringot tu haporseaon
ni si Daud songon sahalak raja na dipangungsian sian pangaleleion ni si Saul
jala disarihon dohot ditogutogu Ahimelek dohot raja na sian Kota Gat, ala
songon halak na rintik do ibana. Gombaran ni harintikonna i patuduhon na
marbisuk di situasi na maol, disi marhaporseaon tu Debata dipardalanan ni
ngoluna, ndada sian dirina sandiri i.
b. Biar mida Jahowa gabe halomoon
ni roha ( 12 – 13)
Sian turpuk on patuduhon
parsitutuon ni haporseaon asa biar mida Jahowa gabe halomoan ni roha. Biar mida
Jahowa ndada songon pangalaho na mabiar hatahuton
songon na so mananda Debata Jahowa. Alai
na nidokna biar mida Jahowa marhite na mangantusi jala manjanghon huhut
mangulahon na nihalomohon ni roha ni Debata dibagasan ngolu ni jolma. Memang
sipata dipardalan ni ngolunta sai masirapusan do na mambahen dokdok rohanta
manang tarontokhan hita marnida na masa sinuaeng on sian hamaolon na masa di
pandemi covid-19 on dohot biar mida Jahowa. Biar rohanta mamereng angaka na
masa di humaliangta boi do gabe patbu sungkunsungkun ni roha, boha do hita boi
mamolus on saluhutna, mansai borat nihilala roha. Dijou do hita sian na mamuhai
roha na biar mida Jahowa dipatuduhon marhite na mangulahhon angka uhum nang
patikNa asa margogo hita mamolus angka hamaolon tarlumobi na masa pandemik
covid-19 on. Dibagasan ayat on dapot hita do pandohan halomoon ni roha, boi doi
marlapatan angka panggulmiton ni ngolu jala naung tadalani somal siganup ari
asa disi ma tahasomalhon mangolu dibagasan biar mida Jahowa. Biar mida Jahowa
ima parmulaan parbinotoan; Poda 1: 7 Biar mida Jahowa do parmulaan ni
parbinotoan, alai anggo halak na oto manoisi hapistaran dohot pangajaran.(1
Korint 1 : 18 -22). Biar mida Jahowa mambahen hita gabe marbisuk jala
marparbinotoan asa manghorhon bagas ni haporseaon di angka jolma na
manghalomohon laho mangulahon Hata ni Debata.
c. manjaga dila dohot na
mangalului hadameon (14-15).
Sian ayat on dipatuduhon do
pangajarion na pinasahat ni Debata di angka ende ni si Daud taringot na mangolu
dibagasan hatigoran diadopan ni Debata marhite na manjaga dila jala mangalului
hadameon. Umpasa ni halak Batak mandok : “jolo ni dilat bibir asa ni dok hata” (Makna:
pikir dahulu baik-baik sebelum berbicara), manang : “{Ingkon songon poting, lam
marisi lam so marsoara”(Makna: Semakin tinggi ilmu pengetahuan seseorang, harus
semakin hati-hati berbicara). Naung dipamanat do sian najolo pamaheon ni dila.
Ala sian dila on on haruar hata pamujion nang
hata na uli na denggan, laos sian dila on do haruar hata ondamondam,
mangarehei, insakinsak, nang hata na so hasea. Sian pangajarion ni haporseaon
taringot tu dila on asa boi manghatai dohot denggan jala toman, porman asa gabe
hinsu ni halak na tigor roha. Molo tapamanat di na masa di hasiangan on, mansai
torop do jolma sai muramura mandok hatana, di angka media sosial sinuaeng on
boi do dipanghe mangahati laho manurat na nidok rohana. Adong do sibahen
lomolomona manghatai, manguhumi, mandikte, manang mandok angka barita na so
tingkos (hoax). Adong na manotophon
hasintonganna di pangajarion na jinalona di perkembangan sinuaeng on, marhite
angka pengaruh sipaotooto na paliluhon godang jolma laho mempengaruhi torop
jolma di hasiangan on. Mansai ringkot do hasintongan nang hatigoran ni di
partingkian sinuaeng on, ai nungamansai torop jolma marasing hatigoran dohot
hasintongan nabinotona nang na hinaporseaonna. Ido umbahen mansai ringkot
manuarahom hasintongan i marhite dila na sintong, songon sahalak na porsea
naung tajalo do hasintongan i dibagasan Jesus Kristus. Sian pangajarion ni
Jesus tu hita asa mangolu dibagasan hasintongan, manjanghon hasintongan i
dibagasan haholongan, manjanghon hasintongan ni ngolu i na marimpola angka poda
manang sipaingot jala manghorhon hadameon ndada hagaoron. Sian dila on do na
gabe dasorta laho paboahon hadameon nang hasintongan i. Unang ma molo didok
bebas berpendapat gabe lomolomona mandok hataNa alai paboahon na sintong i ma
hombar tu lomo ni roha ni Debata.
d. Joujou tu Debata mangido
parlinggoman ( 16 – 18)
Na parpudi idaonta na gabe tanda ni halakna tigor roha di adopan
ni Debata ima na sai joujou tu adopan ni Debata siala ni angka hamaolon na
niadopanna. Tung na so boi do pangasahononta hadirionta songon jolma na tinompa
ni Debata hita. Siala hajolmaonta i na marbatas do kemampuan hagogoon,
pingkiranna, mansai godang do hagaleon nang hahuranganta. Jala songon halak na
porsea hita, ndang marsigantung tu angka huaso na di portibi on hita, manang
huaso na niduru ni Debata, holan unduk tu huaso ni Debata sambing do hita.
Joujou tu Debata ima sada gombaran na pasahathon diri tu adopan ni Debata
marhite habisuhon parbinotoan na dipasahat tu hita songon si Daud na pasahathon
dirina tu Debata, jala diulahon do di hangoluanna marhite habisuhon ni Debata.
Marhaporseaon ima na dasor ni ngolu ni halak Kristen.
e. Sipahusorhusoron:
1. Sai gumodang ma hita
tumangihon angka na uli na denggan asa manghorhon hata na uli na denggan
dibagasan ngolunta jala gabe barita na uli ma i di parngoluonta. Diigil Tuhan i
do hita asa gumodang mananginangi songon na tarsurat di Poda 5: 1 – 2 “Ale anaha, sai parateatehon
ma habisuhon na huajarhon i, tarehon ma pinggolmu tumangihon poda na sian ahu.
Asa diradoti ho angka panuturion, jala dipajop bibirmu parbinotoan.”
Marhite na patarehon sipareon i tu angka poda, pangajarion, poda nang angka na
positif tarlumobi na tumangihon Hata ni Debata, asa ndada holan na manghorhon
parbinotoan, habisuhon dohot hapistaran na lam martamba, alai pasidohot dope
angka pasupasu ni Debata na naeng sipapataronna tu parngoluonta.
2. Ulahon na denggan. Tapadao ma
ngolunta sian hajahaton asa hombar tu Hata ni Debata na tahaporsea i (ay.15a).
Lapatanna na mangolu hombar tu Hata ni Debata. Saleleng ndang mangolu dibagasan
hapolinon dohot hasatiaon tung so dapot hita do asi ni roha ni Debata. Binsan
dilehon Tuhanta i dope asi ni rohaNa dibagasan ngolunta, sai muba ma rohanta tu
haimbaruon dibagasan Jesus Kristus naung manobus angka dosanta.
3. Ringkoti na mangalului
hadameon (ay.15b). Ndang adong guna ni na mameop angka muruk, hansit ni roha,
jut ni roha dohot angka ondamondam tu halak. Molo naeng hipas roha nang
pamatngta naeng ma hita marsormin sian haiason ni jabunta. Molo sapal ndnag
tajaga angka sampah ni bagasta i, boi do manghorhon sahit, ala nunga godang
gulomit, porngis, nang angka na boi mambahen sahit tu hita. Asa sehat tumagon
hobas paiashon jabunta sian angka sampah. Molo ias jabunta sehat ma hita
mangingani bagas ta i jala sonang rohanta. Laos songon i ma gombaran ni haiason
ni rohanta, unang taloas angka sampah mangonggopi dibagasan rohanta (angka
muruk, hansit, ni roha, jut ni roha dna.) boi do i gabe parohon sahit di hita,
ndang sonang rohanta nang ngolunta. Tumagon do taambolonghon sude “sampah” i
sian bagasan ni rohanta marhite huaso ni Tuhanta Jesus Kristus, rupa masisesaan
dosa ala naung disesa Tuanta Jesus dosanta, asa ias jala polin rohanta
mandalani ariari ni ngolunta dibagasan las ni roha (Rom. 12: 17-21; Mat.6:15).
Amen.
