Pasangap
Hamu Ma Debata Marhitehite Dagingmuna
1
Korintus 6 : 12 – 20
a. Surat
1 Korintus, ima surat na tinongos ni Apostel Paulus tu huria Korint di tingki
pardalananna na paduahalihon laho mamaritahon barita na uli (Ulaon AP.18:1-7).
Disurathon sian luat Epesus hirahira taon 50 ndung Kristus. Ia luat Korint on i
ma pusat perdagangan, kota pelabuhan na mansai torop diebati angka bangso, jala
kota na mansai ringkot situtu di Timur Tengah. Ia parngoluon nasida sian na
martigatiga (perdagangan) do), jala marhitehite i do umbahen na mamora situtu nasida. DI luat Korint on
godang do na marharoroan sian angka bangso na marragam. Ala ni i mura do nasida
manjalo hamajuon. Ala ni hamoraon dohot hamajuon on gabe godang tubu angka
hadosaon diula nasida, lumobi ma i pengaruh ni ugamougamo hasipelebeguon na
adong, na bersifat sexual. Ala naung mansai godang dosa pangalaosion diula
nasida, dibahen i do Apostel Paulus manongoshon suratna on. Mansai ragam do
dosa pangalaosion na diula nasida. Masa do ditongatonganasida parbolatbolaton,
na mambahen tubu angka horonghorong (kelompok). Ndang didalanhon nasida angka
ruhutruhut manang aturan na masa ditongatonga ni huria i, holan na mangalului
parbadaan dohot parkaro do nasida tongtong, paotootohon (patubu hata na so toho).
Marhite suratna on ro do Apostel Paulus manuktuhi rohanasida, asa unang be diulahon
angka dosa. Ndang lomo roha ni Apostel Paulus marharajaon dosa di ngolu ni
jolma. Dibagasan i tongtong do dipataridahon Apostel Paulus holong na tu nasida
“Songon ama tu ianangkonna”.
b. Dijolo
ni turpuk on dipatorang do taringot pangalaho ni halak Kristen di luat
Korintus, adong ditongatonga nasida na marparkaro dompak donganna gabe hum
Apostel Paulus mangido uhum tu halak sipargeduk, jala ndang tu angka na badia.
Dipatorang Apostel Paulus do, asa molo tung adong pe parkaro ditongatonga
nasida, unang diboan tu angka na so tumanda Debata (sipargeduk). Dipasingot
Apostel Paulus do nasida asa mangihuthon poda ni Tuhan Jesus songon na tarsurat
di Mateus 15: 17. Molo ndang diula nasida i gabe uhumon ni angka na porsea (na
badia) raphon Kristus do nasida sogot. Nang pe boi nasida deba monang di
parkaro na binoan tu sipargeduk i, jaloon nasida do panguhuman songon balosna,
ala ndang diulahon nasida hata ni Debata. Dumengganan doo hita agoan hepeng
manang arta, unang apala magoan dongan sahaporseaon. Diorai Apostel Paulus do
nasida, asa unang manuntut dongan Kristen dijolo ni pengadilan manang hakim.
Angka parkaro na adong ditongatonga nasida ingkon do dipahantus angka namarroha
na adong ditonga ni huria i.
c. Tamba
taon dohot hamajuon, boi do lam tamba nang pangalaho na hurang denggan dohot
hamaolon ni ngolu. Jotjot ditongatonga ni parngoluonta, hurianta, jabunta adong
parkaro manang parsalisian. Jotjot parbolatbolatan i mambahen gabe marsirang
angka na mardongan manang na sahaporseaon. Doshon tusi do turpukta on, na
manosoi taringot tu haringkoton ni ngolu hasadaon na tutu jala na polin
dibagasan Tuhan i. Hasadaon na niondolhon ni Apostel Paulus on, ima paloashon
dirina manang pamatangta on jala sude panggulmiton ni ngolunta mardomu dohot
Tuhan i. Asa halak na olo pasaorhon dirina tu Tuhan, gabe sada Tondi do i dohot
Ibana. Ai ruas ni dagingNa do hita disi (ptds. Eps.5:30). Sada hasadaon dohot
Tuhan i, ima molo taparateatehon angka na nidokNa. Lapatanna marguru tu Ibana
sude nasa na taulahon dohot na tahobasi. Molo marbariba pangalonta dohot
pambahenanta tu soara ni Tondi i, ndang tagamon boi jumpang hasadaon i di hita.
Masitundalan do ngolu sisongon i. Beha ma tarbahen ni boruboru na jahat na sai
holan paulaula hisap ni dagingna (harorangon) mardomu tu hasadaon ni Tondi ni
Tuhanta i. Ai ndang adong parjumpangan angka ulaon na rotak, na geduk tu
habadiaon ni Debata.
d. Argahon
dirim, ido apala na tangkas naeng lumbahonon ni turpuk on. DI 1 Korint.3:16,
didok do: “Joro ni Debata do hamu, jala Tondi ni Debata maringan dibagasan
hamu”. Dibahen i ndang jadi siranghonon ni jolma dagingna dohot Debata, alai
ingkon pasahathonna ma dagingna bahen pelean na mangolu, na badia, na
hinalomohon ni Debata (ptds. Rom 12: 1). Ndang ahu, ndang ho, ndang hita
saluhutna nampunasa daginta on, Debata do nampunasa (ay.19). Antong ala so hita
nampunasa daging on, andorang so ro na umpunasa i mangalap jala mambuatsa,
tapaias jala taradoti ma dirinta. Asa
arga hita dijolo nampunasa hita. Jala asa marhite i boi tapajongjong
tanggungjawab silehonlehon i.
e. Nunga
dipaias hita marhite mudar ni Kristus i, ima na patuduhon mansai arga do hita
diadopanNa, ndnag na gabe marisuang hita na tinompaNa i. Sian panobusion ni
Kristus dihita halak pardosa dohot marhite haheheonNa sian hamatean, ima sada
jaminan di hita asa unang be ganggu rohanta nang haporseaonta; jala mangonjar
rohanta laho manghormati pamatangta on. Ndang hita nampuna pamatangta on alai
Ibana do songon na tarsurat di B.E. No.
150 NDANG AU NAMPUNA AHU BL. 125;
1. Ndang au nampuna ahu Hulehon diringkon;Tu
Tuhan i Rajangku Sigomgom tano on; Ai dibagasan Jesus au Diida Debatangki Na
pasonangkon au.
2. Ndang au
nampuna ahu Dung mate Jesus i; Dihophop do tondingku Disesa dosangki; Tongtong
ma hupasahat au Mangunduk tu Tuhanku Na lambok roha i.
3. Ndang au
nampuna ahu Dung na tardidi au; Di goar ni Tuhanku Na mangulosi au; Naung domu
au tu Jesus i Rap dohot huriaNa GinomgomanNa i.
4. Ndang au
nampuna ahu Ndang tarhasiphon au; Sai Jesus do artangku Ndang be maila au; Torop
pe manginsahi au Direhe pe Tuhanku Sai Jesus do di au.
5. Sai i do
dohononku "Ndang au nampuna au"; Sai Jesus tioponku Paima sahat au; Ndang
lupa au di Jesus i Paima tos hosangku Ai sonang au disi.
Ala ni i tajaga ma
ngolunta dirinta nang pangalahonta sian harorangon, naeng ma fokus roha nang
haporseaonta di Jesus Kristus marhite tangiang nang elekelekta tu Ibana asa
diramoti hita. Tapasangap ma Debata marhitehite dangingta. Amen.
