Bahan Jamita Evangelium Minggu XI Dung Trinitatis, 31 Agustus 2014

Mansoadahon Diri, Mamorsan Silang, Mangihuthon Jesus

Mateus 16: 21 – 28

    a.       Dijolo ni turpukta on dipaboa do barita taringot tu panindangion ni si Petrus songon sahalak sisean ni Jesus na marsitutu mangihuthon Jesus, songon na mewakili angka sisean i ibana mandok Jesus ima: Kristus (Mesias), Raja na pinarbagabaga i do Ho, Anak ni Debata na mangolu”. Gabe tangkas ma panindangion ni sisean i, Mesias do Jesus jala Raja na pinarbagabaga. Dibagasan Ibana do saut bagabaga ni Debata na di Padan na Robi. Ibana do sipaimaon i, jala ndang adong be na asing. Lam singkop panindangion i, marhite pandohan: Anak ni Debata na mangolu, Anak ni Debata do Ibana, jala Debata na ro tu portibi on, sumolukhon rumang ni jolma jala hatoban (Pil.2). Didok Tuhan Jesus do si Petrus sisean na martua ala ni panindangion i. Ndada holan hajolmaon be i alai nunga ulaon ni Debata. Mangula Debata dibagasan Ibana, papatarhon taringot tu Jesus. Didok Jesus ma ibana batu mamak, jala di atas batu mamak i paojahonNa huriaNa. Molo mangolu na porsea di bagasan panindangion na sintong i, gabe batu mamak ma ibana, gabe dohot ma ibana rap dohot angka apostel gabe ojahan, na ojak di Jesus ojahan na sintong. Diuduti Jesus muse bagabaga i taringot tu anak hinsu ni banuaginjang. Huaso i mangihot dohot paluahon na dipasahat ndada holan tu si Petrus alai tu sude siseanNa i. Sikap maradophon panindangion i do manontuhon ngolu ni jolma. Angka sisean, angka na porsea ingkon diadophon tu panindangion asa dibahen pamilliton, jaloonna manang tulahononna. Adong dua ragam tujuan ni Jesus umbahen na disungkun i tu siesanna ima: naparjolo; asa sude umbotosa, manang songon dia panandaon ni natorop dohot sisean i taringot tu Jesus. Paduahon; asa tangkas marhite pamangan nasida manghatindangkon Jesus. Ndang cukup holan dibagasan roha manang holan dibagasan pikiran haporseaon i. Alai ingkon tangkas do haruar sian pamangan mandok porsea di Jesus Kristus Anak ni Debata (ptds. Rom 10: 10).

     b.      Diuduti mamuse barita ni turpukta on Jesus na paboahon sitaononNa dohot poda tu na giot mangihuthon Jesus. Jala ndada holan Jesus, dipudian ni ari dohot do nang angka sisean i marsitaonon ala ni Kristus. Ala ni i do nuaeng marhite sungkunsungkun i, i do songon langkah parjolo paradehon sisean i, tu tahap na mangihut. Nunga ditontuhon Debata Ama, sitaonon i do dalan manuju tu hamonangan, ala ni i didok Apostel Paulus, “Itahalashon do angka sitaonon si songon i ( Rom. 5:3), ai marhite sitaonon si songon i do dalan tu hamonangan, i ma sitaonon ala ni hatigoran dohot ala ni Kristus i. Dung dipatorang Jesus tu angka siseanna, na ingkon manaon na porsuk sian angka sintua ni natorop, sian sintua ni malim nang sian sibotosurat pe, pola ingkon mate Ibana bunuon, pintor dipaingot si Petrus ma Jesus mandok; “Asi ma roha ni Debata di Ho, Tuhan! Unang ma songgop i tu Ho!”. Molo didok si Petrus pe songon i siala naung di hatindanghon ibana do taringot tu Jesus di ayat 16, 20 ia Jesus ima Raja na Pinarbagabaga i jala Anak ni Debata na mangolu ima Kristus. Alai mansai koras do pandohan ni Jesus tu ibana: “Laho ma ne ho, bolis!”, ima patuduhon parsitutuon ni Jesus laho mangalehon hatorangan na tangkas taringot tu pandohanNa i tu si Petrus dohot angka siseanNa na asing. Ia hagiot ni si Petrus dohot siseanNa i na marharoroan si sibolis do i, sada sikap laho manulak sangkap haluaon ni Debata. Angka sisean ni Jesus mangantusi hadirion ni Jesus holan sebatas manisia dope na naeng patupahon haluaon secara politis na gok huaso jala ndang diantusi siseani dope haroro ni Jesus laho pasauthon lomo ni roha ni Debata.

     c.       Molo nunga dipatandahon Jesus taringot tu identitasNa na sasintongna, sahat ma tu panorangion taringot tu identitas ni angka siseanNa, manang angka siihuthon Tuhan Jesus. Dipodahon Jesus do laho mangihuthon Ibana ima:

• Mansoadahon diri, Lapatanna olo mamelehon dirina hibul tu Debata (ptds.Rom.12:1). Naolo patujolohon Tuhan i dibagasan ngoluna sian kepentinganna sandiri. Dipatuduhon ma ngolu sipangoloi di Hata ni Debata sian na mangoloi sangkap, roha, nang pingkiranna sandiri. Astuanna, molo adong halak na mambahen hansit rohanta, boi do ro pangkilalaan na muruk, manghosomi, dohot na naeng mambalos. Alai molo nunga gabe siihuthon Kristus hita, ndada ulaonta be sisongon i, na tarjou do hita songon Kristus i manesa dosanta, laos tarjou do hita manesa dosa nang saala ni dongan jolma tu hita. Dipardalanan ni ngolunta, sai jumpangan hita do pangalaho nang tantangan sisongon i. 
• Mamorsan silang, Lapatanna  rade mangadopi konsekuensi na umborat ima agoan hosa laho mangihuthon Jesus. Mamorsan silang na marlapatan laho manghatindangkon dirina siihuthon Kristus, tung aha pe na masa, tung resiko aha pe i, dohot angka bentuk pengorbanan, tung di situasi dia pe i, na mansai maol situtu pe i molo satio jala pangoloi do ibana di Tuhani, na lehonon ni Tuhan i do hagogoon dohot patuduhon dalan. Songon angka kuli pangku di dermaga kapal laut i do i, masijolojoloanan do angka kuli i laho menawarhon angka barang ni penumpang laho situhukhononna sagodanggodang na pe taho ima di rohana asa dapot mambalanjoi keluargana sian upana i. Laos songon i do di bandara udara nang di terminal pe tung godang do na mangulahon sisongon i holan asa dapot balanjo di diri nang keluargana. Angka siihuthon Kristus naeng ma mangetong silang i songon ‘balanjo’ tu partondionna, asa mangolu ibana. Tarlatih do angka na porsea i sian ragam ni angka hamaolon na niadopanna, sa boratboratna situhukonna etongonna ma i songon ‘balanjo’ tu hangoluan sogot i. 
• Mangihuthon Jesus. Mangihuthon Jesus ndada sada pilihan alai sada panjouon do on, lapatanna mangihuthon Jesus ima marhaporseaon tu Jesus, ndada laho tu rekreasi, alai laho patuduhon haposan do Ibana dibagasan ngolunta. Molo naeng mangihuthon Jesus, nunga sadalan disi naung paubahon roha, pingkiran, nang pangalaho dohot parangena. Mangihuthon Jesus ndang manonditnondit, alai na togu dohot marsihohot dibagasan Tuhan Jesus. Alai adong do deba jolma na sala mangihuthon Jesus, didok rohana molo naung gabe siihuthon Jesus, dao ma sian angka sahit, molo ro sahit pintor malum ma, dao sian hasusaan, ngoluna lam gabe, mamora, sinur na pinahan, gabe na niula. Songon pangantusion ni gerakan New age movement (gerakan zaman baru). Ala ni Jesus i ndada gabe Tuhan di roha nasida alai gabe ‘alat’ promosi asa martamba raus ni huriana. Ala ni i molo gabe siihuthon Jesus naeng ma gabe pangoloi di Hata ni Debata.

     d.      Di hita angka siihuthon Kristus Ia Poda (syarat) na tolu on ndada na gabe paksaan, molo naeng diihuthon manang ndang saguru di rohana ganup do i, asa molo nanaeng mangihuthon Jesus ingkon marhite roha na bulus jala tulus do. Boi do ra sung kunsungkun di roha na deba: borat ma poda na i? Alai di hita do keputusan, taihuthon do Jesus manang ndang? Di hita do pilihan, ala ni i dipatorang Jesus ma muse mandok pilihan i: “Ai na naeng paluahon hosana, mangagohonsa do; alai na agoan hosa ala ni Ahu, i do na jumpangan”. Tung soadong do jolma na boi jala mampu paluahon dirina, ido umbahen na ro do Jesus tu tongatonga ni portibi on laho paluahon hita jolma asa jaloonta hangoluan na saleleng ni lelengna. Ndang adong na boi tarpatupa hita jolma laho paluahon dirinta sian hamagoan nang hamatean saleleng ni lelengna i. I do umbahen diuduti Jesus muse mandok: “Ai aha ma antong gunana di jolma, nang liat portibi on diomo, anggo mago do tondina? Aha ma tarlehon jolma bahen tobus ni tondina?” Tung manang aha pe na niomo hita di portibi on nda tau i mangalehon dalan haluaon dohot na manggantihon tondinta (nyawa). Tondi nanidok na dison ima hatongtongon, jadi ndang dibatasi hamatean sambing. Ala ni  i ndang adong na boi manggantihon haluaon ni ngolu marhite manang aha pe sian na adong di portibi on.

     e.       Mangihuthon Jesus ima asi ni roha ni Debata na balga do i tu hajolmaon asa manadingkon ngolu na robi na mangihot jolma i manghaholongi ngolu na dibagasan dosa jala tu na mamasuhi hangoluan na imbaru raphon Tuhan Jesus tu hangoluan na saleleng ni lelengna. Ala jumpang na ma tingkina Anak ni Jolma i didongani angka surusuruanNa na gabe Panguhum jala mambalos ganup parulaon ni jolma. Ala ni ni naeng do marsiajar hita sian sisean ni Jesus termasuk si Petrus: Manghatindangkon Jesus naeng ma sadalan dohot haimbaruon ni ngolu. Molo holan hata do ndada sae laho patulushon sangkap ni Tuhan i, ndada holan na manghatindangkon haporseaon songon si Petrus, alai naeng ma tarida panghorhonna di ngolu siganup ari, diparange, panglaho, songon na nidok ni Tuhan Jesus: “Mansoadahon diri,Mamorsan Silang, Mangihuthon Jesus.

     f.     Dipardalanan ni ngolu angka na porsea i, naeng do rajumanna na mardalan do ibana raphon Jesus nanaeng pasahathon diriNa tu Debata, ndada tu sangkap ni portibi on. Ala ni  i tarjou do angka siihuthon Jesus marsihohot satia di ngoluna tung aha pe na masa; arsak, sitaonon, parmaraan, hamaolon, ndada na gabe manginsurut ibana mangihuthon Jesus. Mangihuthon Jesus dipatuduhon ma sikap pangoloion, unduk dohot serep ni roha mangulahon lomo ni roha ni Debata mamaritahon Barita na Uli i ( Jes.53:7; Mat.10:24-25; 1 Ptr.2: 23). Songon haunduhon ni Jesus tu Debata Ama i sadalan na nidok Apostel Paulus di Pilippi 2 : 5-11 Songon parrohaon ni Kristus Jesus ma parrohaonmuna! Atik pe rupa ni Debata di Ibana, ndada songon na nidobo dirajumi rohana tudosna i tu Debata. Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. Dipatutoru do dirina; na gabe pangoloi do Ibana paima mate, pola tung mate tarsilang! Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! Songon pandohan ni halak Indonesia: “Berakit-rakit ke hulu berenang-renang ke tepian, bersakit-sakit dahulu, bersenang-senang kemudian”. Manang songon judul sada sinetron “Sengsara Membawa Nikmat”, Dohot songon istilah ni sahalak artis Amerika Jane Fonda di taon 1982 na memproduseri Video Aerobik: No Pain, No Gain, dungi ditambai ma muse di haporseaonta: “No Crown Without Cross”, Lapatanna ndang adong hasilna molo so adong usaha nang kerja keras, ndang adong hasilna molo soadong pengorbanan. Ganup siihuthon Kristus manuhuk silangna be, jala tatuhuk ma i mardonganhon Tuhan i asa tartaon hita dibagasan benget ni roha, jala diujungna dapot hita ma las ni roha na manongtong i. Amen.

Bahan Jamita Epistel Minggu XI Dung Trinitatis, 31 Agustus 2014

Mansoadahon Diri, Mamorsan Silang, Mangihuthon Jesus

Jeremia 15: 15 – 21

    a.       Ia turpukta on ima songon bagian ni panindangion manang konfessi na binoan ni Panuririang Jeremia taringot tu huaso ni Debata tu angka jolma nahinaolohomnNa. Songon sahalak Panurirang ibana na tarjou laho pasahathon uhuman ni Debata tu bangso Israel nang bangso Jehuda. Alai diulaonnai sai adong do ondamondam nang hamaolon hamaolon sian tongatonga ni bangso i. Jala hamaolon na niadopanna asing ni secara mental dohot do secara fisik. Disada sisi ingkon pasahathonna do sangkap dohot tona ni Debata, alai disisi na asing sai ro do angka panaritaan, hamaolon na niadopanna songon sahalak pnaurirang ibana. Alai marhite i do asa mambahen ibana lam tang marhaporseaon huhut margogo mangulahon ulaonna i. Nang pe mansai borat parsulaon na niadopanna pola sahat tu rohana na sungkunsungkun taringot pangaramotion ni Debata diulaonna alai mrasihohot do si Jeremia mangulahon ulaonna i. Dipasahat ibana do sude parsorion ni ngoluna tu Debata jala ndang mambahen ibana sumurut alai lam margogo, jala lam marsitutu mangulahon ulaon na.

     b.      Dipangido Panurirang Jeremia do ditangiangna asa unang jolo dijou Debata ibana andorang so dibereng ibana angka musuna i dapot uhuman sian Debata, ido umbahen didok ibana:  “Unang butbut ahu....”. Ulaon ni si Jeremia ima sada ulaon na khusus songon Panurirang ni Debata ibana, na tarjou do ibana  mangulahon i, lapatanna manang ise na manulak si Jeremia doshon na manulak Debata, siala si Jeremia ima suruan ni Debata pasahathon tona nang hatigoran ni Debata. Goar ni Debata sandiri do napinasahatna asa asing do ibana sian sihatoropan bangso Israel i na mangulahon harorangon, nang di parpestaan nasida pe ndang olo ibana hundul ala magigi si Jeremia marnida pangalahonasida. Dialo bangso i do ibana jala diburai, songon hira na dao do Debata dihilala ibana jala songon sunge sipaotooto, na so tau mangalehon aek ditingki  mauas halak. Hape na so tadingkonon dohot gabuson ni Debata ibana, jala dapotan sipasingot do si Jeremia ala ni pamingkironna na sala taringot tu Debata ima sian ayat 19-21. Asa marhite na olo si Jeremia mangulahon parsuruon dohot pasahat Hata ni Debata tu bangso i naeng do asa sadalan ibana dohot Debata, ramotanNa ma si Jeremia jala bahenonna bangso Israel gabe parik haksa di ibana.

    c.       Bangso Israel ima bangso ni Debata, na mangolu dibagasan huaso dohot pangaramotion ni Debata. Na gabe persoalan ima pangalaho ni bangso i na muba sian bangso na pinillit ni Debata gabe manundali Debata. Nang naung dipaingot Panurirang Jeremia dohot mangarahon bangso i asa marhamubaon ni roha, ditulak nasida do jala sai tong dope mangulahon harorangon. Ala ni i parsaoran ni Panurirang Jeremia dohot Debata asa dipaimbaru muse songon naposoNa ibana, laos songon i do parsaoran ni bangso i dohot Debata. Molo nunga adong hamubaon manang pertobatan, situasi dohot kondisi ni bangso i naeng do dipauli Debata. Lapatanna molo dipasahat panurirang i nang bangso i ngoluna paturehon ni Debata ma muse parngoluanna, dipatuduhon Debata ma hatigoranNa nang pe mamolus ragam hamaolon panurirang i nang bangso i pe di ngoluna. Dipardalanan ni ngolu ni jolma i pe di portibi on sai torus do mangadopi angka parsualon nang hamaolon dibagasan ngoluna. Jala ditingki mangadopi hamaolon nang persolana i jotjot do na deba halak boi tarrobung tubagasan ni hamaolon i. Ala ni i halak Israel nang panuririang Jeremia tarlumobi halak Kristen naginoaran ‘Israel Na Imbaru’ asa boi mangadopi angka hamaolon nang tantangan i, naeng do pauba roha nang sikap ni ngoluna hombar tu dalan dohot lomo ni roha ni Debata. Dibagasan huaso ni Debata adong pangkirimon dalan haluaon asa adong sitiponta di portibi on

    d.      Songon panjouon ni Debata tu Panurirang Jeremia na godang mangadopi angka tantangan ni ngolu dibagasan ulaon panurorangonna. Tantangan i boi ro sian bagasan dirina sandiri, bangsona na mardomu di ulaonna songon panurirang na paboahon nanaeng masa dian Debata tu bangso i. Alai ndang sumurut ibana mangula ulaonna, nang pe sipata rodo holsoholso ni rohana, sai mulak dope rohana tu Debata na tau mangalehon hagogoon di pamatang nang partondionna pe. Laos songon i do halak na porsea siihuthon Kristus i na tarjou do jala tarpillit asa gabe anak dohot boru ni Debata jala gabe bangsoNa na dipangke gabe singkat ni Kristus gabe ulaulana laho mamaritahon Barita na Uli sian Debata. Alai ndada gabe sai torus ngolunta jala ulaonta i sai denggandenggan mardalan, sai adong do ‘suga’, hamaolon, angka ‘batu’ na mangambati, sai ro do ‘galumbang’ na metmet nang na balga i di pardalanan ni ngolunta songon galumbang ni aek laut i. Alai nang pe songon i ndada boi hita sumurut hinorhon ni i, alai naeng ma tapasahat sude parsorion ni ngolunta tu adopan ni Debata asa Ibana na mangajari hita mangula siulaonta, ala angka ulaonta i sian Debata do i jala tapaulak i tu hasangapon ni Debata. Asa ngolunta on botulbotul ma na gabe panindangion na mangolu, gabe panondang nang gabe sira ni portibi on, jala gabe jamita na mangolu  ditonga ni masyarakat tarlumobi gabe hasangapon di Debata. Songon panindangion ni Jesus Kristus, na mangula do Ibana holan laho patandahon huaso, hagogoon, hasangapon ni Debata marhite angka ulaonNa. Ndada hea Jesus mambuat hasangapon sian angka ulaonNa i, alai asa ditanda bangso i do ise Debata.  Disoadahon Jesus do diriNa, dipangasahon do huaso ni Debata marhite na sai martangiang Ibana mangido pangurupion ni Debata Ama i (Mat.14: 23; Mark.1:35; Luk.3:21; 23:46). Jala dihatindangkon Apostel Paulus do taringot tu Jesus Kristus i di Pilippi 2: 5 -11 ‘Songon parrohaon ni Kristus Jesus ma parrohaonmuna! Atik pe rupa ni Debata di Ibana, ndada songon na nidobo dirajumi rohana tudosna i tu Debata. Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. Dipatutoru do dirina; na gabe pangoloi do Ibana paima mate, pola tung mate tarsilang! Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama!” Ala ni i angka siihuthon Kristus sadalan dohot na pinangido ni topik ni minggunta : “Mansoadahon Diri, Mamorsan Silang, Mangihuthon Jesus” lapatanna dinasa hamaolon dohot hasussaan ni ngolu na taadopi, asa unang hita mangasahon diri lapatanna mansoadahon diri asa tu adopan Tuhan Jesus ma tapasahat (Mateus 16:24 Dung i didok Jesus ma tu angka siseanna: Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu!) jala sadalan na nidok ni Jesus di Johannes 15:5 “Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu.” Dungi didok Jesus do muse di Mateus 11:28-30 “Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon.” Ala ni i angka siihuthon Kristus asa patujolohon Kristus disaluhut gulmit ni ngoluna, Ibana ma Raja jala na gabe Uluan ni ngoluna. (Ptds. 1 Tess.5:12-13).Amen.

Bahan Jamita Evangelium Minggu X Dung Trinitatis, 24 Agustus 2014

Dipaimbaru Hamubaon Ni Pingkiran

Rom 12: 1 – 8

    a.       Dijolo ni turpuk on ima Bindu 11 ayat na parpudi sian ayat 33-36 dipatorang do taringot bagas ni hamoraon, parbinotoan nang hapistaran ni Debata na so hadodoan, na so hasigatan ni jolma nang portibi on. Debata do mual ni nasa pasupasu, mual ni nasa na adong. Na marlapatan manang ise nanaeng pistar, mamora, maduma, ro ma tu Debata, pangido ma roha na bisuk sian Ibana, asa ture parngoluanta saleleng di portibi on hita. Tarlumobi naung dipasupasu Debata do hita jolma marhitehite silehonlehonNa i, asa boi pangkeonta dalan pasupasu dipardalanan ni ngolunta nang na tuhumaliang hita tarlumobi gabe pujipujian tu adopanNa. Molo tung adong pe na mamuji hita ala ni naung adong taulahon nang na tapatupa, manang marhasurungan hita siang na asing, tarajumi ma i sian Debata do i. Sau adong be do hasurungan ni sada halak sian na asing, ai ndang adong ianggo tung na apala sirsir sarupa parbinotoan ni sada halak tu halak na asing. Ai marasingasing be do talenta na pinasahat ni Debata tu ganup jolma. Jadi di halak na so mangantusi, sai madabu ma ibana tu pangapianon, sai dirimpu ma holan tu halak na asing i Debata manarihon hape ia tu ibana ndang disarihon Debata,, ima didok rohana. Hape so pamotoanna tu ganup jolma do dipasahat Debata talenta manang silehonlehonNa i hombar tu ngoluna, jala ingkon sipertanggungjaawabhononnna i nian tu Debata angka talenta na jinalona. Ala sian Debata do sumberna, tontu hapateanna pe tong ma mulak tu Debata. Ianggo posisi ni jolma, holan na manorushon angka ulaon i nama i secara estafet. Boi do hita mamuji saasahalak manang mengagumi ala ni bakat nang talentana, halobionna sian hita, alai ianggo tung manghorhon elat  manang pangiburuon, sala do i. Ai hita pe dilehon Debata do talenta na boi sikembanghononta hombar tu kemampuanta be, naeng ma rajumanta sian Debata do sassudena i jala marhapatean tu Ibana do nasa na adong (ptds. 1 Korint 3: 5-6 “ Ai ise Apollos; ise Paulus? Parhalado do nasida, parhiteanmuna gabe porsea, jala ganup hombar tu pangalehon ni Tuhan i di ibana. Ahu do manuan, Apollos do pabornokkon; alai Debata do patubuhon.”).

     b.      Ido umbahen turpukta on Rom 12: 1-8 gabe kelanjutan ni bindu 11, na dipaingot Ap.Paulus do huria di Rom sude silehonlehon ni Debata do naung sahat di hita jolma, asa tapelehon i mulak tu Debata gabe hasangapon di Ibana. Daging nang tondinta sian Debata do i naeng ma tapelehon mulak tu Debata gabe hasangapon ni GoarNa songon naung dipodahon Ap.Paulus di Rom 11: 36 “Ai sian Ibana do saluhutna ro, marhitehite Ibana jala marhapatean tu Ibana do sasudena i! Di Ibana ma hasangapon salelenglelengna!” Molo botulbotul do hita mamelehon dirinta tu Debata disi ma tapatuduhon holongta tu Ibana. Tung adong pe hasangapon ni portibi on di hita, nang hapistaran, nang hamoraon sian Debata do i. Alai ala ni dosa i, sai jotjot do tartait roha ni jolma i tu na manengahon dirina di angka naung jinalona. Aha na niida ni   mata, nabinege boi mempengaruhi roha ni jolma i mangulahon dosa (manangko,korupsi, teal, elat, late ni roha, pangiburuon, dna.) 1 Korint 2: 9 “Saut do na tarsurat i: "Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na mangkaholongi Ibana." Angka na manghaholongi Debata ima angka naung dibagasan Kristus ima huria ni Debata di portibi on (1 Kor. 1:24; 2: 7) natarjou mamelehon dirina di huria nang di portibi on, ndang boi portibi on mempengaruhi roha nang pingkiranna, alai sai fokus do na porsea i di panjouon ni Kristus i, asa hombar tu lomo ni roha ni Kristus. Tudos songon na tarsurat di  Pilippi 2: 5 “Songon parrohaon ni Kristus Jesus ma parrohaonmuna!”

     c.       Diapoi Apostel paulus do marhite silehonlehon na sian Debata i di ibana nang tu angka ruas i asa unang adong manang ise na manengahon dirina siala silehonlehon i, alai naeng ma boi nirajaanna dirina ni rajaan ni Tondi Parbadia i (ptds. Parbue ni Tondi Gal.5:22-23). Dipatorang Apostel Paulus do marhite na boi masuk to roha nang pingkiran ni jolma, ima taringot tu pamatang (tubuh; somata) boi jahaonta di 1 Korint 12: 12-26; adong pat, tangan, pinggol, mata, dna. Naung dilehon Debata do di ganup ruas ni pamatang i angka inganan di pamatang i hombar tu lomo ni rohaNa. Ganup ruas ni pamatang i adong inganan dohot fungsi na marasingasing. Laos songon i ma angka ruas ni huria i, adong be do inganan dohot fungsina na marasingasing; ndang adong di huria i na tumimbo, natumoru, na sumangap, na lea, sude do ruas i dos diadopan ni Debata, jala uluanna ima Kristus i songon nadidok di ayat  5 “Songon i do hita: Torop sadaging di bagasan Kristus, alai ruas be' do hita sama hita.” Na rap sahundulan dijolo ni Tuhan i, masirainrainan, na gabe ruas sama ruas ma dibagasan pamatang manang huria ni Tuhan i.

     d.      Angka silehonlehon  ni Debata (karisma) na sahat tu ruas ni huria i ndada nanaeng pangasangasanghon i manang ditengahon dirina hinorhon ni i, alai sada panjouon tu  ganup ruas i do i tu Tuhan i. Molo silehonlehon ni Tuhan i do i, na ingkon sipasahaton do i muse tu Tuhan i marhite na tau marguna tu dongan jolma. Diapoi Apostel i do molo naeng mamangke silehonlehon ni Tuhan i di ayat 6 – 8: Ganup manjalo silehonlehon marguru tu ragam ni asi ni roha na tinurpukkonna tu hita: Ia panurirangon (profeteian), naeng ma mardomu tu haporseaon. Ia ulaon marhobas (diakonia), ba ulaon marhobas ma; ia haguruon (didaskon), i ma! Ia pangapoion (parakalon), i ma; ia na mangasii (metadidus), sian bulus ni roha ma; ia na manguluhon (proistamenos), marringgas ni roha ma; ia na marbasabasa (eleon), sian las ni rohana ma. Jadi sian i botoonta adong 7 silehonlehon na mangolu ditongatonga ni ruas ni huria i alai ndang berbentuk jabatan di huria i tingki i, sude nasida mabaor do di angka panghobasion, namarlapatan ungkap ni asi ni roha sama nasida. Pangalaho i ma sada parbue ni partangiangan nasida siihuthon Kristus. Na rup manghilalahon denggan basa ni Debata dibagasan ngoluna.

    e.      Goar ni Minggunta ima Minggu X Dung Trinitatis dohot topik: “Dipaimbaru Hamubaon Ni Pingkiran”. Betak adong dope sian tongatonga ni ruas ni huria na manghilalahon sude hadumaon, hasangapon, hagabeon, hamoraon, hapistaran, nang halobianna sian na asing holan ala ni gogona sambing. So tung ala ni pingkiran nang panghilalaan sisongon i manghorhon adong ruas na marginjang ni roha. “Molo so adong ahu ndang adong na boi sipatupaon ni huria on”, ima didok rohana. “Ummalo do ahu mangulahon i sian na asing” didok ruas na deba muse. Hape dos do hita diadopan ni Debata, rap na tinompa, dohot na mardosa, ai ndang adong na tigor sahalak pe jolma di adopan ni Debata ia so Jesus i. Ndang adong sahalak pe na tigor mangoloi patik nang uhum ni Debata. Holan Jesus do na badia jala na tigor Roha i umbahen na patut do Ibana manghophop hita jolma pardosa on marhite na mamelehon diriNa gabe pelean na badia gabe dalan manean sude dosa ni portibi on, dipadame hita dohot Debata asa taruli pasupasu haluaon sian Asi ni RohaNa i hita laos gabe parjambar di hangoluan sogot (ptds. 1 Ptr.2:19-24). Naeng ma Kristus na paimbaru roha nang pingkiranta, manolsoli sude pambahenan nang hasalaanta. Asa angka siihuthon Kristus mamangke sude na nilehon ni Tuhan i gabe hasangapon di Ibana sadalan naung tarsurat di 1 Petrus 4 : 10-11 “Masipatureturean ma hamu, ganup marguru tu asiasi na jinalona, songon angka juara bagas na burju di ragamragaman ni asiasi ni Debata. Ia adong na marjamita, naeng ma songon angka pandohan ni Debata; ia adong na marhobas, naeng ma sian hagogoon na nilehon ni Debata, asa di saluhutna i marsangap Debata, marhitehite Jesus Kristus. Di Ibana ma hasangapon ro di salelenglelengna i! Amen.”

    f.        Ala ni itujuan ni ngolu ni halak na porsea ima di surgo hasonangan i, jala tarida ma panghirimonna i di portibi on marhite angka ulaon asi ni roha naung jinalona asi ni roha sian Tuhanta i. Songon Tangiang Hatopanta i didok: “Sai ro ma HarajaonMu...” (tangiang na niajarhon Tuhan Jesus di Mat.6:9-13). Hajongjongan ni huria di tonga ni portibi on sada indikasi aplikasi ni haroroan ni Harajaon ni Debata, jala naeng do torus tarida di parngoluon ni ruas ni huria i marhite angka silehonlehon ni Debata di ibana gabe sira nang panondang ditonga ni portibi na gok dosa nang haholomon on (songon istilah teologis di Jesus Kristus). Panjouon ni angka na porsea sian Kristus i asa papatarhon HarajaonNa di portibi on marhite ngolu na olo mardame, pauliulihon. Ala ni i do dipaingot Ap.Paulus di Epesus 4: 31 “Dao ma sian hamu nasa riting ni roha dohot muruk dohot rimas, nang hata songgaksonggak dohot insahinsak, songon i nasa hajahaton! Alai gabe na basar ma hamu sama hamu, angka parasiroha; masisesaan dosa ma hamu, songon panesa ni Debata di dosamuna di bagasan Kristus.” Marhite i naeng do dijou angka na porseai paubahon roha nang pingkiranna asa tudos tu sangkap dohot lomo ni roha ni Debata ngolunta. (ptds. Jes.55:8-9; Pilippi 2: 5 Songon parrohaon ni Kristus Jesus ma parrohaonmuna!). Ido muse asa dipaingot Ap.Paulus di Epesus 3: 20 “Alai tarpatupa Ibana do andul lumobi sian na tapangido manang tapingkiri, hombar tu hagogoon na mangkorhon di bagasan hita.” Dungi didok muse di Rom 11: 33 “Bagasna i, antong, hamoraon, hapistaran dohot parbinotoan ni Debata! Na so hasigatan do angka uhumna jala na so habogasan do angka dalanna!”. Dijou do hita jolma asa porsea ndada holan mangasahon pingkiran be hita laho mangihuthon Jesus Kristus i, alai naeng do umbalga Haporseaonta di Ibana Raja Sipalua i, asa marhite hamubaon ni roha dohot pingkiranta di Kristus mangolu haporseaonta jala marhagogoon.

     g.       Di hita na hinaholongan dibagasan Jesus Kristus mansai las do rohanta molo adong hamubaon ni donganta sian dalan na so denggan gabe tu dalan na denggan, sian dalan haholomon tu dalan hatiuron, alai jotjot do tarambbat ala ni pangalahonta sandiri. Angka na malo mandok: “Kalau ingin mengubah seseorang atau lingkunganmu tergantung diri kita sendiri”, isarana molo asa senyum halak tu hita, jumolo antong hita senyum tu ibana, molo sai pajumpang hita dohot dongan alai bohina sai murhing, tapatujolo menyambut nasida dohot senyuman, ai pastina nasida pe dibereng do hita jala balosononna do songon na tapatupa i, ala jotjot do mental ni jolma berupa balas membalas. Adong do pigapiga slogan ni stiker na tarsurat mandok: “Anda sopan kami pun segan”, lapatanna molo dibahen ho na denggan tung niargaan dongan jolma do i. Dung i adong muse pandohan mandok: “rendahkanlah dirimu sebelum engkau direndahkan orang lain” lapatanna unang ma gabe ginjang rohanta. Siarsakhononta do parange nang pangalaho torop halak di Negaranta Indonesia on; na so maila gabe pengemis di negeri sendiri manang mentak peminta-minta hape ala ni malas na do godang tabereng angka pangidoido di pinggir dalan, dung i angka pengamen, hape didok ende ni Koes Ploes do: “Orang bilang tanah kita tanah surga, tongkat kayu dan batu jadi tanaman. Orang bilang tanah kita tanah surga, Tongkah kayu dan batu jadi tanaman.” Dungi siarsakhononta do pangalaho jolma di kebebasan mangulahon harorangon manang sex bebas, pencabulan, pelecehan sexual, pembunuhan, korupsi, pelanggaran marka lalulintas, mangambolongkon sampah sembarangan, dna. Mauliate ma tadok di Tuhan i, na patuduhon dalan marhite Presiden dohot wakil presiden terpilih 2014-2019 na paradehon program pendidikan Revolusi Mental. Asa marhite program i tahirim kemajuan ni rakyat Indonesia sian hamubaon roha dohot pingkiranna. Nang tarlumobi hita angka naposo ni Debata  naeng do pasidohot hita mendukung kemajuan bangso dohot negaranta Indonesia. Amen.

Bahan Jamita Epistel Minggu X Dung Trinitatis, 24 Agustus 2014

Dipaimbaru Hamubaon Ni Pingkiran

Jesaya 51 : 1 – 6

    a.       Ia  Panurirang Jesaya na mangula do di tingki ni manang piga raja di Israel, Utara dohot Selatan. Iban sandiri maringanan do di Juda. Raja na marhuaaso di tingki i adong do tung mansai jorbut pangalahona i ma si Ahas dohot si Manase. Pangantusion ni si Jesayas taringot tu Debata dipusathon do taringot tu habadiaon ni Debata, jala holan Debata do na tuk mangondihon bangsona. Na mangula do panurirang i muse nang ditongatonga ni halak Israel na di habuangan Babel. Torop do sian halak Israel na lam ngalina haporseaonna, ai nunga lam umporseaan nasida di hagogoon ni debata sileban. Disuriranghon ibana do godang taringot tu apulapul, dohot lambas ni roha ni Debata di bangssona asal ma olo bangso i tumadingkon dalanna na jahat i ro mandapothon Debata. Dibagasan pangalaho na songon on ma joujou panurirang i ndang marnaloja manjouhon haluaon na sian Debata.

     b.      Suman tu panggora ni partigatiga aek dohot angka partigatiga na marragam ditongatonga ni onan, songon i do panurirang i, sian nasa gogona pasahathon hata ni Debata. Gokhon dohot joujou ni Debata tu bangso na tarbuang i. “Ro ma hamu, sude hamu na mauas, ro ma hamu tu aek on. Jala hamu na so marhepeng ro ma hamu manuhor.....”. Molo  dipatubegehon panurirang i dison sipanganon ‘anggur’ dohot ‘susu’ tontu manigor tarsingot do roha ni halak Israel di sejarah ni ompunasida na manjalo bagabaga haluaon i, andorang di tano Misir ( 2 Musa 3). Dibagabagahon do yu ompunasidaaa haruar sian parhatobanon laho masudk tu tano bagabaga i, tano habaoran ni susu dohot situak ni loba.

Dison disorohon panurirang i do manolothon sipaingotna tu halak Israel. Godang do tutu na boi tuhoron, alai ndang ssude i na tau hangoluan dohot na pasonanghon roha. AI godang do i na maralo tu hata doht lomo ni roha ni Debata. Alai anggo na pinatolhaas ni panurirang i, i ma hata ni Debata. So mardonganhon hata ni Debata ndang marnosaan sude angka usaha nassida laho paluahon dohot pamorahon dirinasida di habuangan i. Suman ma nasida tu halak na manuhor na so tau hangoluhononhon dohot pasonang nasida.

     c.       Ndada aek na somal dohot eme na somal, manang anggur dohot susus sipabosur daging na pinasahat ni panurirang i, alai suang songon ringkot sipanganon dohot siinumon na porlu dipardagingon na naeng malua i. Jala ndang sipanganon sian pamangan masuk sipanganon i alai marhite sian sipareon do asa boi dipardaginghon. Ai Hata ni Debata do sipanganon i: “Sai tangihon hamu Ahu, asa panganonmuna na tabo i, jala bosuran rohamuna di tabotabo”. Tung mansai gomos do gonghon dohot joujou ni panurirang i. Nuaeng ditambai panurirang i sada bagabaga, i ma hangoluan na gok, sa singkop: “Tarehon hamu ma pinggolmuna, jala ro ma hamu tu Ahu. Tangihon hamu ma aasa mangolu tondimuna”.

     d.      Marhhite panandaon nasida di Asi ni roha ni Debata, dohot hamumulak nasida tu Debata gabe bahenonna ma nasida partogidohot silehon aturan jala sitindangi. Gabe pasupasu ma nasida di bangso na humaliang. Marhie nasida gabe ditanda bangso na asing ma Debata mula ni nasa na tinompa. Asa gabe ditarik do tugaas missi, jala bagabaga i ndada tu portibi manang politik alai tu portondion do. Tugas ni bangso i na gabe songon evangelis do ala nasida ma gabe haroroan ni barita haluaon.

      e.      Disosoi si Jesaya do halak na so parduli tu Debata. Nunga godang sian tongatonga ni Israel na mangalului holan na ringkot di pardagingon pola ditundalhon nasida Debata. Gogo do dijouhon si Jesaya, binsan tarbahen dope jumpang lapatanna adong dope kesempatan dilehon Debata tu sude jolma asa sipangke tingki laho pajumpang dohot Debata. Olo manang tongtong do rade Debata manjanghon halak na olo mulak tu Ibana. Dijouhon panurirang i do tu angka jolma parjahat asa manundalhon hajahatonna jala tu angka jolma siisangkapi hajahaton asa dipaso angka dalanna dohot sangkapsangkapna, alai mulak ma tu mual ni hatuaon i. Manang ise pe na olo manopoti dosana jala sangkap na buni di bagasan rohana rade do Debata manjanghon ibana huhut manesa dosana. Ndang mardia imbar disi bangso, manang houm, alai secara pribaadi mangaku dosana jala ro tu Debata, tongtong do ungkap tangan ni Debata manjanghonsa.

     f.        Gonghon dohot joujou ni Debata tongtong do marsaringar sahat tu ujung ni portibi on. Ringkot situtu do ngolu pardagingon alai rumingkot dope ngolu partondion. Jesus do aek hangoluan i. Dijouhon Jesus do: “Molo adong na mauas tu Ahu ma ibana ro minum”. Godang do di tingki on joujou ni portibi, na marrumangkon na tabo jala na pasonang roha. Hape jotjot do i mamboan hita lam dao sian mual ni hasonangan dohot dame. Sada do dalan asa boi hita pasidingkon i, manang laho amangke i, i ma molo mian Hata ni Debata dibagasan hita. AI marhite na gabe i hangoluanta jala na tahangoluhon, gabe na imbaru ma hita jala mangolu jala dapotan dame ma hita. Margogo ma hhita huhut las rohanta mandalani ngolu na jempek on. Nasa ragam ni parungkilon, i ma tahamonangkon ai Debata do donganta.

     g.       Disosoi  panurirang Jesaya do mangalului Jahowa. Tagamon do nuaeng godang jolma na holan mangalului arta, huaso, jabatan, hasangapon, hape anggo Jahowa ditundalhon do so parduli be, so tung gabe lupa na tarsurat di Mateus 6: 33 “Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!”.

     h.      Ndang boi antusan ni jolma dalan ni Jahowa ia so marhite haporseaon. Ai pola dipatudos songon timbo ni langit sian tano on songon i dohot dalanna ndang hadodoan jolma. Marhite jaman na lam maju on dohot angka tehknologi canggih unang ma mambahen lalap jolmai manghilalahon i sian gogo nang pingkiranna i, ai sian Debata do saluhutna i, gabe parhitean pasupasu di hita jolma. Naeng ma pangkeonta hamajuon i sude laho pasangaphon Debata dipardalanan ni ngolunta.  

    i.  Hata ni Debata na gok huaso tu sude na tinompa, naeng ma tapangido asa marsoara tu hita. Taparungkilhon ma sude Hata ni Debata patureturehon ngolunta. Sangkap ni Debata ingkon saut do, ai ndang marisuang, jala mulak tu Debata. Ala ni i naeng ma pangoloion di Hata ni Debata gabe ojahan ni ngolunta asa marhite i dipaimbaru roha nang pingkiranta, gabe jolma na imbaru ma hita disi songon topik ni Minggunta: “Dipaimbaru Hamubaon ni Pingkiran”. Amen.

Bahan Jamita Evangelium Minggu IX Dung Trinitatis, 17 Agustus 2014

Tigor Do Panguhum Ni Jahowa Tu Angka Bangso.

Psalmen 67: 2-8

     a.      Ia Psalmen ima buku na marisihon angka ende manang karya sastra. Hata Psalmen na marharoroan sian hata Heber ‘Tehillim’ marlapatan pujipujian manang sian hata Gorik ‘Psalmoi’ na marlapatan angka ende na diiringi dohot alat musik. Somal do di tradisi Hajahudion molo mamuji Debata mardonganhon iringan alat musik. Alat musik mangihuthon tradisi nasida memiliki peranan penting di ulaon parugamoon nasida. Mangihuthon pandapot ni pigapiga pande bisuk, buku Psalmen on digurithon songon dalan pamujion tu Debata marhite ende dohot tangiang sian par-Psalmen na manggombarhon panghilalaan nasida manang naniadopanna pe. Ndada holan ditingki las ni roha alai dohot do ditingki arsak na tinaon nasida asa tongtong mamuji Debata. Na gabe sungkunsungkun di hita : “Boasa mamuji Debata?” alusna ima ala panandaon na tangkas taringot tu habalgaon, hagogoon nang hasongkalon ni Debata dibagasan ngoluna. Ditanda Bangso Israel do Debata sian angka pambahenanNa di ngolunasida siganup ari. Di haradeon ni Debata mangula, mangaramoti dohot marmudumudu ngolu ni bangsoNa dohot ngolu ni saluhut na tinompaNa, laos huhut do i marlapatan haradeon ni Debata patandahon diriNa. Panandaon ni jolma di Debata holan ala haradeon ni Debata patandahon diriNa. Asa, panandaon i pe silehonlehon ni Debata do i na patubu roha mauliate.

Turpukta on ima ende pujipujian na somal diendehon di partangiangan bangso Israel, laho manghatindanghon asi ni roha ni Debata mamasumasu gogo ni tano nasida asa marhasil jala bagian ni ari raya pentakosta manang ari raya parlapelapean  ni bangso i.

     b.      Ayat 2-3; Asa Lam marbinoto tano on dalan ni Debata; Ia turpukta on dibuhai marhite hata pasupasu na pinasahat ni malim, na dikutip par-Psalm sian 4 Musa 6: 24-26, laos on ma tangiang pasupasu na pinasahat ni pandita di hurianta HKBP uju di parmingguon. Dihaporseai par-Psalmen on do ia pasupasu ni Debata ima sada huaso na dinamis na manggohi portibi on: Ido umbahen didok ditangiangna ‘sai asi ma rohaM’ (mengasihani) sian hata Heber ‘chanan’, lapatanna: mendukung, menguntungkan, atau mengenyangkan. Hata ‘chanan’ patuduhon jolma na so margogo, pogos ido asa ingkon didukung, ditogutogu, manang diasii Debata. Huhut dipasupasu Debata hita (memberkati, hata Heber ‘Barakh’; to bend the knee =membungkuk atau menyerahkan diri berlutut). Marsinondang do bohi ni Debata manondangi hita jolma (menyinari sian hata Heber ‘Owr’; menjadi terang, jelas, mudah dimengerti, gilang-gemilang, sangat menyenangkan). Marhite bohi ni Debata manondangi angka ruas-Na; marhite sinondangNa torop jolma tarrurupan manghorhon las ni roha. Ndang tarbatas sinondangNa i (Jes.60: 1-3); molo ro do Debata marhitehite sinondang-Na, angka jolma na dibagasan haholomon boi mamereng sinondangNa (Jes.2:5; ptds.Pslm.119:135). Asa marhite i nasida malua sian hamaolon nang hasusaan (Pslm.31:17; 44:4,8,20). Martudutudu sian  mula ni pasupasu ni Debata naung dipadanhon tu si Abraham dohot angka pinomparna  Israel manghorhon tu angka jolma na di portibi on (1 Musa 12:3; ptds.18:18; 22:18; 26:4; 28:14). Jala on ma sada misi na balga sian bangso Israel na gabe sitindangi habalgaon ni Debata tu sandok bangso na di portibi on (Jer.29:11).

     c.       Ayat 4-5; Asa ganup bangso mamuji Debata; hata ‘mamuji’ sian hata Heber ‘Jadah’: bersyukur, pasahat hamauliateon jala marendeende. Pandohan na somal tarbege di angka tangiang ni halak naung manghilalahon asi ni roha dohot  pangurupion ni Debata na sahat tu nasida. Mandok mauliate ima panindangion ni jolma di hagaleonna asa ro mangasahon hagogoon ni Debata d ngoluna (Pslm.89:6; 99:3; 138:4; 145:10; 107:8,15,21,31) nang angka bangso dohot raja na jinadihon dohot dipalua Debata diarahon asa mamuji Ibana. Angka nabinahen ni Debata patut ma dihamauliatehon dohot pujipujian, siala ‘tigor do panguhumNa’ (memerintah dengan adil), sian Hata Heber ‘syafat’ : mengatur dengan benar, menghukum dengan benar, memulihkan kesejahteraan dua orang, golongan yang berkonflik (terganggu) menjadi berdamai (memberi keadilan). Pasupasu ni Debata ndada holan asa taruli di sipanganon dohot siinumon sian gogo ni tano i, alai dohot do asa menak nasida songon bangso na marhombar balok dohot bangso na asing lapatanna dao sian parsalisian, Debata namanogunogu angka marga di tano on, napatuduhon huaso ni Debata na manompa langit dohot tano on ndada boi batasan holan tu bangso Israel alai ingkon sahat do tu angka bangso na di portibi on asa ganup bangso mamuji Debata.

     d.      Ayat 6-8; Asa sude gogo ni tano dijalo songon silehonlehon ni Debata na patut pujion ni bangso Israel  di angka ari raya nasida. Di pesta raya i, sude nasida marpungu sian angka luat asa mandok mauliate jala martangiang mangido asi ni rohaNa asa gabe manghorhon pasupasu naung jinalo nasida tu angka bangso na dihumaliangna. On ma na gabe ende pujipujian naung  dipasahat tu si Abraham, dipasupasu asa gabe pasupasu tu angka bangso na di portibi on. Pasupasu naung jinalo bangso na pinillit ni Debata ima bangso Israel,  naeng ma nian mabaor gabe panindangion tu saluhut bangso na di portibi on, songon ‘tano on  mangalehon gogona; sai pasupasuon ni Debata’= Na marlapatan sude jolma nang bangso do jongjong diatas tano na tinompa ni Debata, na so marpansohotan mangalehon parbue ni angka tanoman na tubu sian gogo  ni tano i tarpasupasu, naeng ma marhite i angka bangso na manghilalahon i sian Debata, songon na hinatindanghon bangso Israel. Ala ni i ringkot do bangso na diluar Israel mananda Debata, ai ringkot do dinasida asi ni roha ni Debata jala asa pasidohot angka bangso i manghatindanghon Debata dibagasan pujipujian (Ptds. Pangk.7:9). Ndada hea mansohot pasupasu dohot asi ni roha ni Debata tung mabaor do tu angka na mananda habalgaonNa.

     e.      Saluhut Bangso mamuji Debata. Sian mulana i ditompa Debata langit dohot tano on  ro di isina pe asa mamuji pasangap Debata. Marhite pengaturan ni angka na tinompaNa i na marhusor di angka partingkianna asa gabe dalan mamuji pasangap Debata. Alai di jolma natinompaNa i si Adam dohot si Hawa baliksa ndang olo ‘diatur’ Debata alai dilaosi do Hata ni Debata, ndang dioloi Hata ni Debata hape hata ni sibolis i do dipaolooloi umbahen na madabu tu bagasan dosa. Marhite bagabaga ni Debata taringot tu Mesias ima Jesus Kristus i laho manobus dosa ni jolma dohot portibi on laho patulushon missi ni Debata asa saluhut na tinompaNa i mulak mamuji pasangaphon Debata (ptds.Mat.28:19-20;  Pangk. 7: 9; Pil2:11). Laos ido tujuan dohot missi ni angka huria ni Tuhanta na di sandok portibi on asa lam tamba bilangan na porsea jala na mamuji pasangaphon Debata. Saluhutna i siala asi ni roha ni Debata sambing do tu hita jolma asa malua hita (Joh.3:16) jala manghorhon hasonangan di hita jolma (Ptds. Tangiang Ale Amanami: “....sai ro ma HarajaonMu”). Molo taulahon pe na uli na denggan na patuduhon ngolu na mamuji dohot mandok mauliate di haluaon naung dipasahat Debata ti hita marhitehite Jesus Kristus. Mauliate ma di Tuhanta na paloas hurianta HKBP berperan aktif mangurupi ruasna nang masyarakat pe di program Pengmas, CUM (koperasi) HKBP nang angka kegiatan diakonia sosial ni hurianta mangurupi masyarakat luas mananda holong ni Debata, naeng ma marhite i  tanda pujipujianta tu Debata. Na tarjou do huria i lam aktif gabe habaoran pasupasu na tau mangalehon pangurupion di angka ruas nang masyarakat na dihumaliang ni huria, ima;  na pogos, na so mardihadiha, na so mulaulaon, na marsahit, na dibagasan arsak nang sitaonon pe (Jer.29:7; Jer.61:1; Pil.2:3-4). Marhitehite pangurupionta i tau las ni roha nang pasupasu di nasida jala diboto nasida sian Debata doi asa manghorhon pujipujian ni rohana i tu Debata. 

      f. Hatigoran ni Debata manghorhon las ni roha. Dipasangkapi  Debata do asi ni rohaNa tu angka bangso na di portibi on marhite bangso Israel uju i, alai ndang direspon bangso Israel sahat tu haroro ni Jesus Kristus ditonga ni portibi on laos ditulak nasida do Jesus i sahat tu partingkian on (Rom 11: 1-2a+29-32). Alai nang pe songon i ndang mansohot asi ni roha ni Debata tu bangso Israel sai na mangerbang do tu angka bangso na di portibi on tarmasuk tu bangsonta Indonesia. Tahamauliatehon do haluaon marhite hatigoran napinasahat ni Debata tu negaranta Indonesia on, topet di Minggu IX Dung Trinitatis 17 Agustus 2014, ulang Tahun Kemerdekaan RI na-69 on. Ndada holan perjuangan ni rakyat Indonesia sambing asa malua hita sian penjajah jala merdeka, alai holan ala asi ni roha dohota hatigoran ni Debata sambing do i (Ingot : Bom Amerika tu Jepang Kota Hirosima dan Nagasaki). Naung jongjong do huria ni Tuhanta di tonga ni bangso dohot negaranta Indonesia on marhite angka parbarita nauli. Tontu songon halak na porsea hita adong do tugasta songon warga negara Indonesia  dohot  pajongjonghon hatigoran ni bangso dohot negaranta Indonesia na berfalsafah Pancasila dohot UUD 45. Nang pe sian sudut kwantitas tergolong minoritas jala gale do hita alai molo Debata na mandongani hita na margogo do hita berperan aktif mangalehon kontribusi laho pamajuhon bangso dohot negaranta (ptds.Josep di Mesir, Daniel di Babel). Tarlumobi berperan aktif do hita mendukung program pamarenta dohot negaranta menghempang pengaruh ISIS dohot angka teroris nang sangkap mamolamola hasadaon NKRI. Molo dipasupasu Debata bangso dohot Negaranta Indonesia on, na dohot do hita disi mandai pasupasuNa i jala tadok ma songon topik ni minggunta : ‘Tigor do Panguhum ni  Jahowa tu angka bangso’. Ndang holan kemerdekaan na tapangido jala na ringkot; naeng ma pangidoonta tu Debata asa mamaasumasu bangsonta jala asa marsinondang Debata tu bohi ni jolma ni bangsonta. Asa marsahala bangsonta Indonesia di kemerdekaan na -69-on, jala gabe bangso na berdaulat, tarpasupasu tano, laut, dohot sude pangisi ni bangso on. Asa gabe sada tiruan tu angka bangso na di portibi on. Tugasta ma mangarahon donganta sabangso manghilalahon denggan basa ni Debata tu negaranta (ptds. KJ.No.337. “Betapa Kita Tidak Bersyukur’). Amen.

Bahan Jamita Epistel Minggu IX Dung Trinitatis, 17 Agustus 2014

Tigor Do Panguhum ni Jahowa Tu Angka Bangso

Rom 11: 1-2a+29-32

     a.       Ditongos Apostel Paulus do suratna tu Huria Rom laho patandahon dirina tu huria i songon sahalak apostel ni Kristus tu tongatonga ni angka bangso ‘parbegu’ (na so Jahudi). Dibagasan surat i ditogutogu do angka halak Kristen na di huta Rom, asa lam mangantusi nasida di balga ni holong ni roha dohot lambas ni asi roha ni Debata tu saluhut jolma. Jala mardomu naung tubu do sungkunsungkun ditongatonga ni huria i taringot tu keberadaan ni halak Jahudi. Tarbege do angka hatahata na mandok naung ditulak Debata saluhut halak Jahudi; ala ni tangkang ni roha nasida na so manghaporseai Jesus Kristus. Alai didok si Paulus, tung na so tutu do anggapan na songon i. Ndang sude bangso ditulak Debata, ai torop do nang sian nasida na porsea di Jesus Kristus, tarmasuk ma apostel Paulus sandiri na marharoroan sian Jahudi, pinompar ni si Abraham, marga Benjamin.

    b.      Laho mendukung pamingkirion i, dienet si Paulus do manang piga barita taringot tu pangalaho ni halak Israel di Padan na Robi. Sada sian barita i, ima kesilapan ni panurirang Elia na hea mangaluhon saluhut halak Israel tu Jahowa, mandok naung saluhut halak Israel manadinghon Debata Jahowa gabe marsomba tu debata Baal. Didok ibana nunga ditadingkon halak Israel parjanjian nasida tu Jahowa, nunga dilohai angka langgatan pamelean jala nunga dibunu nasida angka panurirang marhite sian angka podang, holan sasada ibana nama tading: ipe sai terancam do ngoluna, ai dohot do hosana dilului nasida naeng buatonna ( 1 Raja 19: 10,14). Alai asing do alus ni Debata Jahowa tu alualu ni si Elia i. Didok Debata do tu si Elia, na tinggal dope dibahen Jahowa di tongatonga ni halak Israel pitu ribu halak nari na so mangalompit ulu ni totna marsomba tu debata Baal dohot na so dung mangumma ibana ( 1 Raja 19: 18). Bilangan pitu ribu halak dison, ndang dilapathon secara hurufiah, alai patuduhon na godang dope sian nasida na masihohot mangoloi Debata Jahowa sambing. Dipatuduhon i do manang beha pe jorbut ni pangalaho ni bangso i maradophon Debata Jahowa, sai adong do dapot ‘pasipasi’ di nasida na polin haporseaonna holan tu Debata Jahowa. Di tingki ni angka panurirang pe, sai adong do angka ‘pasipasi’ na malua sian uhum ni Debata Jahowa. Jala songon i do nang sahat ro di haroro ni Jesus Kristus. Ditulak bangso i do Jesus, jala ala ni pangulahon nasida i, gabe tolhas ma Barita na uli tu angka bangso parbegu. Alai ndang sude nasida manulak Jesus. Adong do ‘pasipasi’ na porsea di Jesus, jala na tarjou gabe parbarita na uli. Ala ni i, ndang mungkin bolonghonon ni Debata sude halak Israel manang halak Jahudi songon sada bangso.

    c.       Nanaeng dohonon ni si Paulus dis, ndang boi ‘parbangsoon’ gabe ojahan ni uhuman manang haluaon. Ndang adong bangso manang huria na di uhum manang dipalua secara masssal. Ndang boi status ni halak Israel songon ‘bangso na pinillit’ ni Debata, gabe dasar haluaon ni bangso i. Ala ni i, ndang otomatis halak Israel dapotan haluaon ala targoar nasida bangso ni Debata. Nang pe dilehon di nasida patik ( Taurat), alai marguru tu roharohana do nasida laho mangulahon i. Jala nang pe disuru Debata angka panurirang laho paingothon nasida, alai ndang ditangihon nasida soara ni angka panurirang, ala ni tangkang ni rohanasida. Marhite na mengutip Jesaya 29: 10, didok si Paulus do : “Ro di sadarion do dilehon Debata tu nasida tondi na derem dohot mata na so jadi marnida ro di pinggol na so jadi marbinege”. Lapatanna: tarpodom do nasida gabe so parduli di angka na humaliangna. Mapitung do nasida jala nengel gabe so ungkap rohana mamereng na binahen ni Debata dohot manangihon soara ni Debata. Nang pe marmata marpinggol do nasida, alai ndang dipargunahon nasida mata dohot pinggolna i dohot denggan. Domu tusi laos di enet si Paulus dope sian Psalmen 69: 22,23, na mandok: “Sai gabe jorgong jala jaring ma meja nasdia, bahen pargasipan jala bahen pamaloson di nasida”. Marhite pandohan on, dipatudos do nasida tu halak na marpesta, na lalap jala marsonangsonang dibahen angka tabo na rade di jolonasida, jala dietong nasida ndang adong na boi mangganggu nasida. Alai, rasa aman nasida i do na gabe jorgong di nasida. Ai di na so panagaman nasida nunga dihaliangi musu nasida. Marojahan di tudosan i ma umbahen didok si Paulus halak Jahudi i, na sai marondingonding tu status nasida songon bangso na pinillit ni Debata; hape status nasida ndang tarbahen mangondihon jala paluahon nasida sian angka musu na manghaliangi nasida.Baliksa tahe, gabe jorgong manang jerat do i tu nasida sandiri.

     d.      Siala naung ditulak Israel do barita na uli i, gabe musu do nasida; alai ala naung marpadan Debata tu angka ompunasida hian, hot do holong ni Debata tu bangso i. Ai ndang unsaton ni Debata padan naung binahenNa tu bangso Israel, jala ndang na manolsoli Debata di pamilliton dohot silehonlehon naung pinasahatNa tu bangso i. Najolo sipelebegu hian do bangso Rom, alai gabe dapotan asi ni roha nasida hinorhon ni na so dijangkon Israel Sipalua i. Suang songon i ma haduan na masa tu bangso Israel. Ndang pangoloi nasida saonnari, alai gabe  taruli asi ni roha do nasida musengani, hinorhon ni asi ni roha na tu bangso Rom (bangso sileban). Ala ni tong do adong panghirimon tu bangso Israel. Tung pe saonnari jumolo bangso Rom taruli asi ni roha, unang pola dihaginjanghon nasida keadaan i (hasurungan i; ptds. Ay.25). Dipasombu Debata roha na so mangoloi mangarajai jolma i, asa asianNa muse saluhutna. Berarti adong unsur ‘kesengajaan’ sian Debata (ptds. Ay.26), on ma hasimoon i. Tarpatupa Debata do marragam cara, hombar tu huaso dohot lomo ni rohaNa, laho paluahon jolma i, jala jotjot do ndang tardodo roha ni jolma huaso ni Debata.

    e.      Songon i do muse nang halak Kristen, Ala ndang dijangkon Israel Sipalua i, gabe bangso na asing, tarmasuk hita Negara Indonesia taruli di haluaon na pinatupa ni Tuhanta marhitehite Jesus Kristus. Naung gabe ‘Israel na imbaru’ hita na porsea di JesusKristus  i. Jala ndang kolektif, manang kelompok huria bertanggung jawab tu Tuhan i, alai ganup pribadi do bertanggung jawab tu Debata! Ndang dijou Debata secara massal tu haluaon i. Ala ni ndang tarbahen dapotan haluaon i tu marsasahalak, ala naung hibul rohana be secara pribadi laho mamelehon diri tu Debata. Manang songon pandohan na pinangke ni si Paulus, ala na porsea ibana di Jesus Kristus. Haporseaon i do dalan laho manjalo haluaon sian Debata.

f.        Patut do hita marlas ni roha mamujimuji Debata jala mandok mauliate, ai nunga taruli hita di Barita Na Uli asa gabe pasidohot hita angka ‘bangso ni Debata’ hinorhon ni angka parbarita na uli na ro tu bangso Batak, nang tu Indonesia on. Molo tung pe gabe sumurung hita saonnari sian bangso Israel, manjalo asi ni roha ni Debata, ndada pola sihaginjanghononhon i. Alai justru tarjou do hita, songon apostel Paulus na tarjou, mamaritahon barita na uli tu nasida na so manjanghon Sipalua i do pe. Ala ni i angka na porsea na mamuji Debata dipatuduhon ma i marhitehite pambahenan manang ulaon na denggan. Molo taulahon pe na denggan ndada “Asa” manjalo manang mandapot upa hita disi, alai tau;lahon pe na denggan “Ala” naung tajalo do asi ni roha ni Debata marhitehite Jesus Kristus na paluahon hita sian gomgoman ni sibolis, dosa nang hamatean gabe panean hita di HarajaonNa i na saleleng ni lelengna. Tahamauliatehon do tu Debata naung 69 taon kemerdekaan Republik Indonesia on topet di Ari Minggu on 17 Agustus 2014. Naung godang binolus ni negaranta nang bangsonta arsak nang las ni roha pe, sian perjuangan ni angka pahlawan laho mandopang angka musu nang penjajah sahat tu era kemajuan Demokrasi ni bangsonta, tung so hasuhatan do denggan basa ni Debata mangaramoti dohot na marmudumudu bangsonta. Ala ni i naung tarjou do hita angka na porsea mamuji Debata marhite napasidohot do hita songon warga negara na burju manghajongjonghon kedaulatan ni bangso dohot negaranta Indonesia. Nang pe hita tergolong minoritas molo olo hita dipangke Debata gabe na berkwalitas maang unggulan ditonga ni negaranta. Tapatuduhon ma karya keselamatan ni Debata tu negaranta marhite ide kreatif ni hita laho pamajuhon bangso dohot negaranta, asa saurdot songon topik di minggunta on mandok : “Tigor do Panguhum ni Jahowa tu Angka Bangso”. Amen.

Bahan Jamita Evangelium Minggu VIII Dung Trinitatis, 10 Agustus 2014

Pos Ma Rohamuna Unang Hamu Mabiar

Mateus 14 : 22-33

a.       Sude do ra hita satuju molo ndang adong sian hita jolma na so hea dibagasan biar ni roha. Biar ni roha on marragam do; adong do mabiar tu binatang na manggulmit, mabiar manangkohi kapal terbang,  kapal laut ala trauma. Adong mabiar tu panangko, tu pareman, mabiar ala ni pengalaman kecelakaan berkendara motor nang mobil, jala  tarlumobi mabiar agoan hosa manang tu hamatean, dna. Marhite angka pengalaman i, lam tamba ma panghilalaan ni jolma laho paturehon ngoluna. Laos songon i do na masa tu angka sisean ni Jesus di evangelium Mateus dipaboa pola dua hali angka sisean i manghilalahon biar ni roha siala galumbang nang habahaba na naeng mangharomhom solu nasida. Naparjolo boi jahaonta di Mateus 8: 23-37, jala na napaduahon di Mateus 14: 22-33 ima turpuk di minggunta on. Molo sian pengalaman  na parjolo solu ni angka siseani naeng diharomhon alogo dohot galumbang na gogo i raphon dohot Jesus do nasida disi. Ditingki ndang tartaonnasida be namasa i asa disungguli nasida Jesus, jala di pa so Jesus do alogo dohot galumbang na gogo i gabe menak ma. Molo di pengalaman napaduahon, solu ni angka sisean i disosak galumbang dohot alogo na doras, jala ndang raphon Jesus nasida ditingki i, ala martangiang dope Jesus disada dolok . Disuru Jesus do asa lao angka siseanNa i tu bariba ni tao i. Dinadua na masa on, namabiar do sikap ni angka sisean i jala mandele siala ndang raphon nasida Jesus i. Ditingki i siseani manghilalahon sahalak nasida manaon habahaba i, jala dihilala rohanasida ndang adong na boi mangurupi dohot paluahon nasida sian mara na naeng manghalononghon nasida i.

b.      Molo tajaha di ayat 24 di hata Indonesia, dipaboa do solu ni angka sisean i nunga pola piga mil doa sian topi ni tao i. Alai molo sian teks aslina ndang marhite ukuran mil, alai didok do sabidang ni ‘stadion’ (ukuran lapangan bola). Molo ukuran sada stadion hirahira 185 m, hape molo tao Galilea ukuranna 12 km, jadi sian i tangka nunga pola ditonga ni tao i nasida ditingki ro galumbang nang angin na gogo i. Jadi mansai maol do nasida mulak tu topi tao i mangido pangurupion tu Tuhan Jesus. Disi ma ro biar ni roha nasida, bobonosan ma rohana, godoran, mandate jala mandele, alai tompu ma ro sada tondi na mandonohi nassida na mardalan di atas aek. Molo dipemahaman ni halak Israel, ia laut nang angka aek na bidang dietong do i songon inganan ni angka tondi na jat. Di laut pe maringan do disi sibolis na marrupahon sada mahkluk na jotjot didok di hata Indonesia ‘Lewiatan’. Didok do mansai gogo mahkluk i, soada na boi manaluhon ia so Debata sandiri (Psalm. 74: 13-14). Ido umbahen adong haporseaon na ditiop ditingki haroro ni Tuhan na ro ma huaso ni portibi on sian laut. Gombaran eskatologis i taringot tu mahluk i boi jahaonta sian Pangungkapon 13: 1 “Dung i huida ma ruar sian laut i sada binatang: Sampulu do tandukna, pitu uluna; diatas ni angka tandukna adong ma sampulu tumpal, jadi angka goar panginsahion do di angka uluna i”. Haporseaon sisongon on boi do jumpang hita nang di angka luat na di portibi on sada na jotjot tabege legenda ni angka halak Jawa  na porsea ia Laut Pantai Selatan di Pulo Jawa ima inganan ni “Nyi Roro Kidul”.  Sahat tu partingkian sisaonnari on adong na mabiar asa umbahen ndang barani mamangke pahean na ratarata uju laho nasida berwisata tu humaliang ni Pantai Laut Selatan ni Pulo Jawa i. Nunga somal na deba laho mamele laho pasonangkong roha ni ‘Nyi Roro Kidul i’ di partingkian na marboho ni kalender ni halak Jawa. Jadi dos do pamingkirion nang haporseaon taringot tu laut nang aek na bidang songon inganan angka na jat na boi manggugai jolma nang pamatehon jolma i marhitehite galumbang na doras. Sian pamingkirion nang haporseaon sisongon i ma na so pola sungkunsungkun hita boasa mabiar angka sisean i uju ro disi Jesus mardalan di atas aek na mandonohi nasida na dibagasan mara, jala dirimpu nasida tondi (hata Indonesia: Hantu).

c.       Dihaporseai huria na parjolo do ndada holan sada halongangan sada peristiwa na nyata na mardalan Jesus di atas aek. Mol dihaporseai do ia aek na bidang manang laut songon inganan ni angka na jat; asa na masa Tuhan Jesus mardalan di atas aek gabe sada pemahaman ia Jesus na boi patundukhon huaso haholomon ditoruni pat-Na. Haporseaon sisongon i gabe patiurhon haporseaon ni huria i, asa ia Jesus ndada holan ‘Anak ni Jolma’ songon nasida, alai Ibana ma ‘Hataridaan ni Hajongjongan ni Debata’. Mansai menarik do dison cara ni Tuhan Jesus laho pamenakhon rohanasida uju dibagasan biar laho mangadopi galumbang na manosak nasida dohot na mabiar mamereng Jesus na dirimpu tondi (bhs. Indonesia: Hantu), didok Jesus do: “Pos ma rohamuna, Ahu do! Unang hamu mabiar” (ay.27). Sian pandohan on Jesus ndang holan mandok ‘unang hamu mabiar’ alai dibuhai do pandohanna ‘Ahu do’ (Hata Gorik: ‘Egoo Eimi’), pandohan sisongon on jotjot do dipangke Jesus laho paboahon taringot diriNa isarana: “AHU do roti hangoluan i”(Joh.6: 35; 48: 51), “Ahu do Panondang ni portibi on” (Joh.8: 12; 9: 5), “Ahu do pintu na tu birubiru i” (Joh.10: 7,9), “Parmahan na denggan do anggo Ahu” (Joh.10: 11, 14), “Ahu do dalan i dohot hasintongan dohot hangoluan” (Joh.14: 6), dna. Sude na i bermakna ‘Egoo Eimi’ na martudutudu tu hadirion ni Debata, jala eksistensi ni Jesus sada manifestasi sian Debata sandiri songon pandohan ni Debata taringot tu DiriNa: “Ahu nuaeng Ahu sogot” (2 Musa 3: 14) tu si Musa, laos songon i ma Tuhan Jesus paboahon diriNa songon Debata na olo jongjong jala mian ditongatonga ni ruasNa. Dibagasan Kristus, naung ro do disi Debat dibagasan sejarah ni hangoluan laho manjumpangi dohot mangurupi angka sisean na dibagasaan parmaraan. Sude huaso ni portibi on, hukum gravitasi nang haholomon i ndang marhuaso mangalo nang palononghon Jesus ditingki mardalan Ibana diatas ni aek i. Ido umbahen di tingki Tuhan Jesus mandok: “Ahu do, unang hamu mabiar”, naung dipatogu do haporseaon ni angka sisean i naung ditongatonga nasida do jongjong Debata na marhuaso mangatasi angka jadijadianNa. Na gabe sungkunsungkun; toho do angka sisean i na porsea ditongatonga ni Debata? Tasulingkiti ma jolo sada sian sahalak sisean ni Jesus na margoar si Petrus na mandok tu Jesus: “Ale Tuhan, anggo Ho do hape, dokkon ahu ro mandapothon Ho, mardalan sian aek i” (ay.28). Porsea do nian na ditongatonga nasida jongjong Debata asa dipangido nasida boi mandonohi Jesus mardalan diatas aek i. Alai disi si Petrus naeng mandonokhon tu Tuhan Jesus, ndang fokus rohana nang pingkiranna tu Jesus, sai holan tu gogo ni pangollus ni alogo i do rohana nang pingkiranna asa gabe ro ma biar ni roha laos naeng lonong ibana.

d.      Hita na porsea dibagasan Jesus Krsitus; pangalaho si Petrus on do na jotjot gabe gombaran sikap na masa dipardalanan ni ngolunta di portibi on nang huriaNa i pe. Porsea do nian hita ia Jesus Kristus do hajongjongan ni Debata di pardalanan ni ngolunta, jala porsea do hita Ibana do Sipalua portibi on. Ido asa uju ro habahaba nang galumbang hamaolon diportibi on, laos disi ma hita ro tu adopanNa. Pasahahon ngolu tu adopanNa mulana i boi do hita mandalani i jala margogo mangadopi angka hamolon na masa di ngolunta. Alai ditonga pardalanan ni ngolunta i boi do mata ni rohanta mulai terpengaruh, ala dihutur angka soara soara na ro tu sipareonta ima kritikan, teguran, hasurahan dohot pangalaho na so denggan sian jolma na dihumaliangta. Hinorhon ni i lam leleng ndang tu Kristus be fokus roha nang pingkiranta, alai gabe fokus tu situasi na masa i. Gabe pintor reaktif ma hita laho mang-kounter sude na maol dihumaliangta marhite pingkiran nang pangkilalaanta na mangganggu i. Disituasi sisongon i ma na gabe lam dao parsaoranta dohot Kristus i asa gabe lam lonong ma hita di gomgoman huaso ni portibi on. Gabe tubu ma sikap na reaktif, emosional jala ndang mampu be hita mangarajai roha nang pingkiranta, jalalam martamba ma parsalisian dohot angka jolma na dihumaliangta. Angka na uli na denggan naung tajalo i gabe muba do sude tabahen; naung burju hian donganta gabe muba do mamusui hita ala naung mandao hita sian haporseaon nang habisuhon na sian Kristus i. Molo so pintor ro hita mangadop Tuhan Jesus i, boi do hita lam dilononghon biar nang hamaolon i. Ditingki lonong si Petrus, pintor ibana do Jesus: “Tuhan, palua ahu” (ay.30), pintor disurdukhon Jesus ma tanganna manangkup ibana.

e.      Ditingki mangadopi hamaolon hita sasintongna songon na jongjong diparsimpangan dalan do hita disi. Adong dua kemungkinan na boi masa ima; pasombu rohanta digomgomi huaso ni parjahat, jotjot hita pasombu diri disituasi hamaolon i hape ndang tasadari hajongjongan ni Tuhan i na sai rade laho mangurupi hita. Ai jonok do Tuhan i ditongatonganta disi uju ro angka hamaolon nang angka habahaba dibagasan ngolunta jala Tuhan i do na berinisiatif manjonohi “solu ni ngolunta” songon Jesus na ro manjonohi parau ni angka sisean i, ima ditingki taadopi sandiri hamaolon nang parmaraan na mansai maol i. Didok Apostel Paulus do di Ron 10: 8 “On do tahe didok: "Talpe do di ho hata i, di bagasan pamanganmu dohot di bagasan roham do!" I do hata haporseaon i na hubaritahon hami.”Ai didok do disi ‘talpe do di ho hata i’, dilapati do ‘hata’ i dohot istilah ‘rema’, hape somal do di hata Gorik didok ‘Logos’ (isarana di 1 Joh.1:1; Pangk.19: 13). Lapatan ni ‘rema’ ima hata na nihatahon ( a spoken word) manang ummampit lapatan ni ‘rema’: “ekspresi konkret dari logos” (the concrete expression of logos). Lapatanna Hata hangoluan i, ima Tuhan Jesus, na gabe daging ma Hata i (Logos) songon na tarsurat di Johannes 1: 14 “Gabe daging ma Hata i jala maringan di tongatonga ni hita on, jadi huida hami ma hasangaponna, i ma hasangapon ni Anak sasada na sian Ama i, gok asi ni roha dohot hasintongan.” Lapatanna hata hangoluan i, ima Tuhan Jesus, Ibana do ‘Logos’ na gabe jolma. Alai ihut ni i ‘logos’ na gabe jolma i  ima ‘rema’ ima hata ni Kristus naung dipatuduhon, mampanghorhon dohot manggomgomi di hangoluan ni jolma siganup ari. Sada contoh Hata ni Kristus na gabe ‘rema’ ima sian Rom 10: 9  “Ai malua ma ho, molo diparhatopot pamanganmi Tuhan Jesus i, huhut dihaporseai roham, naung dipahehe Debata Ibana sian angka na mate.” Molo naung mangolu ‘rema’ dihangoluan ni jolma, gabe patubuhon sada panindangion haporseaon manang credo taringot tu haluaon na sian Kristus i. Ido umbahen uju ro hamaolon, parmaraan nang pangunjunan disi ma tubu sian bagasan rohanta panjouon di panindangion ni haporseaon tu Tuhan Jesus Kristus asa malua ibana. Sadalan songon na tarsurat di Rom 10: 13 Ai "malua do ganup na manjou Goar ni Tuhan i!". Ido umbahen ditaringoti jamita di minggu na salpu ringkot ni na manangihon Hata ni Debata na mangalehon sada dalan na imbaru ima padan hangoluan na saleleng ni leleng dibagasan Jesus Kristus ima Anak ni si David i (Jes.55:1-5).

Dihita na hinaholongan, sian hatorangan on boi antusanta panjouon ni si Petrus: “Tuhan palua ahu”, ndada tudos i na tubu sian hasomalan ni halak nuaeng on na langgus hatana; disi ro songgotsonggot tu ngoluna, pintor didok : OMG – “O My God”. Alai panjouon ni si Petrus di tingki lonong ibana ndada na langgus hatana, na botulbotul tubu sian panindangion ni haporseaonna do tu Jesus ima na haruar sian ‘rema’; ekspresi Hata ni Debata naung jongjong diadopanna. Panjouon na tubu sian ‘rema’ disi ma jongjong Kristus manogunogu hita. Molo naung mian Hata ni Tuhan dibagasan ngolunta, naeng ma torus fokus haporseaonta tartuju tu Ibana. Lapatanna ndang boi be hita tarunjun manang terpengaruh tu angka na paliluhon haporseaonta di portibi on. Uju terpengaruh hita jala lam leleng lam lonong dipambahenan ni huaso portibi on, disi ma nunga lam moru haporseaonta manang krisis iman. Ido umbahen asa didok Jesus tu si Petrus: “E ho, siotik haporseaon; aha ma pola ganggu roham?” (ay.31). Uju ganggu rohanta na holan mamingkirhon hamaolon na masa di portibi on, disi ma ‘rema’ (Kristus na dibagasan rohanta) ndang berfungsi, alai sabalikna molo tongtong do hita fokus, tigor manatap tu jolo ima Kristus Jesus Sipalua hita, disi ma hita dipargogoi mardalan di na so sidalanan ( na so mungkin di pingkiran ni jolma) ima diatas aek, diatas ni huaso haholomon. Ringkot ma di hita mata haporseaon na terarah fokusna songon ‘sinar laser’ na mansai tajom boi manombus baja ala sian jutaan energi atom na pungu tu sada titik. Asing ma molo jutaan atom i ndang marsada manang marserahan ndang dapotna energi na tajom jala gogo. Laos songon i do dohot sikap ni haporseaonta tu Tuhan Jesus Kristus, molo hagogoon ni haporseaon i ndang fokus, boi do haporseaon i ndang manghorhon daya, kemampuan manang ndang margogo, ido umbahen do boi mangadopi ragam ni parsualon songon na tarsurat di 1 Johannes 5 : 4 “Ai nasa na tubu sian Debata do manaluhon portibi on. Haporseaonta i do naung monang manaluhon portibi on.” Gogo ni haporseaonta i ma ‘rema’ ima Hata ni Debata na ingkon tarida torus fokus jala lam bagas laho paubahon sude aspek ni ngolunta. Sadalan songon na tarsurat di Psalmen 105 : 4 “Sisiri hamu ma Jahowa dohot hagogoonna i, tongtong ma lulu i hamu bohina.” Lapatanna sai torus mangalului fokus diganup tingki nang siganup ari Tuhan i dipardalanan ni ngolunta. Molo lam marhuaso ‘rema’ sian Kristus, asa lam fokus ma haporseaonta jala lam tajom boi manombus haholomon dibagasan nang diduru ni dirinta. Ala ni i disi ro angka biar ala ni hamaolon nang parmaraan dipardalanan ni ngolunta ingkon pos do rohanta di hagogoon ni Tuhan i, naung ditaluhon Tuhan Jesus do huaso ni dosa nang hamatean dohot Sibolis i, marhitehite hamamate dohot hahehehonNa sian na mate (Pslm.23:4a; Jes.43:2b; 1 Kor.10:13). Songon topik di Minggunta “Pos Ma Rohamuna Unang Hamu Mabiar” laos sadalan na tarsurat di Johannes 16: 33b “Haporsuhon do jambarmuna di portibi on; alai pos ma rohamuna: Nunga talu hubahen portibi on. Jesaya 43: 5a “Unang ho mabiar ai donganmu do ahu” (5 Musa 20: 4; Pil 4:13; Rom.8: 31b) Amen