Bahan Jamita Evangelium Minggu II Dung Trinitatis, 29 Juni 2014

Unang Ma Dosa I Mangarajai Ngolunta

Rom 6: 12 – 23 

     a.       Di taon 58 M, ima pardalanan ni Apostel Paulus na patoluhon manadinghon Kota Athena laho tu Korintus, asaa disi ibana didapothon si Silas dohot Timoteus na sinuruna tu Tessalonik manopot huria ni Tuhanta na imbaru pinaojaknaasida i. (Ul.AP.17:10-22). Di Korintus pajumpang ma ibana dohot si Akwila dohot si Priskila na dohot hona usir sian Roma taon 50 M pinarentahon Kesar Klaudiusala halak Jahudi do nasida, mangaranto sian luat Pontus (jonok laut Sibirong) tu Roma (Ul.Ap.18:2; Rom 16:3). Ala sahapandean do si Paulus dohot si Akwila – Priskila jala rap halak Jahudi, sahaporseaon (Kristen), hira ganup ari do nasida rap di jabu ni si Akwila – Priskila martonun kulit dohot tarpaal bahen undung undung. Tangkas ma diboto si Paulus na masa ditongatonga ni huria Roma poda haorseaon, patik dohot aturan na binahen ni halak Jahudi (ptds. Rom.6:17-18; Joh.8:36; Ul.Ap.18:1-4; Rom.14:1-23; 15:3-25; 16:22)

   b.      Nasa jolma naung tardidi tu bagasan Goar ni Jesus Kristus ima naung rap tartanom tu bagasan hamamateNa marhite pandidion i; asa sahaheheon rap dohot Ibana tu bagasan NgoluNa, ima ngolu na imbaru; sahangoluan, sapangkilalaan dohot sahadirion dohot Jesus Kristus dibagasan Tondi Parbadia mangulahon lomo ni roha ni Debata. I ma nglolu ni halak na orsea na tongtong marguru tu lomo ni roha ni Debata na pahehehon Jesus Kristus sian na mate tu Hasangapon dohot hamuliaon na hot ro di saleleng ni lelengna. Asa dang dirajai dosa i be ngolu ni ganup jolma Kristen, alai dirajai Tondi ni Debata Jahowa do, na mamboan hita tu parsaoran na badia jala marhadaulaton situtu di bagasan dame dohot las ni roha nirahutan ni holong na sian Debata.

    c.   Sada pamingkirion na mansai maol niantusan angka halak Kristen ima guna ni patik dungkon jaloonna haluaon marhite asi ni roha. Molo porsea do ibana dipanobusion ni Jesus, boasa ringkot dope patik i ? Boi do sungkun sungkun on mangulahi pandohan: Ia patik ndada hea i laho paradehon haluaon, alai lapatan ni patik i tu angka jolma pardosa ima laho patuduhon dosa i. Jadi, silang mansoadahon ringkot ni mangihuthon patii ni Debata. Alai asi ni roha dohot patik i ndang maralo nasada tu nasada, alai sabalikna mansai masirainrainan do na duansa. Ndada boi malua hita hinorhon ni Patik, ido asa ringkot do di hita asi ni roha. Na dialo asi ni roha ndada patik i alai hamatean i do. Parsualonta ndada patik i, alai hamatean hinorhon ni pangalaosionta di patik ni Debata.

    d.      Apostel Paulus paingothon angka halak Kristen asa manat laho mampargunahon angka asi ni roha ni Debata naung dipadanhon i asa gabe alasan laho mangulahon dosa (Rom.6:12, 15). Ala dosa diungkap patik i, ido asa ditingki Apostel Paulus mandok unang mangulahon dosa halak Kristen i sasintongna asa nasida: mameop patik i, huhut gabe sipangoloi di patik i. Dipatuduhon patik i do dosa tu hita, jala mambahen hita manghilalahon ringkot ni Kristus huhut marlojong tu Ibana mangido hasesaan ni dosa dohot dame. Dipatuduhon ma ngolu na marhamubaon ni roha tu Debata jala haporseaon di Tuhan Jesus Kristus. Ala ni  i, molo patik i, unang ma berengonta holan marisihon oraora, alai sian sisi asi ni roha. Oraorana i ima gabe jaminan na pasti di las ni roha na marunduk dohot na marserep ni roha huhut marpangoloion. Dungkon tajalo i dibagasan Kristus, patik mangula dibagasan rohanta laho pabadiahon pangalaho na mamboan las ni roha dihita tu hatongtongon.

      e.      Di angka na unduk tu patik i, dibahen ibana do patik i gabe parik partahanan. Dibagasanna tarida ma sian haburjuon ni Debata marhite pangungkapon ni hasintongan tu manisia, na sai mangalinggomi hita sian hajahaton na ro sian pangalaosion i. Ido asa ngolu na marhabengeton ndada holan pilihan alai na ingkon adong di angka na mangoku siihuthon Kristus. Godang do jolma na terpengaruh asa singkop marhite na mangulahon patik asa panean di Harajaon ni Debata. Di dogma nasida sai ditengahon haboion nasida patupahon i gabe hinsu ni haluaonna, hape lupa do nasida di hagaleon dohot keterbatasan ni manisia i naung madabu tubagasan dosa. Ngolu manisia nunga dihuaso hagiot tu dosa naung di warishon torus sian si Adam-Hawa tu hita jolma, jala sai diganggu angka pangunjunan. Ala ni i angka siihuthon Kristus naeng ma mamparsilanghon hadirion na buruk ( na so dipaimbaru dope) na dibagasan dosa. Hadirion na buruk on ma na dipamate jala dipasohot tu tusilang ni Kristus i. Songon na pinodahon Apostel Paulus tu halak Galatia di Galatia 2 : 20 “Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite, haporseaon di Anak ni Debata, na mangkaholongi ahu jala na mangalehon dirina humongkop ahu”. Nunga Kristus be na mian dibagasan ngolu ni angka na porsea. Tundalhononna ma dosa i jala sai dipukpuhi ma habadiaon dibagasan ngoluna. Ala dosa i, ndang boi so ingkon mate pamatang na olo buruk on. Alai ndang pola beha i, ai so pamatang na olo buruk on be pangkeonta tu banuaginjang, pamatang banuaginjang nama manang badan partondi (1 Korint.15:44,46).

     f.   Di topik Minggu II Dung Trinitatis on mandok : “Unang Ma Dosa i Mangarajai Ngolunta”;Ala ni i halak na porsea i ndang olo be ibana lalapan ni angka na masa di portibi on, nang pe diportibi on dope angka halak na porsea i. Alai na tongtong mamarangehon hata ni Debata dohot Kristus dibagasan Tondi Parbadia di ganup tingki; dilului rohana do angka na ro sogot i, i ma parsaoran ni jolma na badia raphon Jesus Kristus dibagasan Debata di Harajaon Banuaginjang di Jerusalem na Imbaru i. Ala ni i sai unang ma dosa i mangarajai ngolunta alai Kristus ma na gabe Raja di ngolunta. (ptds. Heb.13:14; Rom.3:24;Pslm.32:1-2; 2 Kor.6:18) sadalan dohot na didok di 1 Johannes 2 : 1 – 3 “Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i. Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on. Sian on do taboto, naung tatanda Ibana: Molo taradoti angka patikna.” Amen.

Bahan Jamita Epistel Minggu II Dung Trinitatis, 29 Juni 2014

Unang Ma Dosa Mangarajai Ngolunta

Jeremia 28 : 5 – 9

      a.       Ia bindu 28 on, ndada boi sirangonta sian barita na tarsurat di bindu 27 dohot bindu 29. Na tolu bindu on marsirainrainan do, sian impola sahat tu angka na masa dibagasanna. Na masa di tolu bindu on di taon 594 manaringoti angka panurirang pargapgap (nabi palsu).Mansai torop do martubuan angka panurirang pargapgap jala tumangian do bangso Israel-Juda tu hata nasida asa sian si Jeremia. Angka panurirang pargapgap paboahon na so ringkot unduk tu raja Babel, jala asa barani mangalo manang mamberontak. Nang pe gabe gagal do pemberontakan i ala ndang ditangihon nasida Hata ni Debata na pinasahat ni si Jeremia. Sasintongna na ringkot di bangso i ima hamubaon ni roha tu Debata jala mangoloi HataNa.

     b.      Di taon 594 SM do dipabangkit Raja Sedekia laho manggomgomi harajaon Juda, ndang tolap ibana ditaon naparjolo panggomgomionna laho padengganhon angka parsualon ditonga bangsona, tarlumobi dungkon talu sian Babilonia di taon 597, ima taon na parjolo tarbuang bangso Juda tu Babel. Jala na lam mambahen sega ima angka bangso na di tungkan hasundutan na merasa boi nasida mampargunahon situasi hagaleon ni Harajaon Sedekia asa merdeka. Ala ni i dipalumba Panurirang Jeremia do bangso Juda asa mamparrohahon:

Ø  Debata ima Raja, na so hatudosan na manggomgomi langit dohot tano on jala na marhuaso disandok bangso (Jer.27:5). Asa angka debata sileban ndang marhuaso di portibi on, pandohan on laho mangalo pangalapation na sala di bangso Juda taringot Debata naung talu binahen angka debata sileban, ala ndang marhuaso laho paluahon nasida sian habuangan Babel. Didok si Jeremia ndada na so marhuaso Debata paluahon nasida alai naung gabe sangkap ni Debata do habuangan ni bangso i.

Ø  Nunga dijalo raja Nebukadnesar huaso sian Debata laho manggomgomi Juda (Jer.27:6; 28:14). Disosoi panurirang Jeremia do asa marhamubaon bangso Juda jala mansohot mangulahon harorangon. Nang pe so marbinoto si Nebukadnesar nunga “dipangke” Debata ibana gabe ulaulaNa. Ido asa diondolhon unduk mangoloi Debata ima na marhite unduk tu auga ni Nebukadnesar, jala asa unang mamberontak dohot mangasahon gogo nasida.

Ø  Nang pe songon i, diondolhon si Jeremia do mandok ia hagogoon ni Babel marujung do i ditingkina. Alai huaso ni Debata ndang marhaujungan jala so hadodoan. Ingkon ro ma tingkina Juda gabe mulak tu hademakon, alai ihut ma hamubaon ni bangso Juda jala mangoloi Hata ni Debata.

      c.       Dihatorangan epistel di Minggu naung salpu, nunga dipatorang taringot tu Panurirang Jeremia, ima sahalak Panurirang naung ditodo Debata laho paboahon uhum nanaeng masa tu Bangso Juda. Panurirang Jeremia mangula do songon panongai bango Israel – Juda dohot Debata. Na deba adong do na mangula songon si Jeremia alai ndang diulahon dohot sintong jala jotjotan do holan na palemeslemes hatana asa na umbiaran do ibana diangka panggomgomi asa sian Debata, ndang sintong jala tigor be hatana tu bangso i, ima na ginoaran angka panurirang gapgap (nabi-nabi palsu). Songon na masa di abad VII, dipaboa dibagasan turpuk on adong sahalak panurirang gapgap na margoar si Hanania na niadopan ni panurirang Jeremia. Hanania, di Hata Heber: חֲנַנְיָה - KHANANYAH, lapatanna: 'YHVH itu murah hati', bentuk Yunani: ανανίας - ANANIAS atau HANANIAS. Sai marusaha do si Hanania laho manggurgari dohot manghasut bangso i asa mamberontak tu bangso Babel. Alai molo pandok si Jeremia ia pangalaho ndada boi mamboan bangso Juda tu hadameon nang las ni roha hape baliksa tu hasusaan na so boi sipasidingon. Ia hamamasa paraloan ni si Jeremia tu si Hanania dibagasan parpunguan nasida na disaksihon godang malim dohot ruasna.

    d.      Molo panurirangon ni si Hanania dua taon do lelengna dihabuangan Babel bangso Juda asa marujung. Hape molo sian prinsip Deutronomis (5 Musa 18: 22), molo hajongjongan ni sahalak panurirang taruji sian panurirangonna gabe kenyataan. Molo panurirangon ni si Hanania ima panurirangon na so tingkos dibereng si Jeremia, hape si Jeremia mandok 70 taon do bangso i di habuangan (Jer.25: 12) sude angka ulaula sian Bagas Joro naung dibuat si Nebukadnesar sian Jerusalem, asa dipaulak muse dohot angka halak na tarbuang i, jala ingkon marotak do auga ni raja Babel. Panurirangon si Hanania ima bagabaga “las ni roha” na manggombarhon pardamean dohot hadumaon, jala ido na sininta sude halak Juda termasuk Jeremia. Ido asa di “Amen”-hon si Jeremia, anggiat saut ma na nidok ni si Hanania molo pe sintong i. Sikap Panurirang Jeremia ndang pintor manguhumi pandohan ni si Hanania nang pe disada sisi gabe so haposan be hata panurirangon ni si Jeremia. Ndang pintor di dok si Jeremia na pargabus do si Hanania alai adong dua hal na ingkon so boi lupahonon ni angka sihatoropan i. Alai ndang na laho paluahon dirina songon panurirang ibana disi, alai ala so tudos dohot lomo ni roha ni Debata. Naparjolo; Pandohan ni si Hanania ndang hombar tu hasomalan panurirangon (tradisi propetik) na jotjot dihangoluhon nasida (ay.8-9). Napaduahon; holan paimahon tingkina ma sintong do manang ndang panurirangon ni si Hanania.

    e.      Molo ditradisi Israel kuno, sahalak panurirang sai manuriranghon jea, hasusaan dohot begu antuk (penyakit sampar), jala mansai jarang do manuriranghon hadameon , jadi molo hadameon do disuriranghon ingkon manat do ibana disi sahat tu hagogok ni panurirangonna i. Ido asa dipatorang Panurirang Jeremia bukti ni hasintongan ni panurirangon ima hagogokna di tingkina ( 5 Musa 18: 21-22). Jadi ulaon ni angka panurirang ima laho paingothon manang manjaga pangalaho ni bangso Israel (ay.8). Jadi ndang pola ringkot panurirang di situasi na manjonohi hadameon manang mademakon. Alai nian angka panurirang pargapgap pe mampu do manuriranghon jea (ptds. Mika 3:5). Memang sai dipamanat si Jeremia do parsualon nasida di adopan torop jolma. Boi do gabe muba pangihuthonon ni torop jolma i tu si Hanania nang pe sintong na nidok si Jeremia na marsihohot di hatigoran alai boi do gabe talu ibana. Ise ma na so las rohana molo disuriranghon jonok ne ma las ni roha jala marujung ma tongkinnari jea di nasida. Dungi malo do si Hanania patudos tu auga hau i sian tangkuhuk ni si Jeremia na diponggolhon ibana asa songon i ma simbol murana malua bangso i sian jea huaso ni Nebukadnesar raja Babel i. Ala ni i di udut ni turpuk on laos dibagabagahon Debata do rimasNa marhite si Jeremia na paulihon Debata do auga sian bosi tu tangkuhuk ni saluhut bangso i asa unduk tu si Nebukadnesar ala nunga diponggol si Hanania auga sian hau i. Laos didok si Jeremia do tumpol tu si Hanania: “Ndang na disuru Debata ho”. Dibuktihon si Jeremia do hatana i marhite hamamate si Hanaya dua bulan na mangihut (ay.17).

f.        Mansai tabo do nian begeon angka hata na uli, alai molo ro hatana koras, manang singotsingot, pintor mohop do sipareon umbegesa. Alai molo tapamanat mansai dumenggannan do singotsingot laho padenggan parangenta. Hita na porsea dibagasan Jesus Kristus jotjot do ra tabege jamita nang Hata ni Debata songon na manusuk tu ateate, boi do manungguli rohanta na tarpodom. Ingkon ingotonta do jala tapamanat molo adong jamita na di palemeslemes, manang holan pageokgeok pinggol na umbegesa. Hea mansai koras jamita sahalak pandita na mandok; pangalangkupon ima dosa. Dung sae parmingguon tarsinggung ma sahalak ruas dungkon ni i ndang olo be marminggu. Alai na deba ruas adong muse do manitip jamita tu pandita na naeng marjamita asa dibahen humor, manang na pageokgeok pinggol. Hea do sahalak sintua mandok: “angka na burju do ruasta on, unang pola pakarashu jamitamuna”. Dungi na deba ruas molo laho tu parmingguon, sai di rimpu do holan pasonang rohana alai sabotulna sai jumolo do naeng pasonanghon Debata marhite na mamuji pasangap Debata, asa taruli muse di ibana songon ruas manjanghon Debata dibagasan ngoluna. Molo laho hita tu angka parpunguan, parmingguon nang partangiangan, disi ma hita asa gabe pananginangi Hata ni Debata. Heber 4:12 Ai na marngolu do hata ni Debata jala marpangkorhon, jala tumajom sian nasa podang siduababa, jala torus do disirang hosa dohot tondi, ringring dohot utohutokna, laos diuhumi do na sinangkap dohot na piningkir ni roha.

     g.       Tapamanat ma angka panurirang pargapgap: Sada tanda andorang haroro ni Tuhan Jesus na paduahalihon ima; godang martubuan angka panurirang pargapgap na paliluhon torop jolma (Mat.24:11). Panurirang pargapgap boi do muncul sian tongatonga ni huria; ima angka pangula manang na poso ni Debata na so apala tangkas pangantusionna di Hata ni Debata. Panghorhonna gabe sala pasahathon dohot menafsirkan Hata ni Debata ibana disi. Dungi ndang barani pasingothon ruas ni huria na marsala manang na mardosa. Panurirang pargapgap sai sumarihon dirina sandiri, ndang berkorban, sai holan roharohana do dipatujolohon. Padahal mereka adalah serigala yang sedang menyamar seperti domba (band Matius 7:21-23). Dipodai Apostel Paulus di Epesus 5:16 “Parhaseang hamu ma tingki, ai ari hasusaan do nuaeng”. Naeng ma lam jamot hita di jaman nuaeng on ingkon uji onta do ganup jolma nang tondi i pe. Songon na tarsurat di 1 Tessalonik 5:21-22 “Tangkasi hamu ma saluhutna; na denggan i ma tiop hamu! Pasiding hamu ma nasa rumang ni na roa!”. Ingkon barani do hita angka siihuthon Kristus songon panurirang Jeremia meng-counter angka informasi na so sintong di tonga ni huria nang masyarakat pe. Tarlumobi molo adong Hata ni Debata na di papeol manang gabe gait ndang tingkos dihatahon. Molo nuaeng di na jonok ne nama Pilpres; tung godang do na paroaroahon kandidat presiden manang didok ma ‘black campaign’, pintor ro do meng-counter manang menentang informasi na paroaroahon i sian angka pendukung kandidatna. Tarlumobi ma hita angak siihuthon Kristus, molo adong na paroaroahon Barita Na Uli i manang Hata ni Debata, ingkon rade do hita mangalehon alus na sintong. Saluhutna i tarula hita molo sai olo hita pinargogoan ni Tondi Parbadia i, asa boi hita mangarajai dirinta, ndang tersulut emosi, alai boi songon si Jeremia pasahathon hatana dohot denggan.

      h.      Topik ni minggunta ima “Unang ma dosa i mangarajai ngolunta”. Jotjot do jolma terjebak holan laho pasonanghon donganna, halak na dihumaliangna nang pe so tingkos na nidokna songon na pinamasa si Hanania. Jala disisi na asing sai umbiaran do pe rohana tu donganna jolma asa sian Debata umbahen so didok be hasintongan dohot hatigoran i. Hape didok do di Ulaon Apostel 5: 29 “.....Ingkon oloan do iba di Debata asa di jolma!”. Ala ni i di hita na porsea dibagasan Jesus Kristus tapamanat ngolunta sotung gabe tarihot disangkap sangkap ni sibolis dohot portibi on na mangelaela  hita. Nunga mate, hehe jala manek tu surgo Jesus Kristus laho manghamonanghon hita jolma pardosa, asa unang be dosa i namangarajai ngolunta. Ido ni sosohon Apostel Paulus di Rom 6 : 12 – 23 angka na porsea i asa pasahathon dirina nang ngoluna gabe sinjata hatigoran. Unang ma hita marpangunsandean tu roha nang pingkiran dohot panghilalaanta sandiri. Songon naung dipodahon apostel paulus di Epesus 6:11-17 “Solukkon hamu ma pangkean sinjata na sian Debata, asa taralo hamu utiutian ni sibolis i. Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i. Dibahen i, jalo hamu ma pangkean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude. Antong, jongjong ma hamu, marhohoshon hasintongan di gontingmuna, angka naung manolukkon bajubaju partahanan, i ma hatigoran i. Marsipatu ma patmuna, laho mangkaringgashon barita na uli, pardamean i. Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i. Jangkon hamu ma nang tahuluk haluaon dohot podang ni tondi, i ma hata ni Debata.” Asa di minggu trinitatis on, lam tinggil sipareonta di panogunoguon ni Tondi Parbadia i, asa tarbahen hita pasahat dirinta tu hatigoran laho pabadiahonsa. Molo nunga Tondi Parbadia na mangarajai ngolunta, ndang hatoban ni dosa be hita, alai sabalikna gabe pangoloi ma hita di Hata ni Debata. Amen.

Bahan Jamita Evangelium Minggu I Dung Trinitatis, 22 Juni 2014

Manghatindanghon Jesus di Jolo ni Saluhut

Mateus 10 : 24 – 39

    1.       Andorang so sahat tu haroro ni Jesus na paduahalihon, torop do halak na naeng ro manoluk Goar ni Jesus. Liluhononnasida ma torop halak marhitehite na mamangke Goar ni Jesus. Laho managam saluhutna i, ditonai Jesus do siseanna asa jaga nasida, so tung dohot nasida dililuhon halak. Diparade Jesus do angka siseanNa laho mangadopi angka na naeng masa dipudian ni ari, asa unang tarsonggot nasida molo dung masa angka i. Songon sisean na jonok nasida tu Jesus, dipamora do nasida di bohal na mansai ringkot tu ari na naeng ro.

Diparbagabagahon Jesus do haroro ni Tondi Parbadia molo dung ditogihon angka sisean i tu jolo ni panguhum. Na urupan ni Tondi Parbadia do nasida di sangombas i laho mangalehon alus na sintong. Nunga ditotophon Jesus hian ulaon ni Tondi Parbadia laho mangaramoti huriana. Urupanna do ganup ruas ni huriana di angka alus na porlu hombar tu halehetanna be. Diparade Jesus do angka siseanNa laho mangadopi situasi situasi na maol. Tondi Parbadia donganta laho mangalehon hagogoon nang alus siajarhononna asa dohonon di jolo ni angka panguhum, rapot huria dohot lan keadaan na asing

     2.       Ia turpukta on ima kelanjutan sian parsuruon ni sampuludua sisean ni Jesus na manguduti tu poda nang sipaingot tu parsuruonNa (Mat.10). Laho mangantusi pandohan ni Tuhan Jesus memang ingkon manat do hita mangalapatisa, ala molo so manat boi do madabu tu pangantusion na sala taringot na nidok ni Tuhan Jesus.

    3.       Molo sian gombaran na umum manjaha naung dihatahon Jesus ima parsuruon laho mamaritahon ia Harajaon Banuaginjang na naeng ro (ay.7). Dibagasan parsuruon i, dipaingot Tuhan Jesus do nasida asa jaga siala parsuruon i godang do ambat ambat sian portibi on. Alai samaol maol ni tantangan na niadopan nasida laho mamaritahon Barita Na Uli, dilehon Tuhan do tu nasida jaminan haluaon dohot hagogoon sian Tuhan. Sada na pasti ia parsuruon i ndada sian jolma, alai parsuruon na sian Debata Ama na di Surgo i do i, jala pargogoanNa do nasida asa boi mamaritahon haluaon na sian Debata. Sian turpuk jamita on adong jaminan siondolhonon na pinasahat ni Tuhan Jesus asa barani nasida jala marsitutu di parsuruon na jinalo nasida i, ima:

Ø  Hamaolon na niadopan nasida ndada lobi sian na jinalo ni Tuhan Jesus di portibi on. Ido umbahen didok Jesus di ayat 24-25 “Apala sumurung anak sisean sian guruna, manang naposo sian indukna. Nunga antong jadi di anak sisean i, molo songon na di guruna di ibana; nang di naposo, molo songon na di indukna di ibana. Molo digoar halak nampuna bagas si Belsebul, lam tu donganna sajabu ma, lam so dohononna sisongon i!” Molo tung pe jaloon nasida angka hamaolon nang panaritaan ndada mangalobi i sian na jinalo ni Tuhan Jesus.

Ø  Padan di Hangoluan (ayat 26-30); taringot tu haluaon na tinotophon ni Tuhan Jesus ia haluaon di ngolu nasida naung dipadanhon Debata. Ala na manjou dohot na marsuru nasida ima Debata. Aha pe na masa di portibi on sude na i sian pamotoan ni Debata, sahat tu “gari obuk saluhutna na di ulumuna i nunga dibilang” nunga diboto Debata i saluhutna. Di pahot Tuhan Jesus pangaramotionNa di ngolu ni angka siseanNa sian Debata asa unang mabiar nasida di jolma asa sian Debata. ayat 28 mandok : “Unang pola mabiar hamu mida angka na mambunu daging, angka na so tuk mambunu tondi; alai na marhuaso mangagohon daging dohot tondi tu na roko, i do sihabiaranmuna”. Sadalan na tarsurat di Ul.Apostel 5: 29 “Ingkon oloan do iba di Debata asa di jolma!”.

ü  Hasusaan na boi masa di nasida ndada boi di perbandingkon dohot uhuman na manulak panindangion nasida. Asa unang mabiar nasida manghatindanghon na tutu taringot tu Tuhan Jesus. Nang pe aeon nasida sitaonon, naeng ma ingoton nasida ndada tudos i tu sijaloon nasida ima uhuman sian Debata na mamunu daging dohot tondi.

ü  I do umbahen di paingot Tuhan Jesus di ayat 38 “Jala na so mamorsan silang na tu ibana i, laho mangihuthon Ahu, ndang na tama i siseanku”. Jala na nidokna “podang” (ay.34) gabe sada gombaran panirangon dirinta dohot hisap hisap ni daging do i maksud ni Jesus, na samudar (sekeluarga) na jumonok sian hita pe boi do dumoras tantangan i.

      4.       Panjouon on ndada holan tu na sampulu dua sisean i, alai tu hita angka na porsea di Jesus Kristus. Dijou Tuhan Jesus do hita laho mamaritahon Barita na Uli siab Tuhan songon pamatang ni Kristus hita di portibi on ima huriaNa i, jala Kristus ma na gabe Uluan ni huria i. Di pardalan ni ngolunta mansai godang do hamaolon na taadopi di ha-Kristenonta sian angka diskriminasi sahat tu pangalaho na kasar sian angka jolma na so manghalomohon siihuthon Kristus i. Alai nang pe songon i naeng do ingotonta, ndada hea niajarhon Tuhan Jesus asa manghosomi nasida, jala unang gabe mabiar hita, asa unang madabu hita tu sikap fanatik na manghalupahon parsuruon ni Tuhan Jesus asa Masisesaan dohot Masihaholongan.

    5.       Ndang dao do pe hita sian Minggu Trinitatis; Hasitolusadaon ni Debata. Sai tongtong do Debata mandongani hita, nang sahat dipartingkianta sinuaeng on marhite TondiNa ima Tondi Parbadia. Tondi Parbadia na nilehonNa tu angka siihuthon Kristus i ma sipangasahononta laho mangantusi HataNa dohot parsuruonNa, pargogoanNa do hita songon si Jeremia i laho paboahon hasintongan dohot hatigoran sian Hata ni Debata. 2 Timoteus 1:7 “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton”. Ala ni i parsitutuonta mangihuthon Jesus naeng ma tangkas loyalitas siihuthon Kristus di panggora ni Tondi Parbdia i. Asa marhite Tondi Parbadia i angka siihuthon Kristus:

ü  BARANI laho manghatindanghon Jesus dijolo ni jolma; manghatindanghon Jesus ndada holan hata (jaha: Panindangion Haporseaon) na jotjot tapatupa di parmingguonta. Alai lobi sian i dope ima manghatindanghon Jesus marhite pambahenan dohot pangalahonta. (ptds. Hesekiel 33: 7-9 “Ia ho ale anak ni jolma, nunga hupabangkit ho bahen  parjaga di pinompar ni Israel, ia adong hata nanggo sada dibege ho sian pamanganku, ingkon sipasingothononmu do i tu nasida sian ahu. Molo ahu mandok tu halak parjahat: Ingkon mate do ho ale parjahat, hape ndang marboaboa ho palumba halak parjahat i tumundalhon dalanna i nian, mate do nian parjahat i di bagasan hajahatonna, alai anggo mudarna sian tanganmu do tungguonku. Alai anggo dipalumba ho do halak parjahat i tumundalhon dalanna i nian, asa mulak sian i nian, hape ndang olo ibana mulak tumadingkon dalanna i, mate di bagasan hajahatonna ma ibana, alai anggo ho malua do hosam dibahen ho.”

ü  Marbisuk songon ulok jala lidang songon dara pati. Unangma antong tadok holan na marbisuk ingkon dohot do roha na lidang. Asa di na manghatindanghon Jesus hita diparbisuhi Tondi Parbadia i hita, aha sibahenonta, aha sidohononta.

ü  Paboahon HOLONG i tu angka jolma na dibagasan hosom. Ala ni holongta tu Debata (Joh.3:16) olo hita pasahathon sipasingot di keadaan na sala. Boi hita pasahathon asi ni roha ditongatonga ni ngolu na mangharinghotonsa. Mampu hita do laho manesa dosa nang sala ni halak na mambahen hansit rohanta. Tau hita papatarhon haporseaonta ditingki ro pangunjunan laho mansoadahon haporseaonta. Ditingki situasi sisongon on ma asa Barita na Uli i tabaritahon. Molo apoapo ni Apostel Paulus tu huria Epesus, asa dipangke ruas ni huria i pahean sinjata na sian Debata (Epesus 6: 10-18),asa marhite huaso nasian Debata boi hita mangadopi hamaolon dipardalanan ni ngolunta, tarlumobi di na laho manghatindanghon Jesus i.

ü  Mangarajai diri; Boha do hita boi margogo laho mamaritahon Barita NA Uli molo so boi do pe hita mangarajai dirinta sandiri sian angka sumbia ni portibi on (ptds. Gal.5:19-23). Ala ni i, andorang taadopi angka hamaolon i sian luar, naeng do jumolo sian bagasan i hita boi mangarajai dirinta sandiri.

ü  Mamuji Debata; Ngolu na marpanindangion dibagasna Tondi Parbadia ima ngolu na sai mamuji Debata, jala dibagasan pujianna tu Debata disi do sai dihasiholi tondina hangoluan sogot, asa disi ma tarida ngolu ni angka siihuthon Kristus marsitutu mangihuthon Jesus dohot manghatindanghonsa. Ngolu na mamuji Debata dibagasan Jesus Kristus ima na so mamuji dirina sandiri; jala ngolu na manghatidanghon Jesus ima na patujolohon Jesus dibagasan ngoluna. Amen.

Bahan Jamita Epistel Minggu I Dung Trinitatis, 22 Juni 2014

Manghatindanghon Jesus Di Jolo Ni Jolma

Jeremia 20 : 7 – 13

    1.      Jeremia ima panurirang laho patubegehon uhum ni Debata tu bangso Juda. Nang pe dirajumi dirina poso dope jala ndang malo manghatai (Jer.1:6), alai hot do panjouon ni Debata na tu ibana. Ai Debata sandiri do na manodo ibana gabe naposona. “Tagan so hujadihon dope ho di bortian, nunga hutanda hian ho; jala tagan so ruar dope ho sian ampuan ni natorasmu nunga huparbadia i hian ho. Hupabangkit ho gabe panurirang tu angka bangso”(Jer.1:1-5).

Namangula do panurirang Jeremia di Juda, diujung ni abad VII sahat tu parmulaan ni abad VI seb.Masehi. Keadaan Sosial Politik dihatiha i  ndang stabil, hinorhon ni panggosagosa ni angka harajaon na balga di humaliang nasida, na marsorinsorin manaban bangso i. Ndada holan politik, mampanghorhon do nang situasi i di ngolu parugamaon nasida, ai tarmasuk do debata Baal diboan angka bangso na manaban nasida gabe sisombaon di Juda. Ala ni i, ndang be lomo ni roha ni Debata diula nasida, masa ma angka pangalaho na hinagigihon ni Debata isarana: ketidak-adilan, korupsi, amoral, penindasan,dna. Nian adong do sian Raja Juda manang Raja Josia na boi gabe dongan panurirang i laho memberantas angka situasi na hurang denggan i (Reformasi Josia), alai na deba baliksa manolopi pangalaho na jat i songon Raja Joyakim, laos diihuthon do hasomalan hasomalan manomba debata Baal i.

2.      Dijolo ni turpuk on dipatorang do pambahenan ni malim Pashur na palalu tangan tu panurirang Jeremia, ala ni panurirangon na pinasahatna di alaman ni bagas joro, na patubegehon jea na naeng ro tu bangso i (Jer.19:14-15). Dipungkul si Pashur ma si Jeremia jala dihurungkon. Panghorhon ni pangalahona i, madabu ma uhum ni Debata. Ndada holan si Pashur diuhum alai dohot do bangso Juda. Malim Pashur na oloan tu panggomgomi dohot situan natorop sian tu Debata; ulaonna holan mambuat roha ni jolma, ndang barani mandok na tingkos. Panurirangonna  dohot jamitana holan na mambahen asa tabo do tu sipareon ni torop halak. Ndang barani maminsang, ndang barani mandok natingkos (ptds. Ul.Ap.5:29 “ingkon oloan do iba tu Debata sian tu jolma”). Hape marasing dohot Panurirang Jeremia na tutu situtu pasahathon tona dohot Hata ni Debata. Panurirang Jeremia manghatindanghon Debata tu torop jolma mansai borat do mamarungkilhon na niadopanna. Disada sisi songon sahalak panurirang ibana, diigil do sian ibana laho pasauthon lomo ni roha ni Debata di parngoluon ni bangso i, alai disisi na asing nunga tung mansai dao pangalaho ni bangso i manimbil sian dalan ni Debata. Alai ndang tarjalo nasida sipasingot nipanurirang i, angka rehe rehe dohot hinsak hinsak do dipasahat bangso i mangalusi ibana ganup ari. Jadi ndang tagamon so tubu angka pandeleon di si Jeremia. Ala ni i do pola disangkapi ibana asa unang be marjamita, jala ndang be sitaringotan taringot tu Debata.

3.      Ala bajar dope panurirang i, dimulanai mansai bergumul do si Jeremia di panjouon ni Debata tu panurirangonna, sanga do ibana mandele. Alai ala sai dihatai (dirayu; ptds. Songon sahalak dolidoli na mangelek/merayu sahalak na marbaju) Debata ibana, gabe dioloi ibana do na gabe panurirang i. Alai gumogo do sangkap ni Debata di ngolu ni panurirang i. Dihinamaol ni parungkilon na niadopanna, ndang diloas Debata asa sumurut ibana sian ulaonna i. Songon api na marsigorgor do mangula Tuhan i, di bagasan roha ni panurirang i, asa ndang tarbahen ibana so manguduti ulaonna. Ndang tarjua panurirang i huaso ni Debata na marsuru ibana, molo Debata marsuru ingkon oloan do.

4.      Mansai godang do angka tantangan na niadopan ni panurirang Jeremia di ulaonna. Asing ni na sian angka na torop, pola do dohot angka alealena mangonggop ibana. Asing ni reherehe dohot hinsak hinsak, pola do martuptup nasida laho manangkup ibana, marhitehite na patupa angka tuduhan na so sintong, anggiat tarpatunduk natorop i nian ibana laho martubol (melakukan pembalasan). Alai di situasi na maol i, ndang dipasombu Debata panurirang i sandiri laho mangadopisa. Dihilala panurirang i do pangiringon ni Jahowa di ibana, ‘songon ulubalang na begu (pahlawan yang tak terkalahkan). Debata sandiri marporang mangalo angka musuna i (ptds.21:5), ndang tagamon so monang ibana, gabe tarsulandit (talu) ma angka na mangalelei ibana i, jala murak (malu) situtu do nasida, pola saleleng ni lelengna. Ndang diloas Debata talu angka naposoNa i maralohon angka hagogoon ni portibi on, sai diurupi Debata do angka naposoNa.

5.      Borat do tutu angka tantangan na niadpoan ni panurirang Jeremia, alai boi do ibana marhamonangan sian saluhutna i. Dirajumi panurirang i do angka hamaolon i, songon ujian sian Debata, ujian tu halak partigor (ptds.9:7), jala dihilala ibana do pangurupion ni Debata tuibana lahomangadopi saluhutna i. Ala ni i mago ma arsakna, mulak ma las ni rohana, malua tondina sianpangunjunan i. Dibagasan las ni rohana i ma ditogihon ibana bangso i asa rap dohot ibana mangendehon ende pujipujian di Jahowa, asa pinuji ma Debata siala denggan i pambahenanNa i.

6.      Dipardalanan ni bangsonta di ombas na parpudi on, diperhadaphkan do huria i tu angka hamaolon hamaolon, hinorhon ni angka krisis na so marhasoan. Isara ni ketidak adilan sosial, masalah HAM, hapogoson, penyakit sosial, Narkoba, kekerasan, korupsi, dna. Songon pamatang ni Kristus huria i di tonga ni portibi on tarjou do lahopasauthon lomo ni roha ni Tuhan i: manghatindanghon hasintongan ni Debata, pajongjonghon Harajaon ni Debata jala mamaritahon taon parasinirohaon tu sandok bangso (ptds. Luk.4:19-20). Alai ndang songon mura ni pabalikhon tangan laho paturehon angka hamaolon ni bangsonta. Apalagi di situasi nuaeng, sipata hira na so marlapatan angka usaha na binahen ni huria i. la ni i sipata ndang tagamon so tubu pandelean hinorhon ni angka hamaolon i, na so haru sidung. Marhite turpuk on, patut sipahusorhusoronta; asa ndang jadi mandele huria laho pajongjonghon dohot manghatindangkon hatigoranNa. Molo tung pe songon na maol dalan i naeng ingotonta asa gabe pendorong di hita; na so dipasombu Debata huria i sahalaksa laho manuhuk angka ulaon na borat i (ptds. 1 Kor.10:13).

7.      Topik ni minggunta Minggu I Dung Trinitatis ima: “Manghatindanghon Jesus Dijolo ni jolma”. Di na lam maju ni ngolu ni masyarakat di portibi on, godang do angka na manait roha ni jolma marsasahalak. Hinorhon ni i, sipata lupa jolma i di panggora ni rohana, bahkan godang do nuaeng angka naung mate di panggora ni rohana. Turpuk on paingothon hita asa tinggil hita manangihon panggora ni rohanta i, tangi di soara ni Debata na sai tongtong mangolu di rohanta (ptds. Pang.3:20). Nunga tajalo Tondi Parbadia sian Debata, ndang tondi hatoban na mambahen hita mabiar ( 2 Timoteus  1:7 Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton). Ala ni i tama do angka siihuthon Kristus barani mandok angka hata hasintongan dohot manghatindangkon i di tongatonga ni bangsonta. Unang dohot huria ni Tuhanta tarboanboan tu angka pangalaho ni portibi on, alai ingkon tangkas ma dipatubegehon panindangion na sintong taringot tu Hata ni Debata, jala rade paingothon angka naung dao mardalan manadingkon hasintongan ni Debata. Saluhutna i tarpatupa hita siala na olo  do tondinta  niajaran ni Todi Parbadia i, asa marhasangapon ma Debata diginjang ni saluhutna. Asa molo dung tangi hita di soara ni Tondi i, oloanta ma Ibana, jala urupanNa ma hita mangulahon i asa tarbahen hita mamuji pasangap Debata.

     8.      Ngolu na mamuji Debata i ma ngolu na marpanindangion di sandok gulmit ni ngoluna. Tahatindanghon ma Jesus naung manaluhon sorop ni sibolis dohot hamatean na manesa dosa ni portibi on jala manghamonanghon hita asa partohap hita di hangoluan saleleng ni lelengna i, asa songon na nidok ni Jesus di Mateus 10:32-33 “Ai ganup na mangkatindangkon Ahu di jolo ni jolma, i do hatindangkononku di jolo ni Damang na di banua ginjang i; alai ganup na mansoadahon Ahu di jolo ni jolma, laos soadahononku do i di jolo ni Damang na di banua ginjang i”. Sadalan do hata on dohot na tarsurat di Hezekiel 33 : 8-9 “Molo ahu mandok tu halak parjahat: Ingkon mate do ho ale parjahat, hape ndang marboaboa ho palumba halak parjahat i tumundalhon dalanna i nian, mate do nian parjahat i di bagasan hajahatonna, alai anggo mudarna sian tanganmu do tungguonku. Alai anggo dipalumba ho do halak parjahat i tumundalhon dalanna i nian, asa mulak sian i nian, hape ndang olo ibana mulak tumadingkon dalanna i, mate di bagasan hajahatonna ma ibana, alai anggo ho malua do hosam dibahen ho.” (ptds. Panaonon ni Jesus dohot si Stefanus). Panindangionta di Debata Ama, Anak dohot Tondi Parbadia naeng dibagasan habisuhon songon ulok jala lidang songon dara pati, ndang holan bisuk alai dohot do halidangon ni roha. Jala panindangionta ndada pola ingkon na ekstrim manang ingkon marjamitai, alai tarida ma panindangion ni halak na porsea dibagasan pangalaho na boi gabe tiruan (senyum, sapa, salam, kepedulian, pertolongan) manang hal-hal na sederhana na mampanghorhon tu lingkungan hidup asa lam denggan, (haposan di na otik laos gabe haposan di na godang) dohot parsaoran tu dongan jolma. Ngolu na marpanindangion ima nglou na marparbue. Amen

Bahan Jamita Evangelium Minggu Trinitatis, 15 Juni 2014

Mamuji Debata Sitompa Nasa Na Adong

1 Musa 1 : 1 – 2+ 4a

    1.       Debata Sitompa Nasa Na Adong. Mansai ringkot do turpuk 1Musa 1: 1 on ala marisihon angka na ringkot taringot tu sifat dohot hakekat ni Debata. Jala ayat on do na parjolo manghatindanghon taringot tu Debata jala na nilehon ni Debata. Buku sada Musa on ima sada fakta sejarah jala ndada ninna tu ninna. Ala ni ndada dipangke parhataan: “disada tingki”  manang na somal tabege di hata Indonesia:”Pada suatu waktu” (hata Inggris: Once upon a time”), songon na somal dipangke di angka turiturian (dongeng-dongeng) na somal! Alai dipangke do parhataan “in the begining” (pada mulanya). Sian on tangkas ma patuduhon ia Buku 1 Musa on sada fakta sejarah. Dungi Hata ni Debata on manghatindanghon taringot tu Debata, sian mula ni Bibel on nunga dipaboa taringot Debata. Dungi didok Debata na manompa nasa na adong. Dipaboa do di ayat na parjolo on Debata na manompa. Jala hata parjolo sian 12 panindangion apostel i na mandok : “Ahu porsea di Debata Jahowa, ido Ama pargogo na so hatudosan na manompa langit dohot tano on”. Ima parhataan na martudutudu tu 1 Musa 1:1 on “Dimula ni mulana ditompa Debata langit dohot tano on”. Molo dibagasan Padan na Robi kata kerja Heber (ibrani) bara (menciptakan/manompa)dipangke, somal do i martudutudu tu Debata na patupahon. Dungi Buku 1 Musa on jotjot do mamangke istilah asa (menjadikan/dibahen) patudos tu 1:7,16,25. Molo istilah bara dipangke onom hali di 1 Musa 1:1-2:3(1:1,21,27 {3hali}; 2:3), na marlapatan Debata manompa na imbaru so marhitehite manang aha pe bahanna (ex nihilo). Molo ahli Teolog argoar Wenham mandok: “istilah ini menekankan kebebasan dan kekuasaan  seorang seniman””, jala putihonna do pandok ni W.H.Schmidt molo istilah bara mangondolhon ulaon ni Debata manompa soada hamaolon ala otoritasna dohot na so marbatas huasoNa. Sian pandapot on Buku 1 Musa on manaluhon pandohan ni angka turiturian na so sintong sian Babel; mandok benda (materi) doshon hatongtonganna dohot Debata. Jadi Buku 1 Musa on mangondolhon ndang adong na manongtong nasa na adong ia so Debata. Ibana do na manompa saluhutna na adong sian na so adong.

     2.       Dimulanai Langit dohot Tano on. Jotjot do ditafsirhon ayat 1 on songon panompaon disude portibi on. Adong dua pandapot taringot tu ayat 1 on : 1) Ia ayat on holan patuduhon rumang ni portibi on andorang di renovasi Debata di ayat 3 dohot diudutna. 2) portibi on na tarulang jala halongonan jala holom diatas lung i jotjot ditafsirhon ala ni adong dosa dohot hadadabu ni sibolis i. Nasida mandok langit dohot portibi on dohot ro di isina mulanai nunga singkop. Sian ayat 1 tu ayat 2 adong partingkian na mansai leleng ima jutaan taon jala boi sahat ratusan taon. Adong na mandok istilah Gap Theory (Teori Kesenjangan). Jala di ayat 3 ro di udutna Debata manompa muse. Dasar ni teori on ima Ia Debata ndada mungkin manompa na naung tarulang songon na tarsurat di ayat 2 i. Dungkon adong parholangan tingki jutaan taon asa mansai ampit do Bibel on tu ilmu geologi na mandok umur ni portibi on nunga jutaan taon. Pandapot umum na dijalo taringot tu 1 Musa 1:1-2 ima mandok angka ayat on manggombarhon ari na parjolo di panompaon. Ayat 1 ima patuduhon panompaon ex nihilo ni alam semesta, jala ayat 2 manggombarhon tolu keadaan ni portibi on andorang dipaujung manang dipasingkop Debata sitompaonNa. Jadi portibi on ndang boi dope diingani, jala diari ari na mangihut diparade Debata do angka na ringkot asa tartompa angka na mangolu na marpinompari hombar tu na tinotophon. Na marlapatan Debata manompa na denggan jala teratur jala bertahap. Nang pe na mambahen Gap Theory marusaha mmbahen hadomuan ni Bibel dohot ilmu geologi zaman nuaeng. Porlu do botoonta ia ilmu geologi ndang adong kepastian laho manontuhon umur ni portibi on. Metode na dipangke nasida laho manotophon umur ni portibi on boi mampanghorhon hasil na marasing asing, boi 100 taon manang 20 ribu taon. Di tingki ditompa Debata sasudena di ayat 1, sude na i na tinompaNa i nunga marumur tertentu na so taboto. Isarana: ditingki ditompa si Adam di ari paonomhon, ndada ditompa ibana marrumang posoposo na imbaru tubu, alai sahalak jolma na  magodang. Ido umbahen isarana di ari papituhon adong sahalak ilmuwan mamareso si Adam, boi do kemungkinan dapothononna si Adam nunga marumur 30 manang 50 taon, hape barupe marumur sadari ibana. Laos songon i do angka hau, tanoman, batu, dohot portibi on, dohot angka bintang, manang planet pe dna. Molo isarana portibi on nunga marumur 5 juta taon, ndada na mandok naung sala Bibel i. Alai boi sajo do Debata manompa portibi on dikeadaan na nunga marumur 5 juta taon.

     3.       Tondi ni Debata. Mangareapreap ma Tondi NI Debata di atas ni angka aek. Hata ruakh sian hata heber na marlapatan angin manang roh/tondi. Dibagasan konteks on umampit do dilapati Tondi Ni Debata (Job 26:13; Psl.104:29-30; Joh.1:1-3; Kol.1:16). Hata ‘mangareapreap’ songon induk ni pidong rajawali na manghuturi isi ni hasarna jala mangareapreap diginjang ni anakna (5 Musa 32:11). Sahalak Teolog namargoar Kidner mandok molo dibagasan Padan Na Robi hata “Ruakh” martudutudu tu tu huaso ni Debata, na manompa dohot na mangaramoti (Job.33:4). David Atkinson mandok doshon panghophopon ni induk ni pidong ti ianakhonna laos songon i ma panghophopon ni Debata tu angka na tinompaNa. Ala Debata do na manompa laos Ibana do goaron na manubuhonsa, dosohon tu induk ni pidong Rajawali. Mangareapreap do Debata huhut pasaorhon asi ni rohaNa tu atas ni portibi on. Molo pandok J.Moltman; ia Tondi i manompa parsaoran diginjang ni saluhut naung tinompa dohot Debata, asa dibagasan parsaoran saluhutna marsiantoan, na sada tu na sada jala saluhutna dohot Debata marhite dalanna na marasingasing. Molo dibagasan Ulaon Apostel 17:28 mandok: “Ai di bagasan Ibana do hita mangolu, manggulmit jala humosa....”. atkinson mandok ia Buku 1 Musa ndada holan na manguhal taringot transendensi ni Debata (diluar pangantusion, dohot pengalaman nang pamingkiron ni jolma) dohot hagogoon ni Debata, na mangula hombar tu lomo ni rohana tu angka na tinompaNa. Buku 1 Musa on dohot do mamuhai impola ni imanensi Debata, ima; na mian do Debata dibagasan natinompaNa, Tondi ni Debata na sai marhusor, manompa hasadaon dohot parsaoran. Jotjot do hita marpingkir molo Debata ro tu portibi on di tingki Jesus sorang, jala hehe muse ditingki naek tu surgo Jesus. Alai Bibel manurathon imanensi ni Debata nunga adong ditingki masa panompaon. Hatutubu dohot hananaek ni Jesus patuduhon parsaoran ni Debata na dinamis jala na rosu dohot portibi on.

    4.       Ari na parjolo: Dungi mangkuling ma Debata; ‘jadi ma na tiur’. Napaboahon ndada na so sengaja ditompa portibi on alai ganup ari sian onom ari sai dibuhai marhite pandohan on. Par pslamen mandok di Psalmen 33:9 “Ai mangkuling Ibana, gabe manjadi do, mandokkon do Ibana, jadi jongjong ma”.. Panurat Buku Heber pe mandok di Heber 11:3 “Hinorhon ni haporseaon do taantusi, naung marhitehite pandok ni Debata dipaojak angka hasiangan, asa sian na so tarida manjadi na tarida i”. Mansai luarbiasa do Debata manompa na tiur i. Hatiuron ima alus ni Debata tu hasisingkop ni sude program panompaon. Ditingki mangkuling Debata, “Jadi ma ho na tiur” hasilna ndada mata ni ari, siala mata ni ari ditompa di tingki ari paopathon do (1:16), alai hatiuron sian mual na hot diluar ni portibi. Molo pandok ni Henry Morris, hatiuron (or), ari na parjolo ima hatiuron na manongtong, na so dos tu hatiuron (ma-or) di ari paopathon ima sipahehe hatiuron i. Parhusoran ni na tiur dohot na golap ima na nidok “ari” (ay.5). Jala pandohn i ndada manodo secara langsung parmulaan rotasi ni portibi on. Boasa didok di ay.5 “......bot ma ari torang ma ari muse”, jumolo didok bot ari dungi torang ? Ia buku 1 Musa on sinurathon ni si Musa ima sahalak Israel. Marasing do dinegaranta parhusoran ni ari ima di pkl.12.00 borngin, alai molo di Israel parhusoran ni ari di pkl.06.00 sore. Jadi di nasida sada ari dibuhai sian borngin dungkon i manogot na i. Adong muse pandapot na mandok andorang soadong mata ni ari, sadari doshon tu pitu juta taon, alai dungkon adong mata ni ari, gabe sada ari doshon 24 jom. Pandohan “Ari” dison doshon na tarsurat di Buku ni si Daniel 8: 14 “Jadi ninna ibana ma tu ahu: Pola do gok dua ribu tolu ratus ari, dung salpu i urason ma muse inganan na badia i”, molo marhite tradisi (hasomalan) martudutudu tu parhusoran ni arian dohot borngin na lelengna 24 jom.

     5.       Minggu Trinitatis do goar ni minggunta ima hasitolusadaon ni Debata. Molo hata Trinitatis memang ndang apala tarsurat di Bibelta alai tersirat. Hasitolusadaon ni Debata manang Trinitatis ima keterikatan na so boi sinirang marhite pingkiranta sandiri. Alai boi do tapatudos tu Hatiuron i, ima songon mata ni ari; Matani ari i sandiri, dungi mohopna tahilala, dungi sondangna. Na deba huria memahami songon logo lingkaran segitiga (triquetra). Alai haporseaonta do na boi mangantusi hasitolusadaon i. Minggu Trinitatis ima minggu panutup di parhusoran ni angka ari raya na balga di hurianta. Ari Minggu Trinitatis ima saminggu dungkon Minggu Pentakosta. Hasitolusadaon ni Debata do na mian dibagasan panompaon i. Panompaon ni Debata ndada hea marujung, sai torus dope dipaimbaru hita. Tarlumobi dungkon madabu jolmana parjolo ima si Adam i tubagasan dosa. Asa dipauli Debata gombaran (Imago Dei) ni Debata di jolmanaung sega i marhitehite panghophopon ni Jesus Kristus (Joh.3:16). Asa mulak ma muse tu sorminan ni Debata hita na manjalo panghophoponNa i. Tama ma antong hita sidokmauliate di sude pambahenan ni Debata tu hita Jolma, sai tapuji ma Ibana parasi roha Bolon i. Amen

Bahan Jamita Epistel Minggu Trinitatis, 15 Juni 2014

Mamuji Debata Sitompa Nasa Na Adong

II Korint 13 : 11 – 13

     A.      Na marungkil do Apostel Paulus mangadopi angka parpoda haliluon di huria Korint on. Lam manamba do hamaolon i, di surat 2 Korint on. AI di 1 Korint holan angka Gnostisisme do diadopi, alai di 2 Korint nunga dohot angka parpoda na asing, na langsung menyerang pribadi ni apostel i. Didok na salpu do haapostelon ni si Paulus (11:5). Diparhatopot angka apostel pargapgap on do nasida na sumurung do panjouon na sahat tu nasida tumimbangkon panjouon na sahat tu si Musa ( 2 Korint.3:4) jala dihaginjangkon nasida do ha-Jahudion nasida, ala tongon marharoroan sian halak Jahudi do nasida.

Laos dipodahon angka apostel pargapgap on do taringot tu tumpak pangurupion tu angka parbarita na uli. Didok nasida, na hak nasida do mangido tumpak dohot pangurupion sian huria i, jala kewajiban ni huria i do pasahathonsa tu nasida. I do tanda ni apostel na sintong. Hape ia apostel Paulus ndada hea diantoi ibana taringot tu tumpak ni huria, lumobi di huria na tongon ibana mangula dope. Alai, dunghonsa salpu ibana sian huria na binolusna olo do ibana manungguli tumpak ni huria i. Didok apostel Paulus do nasida angka parbarita na mangalului parlabaan tu dirina (2:17, 11:20), mambahen dirina sumurung sian angka na asing (10:12), hatoban ni sibolis (11:13-15) jala na mamolamola huria Korint.

      B.      Laho paujunghon suratna, disosoi Apostel Paulus do huria na di Korint di onom hal ima asa:

1.       “Sai Las ma rohamuna”: Ngolu na dibagas las ni roha ido na maol luluan ni jolma di hasiangan on, ala portibi on dungkon madabu tubagasan dosa, gok hasusaan dohot parungkilon do di ngolu ni jolma i. I do ala las ni roha sai pinarsinta torop jolma marhite angka hiburan nang inganan na ribur dohot angka kegiatan na mambahen las roha. Na deba jolma dihirim do las ni roha holan marhite angka benda, angka materi so pasidohot angka hubungan sosial dibagasan parsaoran na denggan. Hape na sinosohon ni Apostel Paulus do parsaoran ni ruas ni huria i asa denggan sama nasida tarlumobi dibagasan Tuhan i. Adong sikap masiargaan dibagasan holong, disi ma dipatuduhon ngolu na marlas ni roha. Ruas na parjolo i pe ndungkon hasasaor ni Tondi Parbadia i, sa roha, sapingkiran jala sapangkilalaan do nasida (Ptds. Ul.Ap.2), dipatuduhon do pangalaho na masiurupan (Gal.6:2; Rom 12:6-12,15-16). Nang pe ndada ala ni halobian, alai hahurangan do nasida boi do marlas ni roha ala sada nasida, ido nang panjouon ni Apostel Paulus tu huria na di Korint on. (Pil.2:1-5; 4:4) Asa molo las roha disi do Tuhan dihilala na porsea i mangurupi ibana di ngoluna na gok hamaolon, jala dibagasan Kristus naung monang na porsea i manaluhon dosa dohot sorop ni sibolis, asa partohap di hangoluan sogot ima di Surgo i las ni roha ni na porsea.

2.       “olo patoguon....” (sempurna), hata on boi do dilapati singkop/uli/denggan. Sadalan songon naung didok Jesus sian Mateus 5 : 48 Ipe, ingkon sun denggan do rohamuna songon Amamuna di banua ginjang na sun denggan roha i!(ptds.Ep.4;Mat.4:21;Gal.6:1). Ia ruas ni huria di Korint nunga marhoronghorong jala marbolatbolat ala ni dosa dohot parbadaan sama nasida na so olo ungkap manjalo na sada tu na sada dohot na so olo patutoru diri asa dipadenggan manang dipauli, alai diigil Apostel Paulus do asa tongtong nasida olo aktif pauliulihon dirina be. Jala sadalan dohot naung pinodahon hian tu huria asa saroha jala sapingkiran, asa pasidingkon parasinganna be asa fokus mangalului hadameon. Lapatanna ndada na gabe so niadopan parbadaan nang parasingan na asing, alai asa dipatujolohon ngolu na dibagasan hadameon jala boha do asa meminimalisir angka parsualon (na metmet pe nang na balga). Jadi tangkas hasingkopon, hatoguon, nang hadengganon i na pinarsinta ni Debata ima hamubaon dohot ha-tangon ni roha na togu. Dipatuduhon ma disi hagogoon ni Debata mangula ditongatonga nasida, dohot hapataron Harajao ni Debata ditonga ni portibi on. Molo naung mardalan be i, ndada be so mungkin be paulionNa hita ganup tingki asa gabe ruas na tang nang pe di portibi on gok hagaleon nang hasalaanta maradophon dongan jolma nang maradophon Debata.

3.       “Apoan”; Ringkot do apoapo, laho paingothon dalan nang langka nasida asa unang manimbil sian dalan dohot hata ni Debata. Huria na di Korint diapoi Apostel Paulus asa olo apoan, na marlapatan asa siat hata. Molo nunga olo apoan, naolo do dipatingkos, dipauli jala dipatigor roha nang pambahenanna. Alai molo so olo apoan sasahalak tung mansai maol do muba roha nang pangalahona (Rom.15:14;1 Kor.14:3;1 Tess.2:11; 5:14; Heb.10:25) boi do gabe lam madabu tubagasan dosa nang hamaolon.

4.       “Sada ma pingkiranmu”; Ditonga huria Korint na marbolatbolat i ringkot do sisada pingkiran, unang mamboan pingkirannabe manang patujolohon na di pingkiranna. Jotjot do gabe parbadaan molo saipatujolohon pingkiran niba nihilala na dumenggan, hape so jolo binege boha do pingkiran ni dongan di tonga ni parsaoran. Mansai ringkot do na sapingkiran dimanang didia pe; manang di tonga ni keluarga, masyarakat, parsingkolaan, parkarejoan, organisasi, nang ditonga ni bangso dohot negara pe. Rom 12:16 Sada ma rohamu sama hamu: Unang hatimboon pingkiri hamu, alai patutoru hamu ma rohamu tu haserepon; unang parbisuk hamu di rohamu! Ima hasadaon dibagasan nous (akal budi) dohot gnome (ratio). Jadi ndada na naeng dohonon Apostel Paulus : “memang marasing be do pandapot muna, alai na ringkot sada ma hamu”. Alai sabalikna na niigil Apostel Paulus di huria i asa dipargunahon nasida akal-pikiran ima na tinompa ni Debata di jolmai laho sipangkeon mangantusi sangkap ni Debata tu hasintonganNa. Ala ni i do angka selera, kepentingan pribadi nang kelompok pe asa unduk tu hasintongan ni Debata. Sadalan ma tu sosososo ni Apostel Paulus di suratna na asing ( Rom.15:5-6; Epesus 4:1-6,13). Dasor ni Hasadaon ni huria i naeng ma dibagasan hasintongan asa sian hasadaon ni pingkirann i huria i laho pasangaphon Debata.

5.       “Radoti hamu ma dame i”; Mansai maol do dapot hadameon molo nunga marbolatbolat punguan manang huria i, tarlumobi huria Korint. Ala ni asing ni pingkiran na ingkon sada disosoi Apostel Paulus do asa adong dame ditonga ni huria i. Molo nunga mardame nasida sama nasida tontu adong disi las ni roha nang hasadaon. Molo nunga adong dame boi ma menak sude ruas ni huria i laho mamuji pasangaphon Debata di bagas joro manang dipardalanan ni ngoluna. Ala ni marpusat di pingkiran i do sude; molo sai masicurigaan do nasida sama nasida boi do parohon ganggu ni roha nangpingkiran, boi do ndang dame roha. Ala ni i naeng ma gogo ni Tuhan i dipangasahon nasida mian dibagasan roha nasida, sadalan dohot na pinasahat Apostel Paulus di Pilipi 4:7 “Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus”.

6.       “Asa masitabian marhite umma na badia”; Molo di Timur Tengah, hasomalan ni halak disi do molo masitabian dihaol dohot diumma. Pangalaho on patuduhon ungkap ni rohana manjalo donganna, jala hasomalan manang budaya disi do i, alai ndada boi i tarjalo budaya ni bangso na asing. Alai na umporlu ndada tradisi ni i na pinamasahon manang dipertahanton tu budayanta na marasing, alai makna na i do ima: hatomanon. Dung i didok Apostel Paulus muse: “badia” berarti adong do umma na so badia, ima na boi dapot hita sian barita pangalaho ni si Judas na mangumma Tuhan Jesus di Porlak Getsemane. Ala ni i hatomanon na togu jala na tigor i ma na badia, na tulus jala gabe hamuliaon di goar ni Debata.

     C.      Sian poda ni Apostel Paulus on naeng do manjou angka na porsea i asa marsiajar laho masihaholongan dohot masisesaan dosa. Molo naung prinsip ni ngolu boi ma dipature manang dipadenggan dohot roha na gok holong, alai molo so prinsipil, asa marsiajar masiargaan. Holan dibagasan hadameon do boi hita mangolu marhasonangan jala boi dohonon na marsaor dohot dongan sahaporseaon. Jala songon na hinatindangkon par-Psalmen di Psalmen 133:1-3 “.....Ida ma, dengganna i dohot sonangnai, molo tung pungu sahundulan angka na marhahamaranggi..... ai disi do diparbaga Jahowa pasupasu, hangoluan sahat ro di salelenglelengna”.

     D.      Punguan ni huria na adong di portibi on ima na mamuji Debata. Molo na mamuji do ingkon dipatuduhon dibagasan pamujion, endeendena, nang pasidohot sikap ni ngoluna siganup tingki nang siganup ari. Ndada hasadaon holan di parmingguon, di partangiangan, alai naengma dipatuduhon dingolu siganup ari i. Ndada hasadaon pamujion di formalitas ritus ibadah alai dikeseharian. Asa didongani asi ni roha ni Tuhan Jesus, Holong ni roha ni Debata dohot parsaoran ni Tondi Parbadia nasida huria i. On ma konsep na dibuat ama ni huria i gabe digoari “Tritunggal” manang Trinitatis. Nang pe ndang tarsurat hata i di Bibelta, alai tersirat sian ujung ni turpuk on. Jala turpuk on do na jotjot gabe tangiang ni pasupasu ni angka parhalado pandita. Adong ma barita sian Ama ni huria Agustinus; di sada tingki mardalani ma ibana huhut sai mamingkiri misteri ni hasitolusadaon ni Debata: “Tolu alai sada, sada alai tolu”. Dungi pajumpang ma ibana dohot sahalak dakdanak na sai pamasukhon sude aek laut di lubang na metmet di pasir pantai na binahenna. Dung i didok si Agustinus ma na marisuang do ulaonna i. Dung i dialusi dakdanak i ma mangalusi; lam ma pamasukhon Debata na mansai balga i tu pingkiran ni jolma na metmet i. Sian barita on naeng antusanta Debata sitolusada i; boha do parjadina i? alusna ima ala ni HOLONG. Debata do HOLONG i songon na nidok di 1 Johannes 4:8 Halak na so marholong ni roha, i do na so tumanda Debata, ai haholongon do Debata”. Asa hasadaon na boi masa di Debata Ama, Anak dohot Tondi Parbadia ima ala ni HOLONG (masihaholongan; ndang searah alai dua arah), laos masihaholongan do poda na pinsahat tu hasadaon ni ruas ni huria di Korint i. Songon hasadaon ni Debat Ama, Anak dohot Tondi Parbadia i. (ptds. Joh.6:13). Ala ni i ndang tarpatorang hita Debata na Balga i marhite pingkiranta manisia na metmet on. Boha ma pingkiranta mandodo habalgaonNa di na manompa langit dohot tano ro diisina, nang manompa hita manisia. Tung diparade do di hita angka na dumenggan di ngolunta di portibi on. Alai tahe ndanda holan na di portibi on dohot do nang sahat tu hangoluan sogot. Hita jolma naung madabu tubagasan dosa on do na jotjot na so mananda diri. Hape Debata nunga dipasahat Anakna Jesus Kristus lahomanobus sude dosa nang hasalaanta asa partohap hita di Harajaon Na Saleleng ni Lelengna i. Ido asa angka siihuthon Kristus tama ma Mamuji Debata Sitompa Nasa na Adong, songon topik ni minggunta. Ngolu na mamuji Debata ima ngolu na manjaga parsaoranna dohot dongan jolma nang dohot manjaga lingkunganna marhitehite HOLONG na sian Debata i. Amen

Bahan Jamita Evangelium Pentakosta II – 9 Juni 2014

Malua Do Ganup Na Manjou Goar Ni Tuhan i

Ulaon Apostel 2 : 14 – 21

    1.       Peristiwa Hasasaor Tondi Parbadia, i ma sada titik awal na mangonjar hararat Barita Na Uli dohot parherbang nihuria Kristen di sandok portibi on. Andorang so manaek Tuhan Jesus tu Banuaginjang dibagabaga do Tondi Parbadia tu angka siseanNa (Joh. 14: 26; Mat.28:19-20). Jala dipatudos Debata do bagabagaNa di ari Pentakosta marhite haroro Tondi Parbadia. Ia turpukta on i ma konteks peristiwa  haroro ni Tondi Parbadia mangalehon huaso na balga tu angka sisean na gabe masa pangalaho na so dung dope dialami manang diulahon nasida, isara marhata sileban. Sada hal na paling menonjol na binasabasahon ni Tondi Parbadia tu angka sisean i ma tu si Petrus, na gabe marjamita ibana dibagasan huaso, kharisma, manang marsahala. Jamita na marsahala ima na gabe mamuhai roha ni natorop natumangihonsa. Hape ndnag dung dope si Petrus marjamita songon i hebatna di tingki rap dope nasida dohot Jesus. On ma sada hata hataridaan ni hagogoon huaso na nilehon ni Tondi Parbadia.

    2.       Angka sisean ni Jesus na ginohan ni Tondi Parbadia, boi manghatahon habalgaon ni Debata di hatiha i. Pola longang na deba marnida na masa i, alai deba nari mandok: “Na gok Anggur” do nasida. Marragam do pandohan ni natorop na adong, alai holan angka jolma na mangantusi do boi manjalo na masa i hombar tu bagabaga ni Debata di Padan na Robi. Songon i ma dihilala sisean ni Jesus hatiha i, boi nasida amungka laho “marpangkuling na asing”, marguru tu pangalehon ni Tondi i tu nasida. Sude sisean i halak Galilea do, alai boi manghatahon taringot tu Debata dibagasan sude parhataan na adong di portibi on. Ai halak Israel na ro tu pesta pentakoste di Jerusalem uju i, ndada holan ro sian angka huta ni halak Israel, alai sian sude inganan di portibi on do di dia parserahan ni nasida maringanan saleleng on ima halak Jahudi na ro sian Partia, Media, Elamit, Mesopotamia, Judea, Kappadosia, Portua, Asia, Prigia, Pampilia, Misir, Libia, Roma, Kreta dohot Arab.

   3.       Memang molo so mangantusi gabe asing do angka parhataan nang pangalaho ni angka sisean na sinonggopan ni Tondi Parbadia i. Asing do tanggapan ni natorop na ro tu pesta i, ala ni i do gabe hehe si Petrus dohot donganna na sampulu sada i, laho patubegehon soara nasida. Dipangkulingi nasida ma sude natorop i, paboa na so mabuk nasida saluhutna.Paboa pungkul sia dope ninna si Petrus. Jala mansai sintong do na pinaboa ni si Petrus; ndada apala so diboto donganna sabangso i taringot panurirangon panurirang Joel, ai somal do tradisi lisan, manang sai dibaritahon do tu angka pinompar ni Israel i (sian natoras tu ianangkon). Nang pe naung tardok leleng na hinatahon ni panurirang Joel, ima hirahira 400 taon na salpu di tingki i, alai boi do diingot bangso i, siala na mansai lohot do sue angka na masa i. Panurirangon ni si Joel i gabe sada ojahan di Apostel  Petrus laho patoranghon hasisingkop na nidokna i, na so holan bagabaga sambing sian Debata, alai tarida do di bagasan ulaon na balga marhite haroro ni Tondi Parbadia di tingki i. Molo tingkos do parugamoon nasida, ndang adong na mandok na so tingkos taringot tu na masa i. Ai hagogok ni Debata do na masa i; boi manurirangi angka sisean ni Jesus jala boi diantusi angka na umbegesa.

     4.       Dijamitahon si Petrus ma muse ha ni Panurirang Joel, na asing;l i ma taringot tu patujolo ni ari ni Tuhan i, ari na balga i, na ingkon masa muse asing ni haroro ni Tondi Parbadia i. Ingkon godang do masa parmaraan andorang so ro ari ni Tuhan i, songon na masa andorang so malua bangso Israel sian Misir, adong sampulu uhum na pinamasa ni Debata Jahowa tu nasida. Songon i do na masa patujolo ni ari ni Tuhan i, adong tanda-tanda na boi songon singotsingot sian Debata (ptds.Pangk.9:3-11). Panurirang Joel mandok; “Muba do mataniari gabe mangholom (gerhana mata ni ari), bulan i pe songon mudar. On ma tanda-tanda patujolo ni ari ni Tuhan i. Sude na masa on, ndang na gabe pabbiarbiarhon, alai asa manat jala managam sogot hombar tu na taula tagan di hasiangan on. Alai mauliate ma tadok tu Tuhan i, andorang so ari na balga i, dilehon do Tondi Parbadia tu sude angka na burju marroha, ndada holan tu halak na tertentu be na sinonggopan ni Tuhan i. Dibahen i unang ma lupa hita di angka Hata ni Debata naung tabege jala tajaha di Buku na Badia i.

    5.       Sikap ni angka siihuthon Kristus naeng ma songon si Petrus na margogo jala marbisuk laos rade mangalehon hatorangan, jala paingothon na sintong hombar tu Hata ni Debata. Dijaman nuaeng on lam margogo do panosak ni portibi on, dohot pangela ni sibolis i, asa lupa hita di Hata ni Debata. Ala ni i di parningotan Hasasaor ni Tondi Parbadia na paduahon on paingothon hita asa unang lupa hita impola ni parningotan na paduahon on, asa ampit jala tandap tubagasan rohanta parningotan i. Jala asa taelekelek tu Debata pasaorhon Tondi Tondi Parbadia i tu rohanta ganup asa diparbisuhi hita, dipatiur parningotanta di HataNa i, laos taulahon parsuruonNa i.  Hasasaor ni Tondi Parbadia ndada masa i holan di tingki ari Pentakosta alai marlangku do diganup tingki dungkon hehe Jesus tu Banuaginjang sahat tu haroroNa na paduahon muse. Tondi Parbadia mangalehon huaso tu angka na porsea laho manghatindanghon haporseaonna, ima Jesus Anak ni Debata jala asa malua do ganup na manjou Goar ni Tuhan i (sian torop houm dohot bangso; nang pasidohot lingkunganta-KPKC ptds. Pil2:10-11). Amen  

Bahan Jamita Evangelium Minggu Pentakosta 1, 8 Juni 2014

Ragam Do Parasinirohaon Alai Sada Do Tondi

1 Korint 12 : 3 – 13

    1.       Ia Huria Korint i ma sada Huria na pinajongjong ni Apostel Paulus di tano Gorik. Mansai hatop do berkembang Huria i. Pola gabe pusat ni ha-Kristenon  do luat Gorik. Hira huta hadomuan ni angka na pistar do huta Korint. Ai torop disi angka na pistar, pande bisuk, na ginoaranna filsuf, na sai holan mangondolhon habisuhonna, hasisintong ni pingkiranna, na mamodahon ia na tutu i ma molo domu jala toho tu pingkiran ni jolma. Mardomu ma muse marragam do disi angka ugamo, marragam ma haporseaon. Marjongjongan ma angka inganan parsombaon sian sude ugamo. Gabe hira so adong poda haporseaon na polin sian sadasada ugamo na dihaporseai pangisi ni huta i. Hira na marsampur ma sude pamodaion dohot pangahporseaion taringot tu Debata. I do umbahen na nidok, godang do halumlamon dohot angka na sumsam di huta Korint. Gabe mamparhorhon do tu ngolu ni ha-Kristenon ditonga ni huria hatiha i. Molo tajaha sude isi ni surat 1 Korint on, boi do tapaihutihut manang beha perkembanganna, tarlumobi di ragam ni angka talenta manang kharisma na tubu ditongatonga ni halak Kristen na di Korint i, isara talenta marhata sileban (glossolalia), pamalum sahit, manurirangi dohot angka na asing. Sipata tubu do persaingan na so denggan ditongatonga ni angka nasida na martalenta na marragam i. Tarlumobi molo tajaha di Bindu 12 on, boi jahaonta na tubu mara ditongatonga ni Huria, ala naung lipe pangantusion dohot pangulahonon di angka talenta manang kharisma.

     2.       Laos hombar tusi do umbahen na jotjot Apostel Paulus mamangke tudosan dohot perumpamaan. Jotjot do si Paulus mamangke tudosan tudosan laho mangalehon hatorangan dohot pangantusion taringot tu hasintongan ni pangajarionna. Diumpamahon si Paulus do huria (bhs. Junani; angka na porsea tu Jesus), sada hasadaan na hibul songon pamatang ni jolma (daging), na marrumang sian angka ruas, ndang sada ruas, tung torop do. Manggombarhon na asing be bentuk dohot fungsina; mata, tangan, pat, pinggol, d.n.a. Alai marhasadaon, masirainrainan secara langsung manang secara refleks. Bagian ni pamatang i do ruasna i, jala ingkon disi do asa utuh, ala ni i do sada keutuhan na so tarsirang nasida tu na sada. Molo tung adong na so berfungsi boi do mampangkurangi tu nasida jala asa boimasiurupan.

    3.       Gombaran ni pamatang do angka na porsea tu Tuhan Jesus. Pamatang ni Kristus jala ruasna (ptds.Gal.3:8) rap arga do i dijolo ni Debata ala sude jolma na di portibi on na tinompa ni Debata do. Ala ni i ndang adong parasingan di Debata (ptds. Ndang siida bohi Debata), dos do sude jolma i diadopan ni Debata (sian ragam ni parhataan, nang houm) di portibi on. Songon pamatang i do tudosanna, ndangna gabe sumurung na sada sian nasadaan, alai ibana mamereng, marbinege, maniop, manjaha, mangalangka; alai rap marguna do luhutna, suang songon i do jolma i (ruas) ni huria i. Ndada sude sisia gogo, ndada sude na pistar, na malo; adong do na hurang roha, na oto, na nengel, na mapitung, na pampang, dna. Ala ni i do umbahen digombarhon tu pamatang angka na porsea tu Jesus, jala didok Pamatang niKristus, asa unang adong na so arga jala marguna di Debata, saling melengkapi, saling membutuhkan, jala masiurupan (ptds. Galatia 6: 2 “Masiurupan ma hamu mamorsan angka na dokdok i; i ma dalan mangaradoti patik ni Kristus”; Ep.4:11-13).

     4.       Ala ni i ndang adong nanggo sada na so ringkot ruas manang na porsea i di adopan ni Debata. Angka ruas ni pamatang ni Kristus ima huriaNa i di portibi on marasingasing be silehonlehon na jinalona sian Tuhan i, alai rap arga do i di Ibana, ndang marsisurungi sada tu na sada nang pe adong be surungsurungna secara sosial, ekonomi, budaya, dohot politik. Alai di jolo ni Debata saluhut do hita ruas berfungsi jala marguna naeng pangkeon ni Debata gabe ulaulaNa. Ndang adong ruas nang kelompok na mangarajumi dirina na terhormat. Asa molo adong pe nilai tambah secara kwantitas dan kwalitas na marasing  alai fungsina sada do; ima asa marsangap Debata. Ala ni i ingkon ulahonon do angka ulaonta hombar tu silehonlehon na sian Ibana laho patureturehon angka na badia jala pauliulihon pamatang ni Kristus (ptds. Epesus 4: 11-13). Jala esensi ni ngolu ni jolma; ndada mangolu di portibi on si Adam holan dirina alai dohot do mangurupi ibana si Hawa di tompa asa masipauneunean. Ala ni i mahkluk sosial do ianggo jolma i, ndada mangolu holan di dirinta jolma i molo adong be silehonlehon, alai dohot do na di dongan sarihononta (ptds. Pil.2:3-4). Molo pe asing be angka silehonlehon marguru tu asiasi na jinalona ingkon pangkeonta i laho masipatureturean, masiurupan songon sada daging di bagasan Kristus.

     5.       Songon naung tinaringotan di Epistelta Psalmen 104:24-34;manaringoti sude angka na tinompa ni Debata asa mulak tunatinompa na imbaru marhite jolma naung nilehonNa mandat/tugas laho mangaramoti angka natinompa i. Ditompa Debata jolma i jala dilehon do angka talenta talenta na marasingasing be hombar tu asiasi na jinalona be. Jala dilehon Debata do tu hita kebebasan asa pahembanghonsa di segi kwantitas dohot kwalitas, alai kebebasan na bertangging-jawab ma. Tu ganup jolma, sian ragam houm, nang bangso dilehon do talenta na marasingasing, jala laos adong be do angka hahuranganna be dohot hagaleonna. Marhasurungan be do na sada tu na sada, alai ndang sihaginjanghonon i, alai gabe silas ni roha laho pauliulihon dohot laho masiurupan  paboa na sisada daging, sisada Tondi na manompa langit dohot tano on rajumanta siihuthon Kristus. Ingkon lam bidang panatapan ni siihuthon Kristus laho sumarihon nang angka lingkunganna be; na bermasyarakat, berbangsa dan bernegara, manjaga haulion ni alaman, nang angka na tinompa ni Debata. Siala na saling berpengaruh jala membutuhkan do hita disi; Sian lingkungan keluarga nang ama, ina, ianakhon marsiurupan sisada roha, na bertetangga, na saparsingkolaan, na saparkarejoan, dohot na sapartai, saorganisasi, dna.

    6.       Tarlumobi ma angka na porsea i di huria ni Tuhanta i; sisada haporseaon sisada Tondi; disi ma dipatuduhon songon napinodahon Apostel Paulus di Rom 12: 15 – 16  “Marlas ni roha ma hamu rap dohot angka na marlas ni roha, jala tangis ma hamu rap dohot angka na tangis! Sada ma rohamu sama hamu: Unang hatimboon pingkiri hamu, alai patutoru hamu ma rohamu tu haserepon; unang parbisuk hamu di rohamu”. Ganup angka na porsea sai adong be do fungsi dohot tugasna be, naeng sada pamatang ni Kristus ima huria ni Tuhanta ditonga ni portibi on. Asa molo naung sada sai boi do denggan jala tulus na pinarsinta ni Tuhanta angka ulaon asi ni roha ditonga ni huria; ulaon panghobasion, pembangunan sarana pelayanan dohot ulaon zending pe. Alai molo so sada jala masitihasan, disi ma tondi ni sibolis, portibi – hadagingon na mamolamola (Gal.5:19-21). Ido asa di Parningotan ni Hasasaor ni Tondi Parbadia 1 on manungguli hita huaso dohot gogo ni Tondi Parbadia i marmahani hita. Songon naung pinodahon Apostel Paulus di Galatia 5: 22-23 “Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Ndang maralo patik dompak angka sisongon i.” Asa molo naung mamparbuehon parbue ni Tondi ima na saguru tu lomo ni roha ni Debata. Jala angka na porsea dibagasan Jesus Kristus diigil Debata asa mulak tu ‘citra/rupa/image ni Debata hian andorang so madabu jolma i tubagasan dosa. Molo nunga dirahut dibagasan Tondi ni Kristus disi ma dipatuduhon hasadaon dohot Debata nang hasadaondohot dongan sahaporseaon. Ala Kristus do na “Padamehon; Patomuhon; Pasadahon hita jolma pardosa dohot Debata marhite HOLONG-NA i. Taparrohahon ma nanidok Apostel Paulus di Epesus 4 : 3 – 16

4:3 Haringgashon hamu ma mangaradoti hasadaon ni Tondi, pinadomu ni dame!

4:4 Ai sada do daging i, jala sada do Tondi; ai songon i do hamu tarjou di bagasan sada pangkirimon di panjouon i.

4:5 Sada do Tuhan, sada do haporseaon, sada do nang pandidion.

4:6 Sada do Debata, Ama ni sasude, sigomgomi saluhut, sitorusi saluhut jala siingani saluhut.

4:7 Alai tu ganup hita be do dibasabasahon asiasi i, marguru tu panagihon ni pangalehon ni Kristus.

4:8 Dibahen i ninna do: "Nunga manaek Ibana tu ginjang, ditaban do na tarhurung; dilehon do silehonlehon tu angka jolma!"

4:9 Alai nangkok pe Ibana, naung tuat do Ibana jumolo tu inganan na ditoru ni tano.

4:10 Ibana, naung tuat i, laos I do na manaek tu ginjang ni saluhut banua ginjang, asa digohi sasude.

4:11 Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari,

4:12 patureturehon angka na badia i, laho mangulahon tohonan i, pauliulihon daging ni Kristus:

4:13 Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus.

4:14 Asa unang be hita dakdanak, angka na pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angkal na paotootohon.

4:15 Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus.

4:16 Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i.

------------ A  m  e  n ----------

Bahan Jamita Epistel Minggu Pentakosta I, 8 Juni 2014

Tapuji Ma Debata: TondiNa Mandongani Hita

Psalmen 104 : 24 – 34

1.    Jumolo do diparade Debata nasa na mendukung ngolu ni jolma i, di darat, di laut, di udara na memungkinkan kelangsungan ni ngolu ni jolma. Ibana do na manompa angka dengke di laut ro di angka pidong na martongatonga langit. Diparade Ibana dolingkungan na suman (ay.26) marhitehite na manompa inklim na berlaku. Menyesuaikan diri ma ganup na tinompa ni Debata di ingananna be, jala dilehon Debata do daya adaptasi laho menyesuaikan dirina be ditongatonga ni saluhut na tinompaNa i. Na sumurung do daya adaptasi ni manisia sian saluhut na tinompa ni Debata na asingna i.

2.    Molo mangaranap angka na tinompa i tu Debata, dilehon Ibana do sipanganonasida di tingkina be. Molo dung dilehon Debata sipanganon i tu nasida, dijomputi nasida do, molo dipatedek Ibana tanganna, dung i butongan ma nasida di na denggan i. Alai molo ditabunihon Debata bohiNa, holsoan ma na tinompaNa i, Ditait Debata ma hosanasida, monding ma nasida, jala mulak nasida tu orbuk nasida hian (Ay.29). Alai molo ditongos Debata  TondiNa, tartompa ma nasida, jala dipaimbaru rupa ni tano on.

3.    Molo taparrohahon ngolunta on ndada boi hape marlomolomo. Idaonta nang begeonta pigapiga barita taringot tu halak na marlomolomo ni rohana gabe sega do muse. Adong na marlomo ni roha di hangiot ni pamatangna isarana; lomo rohana sai manginum minuman keras manghorhon halosohon dohot sega ni hahipason, suangsongon i na mamangke narkoba, na balapan liar dijalanan, na manabai hau di tombak, na mambolonghon sampah sembarangan manghorhon polusi dohot banjir. Hape nunga diatur Debata dimulanai saluhutna na tinompaNa langit dohot tano on ro diisina. Sude do nunga diatur Debata boha do parhusoran ni angka tingki dohot angka bulan, bintang nang mata ni ari. Dungkon i angka binatang pe nunga diatur, adong na haruar di tingki borngin (nakturnal), adong na di tingki arian, adong na modom arian, adong na modom dibornginnai. Dungi adong angka suansuanan na marbunga di tingkina be. Laos songon i do dohot hita manisia, nang pe hita jolma na tumimbo sian angka na tinompa ni Debata, tongtong do ditoru ni huaso ni Debata. Alai jotjot do hita lupa dihajongjonganta; isarana ditingki marhasil di parkarejoan, di rumatangga, dna. Jotjot do taantusi sian gogonta sambing i ndang adong pangantoion ni Debata. Hape molo masa parsahiton, panaritaan, dihapogoson, jotjot do taantusi na pinasombu Debata do hita disi. Naeng do rajumanta nang antusanta sude natinompa ni Debata nunga ditotophon ditingkina nang ingananna be laho pasauthon lomo ni rohaNa.

4.    Ala ni i asa sai hot hita di na naung tinotophon ni Debata  tu hita dohot na pasauthon lomo ni rohaNa, naeng ma sude angka natinompaNa unduk dohot satia mangoloi sude angka naung tinotophonNa. Hasatiaon ma na gabe sada tanda pangalusionta tu pambahenan ni Debata dinaung jumolo pinasahatna dibagasan parngoluonta. Alai jotjot do hita lupa asa satia tu Debata. Jotjot do siala sai tahalupahon angka na uli na denggan natajalo asa sian angka harugian nang hamaolon. Boasa sai jotjot jolmai manghalupahon angka na uli na denggan natinompaNa i ? Ido asa dipaingot parpsalmen on di ayat 29 huaso ni Debata di angka natinompaNa i. Molo lomo ni roha ni Tuhan i boi do sigop mago hosa ni jolma i (ptds. Aek na sumar i). Alai ndang dihalupahon Ibana angka na tinompaNa i sandok diparmudumudu do jala diramoti. Tarlumobi hita jolma, ndang halupahononNa hita, ndang loasonNa tarsulandit jala dibagasan haholomon. Ido asa diarahon parpsalmen on asa sude hita mamuji pasangaphon goarNa i. Sude tahe angka jadijadianNa diramoti do, hape hita jolma do natinodoNa laho manjagahon na lupa gabe manegai pamatangna sandiri, lingkungan (ndang adong be keseimbangan ekosistem) be. Ingkon loja do jolma laho mamilangi saluhut na tinompa ni Debata, ai tung lan situtu do bilanganna ro di jenis na tinompaNa i. Gok situtu do tano on dibahen Debata, jala saluhutna do i porlu hombar tu ringkotna di portibi on. Adong do ketergantungan ni na sada tu na sadanari (mutual simbiosis) adong bentuk ni mata rantai na saling membutuhkan. Tutu ma dipauli Debata sandok tano on marhitehite hapistaranNa na so hadodoan i.

5.    Tondi ni Debata do na pangoluhon angka na tinompaNa i, gabe tartompa ma nasida. Mulak ma citra (rupa; imago Dei; gambaran) ni Debata tu na tinompaNa i songon di mulana ‘denggan’. Tusi do tartompa saluhut na tinompa ni Debata. Tondi ni Debata do na pahehehon na tinompa ni Debata, jala huasoNa i do na patupahon saluhut habalgaonna i. TondiNa do nang na paimbaruhon rupa ni tano on, gabe ‘denggan’ ma i songon di mulana i. Mardame ma na tinompaNa i dohot pambuatanna hian, i ma tano i. TondiNa i do na paimbaruhon tanggung-jawab ni hajolmaon laho mangaramoti haimbaruon di sandok portibi on. Diramoti Debata do sude langit, tano ro di isina pe, ndang adong saotik pe na malua sian panatapanNa. Molo Debata na mangaramoti, tontu jagaonNa do i asa lam tu dengganNa, alai jolma i do na jotjot manghalupahon dohot na tagi dihagiotna sambing hinorhon ni naung madabu tubagasan dosa i. Ala ni asi dohot holong ni rohani Debata do asa boi hita mangolu jala dapotan haluaon sian dosa pangalaosionta marhite AnakNa na Sasada i ima Jesus Kristus i (ptds.Joh.3:16). Martanggung-jawab do saluhut jolma naung pinaimbaru ni Tondi ni Debata laho mangaramoti nasa na tinompaNa, laho pauliulihon, ndada lahomanegai portibi on (ay.30,35). Pardosa do na sai manegai portibi on, jala sai siap ma i nian, jala unang adong be angka parjahat (ay.35). Di portibi on do mangolu hita, di tano na tinompa ni Debata dibagasan rupa (citra, image) na imbaru.

6.    Dipuji parspalmen on do Jahowa, asa hot ro di saleleng ni lelengna HarajaonNa i di portibi on. AI na marmulia do Jahowa na patupahon haimbaruon di saluhut na tinompaNa i. Marlas ni roha do angka jadijadianNa ala ditongos Debata TondiNa umbahen tartompa nasida (ay.30). Ibana do tutu na manompa angka dolok ro di hagogoon na mian dibagasanna. Dipaboa parpsalmen on do balga ni rohana dohot gogona laho mangendehon Jahowa saleleng ni ngoluna, huhut umpalu parhinaloan mamuji Debata saleleng adong dope ibana (ay.33). Sai marlas ni roha do pr-psalmen on marnida pambahenan ni Jahowa di ngoluna.

7.       Minggu Parningotan Hasasaor ni Tondi Parbadia do hita nuaeng (Pentakosta I), ala ni i marlas ni roha ma saluhut naung manjalo Tondi ni Debata, i ma angka halak naung tartompa, jala na pinaimbaru ni Debata. Dipatuduhon do las ni roha i marhite na mangendehon Jahowa, na marningot sude angka habalgaon na pinatupa ni Debata. Diramoti Debata do keselamatan ni nasa na tinompaNa i. Ditongos Ibana do TondiNa asa tartompa angka na tinompaNa i, jala dipaimbaru rupa ni tano on. Lam ma hita jolma dilehon do dalan haluaon (keselamatan) di hita marhitehite Anak ni Debata ima Jesus Kristus i, laho manesa dosa nang pangalaosionta, asa malua  hita sian hamatean na saleleng ni lelengna i tu hangoluan na saleleng ni lelengna i. Ndada holan na sahat di portibi on hape disarihon Debata hita alai ro di hangoluan sogot pe tahe dohot do ingkon taruli hita disi. Asa marhite Tondi Parbadia naung sahat tu hita sai paingothon roha nang tondinta di Hata nang patik ni Debata na gabe bohal partodnionta. Asa satia hita tu Ibana, antong taingot ma nanidok ni endenta sian BE. HKBP no.92: 3 “I do las ni rohanami Lao mamujimuji Ho; Ndang be sitoruan hami Ala na dung mate Ho; Dungkon ni mangolu Ho Nunga ringan tondinami; Sian hangoluanmi Ala hamonanganmi”. Ala ni i taloas ma Tondi Parbadia laho mangarajai roha nang pingkiranta asa tartompa na imbaru hita jala tarjou hita manjaga angka na tinompaNa i gabe dalan pasupasu di ngolunta, songon nanidok BE HKBP No. 12: 12, 15 “Sai disarihon Ho sude Di hasiangan on; Tu daging nang tu tondi pe Panongos Ho tongtong” : “Antong pasombu Debatam Mambaen ture langkam; Asa tongtong sonang rohaM Timbul dohot tuam”. Molo nunga songon ende i panindangionta, sai marlas ni roha ma hita manghatindanghon Tuhan i.