Jahowa
do Siparmahan Hita
1 Petrus 2 : 19 – 25
1. Ia
surat Petrus on ima surat epistel (penggembalaan) na ginurithon ni Apostel
Petrus ( 1:1,ptds.1:12; 4:13; 5:1-2, 5, 13) di Babilonia, sada kota na metmet
di Eufrat ( 5:13) di taon 62-65 AD, siala mate martir do si Petrus di tingki
panggomgomion ni Kesar Nero. Na manjalo surat ni si Petrus on ima angka halak Kristen
na diaspora (ima halak Jahudi na porsea jala na marhata Junani di luar luat
Judea ima na ginoaran Hellenisme) na maringan di Pontus, Galatia,
Kappadokia, Asia dohot Bitinia ima di Asia na metmet, jala somalna ro
do nasida tu Jerusalem di tingki Ari Raya Pentakosta (Ul.Ap.2:9-11). Digoari do
nasida ‘halak dagang’; paisolat (musafir) di portibi on-stranger in the world ; patoranghon, na so adong
ianggo inganan na hot di portibi on tudos songon na nidok Ap.Paulus di Pilipi
3: 20-21(band 1 Taw 29:15; Maz 39:12; Ibr 13:14).Di
inganan paisolatan i tontu godang angka ruhut, aturan na niuhal sian pingkiran
ni jolma, ndang sian hata ni Debata, na so ‘produk’ ni hakristenon. Asing ni i,
ala na ginomgoman ni halak Rom do nasida, tontu do mardalan angka hatontuan ni
Kesar laho mangatur masyarakatna. Tama do hormatan angka uhum naung mardalan
sange di masyarakat. Diahen i tama do unduk maradophon uhum na sinuan di
hajolmaon. Ala sadalan do uhum tu na mandalanhon uhum, nang tu angka panguhum
pe ingkon unduk do (ptds. Rom13:1,4).Alai
adong do ‘rumus’ haunduhon tu uhum dohot tu angka raja , ima molo sipinsang
hajahaton jala sipuji na denggan do uhum dohot panguhum i ima dalan mangaramoti
dohot marmahani masyarakatna. Unang ala na mabiar mida bohi, nda tung songon ala
naung manaon panghilalaan gabe marhaunduhon. Marhite uhum na nidalanhon ni
angka panguhum saut angka na denggan. Ala ni i tama do marhaunduhon tu uhum
dohot panguhum na songon i. Alai di situasi ni turpuk on angka panggomgomi
dohot panguhum jotjot patupahon kekerasan tu halak Kristen, ndang diparmahani .
Ndang pola maralang rohanasida patupahon kekerasan i, mardomu ala ndang warga
Negara Roma dope halak Kristen i jala ndang sahaporseaon dohot masyarakat Rom.
Asa tung marsitaonon do halak Kristen ala goar ni Kristus na binaritahon nasida
( 1 Petr.4:14,16).Petrus
khawatir kalau-kalau orang percaya membangkitkan ketidaksenangan pemerintah dan
menasihatkan mereka untuk mengikuti teladan Yesus dalam menderita dengan tidak
bersalah, benar, dan luhur.Na
manghirim do huria i huhut mardalan di sude tingki dohot inganan laho manuju
huta na manongtong sambulo hasonangan i. Asa nang pe manaon huria i saleleng di
tano on, na mangihuthon bogas ni pat ni Kristus i do i, tiruan do i diangka na
porsea ( 2:21). Jala ia ro pe angka hinamago, Ibana do na manganahon tondi asa
unang mago ( 2: 21,25).
2. Dibagasan
turpuk on ditaringoti songon dia do sasintongna halak Kristen gabe siihuthon
Jesus Kristus. Ia Kristus i, na rade do Ibana manaon nasa ragam ni na porsuk di
portibi on, paima sahat Ibana tu Harajaon ni Amana, jala justru sian jolma
pardosa i sandiri ma mangampehon tu Ibana haporsuhon na so marsamari i. Dioloi
Tuhan Jesus do i na gabe dalan haluaon ni hajolmaon di hasiangan on laho
manopot hasonangan sisaleleng nilelengna. Molo di umpasa ni halak Batak adong
do didok; “Ompunta sijolojolo tubu
martungkothon siala gundi, na pinungka ni ompunta na parjolo taihuthon sian
pudi”. Na marlapatan, asa unang mago boti angka na pinungka ni ompunta na
parjolo i, sai diparata ma i, gabe warisan dokumentasi tu angka generasi na
mangihut. Boi do godang angka na positif manang na denggan sian angka na
pinungka ni ompunta na jolo, alai huhut dung mangolu hita di hakristenon on
nunga naeng godang muse sipatureon hombar tu ruhut hakristenon i.
3. Molo
didok mangihuthon Kristus, ndang adong be sipatureon disi, alana singkop do
pangulaon ni Jesus saleleng di portibi on Ibana patupahon angka sitiruon i tu
ngolu ni hajolmaon. Ndang adong disi siralaton, isara ni na sala pangantusion
rupani. Ndang adong sipertimbanghonon disi. Boi do di roha ni sada halak, na
bersedia ibana laho mangihuthon Tuhan Jesus, alai unang ma dohot laho
mangihuthon di haporsuhonNa i. Holan na tabona i ma nian siihuthonon di rohana.
Molo partinaonan ni Kristus i, unang pola dais tu ibana nanggo apala saotik,
sae ma holan Jesus tusi. Hape di na rap manaon hita dohot Kristus, laos di pemahaman i do hita rap di pahehe
jala rap siparjambar di hangoluan saleleng ni lelengna.
4. Sian
Bonana sahat ro diujung ni pangulaon ni Jesus di portibi on, holan sitiruon do
na naeng sanggam di jolma manisia. Molo diula Tuhan Jesus pe mamuri pat ni
angka siseanNa, tong do didok “sitiruon
do hubahen tu hamu....”. Ianggo bogas ni halak di portibi on, mura do
ihutihuthonon, jala mura do tardapot di angkalangkalna. I do umbahen didok,
“jempek do pat ni gabus”. Ai na sai tarjepol do jolma i di angka bogasna, agan
pe sai tongtong diuji jolma i sai naeng marsitabuni di angka pangalahona na so
ture i.
5. Ulaon
panghophopon ni Tuhan Jesus di turpuk on, ditaringoti na mangae na porsuk Ibana
sahat tu dolok Golgata, holan laho paluahon jolma sian dosa nang hamatean i.
Ndang na ngernger partinaonan ni Jesus disi, alai ndang pola dirajumi i laho
dipasingirhon (dipiutangkan) tu jolma i, gariada dipasahat do diriNa tu
panguhum na tigor i. Diampu Ibana na bernit i, dohot tujuan asa malua nasa
hajolmaon sian habernitonna. Diampu
Ibana bugang i, dohot tujuan manobus jolma i asa malum bugang dosa na saleleng
on manggompang di jolma i. Gabe parmahan na denggan roha ma Jesus na manarihon
saluhutna angka na ringkot di ngolu ni hajolmaon. Dipareso do nang partondion
ni jolma i, asa unang tu hamagoan, alai dianahon, dijamothon asa unang
marisuang panghophopon i.
6. Ianggo
pardalanan ni hajolmaon di portibi on, tudos do i tu birubiru na lilu, na
marsitondong dalanna so binoto dompak dia muse tujuanna. Alai dung andap
Kristus di ngoluna, ndang songon na so martujuan be ngoluna i, alai nunga adong
tujuan na pasti, i ma surgo hasonangan na pinarade ni Debata i. Ianggo portibi
on, nunga godang angka na manggoari dirina parmahan nian, alai gabe parmahan na
lam mandaodao sian jampalan na lomak dohot sian siinumon na tio. Nunga godang
angka parmahan na holan manarihon dirina sandiri, ujungna gabe songon parorot
na manggallang tugo ni na pinarorotna.
7. Tung
sengaja do nian kehadiran ni Tuhan Jesus gabe Parmahan na denggan di portibi on laho
memperagahon angka sitiruon di tongatonga ni hajolmaon. Alai tung godang do
sian jolma i na holan longang sambing, so sahat tu na mangantusi hadirion ni
Jesus na gabe Parmahan di ngoluna siapari on. Di deba pangalaho, nang pe naung
dibahen Tuhan Jesus angka sitiruon i, alai gabe angka sitiruon na di portibi on
do jotjot mangalalapi jolma i gabe ndang tu paniruon na sasintongna. Olo ma
sipata holan ihutihut siborok, eme na masak digagat ursa, i na masa i ma diula.
Molo songon i do angka na dangoldangol sisilon ma i jala siutahonon ni Debata
do na songon i, ala parroha na haru so haru do i.Boasa maol jolma i maniru
Tuhan Jesus ? rupa naung godang do dipatuduhon portibi on angka sitiruon na
manuman numan, gabe samak ma paniruon ni jolma i, ujungna ndang sitiru Jesus
be, alai na munafik nama (berpura-pura).
8. Ditingki
na parpudi on, taparungkilhon do angka hamaolon na niadopan ni huria na adong
di Indoneisa on, isarani: angka ijin na pajongjong gareja, na manegai gedung
gereja, dohot hamaolon naniadopan siihuthon Kristus, ndang denggan diparohahon
dohot diparmahani rakyatna, sai hira marasing harohaonna. Marhite jamita on,
dipaingot hita, ala sian Debata do ganup panggomgomi na marsahala, i ma
panggomgomi na manghajongjongkon hasintongan, na mangalo hajahaton, jala na
manumpak sude masyarakat tu hasonangan, patut
hita unduk tu nasida. Jala gomos tatangianghon, asa anggiat mabiar
nasida mida Debata. Alai molo adong angka ‘kebijakan’ na pinatupa ni
panggomgomi, na maralo tu Hata ni Debata, ingkon tonghtong ingotonta songon alus
ni si Petrus dohot angka apostel i; “Ingkon oloan do iba di Debata asa di
jolma” (Ul.Ap.5:29). Molo tung masa songon i boi do hita mangadopi sitaonon na
dokdok, songon na masa uju i tu naposo ni Debata si Sadrak, Mesak dohot
Abednego (Dan.3:8-23), manang songon na masa tu pitu huria hasahatan ni surat
Pangungkapon na tu si Johannes, ai torop sian nasida na ingkon mate ala
panindangion ni Kristus i. Unang pola mabiar hita, hata borhatborhat na
pinasahat ni Jesus tu angka siseanNa, na mandok : “Unang pola mabiar hamu mida angka na mamunu daging, angka na so tuk
mamunu tondi; alai na marhuaso mangagohon daging dohot tondi tu naroko i, ido
sihabiaranmuna” (Mat.10:28), i ma margogoihon, pahothon dohot patoguhon
rohanta laho mangoloi Ibana. Alai songon halak Kristen huhut warga negara
Indonesia hita, patut do patuduhononta parangenta na denggan maradopohon halak
saluhut, asa anggiat ditiru halak parangenta na denggan i, gabe lam torop halak
na porsea tu Tuhan Jesus. Pos ni rohanta di parmahanion ni Tuhan Jesus di hita,
mambahen ndang lilu be hita di pardalanan ni ngolunta di portibi on. Marolopolop
tu Debata sandok tanoon di dok goar ni minggunta Minggu Jubilate ala Jahowa do
Siparmahan di hita, na marmahani hita olat ni on ro di saleleng ni lelengna
(ptds. Psalm. 23: 1-6). Amen
