Jamita Evangelium Minggu Rogate (Martangiang) – 25 Mei 2025

Manangianghon Hasonangan Ni Huta  

 (Berdoa Untuk Kesejahteraan Bersama)

Jeremia 29: 7 - 14

 

1. Huria ni Tuhanta dibagasan Jesus Kristus.Disurathon Panurirang Jeremia do suratna on tu angka na tarbuang di Babel. Disosoi Panurirang i do nasida asa tongtong mangalangka tu jolo huhut manangianghon bangso parbegu i naung manaban nasida. Ditongatonga parngoluon na maol i, ingkon adong do di hita parsihohoton jala ingkon tongtong do mangalangka tu jolo. Na boi masa do, gabe borat tahilala manangianghon angka panggomgomi tarlumobi molo ndang mabiar nasida di Debata, alai apaa di tingki sisongon on do ringkot situtu tangiangta ( 1 Tim. 2: 1 – 2 ). Di na bongot hita tu partingkian na borat manang parhusoron na mannsai hatop, tajugulhon hita ma martangiang jala tongtong mangalangka tu jolo, mangula angka ulaon na bolas ulaon, jala ndang gabe  madabu tu pandelean ala ni biar dohot ketidakpastian.
2. Huria ni Tuhanta adong tolu pandapot na marasing taringot tu pandohan “pitupulu taon” on. Na parjolo mandok: taon 605-538 BC, mamungka mai sian haboborhat parjolo ni angka na tarbuang sian halak Israel tu Babel sahat tu hamumulak parjolo ni angka na tarbuang i muse tu Jerusalem dung ruar parenta ni Raja Koresy. Na paduahon mandok, taon 586-515 BC, mamungka ma i sian haboborhat parpudi ni angka na tarbuang i tu Babel dohot halelengse ni Bagasjoro i sahat ro di na pinajongjongna muse joro i. Na patoluhon mandok, 70 taon ima umur rata-rata ni jolma manisia. Alai torang do, dipaloas Debata tarbuang bangsoNa pola nania lelengna, ndang jempek tingki habubuangnasida i songon na nilumbahon ni angka panurirang pargapgap i.
3. Huria ni Tuhanta, margogo do hita marhite angka uluanta na mamboan hita mangalangka tu jolo, ima angka uluan na pos rohana na bolas hita mangula angka ulaon na pinasahatnasisda jala rampak nasida dohot hita saleleng di  pardalanan i. Songon i ma nang panguluhonon ni Debata di hita. Diboto Ibana do masa depanta jala sangkap nauli na denggan do angka sangkapNa maradophon hita jala gok panghirimon. Raphon Debata, na mamoto masa depanta, na mangalehon angka garis besar ni ulaonta. Mandongani hita paujunghon missiNa i, gabe gok panghirimn na mangolu ma hita. Ndang na marlapatan i, gabe so adong angka hamaolon, parungkilon, sahit, dna. Ditonga ngolunta, alai dilehon Debata di hita gogo mamolus dohot mangadopi saluhutna i.
4. Huria ni Tuhanta, ndang dihalupahon Deata bangsoNa i nang pe tarbuang nasida dii Babel. Disangapi Ibana do mangalehon parmulaan na imbaru tu nasida marhite sada sangkap na imbaru-pauba nasida gabe sada bangso na imbaru. Mamolus partingkian na tung maol di tongatonga ni ngolunta, sipata ndang mampu hita marnida pandonganion ni Debata disi. Hira na dihalupahon Iban hita, alai sipata ndang tasadari na diparade Debata do hita songon  na binahenNa tu bangso Juda on, tu sada parmulaan na imbaru-parngoluon na Ibana gabe pamusatanna. Hombar tu sangkap na uli sian Debata, gabe adong ma di bangsoNa i sada masa depan jala gabe marpanghirimon na mangolu ma nasida. Alai di sisi na asing luluannasida ma Ibana sian nasa rohanasida. Nang pe mamolus partingkian dohot situasi na borat angka na tarbuang i ndang gabe mandele nasida ala adong do di nasida pos  ni roha di kehadiran ni Debata. Bolas do nasida tongtong martangiang tu Ibana, jala marasi ni roha do Debata maradophon nasida. Molo talului Debata sian nasa rohanta sai na jumpangta do Ibana. Ala ni i, ndang adong na tuk manirang hita sian Debata; ndang di parserahan, dipangarantoan, di luat sileban, ndang parungkilon, ndang parsahiton, dna.
5. Huria ni Tuhanta, mangerbang do hurianta HKBP, suang songon i nang halak hita. Sian bona pasogit sahat tu angka parserahan na di sea na ualu i. Jala tangkas do ndang Boana Pasogitta pe nunga lam majemuk, la heterogen, lam marragam sukubangsa dohot ugam mian disi. Mangadopi saluhutna i, ingkon adong di hita pos ni roha, parsihohoton, konsistensi, komitmen tinggi tu Debata Jahowa. Di angka luat na marserak i, sipata ndang adong disi gareja, sipata ndang adong parhalado, sipata ndang tarjalo ni halak disi haKristenonta i. Dihirim Debata do asa tongtong mangolu hita di bagasan parsaoran na togu tu Ibana. Ndang holan di Jerusalem Debata marhabangsa, ndang holan di Boan apasogit, alai hadir do Ibana nang di angka parserahan, pangarantoan, nang di situasi na tung maol pe ala ni angka keadaan setempat na so manghalomohon silang i.
6. Huria ni Tuhanta; bahat do garejanta na disegai, ditutung, diorai bangunon, diorai marminggu, marpungu, dna. Unang ma i gabe pangambati di hita marsaor tu Debata, gariada ingkon tapangke situasi lam pasolhothon parsaoranta tu Debata huhut lam patoguhon solidaritas sesama ruas ni huria i. Unang ma masipasombuan angka ruas ni Huria mangadopi angka hamaolon na mengganggu haporseaonta. Ihut ni i, tapatupa ma angka dialog, kerja sama dohot sikao na marsiurupan antar-umat beragama. Ai sude do ugamo angajarhon angka na denggan maradophon sude dongan jolma. Ala ni i, disosoi hata ni Debata hita asa marbisuk huhut margogo di situasi na songon on. Songon halak Kristen hita ndang adong di hita roh apamaloson gariada ingkon tatangianghon nasida ro di sude panggomgomi asa dipasupasu Debata jala lam tu dengganna angka hubungan antar umat beragama tu joloan ni ari on.
7. Maragam do angka ujian, hamaolon na niadopan ni Hurianta nuaeng on. Adong ma i siala ni angka sikap intoleranis sian angka parugamo na asng, adong ma i siala sikap diskriminatif pemerintah setempat maradophon halak Kristen. Adong ma i siala penyakit sosial, hapogoson dna.  Ndang na gabe lupa Debata tu hita di situasi na songon i jala ndang tuk i sude manirang hita sian Ibana. Gariada tarjou do ganup hita gabe sitindangiNa di sude situasi dohot di ganup inganan. Di Minggu Rogate on na marlapatan : martaniang, jala dilehon do hita topik sipahusorhusoronta ima: Manangianghon Hasonangan ni Huta. Na gogo situtu do do ninna tangiang ni partigor molo dihaburjuhon. Lam gomos ma hita martangiang, asa lam tajugulhon martangiang (Rom 12:12c, 1 Tes.5:17.) Debata manangihon hoihointa jala na olo paluahon hita. Mansai ringkot do ngolu partangiangon di hita halak Kristen. Molo didok, “Doa adalah nas hidup orang percaya”; patuduhon molo ndang martangiang hita hira na mate ma haporseaonta. Tangiang ni na porsea ndang holan na ringkot di hita, ndang na egois, alai dohot do manangianghon na asing, mangondingi na dihumaliang hita, luatta, angka na susah ngoluna, nang bangso dohot negaranta. Sada tanggung jawab ni angka na porsea do laho sumarihon, mamparrohahon, dohot mangondingi di tangiang dohot pambahenan na boi sibahenonta tu luat, daerah, bangso nang negaranta. Ala ni i marbisuk ma hita angka na porsea parhalado nang ruas ni huria marnida konteks ni angka luatta be asa lam denggan parsaoranta dohot manang ise pe. Jala ringkot do hita hidup damai berdampingan, penuh toleransi, ala disi do kesempatan disihita laho marbarita na uli, na gabe sitindangi ni Kristus. Ala ni i ringkot situtu do hita mengiplementasihon visi ni HKBP songon huriana inklusif, dialogis, jalal terbuka huhut padimundimun mutu haKristenonta secara internal. Amen.