Haluaon Sian Debata
Ev.Heber 2 :
1 - 4
Ep.Ester 9 : 15 – 19
I.Patujolo
Marhite turpuk
on, dipasahat do tu hita pangajarion, poda nang sipaingot, ima asa tatangkasi
lam tu manatna laho mamparrohahon dia nanaung tatangihon, asa unang tarboan
hita tu galumbang nang alogo. Ia hata ni Debata naung dipasahat marhite angka
surusuruan sai hot do mardalan, jala ganup pangalaosion nang angka na mangalo
mandapot balos na dos, boha ma hita asa malua molo sai tasoadahon jala ndang
taharingkothon haluaon na bolon i ? Hape naung dipahot jala dipatogu Debata do
panindangion nasida marhite angka tanda nang angka halongangan jala marhite
hapapatar ni huaso nang asiasi ni Tondi Parbadia. Ima marhite angka tanda nang
angka halongangan dohot angka hapapatar
ni huaso nang silehonlehon ni Debata tu hita marhite asi ni rohaNa.
II. Hatorangan
1. Ingkon
jamot jala gomos (ay.1), marhite ayat on, dipaingot do hita asa gomos jala
jamot hita laho mamparrohahon sude Hata ni Debata naung tabege jala tatangihon.
Sialana, asa marsitutu hita marpasiajari jala mamparateatehon Hata ni Debata
naung tatangihon i. Sai lam burju ma hita manjanghon Hata ni Debata, jala
porsea huhut taulahon HataNa marhite sian pos ni roha, sian nasa gogo, ateate
nang pingkiran. Marhite ima, ndang na gabe mimbar hita jala ndang lonong be
diboan galumbang ni portibi on na so binoto be na tinujuna. Astuanna, asa lam
tinggil hita jala serius tu Hata ni Debata na mamboan las ni roha dohot dame.
Unang ma songon si Euthikus. Ulaon Apostel 20:9 Jadi adong ma dolidoli sahalak,
na margoar Eutikus, na hundulhundul di jandela; tarlalap ma ibana di na
mandatdati si Paulus mangkatai; jadi nok ma matana, gabe madabu ma ibana sian
tindi patoluhon tu toru, jadi nunga mate dihindat. Sian barita i paboahon
sahalak dolidoli na margoar Euthikus na nok matana laos gabe madabu sian tindi
patoluhon tu toru di Ari Minggu bodari, uju dipasahat Apostel Paulus jamitana
di parsiranganna di Troas, sada huta na gabe pamoluson ni Asia dohot Eropa ima
naueng Instambul- Turki. Nang pe holan piga ayat digurithon taringot si
Eutikhus, alai gabe parsiajaran do na masa i jala singotsingot tu hita halak na
porsea asa serius jala marsitutu hita maniop jala tumangihon Hata ni Debata. Na
madabu i si Eutikhus jala mate boi do ala ni lojana na maula ulaonna sian
manogot sahat tu arian, boi do ala so di rohana be jamita i ala palelenghu,
siala sahat tu borngin si Paulus mangajari marjamita. Sian na so di rohana be
asa gabe tarlalap modom ma. On ma na ingkon tajamaothon di ngolunta, atik ro di
rohanta na so boi be konsentrasi tu na tumangihon Hata ni Debata. Naung malas
be hita manangihon Hata ni Debata, ndang ringgas be hita marminggu, asa gabe
tatadinghon ma angka parpunguan ni halak Kristen, ndang olo be hita manghobasi
Tuhan i di huriaNa. Ala ni i dipaingot Ap.Paulus hita asa jamot, jala gomos
tatiop hata ni Debata. Sai burju ma hita tumangihon hata ni Debata, taparsiajari,
tapahusorhusor laos ringgas hita mangulahon Hata ni Debata di parngoluonta
siganup ari.
2. Unang
ma marisuang haluaon na bolon i (ay.2). Dibagasan ayat on patuduhon na naung
tarsurat manang ndang alai naung sahat jala marlangku do Hata ni Tuhan i
marhite angka surusuruan ni Debata. Naung tarsurat pe manang naung di pasahat
na so tarsurat i ia jala nasa
pangalaosion dohot hatoison mangalap pamaloson na hombar. Jadi molo songon i
boha do haluaon i masa na ro marhite Jesus Kristus Sipalua i? Ragam do na
dipasahat portibi on tu jolma i asa dao
sian Debata. Angka jolma na so bisuk boi do gabe maup tu haulion ni portibi on,
alai dung diharingkothon haulion portibi on hape holan parsatongkinan do, laos
sai dijugulhon jolma i do manarihonsa asa lam dapot hinatabo ni portibi on,
gabe lam hancur ma jolma i jala malas, sai holan tu lomo ni rohana sandiri ma
boanonna asa i ma na padaohon hita sian Debata. Isarana ima internet nuaeng on,
boi do hita jolma mangakses angka na dirohanta siberengon, sibegeon, jala gabe
ditiru muse, angka na uli, na denggan, na roa, sude ma disi, lomonta do
mamillit asal ma adong kuota internet na, boi do godang disi siberengonta. Alai
ala so bisuk jala jamot hita gabe olo ma lalap sai tusi rohanta, gabe losok ma
rohanta mulaulaon, gabe dao parsaoran dohot keluarga, dongan nang tondong pe.
Ala ni sai jamot ma hita jaga di angka perkembangan sinuaeng on, angka arus ni
jaman di portibi on unang ma gabe manghalononghon hita nang haporseaonta.
Godang nai angka na manghalonoghon hita
boi do i marhite Pinjol (pinjaman online) disedot jala diinsop ma hita marhite
beban bunga yang tinggi, dungi angka investasi bodong na mandok holan dijabu ro
do sinamot manang untung. Jaman nuaeng mandok, unang pola loja mangula alai boi
ro godang hepeng manang pansarian. Boi do menyesatkan hita jolma, gabe malas ma
mangula ulaon, ndang mangolu be daya kreatif dan imaginer diri asa berdaya dan
produktif. Ala ni i saijamot hita di arus ni jaman on asa hita angka naung
ditobus Kristus i unang gabe maoto jala lonong binahen i saluhutna.
3. Ayat
3 na mandok: Unang ma tois di haluaon na sun godang i. Haluaon na tajalo sian
Kristus Jesus ndada holan hata, nang meammeam. Ai ndang adong na marisuang Hata
ni Debata, ndang adong na mulak rata ianggo Hata ni Debata. Jala tarlumobi
Haluaon na sian Jesus Kristus i. Marsitutu manghangoluhon hata ni Debata naung
mian ma ibana di Kristus i, mian ddibagasan Kristus marhite na mangulahon
hatana burju. Ido umabhen sai disosoi hita asa burju hita mangulahon
parsuruonNa i. Wahyu 2:10 - Jangan takut
akan hal-hal apapun yang akan kamu deritakan; Lihatlah, Iblis akan melemparkan
beberapa dari antaramu ke dalam penjara, supaya kamu dicobai; dan kamu akan
mendapat kesusahan sepuluh hari. Hendaklah kamu setia sampai mati, dan Aku akan
memberimu mahkota kehidupan. (Unang habiarhon angka haporsuhon na naeng ro!
Dabuon ni sibolis ma deba sian hamu tubagasan hurungan, asa tarunjun hamu, gabe
tarsosak ma hamu sampulu ari lelengna. Sai burju ma ho rasirasa mate; dung i
lehononku ma tu ho tumpal hangoluan i). Dipardalan ni ngolunta mansai ragam do
na boi dipangke sibolis i laho mangunjuni hita asa tu hamagoan. Godang do halak
nang angka na porsea i tarunjun tu pangalaosion hata ni Debata. Tapangke ma
kesempatan naung dilehon tu hita, binsan adong dope tingki dilehon Tuhanta, asa
taparhaseang i saluhutna laho mamuji pasangap Tuhan i. Lukas 16:16-17 - Intap si
Johannes do patik i dohot angka panurirang i. Olat ni i ma dibaritahon harajaon
ni Debata, jala saluhutna do mambahen gogo tusi. Alai ummomo do salpu langit
dohot tano, sian na gabe bolong sada gurit ni patik i. Ala ni i, sai
ringgas ma hita jala marsitutu mangulahon patik i dibagasan ngolunta, binsan
dilehon dope hosa hangoluan tu hita. Angka na mangalaosi patik i sai jaloonna
do upa na, na mangihut be do angka na niulana, ido na nidok di agenda i uju na
manghobasi na berduka ala adong na monding di sada ruas ni huria. Dia na taula
jala tapuonta do muse haduan sogot upana. Ala ni i taula ma angka na uli na
denggan di ngolunta.
4. Ayat
4 – Panindangion marhite huaso ni Tondi Parbadia. Saluhut hasatiaon, pos ni
roha, hagogoon, pangurupion jaloonta molo sai olo hita nirajaan ni Tondi
Parbadia. Ndang tu dirinta sadniri be hita mangolu alai tu Debata do. Asa
taulahon angka siulaonta marhite hagogoon na sian Tondi Parbadia. Panindangion
ni halak na porsea holan marhite parange, pangalaho nang parsaoranna tu humaliangna, asa gabe jamita na mangolu ma
i, sada kesaksian (panindangion) na boi gabe pasupasu, poda, sitiruon tu halak
na di humaliangna. Hita ma na ditobus Kristus di suru tu tongatonga portibi on
laho bersaksi, tanda-tanda halongangan na marhite angka ulaonta di pasinghon
Tondi Parbadia asa patar Harajaon ni Debata di tonga portibi on.
III. Sipahusorhusoron:
a. Asa
manat jala risik di na manulingkiti hata ni Debata, jala ndang muramura be hita
di palilu sibolis nang portibi on.
b. Taparhaseang
ma tingki on dohot denggan asa marguna ngolunta di portibi on nang gabe
hamuliaon di Debata.
c. Hita
angka na porsea na marnampunahon haluaon i molo sai hot jala satia hita
mangihuthon Jesus Kristus.
d. Kristus
Jesus do na naung paluahon hita, jala hot do i di angka na porsea sadarion ro
di saleleng ni lelengna. Amen.
