Parhalado
Halomoan, Mardongan Biar Dohot Hadaulaton
Heber
12: 18 – 29
a. Dung
bangkit Kaesar Klaudius di Roma taon 41-54 M, diusir ma sandok halak Jahudi
sian Roma dii taon 50 M; ai biar situtu do roha ni Kesar i ala naung balga
pengaruh ni halak Jahudi di sandok Roma na marpenduduk + 1.200.000 jiwa di
tingki i 10.000 jiwa sian i Jahudi do, naung tubu jala warga negara Roma na
marhata Latin, i ma naung maringanan di Roma mulai sian taon 200 sM (zaman
Hellenisme). Asa marserak ma nasida tu asia na metmet (Turky), Mesir, dna.
Songon na masa di taon 19 M, na dibuangkon halak Roma bangso Jahudi tu Sardinia
si 4.000 halak na pinarakarsaan ni si Seyan, sahat tu taon 31 M torus dilele
sian Roma.
b. Alai
di tingki ditongos surat Heber si 13 bindu 301 ayat on sian Roma taon 63-54 M,
nunga lam jorbut pangaleleion tu halak Kristen pinarentahon ni Kesar Nero, na
mansai ambisi tarbarita tu sandok portibi on mamungka sejarah di goarna. Asa
marribu do angka Kristen na setia martyr dibahen di penjara, di lapangan syrkus
na di coliseum, di batang aek Tiber dohot di pupusi halak Rom sian lomolomo ni
rohanasida. Marserak ma halak Kristen tu Asia na metmet (Turky) tu Persia (Iran),
Armenia , Mesopotamia, Afrika Utara, Galilea (Francis), Spania (Spanyol) dohot
tu Britania (Inggris) Eropah (Ul.Ap.7:2; 18: 2; Rom.16: 3; 1 Kor.16: 19;
Heb.13:18-25)
c. Ala
dipenjara do Ap.Paulus dohot si Petrus di tingki i, ai nunga ditutung si Nero
kota Rom laho pagasiphon halak Kristen, asa marhite i tarbarita goarna tu
sandok portibi on. Sada minggu api i ndang haintopan mulai sian tgl.19-24 juli
64 M. Saut ma mosok Kota Rom na bolon i, na pinajongjong di ginjang ni 7 dolok.
Alai sahat ma barita i tu si Paulus dohot si Petrus naung dihurungkon si Nero
rap dohot torop angka Kristen na setia di haporseaon nasida di Tuhan Jesus
Kristus. Deba martabuni di angka tombak liangliang batu na margoar “Katakombe”.
Alana deba gabe marbalik sian haporseaonna hinorhon na so manahan di
pangunjunan na marsamari i (Heb.6:4-6; 10: 22-38).
d. Ditongos
Si Paulus ma surat on jala digoar tu Halak Heber (Ibrani), i ma Kristen na sian
Ha-Jahudion dohot na sian bangso Junani naung marserak i, laho mangapuli angka
dongan na porsea di sitaonon dohot pambebeon na so haotapan i, songon sipaingot
ni Tuhan Jesus tu Huria na 7 di Asia na metmet: Efesus, Smirna, Pergamus,
Tiatira, Sardis dohot Laodikea (Lambang ni Huria di ari parpudi/ zaman Akhir ;
Pangk.2:10; 3: 10; 14: 13). Na tongtong dirataratai angka Ama ni huria na
parjolo. Dung mate angka Apostel ni Tuhan Jesus: Papias, Bishop di Haerapolis,
Surat ni Si Pantaenus tu Si Clement bishop di Rom mangganti si Linus naung
martyr (108-110), si Ignatius, sisean ni si Johannes haholongan (pewahyu),
bishop di Antiokhia jala na martyr taon
115 M, Bishop Policarpus na di Smirna, jala na tangkas mananda Ap.Johannes na
mate sarimatua taon 166 M, Ireneus bishop di Lion na martyr taon 202 M,
Justinus martyr di tingki ni Kesar Markus Aurelius taon 167 M, dohot si
Origenes penafsir alegoris na parjolo i, anak ni si Leonidas na daulat i, na
tarbarita ala ni paralealeonna dohot Kesar Alexander Saverus, alai martyr
dibahen Kesar Septimius Saverus taon 193-211 M, mandok: Dirahasiahon si Paulus
do goarna na tu halak Heber na marserak i, ala naung sanga ditolak ni Jahudi
ibana songon apostel Kristus na tutu (ida; Ul.Ap.1:21-22; 1 Kor.9:1; 15: 7;
Ul.Ap.8:1-2; Heb.10:23-38; 12,22; 13:18-25; 6: 12; 2 Ptr.3: 15-16; Rom. 12:
9-21; Gal.3:11-17; 4: 26; Kol. 4:18 dst.
e. Dibagasan
turpuk on diperbandingkon Apostel Paulus do dolok Sion dohot Dolok Sinai, ima
songon hataridaanta ditingki on. Ayat 18-21, digombarhon ibana do songon dia si
Musa manangihon soara ni Tuhan, dung sahat nasida di dolok Sinai. Ia dolok ima
dolok na boi jamaon, jala ditiop jolma. Dungi api na marsigorgor tu haholomon
dungi ro habahaba, alai ditonga habahaba
i galak do api na mansai balga situtu di atas ni dolok Sinai. Di suara sarune
na gogo i, mambahen nasida na umbegesa gabe mangelekelek asa unang be manghatai
Debata dompak nasida. Jotjot do hita molo manangihon Hata ni Debata, mandok di
tangiangta: “manghuling ma Ho ai na mananginangi do hami...” hape bangso Israel
i mangido asa di pa so, jala unang be manghuling Tuhan i ala so manahan be
nasida. Ia soaraNa i songon soara ni sarune na mansai gogo situtu di dolok
Sinai.
f.
Ayat 20-21; ai ndang tartaon nasida Paksa i,
jala soara ipe mandok; “molo dais dorbia tu dolok ingkon mate i dangguran”.
Jadi molo adong dorbia na mamolus sian inganan i, ingkon mate dangguron i. Mansai
dotdot do situasi disi, ditingki bangso Israel manangiihon soara ni Debata di
dolok Sinai. Pola do dohot si Musa dotdotan jala mandok tung gok biar situtu do
ibana disi. Na manghatai do si Musa dohot Debata mangadop bohi, na hea palambok
ateate ni Debata asa unang muruk, alai ditingki i mansai dotdot do panghilalaan
ni si Musa mangadopi Debata na ro marhite habahaba dohot api di haholomon dohot
marhite suara sarune na mansai gogo situtu. Molo tajaha na binahen ni si Musa
di 5 Musa 9:18-19 pola na marpuaso ibana opat pulu ari opat pulu borngin, ndang
mangan dohot minum holan laho paombun rimas ni Debata mida angka dosa
pangalaosion ni bangso Israel. Ima situasi namasa di Padan na Robi, pajonokhon
diri tu adopan ni Debata dibagasan biar dohot dotdot ni roha.
g. Ayat
22-27; Ima na masa di bangso Israel nabinaritahon di Padan na Robi, alai nuaeng
ndang be di dolok Sinai alai di dolok Sion nama di huta ni Debata ima Jerusalem
na imbaru na gok hasonangan, ndang adong be biar ni roha dohot dotdot ni pingkiran
pajumpang dohot Debata. Di Padan na Imbaru naung dipaombun Jesus i do rimas ni
Debata, Jesus i ma na manghophop hita tu Debata asa sahat hita tu Dolok Sion
ima Jerusalem na imbaru na gok hasonangan nang las ni roha rap dohot angka
surusuruanNa. Ala ni i dijagahon do tu angka na porsea siihuthon Kristus i, asa
unang manimbil sian dalan haporseaonna. Angka na manulak Kristus i, ndang malua
sian uhumanNa, lam ma hita naung manjalo Barita Na uli i naung manjalo patik
nang hata-Na i? Naung dihutur Debata do portibi on dohot ma muse banuaginjang
i. Alai molo angka na porsea i ndang tarhutur i, ndang adong na dais agia aha,
siala Jesus Kristus i do sitioponna asa marsihohot jala so mubamuba rohana nang
haporseaonna. Sadalan songon na pinodahon Apostel Paulus di Rom 8:35 Dia
manirang hita sian holong ni roha ni Kristus i? Haporsuhon do manang hagogotan,
manang pangaleleon manang haraparon, manang parsaemaraon, manang mora, manang
podang pe?
g h. Ayat
28-29: Ala naung tajalo do Harajaon na so tarhutur i naung dipajongjong di atas
batu mamak i, i ma Jesus Kristus i; tung habahaba, aek godang, manang aek na
sumar, dohot alogo tipotipo ndang boi manghutur hita. Ala ni i sai marlas ni
roha ma hita na dibagasan Kristus i tu adopan ni Debata Ama i mamuji pasangap
Ibana hombar tu lomo ni rohaNa, marhite roha na ias, serep jala unduk dohot
biar ni roha mida Ibana. Molo di Hata
Inggris, biar(takut) di dokdo i; Godly Fear, biarna i ndada ala ni roha na
negatif, alai hormat dohot biar tu Debata ala ni holongta tu Debata. Dungi
dipatorang ma muse taringot tu Debata i, songon api na mangallang (the
consuming fire: api yang memakan). Molo tu angka parjahat, api na mangallang do
Debata, alai molo tu hita angka na porsea i, Ibana do api Tondi Parbadia na
mangapuli rohanta. Mansai tajom dipaboa si Johannes pandidi taringot tu Jesus
Kristus na naeng ro mandidi marhite Tondi Parbadia dohot api di Mateus 3:11-12
“Ia ahu, aek do hudidihon tu hamu mandokkon paubahon roha; alai andul gumogo do
na ro sian pudingku, gari mamboan sipatuna hurang tama dope ahu. Didihonon ni I
do tu hamu Tondi Parbadia dohot api! Di tanganna do purpuran; paiasonna ma
pardegeanna; papunguonna do emena tu sopona; alai tutungonna do anggo hurangkam
i tu api na so ra mintop.”
i. Mansai denggan do parsiajaran Hata ni Debata
sian Padan na Robi pola do dipatorang panurat Heber di bindu 11 taringot angka
naposo ni Debata na manghatindangkon hagogoon ni Debata dibagasan haporseaonna.
Lapatanna na olo do angka nasida diajari Debata jala porsea do nasida di Hata
ni Debata i. Sian panindangion ni hatoguon haporseaon nasida tu Debata i do na
gabe sorminan di haporseaonta tu Debata Ama dibagasan Jesus Kristus i. Asa molo
ro pe na “manghutur” hita ndang tarhutur hita disi, ala nuang hot do ojahanta
dibagasan Jesus Kristus Tuhanta i, disi ma dapot hita pos ni roha nang las ni
roha na manongtong i. Ala ni angka na porsea naparjolo i hatiha i di patogu
roha nang haporseaonna marhite turpuk on asa unang ganggu roha na dohot mabiar
hinorhon ni angka ancaman na ro tu nasida, pola ingkon agoan hosa manang mate
martyr godang nasida na martabuni di ‘katakombe’ alai naeng ma marsihohot tu
Jesus Kristus naung manaluhon sorop ni sibolis dohot hamatean i nasida (ptds.
Mat.11: 28-30; Joh.16:33).
j. Domu tu Minggu Letare (Marlas ni roha ma hamu),
asa naporsea i hot las ni rohana dibagasan Jesus Kristus, naeng torus dipaingot
ingot Holong ni Debata dibagasan Jesus i laho holan manghophop hita sian dosa
nang hamatean na saleleng ni lelengna i asa bongot tu hangoluan na saleleng ni
leleng na. Boi do sibolis i manghutur hita marhite angka utiutianna na di
portibi on asa mabiar hita, alai ingkon umbiaran do rohanta tu Debata na tuk
manghutur portibi on nang banuaginjang pe. Ancaman kematian akibat kekerasan ‘begal’,
narkoba, tarlumobi ala na manghatindangkon Kristus tapasahat ma saluhutna tu
Jesus i, asa margogo hita nang haporseaonta mangadopi i saluhutna (Rom8: 31). Holan
Asi ni roha ni Debata sambing do asa malua hita masuk ma hita tu Dolok Sion na
gok olopolop nang las ni roha mamuji pasangap goarNa. Patut ma sude angka na porsea
sidok mauliate (bersyukur dalam segala hal) di sude denggan basa ni Debata, ai
ndang lomo rohana mida hamamate ni parjahat i, baliksa hamumulak parjahat i do
tumundalhon dalanna tu dalan ni Debata (Hes.33:11). Ndada umbalgaan rimas ni
Debata tu hita alai holongNa i do tu hita jolma pardosa on, ndada gabe
sirimasanna hita, sai lehononna do dalan asa malua hita, songon bangso Israel
na marungutungut jala na di pargut ulok tulung api i asa gabe torop na
marmatean, alai di lehon Debata do dalan asa mangolu nasida jala malua sian
hamatean i marhite na mamereng tu ulok tombaga na pinatupa si Musa. Nang hita
pe na porsea asa malua hita sian hamatean i, tadompakhon ma bohinta mamuji jala
marsomba tu adopan ni Tuhan Jesus Kristus i, marhite silang nabadia i gabe
dalan tu hita jolma asa unang mate alai gabe mangolu. Patut ma antong hita na
tinobusna marlas ni roha huhut gabe parhalado halomoan, mardongan biar dohot
hadaulaton ni roha tu Debata Ama dibagasan Jesus Kristus i (ptds. Pil.2:9-11;
4:4). Amen.
