Parhalado
Halomoan, Mardongan Biar Dohot Hadaulaton
4
Musa 21: 4 – 9
a. Parbadaan
ni bangso Israel maradophon Debata dohot si Musa dibuhai hatiha sai marningot
bangso i di parngoluon nasida najolo ditingki di Misir. Angka sungkunsungkun na
dipasahat nasida patuduhon sihol ni roha nasida asa mulak tu ngolu nasida
najolo. Dipartingkian na diparhatoban bangso Misir nasida, nang pe hatoban alai
dihalungunhon nasida do las ni roha haportibi on (ima na holan sumarihon
siubeon nasida, naung somal mangallang angka na tabo nang pe mansai borat ulaon
nasida songon hatoban; 4 Musa.21:4-5). Ala ni pangalaho na jumpang ni si Musa
di bangso Israel gabe jut ma rohana, tarlumobi ma roha ni Debata (ay.6). Ala ni
ma ditongos Jahowa ulok tulung api laho mamarguti bangso Israel i. Siala ni i
mansai torop na marmatean disi. Marhite ulok tulung api i disangkapi Debata
Jahowa BangsoNa i asa mangaranap matana dompak Jahowa, asa sahat nasida tu tano
bagabaga i. I do umbahen disuru Debata nasida mamereng tu ulok tombaga
(ay.8-9), ndada ala ni hagogoon ni ulok tombaga i asa malum nasida sian bisa ni
ulok tulung api, alai holan ala ni hajongjongan ni Debata marhitehite ulok
tombaga i. Holan huaso dohot gogo ni Debata do na boi paluahon nasida sian
rasun ni ulok tulung api i jala mamboan nasida tu tano na dibagabagahon tu ompu
nasida. Marhite turpuk on naeng marsiajar hita di pardalanan ni ngolu ni bangso
Israel manuju tano bagabaga i, sai digonghon Debata do nasida asa tongtong
mangaranap matanasida tu Ibana na mangalehon ngolu jala na manuntun langka
nasida. Suang songon i do nang hita angka na porsea dibagasan Jesus Kristus,
bangso naung dipillit manjalo haluaon i manuju tu tano hasonangan i ima surgo
i, diigil Debata do sian hita asa tongtong mangaranap hita dompak Jahowa
marhitehite Jesus Kristus i, asa mangolu hita jala marlas ni roha ujungna.
Tudia hita marpanatap tusi ma simanjojakta mangalangka . Ditingki tapadompak tu
pudi, ima angka masa lalu ni ngolunta naung salpu i, boi sajo do hita
manghilalahon songon panghilalaan ni bangso Israel. Boi do gabe madabu hita tu
pangalaho na sai marungutungut di situasi parngoluonta si saonnari on. Jala boi
do gabe madabu hita tu sikap panolsolion ni ngolu sisaonnari, tarlumobi molo
tahilalahon mangihuthon Jesus i lam maol jala lam borat jala godang haporsuhon.
Ujungna gabe madabu ma hita tu sikap na mandele jala mandate laho mandalani ari
ari ni ngolunta laho mangihuthon bagabaga ni Debata. Ido umbahen sai di gonghon
Debata hita mangarahon pangaranapanta ndang tu pudi manang naung salpu i, alai
dompak jolo do ima holan tu Kristus i. Siala holan Ibana do na tuk paluahon
hita sian sorop ni hamatean, nang sibolis na sai dihabiari torop jolma di
hasiangan on.
b. Molo
digonghon do bangso Israel di tingki i laho mamereng ulok tombaga na gabe
simbol hajongjongan ni Debata, nang hita di partingkian on di gonghon Ibana do
hita laho mamereng Kristus na gabe tanda hajongjongan ni Debata ditongatonga ni
portibi on. Ai didok di Johannes 3: 14-15 Jadi songon naung pinatimbo ni si
Musa ulok i di halongonan, songon i naeng patimboon Anak ni jolma i, asa
dapotan hangoluan na salelenglelengna ganup na porsea di Ibana”. Na gabe
sungkunsungkun, boasa ingkon patimboon Kristus i? alusna: Kristus di patimbo
asa gabe sada tanda di manisia jala sude jolma rade rohana laho mangadophon tu
Ibana na gabe lombulombuna, asa sahat tu hangoluan na dibagabagahon Debata ima
hangoluan sisaleleng ni lelengna i. Dos dohot bangso Israel na olo mamereng
ulok tombaga na pinatupa ni si Musa jala mandapot haluaon. Suang songon i ma
nang hita jolma na rade mamereng tu Kristus, jala dapot hita ma haluaon i, ai
didok do di Johannes 3: 17 “Ai ndang na disuru Debata Anakna i tu portibi on,
asa uhumanna; naeng paluaonna portibi on tahe, umbahen na disuru”.
c. Mamereng
Kristus na nidok na dison ndada na mamereng gombaran manang lukisan dohot
patung ni Jesus na somal dijual di angka toko rohani nang na adong di jabunta
be, manang paberengbereng silang, patung, nang gambar ni Jesus di gareja nang
di inganan ni halak Kristen. Molo didok mamereng Kristus, lapatanna Kristus i
ma na gabe uluan nang raja dipardalanan ni ngoluna. Mamereng Kristus lapatanna
na olo ibana mandopakhon sude ngoluna songon na nidalana ni Kristus ditonga ni
portibi on.
d. Na
gabe tantangan di hasiangan on ima, sai godang dope jolma di hasiangan on tarela
rohana holan mandopakhon ngoluna nang pamerenganna tu portibi on. Hape na holan
parsatongkinan do portibi on, jala boi do molo so manat hita gabe lam tu maolna
tahilala. AI satongkin do hasonanagn na nilehon portibi on ndang adong na
manongtong hasonangan i, na deba olo dipalalap portibi on, jala dibahen do
tujuan ni ngoluna nang hasonanganna holan na manggulut na di portibi on. Hape
hasonangan na manongtong i hurang diperdulihon, ngolu na saleleng ni lelengna i
hurang di parrohahon, ujungna boi do mura gabe gale manang putus asa. Ala ni i
asa tongtong hita mar-Letare(Marlas ni roha ma hamu), sai taingot ma na adong
di hita i holan sian Debata sambing doi, Ibana do mual ni pasupasu na tajalo i,
jala pasupasu na sumurung i ima Tuhan Jesus Kristus i na naung manghophop hita
jolma pardosa (Joh.3:16), asa malua hita sian parhatobanon ni sibolis,
hadangolon, hapariron, haporsuhon, angka na bernit bongot tu haluaon, hasongan
na saleleng ni lelengna.
e. Hita
na porsea dibagasan Jesus Kristus na tarjou do hita jala disuru laho patandahon
Kristus i tu saluhut jolma. Molo so adong usaha manang pambahenanta laho
patandahon Kristus i, ndang boi idaon ni jolma i. Sian hita do diigil Debata
laho patandahon Ibana dipardalanan ni ngolunta tu ganup jolma na tajumpangi.
Ala ni i tajaga ma ngolunta asa marparbue jala marpangkorhon tu na uli na
denggan di angka jolma na di humaliang hita. Ai didok do di Heber 12 :25 “Jaga
ma hamu, so tung dijua hamu Ibana na mangkuling i! Ai molo gari so malua nasida
na manjua Ibana na mamaksa di tano on, lam hita ma, anggo tatundalhon Ibana na
sian banua ginjang i!” Asa gabe parhalado halomoan hita, mardongan biar dohot
hadaulaton taparangehon ma na diigil Debata sian hita, sai tongtong
marsihhothot di HataNa jala satia. Amen.
