Bahan Jamita Paskah II, 1 April 2013

Manghatindangkon Jesus

Johannes 20 : 24 – 29

      A.      Patujolo

Maol do sosa di roha ni angka na porsea i taringot tu silang na badia i, ala i do lombulombuna. Tiris ni mudarNa sian hau parsilang i, ido mual paridian ni halak na porsea i, dung i umbahen na sai sonang jala mardame rohana dohot pingkiranna. Ida ma, dung hehe Jesus sian na mate, mangihuthon buku Johannes, dipatandahon Ibana ma diriNa jumolo tu si Maria Magdalena, ditonahon Ibana do tu si Maria asa dihatahon ibana tu angka siseanNa: “Na laho nangkok ma Ahu tu Damang jala Amamuna, tu Debatangku, jala Debatamuna (20:17). Sian hata ni Jesus on, botoonta ma paboa naung sun gok jala singkop ulaon haluaon na hinobasanNa humonghop portibi on. HaluaonNa i, hot do ditadingkon di portibi on. Ndang piga leleng nari be nasida boi pajumpang. Ala naung ditaluhonNa i hamatean marhite haheheonNa i, naeng mulak ma Ibana tu ingananNa hian, bagas ni Debata na di surgo i. Dibaritahon si Maria Magdalena do parjumpanganna dohot Jesus na hehe i tu angka siseanNa. Barita haheheon ni Jesus gabe sada perhatian na mansai luar biasa di nasida. Marpungu do nasida di sada inganan. Ia parpunguan nasida seolah-olah tertutup jala rahasia na marpungu i. “Dirahasiahon” nasida parpunguan nasida naung hehe Jesus i sian na mate, asa unang gabe di “politisir” halak taringot tu barita haheheon ni Jesus, naeng jumolo nasida tumangkasi, songon siseanNa. Disordak nasida pintu inganan parpunguan i, ala ni biar ni nasida mida angka Jahudi. Tutu ingkon dohononta do, ia barita taringot tu Jesus naung hehe sian hamatean i, dung dibege angka siseanNa i hira na gabe tubu do roha nasida sungkunsungkun: beha do tutu ni i? Ganggu ni roha sasintongna ndnag holan si Tomas  (bnd. Mark.16:14; Luk.24:36)

      B.      Hatorangan

      1)      Ayat 24 – 27 : Si Tomas papulik dirina.Ditadingkon si Tomas do parpunguan nasida dohot angka sisean na asing, ala ponjot pingkiranna, ala di pingkiranna na so tutu ianggo Jesus hehe sian tanoman i, Di pingkiran ni si Tomas, hamatean do ujung ni sude na masa tu Jesus, ndang siat tu rohana na hehe Jesus di ari patoluhon. Dipingkir rohana peristiwa silang i songon sada titik akhir. Bonsa ni rohana i do mambahen na gabe mamulik ibana, jala laos songon i alusna. Lupa ibana, pigapiga hali sai sipaboa Jesus do sitaononNa, hamateanNa dohot haheheonNa di ari patoluhon (Luk.18:33). Ido umbahen denggan masipaingotan, tungkar pikiran asa unang holan ni piningkiranniba sandiri na toho jala na dumenggan. Disada sisi; dipingkiri si Tomas do ra, ndang adong be na boi mambahen ibana bersemangat, ala Jesus do na mambahen marlapatan ngoluna, naung mate di hau pinarsilang. Anggo angka sisean na asing i, dihatindanghon do; “Nunga huida hami Tuhan i” (ay.25). Ido hata ni sisean i tu si Tomas na so dohot mamereng haroro ni Jesus. Haroro ni Jesus manopot nasida ndang sian pamotoan nasida manang ndang adong boaboa tu nasida. Denggan do antong molo adong na niida dohot na binege barita na uli paboahon tu angka dongan, asa dohot taruli dongan. Alai gumodang do si Tomas mangasahon pingkiranna sandiri dohot rohana. Sai dietong dope i songon nipi. Dibagasan situasi na songon i, jongjong ma Jesus manopot nasida, asa tung tangkas nasida mananda Jesus. Dioloi Jesus do pangidoan ni si Tomas. Maralus do pangidoan ni si Tomas na manjalo bukti na langsung sian Jesus. Saut ma tutu dipataridahon Jesus diriNa tu ibana. Ndang diloas Jesus ibana dibagasan roha na lulululu, asa unang mago lalap pingkiranna mangarajai ibana. Didok Jesus ma tu ibana: “Surdukhon ma tanganmi manjama andorangku, unang ganggu roham, sai porsea ma ho” (ay.27). Nunga langsung si Tomas marnida hasintongan ni barita haheheon ni Jesus i, ndang be holan barita, jala ima bukti nang bohal ni si Tomas laho mamaritahon Jesus naung hehe sian na mate.

      2)      Ayat 28 – 29: adong do tolu poko na mansai ringkot idaonta sian dua ayat on:

                                 i.            Dung dijama si Tomas andora ni Jesus dohot tanganNa i, ipe asa porsea ibana na tutu do hape na hinatindnaghon ni angka donganna i taringot tu Jesus. Dungi didok si Tomas ma : “Tuhanku jala Debatangku”. Tarida do panindangionna marhite na pinangkulingan ni Jesus ibana. DI ganup inganan dohot tingki na tongtong do hita hape dipangkilingi Jesus jala dipataridahon diriNa tu hita. Siala ni i, aha do dohononta mangalusi joujou ni Debata. Naeng dohononta ma songon na nidok ni si Tomas i. Lapatanna di ginjang ni sude huaso na adong di tano on Debata do haporusanta jala partanobatoanta.

                               ii.            Ndang boi pingkiran dohot utokutok laho mananda Debata. Alai marhite haporseaonta do, Solafide nina si Martin Luther. Molo didok Jesus tu si Tomas: “Martua ma angka na porsea atik pe so diida”. Marlapatan do i asa unang dipangke ibana logika ni pingkiranna sambing laho mananda pambahenan ni Debata. Dingolu ni jolma na holan mamangke akal dohot pikiran, maol do i manghaporseai na so niidana taringot tu pambahenan ni Debata. Hape haporseaon i, ima pos ni roha dohot pamotoan na tontu tu na so niida (Heb.11:1). Tapangke ma haporseaonta laho mananda asi dohot pambahenan ni Debata dibagasan ngolunta.

                              iii.            Molo tasigati tutu di buku na badia i, godang do angka tanda na pinatupa ni Jesus dijolo ni angka sisean i dohot ditongatonga ni portibi on (Joh.21:25). Jala saluhutna tanda i, naeng patuduhon huaso ni Jesus songon anak ni Debata. Tajalo ma tanda i marhitehite haporseaon, unang mangasahon pingkiran dohot parbinotoan. Sude angka tanda na binahen ni Jesus i ma laho mambahen jolma i mangantusi hadirion ni Debata na sasintongna, asa sintong panindangionta.

3) Sipahusorhusoron

 v  Jotjot do sai tabege pandohan: “unang songon si Tomas ho”. Ala si Tomas hea ndang manghaporseai barita haheheon ni Jesus. Godang do tanda manang bukti na pinatupa ni Debata laho patuduhon hadirionNa di portibi on. Jala saluhut angka tanda i maol do antusan marhite roha dohot pingkiran. Alai ingkon parhatopotonta do tanda i dalan ni Debata patuduhon holong ni  rohaNa tu hita. Laos marhite tanda i naeng do patuduhon panindangionta na sintong di adopan ni Debata. Aha ma tanda na pinatupa ni Debata di ngolunta ? ima hahipason, habisuhon, hapantason, hadameon, las ni roha dohot lan na asing. Tarjou do sude halak Kristen songon sisean ni Jesus gabe hasahatan ni tanda na binahen ni Debata marhitehite Parsaoran, panindangion, dohot panghobasion na sintong. Usde parhalado dohot ruas ni huria ingkon pataridahon kehadiran noi Debata di portibi on.

 v  Diganup tingki dohot inganan na tongtong do hita dipangkulingi Tuhan i marhite pandohan : “Dame ma dihamu” (damai sejahterah bagimu) . Pandohan i manogihon hita tu pos ni roha dohot haporseon di pandonganion ni Debata. Ima dame na sian Kristus, dinamis so i, jala proaktif. Ingot hita ma hata ni Tuhan Jesus mandok : “Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna” (Joh.14:27). Molo sai uhir tu roha dohot pingkiranta disoara ni hata dame na sian Jesus Tuhanta i, sai na mardame do hita dibagasan Ibana tongtong nang mardame dohot diriniba sandiri dohot dongan jolma pe (pat.Joh.16:13).

 v  Naeng ma jumpang  dihita sada panindangion ni haporseaonta na mandok ; “Tuhanku jala Debatangku”; marlapatan do i, na Debata do mangalehon asini rohaNa di hita. Ibana do partanobatoanta, parmahan na denggan di ngolunta (Psalm 23:1;  Joh.10:11). Unang adong keraguan be di hita taringot tu hagogoonNa. Jotjot do hita dihantui keraguan siala angka parsualon na taadopi. Keraguan bukanloah suatu masalah, yang terpenting adalah apa yang kita lakukan untuk mengatasinya di saat hal itu muncul atau menyerang kita. Sian ganggu ni roha i dapot hita do pangantusion na sintong taringot: beha ma hita manghaporseai Tuhan i. Secara mendasar diajari Tuhan Jesus do, beha hita asa porsea ima: “Martua ma angka na porsea, atik pe so diida! Lapatan ni i, ndada na mansoadahon rasionalitas. Alai didok roha “alternatif” na asing do i asa porsea jolma tu Jesus Tuhanta i. Molo pe dipataridahon Jesus diriNa tu si Tomas paboa naung hehe  Ibana. Dalan pangururpion ni Jesus do i tu si Tomas. On ma pandok ni apostel Paulus mangonjar hita asa porsea: “Asa sian na tumangihon do ro haporseaon, ia panangihoni, sian hata ni Kristus do “ (Rom 10:17). Morot ma hita sian na sai mangasahon utokutokta na mar-Tuhan on, tatiru ma songon si Tomas naung paubahon sudut pandnag na rasional i, dok ma: Tuhanku jala Debatangku. Taingot ma haroroan ni sude pangidoanta dohot na taparsinta, ima Debata. Angkup ni inaeng jumpang dihita parbue ni haporseaon marhitehite na mangulahon angka na denggan jala hombar tu lomo ni roha ni Debata songon na nidok ni si Jakobus : “Haporseaon i pe songon i do, anggo so adong pangulaonna, naung mate do hadirionna” (Jak.2:17). Amen.

Bahan Epistel PASKAH II, 1 April 2013

Margogo Dibagasan Tuhan i

2 Korint 5 : 6 – 10

      A.      Patujolo

Korintus ima sada huta na targoar strategis, ala marhite huta on do na padomuhon Junani Selatan dohot Junani Utara. Korintus ima sada kota pelabuhan, dibahen i gabe pust pardagangan industri do inganan on. Alana gabe marragam bangso dohot houm maringanan di Korintus. Marragam do nang aliran filsafat dohot ugamo jumpang disi tarmasuk ma parsombaon tu ganaganaan na margoar Aphrodite, ima dewi na dihaporseai manarajai holong dohot hagiot ni daging ni jolma. Ala masa sisongoni, gabe tardok do mamora Korintus di arta, malo di parbinotoan alai pogos di partondion nang dipangalaho na so bermoral, angka haramunon na diula torop angka pangisina. Situasi on ma muse na dibereng apostel Paulus songon sada potensi na balga, na mambahen marsitutu ibana laho mamaritahon barita nauli dibagasan panghirimon; anggiat nian boi humatop rarat barita nauli i tu angka luat, tu angka bangso na asing.

      B.      Hatorangan

      1)      Ayat 6 – 8 : Dilehon Debata do Tondi tu saluhut na porsea tu Debata di portibi on. Nang pe dokdok ngolu saleleng di portibi on, ditogihon apostel Paulus do halak Kristen asa margogo jala ndang mandele mangadopi pardalanan ni ngoluna. Nang pe ndang ‘aman’ posisi ni halak Kristen maradophon panggomgomi dohot angka ugamo mayoritas di hatiha i, tung so jadi do mabiar huria i, ala dilehon Debata do Tondina, na margogoihon Huria i. Dipaingot apostel Paulus do huri Korintus, nang pe ragam parsorion ni angka na porsea di portibi on, alai laos disi do papataron ni Debata diriNa, asa lam solhot Huria i tu Tuhan Debata. Dibahen i, ndang hea disolsoli si Paulus asa tongtong sabam, manahan jala margogo Huria i mangasahon Debata, ndada mangasahon hagogoon dohot pingkiran nasida sandiri.

    2)      Ayat 9 – 10 : Dipaingot Apostel Paulus ia manisia ima na tinompa ni Debata na dilehon Debata kebebasan laho mamillit dalan hangoluan na denggan manang na roa. Dibahen i, tung so denggan do molo dipangke Huria i kebebasan na sian Debata holan marojahan tu roha diri dohot angka na ringkot di diri nasida sandiri. Siparungkilhononhon do molo masa kemerosotan moral ditongatonga ni parsaoran ni halak Kristen. Dibahen i, ingkon tongtong do diingot angka na porsea, na diboto Debata do saluhut angka na masa di portibi on. Marhite Tondi ni Debata, diarahon do jolma i asa marpangoloion tu Debata saleleng ni ngoluna. Pilihan terakhir kembali tu jolma i sandiri. Alai unang adong jolma i na lupa, ingkon patar be do sogot dijolo ni habangsa paruhuman ni Kristus, asa dijalo be hombar tu na niulana, tagan di pardagingon, manang na denggan, manang na roa.

      C.      Sipahusorhusoron

ü  Ndang leleng dope sian parningotanta na masa di huria HKBP Setu, jala andorang so masa i, nunga dipamasa tu HKBP Piladelpia, dohot pigapiga huria na di Bandung dohot Bekasi na dibongkar paksa jala ditutup gareja. Tung mansai maol na deba huria laho mandapot IMB(Izin Mendirikan Bangunan). Jala ndang holan i, mansai godang dope angka hamaolon na niadopan siihuthon Kristus. Ala ni i angka parsorion manang tekanan na taadopi dibagasan panghobasionta naeng ma taadopi dibagasan pangalaho na positif. Naeng ma tongtong adong panghirimon dibagasan diri ni angka na porsea, panghirimon di portibi on nang panghirimon dingolu na manongtong raphon Tuhan Debata.

ü  Adong do na mandok: parsirangguton i (pergumulan hidup), sada tanda na mangolu dope hita di portibi on. Boha sikap ni halak porsea mangadopi parsirangguton i; uju perekonomian lam maol, nang angka kondisi sosial (intoleran) merajalela, kondisi politik na semakin rumit, ragam tantangan sian tongatonga keluarga, songon i angka sahit na boi ro tu pamatang ni jolma, dohot lan na asing. Ala ni i ingkon rade do hita maniru songon pambahenan ni apostel Paulus na tongtong marsihohot dibagasan haporseaonna, mamaritahon barita nauli dibagasan ngoluna.

ü  Ndada adong saotik pe na malua sian parbinotoan ni Debata angka na diportibi on. Tondi ni Debata i do na mandongani halak na porsea laho mamangke kebebasan mamillit na denggan manang na roa dibagasan tanggung-jawab, ala ditingkina, patar do sude pangulaon ni jolma i dijolo ni habangsa paruhuman ni Kristus. Naeng ma taauhon sosososo ni apostel Paulus on dibagasan ngolunta laho mangeahi ngolu na ture songon angka siihuthon Kristus. Unang ma mabiar hita laho marsihohot di poda na tingkos i, ai Tuhan Debata do na tongtong mandongani jala margogoihon hita ( 2 Tim. 1:7). Amen.

Jamita Buhabuha ijuk, 31 April 2013

Gabe Sitindangi HaHeheon ni Kristus

Ulaon ni Apostel  2 : 31 – 32

      A.      Patujolo.

Dijolo ni turpuk on dipatorang do taringot realitas manang fakta na pinasahat ni si Petrus marhite jamitana on. Ndada turiturian sambing barita taringot tu raja Daud i, ai haru tanomanna adong sahat tu sadari on. Asing ni sebagai raja, sahalak panurirang do tong ibana. Ndada  holan di harajaonna si Daud dipillit Debata, alai songon sahalak panurirang pe ibana sian  na pinillit ni Debata, maruari do paboa na ro haduan sahalak na gabe raja sian pinompar ni si Daud, marhuraja di harajaonna (Ptds. Psalm.132:11)

      B.      Hatorangan

Ayat 31 – 32 : Ala ni i tung mansai dao do ditatap raja Daud tu jolo. AI molo didok Debata tu si Daud, ia na naeng adong sian tongatonga ni pinompar ni si Daud na marhuraja haduan. Na marlapatan ; ima Mesias. D Psalm 16: 10, didok si Daud do : “Ai ndnag tagamon pasombuonMu tondingku di banua toru, ndang tagamon loasonMu hasianMu marnida habusuhon”’ patuduhon panurirangon taringot tu hamamate dohot haheheon ni Kristus i do i. Jala ipe ndada holan turiturian sambing i, ai apala si Petrus sandiri ma sahalak sian saksi hidup na tangkas langsung mamereng peristiwa hamamate dohot haheheon ni Tuhan Jesus.

Ndada sude jolma natorop i (sandok bangso Juda) na gabe saksi di haheheon ni Tuhan Jesus, alai ianggo di hamamateNa di hau pinarsilang tontu torop do nasida na mamereng i, bahkan mungkin adong do diantara ni natorop i termasuk na koras menuntut Jesus asa diparsilangkon uju i. Ala ni i sadar ma nian bangso Juda paboa Jesus na diparsilanghon nasida i nunga hehe sian hamatean jala ima na patuduhon habalgaonNa i, na hehe Tuhan i jala Kristus dibahen Debata.

      C.      Sipahusorhusoron

                       i.               Songon sahalak sisean na langsung gabe saksi hidup na menyaksikan peristiwa hamamate, haheheon, dohot hananaek ni Tuhan Jesus tu banuaginjang, dijamitahon si Petrus do jamitana on laos songon sada panindangion/kesaksian tu angka natorop i. Haru Raja Daud na mangolu di Padan na robi manurirangkon (na marlapatan porsea do ibana) taringot tu haheheon ni Tuhan Jesus, lam ma nian bangso Jahudi na dohot menyaksikan haheheonNa.

                      ii.            Tarjou do halak Kristen laho manghatindanghon haheheon ni Tuhan Jesus dohot hananaekNa tu banua ginjang, ai ido hataridaan ni Debata di bagasan AnakNa Tuhan Jesus, Ibana do pinabangkit ni Debata Ama gabe Tuhan jala Sipalua. Panindangion i naeng ma nionjar ni haporseaon, ndada ingkon nionjar ni pengalaman/marnida langsung. Martua ma halak na porsea nang pe so diida!

Bahan Jamita Minggu PASKAH I, 31 Maret 2013

Unang Mabiar Nunga Hehe Jesus i

Matius 28 : 1 – 10

      1.       Patujolo

Disurathon na opat evangelium i do nang marasing be dibaritahon traingot tu haheheon on. Molo di angka surat tu huria na parjolo i, gumodangan do pangantusion taringot tu lapatan ni haheheon (teologi) dipatorang. Asa tung na menentukan situtu do haheheon ni Tuhanta i, laho pahothon rohanta di hakristenonta i. Angka dia ma na boi palashon rohanta di Pesta haheheon ni Tuhan Jesus, ganup jumpa uju ro hita tu bagasjoroNa sadari on. Apostel Paulus tangkas do didok ibana: “Ai anggo so hehe Kristus sian angka na mate, rumar ma jamitanami. Laos rumar ma nang haporseaonmuna (1 Korint 15: 14). Ala tutu situtu do hehe Jesus sian na mate, na marlapatan ma i: tutu situtu do Jesus i, Debata na marhuaso di atas ni saluhut, gabe ndnag marisuang haporseaonta, pangkirimonta, dohot holong ni rohanta nang parugamaonta pe. Apostel Paulus sandiri, ganu manongos suratna  ibana tu ganup huria, sai marojahan tu haheheon ni Jesus i do jamitana manang sipaingotna. Laos songon i do sahat tu sadari on, lam rarat do Barita Nauli, nang pe godang na mangambati. Ndang boi mintop manang mansohot Barita Nauli i, ala mangolu do Jesus.

     2.       Hatorangan

    a)      Dibaritahon do paboa mansai sogot  di ari Minggu i borhat do si Maria Magdalena, dohot si Maria Magdalena, dohot si Maria ina ni si Jakobus, dohot si Salome tu tanoman ni Tuhan Jesus. Diboan nasida do ragamragam ni na hushus naung tinuhor nasida hian laho mamiahi bangke ni Tuhan Jesus. Berbeda sian si Mateus, ndang dipatorang si Markus naung masa lalo na gogo, jala na tuat surusuruan ni Tuhan sian banuaginjang laho manggulang batu ni kuburan ni Jesus i laos hundul di atas. Hape angka peristiwa i do na songon ‘event’ haheheon ni Jesus laho mamiahi bangkeNa.

     b)      Longang do angka parompuan i marnida batu naung magulang sian baba pintu ni tanoman i. Penekanan taringot batu na balga i boi do gabe sada alus tu tuduhan seolah-olah naung ro angka siseanNa bornginna i manangko bangke ni Jesus (Ida. Mateus 28: 13). Dung dibereng angka parompuan i naung digulang batu i, dibongoti nasida ma tanoman i. Diida nasida ma disi sahalak dolidoli parulos na marlinang hundul tuangkan siamun. “Mabiar” situtu ma nasida. Hata “mabiar” dipangke jotjot di Injil manggombarhon reaksi tu angka tanda halongangan na pinatupa ni Jesus. Ia sintuhu ni barita ni dolidoli parulos na marlinang i, ima: “Dilului hamu do Jesus na sian Nasaret, naung diparsilangkon. Nunga hehe Ibana! Ida hamu ma ianganan hapeahanNa on”!(ay.6). Laos disuru dolidoli ima angka parompuan i laho paboahon tu angka siseanNa dohot si Petrus na joloanan ni Jesus nama nasida tu Galilea, jala disi ma idaon nasida Ibana.

     3.       Sipahusorhusoron

                     i .            Sada sitiruon do pangalaho ni si Maria Magdalena dohot angka parompuan i, lumobi tu hita angka na sai jotjot dirajai halosohon, na magira so tudia. Ndada ditunda si Maria mangalaputi mambahen na denggan atik pe sahalak parompuan na gale ibana, na so apala tama mardalan di partingkian na holo. Digombarhon do disi pangalaho: a)Mengutamakan Tuhan, b).Berani mengambil resiko, c). Merindukan (manghasiholi) Tuhan Jesus.

                       ii.      Sude do halak na mangolu mangharingkothon “pusupusu” (jantung), ai ndnag tarbahen jolma i mangolu molo so marpusupusu. Tarpatudos hita do tusi nang barita haheheon i, ai haheheon ni Jesus i do jantung utama ni ajaran hakristenon. Ndang na mandok naso ringkot peristiwa na asing na tarsurat di Bibelta i, alai haheheon ni Jesus do pusat ni sude pamaritahonon taringot tu pasupasu haluaon na sian Debata. Haheheon ni Jesus patuduhon hamonanganNa maralohon hamatean i. Aut so hehe Jesus sian tanoman i ndang marlapatan Barita Nauli i. Tangkas do didok Apostel Paulus di 1 Korint 15:14 “Ai anggo so hehe Kristus sian angka namate, rumar ma jamitanami, laos rumar ma nang haporseaonmuna”.

                      iii .   Naeng ma lam mangolu jala hehe partondionta mangadopi saluhut na masa dohot na naeng masa. Marhite haheheon ni Tuhan Jesus (Ibana do patujolo dohot haheheonta sogot), manogunogu hita angka na porsea asa unang holan marpingkir (berorientasi) holan tu ngolu parsatongkinan hita di portibi on. Alai mampu haruar sian roh-roh zaman na pasegahon parsaoranta dohot Debata. Isara ni materialisme, individualisme, konsumerisme, hedonisme,dna. Haheheon ni  Tuhan Jesus sian na mate mamboan kemerdekaan tu angka na porsea di haheheon i, kemedekaan sian perbudakan dosa dohot hamatean sisaleleng ni lelengna. Asa halak naung merdeka, ima halak na mampu berlomba tongtong berdiri teguh aha pe na masa alai sai las roha. Antong dohot do hita disuru mamaritahon hamonangan ni Tuhanta i tu halak na asing, asa lam torop halak na manghaporseai Jesus. Amen.

Sermon Epistel Paskah I, 31 April 2013

Manghatindanghon Jesus

Ulaon 3 : 11 – 16

I.                    Patujolo :

a)        Buku Ulaon ni  Apostel on ima udut  ni Evangelium Lukas. Si Lukas halak Siria na sian Antiokia na gabe siihuthon Jesus Kristus dung umbege jamita ni Apostel Paulus na pola dipasahat Apostel Paulus tabena tu ibana (Kolosse 4 : 14) Manongos tabi tu hamu pandaoni Lukas haholongan i , dohot si Demas. Buku Evangelium Lukas dohot buku Ulaon ni Apostes na ditongos panurat Lukas tu si Theofilus (Lukas 1 : 1  Ulaon 1 : 1 ) Theofilus nadi goari NASANGAP. Somalna molo di halak Rom digoari NASANGAP ima WALI NEGERI . Nunga diboto si Theofilus taringot tu hapaorseaon (iman) ni halak Kristen alai asa haru dasip pangantusionna, ido alana umahen ditongos si Lukas suratna on na pola dipajojor ibana parmulaan ni haKristenon i sian mulai hatutubu ni si Johannes Pandidi , hatutubu ni Tuhan Jesus, sahat ro di natarhurung Apostel Paulus di huta Rom pola 2 taon lelengna hira hira taon 61 A.D. Godang do pangurupion ni nasangap ni Rom tu Apostel Paulus isara ni pangurupion ni si Gallio Gubernur ni Propinsi Akaya (guru ni Kaisar Nero) na so olo umbege tuduhan ni halak Yahudi taringot tu Apostel Paulus ala mangihuthon si Gallio ia tuduhan i urusan ni Theologia ni halak Jahudi do i ( Ulaon 18 : 12 – 17). Dipapatar panurat Lukas : Na dipatupa musu ni Apostel Paulus do surat pangaluan tu si Felix dohot tu si Festus  (namarhuaso di panggomgomi Rom) asa dihukum mate Apostel Paulus alai sude pangaluan i gagal ala dipalua si Festus rap dohot raja Agrippa II do ibana.

b)        Evangelium Lukas dohot Ulaon ni Angka Apostel sasintongna ndada dua buku alai sada buku do i dibagasan dua bagian. Buku Ulaon ni Apostel disurat si Lukas andorang so taon 90 A.D. patar dipatorang di bagian parpudi  taringot tu HAMONANGAN NI BARITA NA ULI na tinariashon ni Apostel Paulus di Roma na so pola adong pangambati laho mamaritahonsa. Buku Ulaon ni Apostel napapatarhon KATOLISISMA (UMUM ) paboa na so adong be parasingan ni halak Kristen na ro sian Jahudi dohot halak Kristen na ro sian na so Jahudi ima na dipapatar di RAPOT BOLON NA DI YERUSALEM (Ulaon 15:).

c)         Tujuan ni panurat Lukas menjembatani jurang pemisah antara ni halak Kristen na sian Jahudi dohot halak Kristen na so sian Jahudi na gabe hapataran ni perkembangan na wajar sian panghobasion ni Tuhan Jesus

dohot panghorhon ni panghaporseaon ni halak Kristen na marmula sian Jerusalem. Naskah mula mula sian Evangelium Lukas dohot sian Ulaon ni Apostel na di parade tu haporluan Apologetik (pembelaan) taringot tu parkaro ni Apostel Paulus molo tung dipasahat tu Kaisar . Ala ni i do umbahen dipatolhas  si Lukas suratna on tu si Theofilus, asa si Theofilus songon WALI NEGARA patoranghon tu Kaisar taringot tu asal usul dohot taringot tu sifat hakiki ni ugamo Kristen na gabe songon sibonsiri umbahen dimusui halak Jahudi nasida. Namansai patar di buku Ulaon ni Apostel paboa naparsidohot do Tondi i mandongani naporsea i di ulaonnasida . Tuhan Jesus naung hehe sian namate naung manjanjihon taringot tu haroro ni Tondi Porbadia, jala PADAN i dipatulus di Ulaon ni Apostel 2 : tu halak Jahudi jala di Ulaon ni Apostel 10 : tu halak na so Jahudi. Dipasingkop Tondi Porbadia  nahinatahon ni Tuhan Jesus. Jala marhite sisean i tolhas hasasaor ni Tondi Porbadia i.

  

II.                  HATORANGAN NI AYAT :

1)        Ayat 11 : HALONGANGAN DO PAMBAHENAN  NI DEBATA : Sisada hasadaon do ayat 1 sahat tu ayat 11 on ima napatoranghon sahalak napangpang boi mardalan jala marinjakinjak huhut mamuji Debata ala ni las ni rohana malua ibana sian namandokdohi dirina. Namasa on di Bagas Joro uju ari Sabbat , parpunguan ni sandok halak Jahudi laho mamuji Jahowa. Hata ni si Petrus tu napangpang i namandok : MARHITEHITE GOAR NI YESUS KRISTUS NA SIAN NASSARET I MARDALANI MA HO : Ima na gabe panindangion di tonga tonga ni namanghasogohon siihuthon Jesus. Parise do namanguluhon peribadahan di Bagas Joro jala Saduse do namangaradoti nasa pelean na di Bagas Joro , digoari do halak on nasangap ni halak Jahudi . Masuk do si Petrus dohot si Johannes tu Bagas Joro i jala andorang so masuk nasida diida adong napangpang di pintu ni Bagas Joro i , gabe dihatahon ma hata : Marhite hite goar ni Jesus na sian Nassaret i mardalani ma ho . Ndang adong biar ni rohanasida marnida punguan ni halak Jahudi naniuluhon ni Parise dohot Saduse i ima na gabe PANINDANGION NA TANGKAS di tonga tonga ni namamunu Jesus i . Marnida na masa i marrongoman ma natorop i ro tu si Petrus dohot si Johanes dibahen songgot (keheranan) ni rohana. Patar halongangan do saluhut pambahenan ni Debata , gabe marjamita si Petrus tu natorop i.

2)        Ayat 12 : - ayat 15 HAPORSEAON TU TUHAN I DO PATUPA HAHISARON . Dipasintong si Petrus do hadirionna di jolo ni natorop i paboa naso ibana dohot si Johanes napaluahon napangpang i sian hadokdohonna i . Didok si Petrus  : HAMU HALAK ISRAEL= ISRA ELOHIM ( ANAK NI DEBATA ). Aplikasi : Atik tung torop do namanggoari dirina halak Kristen (siihuthon Kristus) alai ndang manghatindanghon Kristus di ngoluna. Diihuthon halak Israel do peribadahan di Bagas Joro alai ndang diantusi jala ndang dihaporseai nanindok ni Debata sogon na tarsurat di Padan Na Robi songon napinatorang ni angka Panurirang taringot tu Jesus (Sipalua) i. Dipaandar si Petrus taringot tu hadirion ni Jesus nanibunu ni halak Israel (namanggoari dirina anak ni Debata) alai nadohot mamparsilanghon Jesus i Porsea do halak Israel tu Debata ni si Abaraham, si Ishak, si Jakob napapatarhon nahinaporseaan ni ompunasida i do Debata Jahowa mangalehon PADAN na ingkon lehononna SIPALUA songon na hinatindanghon ni angka Panurirang i. Halak Israel do namausa PARTOGI i jala PARTOGI  i do napahisarhon napangpangi . Ima panindangion ni si Petrus tu natorop i na ro marrongoman mandapothon si Petrus, si Johannes dohot namalua sian hapangpangonna i. Dipahehe Debata Yesus sian namate jala siseanNa ima na gabe sitindangi di haheheon i .

3)        Ayat 16 : HAPORSEAON DI GOARNA MAMBAHEN GOGO . Panindangion ni Apostel Petrus taringot tu Tuhan Jesus namangalehon gogo dohot hahisaron tu halak na gale i, tu halak na so margogo i na holan managam asi asi ni halak , alai dung hisar pamatangna jala margogo ibana hinorhon ni haporseaonna i nunga rap ibana marlas ni roha dohot natorop i laho mamuji jala pasangap Debata.    Sunggul sunggul do pandohan on tu halak Israel na sai tongtong manopot Bagas Joro alai ndang  manghaporseai Debata marhite nahinatindanghon ni PanurirangNa nang sian narobi dope. Na so margogo jala na so pinardulihon ni halak ala ni tihasna di tingki nasai laon alai gabe sitindangi di goar ni Tuhan i , ima ala ni haporseaon dohot pos ni roha ni ibana tu Jesus i. Huaso ni Tuhan Jesus tongtong marsaringar di angka naporsea i jala angka naporsea i gabe sitindangi namangolu tu saluhut nahumaliang na gabe tudu tudu tu las ni roha namaolop olop .

III.                Sipahusorhusoron:

ü  HAPORSEAONMI DO PATUPA GOGO DI HO

ü  HATINDANGHON MA YESUS DI NGOLUM