Guru Dok NI Debata Do Saluhutna
(Tuhan Sanggup
Melakukan Segala Sesuatu)
Job 42: 1 - 6
a) Huria ni Tuhanta dideba huria,
molo manaringoti si Job di ganup jamita, pasti na marhahonaan tu haporsuhon,
panaritaan, sidangolon tu haporseaon, hasatiaon, habengeton ni roha. Parngoluon
ni si job mangalehon inspirasi di sude halak; boha do asa manahan di
haporsuhon. Ia jolma na diportibi on sai adong be do haporsuhonna, adong be do
ragam parsorionna. Bahwa manusia tidak lepas dari maribahaya dan masalah-masalah
kehidupan. Laos disi do jolma i tertantang untuk tetap bertahan atau menyerah.
Molo angka na porsea i sai manahan do sahat di ujungna, ndang humordit ibana,
sai mangula do haporseaonna tu Tuhan i laho mangalului dalan asa malua sian
hamaolon i. Molo angka sangkap ni jolma jotjot do ndang marnasaut, ndang jadi,
alai molo sangkap ni Tuhan i sai na tupa
do luhutna. Ndang adong na boi mangambati sangkap ni Debata, ai Ibana do
nampuna portibi on, ai jadijadianna do hita na di portibi on.
b) Ia turpukta on manaringoti si Job
na mangadopi parungkilon bolon. Mago do sude na di ibana i, ima agoan di arta
agoan keluarga, nang sahit panahit na songgop tu ibana. Nang pe di parungkilon
na boloni ibana sai marsihohot dope ibana manghaposi Debata na marhuaso
patupahon nasa na uli basa jala ndang adong na sundat sangkap ni Debata.
Dibagasan pos ni roha, nang haporseaonna i, dihatindanghon si Job do i a Debata
nampuna hagogooon na so hatudosan, na so marbatas, nang di hamaolon na balga
situtu pe ndang tarambatan huasoNa mangatasi i sude.
c) Lapatan ni panghatindanghonon ni
si job on ima haporseaon nang panindangion ni si Job tu huaso, hasongkalon nang
habisuhon ni Debata. Nang pe adopanna panaritaan na luar biasa jala ndang
diboto ibana sialana ibana manarita, alai sai hot do ibana manghaporsea i
Debata nampuna huaso laho patupahon nasa na adong. Disadari si Job do ia sangka
ni Debata ndang adong na boi manang aha pe na laho mangambatisa. Ia Debata
nampuna parbinotoan na bidang jala tumimbo sian manisia. Panindangion on patuduhon
haporseaon ni si Job na togu ia Debata
ima Parhuaso na so hatudosan, na manguluhon saluhut na tinompa i tarmasuk do
keadaan ni taalami hamaolon na taadopi suang songi na niadopan ni si Job.
d) Digurithon si Job do
panindangionna taringot tu Debata na so hea gagal ima laho paboahon
haporseaonna, panindangion dohot panombaonna tu Debata. Disi ma ihut hamubaon
ni sikapna na naung mangadopi hamaolon i nangparsorion ni ngoluna. Dimulana i
ragu do si Job di hatigoran dohot habisuhoon ni Debata, alai dung diproses
rohana, marsiajar ma ibana laho mananggalhon keraguan dohot kebimbangan huhut
pasahat diri hibul tu sangkap nang huaso ni Debata. Marhite na manggurithon
panindangionna i, si Job naeng pasahathon tu Debata nang tu angka na manjaha
suratna on, ai naung sahat do ibana tu pangantusion na bagas taringot tu Debata
dohot na mangokui hasongkalonNa. Panindangionna i marfungsi do i songon tiruan
tu halak na asing laho manghaposi dohot manghaporseai Debata di sude
partingkian nang pe maol jala gok panaritaan.
e) Huria ni Tuhanta, Guru Dok Ni
Debata Do Saluhutna, (Tuhan Sanggup Melakukan Segala Sesuatu) ima topik di
minggunta na paboahon tu hita ia:
Ø Naparjolo, manghaposi huaso ni
Debata.
Diajari do hita asa marsihohot jala togu manghaposi huaso ni Debata. Nang pe
adopanta ragam ni angka hamaolon ingkon pos do rohanta ai ndang adong na so
tarpatupa Debata. Di Ibana do nasa huaso dohot hagogon na mangatasi saluhut di
portibi on. Ndang adongna maol di Ibana.
Ø Napaduahon, haposi ma sangkapNa. Dihatindanghon si Job do, ia
ndang adong na sundat saluhut sangkap ni Debata. Marhite on laho mangajari hita
asa marnampunahon pos ni orha sihirimon na botubotul di sangkap nang hahomion
ni Debata. Boi do ndang antusanta sasude na masa di ngolunta, manang mansai
maol tarjalo roha na masa i. Alai pos ma rohanta songon na nidok ni si Jeremia
29: 11 Ai nunga tangkas huboto sangkap angka na husangkapi taringot tu hamu,
ninna Jahowa, sangkap hasonangan do tahe ndada tu hamagoan, asa ahu mangalehon
tu hamu ujung na hinalungunhonmuna. Ndang patupaonaNa angka na jat, sai
angka na uli na denggan do bahen las ni rohanta.
Ø Napatoluhon, ndang manahan jolma
i ala ni hagaleonna. Lapatana ndang na gabe jolma na super hita. Adong do kelemahanta,
hagaleonta, keterbatasanta. Jala maol do masuk tu pikiranta na pinamasa ni
Debata. Boi do ndang tarjalo roha dohot pikiranta pambahenan ni Debata. Lao
sosngon i do si Job diokui ibana do naso tardodo pikiranna do sude na masa
parsorion dibagasan ngoluna. Ala ni tama do hita songon si Job na sai unduk
marserep ni roha mangokui hagaleonta mangantusi i saluhutna marhite pikiranta.
Ai marbatas do parbinotoanta, alai holan pos ni roha dohot haporseon do na
mangolu di Debata. Songon Jesus Kristus i sai marpos ni roha do tu Debata Ama i
na lehononNa hagogoon tu AnakNa Jesus Kristus laho mangadopi borat ni hau
pinarsilang i, pola sahat tu na ingkon agoan hosa. Ima holan laho mangoloi
panjouon ni Debata tu AnakNa na Sasada i. Ala ni hamamate ni Jesus i do sangkap
na uli na denggan asa malua ganup na porsea di Ibana. Tuhan sanggup melakukan
segala sesuatu demi kebaikan kita dan keselamatan kita. Amin.
