Jamita Evangelium Minggu XIV D.Trinitatis – 1 September 2024

Mangaradoti Tona Ni Jahowa     

 (Berpegang Pada Perintah Tuhan)

5 Musa 4; 1 – 2, 6 – 9  

 

1)     Huria nahinaholongan dibagasan Jesus Kristus, Ndang adong na holip sian adopan ni Debata jala ndang adong na kebetulan na masa di portibi on. Laos songon i do perenunganta di hurianta HKBP boi jongjong ditonga portibi on ala diloas Tuhanta i laho mangula ulaonNa. Songon i do bangso Israel na dibentuk jala ditotophon Debata gabe bangsoNa laho patulushon sangkapNa. Ala ni i dibagasan turpuk on dipaingot si Musa do bangso i asa tongtong ingot di pangaramotion ni Debata jala mangolu dibagasan haunduhon tu Ibana jala padaohon diri sian debata sileban. Sian turpuk on boi idaonta panogunoguon ni Debata marhite si Musa tu bangso Israel asa manadinghon parngoluon na robi laho bongot mamasuhi tu parngoluon na imbaru. Dibagasan parngoluon na imbaru ima dipatuduhon haunduhon tu Debata. Sian parmahanion ni Debata marhite naposoNa si Musa tu bangso Israel mangalehon tona na ringkot laho diingot jala diulahon angka pinomparna na mangihut ima asa mangashon Debata dibagasan ngoluna.

2)     Asa marngolu dibagasan ngolu na imbaru i, ndada sian tahitahi nang lomo ni roha ni bangso i be na marlangku alai lomo ni roha ni Debata. Dingolu na imbaru i dipangidohon standard ni Debata ima na mangaradoti dohot mangulahon patik dohot Hata ni Debata, jadi ndada standar di bangso i manang hajolmaon. Tudos do i tu panjouon ni Debata tu hita angka na porsea asa unang sarombang dohot portibi on. Songon na nipasahat Ap.paulus di Rom 12: 2 “Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.” Molo diulahon bangso Israel hata nang patik ni Debata asa ido dalanna gabe lomo roha ni bangso Kanaan nang di humaliangna marnida bangso ni Debata ima Israel asa tarjou mamuji Debata. Gabe panutan di sude jolma ido nuaeng dilului jolma. Figur yang membingbing banyak manusia ke arah yang lebih baik lagi. Gabe role model, patron perilaku, moral setter, ketika jaman nuaeng nga gawat darurat moral, krisis moral manusia. Asa tarjou do angka na porsea i marhite parange nang pangalahonta torop jolma manghasiholi Jesus jala manghaporseai Jesus. Na gabe uluan do hita ima manguluhon, mamboan torop halak mangihuthon Jesus, ndang na gabe follower, yang akan diikuti bukan pengikut, dan harus mewarnai bukan ikut-ikutan. Ima dipasahat Tuhanta Jesus di Matius 5: 13-16, “...Hamu do sira....hamu do panondang...” Na gabe sira, asa mardai na tabahen i jala marimpola, adong kesan tersendiri dia angka jolma na tatopoti. Dungi gabe panondang, na mangalo angka pangalaho haholomon, paboa hasintongan dohot hatigoran ni Tuhan i, jala patuduhon dalan ni Tuhan i sian perananta di parngoluon on.

3)     Huria ni Tuhanta, diajari turpuk on do hita boha do hita mangulahonsa. Ala naung dilehon Tuhanta i do standard di ngolunta ima marhite:

Ø  Ay.1. “Tangihon ma”; Manangihon dohot roha na marmulai sian tangiang na hohom jala marmeditasi, disi ma begeonta soara ni Tuhan i na lam gogo. Uju martangiang i do ungkap rohanta sabidangbidangna laho manangihon jala manjanghon HataNa. Sian i ma jaloonta arahan  nang petunjuk ni Debata na singkop laho mangalusi nasa persoalan hidup. Pegangan yang kokoh adalah firmanNya. Seorang hali mengatakan: Bila Allah berkata sekali, kita harus mendengar dua kali. Maehita na sai taulanghon manangihon disi ma lohot tu roha nang pikiranta hataNa i. Rick Warren mengtakan; membaca, merenungkan dan menghafal ayat Alkitab setiap hari, itu ibarat mengisi penuh senapan rohani dengan peluru Firman Tuhan yang sian ditembakkan ketika si iblis datang menggoda, sehingga kita tidak menjadi korban si iblis.

Ø  Ay.2. MANGARADOTI TONA NI JAHOWA. Ima siulaon ni angka na porsea, naung tinobus mudar ni Kristus Jesus. Hata ni Tuhan i do na gabe pasupasu di hita na porsea na so tartuhor jala terukur sian arta na di portibi on. Asa di na laho mangaradoti tona ni Jahowa i unang dipangasahon pingkiran, perasaan asa gabe ambaan manang oruan hata ni Tuhan i. Pangalaho i do na niulahon angka halak Parise dohot Saduse. Jala ido na nibahen Paus uluan Katolik Roma asa ro ma Pdt.Dr.Martin Luther mangalo marhite dalil-dalil nang angka dasar iman Kristen marhite hapolinon ni Hata ni Debata. Sola Scripture, naung singkop do Hata ni Debata i jadi ndang ringkot be siambaan marhite angka fatwa-fatwa manang tafsiran na melenceng na so ada dasorna.

Ø  Ay.6; Mangulahon Hata ni Debata, ido na terutama di angka siihuthon Kristus. Ndang holan mananginangi alai lam malo mangulahon Hata ni Debata. Pangulaon i do laho mambuktihon haporseaonta. Pangulaon i do na mangalehon nilai plus jala na mangalehon pengaruh tu na marnidasa. Songon sahalak na marsiajar marsepeda. Ndang tamulai dope nunga adong di pikiran sai madabu ma annon, jala ndang mungkin boi seimbang dohot dua roda sepeda, manang loja na i na marsepeda on, boi do i mambahen ndang malo be hita laho marsepeda. Suang songon i do na mangulahon hata ni Tuhan i, jotjot do pikiranta i na gabe penghalang. Sai tapingkiri jala tadodo aha do na naeng masa. Sai taukur do dirinta manimbang-nimbang na boi mambahen rugi manang labana. Ala ni i do maol do hita gabe tang marhaporseaon. Sian taon tu taon sai adopanta do angka masalah nang pergumulan hidup na sarupa. Na taulahon na ringkot ima mangalangkahon langkanta marhite “haunduhon na mapitung”. Mangulahon Hata ni Debata so pola mamereng ise be dirinta, latar belakangta manang pandangan ni jolma tu hita. Fokus ni ngolunta ima holan tu Tuhan i, mangulahon dohot mangaradoti PatikaNa ala tahaholongi do Tuhan i. Taradoti hataNa i ala tahaholongi Ibana, tahaposi ma sai dongananNa do hita. Urupanna do hita uju maol tahilala, dilehon bisuk uju ponjot tahilala jala margogoihon hita uju gake tahilala.

Ø  Ay.9: uarihon ma i tu angka pinomparMu. Ai ndang arta nang sinamot portibi on na ummarga siuarihon ni natoras tu gellengna. Alai na rumingkot niuarihon ima haporseaon dibagasan Jesus Kristus. Asa malua angka pinomparta i sian uhuman di ari sogot i. Satia jala burju angka pinomparta i tu Tuhan Jesus. Ala ni i mansai ringkot do ajarhononta patik nang Hata ni Debata tu anakhonta sahat tu pinomparta. Molo so i boi do lam sega generasinta ala ndang niuarihon Hata ni Debata. Ulangan 6 : 6 – 7 : "Apa yang kuperintahkan kepadamu pada hari ini haruslah engkau perhatikan, haruslah engkau mengajarkannya berulang-ulang kepada anak-anakmu dan membicarakannya apabila engkau duduk di rumahmu, apabila engkau sedang dalam perjalanan, apabila engkau berbaring dan apabila engkau bangun".

BE 25 HATAMI ALE TUHANKU

1. HataMi ale Tuhanku, arta na ummarga i

Sai paian di rohangku, unang so hutiop i

Molo so be sitiopan, hata na badia i

Aha nama haojahan Ni haporseaon i?

2. Ale Jesus sai matahon, sai ramoti ma au on

Asa hot haporseaon, di bagasan rohangkon

Sai paringgas ma rohangku, mangoloi di hataMi

Asa mauas di podaMu, songon si Maria i.

Amen.

Jamita Epistel Minggu XIV D.Trinitatis – 1 September 2024

Mangaradoti Tona Ni Jahowa     

 (Berpegang Pada Perintah Tuhan)

Mateus 15 : 1 – 9  

 

1)     Huria nahinaholongan dibagasan Jesus Kristus, Ia Barita na Uli marharoroan sian Debata. Molo adat kebudayaan ima na marharoroan sian pamingkiron, ide, nang pandangan, pambahenan nang sibahenon ni jolma. Siala bdaya i do sian manisia, asa marragam ma angka hasomalan nang adat, jala ala marasing be, boi do partontangan jala maralo tu haomalan nang adat na asing. Alai molo Barita na Uli i sian Debata haroroanna jala ndang adong na maralo i. Parasingan nang partontangan di Barita na uli ima siala jolma i do na marasing be pangantusionna di Barita na Uli i. Boi do marasing angka adat hasomalan alai molo Barita na uli ndang boi marasing. Ia Barita na uli i do manondangi angka adat hasomalanta ndada sabalikna.

2)     Dipanghobasion ni Tuhanta Jesus nang di jamitana jotjot do mambahen tudosan sian angka adat hasomalan. Isarana uju Jesus mamburi pat  ni angka siseanna. Mulana i maburi pat ima adat hasomalan na marlangku uju mamasuhi bagas. Jala ulaon na mamburi pat ima ulaon ni angka hatoban do uju i. DI na laho marsipanganon ndang tarpatupa i molo so jumolo dipatupa mamburi pat. Dipamasa Jesus do hasomalan i laho mangajarhon haserepon ni roha, na rup manghobasi. Na sorang do Jesus jala dipagodang natorasna na maniop togu hasomalan dohot adat istiadat ni halak Jahudi. Di sunat do ibana songon angka ankhon ni halak Jahudi (Luk.1:23). Na ro do ibana di parpestaan di perkawinan ni halak Jahudi mamangke adat hajahudion (Joh.2;1-11). Na mate do Jesus jala ditanom, dibaluti tu dagangan rap dohot na hushus i mangihuthon adat pananomon ni halak Jahudi (Joh.19:40). Sian kenyataan i jelas do ndang na mangalo adat Tuhan Jesus na adong dihatiha i. Alai adong do reaksi ni Tuhan Jesus na laho manglao angka adat hasomalan n amarlangku hatiha i israna ima na dibagasan turpukta on Matius 15: 1 – 9.

3)     (ay.1-2) Na ro ma angka halak Parise dohot sibotosurat na sian Jerusalem tu Jesus huhut mandok: Boasa dilaosi angka siseanmi adat na sian angka natuatua? Ai ndang marburi nasida laho mangan. Dison ma halak Jahudi i mangalului sala ni Jesus dohot angka siseanna asa boi manudu Ibana di hasalaanNa ala mabiar do halak Jahudi di huasoNa i. Dibadai nasida do pangalaho ni angka siseanNa i na so marburi jala naung mangalanggar adat hasomalan nasida. Di angka na so mamburi i nasida, ndang ias be nasida jala nunga ramun, tangiang dohot panindangionna pe gabe marisuang do i. Jadi dibahen nasida do tafsiran na lobi marhasea dibandingho Hata ni Debata i sandiri. Hape so adong Hata ni Debata manaringot i. Angka sibotosurat nang halak Parise ima angka uluan niparugamaon di halak Jahudi na boi dohonon sipatujoloon di parange nang pangalaho na tama. Alai nasida do gabe musu na borat di Barita na Uli i. Ditabunihon nasida do paraloan naisda dohot alasan hasatiaon tu patik ni si Musa  hape na holan pahothon parpunguan nasida do i sian harohaon ni jolma. Angka halak na ginjang roha do nasida jala gok paretongan.

4)     Ay.3-6: ndang na dialusi Jesus tuduhan nasida i, alai mangalehon respon na manguhumi nasida ala naung dohot do nasida mangalaosi Hata ni Debata marhite penafsiran nasida. Sian dalan on do laho mambuha simalolong nasida asa boi mulak tu Jesus. Dipatorang Jesus do tu nasida naung na so mampardulihon holong tu na marnatuatua. Dipusathon nasida do parhatian nasida tu na papungu hepeng, alai didok nasida do alasan laho bohal di panghobasion parugamaon nasida. Alai laos lupa do nasida di unok ni parenta ni Hata ni Debata ima laho manghaholongi.

5)     Ay.7-9; Didok Jesus do nasida siboto surat nang halak Parise angka halak pangansi. Pandohan on patubu jut ni roha nang hosom ni roha nasida, alai diorai Jesus do nasida pangansi. Oraora on na sian Jesaya 29:13 “Jadi didok Tuhan i ma: Ala na jumonok bangso on tu ahu marhitehite pamanganna dohot marhitehite bibirna pasangap ahu, hape anggo rohana holang do sian ahu, jala hadaulatonnasida maradophon ahu patikpatik ni jolma na ginuruhon sambing do i.” Ia tangiang nasida ima holan angka hata na diulakhon do di bibir nasida na so ada haholongon tu Debata. Manghatai do nasida alai ndang marutoktuok, ndang marpingkir dohot denggan aha na hinatahonna. Sai songon na badia do berengon nasida, hape sasintongna angka pangansi, siginjang ni roha, na mambahen partangiangan nasida gabe marisuang ndang huaso na paluahon. Na mangotootoi dirina sandiri do nasida disi dohot angka ruasna, na mangajarhon hasomalan na mate soada holong. Dipaksahon do tanggungjawab ni parugamaon na malobii naung diajarhon di Hata ni Debata. Dipatorang Jesus do dua ciri ni halak na munafik. Naparjolo, dipenampilan di partangiangan ni ugamo nasida. Idaon do songon na jonok tu Debata alai na munafik do nasida, idaon songon na manghormati Debata alai rohanasida dao do sian Debata.  2 Timotius 3:5 Parrumang hadaulaton do nasida; alai hagogoonna i ndang dapot di nasida. Pasiding ma angka sisongon i! Angka halak na munafik do mangajarhon parbinotoan ni jolma. Songon na deba huria di portibi on sai adong dope i mambahen angka  tardisi di huria na so adong hadomuanna tu Hata ni Debata. Nga taboto ra i huria dia. Ala ni i ojahan nihalak na porsea ima Hata ni Debata dibagasan Kristus Jesus. Unangma disarupahon penghormatanna tu jolma naung mate dohot tu Debata. Haluaon holan ala ni asi dohot holong ni roha ni Debata sambing do jala ndang na muba sian i. Alai sai jojot do na deba huria mambahen pembenaran diri marhite na mangulahon holong isarana na viral nuaeng on paham Kristen progresif. Ala ni i unang ma gabe tarela angka halak Kristen i tu pemahaman ni dirina sambing alai dijalo ma parbinotoan sian Debata marhite HataNa i dipeop jala diulahon. Molo holan ritus parugamaon do, holan na niapil dohot hasomalan na so marimpola gabe marisuang do sudena parpunguan i. Taarsakhon do jolma na holan sipaula parpunguan nang parugamaonna na gok kemunafikan, ima angka halak na so unduk tu Debata, holan di pamangan sambing do pamujion i ndang dihangoluhon gabe marisuang do haporseaonna i (Jes.1:11). Ai didok do di Hosea 8: 7 “Ai nunga  disaburhon nasida alogo, jadi habahaba gotilonna sogot, ndang marbiur emena i, ndang maritak biurna i; tung sura pe adong diparbuehon, halak sileban do umpolgaksa sogot.” Na porsea do nasida di habahaba i, jala laos habahaba i do tapuonna sogot.

6)     Huria ni Tuhanta boha do hita naung denggan do taradoti tona ni Jahowa di ngolunta ? memang ndang malua hita sian hasomalanta alai boha do hita menyikapi budaya dohot adat istiadat, aha do labana nang lapatanna diparngoluonta. Asa unang gabe maralo hasomalanta manang adat istiadatta i tarlumobi di hita halak Batak sian Hata ni Debata. Asa Hata ni Debata i ma na tumimbo sian hasomalanta manang adatta i. Jotjot do songon na borat begeon molo didok halak : ndang maradat ho, sian na mambege hata na so marugamo do ho. Na jelas angka nilai-nilai kehidupan i mangalehon na positif di ngolunta jala hombar tu Hata ni Debata ma saluhutna. Dibagasan bukuna Christ and Culture dipatorang si Richard Niebur do lima pendekatan ni budaya dohot Kristus. Alai ndang gabe patokan hasintongan sudena i, ima:

ü  Kristus mangatasi adat istiadat. Saluhut do angka hasomalan i ndang marlaba ndang marlapatan jala dianggap salah. Alai ndang adong parameterna, ai dibagasan budaya i do Kristus maringan ala dipadalan Jesus Kristus do budaya Yahudi di bagasan parngoluonNa. Ndang hea diorai hita sian Bibel asa mangalo kebudayaan.

ü  Budaya ni Kristus; Saluhut hasomalan nang budaya i asa marpangunsandean tu haKristenon asa gabe milik ni Kristus i ma i. On ma na jotjot tapangke di na marhuria asa songon Hata Batak nang angka bahasa daerah di negaranta Indonesia tongtong lestari, terpelihara jala gabe teologi lokal memahami Kristus sian bahasa daerah. Tapangke ma adat-istiadat i manang hasomalan dohot budayanta i berbau keKristenan unang gabe sabalikna. Sian dia do ditanda halak molo hita halak Kristen, molo sosian hasomalanta na marpahean, manghatai, mamboan bibel, mangulahon haholongon. Asa gabe adat istiadat keKristenan ma na menonjol disi.

ü  Kristus mangatasi kebudayaan. Antar sarupa dohot na paduahon i alai gabe marasing ma kebudayaan i bahenonna. Ia Kristus i ndang holan mangolu di sada budaya tertentu, isarana holan budaya Jahudi. Ndang, manang songon halak Silom na manotophon budaya Timur Tengah nang cara paheanna dohot bahasana pe gabe simbol ni keagamaan. Hape adong do halak Kristen Syiria ortodoks na jelas mamangke kultur arab. Suang songon i budaya barat dianggap do i haKristenon. Ia Kristus i ndang terikat manang terpaut holan di sada kultur budaya alai sude do.

ü  Kristus dohot Budaya na marsirapusan. Marasing be do hasomalanna. Ia Kristus adong do hasomalanna jala portibi on pe adong be do hasomalanna, jala rap mardalan do na dua on di portibi on, jala ndang adong marsinggungan, jala on ma na niajarhon paham postmodern. On ma na mambahen pemahaman halak Kristen na mian di dua hasomalan. Molo di huria songon ima burjuna jala tomanna, alai dungkon di duru ni huria manang di dunia pekerjaan nang ulaonna na asing gabe parange nang panglaho na so tama ma idaon. Godang do masa sikap sisongon on di partingkian on alai tatulak do pangalaho sisongon on. Naengma tudoshon halak Kristen na burju di huria nang di duru ni huria.

ü  Kristus do na manguba kebudayaan i. Sian na lima konsep na dipasahat Neibuhr, na palimahon on ma na gok diingot halak. Ndang na sala na berbudaya manang na maradat on, alai boi do gabe di transformasi Kristus Budaya i asa lam tu denggan na. Manang di hata na asing di dok: Christ redeem the culture – Kristus menebus budaya berarti ada nilai yang harus dibayar. Asa Kristus do na mangatasi portibi on dohot angka hasomalanta i asa lam tu dengganna. Dia do hasomalan na so hombar tu Hata ni Debata manang na maralo unang be dipamasa. Alai molo mansai uli do jala hombar tu Hata ni Debata ndang na maralo, asa tongtong ta pertahanton.

7) Na mina do ha Kristenon i di portibi on marhite ragam budaya  nang hasomalan naung adong. Ndang na gabe mamulik angka halak Kristen sian i alai dohot masuk laho manguba marhite na manondangi dohot manirai dibagasan huaso ni Kristus. Songon hurianta HKBP na hadir di portibi on, ditonga tonga ni angka bangso parbegu, gabe sira nang panondang. HKBP na Inklusif. Na mangula do huriaNa i di tonga ni masyarakat, berbaur, berkomunikasi dohot berinteraksi laho paturehon, laho pamajuhon, dohot patupahon angka ulaon asi ni roha. Adong be do hasomalanta di keluarga, di huria, di parkarejoan nang di masyarakat alai unang gabe maralo tu Patik nang Hata ni Debata. Taradoti ma hata ni Debata songon Tuhanta Jesus i dibagasan asi dohot holongni roha. Amen.

Jamita Evangelium Minggu XIII D.Trinitatis – 25 Agustus 2024

Togu Dibagasan Tuhan i     

 (Kuat Didalam Tuhan)

Efesus 6: 10 - 20

 

1)     Huria nahinaholongan dibagasan Jesus Kristus, tongon do di penjara ( di Roma) si Paulus uju manongos surat on. Ditali jala rongking dijaga angka soldadu. Ndang adong disi baju partahanan, lombulombu manang podang. Alai sian penjara i do disosohon ibana gabe parangan ni Kristus. Boasa ? ima asa “togu jala marsihohot” tu Tuhan laho mangadopi angka ragam utiutian ni sibolis. Parungkilon mangalo angka harajaon, parhuaso, angka sigomgomi hasiangan haholomon, lomolomo ni na marhuaso. Dimanang dia pe sai Sibolis i do na manegai jala musunta. Diparkarejoan ro do sibolis i laho mangela angka na karejo disi ima asa laho mangulahon na so patut, na so denggan. Laho hita tu onan manang tu pajak, mall di kota besar asa diela sibolis i manuhor na so apala ringkot, di huria masa angka na marbolatbolat, parbadaan, parhataan na so patut, maondokondok di na marminggu manang partangiangan. Dipartigatigaan mangela panggadis mambahen arga na so pantas manang timbangan palsu manang marangkal busuk. Jadi manang didia di portibi on sai na mambahen susah ngolu ni jolma. Ala ni i ma ingkon dungo ma hita, ndang boi sai sonang menank ninna rohanta di parngoluon on, asa unang di polgak sibolis i hita.

2)     Huriani Tuhanta, angka na porsea di portibi on dilehon Tuhan i do tugas dohot tanggung-jawabta songon halak na porsea asa laho manaluhon portibi on asa gabe sira dohot panondang di portibi on, manirai dohot manondangi portibi on na gok harorangon dohot pangalaho haholomon. Ingkon hobas do hita marporang di partondion, hobas gabe parangan ni Kristus (Militia Christi-Ptds. 2 Tim.2:3). Unang gabe pahebathu tabahen sibolis i, gabe mabiar hita; alai tong do unang gabe anggap enteng, sotung gabe lemba hita dung i mura di polgak, ai mansai licik do sibolis i. Ala ni i sipangasahononta holan Tuhan Jesus i do, jala ndang boi mabiar ai parangan ni Kristus do hita. Tuhanta Jesus do uluanta, ima Anak ni Debata naung manaluhon sude huaso, huaso ni sibolis, dosa dohot hamatean i. Ido na jinouhon Dr.Martin Luther di BE No.117 “JAHOWA DEBATANTA DO” BL. 205: Jahowa Debatanta do Partanobatoanta/ Musunta ingkon talu do Dibaen pangondinganta/Ianggo musu i, I ma sibolis i/Jorbut do tahi ni Mangago jolma i; Ndang dapot na mangatup. Jala laos ido joujou KJ No.339: Maju laskar Kristus, lawan kuasa glap. Disi ma asa togu rohanta dibagasan Tuhan i ala Tuhanta i do na gabe panglima perang disi.

3)     Asa gabe togu dibagasan Tuhan i jala gabe parangan ni Kristus ima:

ü  Ay.11: manolukhon pahean sinjata na sian Debata. Lapatanna ndang gabe halak kristen na ripe sonang, so adong siadopan, musu. Hape tangkas do ditariashon musu, i ma utiutian ni sibolis na mangula di diri ni jolma, angka ulaon hahomion, harajaon, parhuaso na so unduk tu Debata (siula hajahaton). Dibagasan dirina adong do angka kekuatan/hagogoon na boi mamboan hita madabu tu dosa (hagiot ni daging), alai molo taoloi Debata hagogoon na sian Tuhan i nama margogoihon (ay.7-8). Ia taboto do, marhagogoon do sibolis, mangelaela, merayu dohot janji-janji palsu jala sahat tu na mamangke hata ni Debata laho paotootohon (Mat.4:1-10). Ndang tarpodom sibolis i saleleng so ditulus na dirohana (apngk.12:10). Ingkon adong pertahanan, songon soldadu na laho marporang: diparade alat-alat perang, ai musu na ro sian duru ingkon aloon. Suang songon i do bangso Israel najolo Debata do gabe benteng pertahanan, jala na marporang humonghop naisa asal ma hohom (2 Musa 14:14).

ü  Ay.12: Mananda musu. Musu na taadopi ndada jolma secara fisik, alai musu ima hagiothagiot ni roha na mangarajai ngolunta. Na so mangulahon uhum dohot hasintongan ni Debata. Parhuaso na mangganti kedudukan ni Debata di ngoluna. Angka sigomgomi hasiangan haholomon ima pangalaho haholomon jalanaung mandao sian Debata. Angka na so tumanda Jesus dohot tondi hajahaton na boi tapatudos tu Gal.5:19-21. Musunta ima angka kroni-kroni ni si “Diabolos”(sibolis) na sai tongtong mamingkirhon asa haru sega hubungan ni jolma dohot Debata-jolma.

ü  Ay.13: Mamahe pahean sinjata na sian Debata. Ala diboto si Paulus do ndang tarbahen jolma i anggo so sian dirina mangalo, ingkon di pargogoi jala disolukkon sinjata asa tarbahen mangalo. Jala ingkon hot jongjong dung dipatunduk. Beha do bahenon tutu, unang talu molo ro musu i mangonggop dengan segala cara manang strategi apapun. Hata ni Debata do sinjatanta mangalo saluhut elaela ni sibolis. Hata ni Debata do ukuran siulahonon dohot sipasidingon.

ü  Ay.14.Jongjong maradophon musu marhite pahean na lengkap: naparjolo, marhohoshon hasintongan di gonting. Hohos ima  gambaran ni kesiapan manang haradeon menyingsingkan lengan baju mangadopi angka tantangan. Dungo ima siap siaga  kapan saja dan dimanapun, ai mangula do sibolis i. Napaduahon, manolukkon baju-baju partahanan, ima hatigoran. Ingkon dibagasan hatigoran laho mangadopi angka utiutian ni sibolis. Unang lipe hita di partontangan ni ngolu siganup ari.

ü  Ay.15. Marsipatu ma patmuna. Sipatu ima gambaran ni haradeon dohot haringgason sian roha na ias laho mandalani sidalanan dohot mangula siulahononhon. Marsipatu na marlapatan do i asa tolap jala margogo mandalani sidalanan laho mangadopi angka sugasuga dohot balobung, dna. Asa nasa naung manjalo Barita Na Uli (pardamean sian Tuhan i), adong do konsekuensina di tugas ima marpanindangion (gabe saksi laho pararathon Barita na Uli dohot pararathon pardamean naung pinatupa ni Debata dibagasan Jesus Kristus. Angka naung manjalo jala mandai Barita na Uli, unang laos dihomolhomol ibana, ingkon pabotohonon do i tu saluhut halak (Mark.16:15-16; Mat.28:19-20). Na porsea i do gabe sisean ni Tuhan laho mamboan Barita na Uli tu saluhut jolma na humaliang hita (kelurganta, dipangulaonta) manang di dia dohot sadiari tingki pasahathon Barita na Uli i (Joh.3:16). Jala na so tupa be hita tu paruhuman, nunga taripar tu hangoluan na saleleng ni lelengna (Joh.5:24).

ü  Ay.16; Manjalo Lombulombu haporseaon (perisai iman). Tangkas do dipabotohon na adong do di jolo ima sibolis, jala di sude tingki dohot kesempatan do ibana laho mengganggu, merayu, membujuk asa madabu hita tu dosa. Ndang holan hisaphisap manang hagiot ni daging na mangunjuni dohot do na ro sian duru; ima keadaan na masa, godaan-godaan, ajaran palsu dohot panggomgomi na mangaori hajongjongan ni Kristen. Asa boi hita menangkis, menolak nasa bentuk “panah si jahat” (sumbia api) ni parjahat i na boi do “lambok sumbia ni sibolis” alai laho manggojaphon, laho manirang hita sian Debata. Marmansammansam do cara/ usaha, nang bentuk na so sadar jala sadar hita pengaruhan ni sibolis, asa unang porsea jala olo hita mangihuthon hata ni Debata. Parjahat i ndang nok matana saleleng so tulus sangkapna. Sibolis ma goarna, godang do taktik-taktik busuk. Ala ni i ma ringkot perisai iman (Kristus i) laho mangalinggomi hita.

ü  Ay.17 a: Tahuluk haluaon, molo di Hata Indonesia didok “ketopong” na binahen sian bosi baja asa manghuphupi simanjungjung laho marporang. Molo nuaeng adong taida topi (helm) ni halakna marsepeda motor, molo terjadi kecelakaan unang pintor hona simanjujung. Tahuluk haluaon, ima na sian Debata (marhitehite Jesus). Jesus i do na gabe haluaon di hita. Ibana do na tuk paluahon hita sian tahi ni sibolis dohot dosa. Ndang tarbahen hita malua sian sian dirinta, gogonta malonta. Ala ni i do tahuluk haluaon i jangkononta, jaloonta, tahaporseai  na ro Tuhanta tu portibi on gabe haluaon.

ü  Ay.17 b: Podang ni Tondi; ima Hata ni Debata. Hata ni Debata na songon podang. Podang i ima sinjata laho manaluhon musu, laho pamatehon musu. Podang ni tondi di hita i ma Hata ni Debata laho manaluhon musu. Hata ni Debata na songon podang, songon na tarsurat di Heber 4: 12 Ai na marngolu do hata ni Debata jala marpangkorhon, jala tumajom sian nasa podang siduababa, jala torus do disirang hosa dohot tondi, ringring dohot utohutokna, laos diuhumi do na sinangkap dohot na piningkir ni roha. Pedang bermata dua artinya Firman Tuhan itu mampu menyerang musuh, si iblis. Tetapi juga menyerang kita, agar kita tetap “dikalahkan”/ tunduk kepada kuasa Firman Tuhan. Iblis tidak bisa dikalahkan dengan pidato, logika retorika. Hanya dengan Firman Tuhan. Orang Kristen tanpa Firman Tuhan adalah ibarat prajurit tanpa pedang (senapan). Rick Warren mengatakan, kita harus rajin menghafal ayat Alkitab, sebab hal itu ibarat kita mengisi penuh senapan kita dengan peluru yang siap ditembakkan bila si iblis menyerang. Pasti kita semua memiliki Alkitab. Tetapi bisa saja hanya sebagai “simpanan”, tidak pernah dibuka, dibaca atau digunakan. Itu ibarat memiliki pedang tetapi tidak tahu menggunakannya, sehingga menjadi pedang berkarat, tidak bermanfaat.

ü  Ay.18-20; Tangiang; tangiang do parhosaan ni haporseaon, na patuduhon na hipas jala mangolu dope hita. Jala tangiang do mambahen hita margogo, ai marhite tangiangta i dikontakkan hita tu Debata pargogona so hatudosan i, dung i tersalur ma hagogoonNa i tu hita. Ima pangkeonta mangalo sibolis jala boi ma hita monang. Didok endeta i di BE no. 487 : 1 Tung halak na margogo si partangiang i/Dokdok pe si taonnon, ndang olo talu i/Pos situtu roha na di Debata na i/Tuhan na manaluhon sude pangalo i. Peperangan rohani membutuhkan kekuatan dan kesungguhan, tidak boleh lengah. Ala ni ima tung ringkot tangiang. Ala ni ima porlu doingotonta, ingkon torus manorus do hita martangiang, ndang marsanggasangga, manang tingki tertentu. Ingkon songon na marhosa, gabe so pola binoto be ala torus manorus (1 Tes.5:17; Mat.26:41; Pil.4:6). Martangiang dibagasan Tondi; ndada tangiang di pamangan, ndada untaian kata-kata indah, alai roha na marsitutu, sian saluhut hadirionta parbagasan, na lohot tu Tondi ni Debata do. Na martangiang on ingkon jugulhononhon, ndang mandele, tekun (Rom.12:12). Unang holan manangianghon dirinta, alai dohot ma halak na asing, termasuk musunta. Ingkon lam marsiajar do hita asa lam tu godangna hita manangianghon halak na asing. Sitangianghononta tarlobi angka parbarita na uli, missionaris, ai nasida do tardok na marporang di garis depan laho pararathon Harajaon ni Debata. Na mangihut nunga lam torop huria nang ruas na manghilala manfaat ni tangiang on. Di tingki na parpudi on nunga lam tubu angka Team Doa, dohot persekutuan doa. Ingkon torus do i paheheonta, asa lam margogo hita jala boi monang mangalo dipu daya ni sibolis. Amen.

Jamita Epistel Minggu XIII D.Trinitatis – 25 Agustus 2024

 

Togu Dibagasan Tuhan i     

 (Kuat Didalam Tuhan)

Psalmen 34 : 16 - 23

 

1)     Huria nahinaholongan dibagasan Jesus Kristus, ia psalmenon na tubu sian pengalaman ni si Daud na gabe panindnagion haporseaon, na dipalua Debata do ibana sian hasusaan nang hamaolon bolon marhite halongangan. Marhite psalmen on si Daud mangarahon saluhut halak nang hhita asa unang gabe mandele jala mandate uju mangadopi angka jolma na jahat, dipaposhon do rohanta marhite si Daudon molo naeng do marngolu hita dibagasan Tuhan i, sai na paluaonNa do hita ala sai na berpihak do Tuhan i tu angka na tigor roha.

2)     Debata mardingkan tu halak na tigor roha. Godang do jolma mardingkan tu angka na mora, na gogo, ala mangirim ibana asa adong paruntungan manang gabe menak rohana. Alai marasing do Tuhanta i sai na mardingkan tu angka halak na gale (ay.16), na dibagasan hagogotan (ay.18), na bojok marroha (ay.19). Uju mangangguhi bangso Israel ala diparhatoban di Misir, sipareon ni Debata mansai tinggil manangihonsa jala sigop paluaonNa. Ima pangalaho ni Debata na sun gogo. Di Debata ndang maol laho paluahon bangsoNa sian panindos na sun gogo sahali pe. Naung dipatuduhon Debata do i disejarah ni bangso Israel na adil jala na tigor do Debatanta i na membela bangsoNa na dibagasan hagogotan, sian angka panggomgomi na jat dohot angka na jungkat roha. Jala na rumingkot, ditangihon Debata do angukangguk na angka pinarhatoban ni dosa dohot sibolis, na manutup masa depan ni jolma na manghorhon hamatean. Jolma na so marpangkirimon, gok biar dohot dosa na manubuhon angka siua hajahaton na manusai jolma sipargutonna. Ndang adong inganan na sonang ala dosa na manubuhon parmusuon, na masihosoman, marbolatbolat jala panirangon. Angka parjahat gabe marhuaso tu angka na tigor roha. Alai ndangna manguhom Debata. Siala holongNa na so hatudosan mangalehon AnakNa na sasada i ima Tuhanta Jesus Kristus na gabe jolma namangalehon hosaNa di hau pinarsilang di Dolok Golgata laho manesa dosa ni jolma. Na Hehe do Ibana manaluhon dosa dohot sibo;is nang hamatean i. Gabe adong dalan nang kesempatan ni jolma mamasuhi hangoluan na manongtong. Marhite na marhaporseaon dibagasan Tuhan Jesus Kristus. Ima karakter ni Tuhanta i, marhite holongNa i na sai tinggil rohana tu joujou ni na dangol, tu angka tangiang elekelek na gale.

3)     Ndang hea Tuhanta i mardos ni tahi tu hajahaton nang tu angka parjahat. Ala na badia do Tuhanta i, asa disiaphon ma angka hajahaton nang harorangon (ay.17), ai maralo do i tu habadiaonNa. Alai taingot ma, ndada jolmana disiaphon alai hajahaton na mian dibagasan ni jolma i. Ai dilehon Tuhanta i do kesempatan tu ganup jolma asa marhamubaon ni roha. Molo olo do ibana paluahon dirina sian hajahaton i na oloo do Tuhanta i manomunomu; alai baliksa molo holongan do rohana tu hajahaton sian Tuhanta, sai siaphononna do ibana dohot hajahatonna i. Sadia gogo pe angka parjahat i, alai di Tuhanta i angka orbuk do nasida na habang jala ndang marbogas, holan hosa ni Tuhan i do. Taingot ma si Firaun na mangalele bangso Israel i, maup do dilaut Rara i. Jala parik Jerikho na togos i pe boi do malengse marhite angka surak-sruak dohot ende ende ni bangso Israel. Jala huaso ni dosa dohot hamatean i nunga ditaluhon Tuhanta i.

4)     Mangolu dibagasan biar mida Tuhanta (ay.12). Biar mida Debata do asa mulak roha ni Tuhanta i tu hita. Biar mida Debata padaohon hita sian angka parjahat nang siula hajahaton. Jala sasintongna dison parpsalmen Daud ima na biar mida Debata na manghaholongi hangoluan jala na mamboan las ni roha dibagasan ngoluna (ay.13). Ise na biar rohana mida Debata na manghaholongi ngoluna jala na sai mamparbuehon ariarina dohot angka las ni roha. Alai angka halak na holongan tu hajahaton ima na pasuasaehon, jala mangambolonghon ngoluna jala manghophop hasusaan laho manusai ngoluna (ay.22).

5)     Pardalanan ni angka na tigor roha i, na biar mida Debata ndang sai uli jala denggan. Alai jotjot do jumpanganna angka masalah, mamboan dirina tu angka ancaman sian angka na so mabiar mida Debata (ay.20). Boi do ala ni ulaon ni parjahat i, na manghosomi angka na bonar i (ay.18), mandele jala mandate (ay.19). Boi do ala ni huaso, arta nang pengaruh ni angka parjahat mambahen angka halak na bonar i gabe terdesak, terancam. Angka na jungkat roha i mambahen jut roha ni angka na tigor roha marhite hata gabus, gapgap, angka hata barangsi, hata na so hasea, dohot na manghosomi. Naung diae panurirang Jeremia do i tarlumobi Tuhanta Jesus Kristus mangae hasusaan jala mate siala hosom ni parjahat na bertopeng ugamo. Sahat di partingkian on sai masa do angka pangalaho sisongon i di negaranta on. Asa margogo ma angka na porsea i jala angka na tigor roha i manghajongjonghon hasintongan nang hatigoran di negaranta on.

6)     Diida parpsalmen on do kenyataan na asing na tbu sian pengalamanna sandiri. Ima na dihatindanghon ibana dibagasan turpuk on, ima halak na sintong sai na malua do i. Jala dihatindanghon si Daud do i huhut mangarahon sude halak, ia tabona i na dibagasan pangondian ni Tuhanta i. Ndad ala ni gogona sandiri, alai adong do Debata na mangula. Ala hea do Tuhanta Jesus mandok di Joh.16:33 Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on. Molo targogot do halak na bonar i sai sigop do Tuhanta i paluahon di partingkian na topet (ay.18,22). Angka parjahat i pe dilengsehon jala ndang adong inganan ni halak na jungkat roha di Harajaon ni Debata. Ndang manongtong hajahaton nasida, baliksa boi do gabe manegai nasida.

7)     Huria na hinaholongan, boi do ra idaonta sai songon na mardingkan Tuhan i tu halak na jungkat roha, ala mansai denggan jala gok arta ngolu nasida. Hape ngolu ni halak na tigor roha i sai gok hasusaan. Akibatna godang do halak na mangihuthon dalan hajahaton. Alai sasintongna angka hasusaan i holan sada ujian do i di angka na satia, laho mambuktihon hapolinon ni haporseaonna. Molo tong do manahan ibana di hasatiaon i, sai na tama do ibana di adopan ni Tuhan i. Ndang pasombuon ni Tuhan i hasusaan i manegai ngolunta, alai songon ujian kelayakan i do i manang istilah “fit and proper test” asa lam tang marhaporseaon.

8)     Alai adong do halak Kristen i manghilalahon molo ngoluna sai malua ma sian angka parmaraan dohot hasusaan, alai sai sonang ma ngoluna. On ma sikap iman na berbahaya, ala molo ro hasusaan ganggu ma roha nang haporseaonna, jala ndang dihaposi be Hata ni Tuhan i jala boi gabe mangihuthon tahi ni parjahat. Mansai godang do halak na bonar i tarunjun mangihuthon dalan hajahaton asa unang mangonai hasusaan ni halak na tigor dibagasan ngoluna.

 

9)     Ala ni diminggunta on manosoi hita asa: Togu Dibagasan Tuhan i (Kuat Didalam Tuhan), ima marhite na marsiajar sian parpsalmen Daud on. Ndang olo kompromi Tuhan i tu angka siula hajahaton, sai siaphon ni Tuhan i do nasida sogot, jala naung rade inganan tu angka na jahat i ima uhuman na manongtong. Didok Eka Darma Putra; dipudi ni sude hajahaton, secara instrinsik dibagasan dirina, hajahaton i manimpan boni ni kanker na manimpan kehancuranna sandiri; kejahatan memiliki self destructive. Ganup hajahaton mangulahoan hajahatonna, na naeng manegai dirina sandiri do i. Boi do masa i hatop jala boi leleng. Alai sandok ndang manongtong hajahaton i, naung taruji do i di nasa partingkian. La ni i togu ma hita angka na porsea dibagasan Tuhan i, sai tadai ma haburjuon ni Tuhanta i manarihon ngolunta dibagasan Jesus Kristus. Amen.

Jamita Evangelium Minggu XII D.Trinitatis – 18 Agustus 2024

Manadinghon Neang Ni Roha Jala Mangihuthon Dalan Hapantason     

 (Membuang  Kebodohan Dan Mengikuti Jalan Pengertian)

Poda 9 : 1 - 6

 

1)     Huria nahinaholongan dibagasan Jesus Kristus, uju tajalo gonghon dohot joujou di parpestaan, manang na marulang taon, manang marsipanganon, mansai las do roha disi. Jala molo na ro sian si solhot manang angka na tatanda tangkas. Alai molo dapot hita do lobi sian sada gonghon i di ari na sarupa, ingkon buataonta do haputusan tusi. Godang ma pertimbangan laho manontuhon sian angka pilihan. Dia ma sipajoloon, aha do solusina. Udut tusi turpukta on ima gonghon ni habisuhon jala gonghon ni haotoon. Kontradiski do na duaon dipaboahon turpuk on tu hita. Di portibi on sai adong do dua na sai marasing, jala maralo. Haburjuon dohot hajahaton, hamoraon dohot hapogoson, habuluson dohot pargabuson. Hatigoran dohot na so tigor. Habisuhon dohot haotoon. Dia ma sipillitonta hombar tu turpuk on. Habisuhon do manang haotoon do ?

2)     Huria ni Tuhanta, buku Poda on sada ingananta marsiajar taringot tu hapistaran (hikmat). Buku Poda on sandiri, ndada holan seni sastra, alai adong do disi nilai yang sangat luhur yang sanggup mengarahkan dan memberi petunjuk kepada manusia untuk memperolah kebenaran hidup. Boha do dalan asa dapot hita hasintongan taringot tu ngolu on ? Ingkon luluan ma asa adong parbinotoan. Si Salomo pe dapotan parbinotoan na sumalin taringot tu lapatan ni ngolu ala sian sieteetehonna nunga diajari inangna ibana taringot tu parbinotoan i (Poda 4,1-5). Hikmat memberi kita akal budi sehingga kita mampu menalar, menimbang serta memutuskan dengan memahami mana yangbaik dan mana yang tidak baik. Dengan demikian hasilnya akan selalu menampakkan dan mewujudkan keadilan dan kebenaran. Mansai balga do guna ni parbinotoan i. Parbinotoan i do mangalehon di hita wawasan gabe tatanda sandok portibi on nang so hea tadalani. Laos i do nang mambuka isolasi-isolasi keterasingan, mamboan hita haruar sian ketertinggalan laos mamboan hita tu hamajuon. Ido didok si Salomo di Poda 24: 3-5 Marhitehite hapistaran pinajongjong sada bagas, jala dipahot do i marhitehite roha hapantason. Jala marhitehite parbinotoan, gok angka bilutna dohot ugasan marragamragam angka na arga jala na uli. Holan halak na pistar do ompu ni gogo, jala baoa na marparbinotoan, i ma na so taralo. Halak na pistar do ompu ni gogo, na so taralo. Tauji ma jolo mambuat labang na dilabanghon bagas tu dingding. Ianggo holan mamangke gogonta, tung hita na saompu pe ndang tarbutbut hita i. Alai, buat ma gansip (tang), ima hasil niparbinotoan pintor mura do i butbuton ni sahalak dakdanak pe. Apalagi ma angka chip, angka software (perangkat lunak) ni komputer.  Ulaon ni sajuta halak boi dialo sada komouter. Boi hita hatop sahat sian Medan tu California, ndada ala mardalan pat; alai ala adong do hopal habang nabinahen ni parbinotoan.

3)     Dungi di Bindu 16:16 didok; ummarga do i sian mutiha, ai molo malo hita jala pistar, i do mangalehon arta di jabunta (bnd.23:3-4). Hapistaran i mangalehon ngolu tu tuan nampunasa (Parj.7:12). Mamora jong do si Salomo ala mansai bisuk gok hapistaran, jala parbinotoan i do na bertahan lama. Ai ianggo arta boi do ditangko panangko, bangkrut manang matutung. Ianggo parbinotoan hot do i di nampunasa. Taingot do Jepang, di bom Amerika do hutanasida Hirosima dohot Nagasaki di taon 1945, sude magargar. Alai, ndang pola sadia leleng nunga pintor berkembang nasida, pola humebat muse sian Amerika na membom nasida i. Ala ni aha? Ala ndang dohot di bom parbinotoan dohot hapistaran nasida. Halak Batak pe didok do: “Ijuk diparapara, hotang di parlabian; na bisuk nampuna hata na oto tu panggadisan”. Molo adong halak na so paihutihut hamajuon ni parbinotoan i, boi ma i torus songon Ama ni Ogol, na so porsea boi habang bosibosi, ai holan pidong do diboto ibana na boi habang. Di hata nuaeng digoari ma i halak na gaptek (gagap tehknologi). Holan i tutu hita on godang dope mangantusi parbinotoan i dos dohot titel manang ijazah. I do gabe torop halak manuhor titel, asa idaon songon halak na marparbinotoan. Titel diperjual-belikan dengan harga obral, jala torop halak na olo manuhor. Ala mangalului karejo pe tumorop dope berdasarkan nilai dohot surat ijazah. Padahal, parbinotoan ndada di ijazah alai di kemampuan ni dirinta do; ndada situhoron alai siguruhonon do; ndada sipatuduhonon alai siulahonon do.

4)     Ala ni i ringkot ni parbinotoan ima gabe ro nuaeng undangan ni parbinotoan i tu sude jolma. Joujou do ibana, songon iklan manjou hita asa tung talului ibana. Alai ingkon manat do hita. Boasa ? Ai apala dilambungna i tong do joujou nang haotoon (ay.13-18), na paotootohon jala mamboan hita tu hamatean. Ia hapistaran i, tudos so i tu boruboru na bisuk, na patupa panggalangon (perjamuan), na paradehon angka sipanganon na ndada holan tabo alai mangalehon hahipason jala marguna, na mamboan hita tu hangoluan dohot tu dalan hapantason (ay.6). Alai ianggo haotoon i, songon parompuan na oto jala hijang (bebal dan cerewet) do i, na mangalehon spanganon sian natinangkotangkona dohot roti na niallang marsibuni (dengans embunyi-sembunyi, ay.17), na mamboan hita tu hamatean dohot tu naroko (ay.18). Ala ni i manat, unang sala mamillit, mansai fatal do akibatna.

5)     Pillit ma dalan tu parbinotoan i. I do na mangalului Jahowa jala manghabiari Debata. Ai di Ayat 10 didok : “Ai boar mida Jahowa do parmulaan ni hapistaran, jala parbinotoan ni angka na badia do hapantason. Angka na mamillit dalan mangihuthon Jahowa, ido hala na marparbnotoan, mangantusi dohot mangulahon hata ni Debata ido angka na bisuk jala marroha. Ido didok Jesus di Mateus 7: 24-27 (patd.Jak.1:22) “Ia halak na marroha, na bijaksana, na berhikmat, ima halak na so holan mambege Hata ni Debata, alai na olo mangulahonsa sian nasa rohana do. Lam godang hita mangulahon Hata ni Tuhan Jesus, lam timbo marhapistaran. Ia hapistaran i ndang na ro boti, alai ingkon adong do usaha na serius laho mangguruhon dohot mandapot i. Boi do i marhite na laho marguruhon dohot mandapot i. Boi do imarhite na laho marguru, marsiajar mangalului parbinotoan umum sahat tu na spesialis, sian tingkat dasar sahat tu tingkat partimbo. Sian kelas lokal, tu regional, sahat tu na bertaraf internasional. Sian ilmu alam, sosial ekonomi dohot ilmu na asing. Ala ni i disosoihita di Poda 4: 7 “Tuhori hapistaran i, jala tuhorhon sandok na niomom tumuhor pangantusion”

6)     Dijamothon turpuk on di hita asa unang sala mamillit. Disi ma mansa balga peran ni angka natoras, guru, parhalado, dohot na tumua. Ai mansai torop di lambungta nang reklame ni si bolis na menawarkan haotoon. Adong do na manghilala ia parbinotoan dos dohot ijazah, gabe torop na martigatigahon angka ijazah (Asli manang palsu) na boi tuhoron (arga manang mura). Na mamangke parbinotoan i laho mangotootoi halak asal ma dapotsa hepeng na godang (isara ni angka ahli komputer na membobol uang nasabah, na manangko marhite penggandaan nonomor ni ATM; media jejaring sosial songon Facebook,twitter, tiktok, instagram dipargunahon laho mangulahon perselingkuhan, penipuan, share photo porno na mangulahon harorangon dna. Dungi angka pengaruh materialisme marhite flexing nang konsumerisme na mansai bahat menggerogoti angka jolma nuaeng on. Disi na asing adong deba halak na timbo parbinotoanna alai gabe siboan hasusaan tu jolma. Isarana, obat bius, tung pasupasu na balga do  penemuan ni   obat bius tu kemanusiaan, ai tertolong do hosa ni jutaan ni jolma di meja operasi ala ni i. Alai, nuaeng disalah-gunakan ma i, gabe obat bius na pamatehon torop jolma. Songon i nang nuklir, na mansai marguna pahinsathon produksi ni pertanian dohot peternakan di ilmu kedokteran dohot energi. Alai, laos i do dipangke bangso laho pamatehon bangso na asing marhite ni pencarian parbinotoan, songon piso do i. Margantung di tangan ni ise do ibana. Molo di tangan ni inanta di dapur, pangkeonna ma i mangiris bawang, cabe, sayur dna; molo ditangan ahli bedah, pangkeonna ma mambedah. Alai molo di tangan ni parjahat (perampok) ipangkeonna ma laho mamunu.

7)     Topik ni minggunta mandok: Manadinghon Neang Ni Roha Jala Mangihuthon Dalan Hapantason (Membuang  Kebodohan Dan Mengikuti Jalan Pengertian). Biar mida Jahowa ido urat na laho mangihuthon dalan hapantason. Biar mida Jahowa marhite haringgason mangaradoti Hata ni Debata sian na manjaha, mangantusi, mangapil sahat tu na mangulahon (manghangoluhon). Lam huminsat ma usahanta, nasa gogo dohot daya ingkon pangkeonta laho manait roha ni sundut na umposo asa tung jumolo dilului habisuhon sian Debata, ima biar mida Jahowa. Angka pinomparta sisongon i ma na togu haporseaonna marroha hapantason, jala timbo parbinotoanna, ido na gabe pasupasu tu bangso nang masyarakat, alai na rumingkot gabe dipasangap Debata. Songon Tuhanta Jesus Kristus na sai mangihuthon dalan ni Debata Ama i, asa ulahononNa dibagasan haserepon ni roha. Sarihonon ni Jesus do hita marhite diriNa humonghop hita asa taihuthon hapantason dibagasan Ibana jala marngolu na manongtong ma hita. Amen.

Jamita Epistel Minggu XII D.Trinitatis – 18 Agustus 2024

Manadinghon Neang Ni Roha Jala Mangihuthon Dalan Hapantason     

 (Membuang  Kebodohan Dan Mengikuti Jalan Pengertian)

Johannes 6 : 51 - 58

 

1)     Huria nahinaholongan dibagasan Jesus Kristus, dijolo ni turpuk on, na dilehon Jesus do mangan 5.000 halak mangan marhite lima roti dohot dua dengke, jala pola lobi 12 ampang. Alai songon na nidok ni halak Batak do: “usouso na bosur, jorajora na male”. Aia dung bosur nasida naeng pabangkiton nasida ma Jesus gabe Raja. Ra didok rohanasida, molo gabe Raja do Jesus i, bosur ma nasida ganup ari so pola be mangula; holan hundulhundul pe nasida boi do rade sipanganon nasida bahenon ni tnada halongangan ni Jesus. Alai dung mamoto Jesus di sangkap i, sipsip ma Jesus laho tu dolok. Alai sian i ma Ibana muse mangurupi siseanNa na targogot binahen ni habahaba na gogo di tao Galilea di pardalanan nasida mulak. Sahat ma Jesus rap dohot sisean i di bariba. Hape, tong do ro tusi natorop i mangalului Jesus. Gabe dipinsang Jesus ma nasida: “Na tutu situtu do na hudok on tu hamu: Dilului hamu pe Ahu, ndada ala naung dapot rohamuna tanda i, tung ala ni na bosur i do hamu, na mangan roti i.” (ay.26). Gabe sungkunsungkun ma i nang tu hita. Nunga leleng naung diihuthon ho Jesus. Nuaeng sungkun ma dirim: “Aha do naniulamu di Jesus molo diihuthon ho Ibana ? Ai nang nuaeng pe, orop do halak margoar Kristen alai so diboto aha niluluanna dohot pineopna sian Jesus. I do ala torop dope halak nunga margoar Kristen alai tong laho manomba begu, ulaon haholomon dohot ulpuhan ni datu. Nda boi dohonon, halak Kristen, na holan goar do nasida i? Asal ma adong goar Kristus i di nasida. Adong do na mangihuthon Jesus holan laho marnida dohot mandai tanda halongangan binahen ni Jesus. Bagi  mereka ini Yesus sama dengan “tukang mujizat” yang bisa membuat mereka bangga karena Yesus yang hebat. Mansai torop do namangihuthon Jesus i holan asa dapotan pasupasu (berkat-berkat) jasmani. Marhite pasupasu di sude ulaonna, mangalehon godang arta, sinamot dohot pinompar di nasida. Molo ndang dapot i, pintor mandele, gabe manundali Jesus, marhite na laho mangalului tu na asing. Sipasidingonta do na mangihuthon Jesus holan laho mangharapkan pasupasu pardagingon sambing sian Jesus, aisipanganon na olo salpu do i (ay.27).

2)     Dipatingkos Jesus ma sangkap nasida. Didok Jesus ma, adong dope andul dumenggan silehonon-Na tu angka siihuthon Ibana asal ma olo nasida manjalo, ima sipamganon na mamboan tu hangoluan sisalelengnilelengna (ptds. Ay.27). Dipatorang Jesus, nang angka ompunasida pe uju di pardalanan sian Misir tu Kanaan. Disarihon Debata do marhite Manna. Alai, ipe, ndang manongtong i; ai tong do male nasida, jala mate muse (ay.49). Didok Jesus, adong do roti naung sinuru ni Debata sian Banuaginjang silehon hangoluan ni portibi on (ay.33). Pintor hatop do dialusi nasida : “Lehon ma di hami (ay.34). Ala ni i di ay.35, didok Jesus ma: “Ahu do roti hangoluan i; sandok na so male be manang ise, naung ro tu Ahu (ptds. Ay.48). Gabe marmungutmungut do nasida umbege hata i (ay.41). Jala di ay.51, didok Jesus muse: “Ahu do roti na mangolu, na tuat sian banuaginjang i. Manang ise na manganhon roti on, i do mangolu salelenglelengna. Ia roti silehononki, bahen hangoluan ni portibi on, ima dagingku”.

3)     Di aya. 55-56 didok Jesus ma: Ai sipanganon na tutu do dagingku, jala siinumon na tutu do mudarhu. Manang ise na manganhon dagingku jala manginum mudarhu, i do na mian di bagasan Ahu jala Ahu di bagasan ibana. Umbege i gabe marsual ma natorop i. “Hata nakasar do i”, ninna, lapatanna, maol tarjalo roha dohot pingkiran. Tu Jahudi, mansai kasar do hata: “na tuat sian Banuaginjang”. Pangaleaion ni Debata do i di rohanasida, ala so ditanda nasida dope Jesus. Diumpamahon Jesus do dirina songon “manna”, sipanganon na bersifat spiritual dohot supranatural sian Tuhanta. Jala diparasingan na nidok Jeus sian roti “manna” dohot Roti Hangoluan” ima Ibana sandiri. Halobian ni Roti Banuaginjang dohot “manna” mansai tandi. Na sada mamboan tu hangoluan na manongtong i jala roti “manna” ndang tolap mamolus hamatean. Dipatorang Jesus do i di ay.49-50. Memang jelas do na nidok na roti “manna” na sian Debata do i asa didok roti na sian banuaginjang. Alai roti na sintong na sian Banuaginjang ndada roti na dipangan ompunasida najolo i. Siala roti na pinangan ni ompunasida najolo iholan mambahen asa bosuran do nasida satongkin i dinasida. Alai roti na sasintongna na sian Surgo i ndada holan dipangan angka ompunasida alai saluhut jolma na di portibi on. Jala roti i ndada holan laho pabosurhon alai mangalehon hangoluan tu sandok portibi on. Ido alana dipatudu Jesus di diriNa ay.51 “Ahu do roti na mangolu, na tuat sian banua ginjang i. Manang ise na manganhon roti on, i do mangolu salelenglelengna. Ia roti silehononki, bahen hangoluan ni portibi on, i ma dagingku.” Mangallang ‘dagingku” na nidok Jesus ima manjanghon panobusion ni pamatang-Na naung tarsilang i jala mate laho manesa dosanta, dung i hehe sian na mate manobus hita jolma. Astuanna, hangoluan na manongtong na dipaboa Jesus na boi jaloon nasida do i molo dijanghon halak Israel Jesus songon Sipaluanasida.

4)     Dipatorang Jesus do tu nasida nang tu hita taringot tu hadirion-Na dohot panjaloonta di Ibana:

ü  Jesus ma Debata na gabe jolma. Na disuru Debata do Ibana sian Banuaginjang. Na dos songon hita, na mangolu dibagasan daging songon dagingta, nang holiholiNa pe songon holiholinta, mudarNa pe songon mudarta. Marhite i ma boi dihilala Ibana sude na tahilala (Heb.4:15)

ü  DagingNa sohot mudarNa ima nilehonNa tu hamatean di silang di Golgota laho manobus hita. Ido na gabe hangoluan ni hita angka naung mate binahen ni dosa.

ü  Alai, mulak do Ibana muse tu Banuaginjang, tu Ama i (ay.62), dung dipasidung sude ulaonNa marhite haheheonNa sian na mate. UlaonNa disi ima paradehon inganan di angka na porsea di Ibana.

5)  Topik ni Minggunta mandok: Manadinghon Neang Ni Roha Jala Mangihuthon Dalan Hapantason (Membuang  Kebodohan Dan Mengikuti Jalan Pengertian). Ala ndang tarbahen hita porsea ianggo sian dirinta, suruon ni Debata ma Tondi-Na namangula di roha ni jolma. Tondi i do na pangoluhon, ai Tondi ido napatauhon (memampukan) hita asa boi porsea, jala haporseaon i ma na pangoluhon. Ala ni i, asa sahat hita tu hangoluan na saleleng ni lelengna, ingkon ungkap do rohanta tu ulaon ni Tondi i, asa tarbahen hita porsea.  Hata ni Tuhan i  ma na gabe inspirasi dohot sitioponta dibagasan ngolunta. Tabahen ma Jesus na gabe centrum (pusat) ni parngoluonta, molo so Jesus na mangamudii ngolunta boi do gabe lilu hita. Firman yang menjadi roti hidup secara rohani. Karena itu, makanlah roti hidup setiap hari agar kita beroleh kehidupan kekal. Molo tajalo roti dohot anggur di ulaon nabadia, ndang na muba roti dohot anggur i gabe daging dohot mudar ni Kristus. Holan parhitean ni daging dohot mudar-Na do i. Ndang roti dohot anggur ina mambahen hita gabe saut malua. Alai Hata na mandongani roti dohot anggur i do, na mandok: na nilehon humongkop hamu....na niusehon humongkop torop, bahen hasesaan ni dosa. Asa mandalani ngolu on unang ma neang jala leas rohanta, asa taihuthon dalan hapantason dibagasan Kristus Jesus i. Amen.