JAHOWA PABOTOHON ANGKA DALANNA
(Tuhan Menunjukkan
Jalan Kepadaku)
Psalmen 25: 1 - 10
a)
Lobi hurang
sada taon na sai dipaburuburu raja Saul si Daud (helana i), ala ni pangiburuon
sinonggopan ni tondi na hodar raja ni Israel na parjolo on, hirahira taon
1.0050-1.004 sM. Molo tapaihutihut surat ni si Samuel na parjolo bindu 22-23 di
nasai manggasa rimas ni raja Saul mangalele si Daud naeng bunuonna soada salana
nian tu si Saul, nda holan ala naung pinillit ni Jahowa i do si Daud gabe raja
mangganti ibana jala nunga dimiahi panurirang Samuel si Daud fi Betlehem (1
Sam.16: 1 -13). Disi tarboto tu si Saul, naung dimiahi si Samuel si Daud gabe
raja, ndada sada sian anakna i hape. Tarrimas situtu ma ibana tu si Daud.
Saleleng si sada taon i dipangungsian nama si Daud dohot pasukanna si 600 halak
i. Sian Naiot tu Rama, tu Nob, tu Gat, tu Liang Adulan tu Mizpa, torus tu
tombak Heret, dungi mulak tu Nob dst.
b)
Asa dung mate
si Saul bunuh diri di dolok Gilboa, maringanan ma si Daud di Hebron, diingot ma
parmaraan naung binolusna, ro di angka dosa di haposoona, jorbut di
panghorhonna muse tu dirina dohot pinomparna. Alai diida muse ma asi ni roha
dohot angka denggan basa ni Debata Jahowa naung paluahon ibana mangalualu tu
jolo ni Debata dibagasan roha na magopu marningot pengalamanna naung salpu. Asa
tama situtu do perenunganta tingki dohot pengalamanta naung salpu laho mamereng
tingki dohot angka na masa siparehanta tu jolo on.
c)
Adong tolu
bagian penting na pinataridahon ni raja Daud tu hita huria dohot pribadi na
porsea di Tuhanta, ima: Motivasi. Isi dohot tujuan ni tangiang tu Debata Jahowa
marhitehite Jesus Kristus. Motivasi na mangonjar rohana, ima: las ni roha ni si
Daud ala haluaon pinatupa ni Debata di ibana. Ndang dipaila
(dipasiaksiak/disiksa) musuna ibana, jala diondihon sian hamatean. Isini, ima:
mamuji huhut mangolopolophon denggan basa ni Debata Jahowa tu saluhut na
marhaposan tu Ibana, mangondihon sian mara ni daging nang tondi ala asi ni
rohaNa dohot HolongNana so haushatan (halompoan) i. Tujuanna, ima: mangarahon saluhut jolma manghalashon denggan
basa, Asi ni roha dohot holong ni Jahowa na paluahon angka na porsea sian musu
dohot sian rante ni dosa i. Tangiang ni angka na porsea tu Debata Jahowa
pasahathon/mamelehon diri songon haadongonna (sebagaimana ia
ada/keberadaannya), beha pe balga dohot jorbut ni dosana najolo.
d)
Holan marhite
tangiang na torus manorus pasahat diri tu Tangan ni Tuhan na sun hinagogo i do
boi hita jolma malua sian tahi dohot sangkap hajahaton na di portibi on (Psalm
24: 4b; 86:4; 143:8. Mandok : andorang so niula siulaon sai jumolo martangiang.
Nasa na martangiang tu Debata, naeng ma
dibagasan tondi dohot hasintongan, jala marpos ni roha situtu tu asi ni roha ni
Debata. Na alusanNa do tangiangta, ala naung tapasahat sude ngolunta dohot masa
depanta tu Ibana (Psalm 24:6; Joh.4:24).
e)
Sabar
paimahon alus ni Debata di tangiangta. Unang mandele manang gabe mansohot martangiang
molo so pintor dioloi Debata na tapangido di tangiangta be (Mat.7:7-8). Ai
diboto Debata siida roha i do motif, isi dohot tujuan ni ganup tangiangta tu
Ibana, jala alusna: “OLO, NDANG, PAIMA”........”. Tung so tarurak ganup jolma
(baoa, boruboru, sian na matua sahat ro di posoposo) na tongtong marhaposan tu
Debata Jahowa jala na benget paimaimahon denggan basaNa. Songon parjaga (si
jaga malam) na paimaimahon tiur ni ari di ngoluna (Psalm 130:7). Songon
karyawan manang pegawai na paimaimahon upah/gajian (Job.7:2). Songon partani,
parladang, parhauma, dohot pengusaha na paimaimahon hasil ni gotilon, panen
(Jes.5:4).
f)
Alai jolma na
manonggopi hasalaan ni donganna jolma (hinasonghophon ni rohana/musuna) laho
pagasihonsa manang laho pailahonsa, tudos do i songon singa na mangonggoponggopi
mangsana. Ia singa, ima lambang ni sibolis (1 Ptr.5:8) na sai holan mangonggop
dohot mangkuar dosa, hahurangan, hasalaan ni donganna jolma, dung i dipatedek
tu portibi on asa sude na marnida (umbotosa) dohot na manganggo (umbege barita)
i gabe bauan dohot pasidinghonsa. Alai na sumongirna, laos di bursikhon. Ala ni
jorbut ni dosa dohot utiutian ni sibolis na sai mangonggopi angka na porsea i,
di dia tinggang dohot sala asa dipaila nian. I do umbahen ingkon tongtong hita
dungo martangiang pasahat diri tu tangan ni Debata Jahowa. Asa diondihon,
diurupi, dipargogoi, diparbisuhi jala diondihon hita di dalan sidalananta, di
ulaon siulahononta siganup ari dohot di ngolu sihangoluhononta saleleng di
portibi on.
g)
Holan sian
Debata Jahowa do “haluaon sian dosa dohot hamatean” ni sandok hajolmaon. Ala ni
denggan basa dohot asini roha dohot holong ni roha ni Debata Jahowa di hita
jolma tinompaNa, dipaingot do sandok ruas ni huria dohot angka na porsea di
Debata dohot Jesus Kristus, asa taarahon sandok portibi on: mamuji denggan basa
ni Debata marhite endetta dohot tangiangta na so olo sumurut (Jes.32:2;
Pslm.39:8), Asa sadar sude jolma, beha pe situasi manang keadaanna di portibi
on alai naeng ma botoonna tangkas na di tongatonga ni ancaman ni dosa,
haliluon, hajahaton, hatoison dohot ginjang ni roha dope hita mangolu-mamolus
ragam ni pangunjunan. Ala ni ndang tarbahen so ingkon dungo hita martangiang,
jala benget paimaimahon Tuhanta na naeng ro i. Tongtong marguru tu lomo ni roha ni Debata na sun
bisuk i asa diajari hita mangolu di portibi on na mubaubaon on dohot mandalani
dalan hatigoran tu hangoluan na manongtong i. Ganup tingki martangiang, ingkon
tongtong hita mangelekelek asi ni roha dohhot denggan basa ni Debata asa
marpangulahi rohaNa mida dosanta, dosa ni keluarganta, dosa ni masyarakatta,
dosa ni bangsonta, dosa na bongot tu hurianta. Mulai sian dosa na metmet, na
balga, na buni dohot na patar, dosa haposoon (hawa nafsu) dohot dosa dung
dewasa (tamak dohot ambisi na berlebihlebihan), dohot dosa dung matua
(ganggu-mandele). Asa unang pora jala lapuk haporseaonta, pangkirimonta lumobi
holong ni rohanta tu asi ni roha ni Debata sijaloonta nuaeng nang tu jolo on di
ngolunta nang sahat tu pinomparta.
h)
Di halak na
porsea dalan ni Debata ima haholongon nang hasintongan. Dibagasan dalanna i
adong haholongan na paubahon jala hasatiaon tu hita. Ndang adong mara dibagasan
dalan ni Tuhan i. Alai sipata ndang sanggup pikiranta mangantusi dalan ni Tuhan
i. Ala i nang pe songon i sandok dalan ni Tuhan i ima asi ni roha. Didok so di
Jesaya 55: 8-9 “Ai ndada pingkiranku pingkiranmuna i, jala ndada dalanmuna
angka dalanku, ninna Jahowa. Ai songon timbo ni angka langit sian tano on,
songon i do tumimbo angka dalanku sian dalanmuna i, jala angka * pingkiranku
sian pingkiranmuna i.” Ala so mampu hita manangkasi dalan ni Tuhan i, sai
jotjot do hita mamaksa Tuhan i laho mangihuthon lomo ni rohanta, sangkapta nang
tahitahinta, alai ndang olo hita mangihuthon lomoni rohaNa. Mansai maol do
memang dalan ni Tuhan i niantusan songon na so masuk tu roha dohot pikiran.
Mansai jotjot do hita jolma holan na marnida na di pardagingon on jala boi manghorhon
hansit ni roha, muruk nang kecewa tu Tuhanta i jala marungutungut songon bangso
Isarel i.
i)
Songon topik
ni Minggunta mandok : Jahowa Pabotohon DalanNa. Na gabe sungkunsungkun di
hita,boha do asa boi hita mangantusi dalan ni Tuhan i ?:
1.
Naparjolo,
naeng ma serep rohanta. Mansai sogo do roha ni Tuhanta i marnida angka na
ginjang roha na sai mangasahon gogo, roha nang pikiranna laho manontuhon
pilihan nang dalanna. Hape Hata ni Tuhanta i mandok tu hita, sai urupanNa do
hita di angka na olo siurupan, sitoguon,
na tobok rohana, jala serep marroha. Sedangkan halak pe molo mamreng hita
songon na ginjang rohanta, laos so olo mangurupi hita. Alai sabalikna molo
serep rohanta dibereng halak, sai urupanna do hita. Lam ma Tuhanta na basa i sai urupanNa do angka na seep
marroha.
2.
Napaduahon,
ingkon biar mida Jahowa do hita. Biar mida Jahowa ndang na mandok songon na
mabiar, alai na unduk, hormat, porman, toman, tulus mangulahon lomo ni roha ni
Debata marhite patikNa i. Tondi na unduk tu Debata marhite na marlas ni roha
dibagasan Tuhan i. AI tangkas do didok di Poda 1:7 “Biar mida Jahowa do
parmulaan ni parbinotoan, alai anggo halak na oto manoisi hapistaran dohot
pangajaran.” Asa marhite i ma tau hita ajaranni Tuhanta i nang dalanNa i na
mamboan tu las ni roha nang olopolop di hita, keluarganta nang tu pinomparta.
Laho manangkasi lomo ni roha ni Debata nang dalanna sipata memang ingkon
lombuttonNa do hita. Songon na nidok di Hosea 6: 1 – 3 “Beta hita, asa mulak hita tu Jahowa! Ai nunga
ibana mangaribahi, laos ibana pamalum hita! Nunga ibana mambugangi, laos ibana
manaoari hita! Sai pangoluonna do hita dung salpu dua ari, tole patoluarihon
paheheonna hita, asa mangolu hita maradophon ibana. Sai mananda ma hita, sai
ringgas ma hita mangeahi parbinotoan di Jahowa, tudoshon buhasiang ari do
sintong ni habibinsarna, jala sai na ro do ibana songon udan tu hita songon
udan nene na mamornohi tano i.” Ala ni i holan di angka na mananda Debata do na
olo mandalani dalanNa dibagasan Jesus Kristus naung mangae dalan na porsuk i
asa dung i marhamonangan jala
marhabadiaon. Tadalani ma dalan ni ngolunta hombar tu dalanni Tuhanta
Jesus Kristus i sipata maol antusan jala pikiran alai molo haporseaonta mangolu
sai tahamonanghon do saluhutna paraloanta i dibagasan Kristus Jesus i. Minggu
Invocavit: Jouonna ma ahu jala alusanku ma Ibana. Amen.
