Marende Ma Hamu Di Jahowa Ale Sandok Tano on
1 Kronika 16: 23-28
A.Patujolo
Ia buku Kronika on
martujuan laho manarigoti ngolu ni bangso Israel songon bangso ni Debata, naung
dipilit, dipadiri gabe parhitean ni Debata laho papatarhon bagabagaNa tu
portibi on. Adong do dua ondolan na ditaringoti jala sipatolhason ni Buku
Kronika on, ima taringot tu Bagas Joro ni Debata rap dohot panghobasionna dohot
ngolu ibadah parugamaon ni bangso Israel. Laho manaringoti na dua pokok on gabe
dipangke panurat Kronika do Bnuku Rajaraja dohot buku Samuel na memang bersifat
sejarah, angkup ni na mamangke sumber na asing dope. Ala ngolu parugamaon ni
bangso Israel do na gabe pokok perhatian panurat ni Buku on, gabe digoari do
buku Kronika on songon buku na mewakili soara ni angka malim.
Mangihuthon
penelitain, disurat do buku Kronika on di partingkian dung habuangan sian
babel. Otik na ma jumlah ni bangso Israel i mulak tu Jerusalem sian habuangan
babel. Secara psikologis dohot kebangsaan (nasionalisme), bahkan kesadaran
songon bangso ni Debata, tagamon lam ndang menarik perhatian nasida be. Nasida
mulak songon pasipasi (sisa-sisa) na bergumul songon dia ma masa depan nasida
tarlobi songon bangso.
Laho mangurupi
bangsoo Israel di bagasan kondisi na sangat memprihatinkan ima buku Kronika
disurat, songon sada dalan manogunogu, memulihkan jala menyadarkan nasida
songon bangso ni Debata. Ala ni ima, sejarah ni Poti Parpadanan, Undungundung
manang Bagas Joro, silsilah ni raja David tu Mesias na aneng ro dohot sejarah
pamiliton ni bangso i gabe bangso ni Debata, gabe pusat perhatian ni buku
Kronika. Lapatanna, buku Kronika martujuan laho meyakinkan bangso i, tung pe
otik jumlah nasida, tung pe tarbuang nasida jala mulak sian habuangan Babel,
alai hot do nasida bangso ni Debata. Marhite kesadaran i ma, asa tongtong
nasida marparange dohot marpambahenan songon bangso ni Debata, hombar tu patik
ni Debata.
B. Hatorangan
1) Ia turpuk ta on ima
bagian ni sejarah Poti Parpadanan na binoan ni raja David sian Silo tu
Undungundung di Jerusalem. Ala ni i, suasana gok olopolop, las ni roha dohot
pujipujian do bangso Israel menyambut Poti Parpadanan i. Dijolo ni turpuk on
dipatorang do sikap, cara manang tehknis penyambutan Poti Parpadanan, na
manggombarhon hubungan ni bangso i dohot Debata Jahowa na mansai menentukan
kehadiran ni Poti Parpadanan tu Undung-undung. Ima syarat ni kehadiran ni Debata
di tongatonga ni bangso i. Suasana olopolop, las ni roha dohot ende ende
pujipujian naung masa di tingki na salpu. Ido di angkat buku Kronika
ditongatonga ni bangso Israel na gok keprihatinan i, asa marhite i ngolu
spiritualitas, kesadaran identitas nasida songon bangso ni Debata disegarkan
ulang. Kondisi sisongon i do na gabe konteks ni turpuk on.
2) Ende pujipujian do
ia turpukta on, jala laos hombar do i tu goar ni Minggu sadari on Minggu
Kantate, lapatanna “Endehon hamu ma di Jahowa ende na imbaru (Pslm.98:1).
Ayt.23 : Hata, “Endehon, Baritahon”, na dua pandohan on marlapatan panuruon.
Debata Jahowa dohot hauaonNa ingkon baritahonon ni bangsoNa tu sandok bangso,
asa sude bangso umbotosa. Mamaritahon Debata Jahowa marhite ende pujipujian.
Diondolhon peranan ni ende dibagasan
misi ni Huria. Ende ima sada seni suara, ima silehonlehon ni Debata tu jolma
asa marhite parendeon i gabe marmulia Debata. Ende ima sada sarana na efektif
laho mamaritahon Debata Jahowa.
3) Ay.24. Bangso
parbegu dohot saluhut bangso, ido na gabe sasaran ni misi ni bangso ni Debata
di portibi on. Angka halongangan na pinatupa ni Debata tu bangsona, ingkon
botoon jala tolhas tu saluhut bangso. Diondolhon do keuniversalan ni hadebataon
ni Debata Jahowa. Debata Jahowa, ndada holan Debata ni bangso Israel, ndada
holan Debata ni halak Kristen (na porsea), alai tung Debata ni saluhut bangso
do Ibana tanpa kecuali. Ala ni i, tugas pokok kewajiban ni bangso ni Debata do
laho mamaritahon Debata tu sude bangso parbegu (misi gareja) yang abadi.
4) Ay.25 – 28 : ia
turpuk on na marharoroan sian bahagian ni pujiapujian na dipauba sian Buku
Psalmen 105: 1-15 dohot sian bindu 96:1-13, na marisihon angka padan ni Debata
mangalehon tano tu bangsoNa. Sian pardalanan ningolu raphon Tuhan i dipargogoi
ma sian naung pinilit jala ditobus Tuhan i bangsoNa Israel. Bangso sian pinompar
ni si Abraham-Ishak-Jakob ima bangso na metmet martimbanghon angka bangso na
dihumaliangna, na gabe hatoban ni bangso sileban i. Alai padan ni Tuhan i tu
bangsoNa Israel hot do pasahathon tano parpadanan songon inganan parmianan jala
asa gabe bangso na bolon di tano Kanaan. Sai jagaon, diramoti jala dipasupasu
Tuhan i do bangso Israel. Ima pengalaman na digurithon di ayat on. Marhite angka
ende pujipujian i ma bangso Israel paboahon pambahenan nang pangaramotion ni
Tuhan i na mansai balga. Pambahenan ni Tuhan na dibaritahon ima nunga dilehon
Tuhan i haluaon di pardalanan ni sejarah bangso Israel, jala sian ompu nasida
najolo (Abraham-Ishak-Jakob). Sai didongani do sian tano Misir sahat tu Tano
Kanaan, laos songon i do uju di habuangan babel sahat tu na mulak bangso Israel
tu Jerusalem. Na timbul, na gogo, na songkal, na tongam, na marmulia dohot na
badia do Debata Jahowa. Sude sifat ni Debata Jahowa on patudu hasisintong ni
hadebataonNa, ima Debata na mangolu jala na tutu. Ndang adong Debata na asing
sian Ibana. Ibana do na manjadihon portibi on dohot nasa isina pe.
C. Hatorangan
1) Tarbarita do parende
halak Batak. Tarjalo roha do i, ai patar do i nang di ngolu ni huiranta HKBP.
Alai na gabe sungkunsungkun; beha do hasadaon (integritas) ni ende pujipujian i
tu tata-ibadah dohot partangiangan ni hurianta be? Ise do na gabe marsangap
jala marmulia marhite angka ende pujipujian dohot koor ni huria i ? Ala sarana
efektif do parendeon tu misi ni huria.
Beha do pangaradeonta taringot tu angka ende pujipujian i. Sotung do gabe
siparengkelon ala suara sumbang manang fals? Ringkot do asa lam marsitutu angka huria laho patupa angka latihan dohot persiapan na denggan taringot tu
parendeon tarlobi di angka ibadah parmingguon nang partangiangan pe. Asa lam
tangkas na umbegesa manangkup isi ni angka ende pujipujian i. Jala asa lam
marmulia Debata.
2) Debata Jahowa na
tatanda dibagasan AnakNa Tuhan Jesus, Ibana do Debata ni saluhut halak nang
bangso pe. Beha do huria pahembangkon misina dii tingki on. Ditongatonga ni
kemajemukan masyarakat na lam mangerbang. Tantangan na balga do on di ngolu ni
angka huria na minoritas di sadasada wilayah. Molo didok, ingkon pajojoronta,
ingkon patolhasonta tu halak parbegu dohot tu saluhut bangso taringot tu Debata
Jahowa, beha ma strategi na ampit laho patupahon i di negaranta Indonesia on ?
Tarjou do huria di tingki on asa bersikap inklusif-dialogis maradophon sude
ugamo na asing ditongatonga ni kemajemukan on. Inklusif lapatanna ingkon
terbuka do huria (halak Kristen) manghaholongi, menghargai jala mengembangkan
komunikasi manang parsaoran tu sude ugamo na asing. Alai taringot tu haporseaon
i, ingkon bersikap dialogis ma hita, lapatanna terbuka masipatorangan, jala
padaohon sikap na saling mempersalahkan. Tindakan, parange dohot angka
pambahenan na denggan, ido na gabe pujipujian na boi diida jala dihilala angka
donganta na humaliang, tarlumobi ditongatonga ni krisis di tingki on
(solidaritas-nang toleransi)
3) Topik ni minggunta
mandok: “Marende ma hamu ale sandok tano on”. Nabadia do Debata Jahowa. Ala ni
i tarjou do ganup na porsea dohot huria mangjanghon habadiaonna songon bangso
ni Debata. Na mangullus do tondi kekerasan apala di partingkianta on. Tarjou do
hita asa unang gabe parsidohot gabe pelaku kekerasan di keluarga, di huria, di
parkarejoan, di dunia pendidikan nang di tonga ni masyarakat nang di luat dia
pe. Tarjou do huria nang ganup na porsea gabe tiruan di parange nang pangalaho
na dame maradophon saluhut jolma. Naeng ma adopanta angka kekerasan dohot
halambohon, pahembanghon budaya dame di halak na porsea ima deba na gabe ende
pujipujian na tangkas mamuji jala pasangap Debata jahowa. Parendeonta i dohot
na marhite kepedulianta laho mangaramoti angka na tinompa ni Debata na asing
nang manjaga lingkungan hidup. Boha do asa saluhut portibi on mamuji muji
Debata ? ima marhite na olo hita merawat alam, memelihara ciptaan Tuhan. Ai
marhite na menjaga alam dohot menjaga simbiosis ni alam na manghorhon na
denggan tu parngoluon ni manisia jala disi ma sude tano on nang angka na
tinompa; angka binatang, suansuanan nang alogo, ombun sude di tano on boi
mamujimuji (mar-KANTATE) tu Debata. Ala naung ditonahon tu hita jolma laho
mangaramoti na tinompa i. Mar-Kantate hita dijou minggunta on: mangendehon
ende na imbaru; ndada gubahan syair lagu na imbaru; alai ngolunta nang panggulmiton
ni ngolunta ido angka ende na imbaru; ima parange nang panglaho na imbaru; na gabe
jamita na mangolu nang surat ni Kristus ma ngolunta on-ngolu na marpanindangion
na tama. Pamujionta i mandok mauliate di naung ditobus Jesus hita marhitehite
mudarNa i asa malua hita sian hamatean na manongtong i tu hangoluan na saleleng
ni lelengna i. Ima las ni rohanta, olopolopta, endeendeta, nang pamujionta na
marhite gok las ni roha i Dibagasan Jesus i. Amen.
