“Dipamonang
Debata Hita Marhitehite Jesus Kristus”
Allah Memberikan Kita
Kemenangan Oleh Yesus Kristus
& Ev: I Korint 15
: 50-58 & Ep: Parjamita 8: 9-17
A. Patujolo
Dipungka Apostel Paulus do suratna na
parjolo on tu huria Korint marhite hatorangan taringot tu silang (teologi
salib), diujungna dipatuduhon do sada panindangion na balga situtu taringot tu
haheheon ni Kristus dohot panghirimon ni sude halak Kristen di haheheon ni
angka na mate di ari soggot i. Tamba ni surat Rom 8. Di 1 Korint 15 on
dipatorang do mansai tangkas taringot tu panghirimon ni halak Kristen. Suraon
na binege ibana do naung torop sian tongatonga ni halak Kristen na di huta
Korint, na ganggu rohana taringot tu haheheon ni angka na mate, ala tubu di
tongatonga nasida sada poda na mangalo poda taringot tu haheheon sogot i
(ay.12). Ra dibege ibana do barita taringot tusi (angkup ni barita parsalisian
na masa di huria i) sian pangisi ni bagas ni si Kloe (1:11), manang sian angka
donganna na asing na umboto angka na masa ditongatonga ni hhuria i (16:17).
Alai mansai tangkas diondolhon ibana, paboa panghirimon taringot tu haheheon na
sian angka na mate i do sad ondolan ni poda hakristenon. Molo diparhatutu
nasida do haheheon ni Kristus, ingkon parhatutuon nasida do nang haheheon ni
angka na mate, ai patujolo ni haheheon nni angka naung monding i do haheheon ni
Kristus (ay.20). Haheheon ni Kristus i do nang sintuhu ni sude Barita na uli.
Alai molo dialo nasida haheheon ni angka na mate, na mansoadahon haheheon ni
Kristus i do nasida disi. Jala na mansoadahon haheheon ni Kristus na mansoadahon
Barita na uli i do. Jadi dihamham haheheon ni Kristus i do nang haheheon ni
angka na mate (ay.12-34).
B. Hatorangan
1)
Turpukta on ima songon pangibulan ni
sude hatorangan na pinatolhasna di bindu 15, taringot tu pardomuan ni haehehon
ni Kristus dohot haheheon ni angka namate di ari sogot i. Didok ibana boasa
ingkon dipahehe angka naung mate i, ala “ndang tartean sibuk dohot mudar
harajaon ni Debata, jala ndang tartean na olo busuk i hatongtongon i”. Sibuk dohot
mudar ima manggombarhon ngolu pardaging ni jolma na di portibi on. Jala
harajaon ni Debata na nidok ni Ap.Paulus, na dos do lapatan ni i dohot “ngolu
na manongtong ro disaleleng ni lelengna”, songon na nidokna di angka evangelium
i. Jadi ngolu pardagingon manang bangko hajolmaon na olo busuk (mate), ndang
boi gabe bagian ni harajaon ni Debata. Ingkon dipauba do i saluhutna marhite
Tondi, songon na jinamitahhon ni Jesus tu si Nikodemus di John.3:5-6 i. Jadi
ngolu na imbaru sisaonari, na pinangolu ni Tondi i, marpardomuan do tu ngolu
sogot dung haeheheon, songon na nidok Ap.Paulus di Roma 8:11 “Alai molo
maringanan dibagasan hamu Tondi ni na manungguli Jesus sian na mate, sandok
pangoluon ni Ibana naung manungguli Kristus Jesus i, ma nang pamatangmuna na
mate i, hinorhon ni Tondina na mangingani hamu”. Dison ndada manaringoti
taringot tu hatutubu na imbaru marhite hamubaon ni roha apostel i, alai na
manghatai taringot tu hamubaon ni pamatang on do. Ingkon tading do ngolu
pardagingon on, laho bongot tu surgo i (ay.44-46). Jadi molo didok “ndang
tartean na olo busuk i hatongtongon i”. Marlapatan ndang tarbahen pamatang na
olo busuk on harajaon ni Debata. Mangolu manang naung mate pe halak Kristen di
haroro ni Kristus paduahon i, ingkon jolo dipauba do pamatangna asa tarbahen
bongot tu surgo i.
2)
“Hahomion” ni Debata do pangalaho i, na
buni dope di tingki na salpu. Alai saonari nunga dipapatar Debata i dibagasan
Kristus, atik pe hagogokna tarida muse di ari sogot i. Ala ni i ingkon adong do
panghirirmon ni halak Kristen di ngolu sogot. Haporseaon si saonnari, sisoada
do i molo so mardongan dohot panghirirmon di ngolu sogot. Jala si Paulus
sandiri uju manurat surat na on, manghirim ingkon masa do i andorang so monding
pe nasida di haroro ni Kristus i, dohot do nasida paubaonna. Jala tompu do i
patupaonNa, holan dibagasan “sangkidop mata” (satongkin) sambing, dipangkuling
ni sarune di arina parpudi i. Soara nis arune i ma na pabotohon ujung ni angka
tingki laho paheheon angka na mate dohot paubahon angka na mangolu dope hatiha
i tu hatongtongon i. Ai songon naung ditaringoti di jolo, ndang tartean na olo
busuk on hatongtongon i ia so jolo dipauba ibana manolukhon hatongtongon i.
Jadi nang pe marpamatang na olo busuk dope angka halak na mangolu hatiha i,
ingkon dipauba do laho manean hangoluan na manongtong ro disalelenglelengna na
sian Debata. Bonduton ni hangoluan i ma hamatean i.
3)
Disi ma endehonon ni angka na manean
hangoluan i, ende hamonangan na marojahan tu Jesaya 25:8 dohot Hosea 13: 14 na
mandok: “ Jo hamatean, didia hamonanganmi? Jo hamatean didia soropmi”.
Marlapatan do i nunga talu hamatean, jala nunga mago nang soropna. Tutu anggo
saonnari mangula dope hamatean i, jala mandoit nang soropna. Tutu anggo
saonnari mangula dope hamatean i, jala mandoit dope soropna, i ma dosa,
namangalehon hagogoon tu hamatean i. Didok si Paulus dosa i do sorop ni
hamatean, jala patik i do gogo ni dosa i”. Jadi songon na di suratna tu halak
Rom, jotjot do dipadomu si Paulus pangalaho ni dosa, patik dohot hamatean. Jadi
ndang holan ala ni keterbatasan biologis secara alamiah dibereng ibana umbahen
ro hamatean i, alai marpardomuan do moral. Ala ni di na talu hamatean i, jala
monang hangoluan i, ndang tagamon so mandok mauliate angka na porsea i tu
Debata, na mangalehon hamonangan i di angka na porsea marhite Jesus Kristus.
Marhite hamamate ni Jesus nunga ditaluhon hamateann i, jala nunga diroro
soropna, ima dosa. Tontu hamauliateon i ingkon dipatuduhon angka na porsea ma i
marhite na dohot manaluhon dosa i sian dirina be dohot sian angka na
humaliangna.
4)
Na manghirim do halak Kristen di
hangoluan sogot i. Alai ndang holan panghirimon songon i non i. Ingkon tarida
do panghorhonna di ngolu sisaonari. Songon na pinaingothon ni Ap.Paulus di ayat
na parpudi ni turpuk on (ay.58), asa saluhut halak Kristen “Marsihohot jala so
mubauba, jala lam sumurung tongtong di bagasan ulaon ni Tuhan i”. Jadi ingkon
dihorhon panghirimon i do hot ni roha, ndang m uramura munggil roha dohot
haporseaon ala ni angka na masa di portibi on. Songon na didok si Paulus di
surat Kolosse (1:23): “.....Ojak jala hot di bagasan haporseaon, jala so olo
meret sian panghirimon di barita na uli i”. Songon sao (sauh) na hot jala togu
do panghirimon i di tondi ni angka na porsea (Heb.6:19). Angka na mangolu
dibagasan panghirimon na togu, gabe tarbahensa ma di ngolu sisaonnari mangolu
di bagasan Tuhan i, huhut mangula ulaon ni Tuhan i. Jala ndang magopo halojaon
ni angka na mangula ulaon na denggan na gabe hasangapon ni Tuhan i. Angka aha
do na nidokna uaon ni Tuhan i ? Manang aha pe na niula dibagasan haporseaon, na
nionjar ni holong ni roha na sintong, targoar do ulaon ni Tuhan i. Tutu adong
do “ulaon i Tuhan i na khusus”, songon na dipasahat tu si Timoteus dohot tu si
Paulus (16:10). Isara ni na pauliulihon huria i. Sada hasurungan do ulaon na
pauliulihon huria (14:12), alai ndang sitengahononhoni, ai tugas dohot
tanggungjawab ni saluhut halak Kristen do ulaon na songon i. Angka na porsea di
Jesus Kristus ingkon sai tongtong do sumurung di haporseaon, panghirimon dohot
holong ni roha. Jala sisada ihot do na tolu pangalaho i di ngolu ni halak
Kristen, ndang tarsirang, jala ndada masialoan na sada maradophon na sada nari.
Panghirirmon i mangarahut haporseaon na togu, jala mangonjar halak mangaradoti
holong ni roha, i ma saluhut angka ulaon na denggan. Jadi panghirimon na togu
dohot roha, i ma saluhut angka ulaon na denggan. Jadi panghirimon na togu dohot
roha na marsihohot di bagasan haporseaon maniop poda na sintong taringot tu haheheon
sogot, ido mangalehon gogo jala mangonjar hita tongtong sumurung mangula ulaon
ni Tuhan i. Ndada mangopo ulaon angka ulaon na songon i, ai dipasupasu Tuhanta
do i manghorhon na hasea di harajaon ni Debata, di ngolu ni huria dohot di
ngolu ni sandok hajolmaon. Angka na mangula ulaonna denggan marojahan di
panghirimon, haporseaon dohot holong ni roha, ndada na mangalului jasa dohot
hasangapon nidiri, alai tongtong do i dihilala songon tanda ni hamauliateon ni
rohana siala naung jumolo Tuhan i mangula angka na denggan di ngoluna, lumobi
ma siala panghophopon ni Tuhan Jesus naung manaluhon dosa dohot huaso ni
hamatean. Dipamonang Debata hita marhitehite Jesus Kristus, dipamonang manaluhon
haporsuhonta na umbolon i, ima hamatean i. Molo tataringoti pe angka donganta
naung jumolo sian hita mangadopi hamatean i unang ma gabe lomos jala bobos
rohanta nunga ditaluhon hamateanta dibagasan Jesus Kristus. Margogo ma hita
tongtong marpanghirimon di Ibana. Amen.
