Debata
Do Partanobatoanta
Psalmen
43: 1 – 5
a. Ia
turpukta on ima na masuk tu ende sipodaon sian angka anak ni si Kora. Dihalungunhon parpsalmen on
do pangaramotion ni Debata na maringan di tongatonga ni bangsoNa laho mangurupi
angka jolma na niasianNa hombar tu padanNa. Dialo angka bangso na so daulat do
parpsalmen on, manang angka bangso na so tumanda asi ni roha ni Debata ima
angka bangso parbegu. Laos dohot do angka baoa siulahon sipaotooto dohot
hajengkelon paporsukporsuk parpsalmen on. Dipasahat parpsalmen on do hibul
dirina tu Tuhan i : “AI Ho do partanobatoanku”.
Jotjot do turpuk on dipasahat ditingki Minggu Judika : “Luluhon ahu, ale
Debata”, jala on ma tangiang mangido tumpak manang pangurupion ni Debata
maradophon musu. Mangolu ditongatonga bangso na so daulat, marlapatan do i na
so marlangka ruhutruhut parhahamaranggion, ruhut na masihaholongan jala
masiurupan. Maol do mangolu halak partigor di suasana di parsaoran na songon i.
Ai ndang olo partigor i papeol uhum. I do umbahen maheu partigor di tongatonga
ni hageduhon dohot hajahaton. Marsak jala marungkil partigor i paidaida na masa
i, maon terimbas ibana tu na masa i. Ndang adong be siaropan na manguba
parrohaon di ngolu on, so holan Debata. Tung dihalungunhon par-psalmen do
parsaoran di bagas joro ni Debata, ai disi do inganan las ni roha, inganan
pamujion tu Debata.
b. Dipasahat
par-psalmen on do hibul dirina tu Tuhan i : “Ai Ho do partanobatoanku” (Pslm
31:5; Jes.25:4; 2 Sam.22:33; Jer.16:49). DI bagas joro ni Debata, angka jolma
na terdakwa dapotan parlinggoman sahat tu tuntutan na menuntut nasida dipareso,
alai molo tingkos do nasida marsala, boi do nasida dipalao sian inganan nasida
hian. Ala ni i do tubu ma sungkunsungkun na paet, na mandok: “Boasa tung
ambolongkononmu ahu?” Tuhan i sandiri manulak parpsalm i, mambolongkon ibana tu
inganan na dao, songon bangsoNa na dibolongkon ibana tu Babel (Pslm.44: 10, 24;
74:1). Ibana do, na pasahathon halakna tu parsahiton dohot penindasan (ay.2c:
42: 10c-martujungtujung ahu mardalan binahen ni pangarsahi ni musu: Indonesia:
hidup berkabung di bawah himpitan musuh”). Alai nang pe osngon i, Tuhan i
sandiri do na mangujungi sude sitaonon na hnasit i, marhite na marsuru
suruan-Na, i ma marhite na manongos Panondang (hatoranganmu, marningot tiang
api na mandongani Israel di parhorsihan) dohot hasintongan na manogu huhut
pataruhon bangsoNa (Ptds.2 Musa 2:6; 15:1), tu dolok habadiaon dohot inganan ni
Debata (Psalm 46: 5; 84: 2; 132:5, 7). Masuk ma par-psalm tu langgatan ni
Debata, mamboan pelean situtungon, ima pelean hamauliateon, pabotohon tu
natorop paboa Debata naung mangurupi ibana, asa dohot natorop i marlas ni roha.
Pamujion las ni roha on dipatupa mardongan parhinaloan tu Debata, huhut mandok
: “Ale Debata, Debatangku tongon”.
c. Dijaman
na lam maju jala na lam mangimbukbuk on nunga lam tu toropna jolma lupa marsaor
nang manghatai dohot Debata dohot teratur, alai gabe holan tu angka na di
portibi on nama rohana marhaposan, di ujungna madabu ma angka jolma na songon i
holan marpos ni roha tu arta manang sinamot dohot gogo ni portibi on. I ma
bingkaa ni hadadabu ni jolma tu dosa dohot hamatean na saleleng ni lelengna i.
Ala ni i dipaingot bagian na parjolo ni turpukta on do hita angka na porsea di
Debataa Sitolusada i, asa sai tongtong hita manjou goar ni Tuhan i di angka
kesibukanta si ganup ari i, ai alusan-Na do ganup na manjou goar ni Tuhan i.
Tung sura pe hita mandalani jala mengalami pendidikan na lam timbo huhut mardongan arta di portibi on, alai tung so
jadi hita manghalupahon Debata
sitolusada i, jala tung ingkon do sai mangido hita tu Ibana marhite tangiang.
d. Manghirim
di asi ni roha ni Debata na hatop ro mangurupi, laos i ma sihamauliatehono di
ngolu siganup ari. Unang mandele tung pe maol parngoluon, unang lupa
mangunsande tu Debata. Tarpaulak Debata do i sude, asal ma tongtong manghirim
di asi ni rohaNa. Molo marsak angka partigor marnida halumlamon ni parsaoran ni
jolma, tanda na adong dope na porsea sian tongatonga ni jolma. Arsak dohot
hoihoi ni partigor i do na tinangihon ni Debata. Molo maol tahilala pajongjong
hatigoran di parsaoranta, unang ma gabe parssidohot hita mangulahon na jat.
Tapasiding tagonan, ai ala ni hita gabe ro Debata mangurupi padengganhon.
Songon i do na nialaman ni Bapak Reformator Dr.Martin Luther, mamereng sian
pengalamanna marnida na so denggan pardalanan ni huria Rom Katolik.
Siarsaakhononna do i naung lam dao sian hapolinon ni Hata ni Debata, jala
terjadi kesewenangwenangan ni huria Rom Katolik. Domu ala minggu Reformasi
nuaeng na topet di ari 31 Oktober na salpu i, siala ni i semanagt reformasi
naeng ma lam mian diroha ni angka na porsea di Jesus Kristus. Tujuan ni angka
siihuthon Kristus ima gabe pembawa pembaharuan (reformator), na jumolo
membaharui dirina sandiri, nang keluarga dohot na dihumaliangna. Tontu porlu do
keberanian laho paubahon angka na so denggan, ala ni i ringkot do hita mangido
gogo sian Tuhan i songon par-Psalmen on asa mampu mangadopi tantangan laho
pajongjonghon hatigoran dohot hasintongan songon naung diulahon Jesus ditonga
portibi on. Songon topik ni minggunta mandok : “Debata do Partanobatoanta” molo
Debata donganta ise be alonta, ndang pola tahutan hita, alai lam margogo
mangihuthon Tuhan i huhut patuduhon hasintongan-Na. Jadilah agen-agen
pembaharuan na gabe pasupasu ditongatonga portibi on. Amen.
