Bahan Jamita Minggu Advent I, 30 Nopember 2014

Jahowa Do Ama Di Hita

Jesaya 64: 1 – 8

   a.       Namanurirangi do Panurirang Jesaya hurang lobi 40 taon mulai sian taon 740 SM di tingki parmulaan ni harajaon Uzia sahat tu halelengse ni Jerusalem taon 701 SM di tingki panggomgomion raja Hizkia. Jala raja Hizkia manggomgomi sahat tu taon 687/6 SM. Ia turpukta on tarmasuk ma tu horong Trito Jesaya, ima dung haruar bangso i sian habuangan jala mulak tu Jerusalem. Molo tajaha buku 5 Musa, ia bangso Israel nunga diain Debata gabe bangso (anakna), jala Debata rade gabe Amanasida. “Angka anak na niain ni Jahowa, Debatamuna i do hamu ( 5 Musa 14: 1). Diain Debata nasida ndada ala natumorop, dumenggan, sian bangso na asing, alai tung sian holong dohot asi ni roha ni Jahowa sambing do ( 5 Musa 7: 7-8). Jala dipamilliton i adong sangkap ni Debata na ingkon ulahonon jala sipasauton ni bangso Israel i. Lapatanna pamilliton i mangigil asa sai tongtong nasida tangi, unduk, satia jala marhaporseaon holan tu Debata.Unang manomba angka debata sileban (ganaganaan) songon na pinatupa ni bangso na humaliang. Diokui bangso i do na jotjot nasida manggunturi, jala mangarsahi Tondi ni Debata (ay.10). Ala ni i ma gabe lalu rimas  ni Debata dompak bangsoNa. Mangihuthon sejarah taon 587 SM, tarbuang ma nasida tu Babel, marokso bagas joro, jala gabe tarulang huta Jerusalemik pe marrimas Debata, tung diparhatopot nasida do muse, paboa ndang mansohot asi ni roha ni Debata di nasida. Songon asi ni roha ni ama ama tu angka anakhonna, songon i ma asi ni roha ni Debata di angka na mangkabiari Ibana. Songon Topik ni Minggunta : “Jahowa Do Ama DI Hita” (Tuhan itu Bapa kita).

     b.      Ia turpuk ta on sebagian panolsolion na tubu di roha ni bangso i, ala nunga dihilala bangso i songon dia hinaparir ni ngolu nasida ala holang sian Debata. Diingot bangso i do pambahenan ni Debata na jolo mamboan ompunasida haruar sian parhatobanon Misir. Ditogutogu do nasida songon saada punguan marhite tangan ni si Musa dohot si Aron. Angka na hea masa tu si Abraham dohot tu angka pinomparna gabe pengalaman na arga siingoton nasida. Naeng songon i ma nian masa tu nasida di namangadopi hamaolon sinuaeng on (Ay.17-19). Jala diingot nasida do angka hasalaan nang dosa ni nasida najolo sai jotjot manimbil sian adopan ni Debata umbahen sai songgop hamolon dipardalanan ni bangso i, tarmasuk ma dihabuangan nasida di Babel uju i. Sai marhoihoi do nasida mangadopi hamaolon na masa di tonga ni parngoluan nasida. Ndang manahan be nasida di haansit na tinaon nasida i, ndang tartahansa be angka haporsuhon natinaon nasida di habuangan i. Gabe mulak ma roha nang haporseaon nasida tu Debata Jahowa na gabe Ama dinasida umbahen didok;  “Alai nuaeng ale Jahowa. Ho do amanami! Tano do ianggo hami, jala ho do sitompa hami, jala jadijadian ni tanganmu do hami sudena” (ay.7). Naung mulak do na lilu i anak dohot boru ni Debata ima bangso Israel i tu Debata Ama i. Dibagasan panolsolion ni roha nasida mangelekelek ma bangso i tu adopan ni Debata didok do muse di ayat 8 “Sai unang ma marimashu ho, ale Jahowa, jala unang tongtong paingotingot hajahatonnami! Ua ida jala tatap hami, ai bangsom do hami sude!”

    c.       Hamolon na masa di tonga ni bangso Israel boi do jumpang situasi hamaolon dipardalanan ni ngolunta tarlumobi hita na targoar anak dohot boru ni Debata manang angka siihuthon Kristus na jotjot digoari bangso ni Debata. Marganti sorin do arasak nang las ni roha, alai sipata arsak nang sitaonon i do na asai tapasiding dipardalanan ni ngolunta; ro do sitaono, parsahiton nang angka hamaolon na asing. Boi do angka situasi na borat i mandondoni roha nang pingkiranta, ambahen hita gabe gale di partondion jala manghorhon gale haporseaonta laho manghaposi Debata. Boi do ra hita mangarujiruji saluhutna pardalanan ni ngolunta, betak adong na pilit dalanta sian dalan hasintongan dohot hatigoran ni Debata ? Naeng do nian sian angka pengalaman ni ngolunta i manogunogu rohanta mang-evaluasi diri, asa paingothon dirinta nang dalanta asa lam marhamubaon ni roha di adopan ni Debata nang diadopan ni dongan jolma. Jala ingkon tangkas ma nian botoonta asi ni roha ni Debata songon asi ni roha ni ama ama tu ianakhonna. Ala ni i angka anak dohot boru ni Debata na hinongkop dibagasan Jesus Kristus sai tong tong marbenget ni roha mangido pangurupionNa marhitehite tangiang tu Ibana asa lam togu haporseaonta tu Ibana (ptds. Jak.4:8a).

     d.      Nuaeng naung tasalpuhon ma ujung taon parhuriaonta jala masuk hita tu Taon Baru ni hurianta ima Advent I, lapatanna minggu panagamon di haroro ni Tuhan i, huhut parade diri laho manghalashon parningotan hatutubu ni Tuhan Jesus Kristus. Di minggu advent on dipangido do tu hita asa bulus rohanta manghaporseai Tuhan i. Jala rade managam haroroNa paduahalihon. Tabereng do lam godang do hamaolon hamaolon na taadopi dipardalanan ni ngolunta ganup marsadasada nang secara kolektif, boi do tubu di roha asa magira ma ro hasangapon ni Tuhan i marhite hatigoranNa laho maniaphon angka sipapeol uhum, na pasiaksiak jolma dohot siula harorangon nang dosa pe. Atik pe ndang adong jolma na boi mamparetongkon haroro ni Tuhan i, andigan dohot sadiharina. Atik pe ndang adong jolma na boi mamparetonghon haroro ni Tuhan i, andigan dohot sadiharina songon na didok di epistelta di Markus 13:32-33 “Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i pe; nda holan Ama i! Tagam ma hamu; dungo ma hamu, ai ndang diboto hamu, manang sadihari tingkina i!” Sandok taparade ma rohanta ai Jahowa do Ama di hita na manogunogu hita. Ditogutogu lapatanna diiringiring, ditiop jala diramoti asa sonang so hariboriboan. Tudos do i hira na manogunogu sada dakdanak na hurang gompis dope mardalan, ingkon ditata manang ditogutogu unang tinggang. Molo didok manogunogu sada dakdanak berarti adong aarah na jelas, tu dia dakdanak i ditogutogu. Nang tarlumobi Debata Jahowa Ama i na manogunogu hita ndada holan di portibi on sahat do tu sambulo ni tondinta ima Paradeiso i, ima inganan na sonang ngolu na salelengnilelengna i. Asa marhitehite Jesus Kristus AnakNa i na ro manobus hita jolma pardosa boi hita gabe panean di hasonangan i. Ala ni i di minggu Advent on ndang mabiar be hita di namanagam haroro ni Kristus na paduahalihon i. Alai tongtong hita marhaserepon ni roha huhut marhabengeton, unang mura mandele manang putus asa. Sai tahatindangkon ma Jesus Kristus Anak ni Debata na naeng ro i mamboan haluaon tu hita jala marhamubaon ni roha laos pangoloi di Hata ni Debata. Amen.

TATA IBADAH PESTA PAHEHEON REMAJA DAN NAPOSOBULUNG HKBP DEPOK 1 Minggu XXII Dung Trinitatis - 16 Nopember 2014

1.      Joujou marsomba tu Debata Jahowa: (P: Paragenda; R:ruas)

P    : Hamu angka nahinaholongan dibagasan Jesus Kristus, Horas-Selamat Ari Minggu ma di hita saluhutna!

R    :        H o r a s  ! Selamat Ari Minggu!

P    : Tama ma antong tapuji Tuhanta parasiroha i; ai tung sumurung do denggan ni basaNa tu hita. Diramoti jala di pargogoi do hita mangalangka, dohot mangulahon nasa siulaonta suang songoni nang di tongatonga ni hurianta HKBP Depok 1 on. Taon on ima Taon Remaja Dohot Naposobulung HKBP hatopan, ala ni i na dohot do hurianta mangolophon i marhite Pesta Parheheon Remaja dohot Naposobulung ni hurianta na dipamasa topet di ari minggu on. Tahamauliatehon ma di Tuhan naung mandongani jala mampargogoi sude Remaja dohot naposobulung ni hurianta asa marlas ni roha laho marhobas di huriaNai. Pinuji ma Ibana! Marende ma hita !

2.      Marende sian BE. No. 565:1-3   “Las rohangku lao mamuji”

Ø  Las rohangku lao mamuji Debata Parholong i/ Songon bunga na mangerbang di na binsar ari i/Arsak, dosa, haporsuhon mago dibaen asiMi/ Las ni roha na manongtong lehon di au Tuhanki.

Ø  Sude jadijadianMu, laut, tano, langit I/ Angka bintang dohot bulan nang mata ni ari i/ Hauma, ladang, nang harangan, rura dohot dolok I/ Saluhutna mangendehon sangap di Tuhanta i.

--------------- j o n g j o n g -------------------

Ø  Debata Parholong roha, na manesa dosangki/ Ndang tarbaen so las rohangku lao mamuji asiMi/ Sai ajari sude hami mangulahon holong I/ Asa gok las rohanami dibagasan Tuhan i.

3. Votum – Introitus : (P:Paragenda; R: Ruas)

P       : Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on.

R       :  A  m  e  n  !

P       : Ise do na jadi nangkok tu dolok ni Jahowa, jala ise do na jadi jongjong di hajongjongan ni habadiaonNa i? Halak Partangan na lidang dohot na ias roha. Haleluya!

R       : (mangendehon) Haleluya – Haleluya – Haleluya !

P       : Ale Tuhan, Debata, Pargogo na so hatudosan, Amanami saleleng ni lelengna! Asi ni rohaM do na mangaramoti hami sian nasailaon rasirasa nuaeng, jala asi ni rohaM do na mangalehon Barita na Uli i, gabe hangoluannami. Sai asi ma rohaM, sai buhai ma rohanami jala lehon TondiM na badia i, asa huantusi hami sude panogunoguM dohot pambahenanMu na balga i. Paian ma HataM dibagasan rohanami, asa mardame jala sonang hami jala imbaru rohanami marhitehite AnakMu, Tuhan Jesus Kristus Tuhannami.  Amen.                                        ---------- H u n d u l ----------

4.      Marende sian BE. No. 701: 1   “Tu Ho do au marpadan”

Ø  Tu Ho do au marpadan O Jesus Tuhanki/ Asa burju haposan au di adopanMi/ Sai Ho ma mandongani au di ulaonki/ Ajari pargogoi ma au di dalanki.

5.      P  a  t  i  k   : (P: Paragenda; R:Ruas)

P       : Tangihon hamu ma Patik ni Debata di Minggunta sadari on ima patik V dohot lapatanna: Ingkon pasangaponmu do natorasmu, asa martua ho jala leleng mangolu di tano na nilehon ni Jahowa Debatam di ho!

R       :  Dia do lapatan ni i ?

P       : On do;  Ingkon dihabiari rohanta Debata jala ingkon holong rohanta di Ibana, asa unang lea rohanta mida natorasta dohot mida angka rajanta ro di angka natuatua. Ndang jadi paroonta rimas nasida, ingkon pantun do hita jala ingkon holong rohanta tu nasida, sioloan do nasida jala sisubuton do rohana!

            Antong rap mangido gogo ma hita tu adopan ni Debata !

P+R  : Ale Tuhan Debata! Sai pargogoi ma hami mangulahon na hombar tu PatikMi. Amen!

6.      Marende sian BE. No. 683: 1-2   “Di adopanMu Jesus”

Ø  Di adopanMu Jesus lea tutu do diringkon/ Dibaen godang ni dosangkon/di adopanMu Jesus.

---------- j o n g j o n g -----------

Ø  Di adopanMu Jesus marsomba au huhut tungki/ Lao manopoti dosangki/ diadopanMu Jesus.

7.      M a n o p o t i    D o s a : (P:Paragenda; R:Ruas; Ntr: Natoras; Rj-Np: Remaja-Naposobulung)

P       : Tatopoti ma dosanta tu adopan ni Debata; Ale Debata Amanami, Parasiroha na sumurung! Na pungu do hami di joloM martangiang tu Ho; ndada mangasahon hatigorannami  namangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, Sipangolu hami.

R       :  (Mangendehon BE No. 686: 1 “Ramun do au”)

Ø   Ramun do au di joloMi, gok dosangki urasi au

                              O, Jesus, birubiru I, dison do au patau ma au.

Rj-Np: Ho do ale Jahowa Debata, Pangondian na mangondihon ahu. Diparmahani Ho do ahu jala dipasarisari Ho sian hametmetonhu sahat di na magodang. Jotjot do hami ndang manangihon poda sian natuatua nami suang songoni maradophon hataM na Badia i ale Tuhan. Parsaorannami pe godang do marlaok dosa panghorhon ni zaman on. Ala ni i sesa ma dosanami.

R       :  (Mangendehon BE No. 686: 2 “Ramun do au”)

Ø   Na ro do au tu joloMi, Gale do au urupi au

                  O, Jesus, ala mudarMi, Dison do au patau ma au.

Ntr    : Hami angka natoras ditongatonga ni rumah tangga na mi be jotjot do lemba manogunogu angka ianakhon napinasahatMi tu hami. Jotjot do hami mardosa jala marsala tu ianakhonnami. Ala ni tu Ho ma hupasahat hami sude ianakkonnami i, sai ramoti ma nasida. Pasada ma rohanami jala pargogoi laho patureture rumah tangga nami dohot manogunogu angka ianakhon napinasahatMi tu hami asa gabe jolma na hasea di jolonami lumobi di joloM. Di sude hahurangan nami sai anju jala sesa ma dosanami.

R       : (Mangendehon BE No. 686: 2 “Ramun do au”)

Ø   Ala denggan ni basaMi, Ro au tu Ho, O Jesuski,

                  Parbadiai ma rohangki, Dison do au patau ma au

P       : Tabege ma hata bagabaga taringot tu hasesaan ni dosa; Parasiroha jala  pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang!

P+R  :  A  m  e  n !          

                                    ---------- H u n d u l -----------

8.      Marende sian BE. No.754: 1-2     “Gok las ni roha do au”

Ø  Gok las ni roha do au di ngolungkon; di ngolungkon, di ngolungkon

Gok las ni roha do au dingolungkon; tongtong di ngolungkon

Mauliate gok las ni roha; maringan holongMi Tuhan di au

Mauliate gok las ni roha; maringan holongMi Tuhan di au.

Ø  Mardame jala sonang do rohangkon; dingolungkon, dingolungkon.

Mardame jala sonang do rohangkon; tongtong dingolungkon.

Mauliate gok las ni roha; maringan holongMi Tuhan di au

Mauliate gok las ni roha; maringan holongMi Tuhan di au.

9.      E  p  i  s  t  e  l   : (P: Paraganeda;  R: Ruas)

P       : Epistel di Minggunta ima na dienet sian 1 Tessalonik 5 : 1 – 11, tajaha ma marsingkat sorin: Alai ndang pola suraton tu hamu, ale angka dongan, taringot tu tingkina dohot sadiharina.

R       : Ai diboto hamu do tangkas, na songon panangko borngin do haroro ni ari ni Tuhan i.

P       : Ai molo didok halak, dame do jala mara so adong, disi ma tompu tahop tu nasida hamagoan i, songon pambebeon tu na gabegabean, jala ndang adong haporusannasida.

R       : Alai hamu, ale angka dongan, ndang di bagasan na holom hamu: So tung hatiuran ari hamu songon panangko!

P       : Ai saluhutna do hamu anak hatiuron jala anak arian; ndang sian borngin hita manang sian haholomon.

R       : Antong, sai unang ma tarpodom hita, songon angka na leban; sai dungo ma hita jala marroha na torang!

P       : Ai borngin i do tarpodom angka na modom i, jala borngin i do mabuk angka na mabuk i.

R       : Alai anggo hita na sian arian, marroha na torang ma hita, tasolukkon ma haporseaon dohot haholongon songon baju partahanan jala tajujung ma pangkirimon ni roha di haluaon!

P       : Ai ndang dipadiri Debata hita bahen sirimasan; alai naeng ma dapotan haluahon hita marhite sian Tuhanta Jesus Kristus,

R       : Naung mate humongkop hita, asa sandok mangolu hita rap dohot Ibana, manang na dungo (mangolu) dope hita, manang naung modom pe.

P       : Dibahen i, sai masipaingotan ma hamu jala masipauliulian, songon naung binahenmuna.

            Ido sahatna ; Martua do angka na tumangihon Hata ni Debata, jala na umpeopsa.

P+R  :  A  m  e  n !

10.  Marende sian BE. No. 785: 1-2        “Alo Pangunjunan”

Ø  Alo pangunjunan sai benget ma ho, Ai molo dung monang lam togu ma ho. Angka hajahaton sai patunduk ma, Jesus pangasahon ingkon monang ho. Jalo pangurupion sian Tuhanta Jesus, Dapot ho hagogoon mandopang musu i.

                                                ---------- J o n g j o n g -----------

Ø  Sai tundalhon dosa sai burju ma ho, Unang si insahan di parange ho. Anak hatiuron baen tiruan ho, Jesus pangasahon ingkon monang ho. Jalo pangurupion sian Tuhanta Jesus, Dapot  ho hagogoon  mandopang musu i.

11.   Manghatindangkon Haporseaon :

P       :   Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok !

R       :    Ahu porsea......

                                    ---------- h u n d u l ----------

12.     T  i  n  g  t  i  n  g  : 

13.     Marende BE. No. 839 : 1 – 3    “Uli Ni Tingki I”   (P.Pelean)

Ø  Denggan ni tingki I, I ma tingki halehetan na I; Saluhut na tung denggan di baen Ho o Tuhanki;  Na mambaen las roha ni bangsoMi.

                              ---------- M u s i k ---------

Ø  Uli ni tingki I, molo jumpang tingki ni Tuhan I; Parrohai ma au Tuhan mangantusi dalanMi; Asa tarpatupa au lomoMi.

--------- M u s i k ---------

Ø  Sonang ni tingki I, molo jumpang ari ni Tuhanki; Lehon tondiMi Tuhan gohi roha tondingki; Lao mambaen na denggan tu dongan i.

                                                --------- M u s i k ---------

14.     J a m i t a : Sepanya 1 : 7+12-18

15.     Marende sian BE. No. 585 : 1-3 “Somba ma Jahowa”  (P.Pelean)

Ø Somba ma Jahowa Debatanta Amen Haleluya

 Sigomgom langit tano on ro diisi na Amen Haleluya

 Beta hita lao, marsinggang tu joloNa

 Amen Haleluya na songkal jala na badia do Jahowa

 Amen Haleluya endehon Amen haleluya endehon

 Amen haleluya endehon Amen haleluya endehon

 Amen haleluya.

                              ---------- M u s i k -----------

Ø Puji ma Jahowa Debatanta, Amen Haleluya

 Parasi roha na sumurung do Ibana, Amen Haleluya

 Taendehon ma goar ni Debatanta, Amen Haleluya

 Alani denggan ni basaNa tu hita, Amen Haleluya.

 Endehon; “Amen Haleluya, endehon Amen Haleluya

 Endehon Amen Haleluya, endehon Amen Haleluya”.

----------- M u s i k ----------

Ø Sangap di Jahowa Debatanta, Amen Haleluya

 Na bonar jala marmulia do Jahowa, Amen Haleluya

 Tapatimbul ma goar ni Debatanta, Amen Haleluya

 Na tigor jala na sun gogo salelengna, Amen Haleluya

 Endehon; “Amen Haleluya, endehon Amen Haleluya

 Endehon Amen Haleluya, endehon Amen Haleluya”.

                                  --------- Mu s i k ---------

16.  Pajamot diri dohot Parsuruon :

(Pdt : Pandita; R: Ruas, Ntr: Natoras;  Rj,Nap: Remaja-Naposo)

Pdt.   :   Hamu angka nahinongkop ni Tuhanta, nunga di jalo hamu hata ni Debata na gabe bohal di partondion. Debata do mamillit hita jala marpadan Ibana dohot hita. Antong marpangalaho songon anak hatiuron ma hita angka na marpadan dohot Debata laho patuduhon holongNa tu ganup halak. Ai dilehon Debata do angka pasupasu na godang molo sai taulahon hataNa jala molo  sai  tatangihon Ibana.

R       :    Guru di Debata do hatuaonku dohot hamuliaonku, partanobatoan ni hagogoonku, marhaposan tu Debata do ahu. Ho do ale Jahowa Debata, Pangondian na mangondihon ahu. Diparmahani Ho do ahu jala dipasarisari Ho, asa unang marmara ahu. Hupuji ma GoarMu ale Debata.

Ntr    :    Tuhan, ajari hami patuduhon tiruan na uli na denggan tu ianakhonnami; ima parbue na sian HataMi. Sahat tu Ho ma Tuhan pardalanan ni rumatangganami, tau pujipujian di GoarMu na badia i.

Rj,Nap:  Masa muda adalah masa yang penuh kebahagiaan, keceriaan dan penuh masa depan, Namun kami tidak lepas dari pergumulan yang selalu menanti kami, terasa begitu berat kami hadapi, Pengaruh negatif dunia ini yang selalu mengincar kami. Begitu banyak pergaulan bebas kawula muda yang menjerumuskan kehidupannya, tetapi kami ingin diselamatkan oleh Tuhan agar kami dapat mempergunakan masa muda kami dengan penuh kebahagiaan. Kami bahagia oleh karena FirmanMu Tuhan, kami menginginkan FirmanMu bertumbuh dalam hidup kami.

Pdt   :  Molo dijou ho Ibana, alusanNa ma ho Sai dongananNa do ho jumpa hagogotan, paluaonNa ma ho, jala marmulia ho bahenonNa. Dungi dohononNa ma tu ho: “Sai pamahaponku ma ho sarimatua, jala pataridaho-nonKu tu ho hatuaongKu”!

17.  Tangiang Pelean + Pasupasu :

Bahan Jamita Minggu Ujung Taon Parhuriaon, 23 Nopember 2014

Jesus Do Haheheon Dohot Hangoluan

Johannes 11 : 25 – 26

     a.       Godang do halak na mandok , ia evangelium Johannes on disurathon uju mandapothon ujung ni abad na parjolo. Ditingki inunga lam rarat hhuria ditongatonga ni halak Jahudi dohot di halak angka na dihorong hellenisme (na sinaoran ni kebudayaan Junani). Domu tusi tujuan ni evangelium on ndang malua sian tugas marsending di portibi on, naung lam ungkap tu barita na uli i. Ia Johannes bindu 11 on ima sada barita hapunjungan, molo dipamanat muse tu angka bindu na mangihut, hira boi dohonon mangihuthon Johannes, si Lasarus na pinahehe sian na mate, hira i do tanda na parpudi jala na umbalga dipatupa Jesus andorang so passion. Ala ni i tung diondolhon evangelium on do joujou namangontang halak asa porsea di Jesus ( 20:31). Sada catatan na mansai ringkot do taida di si Johannes on. Sude sogo ni roha ni halak Jahudi naung adong hian martomu jala marsada tahi mandok mamunu Jesus siala halongangan na masa tu si Lasarus i. Alai sabalikna di pihak ni Jesus , salpu barita on digombarhon panurat Johannes do, na mangalangka nama Jesus manuju tu hamuliaonNa i ma parsilangon i. Di evangelium Johanneson umummna parsilangon manggombarhon hamuliaon ni Jesus do i. Lapatanna marhite silang i do dipasangap Ibana (ptds.7:39; 12:16,23). Jadi, dibahen i godang do angka barita dohot tanda halongangan ni Jesus na dienet panurat na martujuan paoshon roha ni jolma asa porsea di Ibana. Songon i do nang turpuk on marisi pandohan sian Jesus “Ahu do haheheon dohot hangoluan”, tangkas dipaihut dohot pandohan “Porsea do ho disi?”

     b.      Na marbonsir do turpuk on sian mula parsahiton na songgop tu si Lasarus iboto ni si Marta dohot si Maria na sian Betania. Manigor hatop do dipaboa tu Jesus siala tardok aleale ni Jesus do nasida na tolu, hea do di na sahali ro Jesus mandapothon nasida tu Betania, gabe dimiahi si Maria Ibana (Luk.10:38-42). Marhite i ma ro Jesus, alai nunga sanga salpu ianggo ngolu ni si Lasarus i didapot pola naung opat ari mate. Ro do si Marta manomu Tuhan i dung diboto haroro ni Jesus i, jala didok do: “Aut na dison HO, ale Tuhan”, manaringot ni asalpu in, “Ndang tagamon mate ibotongki!”. Laho manjalo hata ni si Marta na tumpol papuas na dirohana i, didok Jesus ma pandohan apulapul: “Na hehe ma ibotom!” Alai lobi sian apulapul do tahi ni Jesus mandok i, ai laho pasauthon i do Ibana umbahen na ro. Hape si Marta ndang tu hasasaut ni pandohan i ianggo na dijalo rohana, tu haheheon parpudi i do. Tupa diingot si Marta do poda ni Jesusmandok : “Ai di na ro tingkina begeon ni saluhut halak na diangka tanoman i ma soarana. Dung i ruar be ma...” (5:28-29).

    c.       Tu roha ni si Marta na marungkil jala na maol mangantusi i ro pandohan ni Jesus “Ahu do haheheon dohot hangoluan”. Pandohan on martujuan paboa na so holan hata sambing di Jesus mandok na ingkon hehe si Lasarus. Hatutuon ni haheheon i ma di diri ni Jesus sandiri. Ibana do na gabe jaminan ni haheheon. Didok si Paulus: “Ai anggo so hehe Kristus sian angka na mate, rumar ma jamitanami, laos rumar ma nang haporsaonmuna. Ai anggo si dipahehe angka na mate ndang tung hehe nang Kristus i” ( 1 Kor.15: 14, 16). Laho mangantusi tumangkas gogo ni haheheon ni Jesus i, di Padan na Imbaru adong ditaringoti manang piga tipe ni haheheon:  1) Haheheon ni daging , alai na laho salpu do tong na hehe i songon boru ni si Jairus, dolidoli na di huta Nain dohot si Lasarus; 2) Haheheon ni Kristus, na so olo salpu be (Rom.6:9); 3) Haheheon di bagasan Kristus marhitehite haporseaon manang ngolu na imbaru dibagasan Kristus (Kol.2: 12; 2 Kor.5: 17); 4) Haheheon na naeng ro di ari parpudi i, na manghorhon ngolu na manongtong di angka na porsea ( 1 Kor.15: 42, 52; 1 Tess. 4: 13-17), alai uhum saleleng ni lelengna di angka na so porsea (Joh.5: 29). Sian i nunga boi tangkas tarida hasurungan ni haheheon ni Kristus martimbangkon tipe ni haheheon na asing. Ndang hamatean  ujung ni sandok ngolu ni angka na porsea, hangoluan do. Holan Tuhan i do na boi tuk mamboan haheheon dohot hangoluan, jala holan angka na porsea di Ibana do na boi marhatubuhon i songon panindangion ni si Marta na mandok : “Ho do Kristus Anak ni Debata”.

    d.      Sude jolma na mangolu mangae na hansit dibagasan ngoluna tarmasuk ma hita angka siihuthon Kristus, nang pe sai daionta do angka na tonggi di parngoluon on. Alai habiaran ni jolma na jumotjot jala na umbalga ima mangadopi hamatean i. Boi masa doi manang andigan tingkina tu hita, alai unang ma mambahen hita lam gale manang paintophon haporseaonta di Tuhan i. Ingkon na tuk do hita marnida surung ni hasangapon ni Debata na naeng sipapataronna tu angka na porsea. Pangkirimon ni ngolu ni halak na porsea ndada di portibi on, ndang portibi on ujung ni ngolu ni halak na porsea alai hangoluan na saleleng ni lelengna di sambulo ni tondinta na di surgo i. Jala asa bongot hita tusi naeng do gomos tahaporseai na nidok Jesus tu si Marta i. Nang pe di portibi on dipangke Debata do angka jolma nang angka na asing laho marmahani hita, alai ndang terbatas holan na diportibi on pinarmahanNa hita, alai sahat do tu hangoluan sogot i. I do umbahen asa dipasahat Debata AnakNa na sasada i asa dapot haluaon dohot hangoluan na saleleng ni lelengna hita (ptds. Joh. 3: 16). Topet di Minggu on ima Minggu Ujung taon parhuriaon di hurianta HKBP, sai taringotan ni hurianta do angka ruas n huria naung jomolo sian hita. Jala diulaon i sai tabege do istilah “Mementomori”: ingot ari hamamatem, lapatanna sai marningot do hita angka naung parjolo sian hita, jala hita pe haduan ingkon dos do songon nasida manadingkon portibi on. Ala ni i tung andigan pe tingkina di hita dijou Tuhan i sai naeng ingot hita ngolunta on parsatongkinan do, ndang adong na manongtong na di portibi on. Ala ni i unang be mabiar hita di panjouon ni Tuhan i manang sadihari pe tingkina, naeng ma rade rohanta ala tarajumi do sai pinarmahanNa do hita marhite Patik nang Hata ni Debata asa gabe bohalta mangantusi sangkap nang dalanNa dipardanan ni ngolunta. Tuhan Jesus do parmahan na denggan i jala holan Ibana do Haheheon dohot Hangoluan asal ma porsea hita disi. Amen.

Bahan Jamita Epistel Ujung Taon Parhuriaon, 23 Nopember 2014

Jesus Do Haheheon Dohot Hangoluan

Hesekiel 34: 20 – 24  

     a.       Panurirang Hesekiel  ima sahalak malim na dipabangkit Debata gabe panurirang di habuangan Babel. Dohot do ibana diboan Raja Nebukadnezar tarbuang tu huta Babel rap dohot lobi hurang sampulu ribu halak Juda na asing uju i sian Jerusalem dii tingki ni raja Zedekia, andorang so dileksehon dope huta Jerusalem dohot Bagasjoro na disi taon 587 AK. Borat do ulaon ni si Hesekiel di habuangan i ala sai adong do angka panurirang pargapgap na sai paotootohon dohot manggugai haporseaon nasida. Dipabangkit Debata do ibana gabe panurirang tu angka na tarbuang i laho patolhashon sangkap ni Debata taringot tu nasida, asa unang sai hata ni angka panurirang pargapgap dipatangitangi nasida. Ala ni i ingkon mampu do ibana laho manogunogu bangso i mangantusi uhum na mangonai tu nasida, jala asa mananda nasida di dosa nasida maradophon Debata marhite na masa tu nasida i, Ingkon mampu do nang panurirang i huhut mamboan manang marmahani nasida tu pangkirimon di haluaon molo olo nasida paubahon rohana, mulak nasida marhaposan tu Jahowa jala tongtong tumangihon hataNa. Siala tugas na borat na songon i dipatudos Debata do si Hesekiel songon ‘parjaga’ ni bangso i

    b.      Ia Buku Hesekiel bindu 34 on jotjot do manaringoti parmahan di Israel dohot hajongjongan ni bangso i ditongatonga ni angka parmahan na denggan dohot na roa. Molo tajaha dijolo ni turpuk on dipaboa do do sikap ni parmahan di Israel; ndang dianturehon parmahan i be angka birubiruna. Holan dirina sandiri do dipingkirhirhon, ujungna mamparma angka birubiru i, jala na deba disoro angka binatang ni ladang i. Ndang bertanggung jawab nasida di angka tugas na sahat tu nasida. Angka parmahan na nidokna dison i ma angka raja ni Juda dohot Israel na so olo manangihon soara ni Jahowa. Ndang diulahon nasida tugas dohot tanggung-jawabna hombar tu tona ni Debata. Ujungna ditaban angka bangso na leban ma nasida. Tarbuang ma bangso i, marserak ma di manang na piga luat ni bangso na asing. Diuhum Debata do angka parmahan i. Ndang dilehon be tugas tu nasida. Debata sandiri ma na langsung bertindak manogunoggu birubiruNa i jala paluahon sian habuangan. Jadi hombar tu isi ni buku Hesekiel, na mamungka sian bindu 33 dapot idaon angka pangapulion dohot pangkirimon taringot tu pembangunan ni Jerusalem.

    c.       Turpuk on pajamothon ganup halak di ulaon dohot tanggung-jawab na pinasahat ni Debata tu ibana. Ndang boi neang roha di tanggung-jawab, lumobi molo tanggung-jawab i menyangkut ngolu manang tondi ni jolma, songon angka pemimpin manang parmahan ditongatonga ni huria nang ditongatonga ni masyarakat. Saluhut angka pemimpin dos do i dohot parjaga na tinaringotanna di turpuk on, na martanggung-jawab laho mangaramoti, mangondihon, dohot manogunogu saluhut angka na sahat tu ibana tu dalan hangoluan. Alai godangna i angka pemimpin di tingki on na paluahon diri sian tanggung-jawab, gariada jabatan manang tohonan na adong di ibana dipangke songon kesempatan sambing laho mangalului paruntungan dohot hasangapon tu diri.

    d.      Lam tahilala do ditingki on godang ni angka ulaon hajahaton, jala lam malo do halak manabunihon hajahatonna. Boi do i ala ndang apala sadia marfungsi angka badan manang lembaga pendidikan dohot ugamo mangalehon landasan moral dohot pangalaho na denggan siulahonon  ni ganup pribadi ditongatonga ni masyarakat. Nunga hurang angka sundut na tumua mambahen tiruan na denggan tu angka na umposo, tarlumobi laho maminsang angka pangalaho na jahat. Ai nunga jotjot semo batasbatas ni hajahaton dohot pangalaho na denggan. Alani uhum hasintongan pe nunga jotjot kabur nang di parnidaan ni angka halak na bertanggung-jawab di bidang hukum. Mamereng saluhut pangalaho dohot jorbut ni angka dosa na niula ni jolma i, sian sudut uhum hasintongan dohot hatigoran, ingkon uhum hamatean na ma na mangonai tu saluhut parjahat i.

    e.      Mauliate ma di Tuhanta marhite Presiden dohot Wakil Presiden na imbaru nuaeng naeng paturehon ngolu parbangsosonta marhite’Revolusi Mental’, tahirim ma mental ni bangsonta on lam tu dengganna. Asa lam moru pangalaho hajahaton ditonga ni bangsonta. Ndang dipasombu Debata hape bangsonta Indonesia on mengalami keterpurukan mental. Marsoara do Debata pajongjongkon hatigoran dohot hasintongan. Ibana do Debata na sai tongtong marmahani hita marhite angka naung pinillitNa i. Ndang dihalomohon Debata hamatean ni angka parjahat alai tumundalhon dalanna do. Jadi dison ma dipatuduhon angka na porsea dohot huria na manghaporseai Jesus Kristus do Raja na marmahani hita patuduhon sikap na bertanggung-jawab  laho palumbahon angka parjahat i asa dipauba rohana jala asa unang lalu uhum hamatean tu nasida ala ni dosana. Ai molo lemba hita nang huriaNa, tungguon ni Debata do sian hita tondi ni angka parjahat i na mate ala ni hajahatonna. Naeng ma pos rohanta di parmahanion ni Debata na satia paima hamumulakta, ndang holan di portibi on tahe hita pinarmahanNa alai sahat do tu ari sogot ima hangoluan na sonang sambulo ni tondinta ima paradeiso/surgo na gok hangoluan saleleng ni lelengna. I do umbahen didok Jesus di turpuk epistelta manang turpuk ari minggu on sian Johannes 11: 25-26 “Ahu do haheheon dohot hangoluan; na mangolu do na porsea di Ahu, nang pe mate ibana. Jala ganup na mangolu jala na porsea di Ahu, na so tupa mate ibana salelengnilelengna”. Amen.

Bahan Jamita Minggu XXII Dung Trinitatis, 16 Nopember 2014

Lam Jonok Nama Ari Ni Tuhan i

Sepanya 1: 7, 12-18

    a.       Nunga lam merus, jala lam dao kualitas ni parugamaon di tongatonga ni halak Juda dohot Jerusalem, sabalikna lam tu jibuna do parsombaon tu debata baal (ptds. 2 Raja 16:3-4). Sian na masa i diparrohahon Panurirang Sepanya ima sada pangalaho na manundalhon haporseaonna tu Debata Jahowa. Disuru Debata do angka panurirang-Na laho pasahathon Hata-Na tu halak Juda, alai ndang ditangihon halak Juda Hata ni Debata na pinasahat ni panurirang Nahum dohot panurirang boruboru Nai Hulda ( 2 Raja 22:14-17)asa adong hamubaon ni roha, jala asa unang masa uhum ni Debata mangonai tu bangso i. Alai dipatangkang bangso i do rohana, diulahon do sogo ni roha ni Debata marhite na manomba ganaganaan (debata baal). Bangkit do panurirang Sepanyaa (anak ni si Husi) uju di angka ari  ni si Josia laho pasahathon lumbalumba tu Juda taringot tu uhum ni Debata na so haotapan be. Di panurirangon ni si Sepanya on, dilumbahon do nang taringot tu “Ari ni Tuhan i (ima ari pangarimason, hagogotan, pardangolan partabanon, hamagoan, haholomon, lengsehononNa ma portibi on dohot angka jolma (Sep.1:2,15,18).

     b.      Ndang adong na umboto andigan haroro ni Tuhan i, alai turpuk on naung patauhon tu hita aha na masa dipatupa Debata ditingki haroro ni Tuhan i di portibi on. Nang pe ndang apala singkop dipatorang di Buku Sepanya on alai adong pangantusion nanaeng sipapataron Panurirang Sepanya tu hita ima taringot nanaeng pamasaon Debata sogot ditingki ujung ni partingkian. Adong do dua sifat ni ari parpudi i molo tajaha sian bindu 1 on; ima ari parpudi na bersifat umum (1;2-3), ima uhuman tu sandok portibi on na somal didok ‘kiamat’, akhir jaman. Dipaboa do na masa di akhir jaman i na malengse ma sude jadijadian ni Debata, ingkop siaphononNa saluhut pangisi ni sisik ni tano on dohot angka hasusaan bolon (ay.15). Angka jadijadian ni Debata ingkon salpu do sudena, angka aek dohot udara naung tercemar, sude na di portibion ingkon mangae rimas ni Debata. Namangihut ima Ari ni Tuhan na bersifat khusus na masa tu bangso Juda, siala naso satia bangso i maradophon Debata (1:4) naung manimbil rohanasida sian manomba Debata gabe tu debata baal, dungi masa angka na mangasahon gogo, korupsi, dohot harorangon. Jala masa ma uhuman ni Debata songon ari ni Debata tu bangso Juda marhite habuangan ni bangso i tu Babel. Mansai sogo do roha ni Debata mida pangalaho bangso i, di somba do Debataa Jahowa alai huhut do disomba debata ni ugamo na asing. Jadi ndang holan portibi on uhumon ni Debata alai dohot do secara khusus bangsoNa i. I do umbahen didok di 1 Petrus 4: 17 Ai nunga jumpang tingki ni uhum madabu, mamungka sian bagas ni Debata. Alai molo jumolo tu hita, dia ma ujung ni angka na so mangoloi barita na uli na sian Debata?

     c.       Ala ni i dipaingot do dibagasan turpukta on, khususna na menarik di ayat 7 i; “Hohom ma hamu maradophon Tuhan Jahowa! Ai jonok na ma ari ni Jahowa! Ai nunga dipadiri Jahowa sada  pelean sipotongon, nunga diparbadiai halak na piniona i.” Boha do hita angka siihuthon Kristus songon bangso ni Debata naung pinarbadiaan ni Kristus hohom maradophon Tuhan Jahowa ? ima marhite ngolu na marhadaulaton mangasahon Tuhan i dibagasan ngoluna, sai tongtong ingot martangiang na hohom maradophon Tuhan i. Diminggu hurianta on marpelean do hita tu Kategorial Ama ni hurianta HKBP, naeng do tong manungguli haringgason ni ama ni huria nunga sahat didia ? molo sahalak uluan ditongatonga nii keluarga naeng ma dipatuduhon sahalak ama dirina na tau mangondihon angka iankhon nang pardihutana dohot keluargana dibagasan tangiang tu adopan ni Debata. Naeng ma dipatuduhon ama ni huria na ringgas manguluhon partangiangon ditonga ni bagasna be. Ai adong dope ama na so barani manguluhon tangiang ditonga  ni parpunguan keluargana. Naeng ma angka ama ni hurianta HKBP paradehon diri dohot keluargana laho manomunomu haroro ni Kristus na paduahalihon i. Songon topik ni minggunta “Lam Jonok Nama Ari Ni Tuhan i” Naeng ma hobas angka ama ni huria mambohali angka keluargana asa lam pajonokhon diri tu adopan ni Debata marhite tangiang na hohom diadopan ni Debata. Amen.

Bahan Jamita Minggu XXII Dung Trinitatis, 16 Nopember 2014

Lam Jonok Nama Ari Ni Tuhan i

1 Tessalonik 5 : 1 – 11

     a.       Hona lele do Apostel Paulus sian huta Tessalonik, hira hira taon 50 AD dipardalanan na paduahon. Alai dipudian ni ari musediutus ma si Timoteus mamereng huria i, jala sian si Timoteus ma diboto Ap.Paulus barita ni huria i dohot sude parsorion nasida. Domu tu pangalaho i ma disurathon ibana surat on na marisihon poda manang sipaingot na praktis, asa mangolu ruas i hombar tu lomo ni roha ni Debata marhite napatuduhon parange na tama di parsaoran ganup ari. Tarlumobi di pardongan saripeon molo pe ingkon mangadopi angka poda na lipe na mandok ndang ringkot be portibi  on ala naung jonok ari haroro ni Tuhan Jesus na paduahalihon (eskhaton), ima na masa sogot (parousia) . Gabe godang pangalaho ni ruas Tessalonik manghorhon hasosogo di na so tumanda Kristus i. Hinorhon ni angka parsorion na manosak ima Apostel Paulus manurathon sipaingotna on.

      b.      Manat do Apostel Paulus molo taringot sadiaharina, ndang adong dibahen ibana tingki (Kairos) na tontu. Alai didok ibana do songon panangko borngin do harorona, ndang adong jom na tontu dohot tingki na pasti. Dilehon ibana do angka konsiderasi maang sipingkiron gabe pertimbangan na tama parrohahononhon di haroro ni Kristus i. Molo didok halak dame do mara so ada, dung i songon pambebeon tu ina na gabegabean. 

      c.       Dipaingot Apostel i do huria i songon anak hatiuron, so tung hatiuron ari, sai dirimpu holom dope hape nunga torang ari, ala lalap holan na manggohi sangkapsangkapna na jahat i. Angkup ni i: “So tung tarpodom, lalap (tidur pulas), ndang magira so tu dia, hira so adong na mangeak. Marlehaleha, bergolekgolek sambing do manggohi hagiotna jala lalap menikmati ngolu portibi on (mabuk).

   d.      Alai halak na sintong paimahon haroroni Kristus. Naeng ma: Torang rohana, sadar siuman, mangolu dibagasan haporseaon, marholong ni roha, marpanghirimon. Molo songon i ndang be na pinadiri hita asa gabe sirimasan, alai asa tung dapotan haluaon do marhite Tuhan Jesus Kristus. Naporlu; beha do hita asa boi rap manang sangkambona dohot Kristus (Rom.6:5). Jala molo dung songon i nunga singkop saluhutna, gabe dohononta ma: “AI namangolu pe hita, mangolu di Tuhan i do, jala ia  mate pe hita, mate di Tuhan i do. Asa mangolu manang mate pe hita, tong do di Tuhan i hita (Rom.14:8).

    e.      Ala ni iringkot ma na rap masipaingotan jala masipauliulian, unang lalap di hata, dohot na paimahon boti hita so mangula, mannag gabe partuktuhan tu na asing. Tongtong do ingkot radot hita di angka ulaonta, songon na nidok Dr.Martin Luther : walaupun besok hari kiamat saya tetap menanam pohon apel dan membayar hutang hutangku.

    f.        Ala ni i di na lam jonok ari ni Tuhan i; taulaon ma angka na denggan tu dongan; naeng ma masipaingotan jala masipaulian dibagasan holong ni Kristus i. Amen.

Bahan Jamita Evangelium Minggu XXI Dung Trinitatis, 9 Nopember 2014

Boan Ma Parpalitoan Dohot Miak

Mateus 25 : 1 – 13  

     a.       Dipatudos Tuhan Jesus do harajaon banuaginjang i tu sampulu anak boru na borhat manomunomu pangoli, masiboan parpalitoanna be. Tudosan on, sian hasomalan siganup ari na adong di halak Jahudi do dibuaat Tuhan Jesus. Molo di halak Jahudi ndang ditontuhon ari dohot jom haroro ni pangoli mangalap oroanna, holan di buhul do dibagasan sada minggu. Ala ni i boi do dipaima dua manang tolu ari manang opat ari asa dapot pesta i. Jala boi do arian manang borngin songon na di turpuk on, hombar tu tingki ni pangoli. Ala ni i ingkon tangkas do pangaaradeon i atik tukng sadihari ro, so tung adong na so parsidohot tu ulaon i. AI tung gok las ni roha do pesta sisongon i di halak Jahudi. Saluhut do mangalehon roha dohot tingkina rade paimaimahon pesta i, di haroro ni pangoli i mangalap oroan. Tudosan i ma dipangke Tuhan Jesus manggombarhon haroroNa paduahalihon di bagasan harajaonNa mardongan hasangapon. Na ingkon ro do Ibana alai ndang taboto sadihari tingki dohot ariNa, dibahen i ingkon marsitutu hita mangarade managam haroroNa. Songon dia ma na patut pangaraadeon i ?

    b.      Tarbagi dua do parrohaon ni anak boru na sampulu on, lima sian nasida digoari do na pantas marroha i ma na mamboan lampuna dohot miak di ingananna; alai na lima nari na oto do, ndang mantat miak diboan palitona. Ianggo angka na marroha i, singkop do pangaradeonna, ala ni i ndang humasussa nasida manigati sipangkeonna, uju ro joujou di tonga borngin i mandok: “Na ro ma pangoli i, hehe ma hamu manomunomu”. Joujou las ni roha do joujou i, ima barita na uli na manungguli angka na modom asa hehe tu hangoluan Na rap tarpodom do nian angka anak boru i dibahen lelengna paimaimahon, ala so ro pangoli i. Alai ia dung ro pangoli i, anggo angka na marroha i, ditomu ma pangoli i, gabe bongot ma nassida hobaas tu hasampuran rea i. Alai angka na olo i, laho do manuhor miak gabe parpudi nasida ro dung tarsossak pintu ni sampuran rea i. Sai dituktukhi nasida pintu i mangido assa diungkap, alai alus na koras nama na ro mandok: “Ndang Hutanda hamu!” Songon i ma diharoro ni Tuhan i paduahalihon, di ari parpudi. Di haroro ni Tuhan i marujung ma partingkian. Ndang masa be disi marpainte manang marsidalian. Ingkon rade do sude hehe jala humalaput laho manomu. Diujung ni tingki i, nunga tutup pintu parasian, ndang adong be na boi tarbahen disi. Ndang boi be mangido pangurupion dohot asi ni roha, ai nunga salpu tingki mangarade, tingki parasinirohaon. Tu angka jolma na so parade dirina di tingki on, i ma na so manggohi miak ni haporseaonna, ndang tau i parsidohot di las ni roha na pinarade ni Tuhan i. Ndang boi manginjam Haporseaon (“tu panggadis ma hamu laho, sotung annon hurang di hami”) ingkon ugasanta sandiri do i. Ala ni i unang adong hita songon halak Jahudi na mandok: “Anak si Abraham do hami, ndang ringkot di hami na paubahon roha”. Unang adong manghilala ala naka ni pandita, gruru huria, sintua, manang pinompar ni Guru Sending gabe otomatis ma i malua. Ndang! Ingkon pribadi do namardabudabu (bertanggungjawab) tu Tuhan i. Jala Holan angka na pantas marroha do na tau gabe sauduran di halalas ni roha rap dohot Tuhan i. Di Mateus 7: 24, didok: “Na umbege hatangKi jala diulahon, sipatuduson ma i tu halak na marroha, na paulihon bagasna di ataas ni batu mamak. Halak na marroha i ma na olo manangihon hata ni Tuhan Jesus jala mangulahonsa”. I do pangaradeon na tutu. Dipangido Tuhan Jesus do hita asa mangarade diri, tangkas manangihon jala mangulahon hataNa. Taruli tumpal hangoluan, las ni roha na manongtong do ganup na manangihon jala mangulahon hata ni Tuhan i.

    c.       Pengalaman ngolu siganup ari do dibuat Tuhan Jesus tudosan on, sian pengalaman na somal jumpang di kebudayaan masyarakat, i ma las ni roha ni pangoli dohot oroan. Naeng antusanta disi, na ingkon maralus do ganup oroan tu pangoli. Huria i do oroan ni Tuhan Jesus, ala ni i naeng tongtong rade hhuria i, managam haroro ni Tuhan i di panghobasionna, di jamitana dohot di parsaoranna. Alai ndang holan tu huriaNa joujou tu pangaradeon i, tu ganup hita do lumobi diigil pangaradeon na tangkas. Molo ro Tuhanta i, ganup hita ingkon maralus tu Ibana hombar tu tanggungjawab dohot pangulaonta be. Ndang adong be disi na boi marsali, mangido pangurupion tu dongan, tu sisolhot manang tu natoraas. Ganup halak ingkon maniop haporseaonna be. Ala ni i jaga ma hita mamareso diri asa tongtong marsihohot haporseaonta di ganup tingki.

     d.      Di angka na deba ndang dijaga rohana nang pambahenanna, tarlumobi na mambuat pembelaan tu dirina. Boi do dibuat secara alkitabiah, ai pintor dikutip do na tarsurat i: “AI parjahat na di siamun ni Debata i pe songon i do. Apala di silang i pe ibana bertobat. Otik do didok: “Ale Tuhan, ingot ahu ia dung sahat ho tu harajaonMi. Hape pintor dialusi Jesus do ibana: “Sadarion do ho rap dohot Ahu di Paradeiso.” Jadi laho mate pe iba asa pauba roha, asa mar-Tuhan, ninna nasida....ianggo nuaeng holan marhuria ma jolo, asal ma terdaftar jolo iba....ninna. Tutu do alasan i, manang andigan pe hita tutu bertobat, memang laos tongkin i do hita malua, pasti jangkonon ni Jesus do. Sarupa do jambar ni na masuk pukul 9 manogot dohot na masuk pukul 5 botari. Alai persoalan, jala i do na umborat, ima; diboto ho do andigan ho mate? Adong hita on na umboto andigan ibana mate? Ianggo na asing, andigan ho mamora boi do botoonmu, andigan hita marpahompu, manang gabe sarjana, manang gabe manajer, gabe direksi, boi do doprediksi, jala taparade. Alai tung ise sian hita ndang adong na umboto andigan ibana mate, manang andigan haroro ni Tuhan i. Ala ni i sipasidingontaa do roha na mandok: “Magira tudia?”

     e.      Dilumbahon Tuhanta do taringot tu haroroNa paduahalihon, na so diboto  manang ise ari dohot sadiharina . Ndang dilehon Debata pamotoan i tu hita, alai adong do naeng ajarhononNa tu hita marhite i, i ma asa tongtong hita managam Ibana jala manghirim hitamardongan hasabaron. Ingkon sabar do hita ganup ari di portibi on, paimahon Debata mangula di ngolunta, jala ingkon rade do hita mangaloas Ibana pasingkop las ni rohanta, unang mintop panghirimonta. Torop do jolma di tingki on naung gale panghirimonna, ala leleng dipaimima angka alus ni tangiangna. Torop musedo angka na gabe marsidalian, ndang mangalehon alus tu joujou ni barita na uli. Torop dohot marlembalemba ndang mangargahon tingki manang lalap ndang parduli, gabe marsalpuan angka tingki i, so diradoti hata ni Debata, jala ndang diulahon lomo ni roha ni Debata. Atik sadihari ro tingki panjouon ni  Debata tu hita, ndang sanga be disi marsidalian. Molo mangolu pe hita nuaeng, ima tingki paimahon, tingki paima giliran. Jala on ma na maol i, menunggu adalah pekerjaan yang sulit, hansit do na paimahon. Ai songon panangko borngin do harorona, holan Ama i do na umboto (1 Tess.5:2; Mark.13:32; Mat.24:14). Ala ni i, hobas ma hita mangarade ganup ari, paubahon halembaon, halosohon dohot hatangkangon. Alai, tahasiholi ma haroro ni Tuhan i, na ingkon ro di bagasan harajaonNa manjou hita tu hasonangan. Unang mansohot panghirimon i. Galak ma tongtong palito haporseaon i di hita marhite parbue di pangulaonta  siganup ari (ptds. Am.5:18-24)Amen.