Sungguh Yesus Adalah Anak Allah
Mateus
27: 45 – 56
a.
Huria ni Tuhanta na hinaholongan dibagasan Jesus Kristus.
Nunga 70 ari hita ditogutogu jala dipersiapkan laho manjalo puncak ni peristiwa
panaonon ni Jesus na gabe ondolan parningotan Hamamate ni Tuhan Jesus, jala
ganup taon do i tapatupa di huria. Sude do hita mandok na tung mansai parir
diae Tuhan Jesus laho manghophop dosa ni jolma. Patut do nian ingkon burju
jolma i mandapothon Tuhanna ganup ari, na ingkon tarida marhite pangalahona
dohot haoloonna manaon laho manghophop hasintongan i. Alai kenyataan ndang
apala songon i. Torop dope marpangalaho songon si Latus na lebih mementingkan
jabatanna, kedudukanna martimbanghon hasintongan i. Gariada torop do halak na
olo gabe saksi palsu asal ma boi dapotna keinginanna, nang pe molo disulingkit
mansai maralo do panindangionna i tu hati nuranina. Dao ma nian angka pangalaho
Latus sian huria ni Tuhanta. Dao ma nian sian huria angka na mangalului
hasangapon dohot penghormatan sambing, lumobi sian angka naposoNa na marhobas
di huria na menganggap dirina tumimbo sian sude bahkan na mambahen dirina
tumimbo sian ruhut-ruhut ni huria.
b.
Huria ni Tuhanta; Jesus sandiri do na mangusung silangNa
i sian inganan panguhuman ni Latus sahat tu Golgata. Ingkon Ibana sandiri do na
manuhuk penderitaan i, ndang tarlehon Ibana i tu halak na asing. Ala ni i
ingkon tangkas do dijamitahon di huria na so tarjalo hita poda na asing sian i.
Ndang tarjalo hita penafsiran ni Gnostik na mandok: si Simon Kirene do mate di
hau pinarsilang i manggantihon Jesus, dohot ajaran ni Islam na mandok: Sahalak
sian sisean i do mate di silang i ai disarupahon Debata do bohiNa tu Jesus (manang
di nasida Nabi Isa). Nang pe tangkas tujuannasida laho menghormati Jesus, alai
di haporseaon ni halak Kristen, marhite Silang i (hamamate ni Jesus) do ditobus
jala dijanghon Debata jolma pardosa. MudarNa na durus di Golgata manguras dosa
i, jala pergumulanNa laho mangadopi silang i laho manghamonanghon parsuruon ni
Debata. Ingkon roroonNa do jolma sian huaso ni sibolis. Ala ni i, molo tung pe
haotoon hata na taringot tu silang i di deba jolma, alai di hita na porsea,
hagogoon ni Debata do i (1 Kor. 1:18). HaradeonNa manuhuk silang i gabe tiruan
tu sandok jolma na naeng mangihuthon Jesus. Manang ise na naeng gabe siseanNa
ingkon manuhuk silangna (Luk. 14:27). Debata sandiri mangurupi jala margogoihon
angka na porsea mangulahon i.
c. Huria ni
Tuhanta na hinaholongan. Tuhanta Jesus Kristus do Raja na manggomgomi sude
portibi on (alam semesta). Songon topik: TUTU DO JESUS ANAK NI DEBATA (Sungguh
Yesus Adalah Anak Allah); Ingkon baritahononta do harajaonNa i tu sandok
makhluk marhite na olo hita gabe sitindangi huhut pelaku (Siulahon) ni hataNa.
Hombar tu angka perubahan dohot perkembangan ni partingkian on lam godang do
tantangan na ingkon adopan ni Huria. Lam torop do nang angka usaha laho manegai
huria i asa unang margogo panindangionNa. Boi do idaon hira na talu huria i
sangombas. Tuhanta Jesus sandiri mandok na ingkon manaon angka siseanNa, songon
Ibana naung manaon pardangolan i. Ndang sumurung sisean sian Guruna. Lapatanna,
molo manaon Tuhan Jesus, na boi masa do i nang tu angka siseanNa. Panaonon ni
sisean i ma laho mempertahankan manang manjamothon haluaon naung pinatupa ni
Jesus, ndang laho patupa haluaon i. Nunga dipatupa Jesus ulaon paluahon jolma
jala dipasahat i marhite asi ni rohaNa. Nuaeng ingkon jamothononta do i jala
baritahononta asa lam torop halak na dohot marsaulihonsa. Ala ni i molo
tapatupa ganup taon Ulaon dohot Punguan na balga laho marningot Hamamate ni
Jesus, na dipaingot do hita asa tongtong hot jala togu haporseaonta tu Ibana
jala hobas laho manghatindanghonsa di portibi on. Ganup na porsea di Tuhanta
Jesus nunga dapotna hangoluan na manongtong i nang pe di portibi on dope ibana.
Alai digenapi ma haluaon i di haroroNa mangalap angka na porsea i. Laho
margogoihon hita manghangoluhon dohot manghatindanghon i dijou ma hita asa
parsidohot tu Ulaon na badia i. Amen.
