Jamita Evangelium Minggu ESTOMIHI – 2 Maret 2025

 

“Papatarhon Sondang Hamuliaon Ni Jahowa ”

(Menyatakan Cahaya Kemuliaan Tuhan)

2 Musa 34: 29-35

 

a)       Huria ni Tuhanta nahinaholongan dibagasan Jesus Kristus. Molo taparrohahon naueng angka na mamahe badak manang skincare holan sada do na tnujuna ima asa bontar bohina manang pamatangna. Marlumbalumba do angka ragam ni produk ni kulit na bermunculan nuaeng on hinorhon ni torop jolma asa lam bontar. Istilah nuaeng semakin glowing ninna. Molo so glowing manang muka cerah didok do aura maghrib (holom, rotak jala ndang terurus). Ima gombaran ni portibi on na sai manghasiholi dohot holan manghalomohon na bontar, na bersinar, na cerah dohot glowing, hurang tarjalo rohana do molo roa, holom, golap, jala dursunon. Alai dihita na hinaholongan ndang parduru i na rumingkot alai parbagasan i do na ingkon menyala songon na nialaman ni si Musa di bagasan turpukta on. Na sian roha parbagasan ima haporseaon na togu di Debata manghorhon sondang hamuliaon sahap di ibana.

b)      Nunga mansai leleng si Musa marsaor dohot Debata di dolok Sinai ima 40 ari, so pola mangan dohot  minum. Marsinondang do bohina diida bangso Israel. Ndang si Musa mandok na marsinondang bohina alai halak Israel i do na marnidasa ala ndang apa disadari si Musa i hian dope. Dung pajumpang ibana dohot hamuliaon ni Debata-songon na nidok ni si Paulus di epistel i; gabe dipauba Debata do rupana gabe tudos tu rupa ni Debata. Nang pe tutu ndang apala sadia dope i martimbanghon hamuliaon na songgop tu Tuhan Jesus di Luk.9:29 na mandok: “mimbar ma rupa ni bohiNa, jala marlinanglinang ma parabitonNa.”

c)       Huria ni Tuhanta na hinaholongan dibagasan Jesus Kristus, dipangid Tuhan Jesus do nang hita asa dohot marsinondang, ai didok Tuhan Jesus do: “Hamu do panoandang ni portibi on.” Tugasta di portibi on ima laho mamboan sinondang ni Tuhan Jeus, Panondang Bolon i. AI nunga gok haholomon tano on jala hagolapon angka bangso. Alai taboto do, ndang adong kemampuanta laho marsinondang, ai gok dosa do nang hita. Boha ma asa boi hita marsinondang, ingon olo ma hita songon si Musa on, na daulat roha, gabe olo Debata paadopgon sinondang ni bohiNa tu ibana, gabe boi ibana marsinondang. Lehonon ni Debata do sinondangNa i molo daulat rohanta marsomba di joloNa. Kesalehan yang sungguh-sungguh akan membuat muka kita bercahaya memancarkan kemuliaan Allah. I do ala ganup sidung hita marsomba tu Debata tarlobi di ari Minggu i, sai tajalo do pasupasu sian Debata na mandok: “Disondanghon Tuhan Debata ma bohiNa tu ho, jala asi ma rohaNa mida ho; didompakhon Tuhan Debata  ma bohiNa tu ho” (Tuhan menyinari engkau dengan wajahNya; Tuhan menghadapkan wajahNya kepadamu). Molo tahapadothon marhadaulaton, lehonon ni Debata ma sinondangNa i, gabe marsinondang ma bohinta na boi idaon ni torop halak.

d)      Alai adong do halobianta sian Sirael. Ai holan si Musa do di nasida na boi pajumpang dohot Debata paadop bohi; ianggo na asing, holan marhite ombun manang ronggur dohot lalo na mambahen mabiar do (menakutkan). I pe, ingkon huphupon ni si Musa ma bohina ala mabiar bangso i. Alai anggo hita, nunga diungkap Tuhan Jesus sude panghuphupi i. Nunga bebas hita manghatai paadopadop bohi tu Debata, boi do hita martangiang tu Debata manang andigan pe, di inganan dia pe. Molo taradoti parjumpangan na songon i, lehononNa do di hita sinondangNa. Idaon ni halak  ma bohi ni Tuhan Jesus di bohinta, songon nidok ni halak Calcutta tu Bunda Teresia : Diwajahmu kulihat wajah Yesus.” Dapot hita i molo olo hita paadophon dirinta ganup tingki tu Tuhan Jesus Panondang Bolon i. Bohi na marsinondang na songon i ma na boi mamboan las ni roha tu halak na marsak di humaliang hita,  mamboan/paulakhon semangat tu angka nanaeng mandele dohot na galau ala ni parsoalan ni parngoluon on.

e)       Huria ni Tuhanta, laos ima mangalehon wibawa tu hita. Ai sinondang ni bohi ni si Musa do gabe kredensi, surat hatorangan, stempel dohot sk ni Debata na boi dijaha Israel. Gabe tangkas ma di nasida, ise do si Musa, paboa na tutu si tutu do ibana nasinuru ni Debata. Molo dilehon Tuhan Jesus sinondangNa tu hita, jala mian sinondangNa i di hita, gabe hormat ma halak tu hita jala longang. AI marhite i do diida nasida, na Debata na tutu situtu do Tuhan Jesus na tahaporseai i, songon halak marnida si Petrus dohot sisean na parjolo i (tajaha UlAp.4:13). Ala ni itung taradoti ma habadiaon (hidup kudus), asa boi marsinondang hita idaon ni halak. Endenta mandok di BE no. 720 BE 720 NAENG MARSINONDANG NGOLUNGKU. “Naeng marsinondang ngolungku, diigil Jesus i, Manang di dia pe ahu, tongtong huingot i. Tiur marsinondang, i do ni igil ni Jesus Tongtong marsinondang panondang do au tutu.”

f)        Huria ni Tuhanta, ndang apala disadari si Musa na marsinondang bohina. SI Aron dohot Israel do na marnida. Dung i ditutup nasida ma bohina. Aha do lapatan ni i di hita ? Diajari do hita, molo dilehon Debata ekhususan di hita unang ma tahaginjanghon. Adong do penafsir manggoari on songon penyembunyian yang terpuji. Sude kemampuan, haboion, halobian ingkon patunduhon manang tabunihonon  do i tu toru ni tangan ni Debata. Lam godang dilehon Debata di hita angka halobian, ingkon lam unduk ma rohanta. Paloas ma haak na asing marnida i, alai ianggp ho, unang paidaida i, unang paingotingot, unang gabe ginjang ni roha i di ho. Didok penafsir Mathew Henry : “Kekudusan ankan mengudang penghormatan. Tetapi perasaan berdosa membuat orang menjadi takut terhadap sesamanya, walau sebenarnya dia adalah berkat bagi mereka” Ala ni i, tung taradoti ma habadiaon ni Debata, asa dilehon Debata sinondang hamuliaonNa i di hita. Marhite i gabe sinnondang ma hita tu saluhut halak. Amen.