Jesus Do Anak Ni Debata Jala Raja
(Yesus Anak Allah Dan Raja)
Johannes 1: 43 – 51
1)
Hamuna
nahinaholongan dibagasan Jesus Kristus ! Tahamuliatehon dope pardalanan ni
ngolunta sian taon na salpu 2023 bongot hita tu taon na imbaru on 2024, ndang
taboto dope aha na naeng masa diadopanta, songon na manatap dompak ata ni dolok
do hita. Sai ta tatap pe dompak atas dolok i, alai laos so taboto do manang na
angka aha na masa disi. Alai dung tadalani, tanangkohi dolok i, taida ma
sadasada na boi parrohahononta, jala taboto ma manang olat didia na boi idaonta
diatas ni dolok i. Ala ni i diapoi turpuk jamita on hita asa ro ma hita marnida
Jesus Mesias na naung ro i, asa Ibana ma na manogihon hita di dalan sidalananta
asa boi tiur pardalananta di taon 2024 on jala idaonta dohot hamuliaon ni
Tuhanta i. Topik ni jamita: Jesus Do Anak ni Debata jala Raja.
2)
Dung mamungka
mangula ulaonNa Jesus di tano on, siseanNa do parjolo dipabangkit Ibana.
Mangihuthon surat ni si Johannes on dipaboa si Johannes dohot si Andreas do na
parjolo ro mangihuthon Tuhan Jesus. Didok si Johannes Pandidi tu nasida
taringot tu Jesus: “On do Birubiru ni Debata na mamorsan dosa ni portibi on.”
Gabe diihuthon nasida ma Jesus, didok ma tu Jesus: “Rabbi (guru) didia do Ho
sorang?” Dung i didok Jesus ma tu
nasida: “Ro ma hamu, asa diida hamu.” Olat ni i rap ma nasida dohot Jesus. Dung
i pajumpang ma si Andreas dohot donganna saama i ma si Simon, didok tu ibana:
“Nunga jumpang hami Mesias i (astuanna Kristus). Gabe diihuthon ma Jesus.
Dibahen Jesus goarna si Kepas, astuanna:Batumamak; Petrus. Dung i jumpang Jesus
ma muse si Pilipus, didok ma tu ibana: :Ihuthon ma Ahu.” Dapot si Pilipus ma si
Nathanael didok ma tu ibana: “Nunga jumpang hami Ibana, na nidok ni si Musa
jala na pinaboa ni angka panurirang i, i ma Jesus na sian huta Nasaret.” Dung i
didok si Nathanael ma : :Tung tarbahen ma ro na denggan sian huta Nasaret ?”
Jadi didok si Pilipus ma: “Ro ma ho marnida!”. Bulus do alus ni si Pilipus.
Langsung marnida Jesus na sian Nasaret i, asa ibana manontuhon haporseaonna di
Mesias naung ro i. Tingkos do cara berpikir ni si Pilipus, Ai dung tumpol bohi
ibana dohot Jesus, jala dibege hata ni Jesus, didok ibana ma tu Jesus:
“Gurunami. Ho do Anak ni Debata! Hodo Raja ni Israel !. Nunga tangkas taida di
turpuk on, parnidaon dohot panandaon di Jesus Anak ni Debata i ma
Mesias-Kristus i, na berkesinambungan do tabereng sian si Johannes Pandidi tu
si Andreas dohot Johannes anak ni si
Sebedesu, sian si Andreas tu si Simon Petrus. Sian si Pilipus tu si Natanael.
Songon i do marudutudut, langsung Tuhan Jesus marsuru siseanNa, sisean
mamaritahon tu liat portibi on, sahat tu Eropa, tu Asia, nang tu tano Batak, tu
hita sandiri, tu ahu, tu hamu. Nunga taida jala tahaporseai Ibana do Raja na
miniahan ni Debata na boi manaluhon harajaon ni sibolis. Ala ni i sai ro ma
hita marnida Ibana, di Huria i, bagasNa na badia i parpunguan marparsaoran
dohot Tuhanta marhite Hatana na badia i.
3)
Na sun do
Mesias i. Saluhutna diboto Ibana do, so adong na huphup di Ibana. Beha
pangihuthon ni si Johannes dohot Andreas di Ibana diboto do umbahen na humusor
Ibana manungkun nasida. Aha do na noluluanmuna ? Songon na terperogok do sisean
i, ai ndang tagamon rohanasida sungkunon ni Jesus nasida. Gabe sungkunsungkun
do didok nasida. Alai nang pe songon i, diboto Jesus do pingkiran nasida
umbahen na bulus didok Jesus ma: “Ro ma hamu marnida”. Gabe diihuthon nasida ma
Jesus. SI Petrsu pe diboto Jesus do rohana dohot ujung ni haporseaonna, nang pe
marparungkilon, alai monang do di ujungna umbahen na didok tu ibana: “Si Kepas ma
ho goaron, astuanna: “Batu mamak: Petrus”. Si Nathanael pe diida Jesus do,
umbahen didok tu ibana: “On do sada halak Israel na tutu, na so marpangansi
dibagasan. Didok si Nathanael mangalusi Jesus: “Sian dia ditanda Ho ahu?”
Dialusi Jesus do ibana: “Huida do ho uju di toru ni hau ara i ho andorang so
dijou si Pilipus i ho.” Aas sude do diida jala diboto na di bagasan roha ni
jolma. Rohanta pe ganup ditanda Tuhanta do, diboto do manang aha dipingkiri
rohanta, aha natahatai, aha na tapatahitahi, aha na taholsohon, aha na
tahatahon, atik na marpartahanhon haporseaonta di Ibana do manang na ta insahi,
murtad do hita sian Ibana manang ndang, diboto Tuhan i do i. Ndang pola pangke
siasat, matamata, alat penyadap suara Ibana manang mamahe cctv. Nataula na buni
dibereng do i. Tung sura martabuni hita di sada liangliang na so hea dibolus
jolma, manang di sabilut bosi na so boi tembus tu si cahaya manang radar pe,
alai ianggo Tuhanta diida do hita manang aha nataula disi. Molo songon i do
hape tajom dohot tinggil ni parnidaan dohot parbinegean ni Tuhanta Jesus,
tagonan ma taihuthon Ibana jala tapasiding ma nasa dosa manang angka ulaon na
maralo tu lomo ni rohana. Tagonan do hita gabe donganNa unang na apala alona
manang musuna, Mesias-Kristus Raja ni angka raja jala Tuhan ni angka tuan, ima
Rajanta saleleng na mangolu hita di tano on.
4)
Sonang jala
pos do rohanta mandalani sidalanan dohot mangulahon nasa siulaonta. Ai Ibana ma
partoginta di jolonta. Ndang tagamon lilu, susa hita molo Ibana partoginta di
taon 2024 on. Sai diihutihut pamereng ni Tuhan i do angka na hinaholongan ni
rohaNa manang na tu dia pe laho mardalan. Didok Ap.Petrus do: “Ai tu angka
parroha na tigor do mata ni Tuhan i, jala tu angka pangidoannasida pinggolna; alai
bohi ni Tuhan i do alo ni angka sibahen na jat.” (1 Ptr.3:12).
5)
Dipangolu do
haporseaonta, asa gabe boi hita sitindangi songon na nidok ni si Nathanael; “Anak
ni Debata do Ho, Ho do Raja ni halak Israel.” Haporseaon na mangolu – ndang haporseaon
na mate. AI mate do haporseaon molo so mardongan pangulaon (marpanindangion). Molo
barani hita marpanindangion si songon i: “Anak ni Debata do Ho, Ho do Rajangku
dohot raja ni sandok portibi on, ima tandana na boi idaon, saksihonon ni angka
dongan nang alo pe, gabe dohot nasida manghatindanghon haporseaonna be. Gabe tudos
ma hita songon na masa di jamita on masiharaan masibetabetaan marnida dohot
manghaporseai dohot mangibuthon Tuhanta. Nunga halak na martua hita jala las
roha ni Tuhanta marnida hita.
6)
Idaonta do
mungkap Banuaginjang jala marnaek minjur angka surusuruan ni Debata tumopot Anak
ni jolma i. Marhite nipi dope naung marnida songon na nidok ni Tuhanta dison,
ima si Jakob di na laho maporus ibana tu huta ni tulangna si Laban i.
Marbagabaga do ibana ingkon bahenonna disi partinandaan naung diida disi bohi
ni Debata. Ingkon Jahowa do debatana ( 1 Musa 28: 10 – 22). Ap.Paulus nunga
diida ibana mungkap banuaginjang i, na tarhinsat do ibana ro di Paradeiso, jala
dibege do hata na so tarhatahon, na so jadi dohonon ni jolma manisia (2 Kor.12:
4). Na tumangkas na marnida mungkap banuaginjang i, jala diida Anak ni jolma i
(Kristus Mesias i) disi rap dohot angka na porsea marlas ni roha rap marende
mamuji Raja i naung monang maralohon sibolis
pangago i. Ndang holan marnida sambing tahe songon na manonton, hola na ripe marnida
alai dohot aktif mangulahon, parnampuna na tinontonna i. Sae na manonton i
mulak be ma so adong aha sian i di ibana. Alai anggo hita angka naung
dipaidahon Debata tu hita na masa di Banuaginjang, halalas ni roha na sumurung
i, sahat do hita angka naung porsea di panobusion ni Kristus Jesus i sian
saluhut dosanta, partohap manjalo upanta di Banuaginjang i. Antong ro ma hita
marnida Mesias naung monang i, taihuthon ma Ibana. Amen.!
