|
“Ajari
Ma Hami Mamilangi Angka Ariarinami”
|
Ev. Psalmen 90 : 1 – 12 Ep.
Pangungkapon 1 : 4 – 8
a. Ia
turpukta on ima tangiang nisi Musa. Ibana sahalak na dipangke Debata laho
manguluhon bangso Israel haruar sian Misir. Ibana sahalak tokoh na luar biasa
songon parmahan, panurirang nang gabe uluan ni bangso Israel. Jala dirajumi
ibana do holan Debata do hagogoonna na so marmula jala na so marujung, jala
didok na deba halak on sada sian parange ni Debata. Hombar tu pangantusion ni
si Musa, ia Debata na tinandana ima Debata na so tarbatas ni partingkian nang
inganan siala Debata nunga adong andorang so dijadihon angka dolok nang portibi
on sahat ro di saleleng ni lelengna. Debata na manongtong ima inganan
parlinggoman na singkop sian mulana jala Ibana do Debata Jahowa. Uju dipillit
Debata si Musa gabe naposoNa laho manguluhon bangsoNa i haruar sian Misir,
ndang dapot rohana hian na songon i ala mansai posos dope di dok rohanana
dirina jala ndang apala malo manghatai. On ma alasan na so pola marpangalensem
manang na binahenna i alai sada kenyataan dirina do i jala sada fakta. Alai
dilaonlaon ni ari diajari Debata jala di pargogoi do Ibana laho mangulahon
parsuruonNa i marhite goar ni Debata ni Israel. Siala ni i, martangiang do si
Musa mangidohon asa diajari Debata ibana laho mamilangi angka ariarina, asa
gabe halak na marbisuk ibana.
b. Hata
“mamilangi” sian hata heber ‘manah’ na marlapatan: mamilangi /menghitung - (to
count, to reckon, to number),mempersiapkan (to prepare), dan mendaftarkan (to enroll). Halak na porsea
ingkon mamilangi manang mangetong sadia
leleng ma ngoluna na marbatas i hira-hira sian umur 70 manang sahat 80 taon. Alai
godang do na lobi sian i umurna alai tong do marbatas umur ni jolma i di
portibi on. Molo taantusi do na marbatas ngolu nang umur ni jolma i di portibi
on, ido umbahen taparade hian ngolunta sa denggandengganna, dipudi ni tanomanta
i adong hangoluan na manongtong. Mamilangi ari na nidokna dison ndada na nonor
manjejeri angka ari, minggu, bulan nang taon. Alai adong sian dirinta usaha
paradehon saluhutna asa sude partingkianta na tadalani gabe partingkian na
marlapatan, na berkualitas jala marguna tu parngoluonta na manongtong i. Asa
molo dihangoluonta na di portibi on boi tarencanahon angka na uli na denggan,
asa lobi sian i tahe tarpatupa hita angka na ummuli tu hangoluan na saleleng ni
lelengna i. Ringkot do hita marguru sian Debata na songkal jala na manongtong
i, ndada marsiajar sada tehknik na imbaru manang manajemen waktu manang time
management, alai marsiajar mangatur ngolunta –Life Management, na boi dipatupa
sahalak na marroha bisuk situtu. Siala nii sian dalan na praktis adong ma angka
siparrohahononta laho mangulahon Hata ni Debata dibagasan ngolunta:
ü
Naparjolo, sai marsihohot ma hita lam martumbur
jala magodang marhite na manghaburjuhon ulaon partondion (2 Korint 2:16; 1
Korint 15:58). Lam leleng angka na porsea i manghaburjuhon ngolu ni
partondionna lam magodang ma jala tang haporseaonna. Ganup ari ngolu
partondionta i sai ditambortamboti asa lam maruba marhite parsaoranna na hot
dohot Jesus Kristus marhite Hata ni Debata (Joh.15:1-8); marhite tangiang,
pahusorhusorhon Hata ni Debata (Joh.17:17); marhite haporseaon na pinargogoan
ni huaso ni Tondi Parbadia (Ef.3:16). Marhite ulaon i saluhutna ngolu ni
partondionta i gabe lam mangerbang, nang pe ngolu pardangingonta i sai lam moru.
ü
Napaduahon, asa taharingkothon ma na rumingkot
dibagsan ngolunta ala marningot partingkian na tarbatas (Ef.5:15-17). Angka
jolma na adong dihumaliangta isarana; ianangkonta, suami, istri, natoras, angka
donga, tondong nang aleale ingkon matua do haduan nang hita pe jala marujung
sian ngolu on. Asa adong kesempatan di hita laho manghaholongi nang mangargahon
nasida binsan adong dope partingkian nang kesempatan di hita. Unang ma gabe
godang alasanta gabe tartunda aha na boi sipatupaonta nang ulahononta nuaeng.
Manghaposi Tuhan Jesus, manadinghon hajahaton nang dosa , mangharinggashon diri
laho tu parmingguan martangiang nang mamuji Debata. Patuduhon haholongon tu
keluarga nang angka halak na di humaliangta, ala so taboto andingan tingkinta
manadinghon portibi on nang ari sogot.
ü
Napatoluhon, mandalni ari ni parngoluonta na
martanggungjawab. Ganup halak na martanggungjawab do di ngoluna sandiri nang na
niulana. Tanggung-jawab ima tanda ni naung tang di hadirionna. Halak na barani
martanggung jawab ima halak na rade mangadopi resikona, jala paturehon keadaan
nang mangulahon kewajibanna marhite kemampuanna na terbaik. Molo so songon i
boi do bolas hita holan na malo mangulahon sada hagiot ni diri alai dipasombu
nang ture bertanggung-jawab. Asalma ngolu na suar sair ma goaron si songon i.
Ala ni i ingkon ingotonta do ngolunta on sada basabasa ni Debata ni dihaposi tu
hita. Mangolu hita di portibi on holan bersifat parsatongkinan do, hape molo
taperbandingkon dohot ngolu na manongtong i, mansai jempek do ariarinta. Siala
ni ia angka tingki nang kesempatan na adong di hita marbatas umbahen asa taparhaseang
ma tingki nang saluhut tu na denggan secara maksimal jala martanggung jawab.
c. Dirajumi
si Musa do hajongjonganna na mansai jempek di tonga ni portibi on, nang suang
songon i hita, ndada taboto sahat tu umur piga taon hita on. Asa gabe halak na
marbisuk ma hita. Marbisuk hombar tu Hata ni Debata na pola diporluhon modal na
mansai balga, alai dituntut do haburjonta, asa adong pangantusion na denggan tu
Hata ni Debata. Ise pe hita on, asa olo ma hita marsiajar gabe halak na
marbisuk, ala ni angka ariari ni ngolunta di adopanta ndada na lam dumenggan
alai mansai jorbut, godang angka na jat jala maol situtu. Asa bisuk hombar tu
Hata ni Debata ima:
ü
(Poda 6: 6 – 8 ), halak na marbisuk ima halak na
tau mamereng keadaan na naeng ro jala adong bohalna. Molo tabereng porhis i
ndang adong uluanna, alai diboto do andigan mangula laho papunguhon
sipanganonna songon siparadeonna di musim parudan ala dimusim i ndang boi
nasida mangula.
ü
(1 Musa 41: 1-7). Di tingki marhuaso siParao,
dipangke Debata do si Josep laho mangalapati nipina i , ia ro ma sada masa
gotilon dohot masa haraparon. Ido alana saleleng pitu taon na parjolo dipapungu
do sude angka parbue ni tano ima pangaradeon tu pitu taon na paduahon (masa
haraparon). Molo soada uluan na bisuk, tung so diboto nasida do aha siulahonon.
Alai si Josep marhite bisuk na sian Debata paboahon tu saluhut bangso i asa
papunguhon parbue ni tano songon pangaradeon di masa haraparon.
ü
(Jeremia 10: 23), ia manisia ndang marhuaso laho
manontuhon dohot manotophon dalanna, alai Debata do. Ala ni i molo manirpang
hita sian dalan ni Debata, ima na patuduhon na so unduk hita tu Hata ni Debata.
Tapangido ma tu Tuhan Debata asa pauba hita gabe marbisuk di tonga ni keluarga,
parkarejoan, asa boi tabolus angka ari ni ngolunta marhite pujian nang
hamauliateon. Amen.
