Jamita Minggu IX D.Trinitatis, 1 Agustus 2021

Mangaradoti Hasadaon Ni Tondi

Memelihara Kesatuan Roh

Epesus 4:1 – 7

 

Hamuna na hinaholongan dibagasan Jesus Kristus

Dibagasan turpuk on dipaboa do ragam ni angka latarbelakang ruas ni uria na di Epesus; adong na mora, na pogos, adong na sian Jahudi dohot na so Jahudo, baoa, boru dohot angka tuan nang hatoban. Sialani i boi do sibonsiri parasingan i manghorhon parsalisian. Songon parhalado ibana dipaingot Ap.Paulus do nasida asa jaga jala manat nasida laho manjaga hasadaon dohot marsiajar patuduhon hadameon ganup nasida marsadasada. Didok AP.Paulus naung diihot do nasida saluhut gabe sada pamatang, sada tondi jala sada pangkirimon, sada Tuhan, sada haporseaon, sada pandidion, jala sada Debata jala Ama ni saluhut.

Na tarjou do nasida songon halak na porsea sada dibagasan pangkirimon. Dijou, dipaingot, dipangido, jala diontang manang dipaloas ro tu adopan ni Jesus Kristus marhite sada pangkirimon tu hangoluan na manongtong na gok las ni roha jala dame na sian banuaginjang i.

a.       Mangolu hombar tu panjouon: Siala ni sihol ni roha ni Ap.Paulus tu angka na porsea, huria na di Epesus di tingki i dohot sahat tu partingkianta sisaonnari on, dipodai jala dipaingot nasida nang hita asa mangolu hombar tu panjouon ni Debata tu hita. Songon naposo ni Debata na tarhurung siaa ni Kristus Jesus Tuhanta i. Ibana tarhurung siala ni Tuhan i mamodai hita asa mangolu songon halak naung tarjou gabe ruasNa marhite Tuhan i, hombar tu panjouon i. Songon na nidokna di Epesus 4:1 Asa ahu na tarihot di bagasan Tuhan i, huapoi ma hamu: Parangehon hamu ma na tama, hombar tu panjouon naung songgop tu hamu!

b.      Manjaga hasadaon ni Tondi: Diayat 2 – 3 didok, Hata ni Debata na mangajari, mamodai hita asa tongtong hita marserep ni roha, marhalambohon jala benget. Jala dipaingot do hita asa tapatuduhon haholonganta marhite na rup masihaholongan, masiurupan jala marpanarihon. Asa marsihohot hita marusaha manjaga hasadaon ni Tondi niihotan ni dame na sumurung i. Songon na nidokna di ayat 2 – 3 Martoruk ni roha situtu, marlambok jala marlambas ni roha, masihaehean di bagasan roha na holong!  Haringgashon hamu ma mangaradoti hasadaon ni Tondi, pinadomu ni dame

c.       Dijou tu sada pangkirimon: didok di ayat 4 – 6 Ai sada do daging i, jala sada do Tondi; ai songon i do hamu tarjou di bagasan sada pangkirimon di panjouon i. Sada do Tuhan, sada do haporseaon, sada do nang pandidion. Sada do Debata, Ama ni sasude, sigomgomi saluhut, sitorusi saluhut jala siingani saluhut. Ise do na nidokna na pamatang ni Kristus ? molo tajaha di 1 Korint 12: 12 - 14 Hibul do daging i, alai torop do anggo ruasna, jala ruas na torop i manjadihon daging na sasada i; songon i do Kristus. Ai Tondi na sasada i do dipandidihon tu hita saluhutna, gabe sada daging, nang Jahudi, nang Junani, nang hatoban, nang anak mata; jala tu saluhut hita dipainumhon Tondi na sasada i. Tangkas ma na nidokna ia pamatang ni Kristus i ndang marbatas sian sada horong alai manghamham saluhut angka anak ni Debata di sandok portibi on. Ido umbahen molo tadok di Hata Haporseaon, songon na hinatindanghon halak na porsea di sandok portibi on,.....na badia (ima na pinarbadiaan ni Kristus Jesus). Marhite na torop angka ruasna, jala mansai torop do angka silehonlehon na marasing i di ruas i. Isarana pamatangta on tung marragam do ruasna jala marasing be do fungsina alai saluhut do mangula laho tu kepentingan bersama ima pamatang i. Molo male siubeonta, ringgas ma simanjojak nang tangan mangalului jala pasidohot simalolong, parnianggoan, dohot sipareon bekerjasama laho mangalompa, paradehon sipanganon, dipahan mai asa unang male siubeon, jala asa unang gale pamatangi, asa margogo muse sahat tu sude ruas ni  pamatang i. Siala sude ruas marnampunahon angka parange, pangalaho nang sibahenonna na marasing sian nasada tu na asing; asa unang marbada, manang marbolat bolat, asa rup mamparohahon, masiurupan, rap manghilalahon na niae sada ruas tu saluhut ruas. Molo adong na dibagasan arsak ni roha, sude ma ruas i manghilalahon, molo adong ruas na dibagasan las ni roha laos sude ma ruas i manghilalahon las ni roha i. Ido ringkot jala guna ni tingting i; aha ma angka na masa dohot na naeng masa di tongatonga ni huria i, asa sude ruas mamboto, peduli, manghilalahon na hilala ni ruas. Ido alana sipajongjong Debata angka na mangula di tonga ruas ni huria songon apostel, panurirang, pangajari, jala angka na marnampunahon angka silehonlehon ni Debata (Karunia), na mamboto mangubati, marhobas dohot lan na asing. Jadi saluhut ruas ni huria i, masitungkoltungkolan (saling menopang) ganup nasida be manjaga hasadaon ni ruas ni pamatang Kristus ( 1 Kor. 12: 25 – 28).

d.      Asi ni roha: Ayat 7 Alai tu ganup hita be do dibasabasahon asiasi i, marguru tu panagihon ni pangalehon ni Kristus.

d.Dipaingot AP.Paulus do hita ia Jesus Kristus nunga marasini roha tu hita di asiasiNa i marguru tu pangalehonon ni Kristus. Naung tabolus do angka ragam na masa dohot pambahenan ni Debata dibagasan ngolunta marhite asi ni rohaNa. Sian tingki tu tingki sai usehononNa do gok asi ni roha nang pasupasuNa, jala asi ni rohaNa i sai imbaru do ganup ari.

e.       Sipahusorhusoronta marhite jamita on diboan do hita tu sada topik “Mangaradoti hasadaon ni Tondi” Hasadaon ni Tondi manghorhon sude angka na porsea gabe sada tujuan, pangkirimon ni Jesus Kristus; mamboan dame, las niroha, haholongon. Tung mansai uli do na marsada, na saroha, sapingkiran, jala sapangkilalaan. Alai sipata sai ro do sibolis i manggugai, manegai hasadaon i; nang di keluarga; masa perceraian, parbadaan na mahahamaranggi, markeluarga, ditonga ni masyarakat pe boi do ro namanegai hasadaon sian pengaruh pengaruh negatif, manang provokator gabe masa ma na marbada antar keluruhan, kelompok, nang di parkarejoan dohot di huria nang ditonga ni negaranta. Mansai godang do harugian namarbada, boi do sahat tu na berpengadilan, suda gogo, suda arta, hepeng, nang tingkina laho marbada. Laos adong dope pandohan ni hita halak Batak na so olo mardame ( mardame ditano na rara, lapatanna dung mate pe asa mardame, ndang adong be sintong ni i). Ala ni i songon halak na porsea hita naung dipasada Jesus Kristus Sipalua i hita jolma pardosa on dohot Debata Ama i. Disesa Jesus Kristus i do dosanta, naung mate Ibana jala hehe lau manaluhon sorop ni sibolis nang hamatean i, asa diparbadia i hita jala dipatomu dohot Debat Ama na di surgo i. Tama ma hita mandok mauliate siala ni i, taradoti ma Hata nang patik Ni Debata gabe siboan dame, siboan hasadaon, na peduli sada tu na asing, ndang egois, ndang holan mangahut tu diri, alai tongtong do masibasabasa, marpanarihon tu angka donganna jolma. Galatia 6:2 Masiurupan ma hamu mamorsan angka na dokdok i; i ma dalan mangaradoti patik ni Kristus.

e.B.E. 650. Dipasada holongNa I

1. Dipasada holongNa I, saluhutna porsea I, Na tarjou tu sada panghirimon I, songon daging ni Kristus i.

2. Sada do panghirimon I, dibagasan panjouon I, Taradoti hasadaon ni Tondi I, pinadomu ni dame i.

3. Kristus I tatiru ma, roha tapaserep ma, Taeahi na tau padamehon hita, tu angka dongan i

 

Amen.

Jamita Minggu VIII Dung Trinitatis (Hasitolusadaon ni Debata) – 25 Juli 2021

 Diramoti Debata Do BangsoNa

Allah Memelihara UmatNya

 

Ev:  2 Rajaraja 4 : 42 – 4                                         Ep: Johanes 6: 25-35    

 

Huria na hinaholongan dibagasan Jesus Kristus

 

Masuk do hita di Minggu na paaualuhon  dung Trinitatis na paboahon “Diramoti Debata do BangsoNa” na dipatuduhon marhite barita na dibagasan turpuk on Tuhan Jesus mangalahon mangan 5000 halak marhite dua dengke dohot lima roti, jala suang dope sampulu dua bahul . Marhite i patuduhon pangaramotion nang panarihononnNa mangatasi gogo nang pingkiran ni jolma.

Nunga sian mulana Debata sai tongtong mangaramoti na tinompaNa. Sada sian pangaramotionNa i dipaboa do marhite halongangan napinatupa ni si Elisa.

a.       Dungkon hananaek ni panurirang Elia tu Banuaginjang, disi ma dipatuduhon huaso panurirangon i tu si Elisa. Pahean ni si Elia pe ditadinghon di ibana. Tonglat estafet panurirangon i di pasahat si Elai tu si Elisa. Jala dibagasan turpukta on ma dipatuduhon angka halongangan na pinatupa ni si Elisa sian bindu 3 – 7. Dipatuduhon Debata do huasoNa marhite angka halongangan na binahen ni si Elisa.

b.      Songon na hea masa tu si Elia, laos songon i ma na masa tu si Elisa na masa haleonpotir saleleng 7 taon lelengna. Disude inganan na masa hahurangan sipanganon. Ido umbahen parompuan sian Sunem dohot keluargana disuru si Elisa laho paluahon diri sian haraparon i (8: 1 du). Andorang turpuk on naung hea do diurupi si Elisa keluarga on marhite na pangoluhon dakdanak baoa naung mate hian (4: 8 – 37).

c.       Disituasi haleon potir dohot haraparon na masa, ro ma silehonlehon na mansai arga ima duapulu sagusagu dohot itak sidahanon na binolgang sian sahalak Baal-Salisa tu si Elisa (ay.42). Nian lomo ni si Elisa do di silehonlehon i, boi do jagaonna manarihon dirina sandiri sahat tu pudian ni ari. Alai ndang pangkeonna i sandiri nang pe ibana nampunasa silehonlehon i. Jouonna do naposona laho mansagihon i tu sampulu halak na marpungu disi, boi do ra angka siseanna i. Ima na patuduhon panarihononna songon sahalak ama na martanggung jawab laho manggohi angka na ringkot di nasida.

d.      Tung longang situtu do naposona i ala ni parsuruon ni si Elisa i, ndang tarjalo roha na boi dua pulu sagusagu i laho manarihon tu saratus halak. Alai sai di gogohon si Elisa do manuru nasida sian huaso na sian hata ni Debata, marhite hata ni Debata mandok :  “Ingkon mangan angka jolma i jala ingkon adong dope teba” (ay.43). Sian pingkiran ni manisia do ianggo naposona i laho maretong, alai molo si Elisa sian huaso ni Debata do. Ai marbatas do ianggo hagogoon dohot kemampua ni manisia, alai ndang tarasam jala ndang tardodo roha nang pikiran ni jolma ianggo huaso ni Debata. Ai ndang adong na so tarpatupa Debata.

e.      Tung so tarjalo sahalak naposo i dope marhite utokutokna laho mangalehon duapulu sagusagu i tu saratus halak. Singkop do nasida mangan songon na nidok si Elisa, jala adong dope teba na, ndada na manahan nasida mangan manang mangkolit, alai disi disagihon nasida sai martamba tamba do sagu sagu i. Mangula do Debata disi marhite huasoNa tu angka sagusagu i.

 

Hita saluhutna nahinaholongan dibagasan Jesus Kristus, marhite turpuk on manogu hita mamboan angka sipahusorhusoronta:

1.       Huaso ni Debata sai manggula do di sude partingkian ni jolma, jala sahat tu partingkianta di jaman on. Naeng ma mangolu haporseaonta laho mangadopi angka hagaleonta, panaritaanta, hasusaanta, nang hahuranganta. Tarlumobi dimasa pandemic covid 19 on. Ndang adong  na boi tapangasahon holan huaso ni Tuhan i do na margogoihon hita asa malua hita sian mara pandemic covid 19 on.

2.       Marguru sian si Elisa, jala sahat tu parngoluonta siganup ari, taparrohahon ma: Haporseaon na mangolu di si Elisa, dihaporseai ibana do na mangolu jala margogo do Hata ni Debata. Pos do rohana disi jala ndang ganggu di na suruonna sahalak naposo i laho mansagihon sagusagu i tu torop halak. Taruli sipanganon do natorop i jala marlobilobi tahe. Mo lo so marhaporseaon dohot marpos ni roha di Hata ni Debata, ndang tarpatupa si Elisa i saluhutna. Sian haporseaon do ro ma halongangan i.

3.       Ndada mangahut tu diri. Diparangehon si Elisa do pangalaho na marpanari tu dongan jolma. Ndada na mangahut tu dirina di kesempatan na tabo i, angka pasupasu na jinalona i dietong ibana do di sian Tuhan i jala ingkon lehononna do tu Tuhan i muse marhitehite na manarihon angka dongan jolmana di humaliangna. Pasupasu na jinalona i gabe pasupasu nang tu angka na asing ima na gabe sitiruon di hita halak na porsea na taronjar roha nang haporseaonna marsilehonlehon tu donganna na dibagasan hahurangan. Haporseaon na mangolu dipatuduhon marhite panghobasion na holistik sian na marpardomuon tu partondion nang sahat tu pardagingon. Ndada holan na mandok alai dohot do na mangulahon, ndada holan haporseaon dohot do nang pambahenan. Angka na porsea jala na marpanghirimon tu Debata, sai parrohahononna do angka na ringkot tu donganna jolma. Ido ala na asa unang ganggu rohanta, alai sai tongtong mangula jala martangiang. Tatangianghon ma na taulahon i jala taulahon na tatangianghon i, laos ulahon ma na nidok ni Hata ni Debata tu hita asa lehononNa ma na taporluhon dibagasan ngolunta. Panarihonon ni Debata ndada holan na sangombas na di parngoluon on. Mangihuthon Tuhanta i ndada asa lehononna angka sagusagu nang roti nang angka sinamot na di portibi on. Alai mangihuthon Tuhanta Jesus ala naung disesa do dosanta. Panarihononna holan tu hasonanganta do na di parngoluon on sahat tu hasonangan na manongtong marhite panghohoponNa nang angka dosanta disesa asa gabe partohap jala parjambar hita dihangoluan na so ra suda. Dimasa Pandemic on pos ma rohanta dipangaramotion ni Debata tu bangsonta songon topik di minggunta on. Unang ganggu jala lomos rohanta, tapatuduhon ma angka na porsea di tonga ni masyarakat na marggo do Tuhanta i laho manogunogu hita asa boi masilehonlehon asiasi nang pasupasu ni Debata tu angka donganta na manarita ala ni dampak pandemic on. Amen.

Jamita Minggu VII Dung Trinitatis (Hasitolusadaon ni Debata) – 18 Juli 2021

Hasadaon Dohot Hadameon  Dibagasan Tuhani

Kesatuan Dan Damai Dalam Tuhan

 

Ev:  Efesus 2 : 11 – 22         Ep: 1 Musa 32 : 13 - 21

 

Huria na hinaholongan dibagasan Jesus Kristus

 

Nahinalungunhon ni Debata tu hita angka manisia ima asa sada hita saluhutna songon na ni dokNa di Joh.17: 21 Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu.

Marhite i ma na paingothon hita taringot tu hajongjonganta songon manisia na tinompa laho manjaga hasadaon dohot Debata marhite hasadaonna dohot dongan jolma. Dibagasan ngolunta sai tongtong do adong parasingan ni angka manisia, alai ndada laho manirang parasingan i alai naeng ma marhite i laho pasadahon, ndada laho manguhumi parasingan i manang gabe mandok sumurung saotik manang na mandok tumingkos sian halak na asing alai sian na marasing i diigil Tuhanta do hita asa masihaholongan laho mangurupi, manumpahi jala masitungkolan

Ngolu na masihaholongan do na sai dihasiholi sude jolma, asa tarpatupa i ndada sai paimahon asa haholongan ni jolma hita, manang sipaimaon situasina laho manghaholongi, alai pungkaonta ma sian dirinta sandiri laho manghaholongi di situasi manang aha pe namasa, ima patuduhon hadirionta nang haporseaonta songon siihuthon Kristus hita.

 

Songon halak na porsea hita mamereng halak na asing na marasing dohot hita ndada mamereng nasida songon alo manang musu manang tumoru sian hita, jala si pardosa na lea sian hita. Naingkon rajumonta do na dijou Debata do hita gabe ulaulaNa laho pasadahon diri jala masihaholongan songon na tinonahon ni Kristus Jesus tu hita. On ma na ingkon siulahononta jala laos paingothon hita di minggu on na mandok topik Minggu: “Hasadaon dohot hadameon dibagasan Tuhan i”. 

Dibagasan turpuk on diondolhon Ap.Paulus do dibagasan suratna tu huria na di Epesus taringot tu parsaoran na togu jala sada. Jala andorang so turpuk on nunga dipaingot Ap.Paulus nasida: “Ai sian asi ni roha do, umbahen na malua hamu, dalan haporseaon; jala ndada binahenmuna, silehonlehon ni Debata do.Nda tung sian parulaon i, asa unang adong na mamuji diri. Ai jadijadianna do hita, angka na tinompa di bagasan Kristus Jesus, asa marulaon na denggan hita; ai angka i do dipature Debata hian, asa taparangehon i” (Ay.8-10)

 

Ala ni i huria ni Tuhanta na hinaholongan dibagasan Jesus Kristus, songon angka na porsea naung dipasada holongNa i naeng ma patuduhon hasadaon ni Kristus i marhite :

a.       Rap mian sahundulan doho na so sa bangso. Na diondolhon Ap.Paulus ima hasadaon bangso Jahudi dohot na so Jahudi na pinatomu tu situasi na masa adong pingkiran na mandok ia halak Jahudi do na manjalo padan ni Debata, alai bangso na asing ndang. Ai Kristus do pasadahon nasida halak Jahudi manang na so Jahudi, ala ni I didok AP.Paulus najolo hian nasida mansai dao gabe jonok siala asini roha ni Kristus i. Jala marhite Kristus I do asa malengse angka parik panirang na sai jotjot pamasa parsalisian, parmusuon nang parbadabadaan.

b.      Hasadaon dibagasan rumatangga ni Debata. Hasaadaon na mangihut diarahon tu parumatanggaon anang keluarga na dos diadopan ni Debata nang pe so halak Jahudi. Angka halak na dao manang na jonok dipasada songon ruas ni Debata dihasadaon ni Jesus Kristus jala songon halak na pinarbadiaan. Hasadaonon laho mananggali parasingan ni halak na so sian Jahudi gabe mamboan las ni roha songon keluarga ni Debata.

c.       Hasadaon dibagasan bagas ni Debata. Hasadaon I dipatomu tu pambahenan ni halak na porsea na dipasada dibagasan Kristus na dipauliuli laho manggohi bagasNa I ima HarajaonNa. Angka bagas I rap masirainrainan do jala masitungkolan laho patuduhon hamuliaon ni Debata huhut inganan parmianan ni Debata. Angka bagas marhite sian angka apostel, angka panurirang nang sude halak na porsea, Kristus I do na gabe batu parsuhi, lapatanna saluhut dipasada dibagasan Kristus i.

 

 

Hamuna nahinaholongan dibagasan Jesus Kristus, siboanonta dipardalanan ni ngolunta ima:

1.       Debata ima na manggohi angka na tinompana; Debata namangolu na mangatasi saluhutna. Tung so boi do malua halak Kristen sian na binahen ni Debata. Hakristenon I pe ingkon dohot manggohi angka na tinompa ni Debata, laho manghaham saluhutna hombar tu lomoni roha ni Debata. Nang adong parasingan ni warna kulita, latar belakang, parhataan, nang hom ni jolma, tongtong do hita dipasada hot dibagasan Kristus i. Angka na dipasada Kristus I tongtong masihaholongan jala masitumpahan. Unang ma adong sian hita na porsea papulik diri, mangarajumi diri sumurung sian na asing, ingkon dohot do hita mabaor jala marsaor dohot angka jolma na asing di humaliangta laho pasarhon Barita na uli. Angka na porsea olo marsaor dohot portibi on ndada laho asa sega manang disegai portibi on, alai sabalikna laho pauliulihon dibagasan Kristus jesus Tuhanta I; pamalum na marsahit, mangapuli na marsak jala margogoihon na gale, pauliuli angka lingkungan na tinompa ni Debata. Marhite na masa pandemic nuaeng on asa sada hita dohot sude jolma nang pamarenta asa boi hita taat prokes (protokol kesehatan), asa malua hita sian mara pandemic covid 19 on. Hasadaon I mansai ringkot dibagasan ngolunta, nang di keluarga, di huria, di masyarakat nang negaranta asa tarpatupa hita na sinangkap ni roha nang punguanta nang negaranta dibagasan huaso ni Kristus i. sada ma hita patupahon I marhite hasadaonta dohot Debata marhitehite Kristus Jesus Sipalua hita. Marshita hasadaonta dohot Debata Ama, Anak dohot Tondi Parbadia margogoihon hita pasadahon angka na marsalisi, angka na marbada, na marbolatbolat. Moo soada hasadaon hasursaran do na masa, hagunturon, nang hagaoron marnghohrhon hasesega ni angka keluarga, huria, punguan, nang negara. Ala ni taharingkoti ma hasadaon  dohot hadameon dibagsan Tuhan i.

Jamita Minggu VI Dung Trinitatis (Hasitolusadaon ni Debata) – 11 Juli 2021

 Manongtong Pajongjong Hasintongan

Tetaplah Menyuarakan Kebenaran

 

Ev: Amos 7 : 10 – 17                                          Ep: Markus 6 : 1 – 6    

 

Huria na hinaholongan dibagasan Jesus Kristus

 

Ia Panurirang Amos ima sahalak naposo ni Debata na paingothon  angka na papeol hasintongan nang hatigoran di tonga bangso Israel sian pandangan haporseaon nang sian masyarakat.  Tarida do namasa papeol hasintongan nang hatigoran di pangalahao ni angka malim na sai unruk tu pamarenta. Gabe manghorhon bolon tu bangso Israel na unduk tu ugamo na pinajongjong ni panggomgomi nadada be unduk tu Debata Jahowa, ima Debata ni ompunasida. Naung godang do haporseaon ni bangso i dipengaruhi angka haporseaon sian Kanaan na manomba Baal di Betel hape sai dirajumi nasida manomba Debata Jahowa jala bangso ni Debata Jahowa.Jala sahat ma pangalaho ketidak-adilan i di tonga ni masyarakat, na masa pangalonjanon, sisip, na mamoro, angka gabus, lan na asing, jala ima nanaeng kritikon ni si Amos di harajaon utara ni Israel manang Samaria.

a. Panuhasan si Amasia (ay.10-11); Pambahenan ni si Amasia maradophon si si Amos bonsir angka ulaula politik ndada sian haporseaon siala marhahonaan tu hademahon nang hadumaon ni bangso i. Bukti ni panuhasan ni si Amasia tu si Amos na di ihuthon di ayat 11. Alai panuhasan ni si Masia i ndang saurdot dohot naung di hatahon si Amos andorang so turpukta on ( Am.7:9). Ndada dipaboa si Amos tu shalak alai tu haganupan ima keluarga Jerobeam ndada tu pribadi ni si Jerobeam. Ala ni i ndang tingkos na tinuhashon ni si Amasia i.

b. Dibagasan turpukon ma molo taparrohahon partontangan ni angka malim dohot panurirang. Mansai jotjot do masa pangalaho on di Padan na Robi, isarana si Elia dohot angka malim di Baal di dolok Karmel ( 1 Raja.18). Angka malim na marhobas di bagas joro nang di parguruan, jala angka panurirang paboahon angka na nidok ni Debata.

Parguruan i sai jotjot do di pahombar tu pamarenta manang politik, hape pamaritaan ni na nidok ni Debata sai datdati. Mansai jotjot do on masa sahat tu partingkian si saonnari on. Huria manang ugamo jotjot do gabe tarihot tu politik ni negara manghorhon lapatan ni huria i manang ugamo i gabe tarhurung  jala gabe hombar tu na masa politik ni negara.

 

Ingkon boi do huria i mambuat sada sikap ndada gabe sarombang dohhot portibi on dohot politik di negara, asa mangolu huria i dibagasan pasupasu ni Debata, ndada ala ni politik negara. Asa tarida ma hajongjongan ni sada huria na boi mangalehon penilaian manang masukan dohot manuarahon hasintongan nang hatigoran di tongatonga ni negara jala manuarahon hadameon nang hadumaon.

 

c. Dua pangalaho na marasing sian malim dohot panurirang. Malim Amasia na mangula marhite haputusan ni negara manang pamarenta. Alai Molo si Amos songon panurirang mangula hombar tu hata dohot lomo ni roha ni Debata. Pandok ni si Amos ia sahalak malim na sintong di Jahowa ingkon tarida do sian parngoluan siganup ari dibagasan hasintongan.

Dilehon Tuhan Jahowa do sada gombaran songon “tali rambu” ima na mangukur tigor. Tioponna do tali na mangukur i laho mamereng parik i tigor manang ndang. Parik na jolo di pajongjong marhite tali rambu, asa tigor. Alai lam leleng lam meol do jala ndang manahan, asa dilengsehon do i muse asa ndang gabe mara. Tali rambu i ima manggombarhon panuhat tu pangalaho ni bangso Israel (Jes.28: 17a “Jala nunga hubahen uhum gabe tali rambu, jala hatigoran gabe tali pandodo....”).

Marhite hasintongan dohot hatigoran ni Debata, mansai tangkas parngoluan ni bangso Israel naung sega jala naung peol sian hatigoran. Uju ro Debata laho manguhumi marhite tali rambu i, gabe masa ma panguhuman. Alai ndada di panguhuman i na gabe impolana alai paubahon manang paulihon, molo dijanghon dohot denggan. Alai angka sipaingot ni Debata ndada ni janghon dohot denggan sabalikna dialo nasida do. Ndang diokui nasida hasalaan nang hagaleon nasida i. Hape na sampulu patik ni Debata naung di laosi nasida saluhutna.

Pangalaosion na mansai borat parohon uhuman na borat. Alai sai maralus do nasida jala maralasan  ia bangso na pinillit ni Debata do nasida. Ndang porsea nasida di uhuman na ingkon dipasaut tu nasida. Ia uhuman ni Debata ima dua na masa: Halelengse ni inganan parsombaon nasida jala harajaon ni raja Jerobeam II. Pangalaosion nasida di patik ni Debata na sampulu i manghorhon halelengse ni bangso i jala ingkon tu habuangan.

Sipaingot ni si Amos manghorhon partontangan maradophon angka uluan ni ugamo dohot pamarenta. Amasia, ima sahalak uluan na martanggung-jawab di Betel. Ibana ma uluan ni malim “Bagas joro ni negara” (naung dipajongjong si Jerobeam I, jaha 1 Raja. 12: 26-30). Dibereng nasida do pangalaho ni si Amos na maralo dohot negara. Siala ni i asa demak bangso i malua sian hagunturon ingkon dipahohom do baba ni si Amos manang disumppolhon. Ihut muse si Amos songon halak Jehuda (Israel Selatan) targoar halak na asing do i.

 

Angka pamaritaon ni si Amos tardok doi na maralo tu pamarenta na manggomgomi hatiha i.  7:11 “Ai songon on do didok si Amos: Ingkon mate si Jerobeam marhitehite podang, jala ingkon tarboan tu habuangan ianggo Israel sian tanona.” Alai ndang ditarehon sipareonna laho mangulahon hasintongan dohot hatigoran songon boaboa na ingkon argaan. Nunga disosoi nain :  “Lulu i hamu ma ahu, asa mangolu hamu!” (5:4) alai ndang ditangihon.

 

Gabe diusir si Amasia do si Amos sian Betel jala direhei; 7: 12 “Laho ma ho ale paralatan! Maporus ma ho tu tano Juda, jala disi ma ho mangan sagusagu, jala disi ma ho manurirangi!” Sai dietong si Amasia do si Amos sahalak na maralatan manang sahalak panurirang sijalo gaji na mangalului sinamot marhite na manurirang i. Dietong do si Amos na manusai hadumaon jala na manegai. Ima alasan palaohon ndada ala na adong hasalaan na sinuriranghon ni si Amos alai hinorhon politik do i, ia inganan i ima na badia di raja i do manang inganan habadiaon ni raja. Jala tangkas do si Amasia na gabe ulaula ni pamarenta jala sai patujolohon na dihalomohon pamarenta. Jadi ugamo holan sada ulaula ni politik do i. Dison ma parasingan ni si Amos dohot si Amasia, molo si Amos manghatai marhite goar ni Debata Jahowa alai molo si Amasia manghatai marhite goar ni panggomgomi.

 

Diatangkas si Amos do na gabe panurirang i ibana ndada laho mangalului sinamot manang asa jaloonna upa. Dirajumi ibana do dirina ndada panurirang na profesional, holan sahalak parmahan jala na mambuat parbue ni hau ara sian tombak do ibana. Jala dipatorang si Amos do na suksuk do sinamotna i sian angka ulaonna i.

7:15 Dung i dibuat Jahowa ma ahu sian na mangadu birubiru, jala didok Jahowa tu ahu: Laho ma ho manurirangi dompak bangsongku Israel!

Ndada sian hajolmaonna si Amos mangulahon i, alai sian panjouon ni Debata na manjanghon ibana songon panurirang. Ndada mabiar ibana sian ondamondam ni si Amasia, ala pos do rohana ia Hata ni Debata ingkon pasahathononna do i.

 

d. Sadalan panurirang dohot malim. Sasintongna ingkon sadalan ma nian na niulahon ni si Amos songon sahalak panurirang dohot si Amasia songon sahalak malim. Alai ala gabe uluan ni malim si Amasia di Betel jala naung dipengaruhi pamarenta, ido umbahen na diulaho ibana sian na dihalomohon pamarenta jala maralo tu si Amos na dihalomohon ni Debata. Siala panurirang ima na manuriranghon na ni dok ni Debata, na marhajongjongan jala tongam.

 

 e. Hajongjongan ni bangso Israel songon bangso na pinillit ni Debata tudoshon songon hita halak na porsea  halak Kristen naung  pinillit ni Debata. Asa  angka naung pinillit ni Debata mangolu diginjang ni kualitas ni halak na dihumaliangna, laos ido na niarop Debata tu Bangso Israel asa mangolu ditongatonga bangso na dihumaliangna angka bangso sileban.

Asi dohot holong ni Debata sai maarhitehite hasongkalon, ndada boi Tuhan i manadinghon hita, manang na so marnida sude angka hasalaanta. Naeng ma nian hita angka naung pinillit jala pinalua ni Debata maporus sian hatangkangon tu haunduhon. Tanda naung dipalua hita jala naung pinillit ima haunduhonta tu Jesus Kristus na naung mate humonghop jolma pardosa.

Tanda ni haluaon i ima muse gabe tanda ni panguhuman ni Jesus Kristus. Johannes 5:24 Na tutu situtu do na hudok on tu hamu: Manang ise na tumangihon hatangki jala porsea di na marsuru Ahu, nunga sahat tu ibana hangoluan na salelenglelengna; ndang pola be ibana tu paruhuman, nunga taripar ibana sian hamatean tu hangoluan.”

Tanda ni naung dipalua hita ima naolo tumangihon Hatani Tuhanta Jesus jala satia dibagasan haporseaon. Pangungkapon 2:10c  “Sai burju ma ho rasirasa mate; dung i lehononku ma tu ho tumpal hangoluan i”

 

f. Hita saluhut angka na porsea dibagasan Jesus Kristus; Naung tajalao do hamoraon dohot hagogokna i dibagasan Jesus Kristus ima hamoraon dibagasan partondion. Sude na i ndada laho tu dirinta sandiri alai laho disagihon tu halak na asing.  Parmingguonta i ndada holan rutinitas sambing manang na laho patuduhon hamoraon ni portibi alai managihon asiasi ni Tuhan Debata. Mangolu dibagasan parsaoran dohot Tuhan tarida ma i dibagasan parsaoranta dohot donganta sahaporseaon. Amos 5:24 “Jadi margilinggiling ma songon aek uhumi, jala hatigoran songon sunge na so olo marsik.” Ido nadihalomohon roha ni Debata gabe hamoraon na susuk tu angka halak na porsea.

 

g. Partontangan dibagasan portibi on nuaeng ima sian angka halak na manahan, na manggugai hasintongan dohot hatigoran ni Tuhan Debata. Hape naung dijou Tuhan i do angka jolma na olo gabe ulaulaNa laho pasahathon hasintongan dohot hatigoran. Ise do  na ginoaran uluan ni partondion ? Si Amos do manang si Amasia ? Tangkas si Amos do goaron na gabe uluan ni partondion na manguluhon bangso Israel tu dalan hasintongan, alai molo si Amasia na laho paliluhon do.

Hita do na targoar gabe Amos di partingkian sinuaeng on laho paboahon angka hasintongan nang  hatigoran ni Debata. Nang pe sipata sai maralo do hita tu  arus, alai Debata do namandongani  hita.

Rom 8:31 Onpe, aha ma dohononta disi? Molo Debata donganta, ise ma alonta?

 8:33 Ise mangaluhon angka na pinillit ni Debata? Ai Debata do na mamintori. 8:34 Ise do na mandabu uhum hamagoan? Nunga mate Kristus Jesus i, lobi tahe, naung mulak mangolu do; di siamun ni Debata do Ibana mangondihon hita.

Sipata angka halak na tigor i songon na onding do jala dipasiding ala talu sian hatoropan, talu sian pengaruh manang sian pendukungna. Alai ingkon hot do hajongjonganta dibagasan Tuhan i. Ingkon umbiaran do  hita tu Debata asa sian tu Jolma na mangalo Debata. Sai pajongjongonNa do hatigoran i, disi ma partingkian na patar iadon ise do na monang i, ima angka na pinasupasu ni Debata. Unang olo hita manadinghon hatigoran ni Debata dohot hasintonganNa gabe masuk hita tu horong ni halak na ingkon siuhuman, alai na taparsinta ima manjalo panjanghonnon ni Debata jala pasupasuNa naung pinarade tu angka na sai burju rasirasa ro ajal ni portibi on. 2 Timotius 4:2 Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion. Amen. 

Jamita Minggu V Dung Trinitatis (Hasitolusadaon ni Debata) – 4 Juli 2021

 Borhat Mambaritahon Hata ni Tuhan

Pergi dan memberitakan Firman Allah

 

Ev: Markus 6: 6b – 13                                           Ep: Hesekiel 2 : 1 – 5  

 

Huria na hinaholongan dibagasan Jesus Kristus

 

Mamereng na masa tu Jesus na ditulak sian inganan hatubuanna ima Nassaret, jala angka na  nanaung mamereng angka halongangan na binahenNa asa sahat gabe tu na diparsilanghon ma Ibana. Boaha do panghilalaan ni Jesus disi, adong do hosom ni roha, las ni roha ? Molo taparrohahon turpukta di ayat 4 i Tung na so marsangap do panurirang ianggo di luat hagodanganna, di angka donganna sabutuha dohot di bagasna.

Ima paboahon pengalaman ni Jesus, na gabe sungkunsungkun di rohanta, boasa sahalak panurirang ditulak di hutana sandiri, sian keluarga nang sian jabuna sandiri ? Boi do masa di hita molo tapasahat angka hasintongan tarlumobi hombar tu patik nang Hata ni Debata. Adong ma dua hal na porlu siparrohahononnta sian panulakan i:

1.       Ala situasi ni keluarga nang status; molo tabereng sian ayat 3, memang panulakan na masa tu Jesus ala keadaan status ni keluargana ima sahalak anak ni tukang hau, anakhon ni si Maria, haha ni si Jakobus, Joses, Judas nang Simon. DI parngoluanta siganup ari, jotjot do masa na manjua dirinta ala nadada na keadaan ni dirinta alai sandok na sian latarbelakangta nang sabagasta pe.

2.       Napaduahon ima sian hombar balok nang lingkunganta, songon na masa di Jesus sandiri na ditorui angka torop jolma sian humaliangna na mananda Jesus ima sahalak anak ni tukang hau. Dibagasan parngoluanta boi masa doi angka dongan na manorui hita, atik ala ni status kondisinta, ala ni na so ada pangkat, titel, arta, nang latar belakang pendidikan dohot lan na asing. Hasangapon na di portibi on dope na binereng torop jolma. Songon ni pandangan ni halak Batak HAMORAON ,HAGABEON , HASANGAPON ( KEKAYAAN , KETURUNAN DAN KEHORMATAN ) ima na gabe tujuan ni na deba halak Batak asa dibereng, asa dihormati asa diakui jala dijanghon torop halak na hebat jala na marhasil.

 

Ala na masa angka na manjua Jesus ndada na muruk Jesus disi, jala ndad na manolsoli Jesus disi. Ndada na gabe madabu Jesus tu kondisi putus asa manang gabe maheu jala mandate, ndang, alai baliksa sai marsihohot do tondina maereng dao dibagasan visi dohot missiNa laho patulushon angka ulaon na naeng siulahononnNa.    

            Ganup angka sangkap na manjua Jesus, laos i do na pahehehon semangatNa asa margogo laho pasarhon Barita na Uli tu huta hatubuanNa. Jala laos ditongos Ibana do angka siseanNa laho mangajari disi, jala dijalo Ibana do angka siseanNa asa mamaritahon tu ganup halak asa marhamubaon diri, jala dipabali angka siseanna i do sibois dohot na pamalum angka sahit. Jala tangkas ma tarida disi na masa panjuaon di Ibana laos gabe partingkian laho pahinsathon semangat ni angka siseanNa laho mangajarhon hasintongan tu angka jolma na di humaliangNa.

 

Molo taparrohahon angka na manjua angka halak na porsea mansai torop do di liat portibi on, tarlumobi di tonga ni bangsonta nang negaranta Indonesia on. Mansai maol dope hita halak na porsea di janghon angka na so sahorong manang na so sahaporsaon dohot hita. Godang dope na manulak halak Kristen, na mangambati hajongjongan ni huria manang gareja jala godang do na naung ditutup, ditutungi, jala di dangguri. Godang do na Intoleran, na so manjanghon halak Kristen nang Hata ni Debata. Godang angka nacaman, pangambati tu halak Kristen na naeng mangalului parsingkolaan nang parkarejoan nang angka jabatan di perusahaan nang di pemerintahan pe.

Tuhanta Jesus ma na ingkon tiruonta na margogo jala marsitutu laho mangula ulaonna laho pararathon barita na uli. Ndada holan di tingki na une dohot do ditingki na so une baritahononhon Barita na uli i.

 2 Timotius 4:2 Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion

Pemberitaan Injil sering diibaratkan seperti seseorang yang sedang pergi menabur, kita tidak tahu mana setiap taburan itu yang tumbuh dan menghasilkan buah. Pengkotbah 11:6 mengatakan: “Taburkanlah benihmu pagi-pagi hari dan janganlah memberi istirahat kepada tanganmu pada petang hari, karena engkau tidak mengetahui apakah ini atau itu yang akan berhasil atau kedua-duanya sama baik”. Tidak semua orang menerima baik setiap pemberitaan, kita akan menemukan bermacam-macam respon orang atas pemberitaan ini. Ada orang yang menerima dengan senang tetapi kemudian melupakan. Ada orang yang dengan terang melawan dan menolak pemberitaan. Ada juga yang menerima dengan sungguh-sungguh dan menghasilkan buah yang baik. Sehingga Paulus mengatakan: “Siap sedialah baik atau tidak baik waktunya,..rajinlah dan terus bekerja, selagi kesempatan itu diberikan kepada kita”. Paulus menjadikan dirinya sebagai teladan, bagaimana ia berusaha keras menjadi pemberita.

Allah tetap setia memperhatikan dan turun tangan dalam setiap proses kehidupan kita meski kita tidak setia/memperhatikan Dia dan perintah-perintahNya. Dia mengutus para hambaNya-sebagai perpanjangan tanganNya- untuk terus menerus memperingatkan umat agar kembali pada jalan yang benar.

 Apapun kedudukan dan kehebatan kita janganlah kiranya membuat kita menjadi lupa diri dan mengganggap apa yang kita punya (jabatan, kekayaan, kuasa, kehormatan) adalah karena kekuatan kita sendiri melainkan kiranya kita tetap menyadari kemahakuasaan Allah dalam kehidupan kita sehingga kita tetap rendah hati.

 Kekuatan utusan Allah terletak pada kuasa Roh yang dicurahkan Oleh Allah, untuk memampukan kita berdiri teguh dan berkarya memberitakan Firman dengan benar. Bukan pada kekuatan sendiri, sehingga ia datang dengan Otoritas Allah dan bertangungjawab pada Allah.

Sikap sujud, hormat dan pujian kita pada Allah hendaklah menunjukkan rasa siap kita untuk melakukan kehendak Allah bukan malah membuat kita terperangah dan tidak melakukan apapun. Oleh karena itu sudakah ibadah kita menolong kita untuk tanggap melaksanakan firman dan perintah Allah atau malah menjauhkan kita dari firman dan perintah Allah?

Panggilan Tuhan selalu dimulai dengan inisiatif Tuhan sendiri, dan bukan insiatif manusia. Ketika Tuhan memanggil kita, maka Tuhan akan memampukan kita untuk melakukan panggilan Tuhan. Amin.