Jamita Minggu PENTAKOSTA I (Hasasaor ni Tondi Parbadia) - 23 Mei 2021

“TONDI PANGAPUL DOHOT HASINTONGAN”

(ROH PENGHIBUR DAN KEBENARAN)

 

EV. Johannes 16: 4b - 15                                                                                            EP. Hesekiel 37: 11 - 14

 

Horas ma di hita saluhutna

Las rohanta sadari on, siala topet sadari on parningotan Hasasaor Tondi Parbadia manang Pentakosta. Ari Pentakosta ima namasa saor Tondi Parbadia tu angka apostel. Topet lima pulu ari dungkon parningotan ari haheheon ni Tuhanta Jesus Kristus na mate di hau pinarsilang laho manobud dosa ni jolma nang portibi on jala sampulu ari dungkon hananek Tuhanta Jesus tu Banua ginjang.

 

Molo sian sejarah Padan na Robi, ia Pentakosta uju i ima sada ari raya manang pesta di tongatonga bnagso Israel na dirayahon limapuluh ari dungkon masa Paskah jala paboahon naung mansohot gotilon.

Dibagasan turpukta on Johanes 16:4B-15 dipaboahon Jesus na naeng laho ma Ibana laho manadinghon angka siseanNa. Naung dipasahat Jesus do tu angka siseanNa tonaNa na ro ma angka hamaolon na naeng siadopan nasida dungkon laho Ibana tu Surgo. Jala ndang boi nasida mangarop hasonangan ni ngolu na dao sian angka hasusaan songon najolo. Ia najolo diarop nasida do harajaon ni portibi dohot hamuliaon ni Jesus, jala dirimpu nasida do najolo pasidohot disi marsinondang jala gabe manggomgomi dohot Ibana. Alai ndang songon i siboluson nasida, alai angka hamaolon, panaritaan, jala na mambahen marsak roha nasida.

Angka sisean i gabe maoto jala mandele, siala gabe magoan nasida di Jesus. Alai didok Jesus tu nasida marhapatean tu na denggan do saluhutna i, molo laho pe Jesus borhat, ai na ro ma Tondi Parbadia, Tondi Pangurupi. Ditingki hajolmaon ni Jesus, ndada sai boi Jesus raphon nasida di pamingkiron, di roha nang panghilaan nasida. Naung pulik do nasida sian inganan nang partingkian, alai ndang adong batasna molo dibagasan Tondi. Ia tondi i ima Tondi Parbadia na mangula songon:

a.       Pangapuli (ay.4b-7), lapatan ni “Tondi” sian hata Heber; ‘Ruahk’ lapatanna: alogo, angin, napas, kuasa, ilahi. Molo di Hata Gorik didok “ Pneuma” lapatanna Tondi na mangalehon hangoluan na so tarida. Laia molo lapatan ni “parbadia” lapatanna badia, na so martihas. Tondi Parbadia ima Tondi ni Debata, Tondi na haruar sian Debata Jahowa, Tondi na sian Debata, Tondi ni Debata sandiri. Hata “Pangapul” di hata Gorik di dok ‘paraklethos’ lapatanna pangapuli (mangalehon roha na sonang, jala dame). Tondi Parbadia sai na ro tu hita ganup laho mangurupi manang mangalehon pangapulion tu angka siseanNa asa hehe manghatindangkon taringot tu Jesus Kristus nang dibagasan hasusaan nasida manang dbagasan hamaolon.

b.      Naung dipatorang Jesus do tu angka siseanNa, ia dumenganan do Ibana laho tu madinghon nasida manomunomu Debata Ama i di Surgo. Asa boi Ibana manongot Tondi Parbadia songon Tondi Pangapuli tu nasida.

 

Ulaon ni Tondi Parbadia. Dipatorang Tuhanta Jesus do ia na ro ma Tondi Pangapul, jala godangma na niulana: Ima laho pabotohon tu portibi on, mamaritahon hasintongan, pasahathon uhuman tu angka pardosa siala ndang porsea tu Tuhan Jesus

1)      Tondi Parbadia pasingothon halak pardosa. (16:8 Anggo dung ro Ibana, ajaranna do portibi on taringot tu dosa dohot taringot tu hapintoron dohot taringot tu uhum). Dung madabu jolma pardjolo i tu bagasan dosa, sai disusai dosa i do. Parsaoran ni jolma dohot Debata pe gabe sega do jala ndang denggan be. Jolma naung madabu tu bagasan dosa i gabe mandao manadinghhon Debata. I do umbahen sada ulaon ni Tondi Parbadia ima mamboan jolma i asa muba sian hadosaonna. Marhite huaso, habisuhon nang parbinotoan na sian Debata, sai ajaron ni Tondi Parbadia do hita, dipodai, diarahon asa marhamubaon ni roha jala mangantusi ia parbue ni dosa ima hamatean. Asa muba angka pardosa i tumadinghon dalanna manomu Debata marhite tangiang, ende pujian, hamauliateon ni rohana, pamujion, mamparbadia dohot manghobasi Hata ni Debata. Lukas 5:32 “Ndang na ro Ahu manjou angka partigor, asa dipauba rohana, angka pardosa, i do!” Lapatanna paboahon na ro do Tuhanta i ndada manjou halak na tigor roha alai angka pardosa i do asa tumadingkon dalanna.Ul.Ap. 3:19 “Antong, pauba jala paulak hamu ma rohamuna, asa tarsesa dosamuna.” Dipaingot Ap.Paulus do nang hita asa sadar jala marhamubaon ni roha, manadinghon haholomon, nang ngolu na robi tu haimbaruon dibagasan Kristus Jesus. (Ul.Ap.8: 22).

2)      Tondi Parbadia paboahon hasintongan (Joh.16: 13). Hata ni Debata na mandok ia molo ro Tondi hasintongan i, patuduhononna do dalan tu hasintongan i. Jala hasintongan ni ndada sian dirina alai hasintongan na pinasahathna i ima sintuhu jala hasintongan na binegena dohot niidaNa siala huaso ni Debata. Dipaingot Tondi Parbadia i do hita ia Debata do Tondi i. Siala ni i manang ise na manomba Tuhanta Debata, marsomba ma ibana dibagasan Tondi dohot hasintongan. Hata ni Debata di Johannes 4: 24 “Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan.”

3)      Tondi Parbadia pasahathon uhuman. Saonari tajaha ma jolo Johanes 16:10 11 Anggo taringot tu hapintoron, i ma na laho Ahu manopot Damang, jadi ndang be idaonmuna Ahu. Anggo taringot tu uhum, i ma naung hona uhum induk ni portibi on.” Adong hasintongan, na laho do Jesus Kristus tu Debata Ama i, jala nasida angka sisean i dohot hita nuaeng ndang be marnida Jesus i. Molo sian panguhuman do, naung sahat do panguhuman tu angka panggomgomi na di portibi on. Sintong do panguhumanNa i, ala ndada sian diriNa sandiri i, naniulahonNa do i raphon Debata Ama na marsuru Ibana. Johannes 8:16 “Jala ia manguhum pe Ahu, sintong do uhumhu. Ai ndada na mamunjung Ahu; na marsuru Ahu, i do donganku disi.” Sian partingkian ni Debata ima tingki na binuhulNa i, boi do berengonta taringot tu hasintongan ni paruhuman na dipatupa Debata Ama i. Ima panguhuman na gok hatigoranna jala na patamahon hita gabe partohap di HarajaonNa. Hita halak na porsea na manarita siala mangihuthon Jesus dohot na mangulahon HataNa sai na lehononNa do hangoluan na manongtong,na gok las ni roha di hrajaon ni Debata di Surgo i. Laos songon i do di dok di 2 Tesalonik 1 : 5, na mandok : “ I ma tandana, paboa na ro ma paruhumon ni Debata na tigor i; asa disi ma patar hatauonmuna tu harajaon ni Debata, dung jolo manaon na porsuk i hamu humongkopsa.”

4)      Ulaon ni Tondi Parbadia na asing. Ulaon ni Tondi Parbadia muse ima na laho mamuji, mamparbadia i Debata jahowa, mamaritahon Barita na uli, jala laos margogoihon hita angka na porsea asa lam umbiaran mida Jahowa Debata asa sian na asing di portibi on. Johannes 16: 14 – 15 Pasangaponna do Ahu, ai jaloonna do na di Ahu, laho mamaritahonsa tu hamu. Saluhut na di Ama i, di Ahu do i, umbahen na hudok: Jaloonna do na di Ahu, laho mamaritahonsa tu hamu.” Sasintongna naung mangula do mansai bahat Tondi Parbadia i. Boi gabe maol taantusi angka ulaon ni Tondi Pangapul i di pardalanan ni ngolunta. Ulaon ni Tondi Parbadia ndada paubahon roha ni torop jolma na mardosa, mamaritahon hasintongan dohot na holan pasahathon uhuman. Alai dohot do Tondi Parbadia i mangajari, mangalatih jala mangarahon hita tu dalan na tigor i. Jala dohot do Tondi i mamoda i, patuduhon dohot paingothon hita asa sai marsihohot hita martangiang, marminggu dohot mandok mauliate tu Debata. Asa marsihohot hita mamuji, pasangaphon dohot manomba Ibana jala sai ingotonta pasahathon peleanta laos lam malo mangulahon hata nang Patikna i. Amen.