Jamita Minggu Trinitatis (Hasitolusadaon ni Debata) -30 Mei 2021

“DISURU DEBATA DO ANAKNA JALA DIPASAORHON DO TONDINA”

(ALLAH MENGUTUS PUTRANYA DAN MENGARUNIAKAN ROHNYA )

 

EV. Johannes 3: 31- 36                                        EP. Jesaya 6 : 1 – 8

 

Horas ma di hita saluhutna.

Dipatorang do andorang turpukta on taringot pangulaon ni Jesus di luat Judea jonokhon Jerusalem. Dipaboa do taringot Jesus dohot angka siseanNa na mandidi jonokhon inganan pandidion ni si Johannes pandidi. Diulahon angka sisean ni Jesus do pandidion i, dipatupa nasida do i manorushon naung diulahon Johannes pandidi ima papulik halak Israel nanaeng siparadeon laho manomunomu haroro Sipalua i, ima Mesias i, papulik nasida sian angka halak Israel na so olo mangihuthon mangolu dibagasan hasintongan. Alai molo tajaha di Joh.4: 2, ndada marhite aek Jesus mandidihon alai marhite pasaorhon Tondina na so tingkina dope, alai patupaonNa do i di tingki dipelehon Ibana diriNa tu adopan ni Debata Ama dungkon manesa dosa (Hbr. 1: 3; Joh.16: 7-13). Ndada marhite aek Ibana mandidi, alai angka siseanNa i do namandidihon marhitehite aek.

Alai dipaboa di Ay.26, dungkon na marsual nasida taringot tu pandidion dohot angka halak Jahudi, dipaboa nasida do tu Johannes Pandidi ia angka sisean ni Jesus dohot do patupahon pandidion. Godang do angka horong parhobas na patupahon pandidion di luat i. Ditingki marsual angka sisean ni si Johannes pandidi dohot angka halak Jahudi, boi do nasida mandok na sintong pandidion ni si Johannes pandidi siala naung torop angka sisean ni si Johannes sian angka halak Jahudi na dohot patupahon pandidion di luat i. Dao tumimbo huaso dohot na ditangihon dohot na mangihuthon si Johannes pandidi martimbanghon angka pangajari halak Jahudi. Ido umbahen na di Ay.25 angka sisean ni si Johannes pandidi mangagahon guruna i sian angka torop ni siihuthon si Johannes dohot halak Jahudi na marsual dohot nasida. Alai nang pe monang nasida sian angka halak Jahudi sian pandapot nasida i, diboto nasida do adong dope horong na tumorop parsidohotna ima horong na mangihuthon Jesus. Torop do na mangihuthon Jesus, angka siseanna mansai bahat sian n amangihuthhon si Johannes pandidi (Joh.4: 1). I do umbahen di ay.25 i sahat ma rohanasida laho manaringoti Jesus tu si Johannes Pandidi di ay.26 “Gurunami, Halak i na ro tu jolom, di ipar ni aek Jordan, na hinatindangkonmi, I do mandidihon nuaeng, gabe saluhut halak ro mandapothon Ibana.” Dipasingot si Johannes do sisesanna i ala di roha ni angka siseanna naung bongak nasida sian angka na asing.

Angka sisean ni si Johannes sai pabongak diri ala guru nasida si Johannes Pandidi martimbanghon angka guru na asing dohot angka siseanna. Alai gabe ganggu rohanasida molo adong guru dohot siseanna na umbalga jala targanggu do rohanasida disi. Ido umbahen di pasingot si Johannes pandidi angka siseanna i di ay.27 ndang adong na boi mambuat angka silehonlehon na sian banuaginjang i. Ndada adong na boi marhasil marhobas sian dirina sandiri. Tuhan Debata do na mangalehon i tu si Johannes pandidi na naeng silehononNa. Angka parhobas holan na mangulahon ulaonna do na dipasahat Debata tu ibana. Si Johannes pandidi mangulahon i laho paradehon dalan tu Sipalua i ima Mesias i. Lapatanna paradehononna do angka jolma laho porsea dohot mangihuthon Jesus ndada mangihuthon dirina. Las ni roha si Johannes pandidi ima  mamereng Jesus i lam balga jala lam di patimbo. Las ni rohana ima mamereng dohot mambege  soara ni Jesus manjou angka siseanNa mangihuthon Jesus. Ia soara ni si Johannes pandidi nanget nanget do i gabe mago. Soara na mangarahon angka na umbege ibana laho mangalehon diri na tigor torus mamereng dompak Jesus, ndada tu dirina sandiri. Mansai uli na didok si Johannes pandidi di ay.30 “Ianggo Ibana, patut lam ganda; lam moru ma anggo ahu”. Boasa songon i didok si Johannes pandidi, sialana ima:

a.       Ay.31; na ro do Jesus sian ginjang, na tumimbo sian angka angka panurirang diape i tarmasuk ma si Johannes pandidi. Dipasahat Jesus do HataNa songon harorona sian ginjang. Ibana do na mangatasi saluhut angka na tinompa. Ndada sian tanoon na nihatahanna, alai na sian surgo i do nihatahononNa. Dia do na umbalga ? Johannes do manang Jesus ? Si Johannes mandok holan Jesus do na umbalga.

b.      Ay.32; dihatindanghon Jesus do na niadopanna, ima parsaoran haholongon dohot Debata Ama na di Surgo i. Dipaboa Ibana do songon sitindangi na mananda Debata Ama i. Ndada hatahononNa taringot tu Debata Ama i sian pandohan ni jolma. Ndada adong na boi paboahon taringot tu Debata Ama i dohot sintong jala tangkas ia so holan Jesus i sandiri.

c.       Ay.34; Dilehon Debata Ama i do Tondi Parbadia na songkal i tu Jesus songon suruan ni Debata. Jesus ima na sinuru ni Debata dibasabasahon Tondi Parbadia lobi sian na asing. Digohi Tondi Parbadia do si Johannes Pandidi sian bortian ni dainang (ptd. Luk.1:15). Ise ma na boi manghatindanhon huaso ni Tondi Parbadia na mangula dibagasan dirina sandiri ia so sian si Johannes? Na marjamita do ibana marhite huaso ni Tondi Parbadia. Na marhobas do ibana marhite huaso ni Tondi Parbadia. Ndada na adong tudoshon ibana dohot angka uluan ni halak Jahudi di tingki i. Ibana do na manjoloani manang ise pe siala huaso ni Tondi Parbadia na mangula marhitehite ibana. Alai dia ma na nidok ibana taringot tu Kristus? Didok ibana dibasabasahon Debata do Tondi Parbadia tu Jesus Kristus na so marbatas (ay.34)! Ndada si Johannes alai tu Jesus Kristus do dipasaorhon hagogok ni Tondi Parbadia singkop. Ima parhataan na marhuaso na digohi marhite Tondi Parbadia. Dihatindanghon ibana do ia Jesus do na rumingkot, jala dihogi Tondi Parbadia do Jesus songon na sinuru ni Debata Ama i. Jesus do na manjoloani sude angka panurirang, Johannes Pandidi dohot sude angka jolma na ginohan ni Tondi Parbadia. Sian pangantusion on, taboto ma hasongkalon ni asi ni roha ni Jesus Kristus na papadanhon mangalehon Tondi Parbadia tu huriaNa (Joh.14:16, 17, 26; Luk.11:13; Ul.Ap.1:8). Hita do huriaNa naung dipasarhon Tondi Parbadia songon na tu Tuhanta Jesus Kristus i. Na dipasahat Debata Ama i tu Jesus, laos i do na dipasahat Tuhanta Jesus tu hita angka na porsea. Naeng ma hita mangolu dibagasan Tondi Parbadia. Laos marparbuehon parbue ni Tondi (Gal.5: 22). Halak na mangolu dibagasan haimbaruon ima na marnampunahon haporseaon dibagasan Jesus Sipalua i, jala mangolu dibagasan hamubaon (adong transformasi) dibagasan ngoluna. Hamubaon sian na mangolu dibagsan hadosaon, alai nanget nanget maruba tu na mangolu dibagasan hasintongan dohot hatigoran ni Jesus Kristus. Perubahan manang transformasi ima na diulahon Tondi Parbadia di angka halak na porsea. Tondi Parbadia ima pribadi ni Debata, di hata gorik didok do Tondi Parbadia i “Parakletos” lapatanna, na tarjou jala disuru laho mangurupi halak.”

d.      Ay. 35: Jesus do panean ni Harajaon ni Debata. Dipasahat Debata Ama i do tu adopan ni Jesus Kristus. Ndang adong tudosanna tu na asing ia so holan Jesus Kristus i sandiri. Sude harajaon ni Debata dipasahat Ama i do tu AnakNa i Jesus Kristus i. Tu Ibana ma saluhut angka raja na di portibi on marsomba (Psl. 2:10-11). Ibana ma panean ni harajaon, panguhum na tigor, hasongkalon, na manean huaso na sian Debata Ama i. Ise ma si Johannes i? Holan na joujou do si Johannes asa torop jolma na marhamubaon ni roha, torus mamereng Jesus i, tarhatotong rohana tu Jesus, manghaholongi Jesus, mangihuthon, manomba dohot mangoloi Ibana. Sude jolma ingkon ro tu Jesus. On ma tugas  ni si Johannes. Mambahen oroan i mamereng tu Si pangoli ima Jesus i, mambahen sude halak Israel ro jala marsomba tu Jesus.

 

On ma habalgaon ni si Johannes Pandidi. Marhuaso do ibana di panghobasionna siala niuluhon ni Tondi Parbadia, disoadahon do dirina jala dipatimbo do Jesus.

Tu hita ruas ni huria, on ma na taparrohahon sian jamita on. Pambahenan ni si Johannes Pandidi na marhobas diadopan ni Debata laho  pabalgahon goar ni Jesus i. Ndada dirinta be na sai taparrohahon, tapanotnoti, ndada tu toru manang tu portibi on be parohahononta, alai tigor jala fokus mamereng dompak ginjang. Dompak huaso, hasintongan, nang hatigoran ni Debata.

Molo joujou hita mangido dibagasan Jesus, jala mangido hita dibagasan tangiang tu Ama i marhitehite goar ni Jesus, sai na lehonon ni Debata Ama i do. Ndanda na tama hita manjalosa alai siala Tuhanta Jesus na patamahon hita manjalosa. Efesus 3:12 Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana.

Jadi pos ma rohanta dibagasan haporseaon na marhuaso do Jesus laho tumangihon angka tangiangta dohot patupahonsa. Didok Ap. Paulus do ia goar ni Jesus ima goar na marhuaso sian saluhut goar. Holan goarNa i do na boi manaluhon nasa huaso di langit nang di portibi on. Songon lagu di Buku Endenta No. 453  “Sada goar na umuli.”

1.       Sada goar na umuli sian nasa goar I, goar ni Tuhanta Jesus, I do na umuli. I, goarMi, Tuhanki, holan I do endengki, goarMi, Jesuski do pamalum rohangki.

2.       Tung na malum do rohangku, nunga sonang tondingki,GoarMi do sinjatangku dompak angka musu i. GoarMi..........

3.       Sipalua do goarMu, saut malua tondingki.Nasa rante ni sibolis ingkon sega baenon nii. GoarMi............

4.       Sai endehon ma goarNa, burju hatindangkon I, Paima sahat hita sogot lao sumomba Tuhan I. GoarMi..........

 

Sai mabiar do Sibolis i mambege goar ni Jesus, jala holan goar ni Jesus i na boi mandopang jala mangusir angka tondi ni sibolis i. Heber 1 :4 Songon surung ni Goarna na tineanna i, na mangatasi angka surusuruan, songon i do surung ni hasangaponna martimbangkon nasida.

Patut do hita marlas ni roha di Jesus Kristus Tuhanta i ndada pasombuonNa hita. Naung dipasaor do TondiNa ima Tondi Parbadia tu angka na porsea asa margogo laho manghatindanghon Jesus i dibagasan ngolunta. Ndang adong be biar, manang ganggu ni rohanta laho paboahon taringot tu Jesus tu halak na so porsea dope. Alai adong do halak na so porsea di Jesus, bali sian haporseaonna, ditadinghon Jesus holan ala na di portibi on, ala ni materi, jabatan, jodoh, dilupahon do Jesus. Hape lobi sian na tahirim, lobi sian na tahasiholi na di portibi on lehonon ni Tuhanta i do. Tarlumobi hasesaan ni dosanta i gabe parjambar hita di Harajaon ni Debata. Ala ni i tapatimbo ma Goar ni Tuhanta Jesus i dibagasan ngolunta siganup ari, sahat di hasusuda ni bohalta.

Pilipi 2:9 – 10 Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano.

Amen.

 

Jamita Minggu PENTAKOSTA II (Hasasaor ni Tondi Parbadia) - 24 Mei 2021

“DIPAIMBARU MARHITE TONDI PARBADIA”

(Pembaharuan Oleh RoI)

 

EV. Rom 8: 1 – 8                                                 EP. Joel 3: 1 – 2

 

Horas ma di hita saluhutna, Selamat Ari Pentakosta napaduahon.

Na mansai hona tu roha taringot di pangantusion halak Gorik di abad na parjolo ima dualisme. Adong parasingan ni pamatang, tondi dohot roha. Pamatang (dihata Gorik: Sarks, daging)

 

Dibagasan turpuk on ima sada metode ni pangajaran ni Apostel Paulus. Dipangke Ap.Paulus do pangantusion ni budaya hatiha i. Laho patangkashon taringot tu ngolu na imbaru dibagasan Jesus Kristus. Na dipingkiri nasida  taringot tu ngolu ni pardagingon dohot ngolu ni partondion. Mangolu dibagasan pardagingon ima na laho tu hamatean ma i. Hagiothagiot ni daging ima pangalaosion tu Debata jala hamatean. Mangolu dibagasan pardagingon ima hangoluan na so tu dos tu lomo ni roha ni Debata. Ido umbahen di patorang Ap.Paulus tu angka ruas ni huria asa manadinghon ngolu dibagasan daging alai dibagasan partondion. Maralo tu ngolu ni pardagingon, mangolu dibagasan partondion ima na mangolu hombar tu lomo ni roha ni Debata.

 

Ia halak na mangolu holan dibagasan pardagingon ima na nirajaan ni hagiot ni roha, jala ndang dos tu lomo ni roha ni Debata. Dipaingot turpuk on do hita asa mian jala mangolu dibagasan partondion. Na mangolu dibagasan partondion ima na boi mangarajai hagiothagiotna.

Halak Kristen tarjou do laho mangalatih dirina asa unang nirajaan ni hagiot ni rohana nang dagingna. Angka parsualon na metmet boi do gabe balga. Angka pangalaho na so tama boi do manegai sude hangongolu. Saluhutna siala nirajaan ni hagiot ni roha. Lapatanna sai masirapusan do angka hagiot ni daging dohot partondion asa dihamonanghon halak na porsea tu hagiot ni partondion jala mamboan las ni roha dinasida.

 

 

Ndada boi hita nangolu di dua pangalaho; ima na mangolu di pardagingon dohot partondion siala naung ditobus Jesus Kristus do hita gabe ianakhon ni Debata Ama i. Naung dibagasan Kristus mangolu ma dibagasan tondi. Tondi Parbadia ma na mangarajai rohanta nang ngolunta asa lam marbisuk, margogo, marlas ni roha mangulahon Hata ni Debata. Ulaonta songon angka naporsea ima laho manghatindanghon haporseaonta i di Tondi Parbadia na mangula dibagasan ngolunta.

 

 Dipesta parningota hasasaor ni Tondi Parbadia na paduahon on paingothon hita di semangat pelayanan mamaritahon, manghatindanghon huaso ni Tondi Parbadia na manggohi roha nang pingkiranta. Ala ni sai tinggil ma sipareonta laho tumangihhon soara ni Tondi Parbadia i. Molo adong pe soara na asing,manang angka soara ni sibolis laho paliluhon hita, sai tatulak do i siala sai soara ni Tondi Parbadia do na tahasiholi, tatangihon dohot taulahon. Angka na porsea na tumangihon soara ni Tondi Parbadia ima na olo mangulahon lomo ni roha ni Debata Ama i, jala marhite ima dipaimbaru ngoluna tu hatiuron ni Kristus Jesus. Amen.

Jamita Minggu PENTAKOSTA I (Hasasaor ni Tondi Parbadia) - 23 Mei 2021

“TONDI PANGAPUL DOHOT HASINTONGAN”

(ROH PENGHIBUR DAN KEBENARAN)

 

EV. Johannes 16: 4b - 15                                                                                            EP. Hesekiel 37: 11 - 14

 

Horas ma di hita saluhutna

Las rohanta sadari on, siala topet sadari on parningotan Hasasaor Tondi Parbadia manang Pentakosta. Ari Pentakosta ima namasa saor Tondi Parbadia tu angka apostel. Topet lima pulu ari dungkon parningotan ari haheheon ni Tuhanta Jesus Kristus na mate di hau pinarsilang laho manobud dosa ni jolma nang portibi on jala sampulu ari dungkon hananek Tuhanta Jesus tu Banua ginjang.

 

Molo sian sejarah Padan na Robi, ia Pentakosta uju i ima sada ari raya manang pesta di tongatonga bnagso Israel na dirayahon limapuluh ari dungkon masa Paskah jala paboahon naung mansohot gotilon.

Dibagasan turpukta on Johanes 16:4B-15 dipaboahon Jesus na naeng laho ma Ibana laho manadinghon angka siseanNa. Naung dipasahat Jesus do tu angka siseanNa tonaNa na ro ma angka hamaolon na naeng siadopan nasida dungkon laho Ibana tu Surgo. Jala ndang boi nasida mangarop hasonangan ni ngolu na dao sian angka hasusaan songon najolo. Ia najolo diarop nasida do harajaon ni portibi dohot hamuliaon ni Jesus, jala dirimpu nasida do najolo pasidohot disi marsinondang jala gabe manggomgomi dohot Ibana. Alai ndang songon i siboluson nasida, alai angka hamaolon, panaritaan, jala na mambahen marsak roha nasida.

Angka sisean i gabe maoto jala mandele, siala gabe magoan nasida di Jesus. Alai didok Jesus tu nasida marhapatean tu na denggan do saluhutna i, molo laho pe Jesus borhat, ai na ro ma Tondi Parbadia, Tondi Pangurupi. Ditingki hajolmaon ni Jesus, ndada sai boi Jesus raphon nasida di pamingkiron, di roha nang panghilaan nasida. Naung pulik do nasida sian inganan nang partingkian, alai ndang adong batasna molo dibagasan Tondi. Ia tondi i ima Tondi Parbadia na mangula songon:

a.       Pangapuli (ay.4b-7), lapatan ni “Tondi” sian hata Heber; ‘Ruahk’ lapatanna: alogo, angin, napas, kuasa, ilahi. Molo di Hata Gorik didok “ Pneuma” lapatanna Tondi na mangalehon hangoluan na so tarida. Laia molo lapatan ni “parbadia” lapatanna badia, na so martihas. Tondi Parbadia ima Tondi ni Debata, Tondi na haruar sian Debata Jahowa, Tondi na sian Debata, Tondi ni Debata sandiri. Hata “Pangapul” di hata Gorik di dok ‘paraklethos’ lapatanna pangapuli (mangalehon roha na sonang, jala dame). Tondi Parbadia sai na ro tu hita ganup laho mangurupi manang mangalehon pangapulion tu angka siseanNa asa hehe manghatindangkon taringot tu Jesus Kristus nang dibagasan hasusaan nasida manang dbagasan hamaolon.

b.      Naung dipatorang Jesus do tu angka siseanNa, ia dumenganan do Ibana laho tu madinghon nasida manomunomu Debata Ama i di Surgo. Asa boi Ibana manongot Tondi Parbadia songon Tondi Pangapuli tu nasida.

 

Ulaon ni Tondi Parbadia. Dipatorang Tuhanta Jesus do ia na ro ma Tondi Pangapul, jala godangma na niulana: Ima laho pabotohon tu portibi on, mamaritahon hasintongan, pasahathon uhuman tu angka pardosa siala ndang porsea tu Tuhan Jesus

1)      Tondi Parbadia pasingothon halak pardosa. (16:8 Anggo dung ro Ibana, ajaranna do portibi on taringot tu dosa dohot taringot tu hapintoron dohot taringot tu uhum). Dung madabu jolma pardjolo i tu bagasan dosa, sai disusai dosa i do. Parsaoran ni jolma dohot Debata pe gabe sega do jala ndang denggan be. Jolma naung madabu tu bagasan dosa i gabe mandao manadinghhon Debata. I do umbahen sada ulaon ni Tondi Parbadia ima mamboan jolma i asa muba sian hadosaonna. Marhite huaso, habisuhon nang parbinotoan na sian Debata, sai ajaron ni Tondi Parbadia do hita, dipodai, diarahon asa marhamubaon ni roha jala mangantusi ia parbue ni dosa ima hamatean. Asa muba angka pardosa i tumadinghon dalanna manomu Debata marhite tangiang, ende pujian, hamauliateon ni rohana, pamujion, mamparbadia dohot manghobasi Hata ni Debata. Lukas 5:32 “Ndang na ro Ahu manjou angka partigor, asa dipauba rohana, angka pardosa, i do!” Lapatanna paboahon na ro do Tuhanta i ndada manjou halak na tigor roha alai angka pardosa i do asa tumadingkon dalanna.Ul.Ap. 3:19 “Antong, pauba jala paulak hamu ma rohamuna, asa tarsesa dosamuna.” Dipaingot Ap.Paulus do nang hita asa sadar jala marhamubaon ni roha, manadinghon haholomon, nang ngolu na robi tu haimbaruon dibagasan Kristus Jesus. (Ul.Ap.8: 22).

2)      Tondi Parbadia paboahon hasintongan (Joh.16: 13). Hata ni Debata na mandok ia molo ro Tondi hasintongan i, patuduhononna do dalan tu hasintongan i. Jala hasintongan ni ndada sian dirina alai hasintongan na pinasahathna i ima sintuhu jala hasintongan na binegena dohot niidaNa siala huaso ni Debata. Dipaingot Tondi Parbadia i do hita ia Debata do Tondi i. Siala ni i manang ise na manomba Tuhanta Debata, marsomba ma ibana dibagasan Tondi dohot hasintongan. Hata ni Debata di Johannes 4: 24 “Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan.”

3)      Tondi Parbadia pasahathon uhuman. Saonari tajaha ma jolo Johanes 16:10 11 Anggo taringot tu hapintoron, i ma na laho Ahu manopot Damang, jadi ndang be idaonmuna Ahu. Anggo taringot tu uhum, i ma naung hona uhum induk ni portibi on.” Adong hasintongan, na laho do Jesus Kristus tu Debata Ama i, jala nasida angka sisean i dohot hita nuaeng ndang be marnida Jesus i. Molo sian panguhuman do, naung sahat do panguhuman tu angka panggomgomi na di portibi on. Sintong do panguhumanNa i, ala ndada sian diriNa sandiri i, naniulahonNa do i raphon Debata Ama na marsuru Ibana. Johannes 8:16 “Jala ia manguhum pe Ahu, sintong do uhumhu. Ai ndada na mamunjung Ahu; na marsuru Ahu, i do donganku disi.” Sian partingkian ni Debata ima tingki na binuhulNa i, boi do berengonta taringot tu hasintongan ni paruhuman na dipatupa Debata Ama i. Ima panguhuman na gok hatigoranna jala na patamahon hita gabe partohap di HarajaonNa. Hita halak na porsea na manarita siala mangihuthon Jesus dohot na mangulahon HataNa sai na lehononNa do hangoluan na manongtong,na gok las ni roha di hrajaon ni Debata di Surgo i. Laos songon i do di dok di 2 Tesalonik 1 : 5, na mandok : “ I ma tandana, paboa na ro ma paruhumon ni Debata na tigor i; asa disi ma patar hatauonmuna tu harajaon ni Debata, dung jolo manaon na porsuk i hamu humongkopsa.”

4)      Ulaon ni Tondi Parbadia na asing. Ulaon ni Tondi Parbadia muse ima na laho mamuji, mamparbadia i Debata jahowa, mamaritahon Barita na uli, jala laos margogoihon hita angka na porsea asa lam umbiaran mida Jahowa Debata asa sian na asing di portibi on. Johannes 16: 14 – 15 Pasangaponna do Ahu, ai jaloonna do na di Ahu, laho mamaritahonsa tu hamu. Saluhut na di Ama i, di Ahu do i, umbahen na hudok: Jaloonna do na di Ahu, laho mamaritahonsa tu hamu.” Sasintongna naung mangula do mansai bahat Tondi Parbadia i. Boi gabe maol taantusi angka ulaon ni Tondi Pangapul i di pardalanan ni ngolunta. Ulaon ni Tondi Parbadia ndada paubahon roha ni torop jolma na mardosa, mamaritahon hasintongan dohot na holan pasahathon uhuman. Alai dohot do Tondi Parbadia i mangajari, mangalatih jala mangarahon hita tu dalan na tigor i. Jala dohot do Tondi i mamoda i, patuduhon dohot paingothon hita asa sai marsihohot hita martangiang, marminggu dohot mandok mauliate tu Debata. Asa marsihohot hita mamuji, pasangaphon dohot manomba Ibana jala sai ingotonta pasahathon peleanta laos lam malo mangulahon hata nang Patikna i. Amen.

Renungan Partangiangan Minggu PENTAKOSTA 1, Rabu- 19 Mei 2021

TONDI PANGAPUL DOHOT HASINTONGAN

 (Roh Penghibur dan kebenaran)

Yehezkiel 37: 11 – 14

Di hita nahinaholongan dibagasan Jesus Kristus

Dibagasan turpuk on, panurirang Hesekiel marnida panurirangon taringt tu anga holiholi na dipahehe. Ima haheheon ni halak Israel. Panurirang Hesekiel disuru Debata laho marhobas tutongatonga bangsoNa na dibagasan habuangan Babel hatiha i. Sai digogohon si Hesekiel do hamubaon ni roha ni bangso i sian halumlamon, pangalaho na so tama, jala ndang burju maradophon Debata (sai dipangashaon do hagogoon bangso Asyur asa sian Debata,jala partangiangan nasida pe holan hasomalan sambing do na so marimpola).

 

Panurirangon si Hesekiel taringot tu haheheon ni bangso Israel di turpuk on dungkon hirahira 10 taon nasida di habuangan babel. Uju i Bagas Joro ni Debata nunga marongso marhite gogo ni bangso Babel, sian segi politik naung talu do Bangso Israel, jala sian haporseaon pe naung mago do nasida sian adopan ni Debata, ndang denggan be parsaoranna dohot Debata. Siala Bagas Joro ni Debata hatiha i marguna do di parugamoon nasida jala na rumingkot di nasida, gabe pusat hangoluan ni haporseaon ni Bangso Israel hatiha i.

Disituasi si songon i jongjong do si Hesekiel laho maningtinghon panghirimon na imbaru na naeng sipatupaon ni Debata. Sada barita las ni roha do on di bangso Israel na di habuangan i. Dijalo si Hesekiel do pangungkapon taringot Tondi ni Debata na mamboan ibana di tongatonga ni rura na gok angka holiholi na mahiang na marserakan. DI Padan na Robi, holiholi dilapati do i songon lambang ni hagogoon dohot hahotan ni ngolu manisia. Hjoliholi na marserak di rura i boi do i siala parporangan Israel Utara dohot Israel Selatan siala kondisi ni bangso Israel hatiha i bola gabe dua bagian. Na dua bagian bangso i manandinghon Debata jala ganup nasida mangusahahon hagogoon ni ganup bangsona laho marporang. Ido umbahen mansai godang na marmatean di parporangan i.

 

Ahama na masa dung manurirangi si Hesekiel ? na masa do halongangan bolon?

37:5 Songon on do hata ni Tuhan Jahowa tu angka holiholion: Ida ma, ahu mangalehon * tondi tu bagasan hamu, asa mangolu hamu.

37:6 Jala ahu mangalehon tu atas hamu angka uraturat dohot patubuhon sibuk di atas hamu, jala ahu mambahen hamu marhulingkuling huhut mangalehon tondi tu bagasan hamu, asa mangolu hamu, asa tung ditanda hamu, ahu do Jahowa!

37:7 Jadi * manurirangi ma ahu songon naung tinonahon i tu ahu, jadi di na manurirangi i ahu ro ma sada soara, jala ida ma, masa soara na marngongos, gabe masitopotan angka holiholi ganup tu donganna.

37:8 Dung i hubereng ma, gabe ida ma, nunga maruraturat nasida, jala tubu sibuk, jala leap hulingkuling di atasnasida, alai ndang adong dope anggo tondi di bagasan nasida.

37:9 Dung i ninna ibana ma tu ahu: Manurirangi ma ho tu tondi i, manurirangi ma ho tutu ale anak ni jolma, jala dohononmu ma tu tondi i; songon on do hata ni Tuhan Jahowa: Ro ma ho ale tondi sian desa na opat i jala mangullus ma ho tu bagasan halak na binunu on, asa mangolu nasida

 

Aha ma nanaeng sipasahaton si Hesekiel tu Bangso Israel on? Jala laos ido nanaeng sipasahaton ni si Hesekiel tu hita nuaeng:

 

1. Ia ngolu ni jolma molo  marhosa, na mate do goaron i. Ditompa Debata do jolma i sian tano jala diuludhon do hosa hangoluan tu parnianggoanna (1 Musa 2:7). Dipaingot Debata muse bangso Israel ia so marhite huaso ni Debata sai na tu hamatean do dalan ni bangso i. Sai dipangasahon bangso Israel do hagogoonna tu bangso Asyur di hatiha i, molo sian pikiran nasida naung margogo ma i laho marporang. Alai dipaloas Debata do Harajaon Babel i laho mandopang jala talu Harajaon Asyur dohot Israel, asa gabe targade jala tarbuang ma bangso Israel tu babel.

Alai disituasi i ndang mahohom Debata, sai holong do rohana mida bangsoNa i marhite panurirangon taringot tu hamamalum ni bangso i. Dia ma i:

1. Hamamlum ni pardagingon. Dibagabagahon Debata do paulihon tano dohot hajongjongan ni bangso i. Sian visi, pemulihan digombarhon marhite na marsada sude angka holiholi i, naung sirang hian. Marhite angka urat na pasadahon holiholi i, jala mardaging gabe sada holiholi i. Ima hasadaon ni daging nang pamatang i.
2. Hamamalun ni partondion. On ma na rumingkot na dihalomohon Debata tu bangso i ima hamamalun ni partondion ni bangso i. Aha ma na masa secara fisik di bangso i, ima halelengse ni bangso i na talu di parporangan, jala laos tarbuang di habuangan Babel. Sasintongna siala ni halumlamon ni haporseon nasida di i. Sangkap ni Debata laho pauliulihon bangsoNa tarlumobi haporseaon i bangso Israel. Sengaja do Debata mambahen parasingan ni hamamalum i. Diparenta Debat do si Hesekiel laho manurirangi langsung tu bangso i (ay.4-6). Alai na dipamasa secara bertahap do (ay.7-8, 9-10). Pemulihan i gabe manghorhon perubahan; sian holiholi na mahiang jala na marserakan gabe sada punguan soldadu na balga (ay.10). Pemulihan on holan ala ni ulaon i Tondi do i (ay.9,14). Martudutudu do on tu panompaon na imbaru, Naeng diparade Debata do sada generasi na imbaru secara rohani na so olo saor dohot dosa nang portibi on.

 

Huria na hinaholongan dibagasan Jesus Kristus, Ngolu ni halak na porsea, jotjot do songon angka holiholi i na marserak di tingki mangadopi hangoluan siganup ari, siala mansai godang angka hamaolon nang tantangan hidup na niadopanna, manang si parkarejoan, di parsaoran, di keluarga, masyarakat, di huria pe. Siapata soada be sihirimon laho paujunghon i saluhutna, sipata ndang adong be dalan siboluson. Alai marhite Hata ni Debata na mandok ia hangoluan ni jolma i ima marhite Tondi ni Debata dohot huasoNa, asa boi jolma i mangadopi angka masalah nang tantangan, nang hamaolon tung saborat dia pe i, ingkon boi adopanna.

 

Ia Tondi ni Debata ima na mangalehon hangoluan, mangalehon semnagat, mamboan haheheon, mangalehon dalan, hatiuron, nang habisuhon.

2 Timotius 1:7 Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton. Lapatanna ndang hea be dihabiari manang aha angka na manghaposi Debata marhite TondiNa i. Angka na manjanghon jala mangasahon Tondi parbadia, asai margogo do laho mandopang jala mangadopi angka hasusaan, na manusia, na manegai. Margogo do angka na porsea i ala didongani Tondi Parbadia ibana.

Marhite Minggu Pentakosta i, hasasaor Tondi Parbadia pangoluhon partondionta, asa unang mate alai asa mangolu, margogo, mandopang musunta ima sibolis i, Angka na porsea sai tongtong mangasahonTondi Parbadia naung niuarihon Jesus Kristus mandongani hita laho mangulahon lomo ni rohaNa. Amen.

 

Jamita Minggu Exaudi (Sai tangihon ma soarangku ale Jahowa,Psl.27:7) - 16 Mei 2021

“HATUAON NI HALAK NA TIGOR ROHA”

(KEBAHAGIAAN ORANG BENAR )

 

EV. Psalmen 1; 1 - 6                                          EP. Johannes 17: 6 - 19

 

 

1:1 Martua ma halak, na so olo mangihuthon tahi ni angka parjahat, jala na so olo jongjong tu dalan ni angka pardosa, jala na so olo  sahundulan dohot angka pangarehei.

1:2 Sai patik ni Jahowa do lomo ni rohana, jala sai i do  dipingkiri rohana arian dohot borngin.

1:3 Songon hau do ibana, na sinuan di topi ni batang aek, na marparbuehon parbuena di hajujumpang ni tingkina bulungna pe ndang olo malos, jala sude na niulana manjadi do.

1:4 Alai ndang songon i anggo pangalaho ni angka parjahat, songon orbuk, na hinabangkon ni alogo do nasida.

1:5 Dibahen i ndang manahan angka parjahat i maradophon paruhuman, manang tarbahen angka pardosa jongjong di luhutan ni angka na tigor roha.

1:6 Ai ditanda Jahowa do dalan ni angka na tigor roha i; alai matua laho lonong do anggo dalan ni angka parjahat.

 

Dihamu saluhut ruas ni huria nahinaholongan dibagasan Jesus Kristus,  dilehon Tuhan i do di hita pilihan dibagasan ngolunta laho tu dia do dalan na tinuntun ni lomo ni rohanta. Dalan ni Tuhanta, hatigoran, hasintongan do manang dalan ni parjahat, na so tingkos manang sibolis i.

 

Holan na dua dalan i do pilihan ni  ngolu ni jolma ndang adong asing ni i. Ido umbahen molo ingot hita tingki dakdanak marsingkola minggu, adong do ende ni Dakdanak sikolah minggu mandok : “Di dalam dunia ada dua jalan, lebar dan sempit mana kau pilih? Yang lebar api, jiwamu mati tapi yang sempit jiwa berseri.”

Sian dakdanak naung dipaingot do asa manat mamillit dalan sidalananna. Ai tangkas do dipaboa; ia dalan ni adong dua massam: dalan na bolak dohot dalan na sompit. Dalan na balga, na bolak i gabe tu hamagoan do i. Alai ianggo dalan na sompit i mamban tu hangoluan di. Hira songon i ma nanaeng sipaasahathon parpslamen on dibagasan turpuk on. Dalan ni halak partigor dohot dalan ni halak na jahat.

 

Lagu ini menggambarkan dua jalan yang akan ditempuh oleh manusia jalan

Dalam penggambaran dua jalan ini, Pemazmur menjelaskan bahwa orang yang tidak berjalan menurut nasihat orang fasik dan tidak berdiri di jalan orang berdosa adalah orang yang berbahagia. Sebaliknya jika orang menempuh jalan itu, ia terkena hukuman dan penghakiman (ay.5). Singkatnya, Pemazmur ingin membicarakan mengenai dua macam orang, yakni orang yang saleh dan orang yang jahat.

Adong piga-piga pokok siingotonta sian turpuk on:

1.       (Ayat 1), sian on boi botoonta aha do sipatupaon asa dapot hita angka na pinarsinta ni rohanta ima marhasil, jala boi gabe sitioponta di pudian ni ari. Dihalomohon Debata jala tahasiholi  asa marlas ni roha hita: Naparjolo di dok: na so mangihuthon tahi ni angka parjahat. Lapatanna ndnag diulahon hasomalan ni pangalaho angka na so mangihuthon Tuhan Debata, angka halak na so mananda Debata Jahowa. Ai taparrohahon ma ngolunta angka siihuthon Tuhan Debat dibagasan Kristus dohot na so mangihuthon Tuhan Jesus i, mansai tandi do nang pe sipata sai hira tarpasupasu ngolu nasida na so mangihuton patik ni Debata alai na boi do sai hira dos parngoluon nang keadaan ekonomi nasida dohot hita. Alai ingot ma hita songon eme na rap tubu dohot simaremeeme, laos songon ni do ngolunta dohot angka na so sahaporseaon  na rap mangolu di portibi on. Alai tapuon ni Debata do hita sogot jolma on, laos pasidingonna do simaremeeme i jala tutungonNa. Astuanna i na mandok asa mangolu hita hombar tu hata nang patik ni Jahowa. Napaduahon; Na so olo jongjong tu dalan ni angka pardosa. Na so olo mangihuthon tahi tahi ni parjahat. Di ngolu ni jolma adong do na lomo rohana mamillit dalan na maralo tuson. Lomo rohana mangihuthon dalan ni parjahat i, mangulahon harorangon, narkoba, minuman keras, mabuk-mabukan, begal, pemerkosa, panipu, korupsi, nang angka uraon haholomon i. Alai na so manghalomohon i pe mansai bahat do, godang do halak naung bertobat, manadinghon dalan haholomon tu dalan hatiuron, hatigoran dibagasan Kristus i. Napatoluhon; so olo  sahundulan dohot angka pangarehei. Lapatanna na so satahi di pangalaho ni angka na mangaleai Debata marhite panghataionna, pangalahona. Ndada na ni oraan hita marsaor dohot nasida, alai boha do hita boi gabe pengaruh manang na mangalehon panorangion taringt tu Debata tu nasida. Unang holan na mangarehei nasida ala so ditanda ise do Debata na gok holongong i? Ima ulaonta angka na porsea asa lam tangkas ditanda halak sipangarehei i asi dohot holong ni roha ni Debata tu hita dibagasan Jesus Kristus i.

Natolu horong pangalaho ni jolma on jumpangan hita do di humaliangta. Unang gabe tarunjun hita na porsea di tolu ragam pangalaho i, sai manat jala bisuk mamereng angka situasi, kondisi nang sifat-sifat ni jolma pe. Martua ma hita na so sapangalaho dohot na tolu ragam ni halak i

2.       (Ay.2) Sai patik Ni Jahowa do dihalomohon angka na tigor roha i. Poda ni parpsalmen on mansai tangkas siantusanta, jala ndang pola maol antusan. Aha do sitiopanta dibagasan parngoluonta na ginoaran na martua, na marlas ni roha jala marhasil? Hatuaon ni halak na porsea mansai tandi do sian hatuaon na ni lapatan ni portibi on. Ai hatuaon ni portibi on holan di haulion, hasangapon, hadumaon, hamoranna i do na dipangasahon. Hape hatuaon ni halak na porsea lobi sian i dope na hinahkam pangantusionna. Na martua do halak  na porsea molo sadalan do ngoluna dohot na hinalonohon Debata. Lapatanna na martua do dalan nang ngolu ni na porsea molo hombar tu lomo ni roha ni Debata. Angka na porsea sai ringgas manggulahon hata nang patik ni Debata, i do hatuaonna. Ala marhite sian i do dipasupasu Debata ngoluna; dilehon las ni roha, hagogoon nang bisuk asa dapotohononna angka silas ni roha na asing i. Na boi do angka na porsea manahan di angka situasi na so denggan ala gomos ditiop bohal partondionna dibagasan Hata ni Debata. Ido umbahen halak na porseai sai tarpasupasu ngoluna di sinamot, parlabaan, paruntungan, ndada holan di parhepengon dohot do paruntungan na boi marsaor dohot keluarga dibagasan las ni roha, di na marhombar balok mansai denggan parsaoranna, di parhuriaon pe dame jala sonang rohana dohot angka donganna jala boi rap marhobas di tonga ni huria i. Gabe pasupasu ma ngolu ni halak na porsea i di pargulmiton ni ngoluna. Jadi ngolu ni halak na porsea i sai adong do prestasi, kreasi, nang peningkatan di berbagai aspek ngoluna; tamba malona, bisukna, hamoraonna, parbinotoanna, nang parsaoranna lam denggan tu jolma nang tu Debata. Alai ndang sude jolma mangantusi na dihalomohon Debata dibagsan ngoluna. Josua 1:8 Unang meret buku ni patikon sian pamanganmu, sai pingkirpingkiri ma i arian dohot borngin, asa diradoti ho, jala dipatupa ho, hombar tu sude na tarsurat di bagasan i, asa maruntung ho di angka dalanmu, jala marmulia parulaonmu. Naung dipatikhon Debata do angka siulaon nang sidalanan ni bangsoNa. Hita bangso ni Debata naung dipalua dibagasan Jesus Kristus i disosoi do asa sai girgir manangihon dohot mangulahon Hata ni Debata.  5 Musa 6:7 Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse. Dalan ni halak na tigor i sai diingot do Hata ni Debata, jala dihalomohon do manaringoti i tu angka keluargana, nang sisolhotna asa unang madabu tu dalan na so tingkos. Sai dipaingot tu angka pinomparna asa unang sega ngoluna. Saluhut do hita satuju di sintasinta ni sude keluarga nang natoras asa marhasil sude angka pinompara, denggan denggan parngoluonna jala ndang susa. Ido umbahen sai dimemehon angka natoras do angka gellengna asa marpanglaho na denggan, sai ditaringoti Hata ni Debata, sai diajari marpangalaho na denggan. Jadi adong dasor na jelas manang bohal ni angka na porsea asa boi marsaor dohot denggan tu humaliangna.

3.       (Ay.3), sude na niula na porsea i manjadi do. Gabe saut, gabe manjadi, gabe marhasil, ido na pinarsinta godang jolma. Boha do asa manjadi jala marhasil ? Angka halak na naung mian di Hata ni Debata, manang naung mangolu di Hata ni Debata sai marparbue do na niulahonna, Ndang adong na marisuang Hata ni Debata na naung dihangoluhonna. Angka na niulahonna marhasil di karejo, parsaoranna, sangkat nang sintasintana sai saut do. Rom 10:17 Asa sian na tumangihon do ro haporseaon; ia panangihon i, sian hata ni Kristus do. Jala ingkon taradoti ma Hata ni Tuhanta i jala laos taulahon. Ai so holan manangihon laos ihut do manggulahon patik nang Hata ni Debata. Ai molo so diulahon na soadong do parbue ni haporseaonna i (Jak.2: 20), jala mate do haporseaon i (Jak.2:26). Jadi asa martua jala marhasil saluht na taparsinta dohot na taula sai mian jala mangolu ma hita dii patik nang Hata ni Debata. Mansai ringkot nang tapadomu di na manjaha Mateus 7: 24 – 27; manaringoti halak na manangihon Hata ni Debata jala maolo diulahon na togu do haporseaonna i jala ndang marunsur binahen ni angka hamaolon ni portibi on.

4.       (Ay.4-6); Dalan ni parjahat i di dok parpsalmen songon orbuk do ngoluna, jala ndang manahan, jala laos lonong. Parir na i tutu angka siulahajahaton i, molo taparrohahon di humaliangta i, memang songon i do kenyataanna. Nunga bahat tapaidaida pangalaho hajahaton i songon orbuk i do i, ndang togu, ndang manahan laos lonong ma muse. Tapadao ma pangalaho ni parjahat i sian keluarga, lingkungan, huria nang negaranta. Tatangianghon ma angka siula hajahaton i asa marhamubaon ni roha. Tapamanat nang dirinta dohot keluarganta asa dao sian siula hajahaton.

Naung masuk do hita tu Minggu Exaudi na marlapatan; “Sai tangihon ma sorangku, Ale Jahowa” (psl.27:7). Sai tangihonnon di Debata Jahowa do tangiang ni halak na porsea, na sai mangihuthon Tuhan Debata dohot na mangulahon Hata nang PatikNa. Songon Tuhanta Jesus Kristus ditangihon Debata Ama i do ala sada Tuhanta Jesus dohot Debata Ama i. Laos songon i ma angka halak na porsea na sai girgir tumangihon dohot mangulahon hata nang patik ni Debata gabe sada ma ibana dohot Debata Ama, Anak dohot Tondi Parbadia, disi ma hatuaon ni halak na tigor roha i. Amen.

 

Jamita Parningotan Ari Hananek Tuhan Jesus- Kamis,13 Mei 2021

“GABE SITINDANGI NI KRISTUS”

(MENJADI SAKSI KRISTUS)

 

EV. Lukas 24 : 44 - 53                                           EP. Efesus 1: 15 - 23

 

Huria ni Tuhanta na hinaholongan dibagasan Jesus Kristus. Las ma rohanta di naung bongot hita di sadari on parningotan ari hananek Tuhan Jesus Kristus tu surgo. Adong ma pigapiga point siparrohahononta laho mangantusi turpuk on:

1)      Naparjolo (ayat 44-48) Dibagasan ayat on taparohahon andorang naek Jesus tu surgo i, dilehon Jesus do tingkina dohot mangalehon ulaon tu angka siseanNa laho manghatindanghon nasa na niulahon ni Jesus. Jala dipaboahon muse ise do Mesias i sasintongna tu angka siseanNa i naung ginurithon di patik ni si Musa dohot angka panurirang nang di Buku Psalm. Ima Mesias na manarita, naung mate di hau pinarsilang i, di ari patoluhon hehe do ibana sian na mate. Saluhutna i dipatupa laho haluaonta jolam pardosa on. Jala naung dihatindanghon angka sisean i do saluhut na masa i. Ido umbahen dipatik i Tuhan Jesus angka sisean i laho mamaritahon i tu saluhut portibi on na marisihon angka haesaan ni dosa dohot hamumulak ni angka parjahat i tumadinghon dalanna, dibuhai nasida do ulaon i sian Jerusalem. Saluhutna i diulahon nasida marhitehite goar ni Tuhan Jesus Kristus: Boasa ? Siala na parjolo, marhite goraNa i do adong hhuaso na manogunogu angka jolma manolsoli angka dosana jala marhamubaon ni roha. Napaduahon, siala marhite goar ni Tuhan Jesus do hasesaan ni dosa dilehon tu angka na manolsoli dosana asa malua ganup na porsea i. Marhite turpuk dipatorang si Lukas do muse di Buku Ulaon Apostel 4: 12 Asa ndang adong haluaon di bagasan manang ise na asing; ai ndang adong goar na asing ditoru ni langit dilehon tu jolma, parhiteanta tu haluaon. Laos somngon i do na tarsurat di Roma 10: 13  Ai "malua do ganup na manjou Goar ni Tuhan i!"

1)

2)      Napaduahon (ay.49), Naung dipadanhon Jesus do suruonNa na pinarbagabagahon hian ima Tondi Parbadia i. Naung diboto Jesus do ia angka ulaon na pinasahat tu angka siseanNa i ndada ulaon na mura i, alai maol jala borat do i. Naung ditanda Jesus do angka siseanNa i, naung hea manadinghon Ibana dohot mansoadahon Ibana. Ido umbahen ndang loason ni Jesus nasida haruar sian Jerusalem andorang so manjalo hasasaor ni Tondi Parbadia, i so i boi do nasida gabe marisuang nang mampu jala sundat mangulahon i. Sian on ma mangalehon pangantyusion tu hita hinaringkot ni hasonggopan ni Tondi Parbadia laho mangulahon ulaon mamaritahon Barita Na Uli. Tung samalo dia pe parjamita laho marjamita, molo so sinonggopan Tondi Parbadia, tung soada do lapatanna. Tung samalo dia pe pajamita patoranghon Hata ni Debata molo so sinonggopan Tondi Parbadia tung so marlaba do i. Tondi Parbadia naung di bagabagahon Tuhan Jesus i , ima na manguru[pi angka siseanna gabe sitindangi ni Kristus di tongatonga  ni portibi on asa barani nasida manghatindanghon  ia Jesus Kristus do Sipalua i, na olo do angka sisean i marsitutu, barani do asing sian portibi on jala satia sahat tu na mate holan ala ni goarNa.

3)      Patoluhon (Ay.51-53), dipasupasu Jesus do angka siseanNa dungi naek ma Ibana tu surgo i. Tung gok las ni roha do angka sisean i mulak tu Jerusalem jala mar las ni roha. Boasa ? Ai somalna angka na marsirang sai bigasan lungun ni roha mardonganhon ilu do, alai asing do ianggo na masa on. Tung las situtu do roha nasida, ima siala naung gok hasisingkop pangantusion di haporseaonna taringot tu Jesus Kristus i.

 

Hananek ni Tuhan Jesus tu Surgo i dilapati do marhite pigapiga hal: Naparjolo, disi ma hasintonganna ia Jesus i ima Mesias naung nibagabagahon i, asing ni Ibana ndanda adong be haluaon nang sipalua. Napaduahon, marhitehite hananaek ni Tuhan Jesus i tu surgo, diparade Tuhanta Jesus do inganan di angka na porsea. Napatoluhon, hananek ni Tuhan Jesus tu surgo mangalehon panghirimon tu angka na porsea i asa gabe sitindangi ni Kristus dungkon manjalo pasupasu hasosonggop ni Tondi Parbadia i.

Dung di paborhat angka siseanna i dohot mamasu masu nasida, hehe ma Tuhan Jesus. Ibana naung disuru Debata tu portibi on laho pasahathon barita na uli naung paujunghon ulaonNa di portibi on. Hananek ni Tuhan Jesus tu surgo i ima hamamasa ulaon na estafet laho mamaritahon Barita na uli. Nang pe naung laho Jesus guru nasida i sian tongatonga nasida i, tongtong do nasida marlas ni roha. Diboto nasida do ia Mesias i sasintongna Sipalua na ro diparngoluon nasida. Ndada songon na ujui dilapati nasida taringot Mesias i, alai Sipalua na sinuru Debata Ama laho pasahathon Barita na Uli, panghirimon, dohot las ni roha mandalani ariari ni  ngoluna. Haporseaon nasida i manghorhon sai mamuji Debata nasida dibagas Joro ni Debata

Tarjou do hita angka na porsea gabe sitindangi ni Kristus Jesus, dimasa pandemic covid 19 on manguji haporseaonta laho patuduhon na margogo do Tuhanta i di parngoluonta, na so mabiar di na masa on, alai patuhon sikap hidup na bijaksana marhite na mematuhi prokes sian pamarenta. Marhite pamarenta i do sai diparmahani Tuhan Debat hita jala diramoti. Boha do hita halak na porsea manghatindanghon Kristus marhuaso di angka berbagai musibah na masa di parngoluonta. Dia do na nidok ni turpuk on di hita muse?

ü  Hananek ni Tuhan Jesus paboahon na tutu do adong Surgo i. Naek do Jesus tu Surgo i ala sian i do  haroroanNa, Johannes 8: 23 Dung i didok Jesus ma tu nasida: Anggo hamu, sian toru on do hamuna, na sian ginjang do anggo Ahu; na sian portibi on do hamuna, ndang sian portibi on anggo Ahu. Tangkas do adong Paradiso i,manang surgo i, ndada di portibi on, alai dibanuaginjang i do.

ü  Mamarenta do Jesus i sian Surgo i. Disurathon di Lukas 22: 69 Alai olat ni on ma hundul Anak ni jolma i tu siamun ni Hagogoon ni Debata. Sian habangsaNa na disurgo i do Ibana mangarajai luhutna. Saluhutna do nirajaanNa di portibi on nang di surgo i. Ibana ma na mangarajai roha nang pingkiranta, Ibana ma na mangantusi ngolunta nang rohanta, di angka parsorionta. Ndang adong be ganggu ni rohanta disi. Angka na porsea i sai paposhon roha nang ngoluna tu adopan ni Tuhanta Jesus Kristus i.

ü  Ibana do Jesus parhiteanta tu Ama i. Heber 7: 25 Dibahen i, tarbahen Ibana do paluahon sandok angka na manjonohi Debata marhitehite Ibana; ai na mangolu do Ibana tongtong, laho mangondihon nasida.

üDI naung naek Jesus i tu Surgo i, ndada dihalupahon angka siseanna i alai tangianghononna do angka siseanNa i nang hita pe angka na porsea di Ibana na sai pajonokhon diri tu Jesus Sipalua i. Amen.

 

Jamita Minggu ROGATE – (Martangiang ) 9 Mei 2021

“TANGIANG NI HALAK NAPORSEA”

(DOA ORANG BERIMAN)

 

EV. 1 Johannes 5: 1 – 5                                    EP. 1 Samuel 1 : 9 - 18

 

5:1 Ganup na porsea, Jesus do Kristus, i do naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana.

5:2 Sian on do taboto, naung holong rohanta di angka anak ni Debata: Molo tahaholongi Debata jala taradoti patikna.

5:3 Ai on do holong ni roha di Debata; molo taradoti patikna. Ndada na dokdok patikna i.

5:4 Ai nasa na tubu sian Debata do manaluhon portibi on. Haporseaonta i do naung monang manaluhon portibi on.

5:5 Ise do na manaluhon portibi on, ia so na porsea di Jesus Kristus, Anak ni Debata?

 

Huria ni Tuhanta na hinaholongan dibagasan Jesus Kristus

Nuaeng nunga masuk hita tu Minggu Rogate, na marlapatan martangiang. Tangiang ima hosa hangoluan ni na porsea. Marhite tangiang do pasahathonna angka parsorionna tu adopan ni Debata. Diangka pengalamanta, angka na porsea na martangiang tu Tuhanta, sai adong do latarbelakang ni na tinagianghonna. Mansai marragam do tangiang ni angka jolma, sian soarana, intonasina, kondisina, nang carana dohot angka hatana.

 

Na pasti na martangiang on, sai adong do napinangidona tu Tuhan; isarana asa tarcapai angka na tinuju ni rohana, angka sintasintana, sangkap ni rohana asa gabe jala manjadi. Ido umbahen ringkot na pajonokhon diri tu adopan ni Debata, patuduhon parsaoranna rosu dibagasan las ni roha dohot Tuhan Debata.

 

Di angka na porsea, tangiang ima songon alat komunikasi, manang songon jambatan na paloashon hita manghatai, pajumpang dohot Tuhan Debata paboahon nasa na adong dibagasan rohanta, laos mangantusi hata ni Tuhan i, dia do alusNa tu hita.

Dibagasan turpukta on tantangan na niadopan ni halak na porse ujui mansai bahat sian angka panuriang pargapgap, manang angka ajaran sesat. Angka sipangalilui mangajarhon angka haliluon manghorhon hagunturon, parbolatbolatan di angka na porsea uju i ( 1 Yohanes 2:18–19, 22, 26; 4:1),

Jala godang do na manimbil sian huria i jala bali. Sian pengaruh filosofi na gabe pamingkirion na ro sian pargapgap i ima Docetisme na sai jotjot didok Gnotisisme, ima sada aliran na manghaporseai ia partondion i  mansai uli jala denngan alai ia pamatang i ima na jat ala naung madabu jolma i tubagasan dosa.

Ditulak nasida do hajolmaon ni Jesus ala pamatang ni jolma naung madabu tubagasan dosa. Alai dijanghon nasida do Jesus dibagasan tondi, jadi na tarida ianggo Jesus marhite pamatang jolma na somal alai pamatang na so tarjama manang dais tu portibi on. Jadi ndang boi tartullang, marmudar, jala mate Jesus i. Alai sai songon i do pangalaho pardagingon ni Jesus didok nasida. Ido umbahen Docetisme sian hata Gorik Dokeo; seolah-olah, tampaknya. Jadi ajaran nasida gabe mangaliluhon haporseaon ni angka na porsea uju i. Ido umbahen ringkot na nasida martangiang asa margogo haporseaon nasida. Nang pe ndada adong hata martangiang laho mangadopi tantangan i dinasida.

 

Sian bagasan turpuk on mansai ringkot do hita patomutomuhon turpuk on dohot topik niminggunta Rogate = martangiang i dohot epistelta i. Adong pigapiga siingotonta di na laho martangiang tu adopan Tuhan Debata:

1.       Haporseaon na togu. Tangiang ima songon parhiteanta manomunomu Tuhanta, jala ingkon marsihothot jala togu dasorna dibagasan haporseaon. Molo so togu do haporseaon i, boi do gabe marongso jala ndang margogo martangiang. Martangiang marhite dasor haporseaon na togu dibagasan Jesus Kristus mangaloas hita mangido sipangidoonta tu Debata Ama i. Molo soadong pos ni roha nang haporseaon mansai maol do hita martangiang manang mangido sipangidoanta tu Ibana. Taingot ma songon na nidok ni Jesus di Mateus 21: 21 Jadi dialusi Jesus ma nasida: Na tutu do na hudok on tu hamu: Aut na porsea hamu, so ganggu rohamu, ndada holan songon na tu hau ara ondeng patupaonmuna. Sandok gari tu dolok an dohononmuna: Munsat ma ho jala madabu tu laut, gari saut do. Lapatanna haporseaon na mangolu di huaso n i Tuhanta Jesus i na tau mangalehon na ringkot di ngolunta sipatupaon nang siparadeonNa tu hita. Hagogoon ni haporseaon dibagasan Jesus Kristus  manghorhon halongangan na so tardok jaloonta marhite roha maulite. Di nalaho martangiang i, mansai ringkot mangolu jala margogo haporseaon na paposhon ngoluna, rohana, nang pangidoanna tu adopan ni Debata Ama i. Ido umbahen di dok Jesus muse di Mateus 21:22 Ai jaloonmuna do saluhut nasa na pinangidomuna di tangiangmuna, anggo na porsea hamu. Martua ma hita na martangiang marhite dasor na togu di haporseaon, siala naung pinaradena angka pasupasu silas nirohanta dibagasan ngolunta. Boha do hita asa marhuaso tangiangta i jala ditangihon Tuhanta ? ima martangiang dibagasan haporseaon. Songon si Hanna, pos do rohana di asi ni roha ni Debata tu ibana mangalehon pasupasu parianohonon. Adong do dua hal na ingkon siparateatehononta taringot tu haporseaon on. Adong do haporseaon na mate, jala adong do haporseaon namangolu. Ia haporseaon na mate, holan haporseaon na sian simangkudapna sambing, holan bibirna i di ubitubit martangiang tu Debata alai ndang diulahon. Songon na tarsurat di Jakobus 2:17 Haporseaon i pe songon i do: Anggo so adong pangulaonna, naung mate do hadirionna. Jadi na mangula do haporseaon i marhite angka parulaon asa singkop na pinangido ni roha i. (Jak. 2:22 Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i). Gogo ni tangiang ima na saurdot dohot haporseaonna na mangolu. Jadi na laho martangiang on pe ndada holan na mandok sipangidoan, alai dohot do na mangulahon na pinangido ni Tuhanta. Marhite haporseaon do hita boi martangiang jala manjalo angka hasisingkona dibagasan Jesus Kristus.

2.       Manghaholongi Debata. Molo tahaposi Tuhan i dibagasan pangidoan nang tangiangta, naung mian do haporseaon dohot haholongon ni roha tu Tuhan Debata. Haholongon i mangido respon manang ingkon maralus sian Debata tu hita nang hita tu Debata, jadi ndang tarsirang molo na masihaholongan. Molo sirang do hita dohot  donganta ndang marlapatan holong i, laos songon i do tarlumobi dohot Debata. Ala ni i sai ringkot do na manghaholongi Debata marhite na martangiang i. Songon na tarsurat di jolo ni turpukta on 1 Johannes 4:21 On do patik na tajalo sian Ibana: Na mangkaholongi Debata, i ma na mangkaholongi nang donganna.

2.Tahaholongi Debata marhite na martangiang hita tu Ibana ala haposan do Tuhan i, ndang adong ganggu nang biar ni roha  marnida habalgaonNa i. Haposan di Tuhanta i umbahen na olo hita ro tu adopanna joujou, mamuji, jala pasangap Ibana huhut paboahon angka parsorionta. Didok di hata ni Debata 1 Korint 1:9 Haposan do Debata, naung manjou hamu tu parsaoran dohot Anakna Jesus Kristus, Tuhanta i. Lapatanna sai tapatulus do tangiangta i tu Debata ala ni pos ni rohanta di asi dohot holong ni roha ni Tuhanta i. Marhite na martangiang i do asa dipadao hita sian angka pangalilu, siang angka pargapgap nang sipaotooto na di hasiangan on. Jadi botoonta ma dalan nang lomo ni roha ni Debata tu hita marhitehite tangiang i.

3.       Mangulahon PatikNa. Molo holong do rohanta di Debata, ndang pola maol taulahon parsuruonNa nang pangidoanna sipatupaonta, ima Hata nang PatikNa i. Na mangido do hita dibagasan tangiang laos saurdot ma dohot pangidoan ni Debata tuhita di na laho mangulahon Hata nang patikNa i, asa disi ma adong respon manang alus ni pangidoan na masihaholongan hita dohot Tuhan Debata. Alai taokui do mansai godang do angka hamaolon na taadopi laho mangulahon patikna i. Godang angka hamaolon laho patuduhon hasationta tu  Tuhanta. I do umbahen mansai rongkot manjalo gogo dohot pangurupion di Tuhanta i.

Di na martangiang i hita ndada na holan mandok angka sipangidoan alai naeng ma tahangoluhon pangidoanta i. Debata do na mangalehon jala na tahalojahon do marusaha laho mandapothonsa. Mangulahon naung tatangianghon jala manangianghon angka siulahononta. Marhitehite tangiang i, jaloon ni angka sisean i do hagogoon. Lapatanna ndada na holan martangiang angka sisean i alai huhut di ulahon do tangiangna i dibagasan ulaon panghobasion. Martangiang dohot mangula songon istilah umum na tabege ora et labora – berdoa sambil bekerja, ima dua pangalaho na sai masirainrainan. Molo martangiang hita, sai na lehonon ni Debata do habisuhon dohot hagogoon di ngolunta. Mangula dohot na martangiang mansai uli molo dihaburjuhon manggulahon hatigoran. Mangolu dibagasan hatigoran na marlapatan mangulahon na ringkot dihita nang tu angka dongan jolma. Hasintongan dohot hatigoran i ma na gabe panindangion tu angka jolma. Ido na diigil Jesus sian ngolunta; angka na taulahon i gabe sada sitiruon nang siingoton na membangun jati diri ni angka jolma. Sian cara, parange, nang pambahenan tahe gabe pasupasu nang las ni roha tu humaliangna. Ndada gabe hasusaan, nang gabe sipingkiran ni halak manang gabe sitihasan parangenta. Ido umbahen marhite tangiang ni na porsea asa dipargogoi Tondi Parbadia i hita mangulahon patik nang HataNa i. Laos songon ni do Jesus sai martangiang tu Debata Ama i, asa margogo mangulahon parsuruon ni Debata Amai. Ai mansai dokdok do sitaonon ni Jesus i, tarlumobi laho manuhuk silang ni angka jolma pardosa i. Pargogoan ni Debata Ama i do Jesus i sahat tu hau pinarsilang i. Mansai borat jala posi situtu na tinaon ni Jesus i. Alai margogo do Ibana manuhuk silang ni dosa dosanta, dosa ni portibi on asa jaloonta hasonangan ni rohanta di hangoluan na so ra suda i.

 

Di hita na hinaholongan, songon angka na porsea hita; mangolu ma hita dibagasan tangiang na margogo haporseaonna gabe haporseaon na togu, tangiang na dibagasan holong, jala tangiang na mamparbahenan.

BE.487: Tung halak na margogo. Logu.329

Ø  Tung halak na margogo si partangiang i. Dokdok pe si taonnon, ndang olo talu i. Pos situtu roha na di Debata na i. Tuhan na manaluhon sude pangalo i.

Ø  Nang hirahira mogap dibaen sitaonon i, Marsinggang do Ibana managam Tuhan i. Dung jumpang pe tingkina sumurut arsak i, Tarapul ma rohana dibaen Tuhanna i.

Ø  Imbaru pangkirimon nag hagogoon i. Margogo, marsahala do partangiang i. Togu muse langkana lao marjamita i. Ai Kristus do donganna di ulaonna i.

Sai taharingkothon ma jala tajugulhon martangiang songon si Hanna i, asa jaloonta sipangidoanta. Sai pos rohana di pasupasu ni Debata Ama i ngoluna sadarion nang di ari sogot pe dibagasan Jesus Kristus i.

Tuhanta Jesus na sai martangiang tu ama i asa margogo mangadopi silang i, borat sitaonon i. Asa marhite pangoloionNa i do di Ama i tongtong saut na dihalomohon ni Debata di Ibana na gabe pelean panobusion angka dosa ni portibi on. Laos sian i do dalan ni Jesus laho manaluhon portibi on, manaluhon huaso sibolis, haholomon nang hamatean i. Suang songon ima angka na porsea si ihuthon Jesus, sai martangiang do angka na porsea i asa tartaluhon ibana portibi on nang sibolis i. Haporseaon na manaluhon hagiot ni daging nang haholomon i, marhamonangan do na porsea i ala sai margogo marhite tangiang asa ditogutogu jala di urupi Tuhanta i hita mangadopi hamaolon na masa di adopanta. Amen.