ASI
NII ROHA NI DEBATA NA PANGOLUHON”
EV.
Efesus 2 : 1-10
EP. 4 Musa 21: 4 - 9
Ia
kota Efesus ima sada Kota na mansai balga jala ribur di masa ni Ap.Paulus.
Angka
na parbinoto mandok hirahira no opat ma di harajaon Rom. Kota perdagangan
namanubuhon angka sifat materialisme ala ni kemajuanna, laos gabe pusat
parsombaon tu ganaganaan dewi Artemis (Gorik) manang Dewi Diana (Rom). Ulaon
harorangon na niulahon songon sada ulaon na badia jala bagian ni parpunguan
nasida manomba ganaganaan. Pangalaho i manghorhon hasesega ni parumatanggaon
ala gok hajahaton do diulahon.
Sian
turpuk on, dibuhai sian ayat na parjolo, dipatorang Ap.Paulus tu saluhut halak
Kristen pangalaho ngolu i, jala sada panjouon laho paingothon tu hita laho
mangantusi aha do na mambahen hamatean i songon i. Hamamate ni jolma i siala ni
pangalaosionna dohot angka dosana, na mangalaosi Hata ni Debata jala mardosa
maradophon Debata. Ditompa Debata do jolma i asa mangolu laho pasangaphon
Debata jala unduk mangulahon patikNa. Uju dialo jolma i Debata, disima mardosa
hita, jala upa ni dosa ima hamatean. Gabe sirang ma jolma i sian Debata, ima
sada kondisi hamatean. Ai ndang adong na boi pasohothon dosa ni jolma i nang
hurungan pe ndang boi. Marsiajar sian namasa di si Adam dohot Hawa, ditingki
madabu nasida tu bagasan dosa ( 1 Musa 3) marhite na manganhon parbue ni hau na
di tonga ni porlak i. Mangolu do nasida berengon alai sasintongna naung mate do
nasida di tingki manganhon parbue ni hau i, alai ndang boi mamereng tangkas
siala ni hamateanna di haporseaon.
Tangkas
do di patorang Ap.Paulus, ia Huria Efesus najolo naung mate siala ni
pangalaosionna dohot dosana, na mangolu dibagasan dosa, dituntun do dalan ni
portibi on, mangoloi di angka huaso ni haholomon, siula angka na jat. Laos
songon i do boi masa di partingkianta si nuaeng on songo pangalaho masa di
Huria Efesus. Dipatorang Ap.paulus, ia ibana dohot angka donganna, “Hami”
(ay.1), najolo tong do songon angka nasida na mardosa i, hinorhon na sai girgir
di daging dohot haguotna, jala pingkiran nasida na jat i.
Sasintongna
ingkon hona uhuman do nasida, songon angka sipardosa i (ay.2-3). Alai di ay.4 –
6 disosoi ma nasida ia: a. Debata na gok asi ni roha tu hita, pangoluhon hita
raphon Kristus i. Nang pe naung mate hita siala ni hajahatonta. B. Dibagasan
Kristus Jesus naung dipahehe do hita jala raphon hundul dohot Ibana di Surgo i.
Ala
ni i, sasintongna hita nang songon ruas
na di Efesus dohot angka apostel na ingkon uhuman do, alai asi dohot
holong ni roha ni Debata dibagasan Jesus Kristus, tajalo ma haluaonta. Tajalo
ma hangoluan na imbaru. Naung mate hian do hita ala ni dosanta, dilehon
hangoluan sian Debata Ama i, dipahehe sian hamatean, dilehon inganan na
manongtong raphon Kristus i di Surgo.
Ditompa
Debata do hita, dijou, jala dipalua, laho mangulahon ulaon na denggan naung
diparade Debata hian. Angka na porsea tarjou mangulahon ulaon na denggan
dibagasan ngoluna. Ala naung dipalua Jolma i sian boban dosa nang hamatean i,
marlas ni roha ma ibana manjanghon haluaon.
Angka
na dibagasan Kristus Jesus ingkon tongtong marlas ni roha.
Molo
di dok marlas ni roha, ima sada situasi manang roha na mansai sonang, dame,
luangan sian angka boban dohot hasusaan. Somalna angka na marlas ni roha sai
dipengaruhi angka situasi na masa di ngoluna manang marhite sian angka na adong
diibana. Alai sasintongna las ni rohana i ndang manahan leleng, manang
parsatongkinan do hape, manang boi dohonon musiman do las ni rohana i. Ima las
ni roha na so manongtong i ni dilehon portibi on. Boha do hita marlas ni roha
di situasi na mambahen sogo roha, situasi angka mara, pangunjunan, angka
bencana dohot angka sipingkiran na so marna sae di ganup ari, minggu, bulan
nang taon pe. Lapatanna saleleng mangolu hita ndang malua sian angka persoalan
hidup.
Hape
na porsea i dipangido do asa tongtong marlas ni roha, na dipatuduhon dibagasan
ngoluna siganup ari.
Jadi
las ni roha na porsea i ndada ala ni materi, manang angka pasupasu sambing na
tajalo sian Debata, manang ala soada masalah dibagasan ngoluna. Alai las ni
rohana ala pasupasu di partondion i do na sian Tuhan Debata dipeop ibana.
Pasupasu partondion i ima hasesaan ni dosa. Dosa ima parsualon ni jolma na
mansai balga, ala upa tinuhor ni dosa ima hamatean na manongtong. Alai ala balga
ni holong ni Debata, dipalua ma hita sian dosa i.
Angka sinamot, arta, nang pangalaho na denggan ndang
boi paluahon hita sian angka dosanta i. Holan marhite mudar ni Jesus i do hita
asa malua. Di dok di 1 Johannes 1: 7 “Alai molo taparangehon hatiuron, songon
Ibana na di bagasan na tiur, saor do hita sama hita, jala dipaias mudar ni
Jesus, Anakna i, do hita sian nasa dosa.”
a.
Jadi holan asi ni
roha ni Debata sambing do na ingkon tapangasahon, unang tapaloas dirinta sai
marungutungut, sidok mauliate ma di saluhut na tajalo sian Ibana. Ai ndang
adong sangkap na roa sian Debata, alai sangkap hangoluan do jala tu halalas ni
rohanta sambing do. Ai di dok do di
Jeremia 29:11 “Ai nunga tangkas huboto sangkap angka na husangkapi taringot tu
hamu, ninna Jahowa, sangkap hasonangan do tahe ndada tu hamagoan, asa ahu
mangalehon tu hamu ujung na hinalungunhonmuna.”
b.
Ngolunta sai
mandalani ari ari mardonganthon Tuhan Jesus i asa sahat tu Tano Kanaan ima
Surgo i na gok hasonangan i, sipata songon halak Israel i do hita
dipardalananna tu Tano Kanaan i. Boi do ro angka sipingkiran, angka masalah, ro
ma angka ungutungut ala ni hamaolon i. Alai ndang dihalashon nasida jala
dihamauliatehon panarihonon ni Debata di pardalanan nasida. So manaon las ni
ari, so na mangula, alai sai disarihon Tuhan i do nasida. Alai boasa sai ro
ungutungut i namambahen marsak roha ni Debata gabe didabuhon uhum tu nasida
marhite ulok tulong api na mamargut nasida gabe mate. Mulak ma rohanasida tu
Debata marhite si Musa na manopa suman ni Ulok Tulung Api sian tombaga i, asa angka
na hona pargut diberengulok i gabe malua nasida jala mangolu. Jadi molo holan
ala asi ni roha ni Debata do ngolunta on, ndang oloanta na sai marungutungut.
Bolas ma rohanta laho manghaposi Debata songon na ni dok endenta sian B.E. No.753:
1 – 3 Dipardalanan Jesus Di Jolongku
:
1.
Dipardalanan
Jesus dijolongku Holong ni tanganMi manogu au Nang di ngoluku Ho do sombaongku
Tung sonang mardalan raphon au. Huboto do tangkas pangouonMu Diiringiring Ho do
langkangki Sahat ro di ujung ni pardalanku Togu ma au jonok tu lambungMi,
2.
Sipata
lilu haporseaonhu Ni lilianan ni portibi on Alai dung Ho hutatap o Tuhanku
Margogo doau dingolungkon Huboto ………
3.
Patogu ma
Tuhan haporseaonku, Asa polin tu Ho manghirim au, Tu surgo I patulus
pardalananku, TondiMi maringan ma di au. Huboto do ………
c.
Minggu Letare
manjou hita asa tongtong marlas ni roha siala asi dohot holong ni roha ni Debata
na manarihon ngolunta sian sadari on ro disaleleng ni lelengna. Amen.
