Jamita JUMAT AGUNG (parningota ni hamamate Tuhan Yesus) - 2 April 2021

“DISEAHON JESUS DO HOSANA” /

(YESUS MENYERAHKAN NYAWANYA)

 

EV. Lukas 23 : 44 – 48                                      EP. Psalmen 22: 2-12

 

 

23:44 Jala mareak pungkul sampuludua, songgop ma na holom tu sandok tano i sahat ro di pungkul tolu.

23:45 Ai mangkolom ma mata ni ari i. Jadi maribak ma hirehire na di bagas joro i, bola dua.

23:46 Dung i marsoara na gogo ma Jesus, ninna ma: Amang! Tu bagasan tanganmu ma hupasahat tondingku! Jadi dung didok i, tos ma hosana.

23:47 Marnida na masa i letnan i, dipuji ma Debata, ninna ma: Tutu do, halak na tigor roha do On!

23:48 Jadi sude natorop i, na marluhut mainondur, masitompuk andorana, marnida na masa i, laos mulak ma

 

Huria ni Tuhanta nahinaholongan dibagasan Jesus Kristus, sadari on saluhut angka na porsea i patonggor mata haporseaonna tu Tuhan Jesus Kristus naung mangalehon diriNa, HosaNa mamolus dalan silang i (Via Dolorosa) sahat tu Dolok Golgata, dolok partakhurakan (Bukit Kalvari). Sian Porlak Getsemane sahat tu Golgota, sitanon na bernit na niae Jesus. Jala angka naporsea i marningot Via Dolorsa on dohot hamamate ni Tuhan Jesus di Ari Jumat  (Jumat Agung), ndada didok Ari Jumat Pardangolan, ari jumat na marhabot ni roha.

Sian Panurat Lukas tangkas botoonta angka na masa di hamatean ni Jesus di ari hamamateNa i gabe asing sian Ari Jumat na somal:

a.       Haholomon mangalinggomi saluhut huta i saleleng tolu jom, mamungka sian pukul sampulu dua sahat tu pukul tolu. Di arian do na masa i alai saluhut luat gabe mangholom. Haholomon na masa di Jumat Agung ndada songon kejadian alam na somal. Haholomon na masa tolu jom ndang somal i na dosohon dohot haholomon na masa andorang Debata manompa langit, tano ro dohot diisina. Nanaeng patuduhonon si Lukas sia portibi on mulak tu hatotompa ni portibi on najolo, dibagasan haholom na so mar-Debata. Memang dia sampuludua jom na parpudi ngolu ni Jesus nunga dipatuduhon di situasi situan natorop i jolma naung holom rohana. Ndada na holan na manalahon alai dohot do disi nga holoom hasintongan i dibahen gabe sala, jala na targade hasintongan gabe hasalaan do na tubu, angka hansit ni roha, muruk, hosom gabe mamunu hasintongan ni Jesus. Haholomon na masa di Ari Jumat i patuduhon portibi on dohot manisia i naung gabe dao mardalan sian hasintongan dohot haholongon. Satangkarisap do na masa i, holan tolu jom. Molo di paretonhon tolu jom lao paimahon memang mansai leleng do alai ndang manongtong na masa haholomon i. Tolu jom do haholomon i, siding ma haholomon i, lalu ma sian hangoluan ni joma. Ia ulaon  haholomon; hajahaton, na mangalaosi Hata nang patik ni Debata ndang na manongtong i, ai satongkin do i. Ia di haheheon ni Jesus (Paskah) i, tarpasiding do haholomon i, ndang manongtong hagogoon ni i. Na ro do Jesus laho pamatehon huaso hamatean i, huaso haholomon i, huaso ni sibolis i, tolu jom haholomon, doshon tu tolu ari ma i hamamatena i, dunghon i hehe ma Jesus i. Di Paskah (hahaehehon ni Tuhan Jesus) mamolus lao mago do haholomon i, unduk do haholomon i tu Hatiuron i. Na gabe parsiajaran di hita na porsea. Mansai posi do hajahaton i, alai nang pe posi situtu, ndang na manongtong i. Dung ro Panguhum na tigor i, saluhut angka hajahaton i gabe disiaphon do.

b.      Hirehire ni Bagas joro na gabe bola dua. Disurathon do di evangelium Matius dohot Lukas ndanda holan mangholom ari, alai masa do lalo bolon. Portibi on gabe gok biar disi mamereng mual hangoluan i naung gabe mate jala naung bola dua hirehire ni bagas joro i. Diribakhon Tuhan i do angka na padaohon Debata dohot jolma i . Saluhut jolma sian nasa bangso tama do dapotan haluaon sian Tuhan i. Hamamate ni Kristus na mamboan hamubaon dohot haimbaruon dipardalanan ni ngolu ni jolma i.

c.       Dipasahat Jesus ngoluna. Hamamate ni Jesus di hau pinarsilang i ndada ala ni hagogoon ni sibolis na mambuat hosa ni Jesus i. Na mate pe Jesus di hau pinarsilang i ndada ala so ada dalan na asing laho manesa dosa ni manisia i. Hamamate ni Jesus ndana na binahen manang naung diatur angka siboto surat manang sintua ni malim ni halak Jahudi. Hamamate ni Jesus ndada na suda mudarNa i jala ndang manahan di hinabernit sitaonon i. Alai hamamateNa i di hau pinarsilang i siala balga ni Holong ni Jesus na olo mangalehon ngoluna ganti ni angka dosa, nang hasalaanta. Dipasahat Jesus do ngoluna laho manggarar utang ni dosanta i. Ido umbahen hamamate ni Tuhan Jesus di hau pinarsilang i sada Ulaon pardamean, naung dituhuk Jesus do uhuman dohot bura ni Debata di dosa ni jolma i.

d.      Sahalak letnan na mamparsilangkon Jesus i gabe mamuji Debata di hatoropan, dihatindanghon ibana do Jesus i (ay.47): : Tutu do, halak na tigor roha do On. Ndang adong dosa na borat na laho mangambati huaso ni Debata sian hita jolma. Manghkuling do roha parbagasan ni sahalak letnan i siala ni Tuhan i laho mananda asi ni roha dohot hastigoran. Marhite na manghatindanghon ia Jesus halak ni tigor di sihatoropan, laos disi do naeng paboahon naung sala pembahenanna i jala naung manimbil sian hasintongan. Ndada marusaho letnan i laho mangalului hasintonganna, manang membela diri, alai diokui ibana do hasalaanna jala ungkap do rohana paboahon na sintong i.

 

Di hita saluhutna nahinaholongan dibagsan Jesus Kristus, molo tangkas do taantusi lapatan ni naung tartullang, dilombutti jala dilinsingi sahat tu na mabugang sahat tu na so tarida be rupa ni bohi ni Jesus i, saluhutna i aeonNa holan ala laho paradehon haluaonta, ndada be lemba hita di ngolunta, naeng do ingkon arga situtu bahenonta panaonon ni Tuhan Jesus i marhite na magigi mida dohot mangulahon dosa. Jesus na mamelehon diriNa naeng ma mamboan hita tu hamubaon na tingkos. Hamubaon ni roha nang ngolu ndada holan na tumatangis huhut mangokui hasalaanna dibagasan tangiangna. Hamubaon na sintong dibuhai ma marhite panindangion sadalan dohot pambahenan nang padan ni rohana tu Debata Ama i. Mangalehon diri jala ungkap rohana laho manjanghon Jesus gabe sipalua di ibana.

 

Adong do halak na mambahen Jesus gabe sipaluana alai ndang mangaloas Jesus gabe Tuhan dibagsan ngoluna. Adong do halak na mangoari dirina halak na porsea di Jesus alai sai porsea dope tu huaso haholomon, holan di duruni rohana do Jesus i ndada dibagasan rohana. Ndang loasonna Jesus mangarajai roha nang pingkiranna dohot parngoluonna.

Hita na hinaholongan, Jesus Kristus ima Tuhanta naung monang mangatasi huaso ni hamatean, siala ni i naung tajalo do hamonangan i molo naung tajalo Kristus i di ngolunta, siala ni i mangolu ma halak na porsea i songon halak na marhamonangan, ndada loasonna be angka huaso na asing mangarajai ngoluna.

 

Tuhan Jesus ndada holan mamboan sitiruon di hangoluonNa dohot mangajari taringot tu Harajaon ni Debata tu angka siseanNa, alai sahat do di tingki di hau pinarsilang i dohot di ujung ni ngoluNa pe. Ai tiruan na pinasahat ni Jesus tu hita (ay.46) Dung i marsoara na gogo ma Jesus, ninna ma: Amang! Tu bagasan tanganmu ma hupasahat tondingku! Jadi dung didok i, tos ma hosana. Ngolu ni Jesus ima hangoluan na sai mamelehon diri tu Debata Ama i. Ngolu ni Jesus ima ngolu na sai mardalan dibagasan asi ni roha ni Debatra Ama i.  Siala ni i, di ujung ni ngoluNa pe sai dipasahat do ngoluna. Ndang adong na so dipelehon nang dipasahat Ibana ngoluna tu adopan ni Debata. Diujung ni ngoluna pe pasahathononNa do tu Ama i. Ndada mabiar Ibana disi, ndang ganggu rohaNa laho mangadopi sitaonon na porsuk i. Sandok dipsahat do ngoluNa, ala diboto Ibana do holan dibagsann Debata Ama i do boi Ibana mamolus na maol i jala manuhuk i sude. Nang pe hasusaan jala sitaonon na bernit i diporsan Ibana, tongtong do Ibana hot mandalani saluhutna i, jala diujungna jaloonNa do hamonangan siala sai dipasahat do ngoluna tu Ama i.

 

Hamuna angka na hinaholongan, On ma jamita sipahusorhusoronta na laho margogoihon hita ditingki mangadopi sitaonon na bernit. Sai anggiat ma na manon hita dipartinading angka na tahaholongi, unang gabe sai holan marhabot ni roha hita, alai sai manumpak pasupasu ma di ngolunta. Boha do asa gabe manumpak pasupasu tu hita? Ima di tingki manaon habot ni roha i siala na tinandinghon na tahaholongi mambahen jut ni roha manang hansit ni roha, ala i marhite hansit ni roha i do diajari hita ia ngolu on parsatongkinan do, jala ndang adong na hot, ndada holan hasonangan na tajalo alai dohot do haporsuhon. Jala haporsuhon bolon ni jolma ima hamatean i.

Sude parhuseon ni tingki nang ngolunta mamolu angka las ni roha nang arsak. Marhite hamamate ni na tahaholongi diajari do hita na so adong na manongtong di ngolu on, nang umur si jolma i pe terbatas do. Naeng ma pangkeonta saluhut partingkian on marhite na pasahat saluhut ngolunta tu adopan ni Debata Ama i. Taloas ma Tuhanta i na mangarajai roha, pingkiran nang ngolunta on.

Marhite paninghonon angka na tahaholongi naung junolo sian hita mangajari hita, binsan dilehon ari ang tingki tu hita asa tarpahaseang i i laho mangulahon angka na denggan naung niuarihon donganta naung jumolo sian hita asa lam dumenggan muse pangalaho nang parngoluonta. Jala na rumingkot sian saluhutna i ima asa mangolu dibagasan bulus ni roha pasahathon diri nang ngolunta tu Debata Ama i songon naung dipatuduhon Jesus tu hita.

Dimasa Pandemic covid-19, bencana alam, teror bom, sahit panahit angka hamaolon di perekonomian, nang di persoalanta i tapasahat ma tu Tuhanta. Taloas ma Tuhanta i mangatur ngolunta dang dirinta, Ibana na patuduhon dalan haluaon las ni rohanta. Tatangianghon ma asa marhite vaksinasi tu rakyat Indonesai mardalan dohot denggan asa dipauli muse hita di hahipason, malua sian Covid-19, prokes, margogo jala marbisuk pamarenta manjaga hadameon di negaranta, malaua sian terorisme nang hamaolon ekonomi. Lam margogo angka na porsea i mangadopi angka hamaolon nang sitaonon marhitehite Tuhan Jesus Kristus i. Amen.

Jamita Minggu PALMARUM (Maremare) - 28 Maret 2021

“MAROLOPOLOP ALA ASI NI ROHA NI DEBATA” /

(BERSORAKLAH AKAN KASIH SETIA TUHAN)

EV. Psalmen 31: 8 – 16                              EP. Johanes 12: 12-16

 

 

 

31:8 Sai marolopolop jala marlas ni roha ma ahu bahen mida asi ni roham, na tinatapmu dangolhon, na marbinoto i Ho di angka hagogotan ni tondingki.

31:9 Jala ndang * dipadapot Ho ahu tu tangan ni musu, * dipajongjong Ho do pathu di halambason.

31:10 Asi ma roham di ahu, ale Jahowa, ai hagogotan do ahu, * pola do lotop matangku binahen ni haarsahon, maras do rohangku dohot dagingku.

31:11 Ai nunga suda ngolungku dibahen hamarason, suda dohot angka taonhu dibahen angguhangguk, * merus do gogongku dibahen dosangki, jala ndang mangalo be holiholingku.

31:12 Jadi gabe parbilean do ahu maradophon sude angka alongku dohot hombarhu hundul, jala tarsonggot situtu do angka donganku magodang; marsidingsiding be do angka na marnida ahu di balian.

31:13 Nunga tung * lupa ahu sian roha, songon halak na mate, * sobokkon ngarngar na ambolongan nama ahu.

31:14 Ai sai hupabegebege do husiphusip ni torop halak, habiaran humaliang; sai marluhut i do nasida martuptup i ahu, mambuat hosangku do dipingkiri nasida.

31:15 Alai anggo ahu, tu Ho do ahu marhaposan, ale Jahowa, ningku do: * Ho do Debatangku.

31:16 Marguru tu tanganmu do angka parsoriongki, sai palua ma ahu sian tangan ni angka musungku dohot sian angka na mangalotongi ahu

 

 

Huria ni Tuhanta, naung masuk do hita tu Minggu Palmarum, saluhut na porsea manomunomu Minggu on gabe parningotan; lima ari andorang Ari Hamamate ni Tuhan Jesus. Di Minggu palmarum, dihasomalhon hurianta do mamboan maremare tu gareja, manang dekorasi adong maremare, molo di bonapasogit maremare sian janur kuning, molo di kota dibuat sian bulung ni bunga palem. Bulung ni maremare i na marlapatan simbol ni hasintongan, asi ni roha, dohot habisuhon, laos ido sihol ni roha na torop i na manjanghon Jesus i. Ia minggu palmarum ndang hot di ulaon sadari i alai na marhahonaan do i tu pardalanan ni ari tu hamamate ni Tuhan Jesus (Jumat Agung). Jadi lapatan ni minggu Palmarum ima, minggu na pahusorhusorhon lapatan ni  sitaoonon ni Tuhan Jesus, jala Minggu laho mamparbadia i Goar ni Tuhan Jesus. Dua masa pangalaho ima sitaonon dohot hamuliaon na marsada di sada parhusoran masa. Jadi lapatan ni minggu palmarum ima paradehon sitaonon ni Tuhan Jesus, marhite na mamparbadia i Ibana.

Ia turpukta on ima tangiang ni sian si Daud. Adong anggukangguk, pardangolan na pinasahat si Daud songon sahalak parpslamen. Dihilala ibana do sai hira dihalupahon Tuhan i ibana, alai disada sisi adong panghirimon haporseaon sai urupan ni Debata do ibana manaon i saluhutna. Saijoujou do si Daud asa di linggomi Debata ibana, jala sai Debata do partanobatoanna.. Dibagasan turpuk on dipasahat si Daud do parsorionna songon holso nang parungkilon ni halak na porsea. Alai dibagasan parsorion in dang na holan na sai holsoan nang marungkil alai disi do tong mian lapatan ni haporseaonna i, adong haporseaon. Ditangiang on paboahon ia disi ro angka na bernit i boi do hita nilinggoman “marhite” bohi ni Debata.

Tuhan Debata do inganan partanobatoanta laho manjalo haluaon sian musu nang dihamaolon na masa. Haporseaonna i tu Debata songon partanobatoanna ndada na mambahen ibana gabe lemba, alai sai hot do ibana mangalului asi ni roha ni Debata jala mangolu dibagasan Ibana. Tongtong do parpslam i sai marpanghirimon di Debata na tuk mandongani, mangaramoti ibana sian angka hamaolon.

Pardalanan ni Jesus tu hau pinarsilang i (Via Dolorosa) naung tarimangrimangi dibagasan 7 minggu on jala sahat ma hita di minggu papituhon di Minggu Palmarum on. Namardalan do Jesus tu dalan sitaonon i sahat tu Dolok Golgata di hau pinarsilang i holan laho manghophop hita jola asa dapot hita haluaon, las ni roha na hot ro di salelng ni lelengna di paradeiso i.

Mansai maol do jolma i malua sian dosa, ai dibagasan portibi on dope ibana, alai naeng do inghon radotanna patik nang Hata ni Debata. I do umbahen sai masirapusan do haporseaonna dohot hagiot ni daging nang haportibi on dibagasan ngoluna. Jotjot do Sibolis inang portibi on laho mangelaela angka na porsea i. Molo lemba do ibana jala ndang tinggil di soara ni Tondi i, maup jala lonong do jolma i dibahen sibolis tu gambo lisop ni dosa. Alai baliksa sai marhamonangan do na porseai mangatasi i siala sai joujou do ibana tu Debata na tuk margogoihon ibana. Sai tinggil sipareon ni tondina tumangihon panggora ni Tondi parbadia i laho paingothon dalan hasintongan ni Debata. Marhite huaso ni Jesus i sai malua do jolma sisan hagogotan, sian hamaolon, sian sibolis nang hamatean na manongtong i. Dibagasan Silang i adong panghirimon ni na porsea, adong haluaon sian dosa nang sibolis i, asa dapot hita hasonangan ni rohanta, hangoluan na manongtong i.

 

Sitaonon ni parpslmen on sada gombaran sitaonon ni Jesus sahat tu hau pinarsilang i. Ala parsihohotanna tu Tuhan i boi do songon sada ujian ni haporseaon nang hasatiaon sude angka hamaolon i nang angka na bernit i dipardalanan ni ngolunta. Hamaolon na taadopi marragam haroroanna, boi do i sian ngolunta, ala ni dosa, hasalaanta, boido sian durunta, ala ni parsaoran, nang di keluarga, hamaolon di parkarejoan, nang hamolon sian bencana alam, termasuk panaritaan nang hamaolon ala pandemic covid-19 on. Ingkon bolusonta doi sude angka hamaolon i mardonganton Tuhan Jesus i, asa margogo jala marserep ni roha hita manjalo asi ni roha ni Tuhan i. Taolophon ma asi ni roha ni Tuhan i dibagasan Jesus Kristus naung ro tu portibi on songon raja na mangatasi saluhut portibi on.

Minggu palmarum on manjou hita asa mangarade diri manomunomu dohot manjanghon Kristus sipalua i. Nadang tartaon hita angka parsorion, angka na bernit nang angka na dokdok di portibi on ia so mardonganthon Tuhan Jesus i. Marolopolop ma rohanta siala saluhtna holan ala asi ni roha ni Debata sambing do i. Ndang adong na boi tarpangasahon asa malua sian hamaolon nang sian covid-19 on. Mauliate ma tadok di Tuhanta mangalehon dalan haluaon sian sahit on, nang marhite vaksinasi naung ro tu hita asa margogo hita hala kebal sian covid 19 on. Mauliate ma di Tuhanta na manarihon ngolunta sadari on ro di salelengnilelengna. Amen.

Jamita Minggu JUDIKA (Luluhon ahu ale Jahowa, Psalm. 43: 1a) - 21 Maret 2021

“KRISTUS SIHORHON HALUAON” /

(KRISTUS POKOK KESELAMATAN)

EV. Heber 5: 5 - 10                             EP. Jeremia 31: 31 – 34

 

5:5 Laos songon i do nang Kristus: Ndang Ibana mangaithon sahala sintua ni malim tu dirina; Debata do, na mandok tu Ibana: "Anakku do Ho; sadari on do Ho hutubuhon!"

5:6 Songon nidokna i di na asing: "Malim do Ho ro di salelenglelengna, mangihuthon horong ni si Melkisedek!"

5:7 Tagan jolma Ibana, dipelehon do angka pangidoanna dohot elehelekna, mardongan angguk bolon dohot iluilu tu na tuk paluahon Ibana sian hamatean; jadi ditangihon do Ibana, gabe malua sian hatahuton i.

5:8 Ai atik pe Anak i Ibana, diguruhon do pangoloion marhite sian na tinaonanna i!

5:9 Jala dung rimpas gabe sihorhon haluaon salelenglelengna do Ibana di sude na mangoloi Ibana.

5:10 Digoar Debata do Ibana sintua ni malim, mangihuthon horong ni si Melkisedek

 

Ia Buku Heber on natinujuhon tu halak Heber asa manogunogu nasida di huria ia marsihohot di haporseaon di Jesus Kristus jala asa uang muba mulak tu dalan nasida na robi i (10:32-38)

Marhite sitaonon na niadopan nasida i, mansai godang do halak na porsea i marhaporusan sia huria jala mulak tu ha-Jahudion nasida najolo i di bagas jojro nasida. Sangkap ni Ap.Paulus laho patuduuhon tu nasida ia Patik ni si Musa i na martudutudu tu diri ni Jesus Kristus jala mual ni haluaon i marhite hadameonNa i.

Mansai tangkas do di Buku Heber on mangajarhon ia Jesus Kristus i andul umbalga sian Patik i siala Iaban do mual ni angka patik i. Jala sian Buku Heber on dapot hita do pangajaran taringot tu angka panurirang na manjalo huaso marhite haporseaonna di Ibana. Ia Ibana do malim na timbo jala na sangap situtu, jala marhite Ibana do naung dipasingkop saluhut peleanta sian Padan na robi.

 

Jala sumangap do Ibana martimbanghon angka surusuruan, jala marhite na mamelehon diriNa sandiri gabe jaloonta ma hasesaan ni dosanta.

 

Ia sahalak sintua ni Malim (Imam Besar) na gabe parhitean ni angka manisia na gale jala mardosa manjalopardengganan sian Debata (ay.1-2). Sahalak Sintua ni Malim ingkon padengganhon dirina mardame jumolo dohot Debata andorang so gabe parhitean ni huria ni Debata (ay.2-3). Nang pe di hagaleonna, sahalak Sintu ni Malim na mangula impola ni ulaon ditonga ni bangso Israel asa tongtong satia bangso i maradophon Debata.

 

Laos dipatorang di Buku Heber on Ia Jesus doshon dohot Malim Aron, na dipatimbo Debata gabe Sintua ni Malim, nabinuat sian Horong ni Melkisedek.

Songon Sintua ni Mali , dipatuduhon Jesus do sada impola ni hangoluan na marasing sian angka malim na marhuaso di tingki i. Dibagasan Jesus ndang adong hagiot mangahut habadiaon tu diriNa. Saluhutna i ndanda na mambahen gabe ginjang rohaNa, alai na sintong i do diulahon Ibana laho holan pasangaphon Debata Ama na di Surgo i.

 

Nang pe naung di Ibana status dohot hasangapon i, ndang na gabe rajumanNa i hak istimewa di Ibana i di adopan ni Debata. Sikap ni Jesus patuduhon na sai tongtong pajongjong parsaoran na rosu dohot Debata Ama i

 

Marasing do dohot pangalaho ni angka jolma na sai jotjot tarelaela di hadumaon dohot hasonangan ni ngoluna, songon status sosial nang ekonomi na pamenakhon ibana. Sai jotjot do hamenakon i mangunjuni torop jolma asa ndang mangula manang aha. Ia tung diulahon pe sada ulaon ima holan na laho pasombu tagasna sambing.

"Asa na patimbohon dirina sipaoruon do; jala na paoru dirina sipatimboon do" (Lukas 14: 11).

 

Songon  na nidok Ephorus Pdt.Dr.Robinson Butrabutar di jamitana: Di tongatonga ni bangsonta Indonesia mamungka taon 2014 i dipatuduhon Presidenta Joko Widodo do sada sitiruon di haserepon ni roha. Sahalak na marjabatan na  tumimbo situtu di tongatonga ni bangsonta na patuduhon serep ni roha di angka langkalangka na ulaonna na mansai denggan membangun Indonesia. Pemimpin na serep do ibana. Maradophon angka na so sapingkiran dohot ibana pe serep do ibana. Dihaposi ibana, haserepon ni roha do na ingkon hangoluhononna laho manguluon sada bangso na mansai marragam on. Diparangehon ibana  tolu falsafah ni halak Jawa, na so apala marimbar tu nidok ni hata ni Debata.

 

Naparjolo i ma, "Lamun Siro Sekti Ojo Mateni," meskipun kamu sakti meskipun kamu kuat jangan suka menjatuhkan (Molo tung pe sakti jala nagogo ho, unang halomohon mandabuhon/pamatehon)

 

Napaduahon, lamun siro banter ojo ndhisiki, meskipun kamu cepat jangan suka mendahului. (Molo tung pe hatop ho, unang halomohon pajolojolohon).

 

Napatoluhon, "Lamun siro pinter ojo minteri", meskipun kamu pintar jangan sok pintar" (Molo tung pe pistar ho, unang pamalomalohon).  Di hita halak Batak pe adong do angka umpama na manjamothon hita unang madabu tu ginjang ni roha, alai asa serep. Isara: "Jolo nidilat bibir, asa nidok hata," "Na teal so hinallung, na teleng so hinarapean." Dna.

 

Ungkapan ini mengingatkan kita pada suatu nasihat klasik dalam Kitab Amsal yang mengatakan: “Jangan berlagak di hadapan raja, atau berdiri di tempat para pembesar. Karena lebih baik orang berkata kepadamu: "Naiklah ke mari," daripada engkau direndahkan di hadapan orang mulia” (Amsal 25:6-7).

Ala ni i, songon halak Kristen siihuthon poda ni Tuhanta Jesus di partingkian nuaeng, hat ani Tuhanta Jesus di Lukas 14: 11 i

Ia asing do na niulahon nang diparangehon Jesus, nang pe status ni Jesus ima Anak ni Debata, sai hot do Ibana unduk marpangoloi tu sangkap ni Debata Ama na di Surgo i, nang pe marhite pangoloion i inghon bolusonNa habebernit sitaonon nang hamatean. Pangoloion ni Jesus i na gabe pelean jala impola ni haluaon na manongtong tu saluhut jolma. Dison ma dipatuduhon Jesus pangoloionNa i na singkop nang pe marhite angka sitaonon nang hamagoan. Ido umbahen marhite Ibana mangurupi hita asa mampu hita gabe pangoloi, nang sadia maol pe angka na niadopanta.

 

Marhite turpuk on mangajari hita taringot tu asi ni roha ni Debata dibagasan ngolu ni jolma.

Molo tajaha sian turpuk Epistel sian Panurirang Jeremia manggombarhon asi ni roha ni Debata i marhite haradeon ni Debata laho paimbaruhon padan haluaon i tu bangso Israel. Bangso Israel gabe bangso na pinillitni Debata na sasintongna ingkon mangolu dibagasan patik ni Debata (Taurat), alai baliksa bangso Israel i jotjot do mangalosi jala mangalo Patik ni Debata diparngoluan nasida.

 

 

Ido umbahen disuru Debata ma naposoNa i si Jeremia laho pasahathon barita asini roha ni Debata tu Bangso Israel marhite padan Haluaon na pinaimbaru.  Padan Haluaon ni Debata ndang digurithon di dua Batu Le, alai digurithon tu bagasan ateate  nasida saluhut bangso Israel. Lapatanna dihasiholi Debata ia Bangso Israel i sai olo ma marhamubaon ni roha jala mangolu di haimbaruon diadopan ni Debata. Siala ditingki muba roha ni bangso Israel i gabe sada tanda padan haluaon i dipatuduhon dibagasan ngolu ni bangso Israel. Ndada na paimahon be nasida di Patik i sian na tarsurat i, alai sintongsintong do dihangoluhon jala diulahon Patik ni Debata na suan dibagasan ateate nasida saluhtna.

 

Laos songon i do asini roha ni Debata na dipaboa Buku Heber on naung tangkas sahap dibagasan diri ni Jesus Kristus na gabe Sintua ni Malim jala na songkal. Ia Jesus do gabe parhitean ni jolmai dohot Debata, Kristus do sihorhon haluaon (Dialah Pokok Keselamatan kita)

Didok Jesus di Johannes 14:6 Gabe didok Jesus ma tu ibana: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu

 

Marhite Jesus Kristus, naung dipadenggan do parsaoran na sega i jala di parbadia i. Naung diae Jesus do partinaonanta jolma, jala songon Sintua ni Malim naung mamelohon diriNa marhite hamamateNa di hau pinarsilang i. Asa ganup jolma na porsea di Jesus Kristus ima Sipalua i manjalo asi ni roha dohot haluaon sian Debata Ama i.  Amen.

 

PARTORDING NI ACARA PASSION - Kamis - Tgl.1 April 2021 - Pkl 18.30 WIB DI MASA PANDEMIC COVID

I.        JOUJOU TU PARTANGIANGAN PASSION (P = Paragenda)

P   :   Hamu ruas ni huria, dibagasan tingki on, tapatupa do Partangiangan Passion. On ma Partangiangan Passion di masa pandemic covid 19 on holan sahali di hita, laho marningot sitaonon ni Tuhan Jesus humophop hita. Antong, tapahohom jala tapasada ma rohanta tapaihutihut ma barita ni sitaonon ni Tuhan Jesus.       

----- martangiang na hohom huhut manghuling organ -----

 

II.      KEBAKTIAN

1.     Marende: BE. No. 083 : 1 – 2  “Na lao Do Birubiru i”    (BL. 214)          

ÿ Na lao do Birubiru i, mamorsan angka dosa/ Ni nasa hajolmaon i, di benget ni rohaNa/ Diporsan do sahitta i, di lehon do diriNa i/ Tu tangan ni pamunu, ditaoni do na bernit i/  Ro di na tos hosaNa i, didok: Naeng porsanonhu

----- jongjong mangendehon ayat 2 -----

ÿ Ianggo Birubiru i, ima alealengku/ Napaluahon tondingki, disuru Debatangku

     Didok mandok AnakNa I, sai topot ma pardosa i/ Naung sun tinoruanHu, balga tutu do rimasHi/ Alai tarbaen do mombun i, horhonon ni mudarMu

 

2.     Votum – Introitus – Tangiang (P = Paragenda; R:Ruas)

         P    :     Marhitehite Goar ni Debata Ama, dohot Goar ni AnakNa Tuhan Jesus Kristus dohot Goar ni Tondi Porbadia na tumompa langit dohot tano on. Amen,...! Tagan jolma Kristus, dipelehon do angka pangidoanNa dohot elehelekNa, mardongan angguk bolon dohot iluilu tu na tuk paluahon Ibana sian hamatean, jadi ditangihon do Ibana, gabe malua sian hatahuton i. Alai atik pe Anak Ibana, diguruhon do pangoloion marhite sian na tinaonNa i. Jadi dung rimpas, gabe sihorhon haluaon salelengna do Ibana di sude na mangoloi Ibana. Haleluya,...!

                      Martangiang ma hita: Ale Amanami, Parasiroha na sumurung, Debata ni hatuaonnami! Huingot hami do di angka arion panaonon dohot hamamate ni Tuhan Jesus Kristus Tuhannami. Pahibul ma rohanami jala parbadia i mamingkiri sude na tinaonNa i. Patandahon ma tu hami dosanami, asa diarsakhon rohanami, jala asa hupasahat hami lomo ni roha ni na manobus hami, asa martua hami marhite sian i ro di salelenglelengna. Sai patupa ma i di hami marhitehite Tuhan Jesus Kristus, Anak haholongan ni RohaM. Amen,...!

----- hundul ruas ni huria -----

3.     Marende: BE. No. 152 : 1  “Jesus Na Mamorsan”       (BL. 120)   

ÿ Jesus na mamorsan, dosa ni portibi on, pangolu hami

     Jesus na mamorsan, dosa ni portibi on, pangolu hami

     Jesus na mamorsan, dosa ni portibi on, sai pasonang hami

      Amen,… amen,… amen,...

4.     Jesus di Porlak Getsemane  + Martangiang:

P    :     Dung i sahat ma Jesus rap dohot nasida tu porlak na margoar: Getsemane. Jadi didok ma tu angka siseanNa: Hundul ma jolo hamu di son, saleleng di san Ahu martangiang. Dung i ditogihon ma si Petrus dohot anak ni si Zebedeus na dua i. Dung i gabe marsak situtu ma Ibana jala bobonosan. Jadi didok ma tu nasida: Mansai marsak situtu do rohangku, hira na mate do. Di son ma hamu dungo rap dohot Ahu.

R    :     Dung i laho ma Ibana saotik tu jolo, dipatungkap ma bohiNa tu tano martangiang, ninna ma: Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangHu, rohaM do. Dung i mulak ma Ibana tu angka siseanNa, jala tarpodom nasida didapot. Jadi didok ma tu si Petrus: Ndang margogo hamu hape dungo rap dohot Ahu nanggo sangombas? Dungo ma hamu jala martangiang, asa unang bongot hamu tu pangunjunan, ai girgir do nian tondi i, alai gale do ia daging.

P    :     Dung i laho ma Ibana paduahalihon martangiang, ninna ma: Ale Amang, molo so tarbahen salpu on, nda ingkon huinum, sai saut ma lomo ni rohaM. Dung i di na ro Ibana, tarpodom muse ma nasida didapot, ai mansai dokdok do salibon nasida. Jadi ditadingkon ma nasida laho martangiang patoluhalihon mandok hata ondeng.

R    :     Dungi didapothon ma muse angka siseanNa, jadi didok ma tu nasida: Datdatanmuna dope modom dohot maradian? Nunga dapot tingkina nuaeng, sahat ma Anak ni Jolma i tu tangan ni pardosa. Hehe ma hamu, laho ma hita. Ndi, nunga ro na pasahathon Ahu.

5. Marende: BE. No. 081 : 1       “Jesus Mual Ni Ngolungku”  (BL.185)    

ÿ Jesus mual ni ngolungku, Sipangolu tondingki

      Ai dibunu Ho musungku, ima hamatean i

      Ho manaoni hamagoan, patupahon hangoluan

      Alani hupuji Ho, tung marribu hali do

6.     Dijehehon si Judas Tuhan Jesus + Sada Sisean Ni Jesus Mangalaluhon  Tanganna

 P      :     Alai diboto si Judas parjehe i do inganan i, ai jotjot do marpungu Jesus tu  si rap dohot angka siseanNa. Ia si Judas diarahon ma angka soldadu dohot angka naposo ni sintua ni malim, didapothon ma tusi mantat sulusulu, palito dohot sinjata. Diboto Jesus ma saluhut na naeng songgop tu Ibana, jala ruar ma Ibana, didok ma tu nasida: Ise do na jinalahanmuna?

R       :     Gabe ninna nasida ma mangalusi Ibana: Jesus halak Nazaret i do! Dung i ninna Jesus ma mandok nasida: Ahu do i! Alai dohot do si Judas parjehe i jongjong di lambung nasida. Asa dung didok tu nasida: Ahu do i, sumurut ma nasida, angka martinggangan ma tu tano.

P       :     Dung i diulahi ma manungkun nasida: Ise do na niluluanmuna? Jadi didok nasida ma: Jesus halak Nazaret i do! Dung i ninna Jesus ma mangalusi nasida: Nunga hupaboa tu hamu, Ahu do i.

R       :     Asa molo Ahu do na niluluanmuna, loas ma laho angka on. Asa naeng do jumpang na nidokNa i, di hata na mandok: Ndang adong mago Hubahen agia sada sian na nilehonMi tu Ahu. Alai nunga dipabotohon parjehe i hian partinandaan tu nasida, ai didok do: Ia i na huumma, Ibana ma i. I ma tangkup hamu! Asa pintor didapothon si Judas ma Jesus, didok ma: Tabe di Ho, Guru! Laos di umma.

P       :     Alai ninna Jesus ma mandok ibana: Marhua ho tuson, anggia?  O Judas, pangummaon do hape dibahen ho pasahathon Anak ni Jolma i. Dung i ro ma nasida, dilaluhon ma tangan nasida tu Jesus manangkup Ibana.

R       :     Dung i adong ma sada sian angka dongan ni Jesus mangalaluhon  tanganna, disintak ma podangna, ditampulhon  ma tu naposo ni sintua ni malim sahalak, dipisikhon ma pinggolna. Jadi didok Jesus ma: Pasarung podangmi! Ai na manintak podang, mago do bahenon ni podang. Ai na so tarbahen Ahu do di roham mangido sian Damang, asa dipadiri di Ahu saonari, lobi sian sampuludua loksa surusuruan?

P       :     Alai songon dia ma di si saut hata ni surat na mandok: Ingkon masa do na songon i. Uju i ma didok Jesus tu angka natorop i: Hira na dompak panamun do hamu hehe, marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu. Alai na masa do sudena on, asa jumpang hata ni panurirang i. Dung i ditadingkon saluhut sisean i ma Ibana laho maporus.

7.  Marende: BE. No. 180 : 1  “Ro Tu Jesus Ho Na Loja”    (BL.228)   

ÿ Ro tu Jesus ho na loja,  na maheu i/ Lam lumbang do di lambungNa, rohami

 

8. Ditangkup Jesus  + Jesus di Jolo ni Malim Kayafas

P    :     Dung i ditangkup angka soldadu dohot induknasida ro di angka naposo ni Jahudi ma Jesus jala diihoti, jadi ditogihon ma Ibana jumolo tu si Hannas, i ma simatua ni si Kayapas, Sintua ni Malim di na sataon i. I ma si Kayapas naung mandok tu angka Jahudi: Dengganan do mate sada halak humophop bangso.

R    :     Alai diihuthon si Simon Petrus dohot sisean na sadanari ma Jesus. Naung masintadaan do sisean na sada i dohot Sintua ni Malim i, jadi bongot ma ibana rap dohot Jesus tu alaman ni Malim i.

P    :     Alai disungkun Sintua ni Malim i ma Jesus taringot tu angka siseanNa dohot taringot tu podaNa i. Jadi dialusi Jesus ma ibana, ninna ma: Patar do hatangKi di hatoropan. Na tongtong do Ahu mangajari na sai laon di bagasan parguruan nang di bagasjoro pe, parpunguan ni saluhut halak Jahudi.

R    :     Ndang adong manang aha huhatahoN marsibuni, boasa Ahu disungkun ho? Nasida naung umbege hatangKi, i ma sungkun! Ai diboto nasida do na Huhatahon i. Dung didok Jesus songon i, dipastap sada opas na jongjong di si ma Ibana, huhut didok: songon i do pangalusim tu Sintua ni Malim i?

P    :     Dungi ninna Jesus ma mangalusi ibana: Ia na hurang na hudok, hajongjongkon na hurang; alai anggo na hona do, boasa pastaponmu Ahu? Asa disuru si Hannas ma Ibana naung tinali i tu Sintua ni Malim si Kayapas, di si do marpungu angka sibotosurat dohot sintua ni natorop.

R    :     Alai sai mangihut do si Petrus mandaodao sahat ro di alaman ni Sintua ni Malim i. Laos bongot ma ibana tu bagasan, laho hundul tu si rap dohot angka naposo marnida ujungna.

P    :     Alai anggo angka Sintua ni Malim ro di sandok rapot godang mangalului panindangion gapgap dompak Jesus, na tuk mambahen Ibana marutang hosa. Alai nang pe hehe torop sitindangi gapgap, ndang adong jumpangsa hasalaan ni Jesus.

R    :     Alai parpudi ro ma dua halak, ninna ma: didok halak on: Tarbahen Ahu do mangalohai joro ni Debata, jala pajongjongonNa i sumuang di bagasan tolu ari. Dung i hehe ma Sintua ni Malim i, mandok tu Ibana: Ndang alusanMu na hinatindanghonnasida dompak Ho? Alai sai hohom do anggo Jesus.

P    :     Dung i dipanghulingi Sintua ni Malim i ma Ibana, huhut mandok: Hupatolon ma Ho tu Debata Siparngolu i, asa dipaboa Ho tu hami manang na tutu Ho Kristus, Anak ni Debata!

      9. Marende: BE. No.  267 : 5  (BL. 100) “O Tuhan, sulingkit”                    

ÿ   Dipuji rohangku do Ho, o Jesus donganku tutu/ Gogongku sambing nama Ho.

            Pinuji goarMu, pinuji goarMu, hupuji burju/Pinuji goarMu, pinuji goarMu, hupuji burju

 

10.      Dipusa Natorop i Jesus + Diporso si Petrus Tuhan Jesus

P    :     Dungi didok Jesus ma tu ibana: Songon nidokmi ma tutu! Alai hudok ma tu hamu: Olat ni on ma idaonmuna Anak ni jolma i, hundul di siamun ni hagogoon jala ro di atas ombun ni langit. Gabe diribakkon Sintua ni Malim i ma paheanna mandok: Na mangaleai Debata do Ibana! Pola luluan do pe sitindangi?

R    :     Nunga dibege hamu pangaleaiNa i! Beha do di rohamu? Dung i ninna nasida ma mangalusi: Marutang hosa ma Ibana!  Jadi ditijuri nasida ma bohiNa, na deba manompuk, na deba mangalinsingi huhut mandok: Surirangi hami Kristus, ise do na mamunu Ho?

P    :     Alai hundul do anggo si Petrus di alaman i, jadi didapothon sada parompuan ma ibana mandok: Dohot do ho dongan ni Jesus na sian Galilea i! Alai diporso si Petrus do, didok ma: Ndang adong huboto, jala ndang huantusi na nidokmi!

R    :     Laos ruar ma ibana tu alaman jolojolo, jala martahuak ma manuk. Alai marnida ibana, diulahi naposo boruboru i ma mandok tu angka na jongjong di si: On do sada sian nasida!

P    :     Alai mamorso muse anggo ibana. Jadi dung satongkin nari, didok angka na jongjong di si ma muse mandok si Petrus:           A, tongon do dongannasida do ho, ai halak Galilea do ho. Gabe dipungka si Petrus ma mambuburahon dirina huhut manolonnolon: Ndang hutanda jolma na nidokmuna i!.

R    :     Dung i mamintor martahuak ma manuk i paduahalihon. Jadi diingot si Petrus ma na nidok ni Jesus i tu ibana: Tolu hali do soadahononmu Ahu andorang so martahuak manuk paduahalihon!. Jala marningot i, tumatangis ma ibana.

11. Marende: BE. No. 078 : 3 “O ulu Na Sap Mudar”      (BL. 158)

ÿ Au on tama o Tuhan, manaon na tinaonMi/ Dosangku do diporsan, Ho na tarsilang i/ Sai tatap ale Tuhan, au na di joloM on/ Huhut sai patuduhon, basaM tu rohangkon

 

12. Si Judas Manolsoli  - Jesus di Jolo ni si Latus

P    :     Jadi dung diida si Judas parjehe i, na naeng hona uhum na ma Jesus, disolsoli ma rohana, dipaulak ma na tolupulu rupia tu angka Sintua ni Malim dohot tu sintua ni bangso i, ninna ma: Sala do ahu, hujehehon do hape na so marpipot!

R    :     Alai didok nasida ma: Ndang ro di hami i! Ho do na sari di si! Jadi ditimpalhon ma perak i tu bagasan joro i, laos sumurut sian i laho maningkot. Alai dibuat Sintua ni Malim ma hepeng i, ninna ma: Ndang jadi padomuon i tu arta ni joro, ai tuhor ni mudar do i!. Jadi mardos ni roha ma nasida manuhorhonsa tu ladang ni pande hudon, bahen parbandaan ni halak dagang. Ala ni i umbahen margoar i : Ladang Mudar ro di sadari on.

P    :     Asa ditogihon nasida ma Jesus sian jolo ni si Kayapas tu kantor. Alai sogot ma i manogot i. Ndang na bongot anggo nasida tu kantor asa unang tarsubang laho manganhon Paska i. Gabe ruar ma si Latus mandapothon nasida, didok ma: Pangaluan dia do diboan hamu dompak Halak on? Dung i ninna nasida ma mangalusi: Aut unang sibahen na jahat Halak on, ndang tagamon pasahatonnami Ibana tu ho.

R    :     Gabe ninna si Latus ma mandok nasida: “Boan hamu ma Ibana, uhum ma Ibana marguru tu adatmuna.” Alai ninna angka Jahudi ma mandok ibana: “Ndang jadi pusaonnami manang ise.”

P    :     Jadi dialuhon nasida ma Ibana, ninna ma: “Na dapot hami do On pabalikbalikhon bangsonami, jala mangorai mangalehon guguan tu Kesar i, dipandok: “Raja, Kristus do Ibana.” Jadi dibongoti si Latus ma muse kantorna, dijou ma Jesus, didok ma tu Ibana: “Atehe, Ho do Raja ni Jahudi?”

R    :     Ro ma alus ni Jesus: “Na sian roham do na nidokmi, manang na nidok ni halak do i tu ho taringot tu Ahu?” Gabe dialusi si Latus ma: “Ai halak Jahudi do Ahu? BangsoMi dohot angka Sintua ni Malim, i do pasahathon Ho tu ahu. Aha do na binahenMu?”

P    :     Jadi dialusi Jesus ma: “Ndang sian portibi on harajaonKu, aut sian portibi on harajaonKu, ndang tarbahen so mangalo angka naposongKu asa unang sahat Ahu tu tangan ni angka Jahudi. Alai ndang si songon i harajaonKi.”

13. Marende: BE. No. 344 : 8  “Ise Do Angka Nasida”      (BL. 084) 

ÿ  Ale Jesus Rajanami, na marasi roha i

                Sesa nasa dosanami, tiop tangannami be

                Dohot hami on sude, sai pabongot ma muse

 

14. Ndang jumpang si Latus Hasalaan ni Jesus  - Diboan tu Jolo ni si Herodes

P    :     Dungi ninna si Latus ma mandok Ibana: “Asa Raja do Ho?” Jadi ninna Jesus ma mangalusi: “Songon na nidokmi ma tutu, Raja do Ahu umbahen na tubu Ahu jala umbahen na ro Ahu tu portibi on, asa huhatindangkon hasintongan i.

R    :     Ganup na sian hasintongan i, tangihonon ni i do soarangKu.” Jadi ninna si Latus ma mandok Ibana: “Aha ma i hasintongan i?” Jadi dung didok si songon i, ruar ma ibana muse manopot angka Jahudi mandok tu nasida: “Ndang jumpang ahu manang dia hasalaanNa.”

P    :     Alai lam digogohon nasida ma mandok: “Digunturi Ibana do bangso i, ai mangajari do Ibana di sandok tano Judea, mamungka sian Galilea sahat ro tu son.” Alai umbege i si Latus, manungkun ma ibana, manang halak Galilea Ibana. Jala dung diboto, na sian gomgoman ni si Herodes Ibana, disuru ma Ibana tu jolo ni si Herodes, ai tongon do ibana di huta Jerusalem uju i.

R    :     Marnida Jesus si Herodes i, las situtu ma rohana, ai nunga nania lelengna sai naeng idaonna Ibana, ala naung dibege baritaNa jala diarop rohana idaonna tanda sipatupaonNa.

P    :     Jadi godanggodang ma disungkunhon tu Ibana, alai ndang dialusi Jesus ibana. Di si do angka Sintua ni Malim ro di Sibotosurat, jala gogo do Ibana dialuhon. Ia si Herodes rap dohot donganna, direhei jala dilealeai do Ibana, disolukkon ma pahean na arga tu Ibana, laos songon i ma, disuru Ibana mulak tu si Latus. Jadi di na sadari i gabe maraleale ma si Herodes dohot si Latus, ai na masihosoman do nasida anggo na sai laon.

15. Marende: BE. No. 076 : 3  “Sada Na Ma Sangkap Ni Rohangku”  (BL. 199)           

ÿ  Jesusku sai paingot ahu, di dosangku di basaM

               Ai andorang di na holom ahu, dipalambas Ho rohaM

               Nunga leleng dilului Ho do au, na lilu asa unang mago

                Ditaon Ho na bernit i, lao manobus tondingki

 

16. Dipalua si Barrabas - Jesus Manjujung Sungsang Duri dohot Marbaju Dapdap

P    :     Alai peam do dipalua panguhum  di pesta i sada halak na tarhurung, marguru tu na tinodo  ni natorop.  Alai  adong  ma  tarhurung  uju  i  sada  parjahat  na  sumalin  na margoar si Barrabas.

R    :     Jadi di na pungu i nasida, didok si Latus ma tu nasida: “Ise do dipangido hamu paluaonku, si Barrabas manang Jesus na targoar Kristus?” Ai diboto do, late ni roha nasida do umbahen na dipasahat nasida Ibana.

P    :     Alai disosoi angka Sintua ni Malim rap dohot sintua ni bangso i ma natorop i, asa dipangido nasida malua si Barrabas, alai pusaon do ianggo Jesus. Dungi ninna panguhum i mandok nasida: “Ise sian na dua i dipangido hamu paluaonku?”

R    :     Jadi didok nasida ma: “Si Barrabas!” Dung i didok si Latus ma tu nasida: “Antong, aha ma bahenonku tu Jesus, na targoar Kristus?” Gabe saluhut nasida mandok: “Parsilangkon ma!” Alai ninna panguhum i ma: “Ai aha ma na jahat dibahen?” Jadi lam gogo ma dipanjoujouhon: “Parsilangkon ma!”

P    :     Dung i ditogu si Latus ma Jesus, didokkon ma linsingan. Jadi didandani angka soldadu ma sungsang duri bahen tumpal, diampehon ma i tu uluNa; baju dapdap ma dialithon tu dagingNa. Dung i ro ma nasida tu joloNa mandok: “Tabi di Ho ale Raja Jahudi!” Laos dipastapi ma Ibana.

R    :     Dung i ruar ma muse si Latus, didok ma tu angka Jahudi: “Ida hamu ma, hutogihon do Ibana tu jolomuna, asa diboto hamu na so adong jumpang ahu salaNa.” Laos ruar ma Jesus manjujung sungsang duri jala marbaju dapdap. Jadi didok si Latus ma tu nasida: “Ida hamu ma jolma i!”

P    :     Asa dung diida angka Sintua ni Malim dohot angka naposo Ibana, dijouhon nasida ma: “Parsilangkon, parsilangkon ma Ibana!”

 

17. Marende: BE. No. 009 : 5  “Hupuji Holong Ni Rohamu”   (BL. 110)       

ÿ  Ai nunga diparhatoban, sibolis dohot dosa ahu

               Tuani ma Ho ro o Tuhan, mamorsan uhum na tu au

               Ditaoni Ho do hamatean, mambahen di ahu hangoluan

 

18.      Ndang Jumpang si Latus Sala ni Jesus - Dilului Dalan Paluahon Jesus  -Si Latus Mamuri Tanganna           

P    :     Dungi didok si Latus ma tu nasida: “Boan hamu ma Ibana, parsilangkon hamu ma; ai ndang jumpang ahu salaNa.” Gabe dialusi angka Jahudi ma ibana, ninna ma: “Marguru tu patiknami, ingkon marutang hosa Ibana, ai dibahen do diriNa Anak ni Debata.”

R    :     Umbege i si Latus, lam ganda ma biarna. Dung i diulahi ma muse tu kantorna, didok ma tu Jesus: “Sian dia do Ho?” Alai ndang dialusi Jesus ibana. Dung i didok si Latus ma tu Ibana: “Ndang angkupanMu ahu mangkatai? Ndang diboto Ho, marhuaso ahu paluahon Ho jala marhuaso ahu mamparsilangkon Ho?”

P    :     Jadi dialusi Jesus ma: “Ndang adong huasom mangago Ahu, aut unang nilehon i tu ho sian ginjang. Dibahen i gumodang do dosa ni na pasahathon Ahu tu ho.”

R    :     Jadi olat ni i ma dilului si Latus dalan paluahon Ibana. Alai manjujui ma angka Jahudi, ninna do: “Molo dipalua ho On, ndang aleale ni Kesar ho!” Ai na mangalo Kesar i do ganup na mambahen dirina gabe Raja.

P    :     Asa dung dibege si Latus hata i, ditogihon ma Jesus haruar, laos hundul ibana di habangsa paruhuman i na di inganan na margoar: “Pantarbatu”, alai anggo di hata Heber: “Gabbata.”

R    :     I ma na masa di ari parhobasan Paska, mareak hos ni ari. Dung i didok ma tu angka Jahudi: “Ida hamu ma Rajamuna!” Alai digogo nasida ma manjouhon: “Padao, padao ma i, parsilangkon ma Ibana!”

P    :     Dung i didok si Latus ma tu nasida: “Parsilangkon ma Rajamuna!” Jadi dialusi angka Sintua ni Malim ima: “Ndang adong rajanami dungkon ni Kesar i.”

R    :     Asa dung diida si Latus na so marguna hatana, lam ganda tahe gaorna, dibuat ma aek mamuri tanganna di jolo ni natorop i, huhut mandok: “Lias do ahu sian mudar ni On! Hamu do na sari di si!”

P    :     Dung i ninna sude natorop i ma: “Marsapata tu hami dohot tu ianakkonnami ma mudarNa i!” Dung i saut ma dipalua si Barrabas, alai anggo Jesus dilinsingi, dung i dipasahat ma asa diparsilangkon.

 

19.   Tangiang Pangondianon

 

20.   Marende: BE. No. 182 : 1 – 2   “Tu JoloM O Debatangku”      (BL. 024)    

ÿ Tu joloM o Debatangku, sai use do rohangkon

      Sai pasiat tangiangku,  dohot iluilungkon

ÿ Husolsoli do rohangku, na gok dosa i tongtong

      Ai godang ariaringku,  na hubahen ambolong

 

21.   Jamita:

 

22.  Marende: BE. No. 082 : 1 – 3    “O Jesushu Tu BugangMu”  (BL. 021)  

                                            (Papungu Pelean)

ÿ O Jesusku, tu bugangMu, ro marsomba rohangkon

      Sai tarpuji, sai tarpuji, na pamalum tondingkon

ÿ Tung di patMu, o Jesusku, solsolanku rohangki

      Tangisanku na tinaonMu, ala jat ni rohangki

ÿ Tu tanganMu ma tondingku, jumpa hamamatengki

      Tu lambungMu, o Tuhanku, alap na tinobusMi

 

23.   Tangiang Panutup: “Pelean” & “Ale Amanami”

 

24.   Pasupasu & mangendehon: Amen,… Amen,… Amen,…!