Bahan Jamita Epistel Minggu VI Dung Trinitatis, 12 Juli 2015

Tumangihon Jala Mangoloi Panurirangon Ni Jahowa

Efesus 1: 3 – 14

a.       Ia Buku Efesus ima sada sian angka surat na digurithon Apostel Paulus sian hurungan (penjara) ala ni haporseaonna tu Kristus (Ef.3:1; 4: 1; 6: 20); kemungkinan besar di Rom do ibana dihurunghon hira 2 taon (Ul.Ap.28: 30), ala ni i jotjot do didok surat on “surat kiriman penjara”. Nang pe dipenjara ibana, tongtong do dipatuduhon ibana parsihohotanna, las ni rohana, panghirimonna dohot holong ni rohana tu Debata dohot tu Huria i. Tarida do i sian pandohanna di surat on, na so adong di ibana pandelean dohot sumurut sian haporseaon tu Tuhan Jesus. Maksud ni si Paulus manurathon surat on, tontu do laho pahothon panjouon, pamilliton ni angka na porsea, angka na badia (huria i) na ro sian hasipelebeguon marhitehite Kristus i, jala pabotohon hinaarga ni  pamilliton i marhitehite Kristus, sian asi ni roha ni Debata. Hahotan ni panjouon ni Debata tu si Paulus dipatuduhon do i marhite turpukta on, nang pe dibagasan hurungan ibana alai boi do ibana margogo jala marsihohot mamuji Debata. Turpukta on ima uraian doxologis {bahasa Yunani: doxa - "pujian" dan logos - "firman" atau "berbicara"; adalah sebuah himne pendek yang digunakan di pelbagai kebaktian Kristen, seringkali dinyanyikan pada akhir kebaktian} taringot hagogok ni haluaon  ni Debata dibagasan Kristus. Marhite doxologi manang pujipujian i dihatindanghon apostel Paulus do:

1.       Asi ni roha ni Debata na mamillit hita dibagasan Kristus; Asi ni roha ni Debata do patauhon jolma i gabe panean di harajaon-Na. Ai nunga dibagasan gomgoman ni dosa hian sude jolma, hinorhon ni angka pangalaosion. Alai di bagasan Kristus, na Hinaholongan-Na i, gabe ias jala so hasurahan do ganup na porsea di Ibana. Sude jolma do ditodo Debata bahen Anak-Na. Alai na tutu tarpillit gabe anak di harajaonNa, i ma angka na porsea di Tuhan Jesus Kristus (ay.4-5). Na manjalo huaso ha-anahon, manean harajaon-Na i, i ma angka na mangihuthon hata-Na, angka naung pinarbadiaan ni mudar ni Jesus Kristus (Joh.1:12). Manang ise na porsea di hasesaan ni dosana marhite mudar ni Tuhan Jesus, tarrajum do naung manjalo pasupasu partondion. Ai ndada sian malomalona, manang sian gogona, manang jinou ni tuana i umbahen dijalo, tung ala ni asi ni roha ni Debata na marmulia i do (Ep.2:8-9). Tung halongangan do pamilliton ni Debata di hita so ala ni halobian (keistimewaan sian angka na so hona jou dope. Ala ni i, tama do angka na porsea i mamuji Debata ala ni asi ni roha-Na di bagasan Kristus. Diigl do sian angka na jinou jala na pinillitNa i asa mangolu dibagasan holong dohot parange na so hasurahan.

2.       Haluaon dibagasan Kristus; Manang ise na ro tu Tuhan Jesus, manggundukkon pambahenananna na so tama, jala olo paubahon rohana, sai dapotsa do haluaon sian asi ni roha-Na. Dihuphupi holongNa na songkal i doo sude dosa ni angka na ro manopoti dosana ( 1 Joh. 1: 9). Holan Kristus do na marhuaso manghuphupi dosa ni jolma na manolsoli jala paubahon rohana. Ai Ibana do naung mangusehon mudar-Na bahen hasesaan ni dosa ni angka na porsea. Asa ndang adong haluaon sian na asing, tung holan dibagasan Kristus do (Ul.4: 12). Dibagasan Kristus do adong haluaon. Ingkon masuk ma hadirion ni jolma i tu bagasan holong ni roha-Na na bagas i. Gabe ndang be tarida hadirion (ego) ni sada halak molo dibagasan Kristus ibana. Hadirion ni Kristus tama ma tarida di ngolu ni halak naung masuk tu bagasan holong ni roha-Na (Gal.2: 20). Buas do roha ni Jesus mangusehon holong-Na. Diusehon do holongNa i mardongan hapistaran dohot habisuhon godang. Lapatanna, dipapatar do holong-Na i marhite pangantusion na tangkas taringot tu uhum dohot asi ni roha na pangoluhon. Ai ingkon hona uhum do ganup na mangulahon dosa, ndang adong na malua sian hamatean angka na mangulahon hajahaton (Rom 6: 23; Amos 9: 10). Alai  humophop hita gabe dosa do Ibana, na so tumanda dosa, asa gabe hatigoran ni Debata hita di bagasan Ibana ( 2 Korint 5 : 21). Lapatanna, Jesus do mamorsan uhum na patut jaloon ni pardosa i hian, asa malua ganup na porsea di Ibana.

3.       Dipasada do angka na pinilitNa i; Dipabotohon do tu hita tahi ni rohaNa, tahi na buni hian mangihuthhon halolomona, naung dipahotna dibagasan diriNa. Tahi na sian lomo ni rohaNa, i ma naeng malua sian hamagoan; dosa jolma i, unang be hita diparhatoban sibolis i, na mamboan tu hamatean na saleleng ni lelengna. Asa marparange jolma i dibagasan ngolu na imbaru songon Kristus Jesus. (ptds. BE. No.543:1-5). Dipasada do angka na pinillitNa i dibagasan Kristus. Kristus ma pardomuanta, disi ma hita sada marhitehite pandidion, asa ndang be nirahutan manang pinasada ni mudar nang marga, suku alai nunga mudar ni Kristus i (Gal.3: 26-28). Kristus ma partalianta tu Debata dohot tu donganta jolma naung tinodoNa, jala naung disangkapi Debata hian do. Ndang pardomuan ala ni kepentingan pribadi, kelompok dohot cita-cita ni hajolmaon umbahen na sada hita di bagasan Kristus. Alai ala ni mudar ni Kristus Jesus do asa saluhut hita ndang holan na mamingkirhon dirinta be, dohot do  nang dihumaliangta. Marhitehite hita naung pinilitNa, patar ma hasangaponNa di tongatonga ni portibi on (huria, masyarakat dohot bangso). Gabe sira dohot panondang ditongatonga ni angka bangso na so tumanda Tuhan Jesus (Ptds. Mat.5: 13-14). Marhitehite na manghangoluhon barita na uli, gabe idaon ni halak saluhut habasaon, habasaron, parange na denggan, asa marhite angka ulaon na denggan i, patar ma holong ni roha ni Debata di angka donganta na berbeda suku, luat dohot ugamo na asing (ptds. 1 Ptr.2: 12-15). Tarpuji ma hasangaponNa marhitehite hita naung tarpillit i angka naung manghiirim di Kristus i.

4.       Dipasahat do TondiNa ima Tondi Parbadia; TondiNa i ma na mandongan i hita na binagabagahonNa i tu hita, pahothon haporseaon huhut mangapuli angka na porsea i. Tanda jaminan na so dipasombu Debata angka na porsea, jala patujolona nunga dipasahat tu hita, i ma Tondi Parbadia. Tondi Parbadia ma na gabe pahothon panghirimonta, laho manuturi dohot mandongani angka na porsea i, paima sahat hita tu hasangapon sogot (ptds. Rom 8: 14-17). Tondi Parbadia do dilehon patujolo ni arta siteanonta. Tondi Parbadia laho manogihon hita tu haluaon na pinatupaNa, asa tarpuji hasangaponNa.

b.      Lam godang do di tingki on  na mandondoni ngolu ni jolma, atik pe lam timbo teknologi paneanghon angka ulaon siganup ari. Torop do na tarihot tu materialisme, konsumerisme, dohot egoisme laho manggohi hagiot ni rohana. Sipata pola sahat tu na menghalalkan segala cara, so pola parduli manang na gabe korban halak di angka usaha na pinatupana. I ma halak na mangasahon gogo, pingkiran, dohot materi laho mangeahi hasonangan. Molo songon i ndang saut dope diparsaulihon haluaon i, tarihot dope halak i di hagogoon dohot haulion portibi.

c.       Nian ringkot do hahipason asa margogo mangula; ringkot do hapistaran laho mangantusi ulaon na tama; ringkot do hamoraon laho patulus sangkap na denggan. Alai saluhutna i ndang tau mangalehon haluaon sian dosa dohot hamatean. Ai dia ma gunana molo hipas jala togos pamatang hape marsahhit anggo rohana ? Dia ma gunana molo pistar jala tardok pakar sada halak ianggo rumar tondina ? Aha ma gunana nang saluhut portibi on diomo (Mat. 16: 26) anggo sian hajahaton saluhutna diomo ? Songon dia ma tarbahen halak i marende dohot marlas ni roha ? Gariada talpe uhum dohot hamatean di angka halak na mangalului haluaon sian portibi on! Alai rade do pasupasu dohot haluaon di angka halak na marsihohot manghaholongi Tuhan Jesus. Manang ise na manghaholongi dongan songon diriniba sandiri. Anggo hapistaran portibi  mandok ingkon taluhonon jala pasision do dongan asa dapot pangomoan dohot las ni roha. Angka na holit, pangotootoi jala na marroha diri i do na marbisuk didok portibi on. Alai hapistaran dohot habisuhon na sian Debata mandok; molo male musum lehon ibana mangan, molo mauas lehon ibana minum (Mat. 25: 34-40). Haluaon dohot las ni roha na manongtong i do dihasiholi angka na manghaholongi Tuhan Jesus.

d.      Topik ni minggunta mandok : “Tumangihon Jala Mangoloi Panurirangon Ni Jahowa”, asa angka na tarjou, na tarpillit do hita di angka ulaonta be laho papatarhon holong ni roha ni Debata; mangulahon na hinalomohon ni Debata di angka ulaonta, fungsinta be; Ama, Ina, ianakhon tarjou laho manghobasi ulaon na denggan dibagasan haserepon, hatuluson, dohot pangoloion ala ni haporseaon, songon pangoloion ni Jesus Kristus tu Debata Ama i sahat tu hau pinarsilang. Dilehon do tu hita hahipason, hapistaran, habisuhon na sian Tondi Parbadia i, asa taboto manimbangi di lomo ni roha ni Debata. Alai ndang gabe ginjang ni roha, manang kesombongan rohani di hita, alai gabe toruk ni roha (kerendahan hati), ai silehonlehon do i di  hita. Laos gabe i ma na mangonjar rohanta ungkap laho patupahon angka ulaon asi ni roha dohot marpanindangion tu saluhut halak (Gal.6:9-10). Amen.