Bahan Jamita Epistel Minggu VIII Dung Trinitatis, 26 Juli 2015

Porsea Jala Marpos NI Roha Di Hagogoon ni Jahowa

Johannes 6 : 1 – 21

a.       Nunga jotjot hita mambege turpuk jamita on, ala i mansai menarik do pembahasan di turpuk on di angka na porsea di Jesus Kristus. Turpukta on songon lanjutan ni turpuk evangelium (Markus 6: 30-34, 53-56) na di minggu na salpu, na si roha ni Jesus mamereng natorop i. Jala Jesus mangajari na torop i marhitehite holongNa i. Jala mansai ampit dope unok ni jamita turpuk evangelium minggu na salpu, Jesus Parmahan na denggan, napatuduhhon kepedulianNa tu torop halak na mangihuthon Ibana. Ndada holan mangajari Jesus dohot do disarihon angka na mauas di partondion nang di pardagingon.Dipatuduhon do di bagasan turpuk on dua hal na masa, ima:

Ø  Halongangan do na pinatupa ni Jesus on mangalehon 5000 halak (lima ribu orang laki-laki banyaknya) sodohot dope di etong, ina, boru, dohot dakdanak. Pasti lobi sian lima ribu halak torop na dilehon mangan. Jala dibaritahon do i di evangelium na asing di Mateus 14: 13-21; Markus 6: 32-44; dohot di Lukas 9: 10-17). Ndang adong kemungkinan be boi mangan na torop i ala soada dalan, dia ma dalanna ? Jumolo do Jesus mandok sungkunsungkunna tu si Pillipus: “Sian dia ma tuhoronta roti asa mangan angka on?” Boasa pola unjunan sisean i ate ? memang ringkot do i laho mamboto sadia bagas ma pos ni roha nang haporseaon ni angka siseanNa tarmasuk si Pilippus di naung jotjot rampak nasida di pelayanan. Ai Jesus siboto roha do, di dodo do roha nang pangkilalaan ni si Pillipus. Jala dialusi si Pillipus do “Ndang sae roti arga dua ratus hupang, asa dijalo ganup nasida sasaotik”. Lapatanna dipangasahon si Pilippus do hapogosonna, na adong di pingkiranna etongetongan matematika (memang 1 hupang ima 1 dinar, molo 1 dinar dos do i tu balanjo buruh kasar 1 ari). Laos songon i do nang alus si Andreas sahalak siseanNa na asing, dibereng ma aha do bohal ni natorop i: “Adong do dison sada dakdanak na umpeop lima roti dohot dua dengke, alai sadia ma i tu na sai torop ?” dison pe jumpang hita do halihali ni si Andreas na mangasahon utokutok nang pingkiranna. Alai nang pe sisotik i na adong ima dihalashon Jesus na mandok mauliate di tangiangna di sipanganon na adong i. Sian i boi idaonta: Naparjolo, Tung so boi do pangasahonota pingkiranta nang gogonta laho melayani manang marhobas, alai naeng ma molo marhobas pasahat ngolu tu Debata dibagasan tangiang songon Jesus na sai tongtong martangiang. Napaduahon, Tung saotik nang godang pe naeng ma hita sidok mauliate tu Tuhan i. Unang ma ala naung marlobi lobi manang naung godang tajalo manang naung dapot paruntungan nang parlabaan hita asa mandok mauliate. Na otik pe tong do tadok mauliate. Asa haposan di na otik haposan nang di na godang (Luk.16: 10a “Ia haposan halak di na otik, haposan ma ibana nang di na godang”). Martangiang do Jesus mandok mauliate, dungi diparlehon ma tu na torop i. Napatoluhon, Pola do lobi 12 ampang asing ni ndang di etong dope angka dengke, jala ipe dipapungu do ndang diambolongkon. Lapatanna, unang ma molo marlobian hita gabe marlomo lomo di ugasanta, naeng ma jamot hita di naung dipasahat Debata tu hita, asa taparhaseang i saluhutna (intermezzo; songon halak batak istilah: sipanganon na lobi “dipalas” alias dipamasuk tu kantong palastik, tarhilala, unang bolong). Napaopathon; sangkap ni natorop i dung mamereng halongangan na pinatupa ni Jesus i, ima asa manjalo Jesus jongjong gabe Raja ni Bangso Israel, diboto Jesus do sangkap nasida i, ido umbahen maporus Jesus sasadasa tu dolok. Ala haroro ni Jesus ndada gabe raja holan tu sada bangso alai saluhut bangso nang Raja portibi on do, jala ndada raja politisir ni halak Jahudi alai Raja na Paluahon saluhut manisia do di tingkiNa muse.

Ø  Na mardalan Jesus di atas ni aek laho pasohon pangullus ni habahaba na gogo, pola do mabiar angka siseanNa i. On ma kejadian na mangihut; di na manaripari tao i angka siseanNa marsolu dompak Kapernaum, ndang rap Jesus nasida, ro do habahaba na gogo mangullus parao i. Mansai mabiar do angka siseanNa i, hape nian andorang so gabe siseanNa i nasida angka panjala dengke do nian naung berpengalaman nasida, pola ma mabiar nasida di na masa i ? dia do lapatan ni  na masa on ? Naparjolo, Dipardalanan ni ngolunta di portibi on songon solu manang parau i do di tonga ni(simbol soikumene ima solu) laut, aek tao manggombarhon maut, hasusaan, haholomon, nang sibolis, godang angka tantangan nang hamaolon nang ambatambat di ngolunta. Napaduahon, tung so boi do hita aman mangalangka sidalanannta ia so mardonganthon Jesus. Jesus mardalan diatas aek, lapatanna, Jesus do na patundukhon huaso haholomon, nang sibolis i di toru ni patNa. Holan Jesus do na pasonanghon rohanta, jala Ibana do na pademakhon habahaba i. Napatoluhon, dung bongot Jesus tu parau i, pintor sahat ma tu luat sitondongonnasida, lapatanna Jesus do donganta asa sahat hita tu tujuan ni ngolunta ima Surgo hasonangan i, Jesus do na mandongan i hita di pardalanan ni ngolunta, asal ma porsea hita.

b.      Ala ni i songon topik ni minggunta: “Porsea Jala Marpos Ni Roha Dihagogoon NI Jahowa”, dipangido do sian hita angka siihuthon Kristus, sahat didia do pos ni roha nang haporseaonta tu Jahowa uju ro angka hamaolon, nang habahaba di pardalanan ni ngolunta ? Hape jotjot do hita manghatindanghon haporseaonta di Debata Jahowa, Jesus Kristus, dohot Tondi Parbadia di ganup parmingguonta. Ala ni i marhite turpuk on, ndada gagnggu be rohanta mandalani ari ari ni ngolunta, alai marsihohot marhaporseaon dohot marpos ni roha tu Debata Jahowa, naung dipamonang do hita marhitehite Mudar ni Jesus di Hau pinarsilang i, asa talu hamatean, nang sibolis, pasaehon angka dosanta, asa marlas ni roha hita, jala tasomba ma Ibana. Ala ni i nuaeng dijou do hita angka siihuthon Kristus: Boha do asa adong pos ni roha ni torop jolma dohot porsea di panghataionta, pambahenanta, nang pangalahonta ? tarlumobi ma tu angka na so sahaporseaon dohot hita, asa tapatuduhon ma kepercayaan orang banyak bagi kita, sehingga mereka juga yakin dan percaya akan Tuhan yang kita sembah dalam Yesus Kristus. Amen.

Bahan Jamita Evangelium Minggu VII Dung Trinitatis, 19 Juli 2015

Gabe Asi Ma RohaNa Mida Nasida

Markus 6: 30-34 + 53-56

a.       Tarbarita do sude ulaon ni Jesus na pasonanghon torop pangkilalaan ni jolma, nang pe di sisi na asing adong kecemburuan sian angka na tersaingi ulaonna isara ni sian angka sintua ni halak parise dohot saduse nang siboto surat. Nang pe songon i sai adong sian horong na manghosomi Jesus na manghalomohon dohot na manghasiholi Jesus isara ni si: Jairus, si Nikodemus. Dibagasan turpuk on dibaritahon do mansai torop halak na mangihuthon Jesus dohot angka siseanNa. Torop do halak na marlao ro tu nasida; gari mangan, gari so sadihari. Lapatanna; ala ni torop jolma i, ndang sanga nasida mangulon. Alai diantusi Jesus do halojaon ni angka apostel i laho mangajari dohot mangulahon na niajarhon ni Jesus. Pola Jesus mandok tu nasida asa pahosahon saotik (istirahat sejenak). Lapatanna ringkot do mangulon ima mangalehon tingki tu dirinta sandiri asa merenungkon naung niulahon i. Molo adong na marpangkurangi manang naung denggan niulahon panghobasion, boi ditingkathon manang lam dipadasip panghobasion i. Jala di na mangulon i pe boi do i gabe tingki marsiajar dohot mangalap gogo, asa margogo muse mulaulaon, Jadi Jesus pe diantusi do keterbatasan gogo ni angka siseanNa i. Jesus do na memahami kemampuanta, hagogoonta, hagaleonta, dilehon do dalan tu angka siseanna asa margogo muse.

b.      Nang pe naung marparau tu inganan na suhi nasida tongtong do ditanda halak, umbahen na torop mangihuthon mardalan tur nasida jumolo sahat. Mamereng punguan na bolon i, gabe asi ma roha ni Jesus. Ai songon birubiru na so marparmahan. Hamuna angka dongan, molo adong punguan birubiru na so marparmahan tabayangkon ma jolo boha ma parjadina ? tontu gabe marserak do, jala mauas nang haraparon, dung i molo ro babiat manang binatang buas, mura do pargutonna ala naung marserak. Laos songon i ma gombaran ni angka jolma na torop i diida Jesus; gabe asi ma rohaNa mida nasida. Molo asi do roha ni Jesus napatuduhon holong na sian nasa roha nang ateate marnidasa, ndang loasonNa punguan i marserak so marparmahan. Diajari Jesus ma natorop i dohot godang pangajarion. Dison ma dipatuduhon gombaran ni birubiru na mananda parmahanna ima Jesus, pola do torop na mamereng Jesus jala mananda asa diihuthon mardalan tu na dao. Ndang pasombuon ni Jesus halak na torop i songon i boti ndang marparmahan.

c.       Jesus do parmahan na denggan, na marroha do Ibana laho patureturehon halak na torop i. Mansai godang do angka na marsahit pamatang nang roha pe dipamalum Jesus. Alai hamalumonna i torop do i ala holan manjama ulos ni Jesus, boasa ndang tangan di na masijalangan, boasa ndang dais pamatang ni Jesus tu na marsahit ? boi dapot roha do i na masa i umbahen na songoni, ala molo tajaha di bindu na di jolo ni turpuk on( Markus 5 : 21-43 epistel Minggu IV Dung Trinitatis). Hea do dipamalum Jesus sahalak ina na marsahit bulan (pendarahan), holan manjama ulos ni Jesus i do sahalak ina i gabe malum, ra tar sar do barita taringot tu hamalumon ni ina na marsahit bulan i tu torop jolma, asa di haporseai ma asal ma dijama ulosNa i gabe malum. Tutu ma masa tu angka na torop i hamalumon holan ala manjam ulos ni Jesus i. Lapatanna mansai uli  do molo angka ulaon na metmet pe manang hal-hal sederhana boi tarpatupa hita gabe hahisaron nang las ni roha dohot hahipason tu torop jolma; isarana rupani; na masitabian di angka na pajumpang, masijalangan, hahormaton, hata horas-horas di angka na masihaholongan, mansai ringkot do i di angka na porsea. Asa marhite i ma hita angka na porsea masitoguan, masihaposan, jala masihaholongan. Apalagi molo tapatupa ulaon asi ni roha na pasonangkon roha ni dongan jolma; isara ni bantuan, materil dohot moril.

d.      Ala ni i naeng ma huria ni Tuhanta nang angka ruas ni huria boi gabe parhitean ni Debata laho pahisarhon angka na marsahit, angka na mabugang, angka na pogos, angka na gale, na so mardihadiha. Jala tarjou do hita angka naung pinillitNa tu Hangoluan Na saleleng ni lelengna dibagasan Kristus Jesus i laho patupahon ulaon asi ni roha i. Molo Jesus do  parmahan na denggan di hita angka na porsea naeng ma tarida panghorhonna tu ngolunta na olo marmahani angka jolma na dibagasan hahurangan, na gale, dohot na nidok di ginjang. Songon topik ni minggunta: “Gabe Asi Ma Rohana Mida Nasida” asa angka na porsea i pe hita nang ruas marasi ni roha mida angka torop jolma di persoalan ni ngoluna. Naeng ma hurianta HKBP gabe sibolan las ni roha, siboan hahipason, siboan pasupasu, jala na pangoluhon roha na arga di dongan jolma manang “Hospitality” (keramah tamahan). Molo mamereng jaman nuaeng on, mansai tamba do bilangan ni halan na sombong dohot egois, ala ni i huria nang ruas tarjou papatarhon Harajaon Ni Debata na marasi ni roha. Amen.

Bahan Jamita Epistel Minggu VII Dung Trinitatis, 19 Juli 2015

Gabe Asi Ma RohaNa Mida Nasida

Jeremia 23 : 1 – 6

a.       Di ombas panurirangon ni si Jeremia, i ma di angka tingki ni si Josia, Joyakim dohot Sedekia, lopus tu na tarbuang Juda tu Babel. Tontu tarmasuk do disi tingki ni raja Joahas dohot Joyakin na holan tolu bulan be lelengna mangarajai. Sian sude angka raja na ginoaran i holan  di tingki ni si Josia do na boi rap masitiroan (kerjasama) dohot si Jeremia. Pola do dibahen si Josia na patotahon parugamoon ni bangso i, i ma na digoari “Reformasi Josia”. Alai dung mate raja i didopang Firaun Neko sian Misir, marsagi ma parte i di Juda, na deba pro Misir, na deba nari mampartahanhon gagasan ni si Josia. Diampini angka panurirang na so sintong i do na pro Misir songon si Hanaya. Satolop do nasida marpangunsandean tu Misir bangso i. Ala dipabangkit nasida panungganei (penasehat), diusahahon do tongtong manghatahon barita las ni roha (syalom) nang so tutu i na naeng masa. Digintali nasida do raja dohot angka partogi tu ulaon hajahaton. Na jumorbut muse, dipangke nasida do goar ni Jahowa laho manolopi pingkiran mandompakhon Misir. Ndada holan politik, mampangkorhon do nang situasi i di ngolu parugamaon nasida, ai termasuk do Debata Baal diboan angka bangso na manaban nasida, gabe sisombaon di Juda. Ala ni i, ndang be lomo ni roha ni Debata di ula nasida, masa ma angka pangalaho na hinagigihon ni Debata isarana: ketidak adilan, korupsi, amoral (sex). Angka raja nang malim pe ndang be denggan pangalahona jala ndang tiruan tu rakyatna, sasintongna nasida do na ditodo Debata laho ‘marmahani’ bangso ni Debata alai gabe marsiak bagi do.

b.      Haroro ni Panurirang Jeremia songon naposo ni Debata pasahathon tona ni Debata tu bangso i ala naung diida Debata pangalaho ni angka panggomgomi, angka raja, uluan, pengguasa ndang denggan pangalahona. Sasintongna diigil Debata do sikap nasida songon parmahan singkat ni Debata laho mangaramoti bangsoNa. Hape molo dao tu pudi sejarah ni pamilliton ni raja ditongatonga bangso Israel, ndada lomo roha ni Debata gabe jongjong sada raja di tongatonga ni bangsoNa. Alai ala sai jogal roha ni Bangso Israel mangido sada raja jala asa tudos songon angka bangso na asing umbahen dilehon Debata nasida raja marhitehite si Samuel bangkit ma Raja Saul. Sasintongna diigil Debata do asa Ibana sandiri na manguluhon bangsoNa i (theokrasi), alai bangsoNa i do na so tau ajar. Tarida ma kelemahan ni jolma na gabe raja i laho mangarajai bangso Israel sian raja Saul. Daud, Salomo sahat tu partingkian ni si Jeremia. Alai nang pe songon i sai umbalga do holong ni roha ni Debata asa sian rimasNa, ndang pasombuon ni Debata bangsoNa i humasusa, marserak, ndang dipapungu. Marhite turpuk on mangkuling do Debata mangalehon harapan haluaon.

c.       Lumbalumba ni Debata tu bangso i mangalehon haluaon sian tunas ni si Daud ingkon ro ma sahalak parmahan na denggan; na pistar, na tigor roha, ima na martudutudu tu Mesias na naeng ro i. Dihatindangkon do di Padan na Imbaru haroro ni Mesias i dibagasan Jesus Kristus. Ibana ma Anak ni Debata na mangalehon ngoluna laho holan marmahani hita jolma; ditobus do sude angka dosanta marhite bugangNa i, durus mudarNa i holan laho manghophop hita jolma pardosa di hau Pinarsilang i. Diparmahani Debata do hita jolma asa marlas ni roha hita, malua hita sian angka uhum dohot dosa asa gabe panean hita di HarajaonNa  i. Profile Parmahan na denggan i nunga dihatindanghon parpsalmen Daud di Psalmen 23 ima martudutudu tu Debata. Jala Jesus sandiri pe mandok dirina Parmahan na Denggan (Joh.10: 11-15), ido umbahen mansai uli digombarhon Jesus na marmahani angka biru biru i marhite ornamen lukisan.

d.      Ala ni i di hita na hinaholongan dibagsaan Jesus Kristus, molo di dok Parmahan lapatanna denggan ma diparmahani angka pinahanna. Gombaran parmahan songon na dibagasan turpuk on ima martudutudu tu angka uluan, pargomgom, raja, malim, parhalado. Ali di hita na pinarmahanan ni Jesus Kristus ima angka siihuthon Kristus na tarjou do gabe parmahan na burju marhite angka bidang keahlian nang kemampuanta ganup marsada sada hombar tu asiasi naung nilehonNa tu hita. Tapatuduhon ma roha na marmahani dongan jolma di ngolunta siganup tingki nang siganup ari. Tahilalahon ma panarihonon ni Debata dibagasan ngolunta, nda ingkon ungkap ma nian rohanta laho patuduhon asi ni roha ni Debat tu hita nang mangihut tu angka dongan jolma ? Tudos di topik ni Minggunta mandok : “Gabe Asi Ma RohaNa Mida Nasida” manjou hita songon asini roha ni Jesus tu halak na torop i, laos songon i m a panjouon ni haporseaonta di Jesus Kristus laho mangurupi angka jolma na dibagasan haholomon, na ginosagosa, na pinasiaksiak portibi on, na dangol, na oto, na pogos, na so mardihadiha. Asi ma rohanta mamereng angka na hurang angka na so tama di humaliangta. Molo tabege angka barita kekeran terhadap perempuan dan anak-anak mansai malengleng ateate, na tardok gabe natoras gabe penindas, pelaku kejahatan, na tardok guru gabe mangulahon harorangon tu muridna. Ala ni i marjuang do bangsonta marhite angka pemimpin ni negaranta nang daerah pe asa botul botul songon parmahan na mamparrohahon rakyatna, nang sude angka jolma pe. Lam ma hita angka siihuthon Kristus asa tarjou dipangke Debata gabe ulaulaNa patulushon sangkapNa marmahani torop jolma manjalo asi ni rohaNa, marhite i lam torop jolma na porsea di parmahanion ni Debata jala mangihuthon Ibana. Amen.

PARTORDING NI ACARA PESTA PERESMIAN GEDUNG SERBA GUNA HKBP DEPOK 1 Minggu VI Dung Trinitatis Tgl. 12 Juli 2015, Pkl.09.00 WIB

I. P R O S E S I

·      Pkl 9.00 Wib, Prosesi Ephorus, Praeses, Angka Pandita, Parhalado dohot panitia mamasuhi bagas parmingguan, jongjong ma sude ruas di iringi Musik  dohot Song Leader.

·      Jongjong ma Ephorus, Praeses, Angka Pandita dohot parhalado dohot panitia di jolo pasahathon horas horas, dung i hundul ma parhalado tu hundulanna be jala laos hundul ma ruas.

II. PARMINGGUON  (L : Liturgis; R : Ruas; Sl: Song Leader)

1.    Joujou Marsomba Mamuji Debata!

L  : Huria ni Tuhanta na hinaholongan di bagasan Goar ni Tuhanta Jesus Kristus. Marpungu do hita sadarion, marminggu mamuji dohot pasahathon hamauliateon ni rohanta tu Debata parholong roha i. Namangolu do hita dibagasan asi ni rohaNa, jala tarbarita do Barita Nauli i sahat tu luat on, tamba do angka ruas ni hurianta. Ala ni i tarjou do huria i laho paradehon sarana pendukung tu panghobasion di tonga ni huria i. Tahamuliatehon ma di Tuhan i naung jongjong Gedung Serba Guna ni hurianta HKBP Depok 1 laho patulushon ulaon panghobasion di tonga ni hurianta nang masyarakat, saluhutna i ala asi dohot denggan ni basaNa tu hita. Patut ma antong hita marolopolop mamuji pasangap Tuhanta. Antong,  tapuji ma ibana dibagasan las ni roha.

R  :  (mangendehon) BE. No. 565:1 “Las Rohangku Lao Mamuji”

                   ♫  Las rohangku lao mamuji Debata Parholong i

                        Songon bunga na mangerbang di na binsar ari i

                        Arsak, dosa, haporsuhon mago dibaen asiMi

                        Las ni roha na manongtong lehon di au Tuhanki

L  : Di pesta las ni rohanta tu Tuhan i di ari Minggu on, rap do hita ruas, angka naposo ni Tuhanta marlas ni roha mamuji Tuhan i na niuluhon Oppu i Ephorus Pdt.WTP.Simarmata. Tahamuliatehon ma tu Tuhan i parsaoranta di Minggu on. Asa las ni roha bolon do na itajalo sadarion, boi hita marsada jala mangolu dibagasan holong ni roha. Antong tapasangap ma goarNa.

 R   :           (mangendehon) BE.No. 581: 1 – 2     “Sangap di Jahowa”

 ♫ Sangap di jahowa na sun timbul I, Balga ni holongNa ndang tarasam I,

     Di lehon AnaklNa na sasada I, manobus hita jolma pardosa I

     Puji ma Debata ale manisia,Las roham las roham somba ma Debata

     Dapothon Jahowa na sun timbul I,Marhite AnakNa Tuhan Jesus I

                               --------- jongjong --------

    ♫ Balga situtu pambaenMi Debata, Tung so hasuhatan holong ni rohaM.

       Tu jolma pardosa asi do rohaM,Di ungkap Ho dalan lao tu banuaM.

       Puji ma Debata ………

2.    Votum – Introitus – Tangiang :

L  : Marhitehite  Goar ni Debata Ama, dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on.

R  : Amen!

L  : Nunga dipabotohon Ibana tu ho, ale jolma, manang aha na denggan jala manang aha na niluluan ni Jahowa sian ho.

R  :  I ma na mangulahon uhum sambing dohot holong ni roha di habasaon

L  : Jala marpangalaho haserepon maradophon Debatam !  Haleluya!

R  : (mangendehon) Haleluya......Haleluya.....Haleluya.....!

L  : Martangiang ma hita! Ale Tuhan Debata, Parasiroha na sumurung!. Mauliate ma rohanami tu Ho, ala dijou Ho hami tu pangkirimon di hangoluan saleleng ni lelengna.  Ho do na pajongjong HuriaM HKBP Depok 1 on laho pararathon dohot marpanindangi  di holong ni rohaM. Mansai las do roha nami, huriaM HKBP Depok 1 di pangaramotionMu, gabe boi hami sada dibagasan holongMi. Marhite Pesta Peresmian Gedung Serba Guna HKBP Depok 1 sadari on, paingot ma hami di sude denggan ni basaM asa hupangke hami asi ni roha na sian Ho i, laho pararathon BaritaM tu angka ianakhon nami dohot tu angka dongan nami. Pangke ma hami gabe sira dohot panondang di luat on gabe habaoran ni pasu pasuM. Pargogoi ma hami manaluhon saluhut na naeng mangambat hami tu hasonangan. Sai paganda haporseaon, pangkirimon dohot pamompomon ni rohanami, asa monang hami ro diujungna, laho manjalo tumpal i hami dijoloM ala ni AnakMu, Tuhan Jesus Sipangolu iAmen.                         

------- H u n d u l --------

3.    Marende sian BE. No.187 : 1   “Denggan Do Panogum”         BL.200

♫ Denggan do panoguM ale Jahowa Diangka na pinarmahananMi

    Tagamon baheononMu ma na roa So tarbunihon Ho do burjuMi ?

   Jotjot suhar do pambahenanMi Di roha ni na so tumanda Ho

   Alai marhite sian i do ro Tu hatiuron na tinoguMi.

                                   

4.    Patik ni Debata :

L  : Patik ni Debata di minggunta  sadarion,  i ma di  Pesta Peresmian Gedung Serba Guna HKBP Depok 1 sadarion, tarsurat di : Hata Haporseaon  Ponggol Naparjolo (I) dohot lapatanna: Ahu porsea di Debata Jahowa, I do Ama pargogo na so hatudosan, na tumompa langit dohot tano.

R  :  Dia do lapatan ni i?

L  : On do: Diparhatutu rohangku do adong Debata na tumompa nasa na   manggulmit.

R  : Ditompa do dagingku marparnidaan, marparbinegean, marparnianggoan,      marpanghilalaan, marpandaian, dilehon do roha tu tondingku jala dipatureture do i saluhutna rasirasa nuaeng;

L  : Angkup ni i dilehon do tu au parabiton dohot sipanganon siganup ari, ro di nasa na hasea di ahu di hangoluan on;

R  : Diramoti do ahu asa unang mago jala diondingi do ahu diparmaraan;

L  : Luhutna i ndang sian denggan ni parangengku manang sian jinou ni tua; tung asi ni rohaNa sambing do i dohot denggan ni basaNa umbahen na dilehon;

R  : Dibahen i tama hupapujipuji Ibana jala tama huoloi na nidokNa ala saluhutna i, paboa las ni rohangku di Ibana. I ma na tutu situtu!

L  : Antong rap mangido gogo ma hita tu Debata laho mangulahon patikNa!

 L+J  :  Ale Tuhan Debata! Sai pargogoi ma hami mangulahon na hombar tu PatikMi. Amen

5.    Marende sian BE.No.172: 1-2  “O Jesus Panondang”                     BL.143

       ♫  O Jesus panondang Di portibi on; Mula ni na torang Tangi hatangkon

             Sai asi rohaMu Di pardosa on; Ho ma mangapuli au na marsak on

--- jongjong ----

      ♫  Sesa ma dosangku Ale Tuhanki; Ala ni mudarMu Na nilehonMi

           Asal ma rohangku Salelengna i; Ingot di hansitMu Dohot mudarMi

6.    Tangiang Manopoti Dosa:

L    : Dibagasan unduk ni rohanta di Pesta Peresmian Gedung Serbaguna    HKBP Depok I, atik marlaok dosa hita laho pajongjong Gedung serba guna on, ala ni i tama hita manopoti dosanta tu adopan ni Debata:Tuhan Debata, Amanami, Parasiroha na sumurung! Na pungu do hami di joloM martangiang tu Ho; ndada mangasahon hatigorannami, na mangasahon asi ni rohaM na godang i do.

R    : Sai asi ma rohaM mida huriam nang sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, Sipangolu hami.

L+R  :  Amen

SL  :  (mangendehon) BE. No. 683: 1     “DiadopanMu Jesus”

                   ♫  Di adopanMu Jesus;  lea tutu do diringkon,

                        Dibaen godang ni dosangkon; di adopanMu Jesus.

L    :  Tabege ma hata bagabaga taringot tu hasesaan ni dosa! Satongkin do hutadingkon ho, alai papungu punguonHu ma ho muse marhitehite angka asi ni roha godang ! Tagan di parpiar ni murukHu hutabunihon bohingKu satongkin maradophon ho, alai marhitehite denggan basa saleleng lelengna asianHu ho, ninna Jahowa Sipalua ho. Hasangapon ma di Debata na di ginjang !

L +R : Amen!                                                        -------- H u n d u l ------

7.    Marende sian BE. No.651: 2   “Marpadan Do Au On Tu Debatangku”

♫ Marpadan do au on tu Debatangku; Tu Jesus Raja ni Huria i.

    Sai pangkeonku do nasa gogongku, Magaradoti huriaNa I,

    Tung ro pe haleaon ingkon huhabengethon.

    Mangogo pe angka ………

8.    Epistel : Epesus 1  3 - 14

L  : Epistel di Minggunta sadarion ima na tarsurat di Epesus 1 : 3 – 14, taja ha ma marsingkat sorin. Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, dibagasan Kristus.

R  : Ai dipillit do hita di bagasan Ibana andorang so ojak dope tano on, asa badia hita jala so hasurahan di adopanNa i, dibagasan holong ni roha.

L  : Ditodo hian do hita bahen anakNa marhitehite Jesus Kristus, asa tu Ibana, mangihuthon halomoan ni rohaNa.

R  : Asa tarpuji asi ni rohaNa na marmulia i, na niasihonNa tu hita di bagasan na hinaholonganNa i.

L  : Di bagasan Ibana dapot hita haluaon i, binahen ni mudarNa i, i ma hasesaan ni angka      pangalaosion, mangihuthon asi ni rohaNa na tarlobi i.

R  : Naung buas niusehonNa i tu hita mardongan hapistaran dohot habisuhon godang.

L  : Ai dipabotohon Ibana do tu hita tahi ni rohaNa, na buni hian mangihuthon halolomoNa, naung pinahotNa i di bagasan diriNa.

R  : Laho pasauthonsa di hagogok ni tingkina, mandok: Pasadahon di bagasan Kristus i sasudena, na di banua ginjang dohot na di atas tano on.

L  : Ai dibagasan Ibana do dapotan partalian hita angka naung tinodoNa hian marguru tu tahi ni na patulushon sasude, mangihuthon pandok ni rohaNa.

R  : Asa tarpuji hasangaponNa marhitehite hita, angka naung manghirim hian di Kristus i

L  : Di bagasan Ibana dohot hamu umbege hata hasintongan i, i ma Barita na Uli na taringot tu haluaonmuna, jala di bagasan Ibana gabe porsea hamu, laos di sahaphon do tu hamu Tondi Parbadia na pinarbagabaga i.

R  : Ibana do patujolo ni arta siteanonta, bahen haluaon ni na hinophopNa i, asa tarpuji hasangaponNa i.

L  : I do sahatna ! Martua do angka na tumangihon Hata ni Debata, jala na umpeopsa

L+J : Amen!

9.    K o o r :  Seksi Parompuan HKBP Depok 1

10.        Marende sian BE. No.462: 1 + 3   “Ale Tondi Parbadia”           BL. 311

♫ Ale Tondi Porbadia, sai songgopi hami on.

    Rohanami ma paria lao mamuji Ho tongtong.

    Ho tongtong, Ho tongtong, lao mamuji Ho tongtong.

----- Jongjong -----

                   ♫  ApiMi sai lam pagalak, sondang di na holom i.

                       Asa las, tiur ma halak. Lam pita huriaMi.

                       Lam pita, lam pita. Lam pita huriaMi.

                       

11.        Manghatindanghon Haporseaon:

L  : Tahatindangkon ma haporseaonta i, songon na hinatindangkon ni donganta di sandok portibion rap ma hita mandok:

J   : Ahu porsea ……dst. Amen                                           ------- H  u n d u l------

12.        T i n g t i n g :

13.         Marende sian BE. No. 691 : 1 – 6   “Hupasahat ma tu Jesus” (P.Pelean)

♫ Hupasahat ma tu Jesus saluhutna ngolungki,

         Roha nang pambaenanku saluhutna tingkingki

         Hupasahat ma tu Jesus saluhutna diringki,

         Hupasahat ma tu Jesus saluhutna ngolungki.

     ♫ Pangkeonku ma tanganku, mangula lomoNa I,

         Langka nang simanjojakku mangihuthon Tuhanki.

         Hupasahat ma ………

------- M u s i k -------

   

      ♫ Nang pamereng ni matangku, mandompakkon Jesus,

          Soara ni pamanganku, mamuji goarNa i.

          Hupasahat ma ………

     ♫  Dung huida Tuhan Jesus, hutundalhon dosangki,

          Lohot rohangki tu Jesus, Sipalua tondingki.

          Hupasahat ma ………

------ M u s i k -------

     ♫ Tarhalomong do rohangku dipandok ni Tuhanku,

         Ale-ale ni Tuhanku, au di goar Jesus i.

         Hupasahat ma ………

    ♫  Mauliate ma rohangku, ala au hinophopMi,

         Pujionku ma goarMu, salelengna i.

         Hupasahat ma ………

------- M u s i k -----

14.         J a m i t a : Amos 7 : 7 – 15

15.         Marende sian BE. No. 701: 1 – 3   “Tu Ho do au marpadan”

        ♫   Tu Ho do au marpadan O Jesus Tuhanki,

Asa burju haposan au di adopanMi,

Sai Ho ma mandongan ni au di ulaonki.

Ajari pargogoi ma hu di dalanki

        ♫   Baen ma pangkilalaan di au O Tuhanki,

Donok do Ho O Tuhan mandopang musungki.

Ragam do pangunjunan dihasiangan on,

Ho partanobatoan di paraloankon.

------ M u s i k ------

         ♫  PadanMu ale Jesus tu angka ruasMi,

Luhut do toguonMu tu hasangaponMi,

Padanku pe O Jesus satia au tu Ho,

Sai pargogoi ma au, lao mangihuthon Ho.

16.        P A R S U  R U O N   :  (  J o n g j o n g   )

Ephorus : Hamu angka na hinongkop ni Tuhanta, nunga di jalo hamu hata ni Debata na gabe bohal di partondion. Debata do mamillit hita jala marpadan Ibana dohot hita. Antong marpangalaho sisean ma hita angka na marpadan dohot Debata laho patuduhon holongNa tu ganup halak. Ai dilehon Debata do angka pasupasu na godang molo  sai  tatangihon Ibana jala molo sai taulahon hataNa.

Ruas      : (mangendehon) BE. 792:1  “Pasu-pasu hami O Tuhan”

                         ♫    Pasu-pasu hami O Tuhan sai usehon dameMi

                                Sai ampehon tanganMi Tuhan, lehon tu au gogoMi

                                Di portibi on baen ma au Tuhan habaoran ni las ni roha

                                Tu na marsak i tu na dangol i gabe pangapuli i

                                Pasu-pasu hami O Tuhan sai usehon dameMi

                                Sai ampehon tanganMi Tuhan, lehon tu au gogoMi

Ephorus : Hamuna angka na hinaholongan, Huria HKBP Depok 1on na marpesta peresmian Gedung Serba Guna ni hurianta sadarion. Mangolu ma hamu dibagasan holong dohot sada ni roha! Patuduhon ma haporseaonmuna laho mangaradoti haholongon huhut pajongjong hatigoran. Laho ma hamu gabe panondang dohot sira tu tongatonga ni portibion mamboan haluaon tu ganup halak. 

Ruas       : (mangendehon) BE. 792: 5  “Pasu-pasu hami O Tuhan”

                        ♫  Pasu-pasu hami O Tuhan sai usehon dameMi

                             Sai ampehon tanganMi Tuhan, lehon tu au gogoMi

                             Diportibion baen ma au O Tuhan, sipajongjong hatigoran

                             Pargogoi ma au, raphon HuriaM, patupahon na denggan

                             Pasu-pasu hami O Tuhan sai usehon dameMi

                             Sai ampehon tanganMi Tuhan, lehon tu au gogoMi

17.         Tangiang Pelean  + Pasupasu !

III. ACARA RAMAH TAMAH

Bahan Jamita Minggu IV Dung Trinitatis, 12 Juli 2015

Tumangihon Jala Mangoloi Panurirangion NI Jahowa

Amos 7 : 7 – 15

a.       Molo na sintong do hita di adopan ni Jahowa, aha do na ninida ni Debata molo papataronNa marhite tali rambu na marpungga di bagasan tanganNa di bagasan ngolunta ? Naung ditotophon Ibana do tu hita ‘talii rambu’, asa marhite i, ngolunta di patigor sintong hombar tu hasintongan dohot habonaronNa. Sude angka parange nang pangalahonta ndang hahuphupan manang ditabunihon marhite angka partangiangonta. Naung adong do di Tuhan i ukuran taringot tu hasintongan ni ngolunta asa ndang adong na boi manghuphupi dirina nang pangalahona marhite partangiangonna na so marhite hasintongan nang hatigoranNa.

b.      Marhite haporseaon tu Jesus Kristus, ngolu ni hajolmaon dipabangkit jala dipauliuli marhitehite hasintongan dohot hatigoran ni Debata. Asa hita naung dipauliuli di atas ni dasor asi ni rohaNa na pahehehon hita sian huaso ni dosa asa gabe anak ni Debata na badia hita, jala  dilehon tu hita habisuhon dohot pangantusion di hasintonganNa i. Asa mangolu hita ndada gabe songon jolma na naeng siuhuman, alai gabe jolma na dipalua Tuhan i. Ala ni i hangoluanta ndada laho pahehe rimas ni Debata, alai gabe pujipujian dohot hamuliaon ni GoarNa.

c.       Marguru ma hita sian dua tokoh dii turpuk on ima si Amos dohot si Amasia. Dipardalanan ni ngoluna na mangula do si Amos hombar tu lomo ni roha ni Debata, alai si Amasia ima malim di Betel alai na mangula do ibana dihuaso ni haportibi on. Hangoluan ni jolma di portibi on songon hitehite ni Debata laho papatarhon hasintongan dohot hatigoranNa ndada gabe hitehite ni portibi nang sibolis pe na mambahen rimas ni Debata. Dipaingot do hita asa gabe pananginangi dohot pangoloi di Hata nang panurirangon ni Debata. Songon topik ni minggunta: “Tumangihon Jala Mangoloi Panurirangon Ni Jahowa”naeng ma hita ndada gabe pananginangi Hata ni Debata alai dohot ma gabe pangoloi. Songon Jesus Kristus Anak ni Debata, nang pe maol naung sinuriranghon Jahowa taringot tu Ibana ndnag manulak ibana, alai baliksa gabe pangoloi do Ibana sahat tu hau pinarsilang i. Asa marhite na porsanonna dosanta malua hita jala marlas ni roha hita. Nang hita pe angka siihuthon Kristus naung gabe angka anak ni Debata asa ringgas hita tumangihon dohot mangoloi panurirangon ni Jahowa, asa marhite i laho patulushon sangakap ni Jahowa ditonga portibi on siboan hatigoran dohot hasintongan ni Debata. Amen.

Bahan Jamita Epistel Minggu VI Dung Trinitatis, 12 Juli 2015

Tumangihon Jala Mangoloi Panurirangon Ni Jahowa

Efesus 1: 3 – 14

a.       Ia Buku Efesus ima sada sian angka surat na digurithon Apostel Paulus sian hurungan (penjara) ala ni haporseaonna tu Kristus (Ef.3:1; 4: 1; 6: 20); kemungkinan besar di Rom do ibana dihurunghon hira 2 taon (Ul.Ap.28: 30), ala ni i jotjot do didok surat on “surat kiriman penjara”. Nang pe dipenjara ibana, tongtong do dipatuduhon ibana parsihohotanna, las ni rohana, panghirimonna dohot holong ni rohana tu Debata dohot tu Huria i. Tarida do i sian pandohanna di surat on, na so adong di ibana pandelean dohot sumurut sian haporseaon tu Tuhan Jesus. Maksud ni si Paulus manurathon surat on, tontu do laho pahothon panjouon, pamilliton ni angka na porsea, angka na badia (huria i) na ro sian hasipelebeguon marhitehite Kristus i, jala pabotohon hinaarga ni  pamilliton i marhitehite Kristus, sian asi ni roha ni Debata. Hahotan ni panjouon ni Debata tu si Paulus dipatuduhon do i marhite turpukta on, nang pe dibagasan hurungan ibana alai boi do ibana margogo jala marsihohot mamuji Debata. Turpukta on ima uraian doxologis {bahasa Yunani: doxa - "pujian" dan logos - "firman" atau "berbicara"; adalah sebuah himne pendek yang digunakan di pelbagai kebaktian Kristen, seringkali dinyanyikan pada akhir kebaktian} taringot hagogok ni haluaon  ni Debata dibagasan Kristus. Marhite doxologi manang pujipujian i dihatindanghon apostel Paulus do:

1.       Asi ni roha ni Debata na mamillit hita dibagasan Kristus; Asi ni roha ni Debata do patauhon jolma i gabe panean di harajaon-Na. Ai nunga dibagasan gomgoman ni dosa hian sude jolma, hinorhon ni angka pangalaosion. Alai di bagasan Kristus, na Hinaholongan-Na i, gabe ias jala so hasurahan do ganup na porsea di Ibana. Sude jolma do ditodo Debata bahen Anak-Na. Alai na tutu tarpillit gabe anak di harajaonNa, i ma angka na porsea di Tuhan Jesus Kristus (ay.4-5). Na manjalo huaso ha-anahon, manean harajaon-Na i, i ma angka na mangihuthon hata-Na, angka naung pinarbadiaan ni mudar ni Jesus Kristus (Joh.1:12). Manang ise na porsea di hasesaan ni dosana marhite mudar ni Tuhan Jesus, tarrajum do naung manjalo pasupasu partondion. Ai ndada sian malomalona, manang sian gogona, manang jinou ni tuana i umbahen dijalo, tung ala ni asi ni roha ni Debata na marmulia i do (Ep.2:8-9). Tung halongangan do pamilliton ni Debata di hita so ala ni halobian (keistimewaan sian angka na so hona jou dope. Ala ni i, tama do angka na porsea i mamuji Debata ala ni asi ni roha-Na di bagasan Kristus. Diigl do sian angka na jinou jala na pinillitNa i asa mangolu dibagasan holong dohot parange na so hasurahan.

2.       Haluaon dibagasan Kristus; Manang ise na ro tu Tuhan Jesus, manggundukkon pambahenananna na so tama, jala olo paubahon rohana, sai dapotsa do haluaon sian asi ni roha-Na. Dihuphupi holongNa na songkal i doo sude dosa ni angka na ro manopoti dosana ( 1 Joh. 1: 9). Holan Kristus do na marhuaso manghuphupi dosa ni jolma na manolsoli jala paubahon rohana. Ai Ibana do naung mangusehon mudar-Na bahen hasesaan ni dosa ni angka na porsea. Asa ndang adong haluaon sian na asing, tung holan dibagasan Kristus do (Ul.4: 12). Dibagasan Kristus do adong haluaon. Ingkon masuk ma hadirion ni jolma i tu bagasan holong ni roha-Na na bagas i. Gabe ndang be tarida hadirion (ego) ni sada halak molo dibagasan Kristus ibana. Hadirion ni Kristus tama ma tarida di ngolu ni halak naung masuk tu bagasan holong ni roha-Na (Gal.2: 20). Buas do roha ni Jesus mangusehon holong-Na. Diusehon do holongNa i mardongan hapistaran dohot habisuhon godang. Lapatanna, dipapatar do holong-Na i marhite pangantusion na tangkas taringot tu uhum dohot asi ni roha na pangoluhon. Ai ingkon hona uhum do ganup na mangulahon dosa, ndang adong na malua sian hamatean angka na mangulahon hajahaton (Rom 6: 23; Amos 9: 10). Alai  humophop hita gabe dosa do Ibana, na so tumanda dosa, asa gabe hatigoran ni Debata hita di bagasan Ibana ( 2 Korint 5 : 21). Lapatanna, Jesus do mamorsan uhum na patut jaloon ni pardosa i hian, asa malua ganup na porsea di Ibana.

3.       Dipasada do angka na pinilitNa i; Dipabotohon do tu hita tahi ni rohaNa, tahi na buni hian mangihuthhon halolomona, naung dipahotna dibagasan diriNa. Tahi na sian lomo ni rohaNa, i ma naeng malua sian hamagoan; dosa jolma i, unang be hita diparhatoban sibolis i, na mamboan tu hamatean na saleleng ni lelengna. Asa marparange jolma i dibagasan ngolu na imbaru songon Kristus Jesus. (ptds. BE. No.543:1-5). Dipasada do angka na pinillitNa i dibagasan Kristus. Kristus ma pardomuanta, disi ma hita sada marhitehite pandidion, asa ndang be nirahutan manang pinasada ni mudar nang marga, suku alai nunga mudar ni Kristus i (Gal.3: 26-28). Kristus ma partalianta tu Debata dohot tu donganta jolma naung tinodoNa, jala naung disangkapi Debata hian do. Ndang pardomuan ala ni kepentingan pribadi, kelompok dohot cita-cita ni hajolmaon umbahen na sada hita di bagasan Kristus. Alai ala ni mudar ni Kristus Jesus do asa saluhut hita ndang holan na mamingkirhon dirinta be, dohot do  nang dihumaliangta. Marhitehite hita naung pinilitNa, patar ma hasangaponNa di tongatonga ni portibi on (huria, masyarakat dohot bangso). Gabe sira dohot panondang ditongatonga ni angka bangso na so tumanda Tuhan Jesus (Ptds. Mat.5: 13-14). Marhitehite na manghangoluhon barita na uli, gabe idaon ni halak saluhut habasaon, habasaron, parange na denggan, asa marhite angka ulaon na denggan i, patar ma holong ni roha ni Debata di angka donganta na berbeda suku, luat dohot ugamo na asing (ptds. 1 Ptr.2: 12-15). Tarpuji ma hasangaponNa marhitehite hita naung tarpillit i angka naung manghiirim di Kristus i.

4.       Dipasahat do TondiNa ima Tondi Parbadia; TondiNa i ma na mandongan i hita na binagabagahonNa i tu hita, pahothon haporseaon huhut mangapuli angka na porsea i. Tanda jaminan na so dipasombu Debata angka na porsea, jala patujolona nunga dipasahat tu hita, i ma Tondi Parbadia. Tondi Parbadia ma na gabe pahothon panghirimonta, laho manuturi dohot mandongani angka na porsea i, paima sahat hita tu hasangapon sogot (ptds. Rom 8: 14-17). Tondi Parbadia do dilehon patujolo ni arta siteanonta. Tondi Parbadia laho manogihon hita tu haluaon na pinatupaNa, asa tarpuji hasangaponNa.

b.      Lam godang do di tingki on  na mandondoni ngolu ni jolma, atik pe lam timbo teknologi paneanghon angka ulaon siganup ari. Torop do na tarihot tu materialisme, konsumerisme, dohot egoisme laho manggohi hagiot ni rohana. Sipata pola sahat tu na menghalalkan segala cara, so pola parduli manang na gabe korban halak di angka usaha na pinatupana. I ma halak na mangasahon gogo, pingkiran, dohot materi laho mangeahi hasonangan. Molo songon i ndang saut dope diparsaulihon haluaon i, tarihot dope halak i di hagogoon dohot haulion portibi.

c.       Nian ringkot do hahipason asa margogo mangula; ringkot do hapistaran laho mangantusi ulaon na tama; ringkot do hamoraon laho patulus sangkap na denggan. Alai saluhutna i ndang tau mangalehon haluaon sian dosa dohot hamatean. Ai dia ma gunana molo hipas jala togos pamatang hape marsahhit anggo rohana ? Dia ma gunana molo pistar jala tardok pakar sada halak ianggo rumar tondina ? Aha ma gunana nang saluhut portibi on diomo (Mat. 16: 26) anggo sian hajahaton saluhutna diomo ? Songon dia ma tarbahen halak i marende dohot marlas ni roha ? Gariada talpe uhum dohot hamatean di angka halak na mangalului haluaon sian portibi on! Alai rade do pasupasu dohot haluaon di angka halak na marsihohot manghaholongi Tuhan Jesus. Manang ise na manghaholongi dongan songon diriniba sandiri. Anggo hapistaran portibi  mandok ingkon taluhonon jala pasision do dongan asa dapot pangomoan dohot las ni roha. Angka na holit, pangotootoi jala na marroha diri i do na marbisuk didok portibi on. Alai hapistaran dohot habisuhon na sian Debata mandok; molo male musum lehon ibana mangan, molo mauas lehon ibana minum (Mat. 25: 34-40). Haluaon dohot las ni roha na manongtong i do dihasiholi angka na manghaholongi Tuhan Jesus.

d.      Topik ni minggunta mandok : “Tumangihon Jala Mangoloi Panurirangon Ni Jahowa”, asa angka na tarjou, na tarpillit do hita di angka ulaonta be laho papatarhon holong ni roha ni Debata; mangulahon na hinalomohon ni Debata di angka ulaonta, fungsinta be; Ama, Ina, ianakhon tarjou laho manghobasi ulaon na denggan dibagasan haserepon, hatuluson, dohot pangoloion ala ni haporseaon, songon pangoloion ni Jesus Kristus tu Debata Ama i sahat tu hau pinarsilang. Dilehon do tu hita hahipason, hapistaran, habisuhon na sian Tondi Parbadia i, asa taboto manimbangi di lomo ni roha ni Debata. Alai ndang gabe ginjang ni roha, manang kesombongan rohani di hita, alai gabe toruk ni roha (kerendahan hati), ai silehonlehon do i di  hita. Laos gabe i ma na mangonjar rohanta ungkap laho patupahon angka ulaon asi ni roha dohot marpanindangion tu saluhut halak (Gal.6:9-10). Amen.

PARTONDING NI ACARA

IBADAH RAYA PAROMPUAN HKBP DISTRIK XXVIII DEBOSKAB 2015

Tema : “Kita Satu Dalam Kristus” (Galatia 3 : 28c)

Sub Tema: “Perempuan HKBP Dipanggil Menjadi Pelopor Pembaharuan, Perdamaian, Dan Pemberdayaan Keluarga, Gereja, Dan Masyarakat”

MINGGU, 14 Juni 2015

Di Gedung Bagas Raya - Cibinong

Masuk : Pukul 09.00 Wib – Selesai

I. P R O S E S I :

v  Jam 08.40 Wib, prosesi pandita, parhalado, panitia dohot utusan ressort mamasuhi bagas parmingguon, jongjong ma sude ruas di iringi Musik !

v  Jongjong ma sude rombongan prosesi pasahathon horas horas, dung i hundul ma rombongan prosesi tu hundulanna be jala laos hundul ma ruas.

v  Hata patujolo sian Ketua Panitia Taon Parompuan HKBP Distrik 28 DEBOSKAB : Ny. Sihar Dame Simatupang br. Rajagukguk

II. P A R M I N G G U O N

1. JOUJOU MARSOMBA MAMUJI DEBATA:

(P: Paragenda ; SL : Song Leaders ; R:Ruas)

P    :  Huria ni Tuhanta na hinaholongan di bagasan Goar ni Tuhanta Jesus Kristus. Marpungu do hita sadarion di inganan on marminggu mamuji dohot pasahathon hamauliateon ni rohanta tu Debata parholong roha i. Di taon 2015 on, ima Taon Parompuan ni Hurianta HKBP hatopan. Na tarjou do angka parompuan songon kategorial ruas ni huria na missioner di hurianta HKBP nang tu humaliangna, jala mangolu dibagasan asi ni rohaNa. Tahirim do napasidohot parompuan manumpahi ulaon pararathon Barita Na Uli i di luat on tarlumobi di Distrik 28 DEBOSKAB. Ala ni i do di las ni rohanta sadarion tapatupa do pesta parheheon Parompuan di distrikta laho manghamauliatehon saluhutna pambahenan ni Debata di huriaNa. Antong sian tanda las ni rohanta tapuji ma ibana dibagasan las ni roha.

R   :  (mangendehon) BE. No. 565: 11  “Las Rohangku Lao Mamuji”

         ♫ Las rohangku lao mamuji Debata Parholong i

             Songon bunga na mangerbang di na binsar ari i

             Arsak, dosa, haporsuhon mago dibaen asiMi

             Las ni roha na manongtong lehon di au Tuhanki

P    :  Sadarion di Pesta Parheheon Parompuan HKBP Distrik 28 DEBOSKAB, na ro do sude utusan angka parompuan ni hurianta di Distrik DEBOSKAB asa rap do hita dohot angka naposo ni Tuhanta na marhaladoi di hurianta. Asa las ni roha bolon do na itajalo sadarion, boi hita marsada jala mangolu dibagasan holong ni roha. Antong tapuji ma Ibana.

R   :  (mangendehon) BE.No. 565: 2+ 4    “Las Rohangku Lao Mamuji”

         ♫ Sude jadijadianMu, laut, tano, langit i

             Angka bintang dohot bulan nang mata ni ari i

             Hauma, ladang, nang harangan, rura dohot dolok i

             Saluhut na mangendehon sangap di Tuhanta i

--------- J o n g j  o n g --------

         ♫ Rap ma hita mangendehon, sangap di GoarNa i

            Tapangiar soaranta lao mamuji Tuhan i

            Sun do holong ni rohaNa na so marnamontok i

            I do pasadahon hita salelenglelengna i

2.   V O T U M – I N T R O I T U S :

P    :  Dibagasan las ni roha di Pesta Parheheon Parompuan HKBP Distrik 28 DEBOSKAB on, tapungka ma parmingguonta dibagasan Goar ni Debata Ama, dohot Goar ni AnakNa Tuhan Jesus Kristus dohot Tondi Parbadia. Amen!

         Songon on ninna Tuhan Jahowa: Ianggo halak partigor i mangolu do binahen ni parsihohotna marhaporseaon; alai anggo di halak parjahat ndang adong hasonangan. Haleluya!   

R   :  (mangendehon) Haleluya! Haleluya ! Haleluya!

P    :  Martangiang ma hita! Ale Tuhan Debata jala Amanami ! Sai urupi ma hami, asa unang mandele hami, uju ro hapogoson tu hami, jala asa unang magopo hubahen hami silehonlehonMu na denggan i, uju ro pasupasuM tu hami. Ramoti hami, asa unang marpos ni roha hami tu arta na di hasiangan on. Lehon di hami haporseaon asa dohot hami parjambar di siteanon ni angka na porsea di Ho marhitehite Tuhan Jesus Kristus, Tuhannami. Amen

                                     ---------H u n d u l---------

3. K O O R :   a. Gabungan PPD 28 DEBOSKAB

                        b. Gabungan Ina Hanna Distrik 28 DEBOSKAB

4. MARENDE BE. No. 559 : 1  “Debata na songkal jala na badia”

     ♫  Debata na songkal Sitolu sada, Di songot ni ari hupuji GoarMi,

          Debata na songkal Siparasi roha; Si Tolu sada, Na badia i. A m e n.

5.  P A T I K   N I   D E B A T A  :

P    :  Patik ni Debata di minggunta di  Pesta Parheheon Parompuan HKBP Distrik 28 DEBOSKAB sian Patik I – X : Patik Naparjolo; Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.

R    :  Patik Paduahon ; Ndang Jadi ganaonmu jala ndang jadi sumanonmu manang aha na di banuaginjang dohot na di banuatonga on ro di na di bagasan aek na di toru di tano, ianggo tung gabe sisombaon manang sioloan.

P    :  Patik Patoluhon ; Ndang jadi dohonon Goar ni Debata, ianggo so ture dalanna, ai hona uhumNa do sogot angka na marsineang di GoarNa.

R    : Patik Paopathon; Ingot hamu ma pabadiahon ari minggu! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anakmu pe, manang borum, manang naposom lahilahi, manang naposom boruboru, ro di pinahanmu ro di pangisi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina: dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadia i.

P    : Patik Palimahon; Igkon pasangaponmu do natorasmu asa martua ho, jala leleng mangolu di tano na nilehon ni Jahowa Debatam di ho.

R    : Patik Paonomhon; Unang ho mamunu

P    :  Patik Papituhon; Unang ho mangalangkup

R    :  Patik Paualuhon; Unang ho manangko

P    :  Patik Pasiahon ; Unang ho olo manghatindanghon hata na so tutu maralohon dongan jolma.

R    :  Patik Pasampuluhon; Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru, manang lombuna manang hodana, manang dia pe ugasan ni donganmu.

P    :  Beha do pandok ni Debata taringot tu patik na sampulu i? On do ; Dipalumba  Debata do hita disi didok do pinsangonNa nasa na mangalaosi patikNa i. Dibahen i tama do dihabiari rohanta rimasNa, unang ma nilaosan patikNa. Alai diparbagabaga do asi  ni rohaNa, angkup ni i nasa na denggan di angka na so mangalaosi patikNa. Dibahen i tama ma haholongan ni rohanta dohot haposan ni rohanta Ibana, jala las rohanta mangoloi patikNa.

         Antong rap mangido gogo ma hita tu Debata laho mangulahon patikNa i ! 

P+R: Ale Tuhan Debata! Sai pargogoi ma hami mangulahon na hombar tu PatikMi. A m e n!

6. K O O R :   a. Ressort Depok

                         b. Ressort Bogor

7. MARENDE BE.No. 829 : 1   “Patik na imbaru”

      ♫   Patik na imbaru hulehon tu hamu asa masihaholongan, (-----Jongjong----)

            Hamu sama hamu, songon holong ni rohangku maradophon hamu.

            Sian on do di tanda halak hamu siseanHu molo hamu masihaholongan,

            Sian on do tandan halak hamu siseanHu molo hamu masihaholongan.        

8.   TANGIANG MANOPOTI DOSA :

P    :  Hamuna na hinaholongan di bagasan Jesus Kristus! Sadarion tahamuliatehon do Pesta Parheheon Parompuan HKBP Distrik 28 DEBOSKAB. Alai ingkon taparhatopot do dirinta angka halak pardosa. Ala ni i dibagasan unduk ni roha tatopoti ma dosanta na godang i tu adopan ni Debata.

SL  :  (mangendehon) BE. No.  683: 1  “DiadopanMu Jesus”

         ♫   Di adopanMu Jesus lea tutu do diringkon

              Dibaen godang ni dosangkon di adopanMu Jesus

P    :  Ale Amanami jala Debatanami na di Banuaginjang. Parasiroha na sumurung mida hami! Huparhatutu jala hutopoti hami do dosa dohot pangalaosionnami na godang i di joloM. Tatap hami marhitehite asi ni rohaM, jala sesa ma dosanami saluhutna, ala ni panghophop ni Anak haholongan ni rohaM, Tuhan Jesus Kristus, Sipangolu hami.Amen!

R    :  Alai jotjot do hami manimbil sian dalanMu na sintong i. Sipata maol do hami patuduhon holong na sian Ho. Jotjot do hami mangulahon dosa. Hupangasahon hami do utohutok nami sandiri. Sipata mandao do hami sian dalanMu. Lupa do hami di sude pasupasu na nilehonMi tu hami. Ale Tuhan, nunga mardosa hami, asi ma rohaM, sesa dosanami, ai jotjot do hulupahon hami hataM.

SL  :  (mangendehon) BE. No. 683: 2  “DiadopanMu Jesus”

         ♫  Di adopanMu Jesus marsomba au huhut tungki

              Lao manopoti dosangki diadopanMu Jesus

P    :  Dipajongjong Debata do huriaNa tu tongtonga ni portibion na mansai gok dosa dohot hajahaton. Marhite angka parompuan songon ruas di huriaM HKBP di Distrik 28 DEBOSKAB on, di suru Ho nasida pararathon hataM asa lam tamba bilangan ni angka parompuan nang halak na porsea jala marsihohot tongtong tu Ho. Marhite HataMi, naeng mangolu hami ganup ari di ngolu na imbaru. Bagasna i, antong, hamoraon, hapistaran dohot parbinotoanMu. Na so hasigatan do angka uhumMu jala na so habogasan do angka dalanMu.

SL  :  (mangendehon) BE. No.  683: 3  “DiadopanMu Jesus”

            ♫  Di adopanMu Jesus tarsolsol bagi rohangkon

                Muba ma au tu jolo on di adopanMu Jesus

R    :  Jotjot do ndang huhaporseai hami HataM na gabe sitiopon nami. Asa gabe madabu do hami tu hajahaton, hatop do hami mandele dohot mabiar. Lemba do hami ro tu angka parpunguan ni HuriaM, sipata bangkol do rohanami ro tu parmingguan laho manangihon hataM i. Asa gabe gumodang do hami dipengaruhi angka teori teori jaman na lam maju on. Lupa do hami di habisukon na sian Ho i. Ndang huhamauliatehon hami hataM na hubege hami, asa lam hurang do holong nami nang tu angka naposoM. Gabe hubereng hami do angka ulaon nasida i, songon kewajiban sambing. Lupa do hami manghamuliatehon saluhutna tu adopanmu. Ale Tuhan asi ma roham di hami.

SL  :  (mangendehon) BE. No.  683: 4  “DiadopanMu Jesus”

         ♫   Di adopanMu Jesus taruli au di asiMi

              Tu Ho ma sahat diringki di adopanMu Jesus

P    :  Hadirion ni Huria songon pamatang ni Kristus di portibion, ima laho pasauthon panjouon ni Debata. Di suru do hita tu portibi na gok angka sahit, isarani sahit sosial na lam ragatna di masyarakat. Asa tarjou do hita mamboan las ni roha tu angka halak, gabe parasiroha songon Ibana parasiroha i! Hita do parhitean ni Debata laho pasahathon sangkapNa laho mangurupi angka na marsahit, na pogos, na dangol dohot angka na marsitaonon. Aha do naung tabahen? Tarlumobi angka parompuan ni hurianta HKBP di Distrik 28 DEBOSKAB on? Ingkon jujur do hita, mansai godang dope  na so boi taulahon. Ndang marsitutu hita di panjouonta i.

R    :  Ale Tuhan, nunga mardosa hami. Marpamuati ma rohaM dihami, sesa ma dosanami i, ai jotjot do hami holan hata di ngolu nami. Pargogoi ma hami jala jangkon ma hami gabe siseanMu. Ramoti HuriaMi asa gabe pasu pasu i  tu humaliang hami.

SL  :  (mangendehon) BE. No.  683: 1  “DiadopanMu Jesus”

         ♫   Di adopanMu Jesus lea tutu do diringkon

              Dibaen godang ni dosangkon di adopanMu Jesus

P    :  Tabege ma hata bagabaga taringot tu hasesaan ni dosa! Munsat pe angka dolok, jala   humuntal angka robean, alai anggo parasi ni rohangKu na so tupa munsat sian ho, jala padan ni hadameonKu na so tupa humordit, ninna Jahowa Siasii ho. Hasangapon ma di Debata na di ginjang!

P+R: A m e n !                                                --------H u n d u l--------

9. K O O R  :   a. Ressort Cibinong

                          b. Ressort Cimanggis

10. MARENDE BE. No. 411: 1   “Nang pe rara dosamu”   BL. 274

             ♫    Nang pe rara dosamu ias dibaen mudarhu  (2x)

                    Na dapdap songon hasumba songon itak do

                    Nang pe rara dosamu, nang pe rara dosamu

                   ias dibaen mudar hi, ias dibaen mudarhu

11. K O O R :   a. Ressort Depok Timur

                           b. Ressort Villa Duta Bogor

12. E P I S T E L  :  Markus  4 : 26 - 34

P    :  Turpuk epistel di minggunta sadari on ima na ni enet sian Markus 4: 26 – 34, tajaha ma marsingkat sorin: Dung i didok ma: “On ma pangalaho ni harajaon ni Debata: Songon pambahen ni halak na manaburhon boni tu haumana.

R   :  Na modom do ibana bornginna jala dungo ia arianna; na martumbur do angka boni i laos laos marbuhutano, so pamotoan ni parhauma i.

P    :  Ai sian gogona sandiri dipatubu tano i jumolo hauna, dung i biurna, dung i eme na porngis i di bagasan biurna i.

R   :  Alai disi dilehon parbuena, mamintor disuru  ma panabi, ai nunga ro gotilon.

P    : Dung i didok ma: “Tu aha ma pasumanonta harajaon ni Debata; tu dia ma   umpamahonta?

R   : Suman tu batu ni siarum ma. Ai borngin na sinaburhon tu tano, i do na ummetmet sian nasa batu ni suansuanan.

P    : Alai dung sinaburhon, simbur ma i tubu, gabe tumimbo sian nasa ingkau rata jala balga ma dangkana, pola tarbahen do pidong na martongatonga langit marasar di linggomanna i.”

R   : Jadi marhitehite lan umpama sisongon on dihatahon tu nasida hata i, marguru tu na tarjangkon nasida.

P    : Alai ndang adong dihatahon tu nasida so marhitehite umpama; alai pulik do dipatorang saluhutna tu siseanNa.

         Ido sahatna ! Martua do angka na tumangihon Hata ni Debata, jala na umpeopsa.

P+R:  A m e n !

13. K O O R :  a. Ressort Ebenezer

                         b. Ressort Sukatani

                        

14. MARENDE BE. 467:1+3  “Asi Ni RohaM hupuji”    BL. 315

               ♫  Asi ni rohaM hupuji ala Ho manobus au.

                    Dipaias Ho rohangku, gabe soranganMu au

                    Reff : IngananMu rohanami TondiMi manggohi i

                               Pangke dohot ngolunami gabe ulaulaMi

--------- J o n g j o n g---------

                ♫  Naeng huhatindangkon hami hagogoonMi tongtong

                    Paluahon na mardosa, nang parjahat na bolong.

                    Reff :  IngananMu ….

15. MANGHATINDANGHON HAPORSEAON :

P    : Tahatindangkon ma haporseaonta i, songon na hinatindangkon ni donganta sahaporseaon di sandok portibion, rap ma hita mandok:

R   : Ahu porsea ……dst. Amen                                             -------- H  u n d u l-------

16. K O O R  :   a. Ressort Cinere

                           b. Ressort Kirab Remaja

17.  Boaboa/ Sunggulsunggul :

18. K O O R :   a. Gracia

                          b. Pardihuta ni Pandita Distrik 28 DEBOSKAB

19. MARENDE BE. No. 826 : 1 – 3  “Gohi Au Tuhan”       (P.Pelean)

♫   Gohi au Tuhan marhite HataMi; Gohi au Tuhan marhite HataMi,

      Songon hudon na rumar do au Tuhan di sumurMi;

      Gohi au Tuhan marhite HataMi.

♫   Gohi au Tuhan marhite HataMi; Gohi au Tuhan marhite HataMi

      Na mauas do tondingku O Tuhan di HataMi;

      Gohi au Tuhan marhite HataMi.

------- M u s i k --------

♫   Gohi au Tuhan marhite HataMi; Gohi au Tuhan marhite HataMi

      Asa tang jala matoras au marhite HataMi;

      Gohi au Tuhan marhite HataMi.

20.  J A M I TA  :  Psalm 92 : 2 – 5 + 13 - 16      

21.  MARENDE BE. No. No. 361 : 1- 8  “Na Denggan Situtu Do”     BL.157        

      ♫ Na denggan situtu do mamuji Debata;                                      (P.Pelean)

         Jahowa na tumimbo Na sai tongtong basa

         Denggan do paboahon Manogot asiMi;

         Bodari mangendehon BurjuM nang sintongMi

     ♫ Mardongan sipiltihon Na denggan situtu;

         Naeng ma tongtong pujion Ni nasa na burju

        Ho Tuhan Debatangku Ai las ni rohangki;

        Do na tongtong binaenMu Di pambahenanMi

-------- M u s i k --------

   ♫  Ai jadijadianMu Mansai balga do i;

       Nang angka pingkiranMu mansai bagas do i

       Ndang dapot i tandaon Ni baoa na bodo;

       Ai holan sibotoon Ni na porsea do.

   ♫ Martumbur pe parjahat Di atas tano on;

       Sobokkon duhutduhut Ndang mian i tongtong

       Tompu do disiaphon Ho saluhutna i;

       Alai Ho do manongtong Ho na tumimbul i.

-------- M u s i k ---------

   ♫ MusuM, O Debatangku Sibaen na jahat i;

       I ma siaphononMu Marserak ma sude

       Alai patimboonMu Ma au naposoMon;

       Huhut pargogoanMu Mamuji Ho tongtong.

   ♫  Pamereng ni matangku Sombu ma baenonmi;

        Marnida hadadabu Ni angka alongki

        Au naeng agohononNa Hape na sundat do;

        Tinahi ni rohana O Tuhan dibaen Ho.

------- M u s i k -------

    ♫  Martumbur do partigor Tudoshon bagot i;

         Martunas do nasida Songon hau ares i

         Nasida na sinuan Di bagasjoro i;

         Do na marbungabunga Di alamanna i

    ♫  Sai tubu pinomparna Di na ubanon i;

         Margogo do nasida Di na martua i

         Girgir dibaritahon Na tigor Tuhan i;

         Na so marhageduhon Pambaenna sasude        

22. P A R S U  R U O N  :                                                          ------J o n g j o n g ----

Praeses:  Hamu angka nahinongkop ni Tuhanta, nunga di jalo hamu Hata ni Debata na gabe bohal di partondion. Debata do mamillit hita jala marpadan Ibana dohot hita. Antong marpangalaho sisean ma hita angka na marpadan dohot Debata laho patuduhon holongNa tu ganup halak. Ai dilehon Debata do angka pasupasu na godang molo sai taulahon hataNa jala molo  sai  tatangihon Ibana.

Ruas    :  (mangendehon) BE. 792:1  “Pasu-pasu hami O Tuhan”

                 ♫   Pasu-pasu hami O Tuhan sai usehon dameMi

                       Sai ampehon tanganMi Tuhan, lehon tu au gogoMi

                       Di portibi on baen ma au Tuhan habaoran ni las ni roha

                       Tu na marsak i tu na dangol i gabe pangapuli i

                       Pasu-pasu hami O Tuhan sai usehon dameMi

                       Sai ampehon tanganMi Tuhan, lehon tu au gogoMi

Praeses:  Hamuna angka na hinaholongan, Ruas ni Huria tarlumobi angka parompuan; Mangolu ma hamu dibagasan holong dohot sada ni roha! Patuduhon ma haporseaonmuna laho mangaradoti haholongon huhut pajongjong hatigoran. Laho ma hamu gabe panondang dohot sira tu tongatonga ni portibion mamboan haluaon tu ganup halak. 

Ruas    :  (mangendehon) BE. 792: 5  “Pasu-pasu hami O Tuhan”

               ♫  Pasu-pasu hami O Tuhan sai usehon dameMi

                   Sai ampehon tanganMi Tuhan, lehon tu au gogoMi

                   Diportibion baen ma au O Tuhan, sipajongjong hatigoran

                   Pargogoi ma au, raphon HuriaM, patupahon na denggan

                   Pasu-pasu hami O Tuhan sai usehon dameMi

                   Sai ampehon tanganMi Tuhan, lehon tu au gogoMi

23. TANGIANG PELEAN + PASUPASU   

III. ACARA PERAYAAN :

1. Melodrama : Parompuan

2. Makan Siang dengan doa oleh Pdt. Ermi Fier br.Silalahi, S.Th

3. Kata Sambutan :

v  Ketua PPD 28 DEBOSKAB (Ny. Normawati Sinaga br.Silaen)

v  Kabid Diakonia Distrik 28 DEBOSKAB (Pdt.Hantus Hutapea, S.Th)

v  Perwakilan Undangan

v  Bimbingan dan arahan Praeses Distrik 28 DEBOSKAB.

4. Parade Tortor Batak :

v  HKBP Depok I

v  HKBP Depok Timur

v  HKBP Cimanggis

5. Parade Busana Tenunan Adat Batak

v  Pengumuman Juara Lomba Busana

v  Penyerahan Hadiah

6. Pengundian Kupon Berhadiah, diselingi Vocal Group:

v  HKBP Depok I

v  HKBP Bogor Paledang

v  HKBP Villa Duta

7. Penutupan Acara dengan doa oleh Pdt.A. Manalu, S.Th

 SELURUH PENDETA, PARHALADO

&

PELAYAN, PANITIA TAHUN PAROMPUAN

HKBP DISTRIK  XXVIII DEBOSKAB

MENGUCAPKAN :

SELAMAT HARI MINGGU

Olophon Hatigoran-Na

Mars Tahun Perempuan HKBP, Tahun 2015

Olophon ma, tajangkon ma,

Hatigoran ni Tuhanta i.

Sai marnida haporseaonta.

Anggo rupa si panggohi do

I do hatigoran, na so jumpang hita

Di sude  panguhum portibi on.

Ndang mardia imbar dijolo Na,

Sada do diadopan Na i,

Ai  na tinobusNa, sude hajolma on,

Ala ni holong rohaNa i.

Dipabangkit sondang i, tu naholom,

Mangalehon gogo tu naga le i

Paluahon rante ni parhatobanon,

Dibalun angka na marbugang i

Ala ni hamu na dongan parompuan i

Sai tongtong ma hita marhiras ni roha i.

Ringgashon ulaon mu nang di HuriaNa I

Sai hehe ma, endehon  ma,  haleluya !

Sai hehe ma, endehon ma,  haleluya !

Olophon ma, tajangkon ma

Hatigoran ni Tuhanta i.

Amen.